- فينك كده؟
- موجودة
- مختفية يعني ؟!
- حوارات الحياة مبتخلصش
- بس اختفائك المفاجئ دا قولت اكيد وراه حاجة
- حاجة ايه ؟
- يعني مفاجأه كده ولا كده
ضحكت : هو فعلًا كان مفاجأه بس ليا مش تهمك
- أزاي متهمنيش طبعًا تهمني
- بأماره ايه ؟
- ايه ؟
- بأماره ايه انا اهمك
- مالك اتحولتي كده ليه ؟
- لا متحولتش انا اتأقلمت بس.
- أزاي؟
- اتأقلمت اكون لوحدي وانت موجود
- انتى الل بعدتي .
- ودا كان بعد المحاولة الكام مني افهمك انى مش عاوزة اكون لوحدي
- ماهو انتى متكلمتيش هنجم انا ؟
- لا اتكلمت واتكلمت كتير ، لكن انت مسمعتنيش عقلك فى مكان تاني ،مفهمتنيش .. مفهمتش خوفي ولا وجعي..
- أنا..
- ممكن أسأل سؤال ؟
- اتفضلي..
- ليه كل ما كنت بحكي عن حاجة كنت دايما بتقولي انتى قدها وتسببني لوحدي اواجهه ؟
- لأنك فعلًا قدها.. انتى مش صغيره
- ملهاش علاقة صغيره ولا كبيرة ، ومين قال انى قدها مين قال انى مش محتاجة حد معايا ؟
- ماهو ..
- كل إنسان فى الحياة دى مهما كانت قوته وقدرته ع التحمل والتعايش والنجاة لوحده هو محتاج حد معاه ، سواء كان كبير صغير.. الموقف كبير او صغير هو محتاج حد معاه ..حد جنبه يحسسه انه مش لوحده. ان فى مكان بعد المعركة الل هخوضها اقدر اروح اترمي فيه يحتويني .
- أنا قولت كنت بسيبك لوحدك لاني عارف انتى هتتصرفي ازاي، لأنك عارفه الصح والغلط كويس
- على اساس انى انسانه عاقلة ودماغي متكلفه وشايلة نفسي بنفسي وقد اى حاجة ، ف دا اوحالك انى سوبر وومن احتمالية الخطأ منعدمة .
- لا مفيش إنسان مبيغلطش بس انتى هتكوني حسباها
- وهل وانت بتفكر كده ، حسبت ان حسابات الأشخاص بتختلف من شخص لتاني، يعني الغلط عندك ممكن يكون صح عندي واعمله بأقتناع بدون ندم .. مفكرتش انى لما افكر واقرر لوحدي دا معناه ان وجودك بيتبخر من حياتي مش شايفاك.. محسبتش انى انا نفسي مبعرفش احسب حاجة وماشية اخبط.. عارف انت مختلفتش كتير عن إللى حواليا .. حاطيني فى برواز سوبر وومن الجامد الل بتقدر ع اى حاجة وتعمل كل حاجة ومش مستنية حد وسبتوني لدماغي.. لافكاري المشوشه المشوهه .. لعشوائيتي إللى ملهاش ملامح الطش يمين وشمال، أن فلحت برافو عليا وان اخطأت هتقوم قيامتي .. انا مبعرفش انام ، لاني لو نمت بعيش الل عايشاه وانا صاحية وفى الاتنين بكون لوحدي فاهم يعني ايه لوحدي ..
- مكنتش اتخيل انك كده ..
- لاني ممبينش، عيشت ومازالت صراعات مع مخاوف تهد جبل لوحدي ومكنتش طالبه غير حضن يضمني لحظة.. لحظة كانت ممكن تشفي كتير من أوجاع جوايا وتقويتي .. لكن انا قدها ومش محتاجة حد ..
- وأنا هعرف ازاي ؟
- أنت مش شايفني من جوه زي غيرك بتبص ع الظاهر بس ،لكن انا كده مبظهرش تعبي ولا هبين لحد مش هشحت اهتمام ولا احتواء من حد
- يعني قررتي تبعدي نهائي ؟!
- انا قررت أعيش المكتوب لكن هعيشه لوحدي ..لوحدي .. لاني للأسف ملقتش الل يكون معايا وميسبنيش لوحدي ويحميني من نفسي من دماغي وأفكاري ..
-و أنا ؟!
- أنت أنت وانا نفسي .. نفسي وبس ..
مشاهد من مشاهد بقلمي #يارا_سمير
رأيكم 🤎
