- يلا خلصتوا ..؟!
- ثواني واخلص ..
بصت حواليها شافتها واقفة ماسكة نضارتها ب ايد وباصه ع نفسها فى المرايا ..
- ازاي تكوني بتفكري تلبسيها؟
- أنا مش فاهمه ايه المشكلة واحده نظرها ضعيف طبيعي تلبس نظاره..
- فى اختراع اسمه لينسز ع فكرة
- عينيا متتحسس منها ..
- وعملتي الليزك ومنفعش عارفة ..
- اعمل ايه حاجة خارجه عن ارادتي ..
- النضارة بتكبرك انتى ليه مش فاهمه كده، وبعدين شكلك احلي من غيرها وبتشوفي، احنا هنقولك حاجة تضرك..؟!
- لا مش قصدي ..
- صدقيني انتى من غيرها احلي بقولك .. انا مقولتش تعيشي من غيرها بس فى أوقات كده شيليها زى إنهارده احنا هنا يومين نغير جو وفى حفلة دلواقتي كلنا رايحين ولازم نكون أشيك الموجودين ، لبسك جميل ..
- دا لبسك انتي ..
- أنا وانتى واحد وبعدين فى حد مهم عندك هيكون موجود فى الحفلة ..
- كرم ؟
- ايوه - كرم - قولتلك السفرية دى فرصتك إنتهزيها ، خليه يشوفك كده وانتى قمر من غير نظاره ولا لبس الاولاني بتاعك ، فى بنات زى الفل هنا حواليه وانتى شوفتي اول ما وصلنا .. لازم تكوني مختلفه عن الشكل الل كان دايما بيشوفك به فى الجامعه علشان تجذبيه ليكي ولو مش فارق معاكي براحتك انا بقولك نصيحة ..
سابتها ومشيت ووقفت تبص ع النظاره فى ايدها مع نفسها ولبسها فى المرايا للحظات فى شرود .. سمعت صوت أصحابها:
- يلا ..
ردت : يلا ..
سابت النظاره ع السرير واخدت نفس وعدلت لبسها واتحركت لبرا الغرفه مع أصحابها واتجهوا الى الشط مكان الحفلة ..
وقفت مكانها بتدور ع - كرم - رغم أنها بتشوف من غير النظاره لكن الرؤية بتكون ضعيفة ، ف مكنتش عارفه تشوفه كويس ، فكانت بتتحرك تدور عليه كان واقف مع بنتين وقفت قريب منهم متعمدة علشان يشوفها ويتفاجئ زى ما أصحابها قالولها، بالفعل شافها ونظر ليها نظره خاطفة للحظة ورجع للبنتين يضحك ويتكلم ، وقفت ١٠ دقائق لوحدها و أصحابها اندمجوا فى الحفلة، ف مسكت كوبايه عصير ووقفت بعيد، واقفة مكانها ماسكة العصير وبتتنهد .. فى اللحظة دى قرب منها - ياسر - :
- واقفة لوحدك ليه كده؟
- ياسر ..
- لا عفريته .. مالك ؟
- لا مفيش ..
- ايه مش عجباكي الحفلة ولا ايه دا ؟
- لا حلوة ..
- مش باين عليكي مبسوطة
ابتسمت إبتسامة مصتنعه:
- لا بالعكس ..
- طيب واقفه ليه لوحدك ليه مش مع البنات؟
- عادي يعني ..احنا فى رحلة كل واحد يعمل الل يريحه
- وانتى ليه مبتعمليش الل يريحك؟
سكتت لحظة : ماهو دا يريحني
- امممم ... بس ايه التغيير دا فين النظاره ؟
- فى الغرفة قولت تغيير وكده
- بس شكلك متغير خالص ..
- احلي صح ؟
- لا ..
اتفاجأت : ايه ؟
- دا رأي انتى زعلتي ؟
- لا .. يعني بالنظاره احلي ؟
- انتى شايفة ايه؟
سكتت :
- قبل ما تسألي غيرك فى حاجة تخصك انتى اسألي نفسك الاول واعرفي الإجابة كويس .. لأن رأي اى حد تاني مش هيفرق كتير مش هيتحدد عليه مصيرك ..
- انت كبرت الموضوع اوي مصيري ..
- ايوة لما تحددي كل حاجة تخصك حياتك بنفسك رأي الغير يا يساعدك يا هيهدمك وقتها مش هيأثر لأنك عارفه انتى عاوزة ايه بالظبط ..
- كل دا علشان قولتلك كده احلي ولا سحبت السؤال ..
ضحك: تمام ..
-مش هتروح لاصحابك؟
- مضايقك انى واقف معاكي؟
- لا بس مش حابه تربط نفسك بيا يعني عادي انا هقفل لوحدي شويا والبنات جايين ..
- أنا واقف هنا علشان عاوز اقف هنا معاكي ..
- تمام ..
سكتت لحظة :
- هو ينفع اسألك ليه قولتلي ان كده مش احلي ؟
- هتزعلي ولا
- لا هسمعك ..
- وقف قدامها وبصلها:
- لأن الل قدامي دى مش انتي، دى واحده تانيه نسخة من نسخ كتير موجودين هنا، نسخه غير حقيقية
- قصدك انا كده فيك ؟
- ايوة .. اسألي نفسك سؤال هل انتي مرتاحة باللبس دا، ومن غير نظارتك، بالكعب العالي دا .. اراهنك انه لا صح ؟
سكتت :
- مش هيقلل منك انك تكوني ع حقيقتك وطبيعتك (بص ع كرم ) الل هيقبلك كده اهلًا وسهلًا انها اغير من نفسي علشانه ورغم كده ولا حرك حاجة فيه يبقي بلغي نفسي علشانه ودا مش صح دا الفيك ..
- هو انت عارف ..
- كرم .. من اول ما جينا هنا وانا شايف كم المجهود الل بذلتيه علشان تلفتي نظره وهو ولا هنا .. ليه رغم انك من غير اى مجهود لفتني نظر غيره ومش شايف غيرك ..
سكتت لحظة تستجمع الكلام وكمل كلامة :
- لبسك الطبيعي ونظارتك إللى بتخليكي مميزة عن كل الموجودين ، تلقائيتك وطبيعتك فيهم سحر خلوني مش شايف غيرك، انتى عارفه محتاجة ايه ؟
- ها ..
- تلبسي نظارتك تاني وتشوفي الحقيقي عن الفيك ونصيحة متشليش نظارتك مهما حصل لأنها جزء منك من سحرك إللى جذبتني من اول ما شوفتك ..
فى اللحظة دى قرب منهم صديق ليهم وياسر اتحرك معاه وهي وقفت مش عارفه تستوعب الل سمعته، وقفت بصت ع كرم وهو واقف مع اصحابه بيضحك وبيهزر ولا حاسس بوجودها وبصت ع ياسر رغم انه واقف مع اصحابه لكن عيونه كانت عليها .. شويا ورجعت الغرفة لوحدها غيرت هدومها ومسكت النظاره وبصت للمرايا وحطتها ع وشها وافتكرت كلام ياسر للحظة إبتسمت وحبت شكلها لانها كانت مرتاحة بيها، دخلت ع سريرها كان فى رسالة من ياسر :
- شوفتي بالنظاره حسيتي بالراحة ازاي لأن دى إنتى، انتي الل مش بتكرر فى العمر كتير ❤
تاني يوم بعد يوم طويل فى البحر كان فى قاعده ع البحر وكانت بتتجهز فى اوضتها مع البنات :
- يلا ولا قدامكم كتير ..
- قربنا .. بس انتى مجهزتيش ليه؟
- لا انا خلصت( حركت النظاره بصباعها ع وشها مبتسمه)
- انتى بجد هتنزلي كده ؟
- ايوة .. لبس واسع ومريح
- سيبك من اللبس انا بتكلم عن النظاره ؟
- النظارة هتنزل قبلي كمان..
- ايه.. امبارح كنتي ..
قاطعتها:
- امبارح كان اكتر يوم غير مريح ليا، سمعت كلامكم وغيرت طريقه لبسي وشيلته النظارة علشان ابقي شيك رغم أن لبسي مش وحش ومناسب لكن كنت مش انا مش مرتاحة ..
- علشان مش متعوده؟
- أو مش حابه.. انا حابه طريقتي ولبسي وطبيعتي دا مضايقكم فى حاجة ؟
- لا ايه الهبل دا ..احنا بس عاوزينك تبقي تريندي زى الكل كده ..
- الاغلب قصدك.. لأن فى متمسكين بطبيعتهم وانا منهم
- وكرم طيب ؟
- امممم .. بح طار ..
- بتتكلمي بجد ؟
-انا كنت غبية، أعجبت بواحد مش حاسس بوجودي ولما حبيت يحس بوجودي روحت حولت نفسي نسخه من نسخ حواليه ، ايه الل هيفرق ولا حاجة .. امبارح كان درس محترم سمعت كلامكم وعملت كل حاجة ولا شافني ولا حس بوجودي اصلًا فللحظة حسيت هضيع مجهود وطاقة فى إتجاه غلط هضيع فيه نفسي .. انا كده ان حصل وشافني اهلًا وسهلًا غير كده لا .. وقررت مضعفش واعمل المناسب ليا واللى اكون مرتاحه فيه ..يلا بقي ولا اسيبكم وانزل ..
نزلوا ع البحر ووقفت ع الشواية وقف جنبها ياسر :
- حمد الله ع السلامة جيتي امتي ؟
- حركت النظاره مع ابتسامة :
- بليل بس متأخر ..
- متأخر أحسن من مفيش خالص ولا ايه؟
- صح ..
- تسمحيلي اقولك انك جميلة..؟
- مش اوي يعني .. بس عمومًا شكرًا
- أنا بتكلم عن الل شايفه، الانسانة الل خطفت قلبي أجمل واحده هنا ..
سكتت وبصتله:
- ياسر ..
- أنا بحبك زى ماانتي كده اوعي تتغيري علشان حد انتى جميلة كده ومفيش حد أجمل منك فى عنيا ..
- من امتي ؟
- معرفش ولا عاوز اعرف .. حاجة واحده عاوز أعرفها هل تسمحيلي أحبك ..
قرب منهم أصحابهم ياخدوا من المشويات وبعدها قعدوا ع البحر يغنوا ويدندنوا وغنوا اغنيه سيرة الحب ل أم كلثوم وياسر باصص ليها وبيقول :
وقابلتك إنت لقيتك بتغير كل حياتي
ما عرفش إزاي حبيتك
ما عرفش إزاي يا حياتي
من همسة حب لقيتني بحب
لقيتني بحب وأذوب في الحب
وأذوب في الحب وصبح وليل، وليل على بابه ❤
مشهد من مشاهد بقلمي #يارا_سمير
رأيكم ❤
