စုန့်ဟိုင်မြို့တွင် ဝိညာဉ်သားရဲ အရည်အချင်း အကဲဖြတ်ရေးစင်တာ သုံးခုရှိပြီး သားရဲများ အဆင့်အတန်း ခွဲခြားသတ်မှတ်ခြင်းကို အဓိကထား လုပ်ဆောင်သည်။
သင်က သက်ဆိုင်ရာ သားရဲနှင့် စိတ်ဝိညာဉ် အိမ်မွေးတိရစ္ဆာန် စာချုပ်ပြုလုပ်ပြီး အကဲဖြတ်မှု အခကြေးငွေကို ပေးဆောင်နေသမျှ ကာလပတ်လုံး သင်က အရည်အချင်းစစ် အကဲဖြတ်မှုကို ဖြေဆိုနိုင်ပေမည်။
ထွင်ထျန်းဟာက ဝမ်လင်းနှင့် အတူနေတာ ကြာပြီဖြစ်သော်လည်း စာချုပ်မချုပ်ထားပေ။
စိတ်ဝိညာဉ် အိမ်မွေးတိရိစ္ဆာန် စာချုပ် တည်ရှိရခြင်းအကြောင်းရင်းမှာ ပိုင်ရှင်များ အနေဖြင့် ၎င်းတို့၏ စိတ်ဝိညာဉ် အိမ်မွေးတိရစ္ဆာန်များ ပုန်ကန်မှု ပြုလျှင် စာချုပ်စွမ်းအားကို အသုံးပြု၍ အတင်းအကြပ် ချုပ်ကိုင်နိုင်စေရန် ဖြစ်သည်။
သို့သော် လင်းကျန်းရန်နှင့် သက်ဆိုင်သည့် အိမ်မွေးတိရိစ္ဆာန်တစ်ကောင် အနေဖြင့် ဤစာချုပ်က လုံးဝတန်ဖိုးမရှိပေ။
ပထမဆုံး အချက်အနေဖြင့် ထွင်ထျန်းဟာက ဝမ်လင်းကို ပုန်ကန်ဖို့ နေနေသာသာ ဝမ်လင်းရှေ့တွင် သူ့ကိုယ်သူ တင်းတင်းကြပ်ကြပ် ထိန်းချုပ်၍သာ နေခဲ့ရသည်။
အကယ်၍ ပုန်ကန်မိလျှင် တမင်တကာ အရိုက်ခံရရန် တောင်းဆိုသလိုသာ ဖြစ်နေလိမ့်မည် မဟုတ်ပါလော။
သို့သော် ယခုတစ်ကြိမ် ဝိညာဥ်သားရဲ အရည်အချင်းအကဲဖြတ်ရေး ဌာန၏ စမ်းသပ်မှုတွင် ပါဝင်ရန်အတွက် ဝမ်လင်းက ယမန်နေ့ ညနေတွင် ထွင်ထျန်းဟာ နှင့် စာချုပ်ချုပ်ဆိုခဲ့ပြီး ထွင်ထျန်းဟာကလည်း သဘောတူခဲ့၏။
ဖားပြုပ်မျိုးနွယ်စုတွင် အာကာပြင်ဝါးမျိုခြင်း စွမ်းရည် ရှိသည်။
ထွင်ထျန်းဟာက ယခုအခါတွင် ခွေးတစ်ကောင် ဖြစ်နေသော်လည်း မန္တန်ကို သိရှိသ၍ ဝိညာဉ်စွမ်းအင်ကို အသုံးပြုကာ ထိုစွမ်းရည်ကို အသုံးပြုနိုင်မည် ဖြစ်သည်။
လက်ရှိတွင် ထွင်ထျန်းဟာက စာချုပ်ကို ပါးစပ်ထဲတွင်သာ သိမ်းဆည်းထားခဲ့သည်။
..........................
အရည်အချင်းစစ် အကဲဖြတ် စင်တာသို့ အစိမ်းရောင် ခွေးတစ်ကောင် ပေါ်လာချိန်တွင် ဆယ့်တစ်နာရီ နီးပါးရှိပြီ ဖြစ်သည်။
ဤနေရာက မြို့လယ်ရှိ ဝိညာဉ်သားရဲ အရည်အချင်းစစ် အကဲဖြတ်ရေးဌာန ဖြစ်သည်။
၎င်းသည် ဝိညာဉ်ကျောက်တုံး မျိုးစုံဖြင့် ထူထပ်စွာတည်ဆောက်ထားသည့် ဧရာမ ကြက်ဥပုံသဏ္ဍာန် အလှဆင်ထားသော အလွန်တရာ ခံ့ညားသည့် အဆောက်အအုံ တစ်ခုဖြစ်သည်။
ထွင်ထျန်းဟာက နှစ်ကြိမ် သုံးကြိမ် ခုန်လိုက်သည်နှင့် မှန်တံခါးဝဆီသို့ တမဟုတ်ချင်း ရောက်ရှိသွားသည်။
အဆောက်အဦးထဲကို မဝင်ရသေးသော်လည်း အတွင်းထဲကနေ ဆူညံသံများကို ကြားနေရသည်။
ဧည့်ခံကောင်တာရှေ့တွင် အရည်အချင်း အကဲဖြတ်မှုကို ခံယူရန်အတွက် စိတ်ဝိညာဉ် သားရဲများနှင့်အတူ စောင့်ဆိုင်းနေသော ကျင့်ကြံသူ လူတန်းရှည်ကြီး ရှိသည်။
ယင်းက ထွင်ထျန်းဟာ မျှော်လင့်ထားသည် နှင့် ဆန့်ကျင်ဘက် ဖြစ်နေ၏။
၎င်းရှေ့ရှိ ဝိညာဉ်သားရဲများမှာ သာမန်ထက် သာလွန်နေသည်။
ထွင်ထျန်းဟာ အရှေ့တွင် တန်းစီနေသည်မှာ အနီရဲရဲ ဦးထုပ်ကို ဆောင်းထားသည့် ဆယ်ကျော်သက်အရွယ် ဝိညာဥ်သားရဲ ပိုင်ရှင် ဖြစ်၏။
၎င်း၏ ဝိညာဥ်သားရဲမှာ ရှားပါးသည့် ဝိညာဉ်သားရဲလိပ်ပြာ ဖြစ်သည်။
ဤလိပ်ပြာက ဆယ်ကျော်သက်၏ ပခုံးပေါ်၌ နာခံမှုရှိစွာဖြင့် မလှုပ်မယှက် တည်ရှိနေခဲ့သည်။
ထွင်ထျန်းဟာက လူတန်းရှည်၏ အဆုံးတွင် ရှိနေ၏။
သူက လိပ်ပြာသားရဲကို တွေ့လျှင် ချက်ချင်းပင် ချွေးများ ထွက်လာသည်။
၎င်းက ရှားပါးသော ဝိညာဉ်သားရဲ လိပ်ပြာ ဖြစ်နိုင်သော်လည်း ထွင်ထျန်းဟာ အနေဖြင့် ၎င်း၏ ဝိညာဉ်လိပ်ပြာမျိုးစိတ်ကို အတိအကျ မပြောနိုင်ခဲ့ပေ။
..............
ကျင့်ကြံရေး လောကတွင် ဝိညာဥ်သားရဲများကို အမျိုးအစားခွဲခြားခြင်း လုပ်ငန်းစဥ်မှာ ရှုပ်ထွေးလွန်းလှသည်။
ဝိညာဥ်သားရဲ ကောင်းသည်ဖြစ်စေ၊ ဆိုးသည်ဖြစ်စေ မည်မျှသန်မာသလဲ ပေါ်တွင်သာ မူတည်သည်။
သင်က သန်မာနေသရွေ့ ဝိညာဥ် ပုရွက်ဆိတ် တစ်ကောင်ပင် ဖြစ်နေပါစေ ဘုရင်ဟု ခေါ်ဆိုနိုင်ပေသည်။
ယနေ့ခေတ်တွင် နိုင်ငံတစ်ဝှမ်းရှိ စိတ်ဝိညာဉ်တိရစ္ဆာန် ပြိုင်ပွဲများတွင် ဝင်ရောက် ယှဥ်ပြိုင်ခြင်းဖြင့် ဝင်ငွေရှာဖွေသော ကျင့်ကြံသူ များစွာ ရှိနေပြီ ဖြစ်သည်။
ဝိညာဉ်သားရဲ အရည်အချင်းစစ် အကဲဖြတ်ရေး စင်တာများက ဤပြိုင်ပွဲများ ယှဥ်ပြိုင်ရန် အတွက် ဆားဗစ်ပေးရန် ဖန်တီးထားသည့် လုပ်ငန်းအသစ် တစ်ခု ဖြစ်လာ၏။
ပထမဦးစွာ ၎င်းတို့အနေဖြင့် ဝိညာဉ်သားရဲများ ဆိုင်ရာ တိကျသော အချက်အလက်များကို အစိုးရအား ပံ့ပိုးပေးရန်အတွက် နိုင်ငံတစ်ဝှမ်းရှိ ဝိညာဉ်တိရစ္ဆာန် ပြိုင်ပွဲများနှင့် ချိတ်ဆက်နိုင်မည် ဖြစ်သည်။
ဒုတိယအနေဖြင့် ၎င်းတို့က ထိန်းသိမ်းခံထားရသော ဝိညာဉ်သားရဲများ အားလုံးကို မှန်ကန်သော မှတ်တမ်းများ ပြုလုပ်နိုင်မည် ဖြစ်သည်။
ထိုသားရဲများ တစ်စုံတစ်ခု ဖြစ်ခဲ့လျှင် တစ်နိုင်ငံလုံးရှိ အကဲဖြတ် ဌာနများက ပိုင်ရှင်များကို တိုက်ရိုက် ဆက်သွယ်နိုင်မည် ဖြစ်သည်။
ထွင်ထျန်းဟာ တန်းစီနေစဥ် ၎င်း၏ရှေ့ရှိ အနီရောင် လျှာထိုး ဦးထုပ်နှင့် ကောင်လေးက ရုတ်တရက် လှည့်ကြည့်လိုက်သည်။
"မင်းကိုယ်တိုင် လာခဲ့တာလား.. မင်းရဲ့ ပိုင်ရှင်ရော ဘယ်မှာလဲ"
ထွင်ထျန်းဟာက အရည်အချင်းစစ် အကဲဖြတ်ဌာန၏ ပင်မခန်းမရှိ နာရီကို ခေါင်းမော့၍ ကြည့်ကာ တိုက်ရိုက် ပြန်ဖြေလိုက်သည်။
"သူက အတန်းထဲမှာ"
အဆုံးသတ်တွင် အနီးနားရှိ ဝိညာဉ်သားရဲများနှင့် ၎င်းတို့၏ ပိုင်ရှင်များထံမှ လုံးဝ အံ့အားသင့်နေသော အကြည့်များက သူ့ထံသို့ စုပြုံ ကျရောက်လာသည်။
စည်းကမ်းထိန်းသိမ်းမှု တာဝန်ခံများ နှင့် အရည်အချင်းစစ် အကဲဖြတ်ရေး စင်တာ၏ စီမံခန့်ခွဲရေး တာဝန်ခံများ အနားရှိ လုံခြုံရေး အစောင့်များပင် တုန်လှုပ်သွားကြသည်။
"သောက်ချီး.. ဘာလဲဟ"
"ဒီအမွေးစိမ်းခွေးက တကယ်ပဲ စကားပြောနိုင်တာလား"
ယေဘုယျအားဖြင့် ဒုတိယတန်းစား ဝိညာဥ်သားရဲများသာ ဘာသာစကားကို ပြောဆိုနိုင်သည် မဟုတ်လော။
များသောအားဖြင့် ဒုတိယတန်းစားထက် နိမ့်ကျသော ဝိညာဉ်သားရဲများ ပြောဆိုသောအရာများကို ၎င်းတို့နှင့် စာချုပ်ချုပ်ဆိုထားသည့် ၎င်းတို့၏ ပိုင်ရှင်များသာ နားလည်နိုင်မည် ဖြစ်သည်။
ဆယ်ကျော်သက်က ထွင်ထျန်းဟာကို တအံ့တသြ စိုက်ကြည့်နေသည်။
"မင်းစကားပြောလို့ရတယ်လား.. မင်းက ဒုတိယတန်းစားဝိညာဥ်သားရဲလား"
ထွင်ထျန်းဟာက အလွန်ကျိုးနွံစွာ ပြန်ဖြေလိုက်သည်။
"ဒုတိယတန်းစား အဆင့်ကို မရောက်သေးဘူးလို့ ထင်တာပဲ.."
ဆယ်ကျော်သက်က နည်းနည်းတော့ အံ့သြသွား၏။
"ဒါဆို မင်းဘယ်လို စကားပြောတတ်နေတာလဲ"
ထွင်ထျန်းဟာ "ငါက ရေးလည်း ရေးတတ်တယ်.. နေပါဦး.. အဲဒါတွေ သင်ရတာ အရမ်းပဲ ခက်နေလို့လား"
လူတိုင်း "............"
ဆယ်ကျော်သက်က အသက်ခပ်ပြင်းပြင်း ရှူလိုက်သည်။
စိတ်ဝိညာဉ် အိမ်မွေးတိရစ္ဆာန်ကို သူ့ဘာသာသူ အရည်အချင်းစစ် အကဲဖြတ်မှု ခံယူရန် ပိုင်ရှင်က အဘယ်ကြောင့် စိတ်အေးလက်အေး လာရောက်ခွင့်ပြုရသနည်းဟု အစောပိုင်းက သူတွေးနေခဲ့၏။
အဘယ်ကြောင့်ဆိုသော် စိတ်ဝိညာဉ် အိမ်မွေးတိရစ္ဆာန်များသည် အမေးအဖြေကဏ္ဍ အတွက် ၎င်းတို့၏ပိုင်ရှင်များနှင့် ပူးပေါင်းလုပ်ဆောင်ရန် လိုအပ်မည် ဖြစ်သောကြောင့်ပင်။
သို့သော် စိတ်ဝိညာဉ် အိမ်မွေးတိရိစ္ဆာန်က စကားပြောနိုင်နေလျှင် ပိုင်ရှင်က အရည်အချင်းစစ် အကဲဖြတ်မှု အတွက် အတူလိုက်လာရန် မလိုအပ်တော့ပေ။
တကယ်တမ်းတွင် ဤဆယ်ကျော်သက် လူငယ်က သူ့ကိုယ်ပိုင် စိတ်ဝိညာဉ် သားရဲများကို လေ့ကျင့်သင်ကြားကာ နိုင်ငံအနှံ့ လှည့်လည် ပြိုင်ပွဲဝင်နေသော ကျင့်ကြံသူတစ်ယောက် ဖြစ်သည်။
ထို့ကြောင့် ထွင်ထျန်းဟာကို မြင်လိုက်သည်နှင့် စိတ်ဝင်စားသွားခဲ့ပြီး သာမန်ခွေး အမျိုးအစား မဟုတ်ဟု ခံစားလိုက်ရသည်။
ဒုတိယတန်းစား အဆင့်သို့ မရောက်သေးဘဲ မည်သို့သော ဝိညာဥ်သားရဲမျိုးက စကားပြောတတ်၊ စာရေးတတ်ပါမည်နည်း။
ဤဆယ်ကျော်သက်က ထွင်ထျန်းဟာ အကြောင်းကို မယုံနိုင်လောက်အောင် သိချင်နေခဲ့၏။
သူက ချက်ချင်း ဝပ်တွားကာ လက်တစ်ဖက်ကို ဆန့်ထုတ်လိုက်သည်။
"မင်္ဂလာပါ.. တွေ့ရတာ ဝမ်းသာပါတယ်... ငါ့နာမည် ဝေ့ကျစ်ပါ.. ငါက ကျန်းရှင်းမြို့ကပါ။ ငါ့ကို ကျစ်လေးလို့လည်း ခေါ်နိုင်ပါတယ်"
"................"
ထွင်ထျန်းဟာက အကြောင်းတစ်ခုခုကြောင့် မှင်တက်သွားသည်။
ယခင်က ဤစာကြောင်းကို ကြားဖူးသလို ခံစားရ၏။
ဝေ့ကျစ်ဟု ခေါ်သော ဤဆယ်ကျော်သက်က အလွန်စိတ်လှုပ်ရှားနေပုံရသည်။
"မင်းမွေးကတည်းက အစိမ်းရောင်အမွေးနဲ့လား"
ထွင်ထျန်းဟာက ခေါင်းညိတ်လိုက်သည်။
"တစ်မျိုးလေးပဲနော်"
တကယ်တော့ ဤအစိမ်းရောင် အမွေးများကြောင့် သူစိတ်ပျက်ခဲ့သည်မှာ ကြာပြီ ဖြစ်သည်။
သူက တစ်ချိန်က နတ်ဆိုးဘုရင် ဖြစ်ခဲ့ဖူးသော်လည်း မည်သည့်အရာကိုမျှ လွန်လွန်ကျူးကျူး မလုပ်ခဲ့ဖူးပေ။
သူ့ဘ၀တွင် ကျူးလွန်ဖူးသမျှ အကြီးမားဆုံး ကိစ္စမှာ လွန်ခဲ့သည့် ခြောက်နှစ်လောက်က ကမ္ဘာခြားဂိတ်တံခါးနှင့်အတူ ကမ္ဘာမြေပေါ်သို့ ဆင်းသက်ခဲ့ခြင်း ဖြစ်နိုင်သည်။
၎င်းအနေဖြင့် ထိုအချိန်က အခြားသော နတ်ဆိုးဘုရင်များနှင့် အတူတကွ ဆင်းသက်ခဲ့သည်ဟု ပြောလျှင် မည်သူမျှ ယုံနိုင်ဖွယ် မရှိပေ။
အဆုံးသတ်တွင် ကမ္ဘာမြေပေါ်သို့ ရောက်ရောက်ချင်းမှာပင် အသတ်ခံလိုက်ရသည်။
ဤအဖြစ်အပျက်မှလွဲ၍ ထွင်ထျန်းဟာက သူ့ကိုယ်သူ အလွန်ယဥ်ကျေးသော ဖားပြုပ် ဖြစ်သည်ဟု ထင်ခဲ့သည်။
နောက်ပိုင်းတွင် ဆရာမဖန်က သူ့ကို ခွေးတစ်ကောင်နှင့် ပေါင်းစပ်လိုက်ရာ အစိမ်းရောင် အမွေးများ ရှိသည့် ခွေးတစ်ကောင်ဖြစ်သွားခဲ့၏။
ထိုအခိုက်အတန့်က ထွင်ထျန်းဟာ၏ နှလုံးသားကို စိတ်ပျက်အားငယ်စေခဲ့သည်။
"ငယ်ရွယ်တဲ့အချိန်မှာ တစ်ခါမှ အမှားမလုပ်ဖူးတဲ့သူ ရှိလို့လား.. ဘာလို့ အစိမ်းရောင် ပြောင်းလဲသွားရတာလဲ"
အစိမ်းရောင်က တခြားသူအတွက်မူ အရေးမကြီးဟု ထင်ရသော်လည်း ထွင်ထျန်းဟာ အတွက်က တကယ်ကို နာကျင်ရသည်။
ဤဆယ်ကျော်သက် ဝေ့ကျစ်၏ အပြုအမူကြောင့် သူ့ကို စောင့်ကြည့်နေသည့် မျက်လုံး အရေအတွက်က ပိုပိုပြီး များလာသည်ကို ထွင်ထျန်းဟာ သတိပြုမိလိုက်သည်။
ဧည့်ကောင်တာမှ တာဝန်ခံ ဝန်ထမ်း အများအပြားပင် သူ့ကို ထူးခြားစွာ စိုက်ကြည့်နေကြသည်။
ဝေ့ကျစ်က ဖောင်ဖြည့်ရန် အလှည့် ရောက်လာသောအခါ ထွင်ထျန်းဟာကို အနည်းငယ် စိုးရိမ်သော အကြည့်ဖြင့် တစ်ချက် ကြည့်လိုက်သည်။
"မင်းအတွက် ငါဖြည့်ပေးရမလား.. မင်းအတွက် ဘောပင်ကိုင်ရတာ ခက်တယ် မဟုတ်လား"
ထွင်ထျန်းဟာ ခေါင်းခါယမ်းလိုက်သည်။
"မလိုဘူး.. ငါ့ဘာသာလုပ်မယ်"
ဝေ့ကျစ် နှင့် ဧည့်ကောင်တာရှိ ဝန်ထမ်းများ တုန်လှုပ်သွားကြသည်။
ထို့နောက် ဝေ့ကျစ်က ထွင်ထျန်းဟာကို အချက်အလက် ဖြည့်ရန် ဖောင်နှင့် ဘောပင်တစ်ချောင်း ပေးကာ ရယ်မောလိုက်သည်။
"စာရေးတတ်တဲ့ခွေးကို ဒါပထမဆုံး မြင်ဖူးတာပဲ..."
ထွင်ထျန်းဟာက ဘောပင်ကို သေသေချာချာ ကိုင်ထားသည်။
တကယ်တမ်းတွင် ဘောပင်ကို ကိုင်ထားသည်ဟု မဆိုနိုင်ပေ။
ဝိညာဉ်စွမ်းအင်ဖြင့် သူ့ခြေထောက်တွင် ကပ်ထားခြင်းသာ။
၎င်းက ထွင်ထျန်းဟာ အထူးတလည် လေ့ကျင့်ခဲ့သည့် ကိုယ်ဟန်အနေအထား ဖြစ်ပြီး ဘောပင်ကို စိတ်ကြိုက်ရွေ့လျားရန် ပိုမို လွယ်ကူစေသည်။
ထွင်ထျန်းဟာ ဖောင်ဖြည့်စ ပြုလာသည်နှင့်အမျှ တန်းစီနေသော လူအများအပြားက စိတ်ဝင်တစား ကြည့်ရှုခဲ့ကြ၏။
ဝေ့ကျစ်က ထွင်ထျန်းဟာ၏ ဦးတည်ရာကို စိုက်ကြည့်ရင်း သူ့ဖောင်ကို ဖြည့်လိုက်သည်။
ယင်းနောက်တွင် ဝေ့ကျစ်က ရုတ်တရက် စူးစမ်းစွာ မေးခွန်းထုတ်လိုက်၏။
"မင်းက ဘာဝိညာဉ်ခွေး အမျိုးအစားလဲ"
ထွင်ထျန်းဟာက ပေါ့ပေါ့ပါးပါးပင် ပြန်ဖြေလိုက်သည်။
"အက်ကီတာ"
"အကျကီတာလား"
အက်ကီတာက သာမန်ခွေးမျိုးစိတ် တစ်ခုမျှသာ ဖြစ်ပြီး ဝိညာဉ်ခွေး အမျိုးအစားတွင် လုံးဝ မပါဝင်သောကြောင့် လူတိုင်း အံ့အားသင့်သွားကြသည်။
ဝေ့ကျစ် အံ့သြသွားသည်။
"မင်းက ရော်ကျော်ခွေးလား"
ထွင်ထျန်းဟာ၏ မျက်လုံးထောင့်များ လှုပ်ယမ်းသွားသည်။
"မင်းကမှ ရောကျော်ခွေး"
ဝေ့ကျစ် "............"
ကျစ်လေးသည် ပိုကီမွန်စီးရီးမှ အဓိက ဇာတ်ကောင် ဆာတိုရှီ၏ တရုတ်နာမည် ဖြစ်သည်။
အပိုင်း(၃၇၆) ပြီး၏။