3 مارس 2020
- وبعدين ؟
- وبعدين فى ايه؟
- أنا مش هقدر اخبي ع ماما كل دا وأرفض عرسان فى المطلق .. انا مضغوطة وكل يوم خناق
- أنا مش عاوز اخد خطوة ومش عارف هي وخالك هيوافقو على ظروفي دى ولا لا
- أنا موافقة ودا المهم، انا معاك
- خلاص هكلمها وهاجي اتقدملك
20 مارس 2020
- انتى موافقة انك تتجوزيه؟
- ايوة يا ماما
- بظروفه دي، شغل غير ثابت غير شقته مساحتها نص شقتنا ؟
- مش لوحده إللى ظروفه كده ويعني ايه شقة صغيرة مش بالمساحة يا ماما
- هتسيبي القاهرة وتعيشي فى الأرياف و فى بيت عيلة .. انتى فاهمه يعني ايه ؟
- هي دى أسباب اعتراضك كلها أسباب ممكن تتغير فى لحظة المهم الإنسان إللى هعيش معاه وانا هعيش معاه فى اى مكان .
- مش عارفة اقولك ايه ؟!
- متتعبيش نفسك بالكلام معايا انا بحبه ومش هتجوز غيره
- يابنتي الجواز مش حب وبس .
- هو بيحبني وانا بحبه وأى حاجة تانيه هتتعدي
- أنا شايفاه غير مؤهل انه يفتح بيت ويتحمل مسئوليه
- أنا شايفاه عكس كده
- انتى إللى هتشيلي الليله
- موافقة .
3 أبريل 2020
*فى محل الدهب :
- زى ما اتفقنا متقلقش ؟
- أنا قلقان لو اتعرف ان الشبكة اتبدلت بنسخة صيني هيحصل مشكلة كبيره
- هيتعرف منين متقلقش، الموضوع دا بيني وبينك وبين صاحبك ،و زى ما أتفقنا انا هختار الشبكة وبعد اسبوع هتكون جهزت وهختارها عادي ويوزن قدام ماما وخالتو وباللطافة يغير العلب
- ولو مامتك عرفت ؟
- هتكون معايا متقلقش
سكت :
- مالك بس ..
- انتى تستاهلي شبكة دهب فعلًا مش صيني
- أن شاء الله الدنيا تظبط معاك وتجيلي احلي حاجة وبعدين انا راضية وموافقة مش مهم اى حد تاني ، الشبكة دى منظر بس، انا مكنتش عاوزة شبكة ومكتفيه بالدبلة، لكن تحكم ماما هو إللى خلانا نعمل كده
17 مايو 2020
- الحمد الله يوم الخطوبة مر ع خير
- أنا قولتلك متقلقش
- صدقيني هعوضك ع كل حاجة هجبلك شبكة دهب حقيقي وشقة فى القاهرة
- المهم انك معايا
- بحبك
20 سبتمبر 2020
- انت مروحتش شغل إنهاردة؟
- أنا سبته
- ليه كده
- راجل مستفز عصبني فشتمته
- احنا ما صدقنا شغلانه ثبت فيها
- أساسا مش كنت مرتاح فيها ومصاريفها يادوب ع اد مصاريفي دى متفتحش بيت
- وهنعمل ايه والجمعيه الل داخلاها ؟
- مش عارف بقي ..
- خلاص متشلش هم الجمعيه فاضل شهرين وتخلص انا هدفعها، المهم تدور ع شغل تاني
- هو خالك مش قال انه هيشوفلي عقد عمل عنده فى الكويت؟
- بصراحة مسألتوش؟
- طيب باللطافة كده أساليه الدنيا واقفه هنا اوي
- حاضر ..
9 نوفمبر 2020
- ماما أتفقت مع النجار ع الخشب
- مفيش مشاكل
- بس عاوز مبلغ تحت الحساب ف ابعتلي فلوس الجمعية
- هو فاضل منها ٥ هيكفوا ؟
- ٥ ايه .. من ٤٠ ؟
- ماهو انا مقولتلكيش، انا غيرت الموبيل لأنك عارفه انه باظ وكنت ماشي بعدة نوكيا القديمة ودفعت ديون عليا الفتره الل كنت قاعد من الشغل فيها استلفتهم واشتريت طقمين
- احنا كنا داخلين الجمعيه دي علشان تساعدنا تعمل بجزء الشقة وجزء للخشب
- ماهو انا مش هعرف اتجوز ولا امشي فى حوار الجواز وانا مديون كده ..
- والحل طيب ؟
- نصبر شويا ع الجمعيه التانيه وعد اخدها ونعمل إللى عاوزاه ؟
- حاضر ..
4 فبراير 2021
- كل سنه وانتى طيبه يا حبيببتي
- وانت طيب يا حبيبي
- عيد ميلادك إللى جاي فى بيتنا ان شاء الله
- نخلص الشقه وعيد ميلادك الل جاي يكون فيها مع بعض
- أنا والله بحاول وانتى عارفه انى بطولي
- عارفه وصدقني مش هحملك اكتر من حملك، نزق بس الفتره دي وبعدين انا وانت مع بعض ومرتبك على مرتبي الدنيا هتمشي
- ربنا يخليكي ليا
- ويخليك يا حبيبي
٢٧ مارس 2021
- ايه .. مفيش اخبار ع شقه ولا اى حاجة؟
- قريب ان شاء الله يا ماما
- قريب ايه .. دا من وقت الخطوبة مشوفناش منه اى خطوة وانتى عماله تداري عليه .. كده مينفعش
- فى ايه يا ماما .. يعني هو يعمل ايه ؟
- يعمل كتير .. حاطك فى وش المدفع وهو واقف وراكي رغم أن المفروض العكس.. انتى مش شايفه نفسك .. دبلتي وشكلك بقي مرهق مبترتاحيش ..
- يا ماما انتى ليه مركزة معاه كده ، ادعيلنا بس
- يعني انتى شايفه طريقته دى معاكي صح
- طريقة ايه ؟
- الجمعية إللى انتى داخلاها ب اسمه وانتى الل بتدفعيها من مرتبك
- عرفتي ازاي ؟
- أنا شايفة وعارفه من زمان وبقول مع الوقت هتفهم انه غير مناسب ، شخص غير مسؤول ومعتمد عليكي فى كل حاجة
- مش الجواز مسؤوليه بين اتنين طبيعي أشيل معاه
- جواز .. انتم مخطوبين وسنه اهو مشوفناش منه خطوة تبشر بخير وبيجيلك مره فى الشهر بتوفريله فلوس المواصلات ..
- أنا مش هضغطه كفايه إللى هو فيه
- مش عارفه اقولك ايه يا بنتي بجد ، لكن زى ما اتفق مع خالك ، يخلص الشقه قبل نهايه السنه ومفيش كلام تاني هيتقال منك لخالك فاهمه ؟
10 يوليو 2021
- عماله اكلمك مبتردش ليه ؟
- ارد عليكي اقولك ايه ؟
- تقولي صاحبك قالك ايه ؟
- مفيش حاجة يقولها
- المشروع الل دخلته معاه ايه اخباره
- مفيش
- أزاي يعني؟
- رجعلي نص الفلوس بس
- والباقي ؟
- خسائر
- مش انت قولت متأكد
- هو قالي كده وانا قولت فرصة وابن #%%%$$%$ ضيع الفلوس .
- متعصبش نفسك كل حاجة تتحل
- أزاي ودى كانت فلوس الشقة
- المبلغ الباقي نوضب اى حاجة ونقعد فيها مؤقت ؟
- وامك وخالك هيوافقوا
- أنا موافقة لأن انا الل هعيش
22 سبتمبر 2021
- بعتلك فلوس الفستان والميكب ارتست
- ها .. ايوه ؟
- كام ؟
- مش عارفه هعرف لما اسحبهم
- ياتري بعتهم كلهم ولا هتكملي عليهم
- لا بعتهم كلهم
- لسه عاوزة تكملي الجوازة دي ؟
- تسأليني وفاضل شهر ع الفرح
- فرح؟ انه يكتب الكتاب فى البيت هنا وياخدك فين الفرح
- الفرح أننا مع بعض
3 نوفمبر 2021 💔
- فينك كده .. من أول إمبارح مش عارفه اوصلك كنت هجيلك ؟
- مشغول شويا
- هانت خلاص كلها أسبوع ونبقي مع بعض
- أنا عاوز اتكلم معاكي فى حاجة ؟
- قول ..
- أنا مش مرتاح؟
- دا طبيعي ضغط تجهيزات الجواز وكده لما نكون فى بيتنا أى حاجة حاسسها هتختفي
- انتى حاسه بكده ؟
- ع فكره المفروض أنت الل تهديني مش العكس
- علشان كده بقولك مش مرتاح
- ليه فى حاجة حصلت ؟
- حاسس أنى اتسرعت
من الصدمة : بتقول ايه .. اتسرعت فى ايه ؟
- فى خطوة الجواز .. الحوار كبير وحاسس أنى مش اده
- بعد الفتره والسنين دي .. الأسبوع اللي جاي فرحنا
- أحسن كتير ما اظلمك معايا وتتحسب عليكي جوازة
- أنا مش فاهمه أنت بتقول ايه .. أنت فاهم كلامك ؟
- أنا حبيت اتكلم معاكي قبل ما اتصل بخالك وابلغه
- تبلغه ايه ؟
- مش هكمل الجوازة ..
بتحاول تكدب نفسها الل سمعاه:
- بص تعالي نتقابل بكره .. انا هجيلك
- مش مستاهله
- لا لا اكيد مش كده .. دا من الضغط صدقني هيختفي وهانت خلاص بقولك الأسبوع اللي جاي فرحنا .. شقتنا اتفرشت وحجزت الفستان والمأذون والمعازيم .. كل حاجة جاهزة واوعدك مش هطلب حاجة خلاص ..
- صدقيني فكرت كتير وكل مره النتيجة انى مش مرتاح واتسرعت ..
قاعدة ساكته :
- أنا قولت ابلغك وهقفل معاكي واتصل بخالك ابلغه
قفل الخط وهي مش مستوعبه الل سمعته ..
7 نوفمبر 2021
- دا إنسان غير مسؤول
- أنا قولتلها من الأول .. كان باين استغلاله ليها.. حسبي الله ونعم الوكيل فيه كسر فرحتها
- أن شاء الله ربنا هيعوضها خير
- يارب ..
- بكره هنروح نجيب حاجاتها الل فى الشقه وهشيلها فى المخزن
- يا عيني عليكي يا بنتي
30 ديسمبر 2021
- مينفعش تفضلي حابسه نفسك كده ؟
- مش قادره يا خالو ..
- لا هتقدري، انتى مظلومة ومش ظالمة والمظلوم قوي بالله، كملي حياتك وارجعي شغلك .. اشغلي نفسك لأن طول ماانتي قاعده مش هتقدري تتخطي
- هحاول حاضر
- وعد
- وعد
15 يناير 2022
- خالتك ام علاء جايبلك عريس بجد لما حكتلي عنه
قاطعتها: انا مش عاوزة
- ليه بقي ؟
- يا ماما مش قادره.. انتى مش حاسه بيا
- ماهو علشان حاسه بيكي.. انتى هتفضلي عايشه ع ذكريات ولا ايه ؟
- ماما ارجوكي
- يابنتي مينفعش كده، جربي واقعدي وادي فرصة مش يمكن النصيب يكون فى صدفه
- ماما انا مش جاهزة اقعد مع حد
- لامتي ها .. لامتي ؟
- معرفش .. ارجوكي متضغطيش عليا
18مارس 2022
- متتاخريش برا
- ليه ؟
- فى ناس جايين ليكي وع الله تحرجيني
- ماشي يا ماما
* بعد الزيارة..
- ايه رأيك والله عريس ابن ناس ومؤدب ؟
ساكته مبتتكلمش :
- قولتي ايه ؟
- قولت زى ما قولت لأخته يومين ونرد عليهم
- يعني موافقة
- لا
- تاني انتى مصممه توجعي قلبي
- هصلي استخارة وبعد هقرر
- خير ان شاء الله
22 مارس 2022
- رفضت العريس قالت مش مرتاحه ؟
- سبيها ع راحتها متضغطيش عليها توافق، لأنك أساسا ضاغطة عليها تقعد مع عريسان
- عاوزة اطمن عليها اى ام عاوزة تطمن ع بنتها
- كله هيحصل فى وقته ..إللى مرت به مكنش سهل انها تأمن لحد بسهولة تاني
- طول ما انت مهاودها كده
- مينفعش انتى تشدي وانا كمان لازم حد يرخي
- أنت خالها وكبيرنا وكلامك يمشي ع الكل
- هدي الدنيا وومتضغطيش عليها
- حاضر
14 يوليو 2022
- الو
- ايوة
- بيت المهندس خيرت
- ايوه مين معايا
- أنا شاكر شغال مع المهندس خيرت وكلمتكم اطمنكم عليه
- تليفونه مقفول بقاله ٤ ايام فى حاجة ولا ايه ؟
- انتى بنت اخته "آيه" صح ؟
- ايوه
- أنا هعرفك حاجة واثق انك هتقدري تتعاملي معاها
قلقت وخافت :
- خالو حصله حاجة ؟
- واحنا فى الموقع اتعرض ل أزمةقلبيه واتنقل للمستشفي
- ايه ؟
- اطمني عمل العمليه وحالته استقرت متقلقيش
- عملية ايه؟
- غير صمامين فى القلب وكان فى شويا مضاعفات لكن هو كويس أطمني
- عاوزة اكلمه
- حاليًا هو تعبان شويا مش هيقدر يكلمكم وطلب مني اكلمك اطمنكم عليه .
- موبيله مقفول ؟
- للأسف الموبيل وقع وانكسر وانشغلنا مع البشمهندس
- بجد هو كويس
- آه والله .. وانا كل يوم هطمنك عليه ولما يقدر يتكلم هخليه يكلمكم
- دا رقمك صح ؟
- ايوه ..
26 يوليو 2022
- صباح الخير
- صباح الخير
- ايه الأخبار؟
- لا هو أحسن كتير وبكره هكون معاه وهتصل عليكي تكلميه فيديو
- أنا بجد بعتذر كل يوم إزعاج رسائل واتصالات
- متقوليش كده البشمهندس اخويا الكبير واحنا ملناش غير بعض فى الغربة
- هو انت لوحدك زيه ؟
- ايوه أهلي كلهم فى مصر
- ترجعلهم بالسلامة
- شكرًا .. ايه صوت الدوشة دي ؟
- فى البلكونه اصل عندنا إفتتاح محل
- ياااه ع الاجواء المصرية
- أنت بقالك كتير منزلتش ولا ايه ؟
- يعني ٧ سنين
- ياااه ليه كده ؟
- يعني محبتش انزل واهلي ببعتلهم بيجوا زياره فتره ويرجعوا
- لا لازم تنزل مصر فى حاجات كتير اتغيرت
- أن شاء الله .. الجو برد عندكم
- مش اوي؟
- خلي بالك ع نفسك من نزلات البرد الغير متوقعه
- ربنا يستر
27 يوليو 2022
- حبيبي يا خالو الف سلامة عليك
- الله يسلمك يا حبيببتي
- كده تقلقنا عليك
- الحمد الله .. اطمنوا انا هبقي كويس
- ماما معاك يا خالو..( مسكت الموبيل )
- شوفت يا خيري نتيجة اهمالك فى نفسك
- الحمد الله
اتكلم شويا وحس بالتعب:
- معلش البشمهندس مش هيقدر يطول
- تمام .. وشكرا يا ابني انك دايما بتطمنا عليه
- متقوليش كده يا امي انا معاه ومش هسيبه
*قفل الخط .. بعد ساعتين رن موابيلها :
- الو
- نايمة ازعجتك
- لا ابدا ..
- صوتك متغير
- استلمني دور البرد المعتاد
- أنا لاحظت من صوتك.. طيب اخدتي حاجة ؟
- هبعت من الصيداليه اجيب
- الف سلامة عليكي
- الله يسلمك
30 يوليو 2022
- لسه تعبانه؟
- ماهو بيقعد معايا فتره
- طيب حاولي ترتاحي
- تمام
*بعد ساعتين رن موابيلها من رقم غريب
- أستاذة آيه..؟!
- ايوة
-مع حضرتك صيدليه دكتوره هناء ممكن العنوان بالتفصيل
- ليه؟
- علشان فى حد عمل أوردر أدوية لحضرتك
- مين ؟
- المهندس شاكر
اتفاجئت: تمام .. العنوان ..
* وصلت الأدوية وارسلت رسالة واتساب
- شكرا ع الأدوية
*رن موابيلها وردت
- شكرا يا شاكر بس مكنش لأزمة تتعب نفسك
- تعب ايه .. انتى إللى تعبانه ولاحظت ان الدور طول وانتى مروحتيش تكشفي، ف دكتورة هناء قريبتي كلمتها وشرحتلها وهي الل رشحت الأدوية دي ..بس هتجيب من الآخر
- شكرا لك ولدكتورة هناء .. يارب أفتكر مواعيدهم بس
- متقلقيش انا هبعتلك فى ميعاد الجرعات افكرك
ضحكت : مش لدرجة يعني
- يلا بس اعملي حاجة سخنه اشربيها ودفي نفسك كويس
- حاضر ..
10 أغسطس 2022
- إنهاردة كان اخر حاجة
- الحمد الله
- وباين انك احسن بكتير
- جدًا بجد
- لازم تهتمي بنفسك لأن واضح ان مناعتك مهاجره
- بتقول فيها اى دور تعب بنام ، انا نص مرتبي خصم علشان الإجازات
- مش مهم اى حاجة المهم انك تكوني بخير
- الحمد الله .. بس بجد مش عارفة اقولك ايه ١٠ ايام ولا يوم فلت منك ماشاء الله عليك
- مش انا وعدتك وقولت ومن طبعي لما بقول بعمل
- ياريت الكل زيك كانت الحياة هتبقي أجمل
- الحياة بتكون أجمل مع الأشخاص الصح فى حياتنا
تنهدت : فعلًا .
- هو انا فكرتك بحاجة ولا ايه ؟
- لا ابدا ..
- انا عرفت من البشمهندس انك كنتي مخطوبة
- تجربة ومرت
- وأنا كمان كنت خاطب
- كنت ؟
- ايوة تجربة ومرت
- منك ولا منها ولا النصيب
- امممم ممكن تقولي كنت مغمض عيني وسادد وداني عن الحقيقة
- وايه الحقيقة ؟
- ان انا كنت فرصة كويسه
- تم استغلالك
- بنجاح ..
- اسفه انى بفكرك
- مفيش حد بيمر بتجربة قاسية وبينساها احنا بنتناسي علشان نكمل حياتنا
- واضح انها وجعتك اوي
- حبيتها وهي كانت بتحب غيري معايا
- ايه ؟
- زى ما سمعتي .. ولما اكتشفت دا انسحبت انا من المشهد لأن مليش مكان
- مش عارفة اقولك ايه بس اكيد هى خسرت
- بالعكس كسبت الل بتحبه واتجوزوا ..انا خسرت بس كسبت
- وايه مكسبك ؟
- القدرة ع التميز بين الحقيقة والوهم .. يمكن مشاعري اتجاهها كانت غلباني مكنتش شايف حقيقة مشاعرها ليا وان اهلها ضاغطين عليها لأني كنت فرصة وهى وافقتهم ..
- ربي يعوضك خير ..
- ربي يعوضنا خير
- أن شاء الله
- تعرفي
- ايه ؟
- أنا عاهدت نفسي متكلمش فى الموضوع دا ولا أذكر التجربة دي لكن حكتلك بسلاسه واريحية
- ودا حلو ولا ؟
- حلو جدًا .. بس اتمني مكنش ازعجتك
- لا ابدا وبعدين أنت قولت أن معندكش شخص مقرب تحكي معاه ف اني أكون الشخص دا دا يسعدني
- واسعدني قبلك .. يلا اقولك تصبحي ع خير
- وانت من اهله
12 أغسطس 2022
*رسالة واتساب :
- صباح الخير
- صباح الخير
- فطرتي ..
- ايوه .. وأنت؟
- حالا .. يومك جميل
- وأنت كمان
* بليل مكالمة
- يومك كان عامل ازاي ؟
- شغل وضغط الشغل وحاجة نيلة
- بس عدي ع خير
- ايوه الحمد الله .. وأنت
- شغل وروحت للبشمهندس خيرت البيت اتغدينا سوا ولعبنا دور طاوله وفى كام حد من الشركة جيه اتعشينا كلنا ونزلنا كل واحد لبيته ورجعت اكلمك وهنام
- تمام
- روحتي المشوار إللى كنتي مأجلها
- آه.. وحصل كوارث
- حصل ايه..؟!
- هقولك ...
27 أغسطس 2022
- مصر نورت
- منوره بناسها
- يعني لازم فرح علشان تنزل
- مش اى فرح دا فرح اختي
- يلا ربنا يكملها ع خير
- يارب ..
- ممكن تفضي نفسك ساعه محتاجك تختاري البدلة
- اتعودت ولا ايه ..مبقتش بتلبس غير لما ترجعلي
- طبعا الفاشونيستا حجي
ضحكت : تمام بكره الساعه ٥ تمام
- تمام وهمر عليكي هاخدك
- لا خليك هاجيلك
- لا انا إللى هاجيلك يلا ..
* فى محل البدل
- أنهي بدله ؟
- الإتنين حلوين بجد عليك
- اكيد مش هروح الفرح ببدلتين
ضحكت : الكحلي حلوة اوي رغم انا بحب لون الأسود فى البدل وبدل القميص الأبيض قميص اسود
- اها .. تمام يبقي الكحلي لأن مش عندي قميص أسود
- عمومًا الإتنين حلووين
- تمام .
* موابيلها رن :
- بجد .. طيب انا جايه
- فى حاجة ولا ايه ؟
- بنت خالتو جت فجأه من السفر
- طيب يلا بينا
- تمام وانت يادوب كمان تجهز للفرح
- يلا هوصلك
- مش راجعه ع البيت همر ع خالتو
- هوصللك وهرجع اخد البدلة يكون ظبطها
- تمام
- ابقي وريني اللوك النهائي
*بعد ساعتين على الواتساب صوره بالبدلة واتفاجئت وارسلتله فويس:
- ايه دا مش كانت البدلة الكحلي ليه التغيير ل السودا
رد عليها فويس :
- حسيت ان البدلة السودا والقميص الأسود اشيك اقتنعت برأيك ولو هتسألي ع القميص اشتريته فى الطريق وغيرت فى غرفة الفندق
-والله انت دماغ
- بس شياكة صح
- واناقة ..
20 أكتوبر 2022
*فى الكويت مكالمه :
- فينك طول اليوم امبارح؟
- رجعت مش شايف وكان الموبيل فاصل ونسيت اشحنه
- اتخضيت افتكرت لسه تعبان
- لا تمام بس الشغل فى الموقع كان كتير ومكنتش نايم كويس
- المهم انك بخير
- طول ما انتي بخير
- أكلت ..
- لا لسه بفكر اعمل اكل هنا بس هتساعديني ماشي
- تمام يلا عاوز ايه ؟
- مكرونه بالبشاميل
- مره واحده
- آخر مره اتكلمنا كنتي عاملاها ف ريقي جري عليها
- من عنيا .. كان نفسي اقولك من ايديا بس تتعوض لما تنزل الاجازة مع خالو اعزمك عليها
- من هنا للاجازة لسه .. يلا معايا ع المطبخ وخطوه خطوه وتفصيله تفصيله عاوزاها زى إللى عملتيها
- ع اساس هعملها بروحي كده
ضحكوا : يعني .. يلا بينا
- يلا قدامي ع المطبخ
ضحك: يلا بينا
29 أكتوبر 2022
- ايه يومك كان عامل ازاي ؟
- لسه راجع من عند البشمهندس خيرت ؟
- مش كنت عنده الصبح هو فى حاجة
- لا بس كنت محتاجة فى موضوع
- فى حاجة ولا ايه ؟
*سكت لحظة :
- طلبت ايدك منه ؟
بتضحك: متهزرش
- أنا بتكلم بجد .. طلبت ايدك منه وبكره هيتكلم معاكي ويسألك ع رايك
- أنت بتتكلم بجد
- ايوه.. مش مصدقاني استني لبكره
- ليه عملت كده ؟
- علشان بحبك
- ايه ؟
- بحبك .. متسأليش ازاي وامتي لأن انا مخططتش لأي حاجة انا حاسسها معاكي .. انا لاقيت نفسي معاكي وبحبك
سكتت وكمل كلامه :
- أنا مش هضغط عليكي ومهما كان ردك ايه انا متقبله، لكن عاوزك تفكري فى حاجة واحده لو حساها او لا ..
- ايه هي ؟
- هل انا شخص جدير بانك تقضي أيامك الجايه معاه وانتى مطمنة .. جوابك ع السؤال دا هو الل محتاجة .. انا هقفل وفى انتظار الرد من البشمهندس
قفل الخط وهي مرتبكة ومتفاجأه ..
30 أكتوبر 2022
- شاكر طلب ايدك ايه رايك من غير ضغط
- موافقة
- بتتكلمي بجد ؟
- ايوه
- مش محتاجة وقت ؟
- لا ..
- مبروك يا حبيبه خالو .. هكلمه ونرتبها
- تمام
3 نوفمبر 2022❤💍
*يوم الخطوبة بصت ع النتيجة واتفأجأت من التاريخ، نفس التوقيت من سنه كانت بتمر ب أسوء تجربة فى حياتها لكن دلواقتي عايشة احلي إحساس..
- مبروك عليا انتي
- أنا إللى مبروك عليا انت
- أنا مش مصدق بجد
- ولا انا .. فى ٣ ايام تنزل وتحصل الخطوبة
- مكنتش مصدق وقولت مش هصدق غير لما تكون دبلتي فى ايدك ..
- طبعا هتلاقي زي فين
- فعلا مكنتش اتوقع ان انا هقابل حد زيك
- كسفتتي والله بس بقي
- زى إنهارده السنه الجايه هتكون فى بيتنا .
10 نوفمبر 2023💍❤
*الكويت
- أخيرا فى بيتنا
- الحمد الله
- فى سؤال كنت عاوز اسالهولك.. ممكن ؟
- ايه هو ؟
- انتى وافقتي عليا ليه ؟
- طبعا انت مستني ان اقولك لأنك كنت جدير باني اامنلك ع ايامي الجايه معاك بس مش دا السبب
- ايه السبب ؟
- أنا كان جوايا جرح كبير من تجربتي، وكنت رافضة فكرة الارتباط تاني لدرجة حسيت انى بالجرح دا وأثره صعب اعيش حياة وأحس مشاعر جميلة تاني استهلكت مني ، وتعايشت مع الفكرة لكن، الحال اتغير وانا مش حاسه بظهورك ، انا كان إللى طالباه ان الوجع إللى حساه يقل .. ظهورك فى حياتي كان زى المطهر والمضاد الحيوي بيطيب الجرح وبيقلل من آلامه والإحساس به تدريجي مع الوقت، والسنه إللى مرت من خطوبتها اكددتلي انك الإختيار الصح عارف ليه ؟
- ليه ؟
- لأن وانا معاك إللى فات ادفن فى سابع أرض وملوش ملامح، تضائل لدرجة مش شايفاه ولا فاكراه ..حبك وحنيتك واهتمامك مسمحليش بفرصة ولو لثواني افتكر او افكر فى حاجة عيشتها ووجعتني .. علامة الجرح موجودة لكن مش حاسة به مش شايفاه ودا اكدلي اني لما حبيت حبيت صح .. حبيت الشخص الصح بجانب ان فعلًا لاقيتك جدير بثقتي اني اقضي عمري إللى جاي معاك .
- أنا لما كلمتك مكنش فى بالي اى حاجة لكن مع الوقت يومي ميعديش غير لما اسمع صوتك واليوم الل يمر كده مش محسوب من عمري .. معاكي لاقيت نفسي وكنت بدعي انك تكوني ليا ومعايا باقي عمري .. ف اول يوم فى حياتنا اوعدك أفضل معاكي وجنبك طول حياتنا مع بعض
- وفى حضنك
ضمها لحضنه : طول العمر ❤
فى الخلفية ام كلثوم بتقول:
صالحت بيك أيامي سامحت بيك الزمن
نسيتني بيك آلامي ونسيت معاك، معاك الشجن ❤
مشهد من مشاهد بقلمي #يارا_سمير
عن قصة حقيقة رأيكم ❤