- هتعملي ايه انهاردة ؟
- ولا حاجة هقعد في البيت
- طيب ايه رأيك تخرجي معانا احنا متجمعين ف مكان هنحتفل بالسنه الجديدة ..
- مش عارفه ..
- طيب حاولي وغيري جو من وقت ما رجعتي وحياتك شغل ×شغل ..نفسك عليها حق ..
- هشوف ..
- عنوان هبعتلك اللوكيشن ..
فى البيت امام التليفزيون والريموت فى ايدي بقلب فى القنوات، كلها إحتفالات بالسنة الجديدة ، الفيسبوك وانستجرام و تويتر كله بيعايد ع كله وبيتمنوا امنياتهم الل منها يفضلوا مع بعض كل سنه، افتكرت أمنيتي فتحت كتاب كان معايا فيه جواب من سنتين متفتحتش ورجعت قفلت الكتاب .. قررت انزل وقومت لبست ونزلت اتمشي ع الكورنيش ، روحت مكان آخر مره كنت فيه من سنتين قبل ما اسافر ، ماسكه فى ايدي الكتاب وأيدي التانيه النسكافيه وقعدت افتكر الل عملته والل بسببه عشت سنتين فى وحدة وانا بتفرج ع كل الل حواليا بيحتفلوا بالسنه الجديدة وهما سعداء..
- مكنتش اتوقع اشوفك هنا تاني ؟
بصيت جنبي كانت مفاجأة غير متوقعه، هو ..
- أنا أسف لو سببتلك إزعاج ..
فضلت ساكته :
- ممكن اقعد ولا امشي ؟
- انت هنا ليه ؟
- انتى هنا ليه ؟
- أنا..
قعد وباصص قدامه وبعد تنهيدة :
- أنا كل سنه فى نفس الوقت بكون هنا ..
- هنا ..؟
- ايوه هنا ..فى المكان الل قولتيلي فيه مش هينفع نكمل ونهيتي كل حاجة بينا وسيبتيني وسافرتي وقطعتي كل صلة ممكن اوصلك بيهم ..
سكت مش عارفه اقول ايه وقتها كان لازم اسافر مع اهلي وكان لازم اسيبه اقطع اى علاقه تربطني ب هنا :
- طمنيني ع اخبارك .. اشتغلتي .. اتجوزتي ..؟
- اشتغلت بس
- وانا كمان ..اشتغلت بس .. رجعتي امتي ؟
- من شهريين ..
- عارفه .. فى خلال السنتين كل شهر ديسمبر كل يوم فيه بكون هنا .. هنا فى المكان الل جزء منى اتحفر فيه .. كنت مستنيكي ..
- مستنيني بعد الل حصل ؟
- أنا دا كان قرارك انتى مش انا ، قررتي تسيبني وتنهي كل حاجة علشان اعتقادك انك لما هتسافري واستقرارك مع اهلك برا هيكون بينا بلاد واختلاف توقيت البعد هينسينا بعض، هنساكي، فقررتي ننفصل بلا رجعه ..
- دا كان قرار صح ..
- من وجهه نظرك، خوفك من العلاقات الغير مكتمله حواليكي هزت ثقتك فى علاقتنا اننا زيهم ، موثقتيش فينا وفى الل بينا وجازفتي بالفراق ك حل .. والنتيجة ايه .. انا وانتى بعد سنتين هنا .. هنا فى نفس المكان الل قررتي فيه ننفصل وكل واحد ينسي التاني والحقيقة منسناش بعض ..
بص ع الكتاب :
- واضح ان الكتاب معاكي والجواب ؟
مسكت الكتاب وبصتله:
- عرفت ازاي ؟
- دا كتابك المفضل وكان معاكي من سنتين هنا، واضح انك مفتحتيش الجواب ..
طلعت الجواب مقفول :
- خفت افتحه واقراه واعيش بوجع كلماته ..
- لدرجه دى الخوف وصلك ان انا ممكن اوجعك ..
- استحقه.. استحق الوجع لأن انا اختارته من سنتين هنا ..
- لا انتى ولا انا نستحق الل عشناه سنتين ، عموما احنا فى دلواقتي.. افتحي الجواب ..
بتردد فتحت الجواب كان عباره عن جمله واحده
" رغم فراقنا لكننا على موعد لقاء
سنلتقي فى احدي الليالي ...
فى ليالي ديسمبر .."
- قلبي كان دايما بيقولي أننا هنتقابل تاني ، هنتقابل فى نفس الوقت الل بعدنا فيه ، هنتقابل تاني علشان نكمل الل بدأناه من سنتين .. هنتقابل علشان اقولك ان انا افتقدتك ولا لحظة نسيتك وكنت مستنيكي وحشتيني ❤
الساعه دقت ١٢ واحتفالات بداية السنه الجديدة حوالينا وانتهت اخر ليلة فى ديسمبر واحنا مع بعض ، افتراقنا ورجعنا تاني فى ليالي ديسمبر " ✨
مشاهد بقلمي #يارا_سمير
رأيكم
