ဆယ်နာရီကျော်လောက်ထိ ဝမ်လင်းနှင့်ဖန့်ရှင်းက မှော်အစီအရင်ကို ကိုင်တွယ်နေဆဲပင်။
ချုံရှစ်စစ်ကို အရှင် ဖမ်းဆီးပြီးနောက် ဝမ်မင် နှင့် ကျိုးရီ တို့က လမ်းကြားတစ်ခုတွင် ရှောင်ယွင်ချမ်းကို တွေ့ရှိခဲ့ကြသည်။
သူ့မျက်လုံးများက သွေးနီရောင် ဖြစ်နေ၏။
ရွှေကုံးဂိုဏ်း၏ အသီးက သူ့ခန္ဓာကိုယ်ထဲတွင် လုံးဝကွဲလုမတတ် ဖြစ်နေသည်။
အဝေးမှာ ရှိနေသည့် သူတို့ပင် ဖော်မပြနိုင်သည့် ဖိအားကို ခံစားနေကြရ၏။
၎င်းက သာမန် ကျင့်ကြံသူမှ ထုတ်လွှတ်သော ဝိညာဉ်ရေးဖိအားနှင့် ကွဲပြားသည်။
ယခုက ထိန်းချုပ်နိုင်စွမ်း မရှိသော အော်ရာ ဖိအားတစ်ခု ဖြစ်ပြီး ရှောင်ယွင်ချမ်း အတွင်းရှိ ဝိညာဉ်စွမ်းအင်များ၏ အာရုံစူးစိုက်မှုက အထွတ်အထိပ်သို့ ရောက်ရှိခါနီးတွင် ပြသတတ်သော အလွန် အန္တရာယ်များသည့် လက္ခဏာ တစ်ရပ် ဖြစ်သည်။
ဝမ်မင်က သူ့ချွေးများကို သုတ်လိုက်သည်။
သူတို့က ချုံရှစ်စစ် နှင့် အချိန်အတော် ကုန်သွားခဲ့ရသည်။
ကံကောင်းစွာဖြင့် သူတို့က အချိန်မနှောင်းမီ ဖမ်းမိခဲ့၍ အရာအားလုံးကို ပြန်လှည့်ရန် အချိန်ရှိပါသေးသည်။
"ညီနောင်အာ ငါတို့ သူ့အနီးကို လုံးဝကပ်လို့ရမှာ မဟုတ်ဘူး"
ကျိုးရီနှင့်ဝမ်မင်တို့က ထိုဖိနှိပ်မှုကို ပြင်းထန်စွာ ခံစားနေရ၏။
သူတို့ဝတ်ထားသည့် အသားကပ်ဝတ်စုံကြောင့်သာ မဟုတ်လျှင် ဤဖိအားက ပို၍ပင် ပြင်းထန်လာနိုင်ပေသည်။
အတိုင်းအတာ တစ်ခုအထိ ရှောင်ယွင်ချမ်း၏ အော်ရာက ယခုအခါ စိတ်ဝိညာဥ် အခြေတည် အဆင့်၏ အထွတ်အထိပ်သို့ ချဉ်းကပ်နေပြီ ဖြစ်သည်။
ထိန်းမနိုင်သိမ်းမရ ဖြစ်နေသည့် ဤအော်ရာ ဖိအားကြောင့် လှုပ်ရှားဖို့ နေနေသာသာ ခံနိုင်ရည် ရှိရန်ပင် မနည်းရုန်းကန်နေရ၏။
ယင်းက ရွှေကုံးဂိုဏ်းမှ တီထွင်ခဲ့သော သစ်သီး မည်မျှ ကြောက်မက်ဖွယ် ကောင်းသည်ကို ပြသနေခြင်းပင်။
အသီးထဲတွင် ပါရှိသော စွမ်းအင်ဖြင့် အခြေခံ တည်ထောင်ခြင်း အဆင့် ကျင့်ကြံသူ တစ်ဦးသည် ခန္ဓာကိုယ်အတွင်းရှိ ဝိညာဉ်စွမ်းအင်များကို စုစည်းနိုင်မည့် အပြင် စိတ်ကူးပင် မယဉ်နိုင်သော အတိုင်းအတာအထိ ဝိညာဥ်စွမ်းအားများကို တွန်းအားပေး မြှင့်တင်နိုင်သည်။
ရှောင်ယွင်ချမ်းက ယခုအခါတွင် ရုပ်ပိုင်းဆိုင်ရာ အပြင် စိတ်ပိုင်းဆိုင်ရာ ဝေဒနာကိုပါ ခံစားနေရသည်။
သို့သော် ရှောင်ယွမ်ချမ်းက ကံကောင်းသည်ဟု ဆိုရမည်။
ရှောင်မျိုးနွယ်စု၏ အတွင်းစည်းနှင့် အပြင်စည်းဂိုဏ်းများတွင် ရာထူးတိုးရန်အတွက် ရွေးချယ်မှုစနစ်သည် အလွန်တင်းကျပ်သည်။
ပြင်ပဂိုဏ်းရှိ ရှောင်မျိုးနွယ်စု၏ နံပါတ်တစ် တပည့်ဖြစ်သော ရှောင်ယွင်ချမ်းသည် သာမန်လူထက် ပိုမို၍ ကြိုးစားအားထုတ်ခဲ့မည်မှာ သေချာ၏။
အကယ်၍ ဤနေရာတွင် ရပ်နေသူက ရှောင်ယွင်ချမ်း မဟုတ်ဘဲ အခြားသူတစ်ဦး ဖြစ်ခဲ့လျှင် ၎င်းတို့က အချိန် အကြာကြီး တောင့်ခံနိုင်မည် မဟုတ်ပေ။
"စိတ်မပူပါနဲ့ ငါမင်းကို ခုချက်ချင်း ကယ်တင်ပေးမယ်"
ဝမ်မင်၏ သိုလှောင်လက်စွပ်ထဲမှ ဝိညာဉ်စွမ်းအင်များက သူကိုင်ဆောင်ထားသော ကောင်းကင်သတ္တုဓား ထဲသို့ စိမ့်ဝင်သွားသည်။
ကျယ်လောင်သော အသံနှင့်အတူ ကောင်းကင်သတ္တုဓားက ရှောင်ယွင်ချမ်း ဆီသို့ တန်းတန်းမတ်မတ် ပျံသန်းသွားသော အလင်းတန်းတစ်ခု အဖြစ် မထင်မှတ်ဘဲ ပြောင်းလဲသွားခဲ့သည်။
"ဒီဓားက အော်ရာဖိအားကို ထိုးခွဲပြီး ပျံသန်းသွားတာလား"
ကျိုးရီ အံ့ဩသွားသည်။
ကောင်းကင်သတ္တုဓားတွင် ဤကဲ့သို့ စွမ်းရည်မျိုး ရှိသည်ကိုသူမသိခဲ့ပေ။
ဤဓား၏ ဓားချီက ဝိညာဉ်စွမ်းအင်များကို တံဆိပ်ခတ်ရန် အသုံးပြုရုံသာမက စိတ်ဝိညာဉ်ဆိုင်ရာ ဖိအားများကိုပင် လျစ်လျူရှုနိုင်စွမ်း ရှိပေသည်။
"ထူးခြားတဲ့ဓားပဲ.. ဒါကြောင့် ဆရာက သိမ်းယူထားတာ ဖြစ်မယ်"
ကျိုးရီက ဤအတွေးကြောင့် တုန်လှုပ်သွားခဲ့သည်။
စံအိမ်သခင် ချန်ယွီ၏ ဓားပြုလုပ်မည့် အစီအစဉ် အဆုံးသတ်တွင် မအောင်မြင်သည့် အတွက်လည်း အလွန်ဝမ်းသာနေမိသည်။
ကောင်းကင်သတ္တုဓားကို ပြုလုပ်ရာတွင် အကောင်းဆုံးသော ပစ္စည်းများကိုသာ အသုံးပြုထားသည်။
ဤဓားကို ဖန်တီးရန်အတွက် အင်မော်တယ်စံအိမ်၏ သခင်က သူ့ဘဝ တစ်ဝက်နီးပါးကို မြှုပ်နှံထားခဲ့ရသည်။
ကျိုးရီက ဓားကို အကဲဖြတ်ပြီးနောက် ပထမတန်းစား သိဒ္ဓိလက်နက် ဖြစ်ကြောင်း ကောက်ချက်ချခဲ့သည်။
ဤခေတ်တွင် မရေမတွက်နိုင်သော ကျင့်ကြံသူများသည် ကောင်းကင်သတ္တုဓားကို တန်ဖိုးမဖြတ်နိုင်သော ရတနာတစ်ခု အဖြစ် မှတ်ယူကြပေလိမ့်မည်။
ပုံမှန်အားဖြင့် သင်က နယ်ပယ်ချင်း ကွာခြားမှုရှိသည့် ပြိုင်ဘက် နှင့် တိုက်ပွဲဝင်နေပါက သင်၏ ပြိုင်ဘက်ကို ကျော်လွန်နိုင်သည့် မှော်လက်နက် တစ်ခုရှိရန် သင့်အတွက် အလွန်အရေးကြီးသည်။
ထိုအချိန်က ဖန့်ရှင်း နှင့် တိုက်ပွဲတွင် အင်မော်တယ်စံအိမ်သခင်ချန်ယွီက ဤကောင်းကင်သတ္တုဓားနှင့် သူ၏ မူလ စိတ်ဝိညာဉ်နယ်ပယ်ကို အသုံးပြုခဲ့သည်။
ဖန့်ရှင်းက စွမ်းရည်နှစ်မျိုးကို တွဲသုံး၍ ပကတိအင်မော်တယ် အဖြစ်သို့ ရောက်ရှိသွားသော်လည်း ချန်ယွီက ကောင်းကင်သတ္တုဓားအစွမ်းကြောင့် ခြေသလုံးအိမ်တိုင် အင်မော်တယ် အထွတ်အထိပ် အဆင့်ဖြင့်ပင် သူတင်ကိုယ်တင် ယှဥ်ပြိုင်နိုင်ခဲ့၏။
ယင်းက ကောင်းကင်သတ္တုဓား မည်မျှအထိ ကြောက်စရာကောင်းမှန်း သက်သေပြဖို့ လုံလောက်နေပေသည်။
၎င်း၏ တစ်ခုတည်းသော ချို့ယွင်းချက်မှာ ဓားဝိညာဉ်မရှိခြင်းပင် ဖြစ်သည်။
ဝိညာဥ်ဓား၏ ခွန်အား သုံးဆယ်ရာခိုင်နှုန်းသည် ၎င်းကိုပြုလုပ်သည့် ဓာတုဗေဒ ပစ္စည်းများ အပေါ်တွင် မူတည်ပြီး ဓားဝိညာဉ်ပေါ်တွင်မူ ခုနစ်ဆယ်ရာခိုင်နှုန်း ရှိ၏။
ဤအချက်ကို ချန်ယွီက နက်နက်ရှိုင်းရှိုင်း သိရှိခဲ့သော်လည်း ကံမကောင်းစွာဖြင့် သူက ကျင့်ခယ်ကို ပစ်မှတ်ထားမိခဲ့သည်။
...................
အနားမကပ်နိုင်တော့သည့် အတွက် ဝမ်မင်က အဝေးကနေ တိုက်ခိုက်နိုင်သည့် ကောင်းကင်သတ္တုဓား၏ စွမ်းရည်ကို အသုံးပြုဖို့ စိတ်ကူးထားပြီးသား ဖြစ်သည်။
ထိုအခိုက်အတန့်တွင် ကောင်းကင်သတ္တုဓား၏ အော်ရာ ထိုးခွဲနိုင်သော အစွမ်းကြောင့် ရှောင်ယွင်ချမ်း၏ အော်ရာများက လွင့်စင်သွားခဲ့သည်။
ဝိညာဉ်ရေးဖိအားများ လျော့ပါးလာသည်နှင့်အမျှ ဝမ်မင်နှင့်ကျိုးရီတို့က ရှောင်ယွင်ချမ်းထံ ချဉ်းကပ်ရန် အခွင့်အရေးကို အမိအရ ဆုပ်ကိုင်လိုက်သည်။
ရှောင်ယွင်ချမ်းက လမ်းထောင့်တစ်ခုတွင် ရှိနေ၏။
သူ၏ အနီရောင် မျက်လုံးများဖြင့် ရိုင်းစိုင်းသော တိရစ္ဆာန် တစ်ကောင် ကဲ့သို့ လမ်းကြောင်းတိုင်းကို လှည့်ပတ်ကြည့်ရှုနေသည်။
သူ့တုံ့ပြန်မှုက အလွန်မြန်ဆန်၏။
ဓားအလင်းတန်း သူ့ဆီ ရောက်လာသည်ကို မြင်သည်နှင့် သူက လေထဲသို့ ခုန်တက်သွားပြီး ဝိညာဥ်ဓား၏ တိုက်ခိုက်မှုကို လွယ်လွယ်နှင့် ရှောင်တိမ်းနိုင်ခဲ့သည်။
ဝမ်မင်က ဝိညာဉ်ဓားကို ထိန်းချုပ်ရန်အတွက် သိုလှောင်လက်စွပ်အတွင်း သိမ်းဆည်းထားသည့် စွမ်းအားများကို အားကိုးနေရသောကြောင့် ကျင့်ကြံသူများနှင့် မယှဉ်နိုင်ပေ။
လက်ရှိအခြေအနေအရ ကောင်းကင်ဓားကို သူ့ကိုယ်တိုင် ကိုင်ဆောင်၍ တိုက်ခိုက်လည်း အလုပ်မဖြစ်နိုင်ဟု ကျိုးရီ ထင်ခဲ့သည်။
အသီးဖြင့် မြှင့်တင်ထားသောကြောင့် ရှောင်ယွင်ချမ်း၏ ခွန်အားက ရွှေအမြူတေအဆင့်ကို ကျော်လွန်သွားခဲ့ပြီဖြစ်သည်။
စိတ်ဝိညာဥ် အခြေတည် အဆင့် သို့မဟုတ် စိတ်ဝိညာဥ် ဖွဲ့စည်းခြင်း အဆင့်တွင် အနည်းဆုံး ရှိသူတစ်ဦးကသာ ရှောင်ယွင်ချမ်းကို ဤဓားဖြင့် တိုက်ခိုက်ရန် အခွင့်အရေး ရှိပေသည်။
"ညီနောင်အာ.. ငါတို့ ဦးနှောက် တွက်ဆခြင်း နည်းစနစ်ကို ထပ်သုံးကြည့်ရင် ကောင်းမလား"
သူတို့က ချုံရှစ်စစ် နှင့် ပြုလုပ်ခဲ့သည့်အတိုင်း ရှောင်ယွင်ချမ်းကို စိတ်အာရုံထဲ ပိတ်ထားနိုင်လျှင် သူတို့အတွက် အခွင့်အရေးတစ်ခု ရလာပေလိမ့်မည် မဟုတ်လော။
"တစ်ဖက်သား စိတ်ရှုပ်နေတဲ့အခါမှာ အလုပ်မဖြစ်ဘူး"
ဝမ်မင် ခေါင်းခါယမ်းလိုက်သည်။
ယင်းက ဦးနှောက်တွက်ဆခြင်း နည်းစနစ်၏ ကန့်သတ်ချက်တွေထဲက တစ်ခု ဖြစ်သည်။
ပထမအဆင့်က အရေးကြီးဆုံးဖြစ်ပြီး အိပ်မွေ့ချခြင်းကဲ့သို့ လုပ်ဆောင်ရသည်။
၎င်းက အကြံပြုချက် တစ်ခုခုကို ဖန်တီးပြီး ရန်သူကို မိမိ၏ စိတ်အာရုံထဲသို့ မသိလိုက်ဘဲ ဆွဲသွင်းရ၏။
ကံဆိုးစွာဖြင့် တစ်ဖက်လူ၏ အကြံအစည်များက ရှုပ်ထွေးနေလျှင် အကြံပြုချက်ကို အသုံးမပြုနိုင်သဖြင့် ထိုနည်းစနစ်ကို အသုံးမချနိုင်တော့ပေ။
ယခုအချိန်တွင် ရှောင်ယွင်ချမ်းက ပို၍ ဒေါသထွက်လာပြီး ရိုင်းစိုင်းစွာ အော်ဟစ်လိုက်သည်။
သူက ဝမ်မင် နှင့် ကျိုးရီကို စိုက်ကြည့်ရင်း သူ့သွားများကို အံကြိတ်လိုက်၏။
ပြင်းပြသော လူသတ်ငွေ့က ကျိုးရီ၏ ဆံပင်များကို အဆုံးအထိ ထောင်ထသွားစေသည်။
"ညီနောင်အာ သတိထားပါ"
"ငါ ကိုင်တွယ်လိုက်ပါ့မယ်"
ဝမ်မင်က သူ့လက်ကို တစ်ဖန် မြှောက်လိုက်ရာ တောက်ပသော အလင်းရောင်နှင့်အတူ ကားလိပ် တစ်လိပ် ထွက်လာသည်။
"ရှောင်ယွမ်ချမ်း ဒါက ဘာလဲဆိုတာ ကြည့်လိုက်စမ်း"
ကားလိပ်ကို အပေါ်ကနေ ကိုင်ထားပြီးနောက် ဝမ်မင်ကကားလိပ်ကို ချည်ထားသည့် အနီရောင်ကြိုးကို ဆွဲဖြည်ချလိုက်သည်။
ရှောင်ယွင်ချမ်းက ပန်းချီကားလိပ်ထဲမှ ပုံအား တစ်ချက်ကြည့်မိသည်နှင့် အမှန်တကယ် မလှုပ်ရှားဝံ့တော့ပေ။
သူ၏ သတ်ဖြတ်ချင်စိတ်များပင် လုံးဝ ပျောက်ကွယ်သွာခဲ့သည်။
ထိုအချိန်တွင် သူက အာရုံခံစားမှု အချို့ကို ပြန်လည်ရရှိလာပုံရ၏။
သူ့မျက်လုံးများက နီရဲနေသေးသည့်တိုင် အနည်းငယ် သက်သာသွားပုံ ရသည်။
အဆုံးသတ်တွင် သူက မြေပြင်ပေါ် ဒူးထောက်ချလိုက်သည်။
"ရော့"
ရှောင်ယွင်ချမ်း၏ ပျော့ညံ့သော အခြေအနေကို အခွင့်ကောင်းယူပြီး ဝမ်မင်က အနားသို့ ချဥ်းကပ်ကာ ကောင်းကင်သတ္တုဓားဖြင့် ပုခုံးကို ထိုးချလိုက်သည်။
တစ်ချိန်တည်းမှာပင် ရှောင်ယွင်ချမ်း၏ မျက်လုံးမှ အနီရောင်များက လွင့်စင်သွားခဲ့၏။
နောက်ဆုံးတွင် သူက မြေပြင်ပေါ်သို့ လဲကျသွားသည်အထိ သူ၏ အော်ရာက ဆက်လက် အားနည်းသွားခဲ့သည်။
"ညီနောင်အာ.. ဒီကားလိပ်က ထူးခြားတဲ့ မှော်ရတနာလား"
ဤမြင်ကွင်းကိုကြည့်ကာ ကျိုးရီက လုံးဝ အံ့အားသင့်သွားခဲ့သည်။
ဝမ်မင်က ကားလိပ်ကို သူ့ဆီ ပစ်ပေးလိုက်သည်။
"ဘာမှမထူးခြားပါဘူး.. အဲဒါက ပုံတစ်ပုံပါပဲ"
ကားလိပ်ထဲမှ ပုံကိုကြည့်ပြီး ကျိုးရီ၏ နှုတ်ခမ်းက တလှုပ်လှုပ် ဖြစ်သွားသည်။
".............."
ကားလိပ်ထဲမှပုံက ဒေါသဘုရား၏ ဗုဒ္ဓမီးကြာပန်းကို အသုံးပြုထားသော မီးတောက်ဧကရာဇ်ရဲ့ ပုံတူဖြစ်သည်။
ဝမ်မင်က မြေပြင်ပေါ်ရှိ ရှောင်ယွင်ချမ်းကို စိုက်ကြည့်ကာ လက်ဝှေ့ယမ်းလိုက်သည်။
"ရှောင်မျိုးနွယ်စုဝင် အားလုံးက မီးတောက်ဧကရာဇ်ရဲ့ မျိုးဆက်တွေလေ.. သူတို့က ဘိုးဘေးဖြစ်တဲ့ မီးတောက်ဧကရာဇ်နဲ့ ပတ်သက်ပြီး လေးနက်တဲ့ ခံစားချက်တွေရှိကြတယ်"
ကျိုးရီ"............."
အပိုင်း(၃၅၅)ပြီး၏။