الموت الحي

البارت الاخير

مرحبا حبايبي العسل شلونكم ❤️❤️

اتمنى من كل الي تابعو الرواية يتفاعلون على هالبارت لأن هذا اخر بارت الي وياكم بـــرواية المــوت الحـــي
وكلش حابه اشوف تعليقاتكم وتفاعلكم بالبارت الاخير من الرواية ❤️❤️

#الموت الحي
#للكاتبة براء الموسوي

زبيدة : كافي يمعودات صدك جذب تحجن ، عليمن هالبچي ؟!

خالة وئام شنو السالفة عيونج راحن حبيبتي ليش هيج تبجين مردتي گلبي والله

وئام : سودة عليه عليج يا يمه راحت رجليناتج من عمت عيني كون

زبيدة : لزمت اديها ، والله العظيم اني زينة والطبيب گلي انُ عدم مقدرتي على المشي هاي الفترة شي جدًا طبيعي لأن النخاع اخذو الي من عظام الفخذ والحوض والأعصاب راح تاخذ فترة ياله ترجع لنشاطها

وان شاء الله ويه العلاج الطبيعي والتمارين راح ارجع امشي وهذا الشي بأذن الله شبه اكيد يعني موضوعي
ابد ميخوف

ديمة : يعني اكيد راح ترجعين تمشين

زبيدة : مسحت دموعها وابتسمتلها ، وداعة عيونج يالشگرة راح ارجع امشي

شنو نسيتي إني رياضية واعضائي كلها نشطة وان شاء الله بس ارتاح هالچم انوب يوم ابلش علاج

حتى سألي عمو عبدالله هو چان موجود بوقتها ، احجيلهم عمو تره وداعتك اني لو احجي وياهم
منا لباجر ميصدگوني

عبدالله : ام معين ، ام حسن ، عمي حبيباتي الدكتور گللنا العملية ناجحة ١٠٠٪

وزبيدة لا مشلولة ولا اسم الله بيها شي بس لأن بالعملية اخذولها النخاع من فخذها وحوضها صار ضغط بسيط على اعصابها ومع مرور الأيام
وبالعلاج راح ترجع تمشي مثل اول واحسن

الموضوع بس يحتاج وقت بسيط جدًا وزبيدة سباعية واحنه كلنا وياها وايدنا بإيدها وان شاء الله منا لچم شهر نلگاها تفتر كدام عيونه

لو شتگولين ام الزبد

زبيدة : ابتسمت ان شاء الله

يله كافي مسحن دموعجن تره والله ازعل عليجن ، بست خالة وئام وديمة ومسحت دموعهن

باوعت لدنيا التباوعلي ونتشغ ، تنهدت وفتحتلها اديه اجتي حضنتني ، بادلتها الحضن وغمضت عيوني

دنيا : ااااخ يا حنينة شلون بينه بهاي حنيتج التوزعين بيها ومملحگه

زبيدة : انتو عندي تسوون الدنيا ومابيها ، صحتكم هي صحتي وسعادتكم هي سعادتي ، اني بدونكم ما اسوه شي ، انتو اهلي والنص الثاني من روحي

ابتعدت ورفعت اصابعي مسحت دموعها ، لتبجين تره دموعج غالية عليه وميهينلي بيج

وداعتكم عندي اني زينة والفرحة مسايعتني واني اشوفكم گدام عيني وداير مدايري

هاي اللمة تسوه عندي هواي ، ففدوة لتضلون تبجون وتكائبوني واني جاية من الهند طايرة طيور بسلامة
هارون وسلامتي

دنيا : اااخ يهارون اااخ

زبيدة : ههههه اي والله اااخ شسوه بيه نعلون شعوطلي گلبي ابن الزفرة

سواني مثل السعفة من الخوف عليه اتراجف ، ولج اثاري الحب ما طلع هين يا دنيا ، اوف منك يبابا شوازاك وذبيتنا على بيت النوح

دنيا : ضحكت ومسحت دموعي ، هاي بعد الدنيا قسمتج تركض وراج وين مترحين

باوعتلها شلون خدودها موردة وعيونها تشع فرح
ابتسمت

نعلعلا بليسج زبيدة لهالدرجة فرحانه بسلامة هارون

زبيدة : تنهدت وجاوبتها ، سكتي دنيا ما اعرف شبيه من اللحظة الي سمعت بيها انه صار زين واني احس الروح ردتلي

ما توقعت نفسي احبه لهاي الدرجة ، والله الدنيا وكفت بعيني من وكع ، ما عمري تخيلت نفسي
إني ممكن احب احد هيج من بعد امي

ديمة : الله يحفظكم ويخليكم لبعض يارب

زبيدة : ابتسمت ، آمين يارب ويخليكم اليه

باوعت لعمو عبدالله الواكف يم الباب يباوعلي ومبتسم ، اوووو هذا الثاني نسيت وجوده وانطلقت

شكد فشلة والله استحيت وما انتبهت عليه من حجيت عبالي بس خواتي ودادا وخالة يمي

اجيت احجي وهو اشرلي اسكت وضحك متقرب مني باسني من راسي وطلع من الغرفة بكل هدوء

شويه ودخل معين

معين : هاا حبيبة گلبي شلونها

زبيدة : اني زينة يگلبي ، انت شلونك

معين : من شفتج صرت زين يبعد اخوج

ولتخافين ان شاء الله شغلتج سهلة ما دام السالفة سالفة خمول بالأعصاب تنحل بعون الله

وداعتج آني الانجلطت وماتن اعصابي ما طولت ست شهور مدري 8 وكمت مثل الحصان

زبيدة : مو اگللهم

معين : ما عليج منهم انتِ سباعية واني وياج ما اعوفج

زبيدة : دزيتله بوسة بالهوه ، حبيبي انت

معين : يله يمه يله دادا ، بنات حبيباتي يله كومن خلي نعوف زبيدة ترتاح

خطية صارلها 3 ساعات كاعدة هي وهارون انسطرو من هوسة بيت جدي وهوستنا خليهم يرتاحون شويه

ام حسن : اي والله كلامك صحيح

ديمة : بس شلون نعوف زبيدة وحدها

معين : هسه يصعدلها رجلها

ام حسن : لعد مدام هيج يله بعد گلبي اخذي راحتج 

زبيدة : خليكم كاعدين والله ما شبعت منكم

وئام : لا يمه ارتاحي احنه ما طايرين هياتنه يمج حتى ما راح نرجع لبيتنا باقين بغرفتج القديمة
حتى شوكت متحتاجينه بس صيحي احنه يمج

زبيدة : لالا ليش تعلعلون نفسكم ارجعو للبيت واني اذا احتاجيت شي اتصل عليكم عود

وئام : لا حبيبتي اني ما اامن اعوفج وحدة اذا يردن خواتج خلي يروحن اني راح ابقى هنا

دنيا : لا يمه باقين وياج

زبيدة : هاهي على راحتكم

كامن بوسني هن ومعين وطلعو من الغرفة

عدلت راسي على المخدة وغمضت ، طبعًا نعسانه نعس مو طبيعي ، هستوني داغفه وسمعت الباب ينفتح

فتحت عيوني بخفه وباوعت لكيت هارون ديدخل للغرفة

اباوعله اجه دنگ عليه واني نايمة ، خله شفايفه يم اذاني وحاجاني بهمس

هارون : ستوني جنت جوه شفت بيبيتي طابخة برياني وتشريب

شنو رأيج تكومين على حيلج وتشمرين الطاسة عليه

زبيدة : ضحكت وجاوبته ، وبعدها شيصير هم ترگع راسي بالطبلة

هارون : لا اعيد كل السويته واخلي حياتنا تمشي مثل ما جانت مكتوبة

ومن اوصل لأخر حدث صار بيني وبينج انعل  الشيطان وابقى يمج وما اطلع من البيت حتى ليصير الي صار وتتأذين بسببي

زبيدة : سحبت راسه مباوعتله ، ليش تحجي هيج وتضوجني منك

هارون : تدرين لو صاير عليج شي شچان صار بيه ؟  نهايتي جانت على شفا حفرة وانتِ السبب

زبيدة اني لو لا سامح الله خاسرج چان خسرت اخر ما تبقى من عقلي

ومو بعيدة تلگيني مخبل وتايه بهاي الدنيا بلياج ، انتِ الشي الوحيد المخليني احس انُ هالدنيا ما زال بيها
طعم يستحق إني اكمل علمود اعيشه

انتِ بالنسبة الي الحايط الاستند عليه واني مأمن انه ما راح يميل ويأذيني

الامان الخليتيني احسه واني وياج عمري ما حسيته ويه بشر وبأخر موقف سويتي ويايه خليتيني اتيقن انج العوض الي الله دزه الي حتى يلون سنيني السوده

انتِ وصلتيني لمرحلة اتمنى اخسر روحي ولا اخسر اظفر من اظافرج

وخاف عبالج ذني الرجلين الكعدن رجليج لا والله ذني رجليه اني الشايلاتني من تعب هالدنيا الشلعت گلبي وما بردته الا لمن طلعتيلي انتِ

زبيدة : اني شلون بيه ويه سوالفك ، تره اذا تضل تحجي هيج وياي مو بس تنشط اعصابي لا تسودني

واذا تسودنت تبتلش بيه من هسه اني اكلك

باسني من شفتي وابتعد مبتسم

هارون : ابتلش ، واعتني واخدم حتى رمش عينج بس ابقي بحياتي

زبيدة : ابتسمت وحركت انفي على انفه ، يله لعد اخدمني وروح طلعلي ملابس اريد ابدل

هارون : تأمرين امر

زبيدة : اباوعله راح فتح جنطتي طلعلي ملابس خلاهن على الجرباية واجه شالني

هاي وين ماخذني ؟

هارون : اسبحج حتى تنامين

زبيدة : مابيه حيل وبعدين ميصير اسبح لحد ما تجي الممرضة تساعدني اخاف جرحي يلتهب

هارون : شتسوين بالممرضة ورجلج دكتور لو مو بعينج ولج

زبيدة : بسته من خده اروح فدوة لكرعتك اني

هارون : ههههه انجبي

زبيدة : كعدني على الكرسي المتحرك ودفعني للحمام

دخلني وخله ظهري على المغسلة ، اباوعله كعد بمستوايه ورفع البلوز منزعه الي كمل باقي ملابسي

شفته يباوعلي ويمسح على كصته ، ضربته على ايده
ديربالك يروح بالك لبعيد الدكتور يگول ممنوع

هارون : ههههههه طاحظج اي والله شكد بـ**** گبل فهمتيني

زبيدة : رفعتله حواجبي ، لعد شعبالك حبيبي اني ام الزبد متفوتني فايته

هارون : اروح فدوة لهالزبد اليخبل

زبيدة : ضحكت واشرتله ، يله سبحني نعسانه

هارون : بعيني

زبيدة : راح وكف ورايه وفتح ضفيرتي ، نكشلي شعري وراح فتح الحنفية مالت المغسلة وكاسرلي
المي

بلل شعري وكام يدلك راسي ، غمضت عيوني من لامس راسي المي الدافي ، خلالي شامبو وكام يفرك
شعري واني مغمضة ومسنحه

هارون : الله شنو هذا الشعر اليخبل

زبيدة : ابتسمت بدون لا احجي

ضحكت من حسيت بشفايفه على شفايفه ، باسني وابتعد يدندن ويغسل بشعري

كمل وجر الخاولي لف شعري وغسل وجهي من رغوة الشامبو

فتحت عيوني اباوعله نزع بلوزة وراح خله شويه من غسول الجسم بالمنشفة ورطبها بالمي واجه كعد كبالي

مسح ركبتي واديه لحد مناطق الخياط توقف وشالني مسح ظهري ورجع كعدني على الكرسي 

هارون : تدرين اني جاي اجاهد نفسي هسه

زبيدة : هههههه مبين متحتاج تحجي

هارون : مو اكلج بـ****

زبيدة : هههه يله كمل

هارون : هاي حبيبي كملت بقت بس رجليج

زبيدة : راح سحب صوندة الدوش واجه تربع بالگاع واخذ رجليه خلانهن بحضنه كام يدلكهن ويغسلهن

طبعًا اني ما احس بيهن بس كاعدة اباوعله شلون يدلكهن ويضغط على چف رجلي

هارون : ما جاي تحسين بيهن

زبيدة : فدوتك هن وصاحبتهن يروحي

اباوعله شلون تكدر ، حبيبي من يوم الكعد ودره بيه متبرعتله وما راح اكدر امشي وهو يكسر الخاطر ياكل بروحه اكل

ابد ما انسى موقفه من كعد شلون ضل يبجي عليه كل وعباله ما راح اكدر امشي بعد

ردة فعله بوقتها خلاني اتيقن انُ السويته مو غلط ولو يرجع بيه الزمن اتبرعله بدال المرة الف

والأيام ثبتتلني انُ هارون انسان لو انطي روحي هم مو خسارة بي

كملت حمام وطلع بدلي ومشطلي وضل كاعد يمي لحد ما نمت

وهيج مرت ايامي بين علاجي المتعب وبين دلال هارون الشايلني على كفوف الراحة هو واهلي العيشوني اميرة زماني بهالفترة

__________________________________

بصائر : اندكت باب البيت ، كمت فتحتها لكيت سهير بوجهي

تفاجئت واستغربت من شفتها ، سهير اني ما اشوفها غير بموعد المراجعة للطبيبة ومن شفتها هسه بوجهي ضليت باهته

سهير : السلام عليكم

بصائر : هاا وعليكم السلام ، اهلاً وسهلاً تفضلي

دخلت لجوه كعدت بالصالة ، رحت للمطبخ جبتلها مي ووصيت ام الوصل تسوي جاي

طلعت قدمتلها مي وكعدت كبالها

سهير : شلونج

بصائر : احم الحمدلله انتِ شلونج

سهير : الحمدلله ، اكيد مستغربة جيتي لهنا مو

بصائر : بصراحة اي وكلش هم ، خير خوما صاير شي

سهير : البارحة فاتحت جياد بالموضوع

بصائر : يا موضوع ؟

سهير : موضوع الطفلة الي ببطنج ، كلت بما انُ انتِ هسه بشهر الخامس وما بقالج شي وتجيبين ان شاء الله

فخلي افتح الموضوع ويه جياد حتى نبدي نتحضر لأستقبال الطفلة ونكمل كلشي يخصها ونبلغ بيت عمو

لكن للأسف جياد رفض

بصائر : ما فهمتج ، رفض شنو ؟

سهير : رفض ناخذ الطفلة يگول مستحيل ارتكب هاي الجريمة واخذها من اهلها لو اعرف ابقى العمر كله بدون اطفال

بصائر : كتيله احنه منريدها ؟

سهير : كتله وهم رفض يگول ما اتحمل ذنبها واخذها
هي طفلة شنو ذنبها تنحرم من اهلها وحلف يروح لحليم ويتعارك ويا لوما اني اهدئه وامنعه

بصائر : يعني هسه افتهم من كلامج انتِ بطلتي متريدها ؟

سهير : مو اني جياد

بصائر : انتِ صدك تحجين لا وجايتني تحجين ببرود اعصاب

اذا حضرة جنابج ما متأكدة اذا رجلج يقبل تاخذوها لو لا ليش خليتيني اتورط وما اسقطها من البداية

سهير : اعتبري وجود هالطفلة فرصة الج ولحليم بلكت الله تكون هي سبب بصلاح علاقتكم

بصائر : صلاح علاقتنا شنو انتتتتِ تدرييين بيه اريييد اتطلك لييييش تورطيني بيها

اني ما اريدها ما اريدها ، هو اني اريد اجيبها وانطيها
الج حتى اتطلك واخلص منها ومن ابوها

تالي متالي تجيني من بعد خمس شهور تكليلي ما اريدها !!!

سهير : لو تحاولين مرة وحدة توكفين على المراية وتستشعرين معنى كلمة ام

راح تعرفين النعمة الي انتِ بيها

من رخصتج

بصائر : عافتني وطلعت من البيت ولا كإنما صاير شي ، ضليت اني كاعدة بمكاني وصافنه

اني شراح اسوي هسه ، ووين راح اودي هاي اذا جبتها
لا حليم يريدها ولا اني اريدها

وين حيصفى بيها الدهر وهي منبوذة من الصفحتين امها وابوها !!!

باوعت لسجى طلعت تركض من المطبخ طلعت فتحت الباب شويه ودخل وراها حليم ، سلم وكعد كدامي

باوعتله وجهه اصفر وملامحه تعبانه ، حسيت بي شي على غير العادة

كلمة وحدة طلعت مني ، شبيك ؟

حليم : اليوم مكتب يوسف بي صيانة واجه يكمل شغلة بمكتبي وچان جايب تيم ويا

لأن دنيا عدها مراجعة ويه زبيدة للطبيب وما گدرت تاخذ تيم فيوسف جابه ويا للشركة

طول اليوم اني صافن عليه ، كمل الدوام كله وهو ايد يم ابنه وايد بالشغل

تيم اكل نستله واجه مسح بسترته وهو بكل سهولة
گام نزع سترته ورجع كمل شغل

اباوعله ساعة يشيفله تفاح وساعة يطلعله كارتون بالموبايل يتابع ، اجه وقت الغدة گام طلبله اكل من بره للشركة كعد يوكله ويبوس بي

كمل لأبنه اكل واخذه للحمام بدله حفاضته وغسله وطلع بدله وخلا بحضنه يدكدكله حتى ينام

منتبهله اني من الـ8 الصبح ولحد الـ2 الظهر ما عاف ابنه لحظة وحدة وكل شويه يبوس بي ويلعبه حتى ميمل ويضوج

ودنيا كل جم ساعة تخابرهم وتضحك وتسولف وياهم وهمه متونسين

تصدگين طول ما اني بالدوام افكر بهالطفلة الي ببطنج اشتهيت نفسي بمكانهم

يا ترى لو اني وياج بمكان يوسف ودنيا چنه راح نخليها سعيدة هيج

بصائر : ما اعتقد

حليم : ليش ؟

بصائر : لأن احنه ما بينه حظ

حليم : برأيج جياد وسهير راح يگدرون يعيشوها نفس الحياة الجاي يعيشها تيومي

بصائر : جياد وسهير بطلو ميردوها ، قبل شويه اجتني سهير وبلغتني انُ جياد ميريد الطفلة ميقبل ياخذها
يكول عدها اهل على يا اساس اني اخذها

حليم : جياد گايل هيج ؟

بصائر : تگدر تخابر سهير وتتأكد

حليم : وانتِ شنو رأيج

بصائر : رأيي بشنو ؟

حليم : بإلي صار متحسيها اشارة من الله يجوز يريدنا
نبدي بداية جديدة

اني عن نفسي وبصراحة حاب ننطي لعلاقتنا فرصة اذا مو علمودنا فعلمود هالطفلة شنو تفرق هي عن
بقية الاطفال

بصائر : بس اني ما اريدها ولا اريدك ، تريدها اخذها وخلصني منك ومنـ...

عطت بوجع من رفستني برجلها حيل ، لزمت بطني وغمضت متوجعه

حليم : شبيج

بصائر : فتحت عيوني وتنهدت مابيه شي اجاني مغص

كمت ودخلت للغرفة ، تمددت على الجرباية وبچيت
ياربي ساعدني ودليني على الدرب الصحيح ما اعرف
شسوي تايهه وخايفة ساعدني يارب

__________________________________

الى الرجُل الذي تحملهُ عيوني : حبيبي الجميل ، إسمح لي ان اكون بلادَك التي حُرمت منها ، هاك كتفي ، يلحقهُ كفي ، احمل رأسك وامسح تعبك واغزل من عيناي وسادة لترتاح إليها وارسمُ بأطراف أصابعي بيتًا صغيرًا بشبهنا ، جُدرانهُ يداك

"زبيدة "

"بعد مرور شهرين"

هارون :  يله حبيبي يله يگلبي تحركي

زبيدة : ذبيت حملي على العكازات وتحركت بهدف المشي

صفگلي هارون بإديه حيل

هارون : عفية عفية ورد

يله حبيبي امشي شويه

زبيدة : ضغطت على روحي ومشيت شويه وهو ومعين مگابليني

معين : يله زبد يله وصلتي ما بقى شي

زبيدة : ولكم تعبت مابيه بعد

هارون : ميخالف حبيبتي هي خطوتين بقت وتوصلين يمي شدي على روحج شويه

معين : يله زبد وگف ولا طاح طوله من طول المفتاح

زبيدة : هههههههه سخيف اني اعلمك والنبي

هارون : ههههه عوفج منه يله تعاليلي

زبيدة : شديت على روحي شويه وكوه وصلت يم هارون صح الخطوات مو بعيده بس اني جاي اتعب بسرعة

اباوع لهارون بس وصلت لگفني وحضني ، شمرت حملي عليه واسمع معين يصفك

معين : عفية زبد عفية

هارون : روح جيب الكرسي بسرعة

زبيدة : ركض معين جابلي الكرسي ، كعدني هارون وانطاني مي

شربت واني الهث اليشوفني يگول داخلة بسباق مو جنت امشي تاتي تواتي

باوعت لهارون الكعد بمستوايه

هارون : عاشت ايدج اليوم مشينه سبع خطوات ابعد من كل مرة

زبيدة : تنهدت الحمدلله

هارون : الحمدلله ، وينك معين صورتها وهي تمشي

معين : اي هاك شوف زين هيج

هارون : اي عاشت ايدك ، يله اخذ راحتك هم ياله تسبح وتبدل حتى تروح للمحامي

معين : هو هيج ، محتاجة شي حبيبتي

زبيدة : ابتسمتله لا بعد عمري سلامتك

كرصني من خدي وراح يهرول للبيت

هارون : هاا حبيبي بيج حيل ترتكزين على العكازات وتمشين لو ادفعج بالكرسي

زبيدة : لا ادفعني بالكرسي صارلنا ساعتين ونص نتمرن تعبت

هارون : طيب

زبيدة : دفع الكرسي مدخلني جوه

حمزية : هاا هارون زبد شلونها اليوم

هارون : الحمدلله يوم عن يوم جاي تصير احسن

بدرية : الف الحمدلله

والله اني ناذرة بس توگف على حيلها الا اذبح تلث عجولة واوزعهن كلهن للفقرة على سلامتها

زبيدة : ابتسمتلها بأمتنان وهارون شالني وصعدني فوك

دخلني للغرفة وكالعادة ينيمني ويدلك رجليه بزيت حيواني مدري منين يجيبه بس ريحته تلعب النفس
يخلي يحمه شويه ويكعد يدلك رجليه لحد ما تبدي
بشرة رجليه تصير حمرة دم ياله يعوفني

بالبداية ما جنت احس بس هسه كامت روحي تشوط لان احس الالم بعضامي بس انجبر اضغط على نفسي
واتحمل

لأن التمارين الجاي يسويهن الي هارون كلش
جاي يفيدني واني اريد امشي بأسرع وقت

باوعت لتيمور كاعد بالبلكون ، حضرة جنابه نازوكي وتلعب روحه من الريحة فهارون يفتحله البلكون ويروح يگعد هناك علما تتهوى وتروح ريحة زفر الزيت ياله يطب

مو تيمور ضيم يچقل حتى على جدي وفنه اليگله شبيك ماخذنا حاصل فاصل ولا يگول احنه المشتري
لا والله هو المشترينا

كمل هارون التمارين واخذني سبحني وطلع بدلي وعافني ارتاح وراح يفتح الباب الي اندكت

باوعت لنور دخلت وبأيدها ماعون ، اول ما شفتها ابتسمت وبوستها

نور : جبتلج حلاوة جزر ادري بيج تحبيها

زبيدة : عاشت ايدج حبيبتي بس وينج اليوم من الصبح مختفية افتقدناج اني وديمة

نور : والله تدرين بيه هالفترة ملتهيه ويه امي وما جاي اعوفها لا اني ولا بابا

وهسه جدو جاب حلاوة ووصاني اصعدها الكم كلت اجيبلكم واروح يم امي

زبيدة : باوعت لهارون الي اخذ ملابس ودخل للحمام ولا دار بال لكلام نور

رجعت نظري على نور ، شلونج انتِ طمنيني عنج

نور : والله يازبيدة اليوم الساعة جاي تمر عليه بضيم من وره امي

سودة عليه كلش تعبانه والعلاج ماخذ من حيلها حيل ، مكسور گلبي عليها

الكيمياوي مردها مرد ، صفت فارغة لا شعر ، لا رموش ، لا صحة حتى صدرها بترو وتشوه جسمها

زبيدة : تنهدت وحاولت ابين طبيعية ، وما عسايه اگول غير الجمل الي بلكت تبرد گلبها

ميخالف الله يجعل الم هذا المرض يخفف من ذنوبها ويشفعلها يوم القيامة

نور : ادعيلها زبيدة بلكت الله تصير زينة ، اني ما اريدها بشعر ولا برموش المهم تكون عايشة اذا ماتت اموت وراها والله

زبيدة : انقهرت من شفتها گامت تبجي ، حضنتها وطبطبت على ظهرها

ما راح اكلج لتبجين ، ابجي وفرغي الي بگلبج ادري بيج تعبانه وضامه كل هالقهر بداخلج ومتگدرين
تضعفين وتنهارين خوفًا منج لتأثرين على نفسية
امج

عايشة اني نفس شعورج ، اااااه شكد جنت ارتاح من اختلي بروحي واطلع البگلبي ، ابجي حبيبتي ابجي

ونصيحة اندعي لأمج شكد متكدرين ، واني والله جاي ادعيلها تصير زينة لخاطرج انتِ

ما اريد اشوفج مكسورة ومتأذيه ، خليتها على راحتها تبجي ، ما چان بأستطاعتي الا إني اواسيها

رغم إني كاره ام هارون وما اطيق حتى اسمع بأسمها بس نور والولد كاسرين خاطري يبجون عليها شلون
الجهال

وعمي عبدالله ، اااخ يا عمي يكسر باب الگلب وهو مگابل السجادة يدعيلها الله يقويها وگوه مسيطر على
روحه لا ينهار ويبجي عليها

وهي شلون جازت حبه وحرصه عليها ، حسبي الله ونعم الوكيل

تحسرت وباوعت لنور الي ابتعدت تمسح بدموعها وتبتسم

نور : شكراً زبيدة والله اني هواي احبج

زبيدة : اني هم احبج واكيد ميحتاج اكول انج بالنسبة الي من حال ديمة ودنيا عندي

نور : والله اني هم كلش احبجن

زبيدة : احنه هم نحبج و همستلها ، صاحب هم يحبج
اباوعلها ابتسمت وعدلت حجابها

نور : مو وكته هسه هذا الكلام خلي تصير امي زينة والله كريم

زبيدة : مسحت على جتفها ، والنعم بالله حبيبتي

نور : يله من رخصتج

زبيدة : طلعت نور من الغرفة وتلاها هارون الطلع ينشف بشعره

نعيمًا

هارون : الله ينعم عليج ، زبيدة

زبيدة : هاا حبيبي

هارون : خليج ويه نور هاي الفترة تره نفسيتها تعبانة
وتحتاج احد يبقى وياها

زبيدة : اني داحاول ما اقصر بس انت ليش متتقربلها هي بالنهاية اختك وتحتاجك خصوصاً بهيج اوقات

هارون : اتمنى ابادر واتقرب ، احضنها واخفف عنها بس ما اگدر من بعد كل هالسنين بدون لا احس بنيت
حواجز بيني وبين اخواني صعب عليه اجي هسه واهدمها

عبالج سهلة عليه اشوف اخواني وخواتي مكسورين كدام عيني وحالتهم حالة

اتمنى اروح اطبطب عليهم واواسيهم بالنهاية هي امهم وهمه ميعرفون بإلي سوته فكل الحق بأيدهم
اذا رادو يزعلون عليها

خصوصاً هي بالنسبة الهم ملاك عاش العمر كله يغمرهم بحنانه وطيبته وعطفه

زبيدة : وانت ؟ ممحتاج احد يواسيك بهذا الظرف الصعب

هارون : صدگيني اني لو جنت احس بشي جان اجيت شمرت روحي بحضنج وشكيت وطلعت الي بگلبي

بس المشكلة إني ما حاس بشي ، لا فرحان لأن كصو صدرها الجانت تظهره بالحرام

ولا زعلان لأن من بعد هالسنين الله ضوگها الم الروح من ينسلب شي من الجسد

مشاعري تجاهها فارغة ، ماعندي كل شعور ، هي والغريب عندي سوه

ان الله شافها فالبعافية على اليحبوها وإن ما شافها
فهاي بعد منيتها شسويلها

زبيدة : الكلام هذا طالع من گلبك

هارون : صراحة

زبيدة : اكيد

هارون : اي طالع من گلبي

دكتوري الجنت اراجع عنه من جنت عايش ***** گلي إني ممكن اتخطى واعيش حياتي بحالة وحدة

إني اكمل بدون لا اسامح الغلط بحقي ولا احقد عليه اترك زمام الأمور لله واكتفي بالبعد والانشغال بحياتي

كملت حياتي واني مقتنع بكل كلمة يكولها الي هذا الدكتور الا هاي الجملة عجزت إني اقتنع بيها

لكن من بعد اخر وكعه وكعتها قررت إني امشي بنصيحة هذا الدكتور وابدي اعيش حياتي

سابقًا ما چان عندي حياة تخليني انام واكعد اخطط شلون اعيشها

اما هسه فصار عندي انتِ ووجودج بحياتي هدف يخليني اسعى حتى اكمل واعوض السعادة الما عشتها واني طفل وياج انتِ

زبيدة : اگدر اسألك سؤال

ذولاك شصفى بيهم الزمن ، وين راحو ؟ شصار عليهم ؟ اخذو جزاتهم بالدنيا لو لا ؟

اتمنى اعرف بس ما اريد اصغط عليك واضوجك واذا متحب تجاوبني فعلى راحتك اعتبرني ما سألت اصلاً

هارون : ماتو من سنين طويلة

زبيدة : ثنيناتهم ؟!!!

هارون : اي

زبيدة : هم چان الك يد بموتهم ؟

ابتسم بشرود وهز راسه مجاوبني

هارون : تصدگين لا

عشت عمري كله اخذ حقي بأيدي من كل اليأذيني الا ذولة ما گدرت اخذ حقي منهم لان جنت طفل بوقتها
من ماتو

من بعد مرور 5 سنوات على الحادث الصارلي سمعت بخبر وفاتهم وبنفس السنة

لسة اتذكر سلوان مات بشهر الواحد وتوفيق مات بشهر التاسع

زبيدة : تعرف شنو سبب وفاتهم ؟

هارون : اي سلوان جان شرطي وعنده علاقة بمرت ضابط معروف بالمنطقة

وچان يروحلها من رجلها يطلع خفر وبمره من المرات راجع الضابط بالليل وشايفه عدها وبيومها رفع سلاحه ونخبهم ثنيناتهم

لمن فاضو بدمهم شالهم شمرهم بالشارع وهمه بأنكس وضع كدام عيون الكل وراح سلم نفسه

وبذاك الوكت الناس تخاف تتدخل خاف يلوحها طشار
لو توكعلها بفصل يكسر الظهر

الكل عافوهم عريانين بالشارع الذبان ملتهم عليهم وهيج ضلو كدام الناس لحد ما اجت الشرطة

الدنيا انگلبت بيومها الشرطة والدنيا والناس ، اتذكر بوكتها حتى الشارع انسد

وهيج انتهى سلوان بفضيحة تكسر الظهر گدام الناس ، مات نكس وزاني وراح لربه وهو عنده
تل ذنوب شلون راح يوسعها گبره ما ادري

زبيدة : حيل وابو زايد عسى بنار جنهم بحق الحبيب محمد كون بأنكس قاع بالنار الله يخلي

كمل وتوفيق الجلب شلون مات

هارون : توفيق چان متزوج بس مو على صلح ويه مرته وچان يكتلها وبيوم من الايام من كثر الكتل
طفه عينها للمسكينة

ومرت توفيق هي اخت حاتم صديق ابويه نفسه ذاك الاجانه مرة اذا تتذكرين

اتذكر بذاك الوكت من حاتم واخوته درو بتوفيق عامي اختهم راحوله ملخو تملخ واخذو اختهم وبزرها وعافو مثل الچلب يلوب

ومن صارت كعدة عشاير عليهم حجو كلشي وطلبو يطلكون اختهم وطلگوها واخذوها تعيش عدهم

ومن بعد عملة توفيق ويه مرته اهله كاطعو ومنعو يوصللهم بعد

وبيوم وليلة انگطعت اخباره محد يعرف عنه شي ، اخوته والناس الخيرة دورو عليه لمن هلكو

يدگون بابه ، البيت فارغ مابي احد ، شغلة عايفه وما جاي يداوم ماكو فص ملح وذاب

اهله تخبلو خصوصًا امه وابو لان جانو ستوهم فاقدين سلوان وچملها عليهم توفيق الي اختفى
ومحد يعرف عنه شي

حتى وصل بيهم الحال يرفعون دعوة على حاتم واخوانه يحملوهم ذنب اختفائه بس الشرطة
ما لكو عليهم شي من حققو وياهم فعافوهم

ومن بعد مرور شهر تقريبًا بدو الجوارين يشمون ريحة مو طيبة من بيته ومن ازدادت الريحة راحو بلغو ابو واخوته يستأذنوهم يطفرون على البيت
يشوفون شبي

كل وعبالهم حيوان ميت لان الريحة جانت لا تطاق ومن اخذو الاذن وراحو طفرو مو السياج

صح بيومها مالگو حيوان ميت بالحديقة بس لگو جثة توفيق بداخل البيت

حسب السمعته بوكتها انهم من طافرين على البيت وما لاكين شي متبعين الريحة ولاكيها تطلع من داخل البيت

فراحو الجوارين ركض بلغو اهل توفيق ومن اجو وكسرو الابواب المقفولة ودخلو لجوه لگو ميت بمكانه
وبطل الشرب بأيده

بطنه منفجرة والدود ياكل بيها ، والجريذية تاكل باظافرة وشعره

يكولون من گد ما چان منظره مخيف ومؤلم للعين الابو ما گادر يتحمله وميت بنفس اللحظة

ومن شرحو الاطباء جثته اكتشفو انه ميت بجرعة زايدة مال مخدرات وكحول سببتله جلطة

ولأن جانت الدنيا ليل وهو مقفل الابواب ومطفي الاضويه محد گدر يشك انه جوه لحدما طلعت ريحة
جثة الجافت

وهيج انتهو الاثنين واني ما شاركت بموتتهم ولو بقيد شعره

رب العالمين انتقملي بدون لا ينكس اديه بدمهم ولا يعرضني لأذى اكبر بسببهم

زبيدة : دخيلك ياربي شهالنهاية المأساوية هاي

شحصلو هسه عاشو بوجه اسود وماتو بوجه اسود شلون راح يقابلون رب العالمين بعد الي سوو

هارون : الي صار بيهم هسه لا شيء من الراح يصير بيهم هناك يم رب العالمين

زبيدة : الف الحمدلله من الله اخذ حوبتك وحوبة كل واحد اذوو بالدنيا قبل الاخرة

اثاري فعلًا الحوبة تبطي بس ابد متخطي

سبحانك يا إلهي شكد رحمتك عظيمة وشكد عقابك قاسي 

__________________________________

بصائر : علكت التيبل لمب وكعدت اشرب مي ، رجعت الكلاص لمكانه وباوعت على مكان حليم ما لكيته

شعجب ما نايم لسه الساعة بالأربعة الصبح ، كمت من الفراش لزمت بطني يمه راح اموت احس روحي شثگلني

يمه شوكت اجيب واخلص ، فتحت باب الغرفة وطلعت ما لكيته بالصالة ، مشيت فتحت البردة
شفته كاعد بالحديقة

گلبي حسني اكو شي ، لفيت الروب عليه زين وطلعت للحديقة ، وصلت يمه لكيته كاعد يباوع للسمه وعيونه مدمعه

كعدت بصفه وحاجيته ، شبيك حليم ليش كاعد بهالوقت هنا شنو صاير وياك شي ، مسح دموعه وباوعلي

حليم : سلامتج مابيه شي

بصائر : احجي حليم عليك الله شو اهلك بيهم شي لو اهلي ، حباب احجي والله وضعك ممريحني

اليوم من رجعت من الشغل وانت حالك مو طبيعي انوب هسه عيونك مدمعه ووجهك اصفر شصايرلك

حليم : بصائر تعرفين مرڤت

بصائر : يا مرڤت هاي ؟

حليم : البنية الشفتيني مرة اخابرها وتعاركتي وياي

بصائر : هاا اي تذكرتها شنو شبيها ، تعارك انت وياها ؟

حليم : لا بس اليوم خابرتني وبلغتني أنها اكتشفت بالجديد انُ بيها إيدز

بصائر : يااا إيدز !!!

حليم : اي وتريد مني اساعدها وانطيها فلوس حتى بلكي تلحك نفسها وتشوف شيصيرها من چارة

بصائر : وانت شبيك هيج تتراجف ، صفنت عيله وطخت عندي

انت خايف لتكون منعدي منها ؟

اباوعله هز راسه ودموعه صارن عشرة عشرة ، ضليت صافنه عليه شلون خال ايده على راسه ويناشغ من البجي

حليم : اني انتهيت تدمرت حياتي خلص خلص انتهيت

بصائر : بس لحظة اهدئ شويه حباب وفهمني انت شوكت اخر مرة تقربتلها لهاي الاسمها مرڤت

حليم : قبل ست شهور تقريبًا

بصائر : شكد جان صعب عليه اسأله هاي الاسئلة ، ماكو مرة بهاي الدنيا مهما كانت ممكن تتحمل تسأل زوجها هيج سؤال

بس اني دست على نفسي من شفت حالته هيج واضطريت اسأله

جنت تاخذ احتياطك وياها لو لا

حليم : جنت اخذ احتياطاتي واني واعي بس اكو مرات جنت اروحلها سكران وما ادري بروحي شسوي
هناك

بصائر : حليم انت لازم تسوي تحليل ، ماعندك حل يقطع الشك من اليقين غير التحليل

حليم : حللت بصائر ، اليوم طلعت من الدوام وبوجهي للدكتور والدكتور حللي وگلي النتيجة القطعية يرادلها
6 اسابيع ياله تطلع

اني شيصبرني 6 اسابيع ، هذا مو انتظار هذا يسمو موت على البطيئ ، الله بخليج بصائر انصحيني
شسوي انتِ ستوج تخرجتي ومن الاوائل على دفعتج
اكيد تفهمين

كللي شسوي وين اروح بروحي اذا طلع عندي إيدز ، ساعديني بصائر ساعديني حبابه

بصائر : للأسف اني ما اگدر اساعدك بشي ما علينا الا ننتظر نتيجة التحاليل ومنا لوقتها ما بإيدنا غير الدعاء

ادعي ، التجئ لرب العالمين ولتحجي لأحد خلي الموضوع بيناتنا ويفضل تعوف الشغل هاي الفترة
واعتزل بنفسك حتى متعدي احد لو لا سامح الله
طلع عندك هذا المرض

اباوعله گام يلطم على راسه ويبجي

حليم : اليوم تغديت ويه اخواني بالشركة ولزمتهم اكيد عديتهم اكيد ، دمرتهم اني الله يدمرني

بصائر : جريت ايده عن وجهه وعطت ، كافييييي لتسوييي بروووحك هييييج

النتيجة بعدها لسه ما طالعة فمنگدر نحكم واصلاً نسبة انتقال فايروس نقص المناعة عن طريق الاكل
ضئيل يعني لتخاف على اخوانك

هسه اهدئ وحاول تسيطر على انفعالاتك ميصير الدتسوي بنفسك

باجر تخابر عمو تبلغه انُ تريد تبقى ويايه لحد ما اجيب واني متأكده ما راح يكلك لا

ومن صبح باجر اني راح اعزلك فوك ، اكلك وشربك وكلشي يخصك يوصلك فوك لتنزل علمود لتعدينا
لو اسم الله طلع بيك شي

تحمل هال6 اسابيع وان شاء الله خير ، حليم نفذ كلامي بالحرف الواحد

حليم : لالا اني راح اطلع من البيت

بصائر : اوكف لتطلع من البيت اسمع كلامي ، انت مو ساعدتني بفترة حملي هسه اجه دوري اردلك الجميل
خليني اساعدك

ولتخاف ما عليه شي بس هاي الاسمها سجى سرحها منا لتروح اسم الله تنعدي هم خطية

حليم : وانتِ ؟

بصائر : اني ماراح التقي بيك انت راح تعزل فوك واكلك وشربك وكلشي يخصك راح يوصلك من بره حتى نزله ما راح تنزل وهدومك اكو غسالة فوك اغسلهن المهم متنزل

حليم : واخوج امين باجر المحكمة مالته هو وديمة واني متفق ويا اروح

بصائر : باجر المحكمة ؟

حليم : اي

بصائر : طلع اي حجة ولتروح ابقى هنا ، يله گوم لم هدومك و اصعد فوك

حليم : ماشي

____________________________________

ديمة : قلب الإنسان لا ينسى ....
إنها ليست مسألة وقت او صعوبة تجاوز ، ليست مسألة إن هناك من تركك في نصف الطريق ولا لأنك
خُذلت من الشخص الذي راهنت عليه ... الحقيقة تكمن في إنك استنزفت مشاعرك في المكان الخطأ
ولم يعد بمقدورك إعطاء المزيد

اني اليوم واگفه گدام الشخص الوحيد الجنت متخيله انه اخر واحد بهالدنيا ممكن يأذيني

اباوعله شگد متغير ، سمنان وحليان لدرجة اني نفسي اول ما طب تفاجئت من هالتغير الملحوظ الطاغي على شكله الخارجي

حرفيًا ولا چنه امين نفسه الاعرفه ، قميصه الاسود وبنطرونه الي بنفس اللون يلمعن من النظافة

تسريحة شعره المرتبة وهندامه الحلو ، الساعة الي سعرها بكذا مليون تحاوط ايده وتصيح باوعولي

والعطر الغالي الي لفحني اول ما دخل للمحكمة يگول تعالو شموني

اخذت صفنه عليه صح شكله الخارجي متغير وهواي هم بس اكو شي من امين الاعرفه لسه موجود

العيون التعبانه من السهر وقلة النوم مبينه ، والهم المرسوم على ملامح وجهه التعبان ذاك وينه مبين

عيونه جانت عليه تتوسل إني اتراجع عن قراري بس هيهات

اني اكتفيت من الصارلي ورغم إني احبه بس اكو جرح بداخلي كلما اباوعله يوجعني

ومن گد ما هذا الجرح يوجع عجزت اتجاهله وفضلت
الابتعاد اليعفيني من هذا الوجع

سلمت امري لله من بعد ما سألني القاضي وحاول يحل الامور بيناتنه لكن اني موقفي كان واحد

اصريت على الطلاق وحصلته ، باوعت لأمين اخر مرة قبل لا ينطق بصوت مهضوم

امين : انتِ طالق

ديمة : وبهيج اكون ختمت قصتي ويه امين الولد البسيط النقي الحولته آني بافعالي وافعال اخته لشخص ثاني

طلعت من المحكمة واني تحت جناح معين ودنيا وهارون

دموعي الوقت كله ما وكفن ، امسحهن ويرجعن ينزلن
للأسف بيومها ما اجه على بالي غير الذكريات الحلوة
العشتها ويا واني اباوعله

وهالشي قهرني ، اني لو من البداية ماشيه صح وما مأذيه هذا الإنسان النظيف مچان دارت عليه الدنيا وضوگتني من نفس كاس الوجع الضوگته اله

وبالنهاية كل واحد بينا مصيرة ياخذ جزاته واني اعتقد اخذت جزاتي وزايد

__________________________________

بصائر :  كاعدة ووصلتني رسالة من امين ، فتحتها لكيته كاتبلي

امين : خسرتها اليوم والفضل الج

بصائر : انعصر گلبي من قريت رسالته ، اجيت اتصل عليه وما گدرت لأن حظرني

شمرت الموبايل وگمت اكل بروحي ، تطلگو يعني خلص انتهت علاقتهم واني صرت السبب

ليش ما سترت عليها ، ليش زودت حجي وشيشت اخوية عليها وهي كلشي ما مسويتلي

ليش هجمت بيتهم ودمرت حياتهم وين حروح من رب العالمين

اني طعنت بشرف البنية والفت عليها كلام مصاير ، شلون حگدر اكفر عن ذنبي

شنو ذنبها دمرت حياتها بحقدي وغلي ، ليش سويت هيج لو ما حاجيه مو چان هي واخويه عايشين تحت سگف واحد

ليش والف ليش بس شيفيد الليش بعد فوات الأوان

قاطع شرودي منبه موبايلي ، كمت دخلت للمطبخ لبست جفوف ولزمت مواعين حليم صبيت بيهن

طبعًا اني رجعت سجى لبيت عمو وكمت اني اطبخ هالفترة واصب لحليم بمواعين سفري واصيحله من يم الدرج ينزل ياخذ اكله ويصعد حتى من يكمل يغسل الصينية ويخلي المواعين بالزبل وبالليل يطلع يذبهن بالحاوية ويدخل جوه

كلش تشددت عليه هالفترة وحتى زودتها خوفًا عليه وعلى نفسي والطفلة شنو ذنبها خطية تنولد بيها ايدز
وتدمر حياتي من وره ابوها

لبست الكمامة وشلت الصينية خليتها على الدرج وصحتله ينزل

بالعادة من اول مرة يگلي اجيت حتى اروح بس هالمرة ماكو ، وخرت الكمامة عن وجهي وصحتله بصوت اعلى وهم ما جاوبني

خفت ليروح يكون صايرله شي لو مسوي بروحه شي هذا مسودن حاله من حالي ادري بي

شلت الصينية خليتها على الميز رجعت الكمامة على وجهي وصعدت فوك اشوف وينه

وصلت للطابق الفوك وتقربت للغرفة الكاعد بيها ، فتحتها وضليت واكفه وصافنه عليه

اباوعله مدنك على سجادة الصلاة بوضع السجود ويبجي بحرگه گلب ودموعه تنزل على ارضية السجادة

رغم كل الصار بيني وبينه بس ما انكر هذا الموقف هواي هزني واثر بنفسيتي

والي اكتشفته انه جان كلش خايف وتعبان لدرجة انه انهار بهاي الطريقة

الشي الغريب بالموضوع انُ احنه البشر نعصي رب العالمين ومن نوكع بشدة نرجع قاصدين ابوابه لا ونتشارك ويا دواخلنا والشي المخوفنا

رغم اليصيرنا ما هو الا زرع احنه النزرعه بادينا واحنه بالنهاية الي لازم نحصده

انتبهتله گام من السجود وسلم مباوعلي ، عيونه الزرك رايح لونهن وصايرات چبود من البجي

حاچاني بصوت مبحوح

حليم : انتِ شعندج هنا امشي نزلي لا اعديج

بصائر : صحتلك علمود الغدة ومن ما رديت عليه قلقت وصعدت اشوف شبيك

حليم : بصائر النتيجة بعد اسبوع تطلع

بصائر : اعرف وكافي لتبجي گول يا الله ، انت كاعد على سجادة رب العالمين وهو ديسمعك

اندعيله بلكت يستجاب دعائك ، وبالمناسبة اني گلبي بارد تره

احس انُ مابيك شي وان شاء الله يكون احساسي بمحله

حروح اصعدلك الصينية

حليم : لا اني اجيبها بس انتِ نزلي

بصائر : نزلت جوه داخلة لغرفتي وهو نزل اخذ الاكل وصعد

وهيج مر الاسبوع واليوم راح يروح هو يشوف نتيجة التحليل ويرجع

واكف كدامي ، الوجه اصفر وعيون صايره نگره من البجي والسهر

طول الأسبوع اسمعه يناجي رب العالمين ويبجي ، چان اسبوع صعب مو بس عليه لا حتى عليه اني

ابتسمت محاولة اطمنه ، روح وان شاء الله خير

حليم : قبل لا اطلع منا اريد اشهدج على شي والله يسمعنا

اني اذا رحت منا وجبت النتيجة وطلعت النتيجة سلبية وما مصاب بالإيدز ييحرم عليه كل درب الحرام منا لمن يطمني التراب

وانتِ ورب العالمين جاي تسمعوني وشاهدين على كلامي ، بس اطلع من هاي الشدة بخير اترك كلشي
حرام جنت اسوي

وابتعد عن كلشي يغضب الله لو جان هذا الشي مجرد حجاية لو نظرة

واذا طلعت النتيجة إيجابية واني مصاب فمعناها هذا عقاب رب العالمين الي على كل حرام سويته بحياتي

بصائر : طلع من البيت بعد ما ختم كلامه واني كعدت لازمه القرآن اقرأ وگلبي يدعيله

يارب كون يطلع ما مصاب ، يارب انطي فرصة ثانية
وخلي يثبتلك صفاء نيته عسى ولعل توبته تكون بهذا الاختبار يارب

ضليت كاعدة والوب لا ساعة ولا ثنين والله ولوما اني بشهر الثامن چان كلت راح اجيب گد ما لوتني بطني

صارت السبعة وطب حليم لازم بأيده التحليل ، چان ساكت وهادئ لدرجة خوفني حتى اسأله

بلعت ريكي واخيرًا قررت انطق واسأله ، هاا حليم بشر شطلع ؟

حليم : ما مصاب

بصائر : شنو ؟

حليم : النتيجة سلبية ماعندي إيدز

بصائر : تقربت وگفت گباله ، لعد شبيك ليش هيج باهته ملامحك

بدون ميجاوبني تقرب حضني بقوة ، حسيت بأديه تشد على دشداشتي

شويه وكمت احس بدموعه تنزل على رگبتي ، بدت شهكاته تتعالى وجسمه يختض من البچي

ضليت واكفه بمكاني وعايفته على راحته لحد ما هدئ وابتعد من نفسه

ابتسمت وطبطبت على ايده ، الحمدلله على سلامتك

حليم : بصائر خلي نبدي بداية جديدة

بصائر : هااا !!

حليم : اي اي ، خلي ننطي فرصة لعلاقتنا اني ما اريد اطلكج والله هسه راح يرزقنا بنية

ليش نشتتها خلينا ننطي رواحنا فرصة لخاطرها هي
اني كلشي ما اريد منج لا اهتمام ولا حب ولا طبخ
ولا اي شي

بس ابقي هنا لتعوفيني وخلينا نربي هاي الطفلة ونكفر الأخطاء السويناها سوه

سنديني واسندج بصائر اني محتاجج ، الـ6 اسابيع المرن عليه ذني جانن عدال 6 سنين بالنسبة الي

اني الله كتبلي اليوم عمر جديد واني ما اريد اضيع هذا العمر هيج

اريد ابني بيت وعائلة تكونين انتِ بيها وبتنه ويانا ، شمدريج انتِ يجوز الله نطق جياد وخلا يرفض
لأن يدري هاي الطفلة بيها صالح النا

بصائر كافي مكابر اني ادري بيج تحبيني واني ما اجذب كاعد احس بشي تجاهج وهذا الشي اني حابه

انطيني فرصة اصلح علاقتنا خلي نكتب عمر جديد
لهاي العلاقة لنهجم هذا البيت اذا مو لخاطري فلخاطر
هاي الطفلة

باچر عگبة نتحاسب على كلشي يصيبها ليش نخليها تتعقد وتعلعل بسبب امها وابوها المطلگين

خلينا نهديها حياة حلوة وآمنه تعيشها بسلام عسى ولعل الامان الراح نقدمه الها يكون سبب بغفران
ذنوبنه واذيتنا لغيرنا

بصائر : خليني افكر بالموضوع

حليم : يعني اكو امل تقبلين

بصائر : راح احاول رغم إني ما مقتنعه

فزيت من رجع حضني وابتعد باسني نن من راسي

حليم : وعد يا بصائر اذا قبلتي تبقين راح اتغير واكون شخص ثاني احسن من العاشرتي بألف مرة

بصائر : ان شاء الله يله من رخصتك حروح اتمدد

حليم : لتنامين اني طالع اجيب عشه من بره خلي نتعشه سوه اليوم بس بالأول خلي اصلي صلاة
شكر لله

بصائر : هزيت راسي وكعدت وهو راح يركض صلا ركعتين شكر وطلع جاب عشه من بره واجه

تعشينه بكل هدوء وهو الابتسامة شاگه حلگه ومبين أنه حيل فرحان لان طلع سليم

دعيت الله يهديني ويهدي ، ثاني يوم راح للدوام بس تأخر بالرجعه واني عفته على راحته حتى ما خابرته

رجع بالليل محمل ، ضليت صافنه عليه

هاي شنو العلاليك ؟

حليم : اليوم طلعت اشتريت چم حاجة الي بعد الدوام وشفت محل يبيع ملابس مال اطفال فگلت خلي انزل اشوف شكو بي وما لكيت نفسي الا محمل وطالع

تعاي شوفي تعاي جبت شغلات تخبل انوب ملابس البنات هيج تسودن والله يعني مو طبيعيات يشگن الحلك

باعي هذا الشورت الاحمر ، يايابه اتخيلها لابسته والزرور سمان واللحم طالع منا ومنا وحاطة شفقة
على راسها ومسويه سلفي

يبووووووو

بصائر : صراحة ما گدرت ما ابتسم على تصرفاته ، اباوعله اجه كعد يمي وكام يراويني شمشتري

حليم : باعي ذني الجواريب بعد روحي بطول اصبعي يصيرن

بصائر : الله فدوة شلون حلوات وصغيرونات

حليم : شوفي ذني القراصات مالت هاي باربي مدري فلا

بصائر : هههههه ليش هي منيلها شعر حتى تجيبلها قراصات

حليم : يمعودة ضميهن عود من يطلعلها شعر ، باعي جبتلها ورديات وحمر ادري بيجن انتن البنات تحبن الوردي والحماريات

بصائر : بس اني ما احب الوردي ولا الاحمر

حليم : لعد شتحبين ؟

بصائر : الاخضر

اباوعله كرمش ملامحه وهز راسه بخفه

حليم : شبي الاخضر هم حلو يخبل

بصائر : ابتسمت ورجعت اشوف باقي الغراض ويا

وضل حليم طول الـ3 اسابيع هاي يوميه جايب حاجة واني اكيف احس حلو اهتمامه بالموضوع ولو هالاهتمام اجه متأخر

وحتى اكون صريحة اني فترة حملي كلها ما حسيت بيها ولا فرحت وعشت ايامها مثل كل ام

يمكن بس اخر 3 اسابيع من حملي تونست بيهن لأن جان الن نكهة خاصة حتى بزواجي ما استطعمتها

خلصن ايام حملي بصعوباتهن ودخلت بالشهر التاسع وتحضرت للولادة

لان اخاف اجيب طبيعي وماعندي الجرئة اتحمل ثاني اصعب الم بالحياة من بعد الم الحريق

ففضلت اسوي عملية واخلص من هذا الخوف وحليم ايد فكرتي وفعلًا هذا الي صار واني اليوم رايحة اولد

وصلت للمستشفى ويه سهير وخالة رميم وحليم توجهنا لغرفة الدكتورة المشرفة على حالتي سوتلي فحص وطلبت مني اروح ابدل

طلعنا من غرفة الدكتورة ولاكتنا امي وامين واسلام
فرفحت روحي من شفتهم ركضت شمرت روحي على امي اشم وابوس بيها وابجي

هناء : على كيفج يمه على كيفج

بصائر : بعد عمري يمه بعد عمري انتِ ادري بيج ميهون عليج تعوفيني بهيج يوم والله ادري بيج

هناء : لا يمه ما اعوفج اميمتج اني لو شما تسوين
على كيفج يبعد امج اني وياج لتخافين واخوتج هم وياج

بصائر : باوعت لأخواني وابتعد عن امي متقربه منهم بتردد ، حضني اسلام وبادلته واني ابجي

اموت عليهم ذوله مو اخوتي لا والله ابويه وروحي الثانية واني عمت عيني شسويت بيهم

ابتعدت ابجي وباوعت لأمين الي اجه باس راسي ومسح على خدودي

امين : صيري سباعية ولتبجين وان شاء الله تطبين وتطلعين مثل الورد انتِ والحلوة الي ببطنج

بصائر : سامحني خوية فدوة اروحلك اني هواي غلطت بحقك وهجمت بيتك من الله لا يرحمني
خليتك مكسور بليه مرتك

سامحني الله يخليك ولتضل زعلان مني اني بدونكم ما اسوه والله

امين : مو وكت هذا الحجي هسه ، انسي كلشي صار اليوم وركزي على ولادتج

احنه هنا كلنا منتظريج يله حبيبتي روحي وبأذن الله ولادتج يسيره وهينه

بصائر : ان شاء الله ، مسحت دموعي واجيت اروح ويه خالة وامي وسهير ووقفني صوت امين

انداريت عليه بلهفة ، نعم امين گول

اباوعله تقدم وگف كبالي وحجه بصوت ناصي

امين : اني سامع انُ الحامل اثناء الولادة يكون دعائها مستجاب

اذا صدك ندمانه على كلشي سويتي اريدج تدعيلي حتى ديمة ترجعلي

هذا كل الاريده منج

بصائر : ححـ حاضر بعيني انت وديمة والله اندعيلكم تنجمعون سوه واني الممنونه هم

حدعيلكم والله ادعيلكم بس كون الله يستجابلي

امين : ان شاء الله يستجاب الج ، يله روحي

بصائر : رحت ودخلت بدلت ملابسي وساعدتني سهير
قبل لا ادخل لغرفة العمليات ابتسمت بوجه سهير

امين يكول على اساس دعاء الحامل مستجاب واني حدعيلج رب العالمين يرزقج بأطفال ويكحل عيونج وعيون جياد بشوفتهم

سهير : آمين يارب

واني هم اريد اكلج شي قبل لتدخلين للعملية ، بصائر اني ما حاجيت جياد بموضوع اخذ الطفلة من الاساس

وتره كل السويته حتى امنعج من قرار الانفصال وهم انطيج فرصة تفكرين بالموضوع وتتراجعين عنه

ما ردت تسقطين الطفل وترتكبين بحقه هاي الجريمة والحمدلله نجحت إني امنعج

وهياتج اليوم كملتي حملج على خير وحتدخلين تطلعين هاي الحلوة وتاخذيها لبيتج

بصائر : يعني ما جنتِ ترديها مثل ما گلتي

سهير : مستحيل اسمح لنفسي اخذها منج واحرمها من حنانج ، اني صح اتمنى الطفل امنية بس هذا ميعني إني اكون انانية واسلب ضنى غيري واخذه

هاي مو اخلاقي وبعمرها ما راح تكون

بصائر : ان شاء الله رب العالمين يرزقج بدل الطفل عشرة ما دام هيج نيتج صافية وگلبج نظيف
ما اتوقع ربنا ممكن يكسر بخاطرج

سهير : والنعم بالله اني مؤمنة انه راح يعوضني خير

بصائر : ان شاء الله ، ابتسمتلها ومشيت داخلة لغرفة العمليات انطوني بنج وبلشت العملية

خلصت واني ما حاسه بالوقت كل الاتذكره إني اندعيت لديمة وامين وسهير وجياد وراهاجبت بخير وسلامة وبعدها نقلوني لغرفة خاصة

وهناك نمت وكعدت على الم فضيع ، نسيت اني جايبه ونسيت اني شعندي بالمستشفى كل الي ببالي شلون
اخر هذا الالم

ضليت الوب وكوه مصبرة روحي ، شويه شويه بده الالم عندي يصير اخف من اول

باوعت لگيت امي وخالة وسهير ونسوان حمويني مگابلاتني

بس الوجوه ابد متبشر بالخير

رميم : الحمدلله على السلامة

بصائر : اجت امي بوستني هي والكل ، رديت عليهم الله يسلمكم

اجت الدكتورة تطمنت عليه وفحصتني

الدكتورة : الحمدلله على سلامتج عزيزتي

بصائر : الله يسلمج دكتورة بس بنتي وين اريد اشوفها

الدكتورة : حبيبتي بصائر انتِ اكيد مؤمنة بالله وتعرفين انُ المؤمن مبتلى

وخير الناس الي يصبرون على ابتلائات رب العالمين وانتِ يا گلبي كسبتي الجنة والشفاعة

اصبري على هذا البلاء وكولي الحمدلله ، طريقج مو سهل وان شاء الله اجرج على رب العالمين

بصائر : شبيج دكتورة تره مدافهم منج شي

اجت تجاوبني وانفتحت باب الغرفة ودخل حليم شايل بأيده طفل ملفوف بملحف وردي وابيض

من شكل الملحف عرفتها هاي بنتي ، تجاهلت كلام الدكتورة واشرت لحليم يجيني

تقدم وگف گبالي ، سالته هاي بنتي ؟

حليم : اي

بصائر : اخذتها من ايده وخليتها بحضني ، اباوعلها ما شاء الله بيضة حمرة ونايمة بهدوء

رف گلبي عليها وكإنما صحت بيه شي نايم ، رفعتها بدون شعور وبستها وشميتها واوف يا يمه شنو
من احساس حسيت

نسيت كلشي ،نسيت إني ما اريدها ونسيت إني مجنت طايقتها ، بس خليتها بحضني حرفيًا كلامي كله تبخر

ردتها ، اي من لزمتها ردتها وتمسكت بيها وكإنها حبل نجاة بالنسبة الي

ابتسمت واني اباوعلها وشلت راسي داحجي حليم لگيته يباوعلي وعيونه حمر دم

رجعت نظري على الدكتورة ، شكو دكتورة شبيج انتِ والكل

مو هياتها الطفلة بحضني وكلشي مابيها ، شبيكم ؟

الدكتورة : حبيبتي بصائر للأسف من بعد ولادتج
بسلامة واخذ الطفلة للصفح

يؤسفني ابلغج انُ الفحوصات ظهرت على الطفلة اثار الاصابة بمتلازمة داون

___________________________________

زبيدة : كاعدة ادلك رجليه ودخل هارون

هارون : السلام عليكم

زبيدة : وعليكم السلام حبيبي وينك تأخرت

هارون : جنت يم جدي وصاني اوديج لبيت اهلج

زبيدة : ما عرفت ليش

هارون : لا والله

زبيدة : تمام بس تعال ساعدني

اجه ساعدني ونزلني لجوه ، وصلنا لبيت اهلي دخلت لكيت خواتي واخويه كاعدين ودادا وخالة وئام وبيبي كاعدات

صار ظهر مره لابسه حجاب نيلي عليه ، حركت العكازة متقدمة لگدام

داگول السلام عليكم وسكتت من شفت البنية ام الحجاب النيلي

رفعت العكازة بوجها وحجيت ، انتِ شعندج هنا ؟

ضي : شلونج زبيدة

زبيدة : عساج لا شفتي لوني

شعندج هنا ورجلج الشفية الحرامي وينه شنو بس لا مشاريعكم انتِ ويا خسرت واجيتو هنا نتبحون علينا مثل الجلاب حتى نلفيكم

معين : گعدي زبيدة ، گعديييي كلتتتتت

جدي جابها واجانه ، شلون منين محد يعرف كل الفهمنا انُ جدي يريد يحجي ويانه بخصوص شنو هم محد يعرف

يوسف : گعدي زبيدة شبيج واكفه جنج شمعة فگر

زبيدة : وهاي استارحيت تفضل جدي العزيز

النوح : قبل لا احجي عن سبب وجود ضي هنا اريد اسولفلكم سالفة

قبل اكثر من سنة اني ساومت زبيدة وهارون حتى يرضون يتزوجون بعض مقابل اشياء تفيد مصلحتهم

ديمة : نعرفها هاي السالفة جدو

النوح : لا حبيبتي الوصللكم شي والحقيقة شي ثاني

اني ساومت هارون على امور خاصة بي هو يعرفها

اما زبيدة ، فقبلت تتزوج هارون بشرط إني اقبل اسفر معين اعالجه حتى يمشي

واجيب القتلو ابن دنيا واسلمه للعدالة

انتقم من راسل وهبه الدمرو حياة ديمة

واخذ حقكم من مبين الباگ حلال ابوكم وشرد وخلاكم تعانون

زبيدة : باوعت للكل اندارو عليه مصدومين

معين : شنو هذا الحجي زبيدة ؟

دنيا : كل عقلج تحجين انتِ ذبيتي روحج هالذبة على حسابنا

ديمة : ليش هيج سويتي زبيدة

زبيدة : دمعت عيوني ، لتضلون تلوموني اني كل السويته حتى ارمم من الدمار الصارلكم ولو شويه

والسويته اني واجب عليه وانتو لو جنتو بمكاني جنتو حتسوون نفس الشي

تخيلو يعني اتنازل عن رجلين معين لو عن حق ديمة ودنيا وحقنا كلنا

مستحيل جنت اقبل إني اسويها ، اني جنت وما زلت لأخر لحظة بعمري افديكم بروحي كلكم

انتو البقيتولي من ريحة ابويه وامي ما افرط بيكم ولا بسعادتكم

فدوة لحد بيكم يلومني اني السويته كله هذا بس لأن احبكم ومتهونون عندي

معين : زين جدي انت شلون گدرت تستغلها هذا الاستغلال وانت تدري بيها مستعدة كلشي تسوي
علمودنا

دنيا : مع الأسف عليك جدو متوقعتك قاسي لهاي الدرجة

هيج هانت عليك وصية بابا ، امنا يمك تالي متالي تستغلنا وتضغط على اختنا حتى تحقق مصالحك

النوح : السويته اني كله جان مجرد حجي حجيته حتى اضغط عليها

اني مستحيل جنت اخلي معين بهذا الحال لو ما اخذ حق ديمة لو حقج

اني صنت امانة ابوكم وبالعلامة سألوها اني جنت اعرف قصص كل واحد بيكم قبل حتى لا تصير مشكلتها هي وهارون

اعرف السويته غلط ومو صحيح اني اعترف بس صدكوني كل السويته إني استخدمت لساني وهمه
صدگو بس لو نجي للواقع اني ما اسويها

انتو احفادي قطعة من گلبي ، دمي ولحمي اسلخ جلدة عن عضمه اليتقربلكم

حتى هارون الاوراق الجنت اهدده بيهن كلهن جذب واني حاركهن من زمان

تتوقعون إني ممكن اترك لزمة عليكم وانتو سندي من بعد الله وولدي الخسرتهم

اني ما سويتها ويه الغريب تردوني اسويها وياكم

و اني چان عندي غاية وحققتها وشوفة عينكم اختكم هسه عايشة مرتاحة بجال رجلها ورجلها هم يحبها
وما مقصر وياها

احجي زبيدة انتِ بعدج متردي لهارون

زبيدة : يمكن الشي الوحيد اليخليني اسامحك هسه
هو هارون

حياتي ويا هي من ضمن هواي اشياء ايجابيه حصلتها من هذا الزواج

شوفة معين وهو يفتر گدامي بطولة الحلو

راحة ديمة من بعد انتهاء سالفة راسل وهبه

استقراري

دنيا حبيبتي اني اسفه لان ما كدرنا نحصل المجرمين الاذوج ونسلمهم للعدالة وهذا الشي الوحيد الياكل بگلبي لسه

دنيا : اني الله عوضني بيوسف وتميم ، الماضي راح والله ويا وحساب الاذوني واذو هواي امهات يم
رب العباد هو اليتكفل امرهم

زبيدة : والنعم بالله

اما مبين

فآني منتظرة اشوف النتيجة حالي من حالكم

النوح : والله ما اعرف شحجي وشكول

اول شي البقاء في حياتكم ، مبين انطاكم عمره

زبيدة : الكل شهك بصوت متفاجأين من السمعنا

اباوع لخالة دموعها تتسابق على وجها

وئام : ششـ شلون مات

ضي : انتحر

من بعد ما اخذني وسافرنا خارج العراق محولين كل فلوسنا لبره

استقرينا بال***** وهناك مبين شغل الفلوس وسوه مشاريع درت ذهب عليه

عشنا هناك 3 سنوات ، 3 سنوات من العذاب بالنسبة الي و3 سنوات من التمتع والسعادة بالنسبة لمبين

كثرة الفلوس خلت مبين يطغى ويسوي العمايل هناك ومحد يگدر يحجي ويا

شرب ونسوان ومخدرات وقمار اشكال والوان

عشت تلث سنوات بذل واهاين وضرب ، كسرلي خشمي مرتين وجبرني جبر اتعالج حتى احبل منه
وميضل يحس بالنقص

قبل عشر شهور مبين سوه سهرة هو وجماعته السكط عندي بالبيت

جابو نسوان وشربو واخذو ممنوعات بيومها فقدو على الاخير و

زبيدة : اباوعلها سكتت متنهده ، قدملها جدي مي اخذته تشرب واديها ترجف

كملت شرب ورجعت تكمل

ضي : متتخيلون شكد صعب عليه احجي الصار بس راح احجي حتى ابري ذمتي وما اكون بنظركم الحقيرة الانانية التفكر بس بنفسها

ابنكم وهو سكران انطه مفتاح غرفتي القافلها عليه خوفًا من جماعته الهم

ودخل هو وجماعته اعتدو عليه وطلعو ولا كإنما صار شي

بليلتها اني صابتني صدمة وضليت جامدة للصبح

كعد مبين وشاف حالي ، ما ترددت لحظة إني احجيله بسببه شنو صارلي

والحجيته خلا ينهار لدرجة انه ياخذ سلاحه ويطلع يقتل كل جماعته

وينتهي بي المطاف موجه السلاح لراسه وضاغط على الزناد محرر طلقة استقرت بدماغة من هول السمعة والصارلي بسببه

مبين مات گدامي واني گلبي ما رف عليه ثانية وحدة ، اكتفيت اني ابلغ الشرطة اجوي اخذوهم

واخذوني للتحقيق ومن بعد ما شافو كاميرات المراقبة الخالها مبين داخل البيت اكتشفو إني
مالي يد بإلي صار

طلقو سراحي وتوقعت انُ بعد الصار راح اگدر اعيش بشكل طبيعي

لكن تفاجئت بعد شهور بنفسي من طلعت حامل

خفت لا اكون حملت من جماعة مبين وعرضت الجنين للخطر وسويت DNA وطلع الجنين من مبين

قررت إني انزله ورحت انزل الطفل لكيته متكون وصاير روح ما گدرت انزله

خفت ربي بساعتها لا اقتل روح واذيها ، اخذت قرار إني اخلي الطفل ومن اجيبه انطي الكم وابري ذمتي امام الله من المسؤولية

الووو سالي جيبي الطفلة لهنا وتعاي

زبيدة : نباوع على بنية لابسة لبس خليجي دخلت وشايله بأيدها طفلة

ضي : هاي الامانة الجانت عندي اخذوها اني ما اگدر اربيها

كلما اباوعلها اتذكر الحادثة الشنيعة الصارتلي والي تسببت بوجودها

اني ما اگدر اخليها عندي ، من يوم الجبتها واني حتى مداگدر اباوع بوجها

مداگدر اتقبلها وما اريد اظلمها ويايه ، اخذوها انتو

واني سميتها وسيلة كلت عسى ولعل تنسون كرهكم لابوها وتحبوها على حبكم لهذا الاسم

هاي اول امانة صارت يمكم

اما الامانة الثانية فهي حقكم السلبه منكم مبين
اني جايه ارجعه الكم ما ناقص ربع دينار

ما اريد فلوس مبين ولا اي شي منه كل الاريده إني اعيش حياتي بعيد عنه وعن اي شي يخصه

فلوس مبين موجودة واني وبنته ورثنا وماعندي مانع احول الفلوس الكم شوكت متحبون

اني حجيت العندي وهسه مضطرة اروح طيارتي باجر

وهاي الطفلة امانه بركبتكم راعو الله بيها

___________________________________

"بعد مرور عامين "

بصائر : اندك الجرس ، رحت فتحت الباب دخل حليم باسني من خدي

حليم : السلام عليكم حبيبتي

بصائر : وعليكم السلام حبيبي الله يساعدج

حليم : ويساعدج يارب

وينها حبيبتي ؟

بصائر : ابتسمت وباوعتلها طلعت تضحك من الغرفة

حليم : هلا بگلبي هلا بروحي هلا بحياتي

يييمه صدقة لهالخدود التخبل وينها حبيبتي وينها

بصائر : اباوعلها ركضت شمرت روحها بحضن حليم تبوس وتحضن بي وتسولفله شگد هي مشتاقتله
وهو متفاعل وياها

حليم : جبتلج كيكة وجبتلج عصير وجبتلج نستلة وجبس ومارشملو وحليب

حياة : الي ؟

حليم : كلهن الج ليش جم حياة عندي اني

ييييمه افييييش شنو هالريحة الحلوة تعاي اكلج اليوم اني اكلج

بصائر : ضحكت عليها من ضمت روحها تحضنه وكامت تضحك مطلعه سنيناتها

بعد گلبي رحت فدوة لهالسنون الحلوة

حليم : يله حبيبي ميت جوع تره اني

بصائر : يله هسه اصب بس انت روح

راح هو أخذ حياة ودخل للغرفة

حياة او حياتي طفلة من ذوي الاحتياجات الخاصة ام من المصابين بمتلازمة داون

وجودها غير حياتي وحياة حليم رأس على عقب ، كملنا علمودها وحبينا بعض علمودها ، عشنا علمودها
وحنعيش علمودها

حياة واسمها عليها ، رب العالمين زرع بداخلنا حب تجاهها مينوصف

نخاف عليها من نسمة الهوى ونبجي بدموع دم لو گالت اخ

حليم مهووس بيها يموت عليها لدرجة مو طبيعية
وسبحان الزرع المحبة هاي بگلب كلمن يشوف حياة

بيت جدها يموتون عليها ، عمامها واخواني يجون خصيصًا لبيتنا علمودها وهي حبيبتي ام لسان ودمها
يلعب تجبر الواحد جبر يحبها

بعيونها الزرك وشعرها الاشگر وخدودها دمها الحلو
وطيبتها

گدرت تكون الحياة الحقيقية الي ولأبوها

ولهذا اليوم لو يرجع بيه الزمن اكطع لساني ولا اتخلى عنها ، حياة بنتي هي الحب الحقيقي بالنسبة الي

ما حبيت ولا راح احب انسان بهاي الدنيا گد ما احبها
روحي معلگه بيها لدرجة ابجي على فقدانها وهي ويايه

حياة : سوسو وينج

بصائر : ابتسمت وجاوبتها اجيت يا بعد گلبها لسوسو

________________________________

ديمة : طلعت من شركة النوح وباوعتله ، كالعادة
يوميه لازم الگه سيارته بوجهي

كلما اطلع من الدوام اشوفه موكف السيارة وكاعد شيريد ما اعرف

شغلت سيارتي متجاهله وجوده

اني ديمة النوح المدير التنفيذي لمشاريع التصميم المتعلقة بشركات النوح

اعيش بسكر نوع اول وكلية وحدة وصفر طحال ، عايشة حياتي بين اهلي وناسي اليحبوني ويموتون
عليه

فشلت بتكوين الصداقات والحب والزواج بس كسبت نفسي وصرت صاحبة شغل وجوه ايدي ملايين رغم صغر سني

انسانة صاحبة شخصية ومركز بدوامي وطفلة تافهه
داخل البيت

هاي شخصيتي وهيج عايشة والحمدلله مرتاحة ، تقينت من خلال السنين والظروف العشتها

انُ الإنسان سهل الا يخسر كلشي الا نفسه

واني هذا السويته كسبت نفسي وخليت الظروف حافز وصلتني للآني بي هسه

دك موبايلي شفته معين

الووو هااا حبيبي

معين : جبتي الكيك

ديمة : هسه رايحة اجيبه محتاجين شي

معين : لا بس استعجلي تره ستوني راجع من الشغل وميت جوع

ديمة : هياتني مسافة الطريق ما راح اتأخر

رحت لمحل الكيك ونزلت جبت الكيكة ورجعت للبيت
فتحت الباب ودخلت

تلكتني لولو بالباب ، فتحتلها اديه يمه عماتي حبيباتي
بوستها واجيت اشيلها بس عافتني وركضت كعدت بحضن معين

عفيه معين اللازگه بي هاللزگة ، ابتسمت وصعدت لغرفتي ، طبعًا وسيلة ومعين بيناتهم علاقة فضيعة

احس وكإنما هو لگه بهاي الطفلة اولاده الماتو وهي لگت بي اهلها الماوعت عليهم

شگد توسلنا بمعين يتزوج ورفض يگول اني عايش حياتي لوسيلة والكم

كملت تبديل ونزلت جوه تغدينا وبدينا نحضر لحفلة راس السنة

اجت زبيدة تركض ولا جنها ستوها حامل وميصير تتعب روحها

طبعًا زبيدة عليها 3 شهور تعمدت هي وهارون يأجلون سالفة الاطفال لحد ما تمر على عمليتهم ثنيناتهم اكثر شي سنتين وهمه مشو بنصيحة
الدكتور

اجت ساعدتني هي وهارون بالتزيين ووسيلة تكمز هنا وهنا وامي وزبيدة يركضن وراها يخافن لتتعور
وهي يمه ام الوكاحة متكعد وضاحكة علينا بسوالفها

بالليل اجت دنيا ، خطية هالفترة متگدر تطلع منها لهنا علمود سهير لأن طبت بشهرها

اي حبيبتي سهير الله كرمها ورزقها من بعد سنين ، بدون عمليات وبدون اي تدخل طبي حملت بقدرة الله

وان شاء الله ابنها بعد شهر ينور على الدنيا بخير وسلامة

بلشنا الحفلة سوينا عشه بره ويه بيبي وجدو ونور وصاحب عصافير الحب

كملنا عشه واحتفلنا بعيد رأس السنة

اجت الساعة 12 ودخلنا بالسنة الجديدة

اباوع لزبيدة حاضنه هارون وتضحك يمه هالبنية ولا تستحي

دنيا كاعدة بصف يوسف وتيم بحضنها

معين شابگ وسيلة ويلوكلها كيك

بيبي وجدو وامي ودادا كاعدين يدردشون كالعادة

لمض موبايلي يعلن عن وصول مسج

فتحت الرسالة لكيتها من رقم غريب

قريت محتواها

كل عام وانتِ اول واخر وحدة تسكن گلبي ، كل عام وانتِ حب حياتي ، احبج

تنهدت وسديت الموبايل

اااخ منك امين اااخ

.
.
.

اسمحولنا نتوقف هنا ونطلع من بيت النوح سادين الباب ورانا بكل هدوء

لهنا نكون ختمنا رواية " الموت الحي "

الرواية الي شگد ما تعبتني وتعبتكم لكني حسيتها تستحق هذا التعب

شاركت وياكم حياة الابطال ، ظروفهم ، معاناتهم ، فرحهم وحزنهم وحتى اصعب لحظات حياتهم

اتمنى اكون من خلال هالرواية وصلت لكلوبكم وخليتكم تحسون نفسكم ولو جزء بسيط
من الابطال والقصة

وبالنهاية اشكركم على حبكم وتفاعلكم وتواجدكم الي
مضاف للرواية غير السعادة والفرح

اعذروني لأن شلعت گلوبكم ادري بروحي والله بس طمعانه بلطافتكم وادري محتضوجون مني

وهم تطلبوني بارت اضافي عن حياتهم حاليًا بس تستقر اموري انزله الكم ان شاء الله

واخيرًا اعتذر منكم في حال لو بدر مني شي تجاهكم بقصد او بغير قصد ، واتمنى متذكرون مني غير الامور الطيبة

لتنسوني من دعائكم

كل الحب والتقدير الكم جميعًا

اختكم براء الموسوي ❤️