#سبيل_الغيب
"الحلقه الواحد وعَشرون "
سهى
ـ لأ والله إبداً ما فاتحته وأذا أفتحها كدام عينك هي مقفوله .
ضرغام ـ لعد الفلوس ويـــن راحت ولج لا مليون ولا ثلاث ملايين ما تنعد شعد علمود أعدلج گومة فلوس رايحه .
ـ ما أعرف ، والله ما مأخذه منهن ولا افكر أمد ايدي على فلوسك تنعدم عافيتي وتنشل ايدي اذا افكر ابوكك والله اذا أحتاج الفلوس ما اطلب منك تعرفني أنتَ من ذاتك تنطيني المصرف اليه ولأبنك .
ـ حبيبي عيوني أنتِ اني ما جاي أتهمج أنعدم من الوجود أذا افكر اتهمج أو أشك بيج بس جاي أسألج وجاوبيني لن راح أتخبل وين راحت يا إسلام .
ـ عدهن مره ثانيه وأني وياك بلكي غلط بالحساب .
ـ شنعد سهى مو مال عد الفلوس ناقصات هواي وهاي عود ما حاسبهن من زمان كلت يوم افضي واكعد اعدهن هيج أجيت اخذ مبلغ محترم افرح بي اختي بان ، وأجيت ونص الفلوس طايره !! .
ـ والله ما اعرف شگولك .
ـ منو داخل البيت بغيابي احجيلي علمود أخلي احتمالات .
ـ محد غير عمتي هيفاء وشاهيناز وأختي نهى .
ـ لا هذن مستحيل تطلع منهن أمي وأختي شلون يمدن إيدن لا مستحيل حتى إختج أعرفها متسويها
أعرفها زين ، تحب الفلوس بس متبوك .
ّ ـ بداخلي الحمدللة نظرتك بينا عاليه وما شگيت بيها
معقوله أحمد !! ما أعرف ليش خطر عـلـىٰ بالي لن هو دائمًا يحجي لـ نهى عن الاموال والاملاك ويغار من أخوه .
ـ شبيـــچ صفنتي .
- تشك بإحد .
ـ لأ او بالاحرى ما اعرف دخت بيمن أشك بس اذا أشك بإهل البيت لو حرامي داخل البيت بغيابنا ولو احنه ما باتين خارج البيت بس من سويتي عمليه يوم واحد بالمُستشفى .
ـ وهسه شتسوي .
ـ شسوي ما اعرف گومي قفلي الباب وتعالي نعدهم سوه والباب بيوم اجي والكاه مفتوح كتلتج عمل شعبي
ـ ماشي حبيبي ، رحت قفلت الباب واجيت يمه عدهن كلهن وخلاهن بالخزنه وياهن الملفات والاوراق ما اعرف شسوى الها وقفلها .
ـ اذا تحتاجين فلوس تعرفين تفتحينها مو .
ـ لا ما احتاج عود اطلب منك .
ـ تمام حبيبي هذا هو ، هنا الج وجهالنا والله المن قابل هسه قفلتها بس أني أكدر افتحها والباب يضل مقفول موجود او غايب عن البيت فهمتي سهى لو اعيد .
ـ فهمت حبيبي .
ـ يلة گومي نروح تأخرنا عـلـىٰ خطوبه بان .
ـ كام عدل ملابسه ورشيتله عطر وشال ليث وطلعنا من بيتنا وصلنا هو دخل غرفة الضيوف وأني توجهت عليهن ، لكيتهن متجهزات وبان كاشخه وفرحانه ، الف مبروك تستاهلين كُل الخير .
بان ـ شُڪراً .
سهى ـ كان ردها بارد فشلتني ، عفتهن رحت على نهى وقبل لا اوصل سمعت صوتها هي واحمد متعاركين ،انفتح الباب وصار أحمد بوجهي نهى موجوده .
احمد ـ سهى !!
أي موجوده اتفضلي ، ضرغام موجود
ـ اي دخل غرفة الضيوف .
سهى ـ عبرني وهو مبتسم دخلت عـلـىٰ نهى لحد الأن ما متجهزه شوكت تخلصين وشبيج وجهج نار .
نهى ـ ما بيه شيء من ورى هالأثول يعل الگلب .
ـ أكدر احجي وياج .
ـ بشُنو
ـ حجيت الها وضلت مصدومه .
ـ بيمن تشگون .
ـ ما اعرف والله ما شگ بإحد وحايره الفلوس وين راحت
ـ والله ما أدري همزين عجبني موقفه الحلو من ما شگ بيه الحمدللة
ـ قابل ما يعرفج .
ـ بشر ما تعرفين شوكت يتغير عليج ليش الواحد صار يأمن على نفسه علمود يامن على فلوسه .
ـ اي والله ،يلة گومي تجهزي ننزل هسه يجون
كامت لبست وساعدتها بالإختيار ونزلنا سوه أني وياها وضرغام اجه حسيته ما مرتاح ، هاا حبيبي .
ضرغام ـ اخذي ليث يمج هسه ارجع ، طلع مستعجل ما عرفت وين راح
نهى ـ ضرغام شبي ويـــن راح .
سهى ـ ما اعرف هو منا دايخ علمود سالفة الفلوس
ـ شگد راح الكم
ــ هواي رايح النا فلوس سگتي وخليها بالملايين
ـ يمه صدك تحجين .
ـ يمعوده شبعت قهر عليه والله تعبه مجمعهن والايجارات .
ـ الله يعوضه والله ما يستاهل .
سهى ـ امشي نكعد العيون علينا ، رحنه كعدنا يم الضيوف وبان قدمت الضيافه وطالعه تخبل بس مغروره وبلشت مراسيم الخطوبه وعقدت وتم گلشي على خيـــࢪ ومبارك عليها .
" خلصت الحفله ورجعت البيت قبله غيرت ملابسي صايره بسرعه أتعب وحملي ثكيل تعبتيني يا يمه أكثر من إخوج .
" دخل ضرغام وحضني ويبوس بخدي هاا شصار اتفقوا عـلـىٰ گلشي .
ضرغام ـ أي الحمدللة تم گلشي بس الاخ يريد هالأسبو؏ يأخذها .
ـ وتالي شقررتوا .
ـ الوالد حجه وياه واتفقوا على موعد بهذا الشهر يتزوجون .
سهى ـ بيها الخير عمري ، نمنا وليث بالنص نايم بينا محتل الساحه نوب يحضن أبوه نوب اني للفجر كعدت لكيت ضرغام عايفه وحاضني من ظهري ما تكدر ولا لحظه اذا مو حضن ، غطيت ليث وانداريت عليه بسته من خشمه شجابك اهنا .
ضرغام ـ حضنج جابني .
سهى ـ يمه شحبك ، كملت نومتي بحضنه والصبح كعدت هو رايح الدوام ، وكمت لملمت شغل البيت كالعاده مثل كل يوم والروتين المعتاد
" مرت الايام وبان كملت كل تجهيزاتها لعرسها الصراحه قله اروح روحاتي الهم ينعدن لن تضايق من وجودي ما مرحب بيه لحد الأن ما عدى عمتي تريدني وتريد ليث .
"كعدت على صوت أتصال وهو ما موجود رايح الدوامه ، جريت التلفون نهى شعدها من الصبح الو
نهى ـ هـلأ مبين من صوتج لحد الام نايمه .
ـ أي والله البارحه ليث ما خلاني أنام مصخن وضليت سهرانه ، شلونج .
ـ الحمدللة عـلـىٰ الله ، أكولج تروحيــــن الحنه مو
ـ ما اعرف ما عزمتني لحد الأن بس لازم نروح مو نسوان أخوانها .
ـ عشتوا نسوان إخوانها ، عمتي كالتلي تحضرين ما عليج منها فـہ راح اروح لخاطر عمتي هيفاء .
ـ لعد اني هم احضر ، تعالي يمي نتمكيج سوا ما بيه اروح صالون .
ـ يا صالون يمعوده على اساس متعلمين الا بصالونات هذا يسمونها تهنبل وجذب ، شو مكياج وموجود ونخلي ونترتب .
ـ هم صُدك تمام تعالي إنتظرج .
ـ ورجلج شلون خاف عيب يرجع تعبان .
ـ ما أعتقد يجي البيت من المُستشفى كبل العياده لن الجو بارد والنهار قصير والناس تجي من وكت وعنده مراجعين هواي ، تعالي شتردين من عنده حتى لو يجي بس يتغدا ويروح ما يطول .
ـ تمام اتغدى واجيج
ـ هـلأ بيج ، نهيت الأتصال وبوست ليث نايم بصفي واتصل حبيبي هلا .
ضرغام ـ نايمين حبايب روحي شلونه البطل .
سهى ـ نايم حرارته زينه واني توني كعدت وليش ما كعدتني اسويلك ريوك .
ـ نوم العافيه ، أنتِ الليل كله سهرانه يا ريوك أكلت بالمستشفى .
ـ بالعافيه لعد اكوم أسويلك الغده .
ـ اتغدى واطلع بليل اني يمج صاير ما اشوفكم هواي
هالأسبوع باقي عندي يوم اجازه اخذه واضل بالبيت
ـ ماشي حبيبي .
ـ دربالج عـلـىٰ ليث لاتخلينه يطلع برى الجو بارد ولايشرب ماي بارد عينج عليه .
ّ ـ بعيوني .
ـ يلة گلبي أترخص منج .
ـ الله وياك ، أنتهى الاتصال كمت سبحت ورتبت الغرفه ونظفت البيت وخليت الغده على الطباخ وكعد ليث يمشي بخطواته الحلوه عيني طوله وليدي هلا بالنام وكعد والنوم بعيونه بعد كام يصفك حضنته ابوس اللي يصفك ويحب الطرب تعال ناكل هميه .
" كعدنا نأكل اني وياه ومشغلين أفلام كارتون واخذت صوره ورسلتها اله كبل شافها ودز
ضرغام ـ فدوة رحتلكم .
سهى ـ يباو؏ ويأشر ويسولف لوحده وكل شوي يبوسني من خدي طالع عـلـىٰ ابوك تحب البوس ، أشر عـلـىٰ بطني ويسولف
ليث ـ دادا .
سهى ـ إي دادا هايہ أختك اوي اكله وليدي عيني هو
اندك الباب عفته كاعد يباو؏ وطلعت نهى وياها جنطتها وملابسها اجت خالتك الخبله .
نهى ـ وينه وينه تعال لك اوي ابوس الحلو حبيب خالته شلون بوسه طيبه .
سهى ـ شافها وركض إلها شالته تبوس بي وتشم بريحته ولج گافي اكلتي لاتعضينه فدوة ينزعج .
ـ ما ينزعج مني تعال شوف شُنــــوْ جبتلك .
ـ طلعت اله العاب وتسولف وياه وفرحان بيها هاا جبتي كل أغراضج .
ـ اي ومتعاركين أني وأحمد .
ـ خيـــࢪ شبيـــكم .
ـ يمعوده محتاجه فلوس مصرف ما عندي وهو صــاࢪ أشهر راتبه ما اعرف وين يودي عدا يدز لرشا مصرفها واني ماكو ولا ربع خبلني أساله وين راتبك يگولي ميخصج ادري لعد اني شُنــــوْ بحياتك .
ـ هو من يومه هيج مهمل .
ـ زواج الأكشر اي والله ، عوفينا منه ومن سيرته صدك فلوسكم ما لكيتوها .
ـ ويـــن نلگاها راحت بعد وهو خطيه انقهر وتالي كال فدوة الكم .
ـ ما يستاهل والله تعبه خطيه وهو ما يشبه أخوانه يحب عمله ومخلص بي وما عنده سوالف مو زينه حتى ما عنده اصدقاء يتلقي بيهم بليل لن ما اشوفه يطلع
ـ اي والله الليل كله يمنا ، هو كلش ما يشبه إهله بس بعد حظه يلة فدوة اله شنسوي بعد
ـ ما نكدر نحجي ونكول حرامي بيت خاف يرجعون علينا بس هما بينهم نحسين واحد يغار من الثاني بالاخص رجلي يابه شُڪثر نحس ما يحب الخير لغيره ، عشت وياه وعرفت شُنــــوْ من طينه طينته .
ـ الله يهديهم ، يلة نكوم نتجهز هم يلة ، دخلنا الغرفه
وليث انطيته تلفوني والعاب وبلشت اخلي الها مكياج وخلصت وهي رجعت تخلي اليه وما حسينا بالوقت الا سمعنا صوت ضرغام يصيح علينا .
ضرغام ـ وينكم حبيبي ليث بابا أني اجيت لك هلا لك هلا يابه فدوة لطولك ولك قزم وتمشي والله أخاف عليك يندار عمر ابوك الك هلا هلا .
سهى ـ شاف ابوه وشهك بفرح وعاف گلشي وراح ركض الها وضرغام فتح حضنه ويهلي بي يبوس ويشم اكله اكل باوع النا .
ضرغام ـ اعتذر ما شفت شسون نهى شلون عيني .
نهى ـ هلا عيني الحمدللة الله يسلمك ويخليك .
ـ ماطول إهنا اليوم استلمت الراتب وهاج حصتج.
نهى ـ والله خجلتني منك اريد سلامتك ياعيني .
ـ اخذيهن أني هم خيج خالة ليث بعد .
ـ فدوة ربي يحفظك ويوفقك ويحفظلك ليث وأمه .
ـ امين يارب ، سهى خلصي وصبيلي غده اريد اروح
سهى ـ من عيوني عفت نهى ورحت صبيت اله وهو كاعد ويبوس ب ليث ترى نغار .
ـ تعالي .
ـ فتح حضنه وباسني وبسته من عيونه وطبعت الحمره ومسحتها وهو يضحك شلون عيون حلوة ابوسهن .
ـ فدوة رحتلج .
ـ كعدت وياه ما عفته الا خلص يأكل واني صافنه عليه تدري مهوسه بحبك .
ـ ادري مبين عليج واني هم مهوس أڪثر منج والله
نهى ـ يحجون واحد صافن بالثاني وأني صافنه عليهم ربي يحفظكم لبعض ، سهى تعالي محتاجتج .
سهى ـ إجيت ، رحت الها هاا نهى .
ـ ما ضل وكت هم يلة بس منو يوصلنا هسه راحن .
ـ ضرغام من يطلع العياده خل يوصلنا يلة غيري ملابسج لما يكمل واغسل المواعين ونروح .
ـ تمام .
سهى ـ ضلت بالغرفه تغير ملابسها واني خلص وغسلت المواعين وهو غير ملابس ليث وكشخه فدوة للمرتب .
ـ طالع عـلـىٰ امه مرتب .
ـ لا طالع عـلـىٰ ابوه ، ضحك فدوة لهل الضحكه الحلوة ناكعه بگلبي ، خلصنا وطلعنا للقاعه ونهى ويانا بالطريق أتصل عليها أحمد .
أحمد ـ وين أنتِ من الظهر طالعه وما تكولين خل أشوف زلمتي وينه .
نهى ـ يم أختي مو دزيتلك رساله وبلغتك وگتلي روحي .
ـ بس گتلج اني اوصلكم وما رديتي خبر .
ـ طلعنا ضرغام وصلنا .
ـ ماشي يا نهى ترجعين ويصير خيـــࢪ .
سهى ـ انتهى الاتصال وضرغام باوع إلها بالجامه وهز رأسه ما مرتضي .
ضرغام ـ سهى ليث ما اوصيج عليه .
سهى ـ ماشي حبيبي ، وصلنا وهو نزل ويانا دخلنا القاعة ويبوس ب ليث وكرصني من خدي وتوكل الله وياه .
" دخلنا وباركنا الها وهي ما ردت وأبتعدت عنا واني ونهى وحده تباو؏ الثانيه مو صوجها صوجنا حضرنا
نوبة العلمت ما ضرت .
نهى ـ أمشي نكعد ساعة زمان ونرجع مو ادامي حقيره ومغروره من يومها اني لو مخربه زواجها جان خوش بس كلت خطيه تحبه .
- سگتي يمعوده ختولي مو مال مشاڪل ، كعدنا والمشكله محد كابلنا وحدنا بس أني نهى وليث بحضني حيل ضجت وخطيه عمتي تجي يمنا شوي ويدزن عليها وتروح .
ـ الوضع مقرف كرهت حتى روحي كاعدين بين ناس ما يردوني منقرفين من وجودي عابت شكولهن أمشي نأخذ تكسي ونرجع البيت
ـ أمشي شلت ليث وطلعنا لوحدنا بدون ما نكول الهن نهى وكفت تگسي كبل توجهنا البيت وصلتني البيت هاا تروحيــــن .
ـ أحتركت من وراهن رايحه اخذ دوش .
سهى ـ تمام نتخابر عود ، راحت وفتحت الباب أنفتح كبل !! شسالفه ضرغام قفل الباب بيده !! معقوله نسه يقفله وطلع مستعجل !! .
" دخلت البيت وليث وراي ، افتريت بالبيت ماكو شيء لاحظت الكنتور مفتوح !! فتحته قطعه من ملابسي الداخلية بالكاع ! . أبداً ما اعوف الكنتور مخربط لا اني ولا ضرغام اثنينا مرتبين معقوله من نهى كلبت الملابس وكعتها !! هسه اني شبيه خبصت الجو ، شلتها اريد ارجعها لمكان ليث صرخ عفتتها وركضت وصار احمد شايله وهو يبجي
إحمد ـ لك شبيـــك تنعوص اني عمك باوعلي .
سهى ـ أنطيناه ميسكت إحتمال أستغرت من عندك أخذته منه
ـ لكيته يفتر وجبته خفت عليه ، شُنــــوْ راجعين من وكت وين البقيه ، راجعه لوحدج !! .
ـ لأ !! نهى رجعت وياي ليث تنحس من أصوات الاغاني العاليه ورجعنا .
ـ لعد نهى ويـــن .
ـ راحت البيت .
ـ وحدج بالبيت .
ـ لا ضرغام موجود .
ـ وينه شوو سيارته ماكو .
ـ يم التصليح عن أذنك اريد انوم ليث دخلت وقفلت الباب وراي ما اعرف ما ارتاحيت اله متت خوف ركضت الغرفه وقفلتها ونفسي عالي ودگات گلبي سريعه يمه ما ارتاحيت لنظراته واسألته ابلغ ضرغام لو لا ! ، لا خاف يكول تتهم إخويه وتبطل عليه احسن شيء أقفل الباب دائماً واذا عادها ابلغ ضرغام خل هو يتصرف .
" للمغرب كاعده وبابي مقفول واندك الباب كمت أشوف منو أحمد من ورى الباب هاا احمد شتريد .
أحمد ـ شبيـــچ قافله الباب فتحي يمعوده جايبلكم عشه ابويه جاب للبيت ودزلكم حصتكم .
سهى ـ تسلم ما جوعانين اتعشينا
ـ فتحي الباب واخذي ليش قافلته شگو يمعوده محسستني حرامي لما حماج وحسبة إخوج .
ـ بعدني ما حاجيه اجه ضرغام صاح عليه ماي بارد ونزل عـلـىٰ گلبي .
ضرغام ـ هاا أحمد شعندك .
أحمد ـ ضرغام عبالي بالبيت جبتلكم عشه أبويه جاب للبيت ودزلكم حصتكم
- لا جنت بالعياده ماشي مشكور تعبناك ويانا .
سهى ـ أخذ منه العشه وراح وفتحت الباب .
ضرغام ـ خوما حجه شيء او فتحتي الباب .
سهى ـ لأ ابداً والله هايہ جيتك فتحت الباب .
ضرغام ـ ماشي أشوفلي حل وياه ،أخذي العشه فايت اسبح ليث وينه .
سهى ـ أخذت العشه وهو سبح واجه وليث نايم تعشينا وما طلع ضلينا ڪاعدين هو يتصفح بتلفونه وأني العب ويه ليث ، عينه بالتلفون صُدك حبيبي .
ـ هاا حبيبي
ـ باجر ما أحضر العرس عود لأتزعل .
ـ ليش .
ـ ما مرحب بيه ولا بإختي نهى رحنا اليوم وأختك لبستنا وحالنا حال الغرب حتى الغرب احسن من عدنا عبالك ذابحين عزيز گلبها .
ـ عـلـى راحتج گلبي .
ـ ما تزعل
ـ ليش ازعل ، اللي يريحج يريحني مكان ما مرحب بوجودج عوفي وهما الخسرانين وهاا حتى المباركه ما اعرف السبعه ما تروحيــــن خاف أمي تأخذج ولخاطري وما اعرف أيش كولي الها ضرغام ما يقبل
ـ ماشي بس تدري حيل ضجت يعني هي إختك واني زوجة إخوها المفروض بهيج يوم مهم اني متواجده
ـ شتسوين لعقليتها زعطوط ما تعقل خليها .
ـ والله لخاطر رحت .
ـ يسلم خاطرج حبيبي ، هايہ شتريد !
ـ مـنو ؟
ـ سولاف
ـ منو هايہ
ـ بنت خالتي ما اعرف دازه رساله هلاو راسلتها تشوف رساله متجاوب
ـ وليش تجاوبها
ـ شُنــــوْ ليش غير هي مراسله وأني اجاوب خاف محتاجه شيء .
ـ لاتجاوبها ، إخذت التلفون وحظرتها .
ـ هايہ إشســويتي
ّ - ما ترد لا عليها ولا على غيرها ممنو؏ .
ـ عيب هالتصرفات أني مو جاهل تعلميني ويامن احجي وبعدين أنتِ متربعه بگلبي محد يأخذ مكانج عوفي الافكار اللي تنكز برأسج وتعالي بحضني .
ـ شمر التلفون وأخذني بحضنه متجاوبها .
ـ ميخالف تدللي .
ـ أغار
ـ غاري منو لازمج بس غيرتج بحدود احب تكون عندج ثقه بيه وبحبي الج .
ـ كلش عندي ثقه بيك مقبطه
ـ تعجبيني ، تعالي هسه خل نتفاهم اليوم طالعه حلوه شو تعالي .... ....
ـ رحت لحضنه وأنغرمت بحبه ، گلشي بعلاقتنا حلو نضحك نسولف نتزاعل نغار عـلـىٰ بعض وكل يوم يمر اني مرتاحه بقربه ما شفت شيء منه وجع گلبي ما ردلي طلب يعصب الاوقات تطلب العصبيه والعين الحمره على گولته
" بهل الايام عمي راح العمره فرحنا اله يستاهل هواي يتعب بشغله علمود يوفر حياة حلوه لعائلته ، ودعناه وباسني من كصتي .
قيس ـ هسه راضي عليج دام أبني مرتاح وسعيد وياج ، خوش مره معدله دربالج عليه وع ليث .
سهى ـ ان شاء الله عمو ضرغام باوعلي وأبتسم وغمزلي فرح لن شاف ابوه يحجي وياي كلام حلو اجه وكف بصفي وشايل ليث .
" ودع الكل وصلناه وراح الله وياه "
" رجعنا البيت وضرغام راح المطعم هو لزم الشغل بمكان ابوه والعياده خصص اوقات يفتحها والحمدلله كدر يسيطر بين الدوام والشغل والعياده رجال ينشد بي الظهر رغم التعب والمسؤوليه وبيتين عليه ويفتر عـلـىٰ أخوانه الصغار ويتفقد أخواته حنين بشكل مفرط .
" اليوم مباركة بان اللي ما اجت ودعت ابوها جانت مسافره شهل عسل وخابرت أمها تبجي واجتمعن كلهن يرحن الها عمتي عزمتني رفضت اروح ونهى كذلك وراحن هي والبنات وخالاتها وعماتها كومه خوما مثل حظي لا مباركة لا شيء يلة الحمدللة المهم حبيبي عـلـىٰ رأسي وابني يفتر بطوله الحلو ومنتظره بنتي بخير وسلامه .
" جنت بالبيت الجبير وهنا راحن ونهى عوجت حلكها
نهى ـ عبالي تروحيــــن جان خنكتج والله .
سهى ـ لا ضرغام ما يقبل شگوو رايحه يمعوده نشبع قهر ونرجع ، واكفين نحجي وأحمد صاح عليها
أحمد ـ نهى تعالي .
نهى ـ شتريد .
سهى ـ روحي رجلج يريدج أني أروح الـ بيتي ارتاح حملي حيل متعبني .
ـ روحي عيوني وضرغام شوكت يجيج .
ـ ما يجي من المُستشفى يروح عـلـىٰ محمد مرات يرجع يسبح يغير ملابسه مرات لا حسب مزاجه .
ـ ماشي اذا ما اجه اجي عليج ضوجه بين ما يرجعن مكاميع اذا ما نمت .
سهى ـ ضحكت ماشي إنتظرج ، طلعت من البيت وتوجهت لبيتي دخلت نومت ليث ودخلت سبحت وغسلت ملابس وطلعت برى انشرهن وصار بوجهي أحمد .
أحمد ـ سهى أريد احجي وياج .
بخوف ـ بشنو تحجي وياي .
ـ شبيـــچ خايفه
ـ لا ما خايفه .
ـ سهى أني أحبُّچ أكثر منه ، أعشقج أتنفس هواج عايش عـلـىٰ وجودج بالدنيا ، كل مكان أنتِ متواجده بي أعبده وأقدسه ، أنتِ العايش علمودها ، أنتِ حَـبيبتي ! ، عوفي وتعالي وياي خل ننهزم !! .
ـ شتحجي أنتَ !! وكعت سلة الملابس من إيدي عن أذنك كمت تخربط بسوالفك ، مشيت سريع البيت اريد اوصل الباب صــاࢪ شبعده وهي لحظات وصار كدامي بعد عن طريقي دفعته ما كدرت اله سحبني وسد حلگي واخذني يجر بيه بالصاله عوفنيييي يا حقير يا حب تحجي أنت ولك اني زوجة إخوك
همس ـ أحبج ومن زمان وقبله واريدج وميت بيج وسويت المستحيل علمودج ما أكدر أصبر واتحمل أكثر اليوم أنتِ اليه !!
سهى ـ يحجي وأحس شيء اخترق جسدي نغزه مثل نغزه الابره !!
والدنيا اخذتني بصوب بعيد بعيد كلش أدفع وارفع بيدي بس بطىء واضرب بس بخفه أيدي صارت ثكيله كلش صار خياله كدامي وهو مبتسم وبعدها ما اذكر شيء ... ...
" أصوات عاليه بس ما أشوف شيء أحس روحي داخله عمليه مو كادره احرك أي جزء من جسمي بدأت الرويا تتوضح كدامي بين وضوح وبين ضباب شفت ضرغام !! بصوت ثكيل حبيبي 💔😔
يَتبع .. ..