بصت قدامها وسكتت واتكلم :
- بقالك كتير؟!
اتنهدت : سنتين
- يعني فى البداية .
- بداية ..
- ايوة بداية
- أنا طول الفترة دى مستنيه إللى حساه دا يروح ويختفي مبيختفيش .
- ومش هيختفي طول ما انتى مركزه تفكيرك فيه ومستنياه يختفي، وواضح أنك مطولة كتير فى البداية، عارفه ليه ؟
- ليه ؟!
- لأنك متقبلتيش الوجع وألم ، وطول ما انتى متقبلتيش هتفضلي فى البداية مبتتحركيش
- اتقبله ازاي انا عاوزة يختفي
- أى ألم بنعيشه بيختفي لكن مبيختفيش
- أزاي مبيختفيش، الكل بيقول الوقت بيشفي
- سنتين ولسه زى ماانتي ؟
سكتت لحظة : فعلًا مفيش حاجة حصلت
- لأن الوقت مبيشفيش، الوقت بيدينا فرصة
- فرصة ؟
- فرصة نتقبل و أننا نحاول نتخطي ونكمل ،محاولاتنا هى إللى هتساعدنا مش الوقت ، لأن لو هتركزي ع الوقت بس من غير اى محاولة مفيش حاجة هتتغير غير تضخم كل حاجة حاسه بيها وتغرقي فى محيط من التوهان والضياع والآلام والوجع ، لكن الفرصة هتمنع كده .
- يعني الفرصة دي هتساعدني ان إللى حساة يختفي ؟
- هتساعدك تتقبلي؟! الفرص بتساعدنا نتقبل الألم والوجع، نتقبل تغير الحال، نتقبل فكرة أن مفيش حاجة بترجع زى ما كانت يا بترجع احسن من الاول يا أسوء، نتقبل حياتنا وقدرنا ونكمل سعي.. نكمل حياة
- يعني هعيش عمري كله بالوجع دا ؟
- هتعيشي ب أثر لكن مش بوجع
قبل ما تتكلم شاور ليها ع السما :
- شايفه ايه فى السما ؟
- نجوم
- هل النجوم بتختفي من السما
- لا ؟
- حتي لو فى مره مظهرتش ليكي كل مره هتبصي للسما و انتى عارفه ان النجوم مكانها السما لأن دا مكانها صح ؟!
- ايوه ..
- هو دا الأثر، ، ان الحدث رغم ضخامته لكن مع الوقت بيكون عباره عن أثر ، أثر يفكرنا كنا ايه وبقينا ايه، أثر يفكرنا كنا بنفكر ازاي ووصلنا ل ايه، أثر لكل قرار وأختيار ، أثر تغير بيحصلنا فى حياتنا سواء كويس او لا .. الأثر هيعيش جواكي عمرك كله لكن مش هيأثر ع حياتك بالسلب .. الأثر هيساعدك تعرفي نفسك عن قرب ..
-، هو علشان اعرف نفسي لازم اتوجع ؟
- الوجع اكتر وسيلة فعالة فى حياة البشر، يا تكون صحوة يا تكون ضياع واحنا الل بنقرر تكون ايه عارفه ب ايه ؟! بالفرص إللى الوقت هيدهالنا ومحاولاتنا ، الفرصة اننا نستوعب إللى حصل ونتقبل النتيجة، لأن استسلامنا وبكائنا على الل فات وعدم قدرتنا ع سيطرة نفسنا ومشاعرنا وانها تاخد أكبر من وقتها مش هيفيدنا بالعكس هيضرنا اكتر ما نتخيل ..
يعني مفيش نهايه ؟
- النهاية بتكون مع اخر نفس ليكي فى الدنيا غير كده كل مره رغم صعوبتها بتكون بداية جديدة، ومع كل مره هتتقبلي وهتعيشي حياتك بتقلباتها وهيكون فى أثر مش هيختفي هيفضل موجود يفكرك زى ما قولت حياتك قبل وبعد، وكل وجع وألم هتعيشيه هيكون أثر فى حياتك مش هيكون هو حياتك .
مشهد من مشاهد بقلمي #يارا_سمير
رأيكم 🤎
