- ايه الأخبار؟
- تمام ..وانتى ؟
- الحمد الله .. فينك كده طول اليوم؟
- مشغول شويا، ايه الدنيا معاكي
- طيب اسيبك دلواقتي ؟
-، انتى وراكي حاجة ؟
- لا انا قولت اكلمك أطمن عليك ؟
- أنا بخير يا حبيبي
- هو ممكن اسألك سؤال؟
- ايه ؟
- هو فى حاجة حصلت انا معرفهاش ؟
- لا مفيش ليه بتقولي كده ؟
- بقالك فتره متغير، مكالمات قليلة حتي الواتساب بتفتح الرسائل تاني يوم وصوتك فيه حاجة ؟
- لا مفيش هو ممكن ضغط شغل بس
- ضغط شغل .. طيب
- متشغليش دماغك بيا
- يعني ايه مشغلش دماغي بيك اومال اشغلها بمين ؟
- أنتي اتعصبتي كده ليه ؟
- ماهو شوف انت بتعمل ايه ؟
- أنا مبعملش حاجة انتى إللى بتعملي دلواقتي
- يا سلام وانتى مشغلش دماغي بك دا ايه ؟
- يعني انا غلطان ان انا عاوزك مرتاحه خلاص كدري نفسك انجوي ..
- أنت بتتكلم كده ليه ؟
- ماهو انا طالع عيني هنا لوحدي ومش عارف اخد اجازة انزل مصر وفى ضغط شغل عاوزاني اعمل ايه اغني
- خلاص انا هقفل
- هتنامي ؟
- ايوه هتخمد
- طيب تصبحي على خير .
قفلت الموبيل وهى مضايقة وبعدها بعتلها رساله ومكتوب فيها ( love you ) , كانت منتظره مكالمة لكن متكلمش ونامت،، فتره مكالمات قليلة بينهم بسبب ضغط الشغل.. قاعدة فى البيت ومعاه بنت خالتها وشايفاها ماسكة الموبيل :
- ايه لسه مفتحش الرسالة ؟
- لا لسه
- أنتي من الصبح ماسكه الموبيل يا بنتي قومي ننزل
- لا استني شويا علشان لو كلمني
- انتى من الصبح مستنيه رساله وبتقولي هيكلمك
- انزلي وسبيني مش عاوزة انزل
- انتى رخمه بجد ، مش هنزل
اتكلمت معاه ١٠ دقائق وقفل وملامحها متغيرة:
- فى ايه ؟
- مفيش
- مطولتيش يعني
- مشغول المهم اطمنت عليه
- ياتري بقي فاكر عيد ميلادك انه بعد بكره ولا زى السنه الل فاتت افتكر بعدها بيومين لما شاف الاستويرز ؟
- هو ممكن يكون ناسي بجد ؟
- تاريخه فى نسيان التواريخ يقول كده
- دا انا زعلت وكانت ليله السنه الل فاتت ممكن يكون ناسي
- معاه ممكن جدًا .. طيب فكريه ؟
- لا مش هفكره
- براحتك تعالي ننزل بقي
- لا ..
- يا رخمه ..
قاعده ماسكة الموبيل والساعة كانت ١١ وعماله تبص على الموبيل :
- هطلب اكل اطلبلك معايا ؟
- لا مش جعانه
- مالك فى حاجة ولا ايه .. دى واحده عيد ميلادها بكره
- خايفة يكون ناسي وانهارده كلمني ملمحش حتي
- عامليه معامله المريض وليس على المريض حرج
- أنا مش عاوزة غير رسالة منه ، ابدء سنه الجديدة فى عمري بصوته هو دا كتير
- مش كتير بس متعرفيش ظروفه ايه هو فى بلد وانتى فى بلد ..
بتبص ع الساعة كانت ١١ ونص:
- أنا مش عاوزة غير رسالة يارب رسالة بس منه
سابتها بنت خالتها وهى باصه ع الموبيل .. الساعة ياقمري ل ١٢ وهى متوتره وقلقانه وخايفة.. خايفة انه يكون ناسي فعلًا .. الساعة دقت ١٢ ورن جرس الباب ..فتحت الباب وملامحها كلها حزن وكانت المفأجاه انه قدامها ومعاه بوكس ورد وشوكليت هدية عيد ميلادها، دخل أخوها وراه وقالها :
- على فكره انا قابلته تحت العماره كان واقف من الساعة ١١ ومرضاش يطلع غير لما الساعة تكون ١٢ حب يفاجئك.
هي بتحاول تجمع انه قدامها قالتله :
- ايه دا انت ازاي هنا ؟ انت كنت قايلي انك مش عارف تاخد اجازة ؟
- مكنتش عارف اظبط الإجازة وبعدين..
قرب منها خطوتين وقالها :
- حبيت أول دقيقة من عمرك فى السنه الجديدة تبتدي معايا
كل سنه وانتى معايا
قرب ليها البوكس :
- ايه كل دا كتير اوي
- انتى أجمل حاجة فى حياتي، كان نفسي اجبلك الدنيا كلها لأنك تستاهلي ، ربنا يخليكي ليا العمر كله مع بعض .. بحبك ❤
مشاهد بقلمي #يارا_سمير ❤
رأيكم ✨❤
ملحوظة :
الموقف حصل ❤
