- مبتردش على تليفونك ليه ؟
- مسمعتهوش .. ( رن الموبيل )
- ماهو بيرن اهو ..
- كنت قافل الصوت ولسه فاتحه كان فى حاجة يعني ..
- كنت برا و عاوزة أسألك تحب بامية ولا فاصوليا ع الغدا؟
- بجد ..
- ايوة ..
- ١٥ اتصال علشان تسأليني بامية ولا فاصوليا ؟
- ايوة ..اصلي احترت وكنت عاوزة اعملك الل بتحبه ..
- وعملتي ايه ؟
- الاتنين ...
- الاتنين .. طيب ماهى اتحلت ايه مكنش له داعي ال ١٥ اتصال ..
- ماهو انا لما مردتيش قررت بقي ..
- أنا داخل اغير هدومي ..
- والغدا هيكون جاهز ..
الاكل ع السفره:
- ايه رأيك؟
- حلو..
- حلو بس ؟!
- حلو اووي ..كويس كده ؟
- انت فى حاجة مضايقاك؟
- لا مفيش ..ممكن نأكل ..
سكتوا لحظة :
- ماما كلمتني وقولتلها احنا رايحين ل خالتك الجمعه ولو فى وقت هنمر عليها ..
- تمام ..
- محصل النور جه انهارده تخيل الفاتوره كام ..دا لسه والصيف مجأش بقوله ليه كده بيقول الزياده ع الكل ..
- تمام ..
سكتوا لحظة :
- شوفت ام زغلول عملت ايه مش هتصدق ؟!
حط المعلقة بعنف:
- ممكن كفايه من وقت ما دخلت البيت وانتى عماله تتكلمي وتحكي فلانه كلمتني شوفت حصل ايه شوفت عمل ايه ..فى ايه ؟
- فى ايه انت .. ما دا الطبيعي انا بحكيلك ع يومي زى كل يوم ..
- مش عاوز اسمع انهارده ..
لاحظت عصبيته :
- أنا..
- أنا شبعت..
قام ودخل البلكونة وهى شالت الاكل ودخلت المطبخ عملتله فنجان القهوة وخرجت للبلكونه وحطتها جنبه فى هدوء وخرجت، ساعتين قاعد فى البلكونه بعتتله رساله ع الموبيل :
- أنا زعلان مني فى حاجة ؟
شاف الرسالة وسكت وحس انه زعلها بعصبيته بص ع الساعة وكانت ١١ وميعاد نومها قرب، خرج من البلكونه يدور عليها وكانت فى المطبخ واقفه جنب براد الشاي ع البوتاجاز وسرحانه والمايه بتغلي، قرب منها وقفل النار :
- سرحانه فى ايه ؟
- لا مفيش ..انت عاوز حاجة ؟!
مسكها من ايديها وقعدوا :
- أنا آسف..
- أنا الل آسفة..
- حصل مشكله فى الشغل إنهاردة وقفلتني ..
- مكنتش اعرف ؟
- وأنا مكنتش هحكي، بس انتى ملكيش ذنب ومكنش ينفع اتعصب عليكي كده ..
- ماهو انت معودني احكيلك كل يوم الل حصل لما بترجع من برا ف انا كنت بتعامل طبيعي ولو كنت قولت انك مش فى المود كنت هسكت .. ف اسفه انى ملاحظتش دا ..
- يعني من زعلانه مني ؟
سكتت :
- مش هينفع تنامي زعلانه مني كده هحلم بكوابيس؟
- لا خلاص..المهم المشكله اتحلت ولا لسه؟!
- هتتحل ان شاء الله .. انتى كنتى بتعملي ايه ؟!
- شاي ..
- خليكي وهعمله أنا ..
- ماشي ..
عمل براد الشاي :
- هصبه انا بقي ..انت عملته وانا هصبه ..
- مقولتليش ام زغلول عملت ايه صحيح ؟
- اسكت، بتبيع رابطه الجرجير ب ٤ جنيه وفى السوق ب ٢ جنيه.. تخيل ؟!
- لا متوقع منها، ست استغلالية وانتى عملتي ايه ؟
- روحت السوق ماهو انا كنت بجيب الباميه وقتها ..
- ع فكره كانت حلوة اوي البامية ، حمصيلنا رغيفين بقي وسخنلنا طبق وعصره ليمون وفلفل ونتعشي ..
- عيوني ..
- بس ام زغلول استغلاليه اوي ..
- اوي اوي ..
مشاهد بقلمي #يارا_سمير
رأيكم
