الموت الحي

البارت السابع والثلاثون/الجزء الثاني

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

بصائر : كاعدة واهز برجلي من التوتر ، باوعت للساعة صارلهم ساعتين من اخذوها للمستشفى

يربي بس لا صار بيها شي انوب يبلوني بيها

سمعت الباب البره ينفتح ، طلعت من الغرفة لكيت امي واسلام ساندين ديمة الي كوه تمشي ، وجها
ذبلان والكانولة تتوسط كف ايدها

اسلام : تعاي حبيبتي فتحيلنا الباب

بصائر : تقربت فتحت باب غرفتها تحت انظار امي الاكلتني اكل

اباوعلهم دخلوها للغرفة مددوها وامي اشرت لأسلام يطلع حتى تبدل لديمة

طلع اسلام واني ما كدرت اتحمل نظرات امي طلعت ورا وسديت الباب

هاا شلونها ؟

اسلام : والله موزينة سكرها مفول 300 خطبة

بس فهميني هي شبيها ، سامعة شي ، شايفة شي ، متعاركة ويه امين ليش هيج سكرها فجأة ارتفع
وهي الصبح كلشي مابيها

احاجي امي متجاوبني مخبوصة بيها وبس تبجي
انتِ كليلي

بصائر : هاا ممـ ما اعرف يمكن متعاركة ويه امين

اسلام : وهذا اخوج الثاني شبي كل ساعة متناكر وياها

البنية حبابه ودرة مالت الله وفوك هذا مريضة ومتتحمل شجا وياها غير يراعي وضعها

والمشكلة اني ما عاجبتني هالوضعية بس استحي اكعد واحجي ويا تبقى هاي حياته الشخصية ومالي حق اتدخل بيها

بصائر : تحمحت وجاوبته ، ما اعرف شكلك بس الله يهدي سرهم ويتصافون

اسلام : آمين ، يله اني رايح للمحل اذا احتاجيتو شي گبل اتصلو عليه

بصائر : ماشي الله وياك حبيبي

طلع اسلام واني طبيت للغرفة ، هستوني داكعد ودخلت امي

بعدني داسألها عن وضع ديمة وفاجأتني من رفعت ايدها وصفكتني راشدي

هبط گلبي ولزمت خدي صافنه عليها

هناء : عمري وحياتي ما تخيلت إني ممكن في يوم من الايام امد ايدي على واحد بيكم

بس الظاهر اليوم اجه الوقت الاستخدم بي ايدي العمري ما فكرت ارفعها عليكم

بصائر : تضربيني يمه !! تمدين ايدج عليه علمود وحدة حقيرة مثل هاي ؟

هناء : واكسر راسج هم

لج ادبسز اني كلت عندي بنية خلي افضفضلها وجبتج وحجيتلج الي بگلبي حتى تخففين عني مو حتى ترحين تعيرين البنية

وهاي عود اني بلغتج وكتلج ما اريد ديمة تدري اني سمعتها تسولف ويه سهير واريد الموضوع يبقى سر بيني وبينج

كلتتتت لو ما كلتتتت

بصائر : فزيت من جرتني من بلوزي تصيح

هناء : جاوبينييي كلتتتت لووو لا

الليل كله اني كاعدة اشكيلج وميته من القهر على البنية وعلى الصار بيها

وحذرتج كتلج يمه ما اريد ديمة تدري احنه ندري هي مالها ذنب بالصار وياما بنات مثلها انضحك عليهن

واني ناظرتلها مثل ما ناظرتلج وما اريدها تعرف
وتنجرج واني ادري بيها جاي تحاول تنسى وتعيش حياتها

تالييي متالييي تكسرين حجياتي وترحين تبثين سمج عليها وتعيريها ولج ليييش لو ميتة البنية لو مجلوطة
من الخوف شتردين تسوييين

وفوكاها هي جاي تداري وتعالج في سبيل تبقى محافظة على صورتها كدامنا تاليها تجين انتِ
تهدمييين كل البنتتتته

بصائر : يطبها مررررض خليييي اخوييييه يعرفها على حقيقتهااا ويفكناااا من استهتارهاااا

رجعت صفكتني راشدي اقوى من الي قبله

لييييش تضربينيييي ليييييش ، ضوجتتتج حقيقة جنتتتتتج بنتتتت الشوارع اممم الزلللللم امممم
الشقققق

هناء : من اليوم يا بصائر تنسين عندج ام وما تردين تهجمين هالعائلة فتعذريني من هاللحظة بيتي يتعذرج

بصائر : ششـ شنو شنو بيتج يتعذرني

هناء : مثل ما سمعتي ، منين ما اجيتي رجعي وجودج اذا بي مضرة لنفسج ولأخوتج رجعي يمه

مع الأسف انتِ مو مثل قبل الظاهر المكانه الانتِ بيها خلتج تنسين اني شلون ربيتج وربية اخوتج

عمري ما ربيتكم على قساوة الگلب ولا علمتكم تنتصرون وانتو تفضحون غيركم

بس الظاهر يايمه تربيتي ما فادت بيج ويمكن البيئة الحواليج أثرت بيج اكثر من هالتربية والحنان

وما دام هيج خليني اقسي گلبي شويه عسى ولعل قساوتي هاي تفيد وياكم

بصائر : بجيت ولزمت ايدها ، يمه حبابه لتسوين هيج

هناء : روحي بصائر ولتحاجيني بعد انتِ مو گد الامانة ومتستحقين اعتبرج بنتي وافتحلج گلبي

وللأسف خانتني امومتي وكلت خلي ادردش ويه وحيدتي حتى ارتاح كل وعبالي عندي بنية حنينة
وطيبة ماممكن تستغلني وتسحب لساني حتى
تلزملها لزمة على مرت اخوها

اني طالعة يم هاي المسكينة وانتِ اتصلي على رجلج ورجعي لبيتج ما اريد اشوفج 

بصائر : عافتني وطلعت واني صافنه

امي طردتني ومن ورا من ؟ من وره وحدة منحطة مثل ديمة !!

يعني هي تغلط واني ابتلي بس لان واجهتها بهذا الغلط ، زين مو المفروض هي التنطرد ليش اني
الي وكعت بيها !!

مسحت الدمعة الفرت من عيني وتقدمت لبست صايتي وحجابي ، جريت جنطتي وطلعت من البيت

شفت سيارة تكسي اشرتلها وصعدت ، الطريق كله اني
صافنه وماعندي اي ردة فعل

معقولة امي تطردني علمود موقف تافه مثل هذا ، مداستوعب والله مداستوعب

قاطع حبل افكاري صوت السايق وهو يبلغني إنه وصلني ، حاسبته ونزلت

سلمو عليه الحرس ما رديت عليهم دخلت جوه وشفت خالة والبنات كاعدات

سلمت عليهن من بعيد وصعدت لغرفتي ، فتحت الباب ودخلت ، شمرت غراضي وكعدت

اباوع للغرفة شلون مهوسة ماعندي حيل اكوم اعزلها عفتها وضليت كاعدة بمكاني

ما اعرف شكد مر وقت بس شفت الباب انفتح ودخل حليم يدندن ، اول ما شافني سكت

حليم : هاا بصائر انتِ هنا ، شوكت اجيتي

بصائر : قبل جم ساعة

حليم : منو جابج

بصائر : تكسي

حليم : شنو قلة سيارات ليش ما خابرتيني اني امر عليج فشلة من اخوانج وامج شيكولون عليه

بصائر : هو يحجي واني عيني على ركبته المزينة بعلامات العاهرات

حليم : مو احجي وياج شبيج

بصائر : ما رديت عليه ، تمشيت فتحت باب الغرفة وطلعت نازلة جوه ومن شفت الاضوية كلها مطفيه
انتهبت انُ الوقت متأخر

فتحت باب الصالة وطلعت للحديقة ، رغم الجو جان بارد ثلج بس النار الي بداخلي مجان مأثر بيها
هالكم من البرد

كعدت ودموعي حارة تجوي وجناتي ، سؤال واحد وجهته لنفسي

ليش ؟

ليش هالتعاسة المفاجأة الحاوطتني من كل صفحة ، شسويت اني ، لا ام تريدني لا رجل بحالي لا اخوة
اكدر اشكيلهم

ليش ؟ شنو هالذنب العظيم السويته ؟

لا رجل بي حظ ولا اهل يستقبلوني وين اروح ويييين
لطمت على وجهي وبجيت

وين اولي وين امي اول ما حست وجودي راح يأثر على جنتها الساقطة طردتني ورجلي عايش حياته ومتونس ويه الگ****

زين واني مو خطية ؟ شنو ذنبييييي ؟

انهاريت من البجي لا خليت شعر ولا خدود ، احس نار وتاكل بيه اكل

ومن شدة قهري وانهياري بلحظتها ما حسيت بنفسي الا اتصل على امين واحجيله كلشي يخص ديمة

بدايةً من علاقة ديمة براسل لحد ما باكت فلوس اختها و تزوجت امين

_________________________________

ديمة : نايمة وحسيت بحرارة على كصتي

فتحت عيوني امين كاعد يم راسي ولازم كصتي اباوعله ابتعد ومسح على شعري

امين : هااا سلامات سمعت بيج متخربطة اليوم

ديمة : بلعت ريكي مباوعتله مبين عليه مسامع شي لان ملامحه طبيعية

احم اي شويه صعد سكري

امين : سلامتج

ديمة : شكراً الله يسلمك

باوعت لملابسه مبين هستوه اجه من الشغل لان سابح ، اجيت اكوم حتى احضرله الاكل وهو لزمني

امين : وين رايحة ؟

ديمة : اسويلك اكل اكيد جاي جوعان

امين : ارتاحي ميحتاج ما اشتهي

ديمة : كعدت عدل ، شنو متشتهي انت شايف نفسك شلون دتتعب وفوكاها دتكول ما اشتهي

هو اكيد الواحد من التعب ميشتهي مرات بس مع هذا اجبر روحك على الاكل حرامات تروح تتمرض

شبيك امين ليش دتباوعلي هيج

امين : اول مرة اشوف وحدة متخربطة ومريضة هيج تطلع حلوة

ديمة : بلعت ريكي وخليت شعري وره اذاني ، صدك تحجي لو دتجاملني لان مريضة  ؟

امين : ليش اجاملج مو انتِ نفسج جنتِ تكليلي انج تشوفين روحج احلى وحدة بالبنات

ديمة : صح بس انت بالذات بعد الصار مجان عبالي بعدك تشوفني حلوة

امين : اني عمري ما تغير شكلج الخارجي عليه

شكلج الخارجي نفسه بس الداخلي تغير ، تغير هواي واني راح اتغير حتى اتناسب ويه التغير الشفته على
شكلج الداخلي

ديمة : ما فهمت قصدك

تجاهل سؤالي وكمل كلامه

امين : انتِ من اجمل النساء اللمحتهم عيني وهاي حقيقة لا يمكن انكارها ، انتِ جدًا جميلة

ديمة : رفرف گلبي من سمعته ، ابتسمت بصدق ولزمت ايده بستها

شكراً على هالكلام الحلو متتخيل شكد جنت محتاجته وخصوصاً منك انت

امين : العفو وهسه رجعي تمددي

ديمة : رجعت تمددت وهو غطاني وكعد يم راسي يتحسس جبيني

شدتسوي ؟

امين : اشوفج خاف مصخنه

ديمة : ارتاح صدكني اني زينه ، مسح على راسي وتقرب نام بصفي

امين : اذا تحسين بشي كعديني

ديمة : تمام

نمت وثاني يوم كعدت الحمدلله احسن من البارحة ، كمت على حيلي سبحت وطلعت لكيت خالة كاعدة

ترددت اصبح عليها شريد اگلها اذا سألتني عن كلام بصائر البارحة

دخلت للمطبخ وتفاجئت من شفت خالة تباوعلي وتبتسم

هناء : هااا صباح الخير يا حلوة تعاي حبيبتي

ديمة : بس سمعتها دمعت عيوني

خخـ خالة بخصوص الحجته بصائر البـ.... ، قاطعتني مأشرة بأصبعها على حلكها

هناء : اشش كافي سدي الموضوع ، البارحة بصائر حجتلي كلشي وكلتلي جان عندج صديقات موزينات شسمهن بله اي هبه ورسل

وعلى اساس جانن جايباتلج حجي مو حلو بس ابوج الله يرحمه تدارك الوضع ونقلج لغير كلية وخلصج منهن بفضل الله 

ديمة : صفنت بوجهها ، هااا ؟

دمغتني وهي تضحك

هناء : وكعتي گلبي البارحة وعبالي اكو سالفة جبيرة ضامتها هلي خوفتج هيج تالي طلع الموضوع تافه

طاحظج اي والله لعد يمه اذا صديقاتج مو خوش انتِ شكو قابل انتِ الكتيلهن يمشن بهالدرب

ديمة : ززين هي شمدريها

هناء : تكول انها سمعتج تحجين ويه سهير بالموبايل

المهم يمه حبيبتي اخذيها نصيحة من امج لتصيرين مهزوزة واي موقفج يهدمج

عادي منو بينه بهالدنيا الميتعرض لمواقف صعبة لو ميغلط

منو الكلج احنه معصومين حتى نخاف من المواجهه اذا غلطنا ، الرسول ( صل الله عليه وعلى آله وسلم )
يكول { كلُّ بني آدم خَطَّاءٌ، وخيرُ الخَطَّائِينَ التواب}

وانتِ يا حبيبتي صح خطأتي من صادقتي وامنتي بذني البنات المو خوش بس بعدين تعلمتي من غلطج وتبتي ومشيتي صح

وابسط دليل على كلامي وكفتج هاي كدامي ، انتِ لو بعدج مصرة على طريق ذنيج البنات ما رجعتي تسعين حتى تبدلين حياتج للأفضل وتكونين
إنسانه ثانية

مو صح كلامي ؟

ديمة : هزيت راسي ودموعي تنزل ، اي اي صحيح

هناء : ما دام كلامي صح فروحي هسه غسلي وتعاي نتريك اني وياج شلون شوربة عدس مسويه على هالبرد ووياها خبز حار ستوني طلعته من التنور
يلوك لهالحلك الجنه مسقولة

ديمة : ابتسمت ومسحت دموعي ، رحت غسلت واجيت كعدت وياها ، اكلنا ودردشنا سوه

بس طول ما اني كاعدة بالي يم بصائر ، عفية هالبصائر شكد طلعت حبابه واني الجنت ظالمتها

بيومها شكد خجلت من نفسي لان سمعتها كلام مو حلو اثاريها صدك مثل مكالو صوت عالي وگلب خالي

موقفها وياي والصار البارحة كبرها بعيني مو شلون ما جان وما اعرف شلون اشكرها

_____________________________________

زبيدة : ضامه اديه وواكفه كدام البحر وحسيت بأدين تحاوط خصري

اخليت اديه على اديه مرجعه راسي على صدره

هارون : شبي حبيبي

زبيدة : تنهدت والله ما اعرف بس احس گلبي مقبوض

هارون : سامعة شي ؟

زبيدة : لا ابد بس كتلك گلبي مقبوض والهوى يخنك هيج شعور غريب بس يخوف

احس وكإنما حيصير شي

هارون : شو باوعيلي

زبيدة : دارني عليه ولزم وجهي

هارون : سؤال انتِ مؤمنة بالله سبحانه وتعالى وبقضائه وقدره

زبيدة : اكيد

هارون : ما دامج مؤمنة بي وعندج ثقة انه كفيل بتدمير كل امور حياتج معناها سلمي امرج

ولتفكرين حتى شنو ممكن يصير بعد ثانية ، عيشي كل لحظة الله ينطيها الج وانتِ حية واتركي تدبير
المستقبل لله حتى لو جان هالمستقبل بعد دقيقة
وحدة من اللحظة الانتِ عايشتها

زبيدة : هزيت راسي وهو جرني حاضني لصدره

حاوطت خصره وتنهدت ، رغم كلامه ريحني نوعًا ما
بس بقى اكو شعور مو حلو بداخلي

هارون : يله تمشين ندخل جوه الجو برد كلش

زبيدة : يله حبيبي

دخلت ويا وحاولت اتجاهل هذا الشعور الي بداخلي وفعلاً نجحت إني اتجاهله

وهيج مرن الاسبوعين بدون لا احس عليهن ، حرفيًا عشت بيهن اجمل ايام حياتي الما ممكن انساهن

هارون سوالي شغلات اخذتلي عقلي وگلبي وكل ذرة بجسمي

مرة عزفلي على الكلارينت ومرة نططني من الطيارة وثانية اخذني وغصنا بنص البحر وتصورنا ويه مختلف انواع الحيوانات البحرية

ليلة ننام بأحضان بعض ببلكون غرفتنا وليلة نسوي جلسة قليلة ادب بساونا الفندق

صعدني دراجة وفرني بشوارع إيطاليا الساعة بالوحدة بالليل ، طبخنا سوه وركصنا سوه

ولو شكد ما اشرح بعد اكون مقصرة لكن اكتفي إني اكول من كثر السعادة العشتها بهالكم يوم حسيت نفسي طير وديرفرف جناحاته بالجنة

هارون : حبيبي

زبيدة : هاا

هارون : وصلنا

زبيدة : باوعت من جامة الطيارة وابتسمت متمغطة واخيراً وصلنا

ضحكت من دك هارون على صدري

هارون : صح النوم

زبيدة : يصح بدنك حبيب ، مدلي ايده اخذتها ونزلنا من الطيارة

كملنا كلشي وطلعنا ماخذين تكسي وراجعين للبيت

بالمناسبة محد يدري بينا اني وهارون رجعنا لبعض غير اهلي بيت جدي عبالهم هارون مثل كل مرة سافر وحده

واني بصراحة ايدت فكرة هارون من ما قبل يگل لاحد حتى لينغصون علينا وحتى

وصلنا للبيت ونزلنا جنطنا ، سلمنا على الحرس ودخلنا لجوه لكيناهم كاعدين

هارون : السلام عليكم

زبيدة : اباوعلهم جانو كاعدين يشربون جاي ومن شافونه صفنو

صراحة حقهم لان احنه طبينا عليهم مثل التسونامي مجانو متوقعين يشوفونا

حمزية : وععـ وعليكم السلام بيبي ، الحمدالله على سلامتك حبيبي

زبيدة : رفع هارون ايدي اللازمها واشر لبيبتي

هارون : قصدج سلامتنا

النوح : ليش زبيدة جانت وياك ؟

هارون : اي

حمزية : واني الما خليت نذر ولا دعاء حتى الله يهديكم تالي سرابيت تاخذون بعضكم وتسافرون
بدون متحجون

زبيدة : باوعت لهارون وابتسمت

هارون :  احم صارت بعد

النوح : ههههه ملاعيين والله ملاعيين ههههه طبو طبو

زبيدة : دخلنا وجدي خذا الواهس بوسنا وحضنا ما شاء الله بس سمع بيه رجعت صرت عزيزة عنده وعند بيبتي

شفت نور كمت حضنتها وبوستها الوحيدة بالبيت هذا الاحبها من بعد الروح والرية

نور : شكد حقيرة انتِ صار اسبوعين اخابرج ما كتيلي

زبيدة : ضحكت وتأسفت منها لان هارون مجان يقبل احجي لاحد هو حتى اهلي لوما مضطر ميكللهم

بدرية : الحمدلله على سلامتكم عمه

زبيدة : شكراً الله يسلمج

هيام : الحمدلله على السلامة حبيبي يمه طمني شلونك مشتاقتلك والله

هارون : من رخصتكم احنه صاعدين وخلو العاملات يصعدن جنطنا

زبيدة : جرني من ايدي وصعدنا فوك

اباوعله مد ايده طلع مفاتح الغرفة فتحها واشرلي

هارون : تفضلي ست

زبيدة : شكرًا حبيب

دخلت ونزعت حجايي شمرته ووكفت بنص الغرفة اباوع لكل جزء بيها وتتزاحم عليه الذكريات من يوم طبيتلها ولحد ما طلعت منها

باوعت للمكان الجنت انام بي بالگاع وابتسمت

هارون : شبيج تضحكين

زبيدة : باوعتله ، تذكرت من جنت انام بالكاع ومدري ليش اشتاقيت ارجع انام هنا

اباوعله تقرب لزمني من خصري وجرني عليه

هارون : عادي نامي

زبيدة : حاوطت ركبته امممم زين اذا اني نمت بالكاع انت وين حتنام ؟

دنك عليه وخله راسه بركبتي

هارون : بحضنج

زبيدة : ضحكت ودفعته من مد ايده يرفع بقميصي

تأدب شويه

هارون : عوفيني بعدني عريس

زبيدة : عفية عريس صارله اسبوعين معرس ، عوفني ماكو

هارون : متأكدة

زبيدة : ابتسمت من كام يمشي شفايفه على ركبتي ، شكد سخيف يعرف شلون يأثر عليه

حسيت بايده تفتح قميصي وتشيلني بحضنه وبلشت بعدها خلوة الاستهار وقلة الادب

طلعت من الحمام الف الخاولي على شعري ، سمعت موبايلي يدك ، عبالي معين اجه هو وخالة ودادا من الزيارة بس من شلته لكيتها دنيا

جاوبتها الووو حبيب شلونك

دنيا : هلا بالسايبة الصارلها اسبوع غالقة موبايلها

زبيدة : ههههه والله مو اني هذا هارون طنكر عليه هناك لان اضل اخابرجن تالي اخذه مني وغلقه

دنيا : وشدعوة عليه العاشق الولهان

زبيدة : تصنفين حضرتج شنو نسيتي سواياتج انتِ وسيد يوسف ولج انتِ حتى بيبتوته مجنتِ تباتين
عدنه علمود لتعوفين حبيب الگلب هسه جايه تحسابيني

دنيا : يبووو يبووو لو ادري ما حاجيه

زبيدة : ههههه المهم هسه مكتيلي شوكت تجون

دنيا : باجر

زبيدة : ليش مو اليوم

دنيا : حزري ليش

زبيدة : باوعت لهارون الطلع من الحمام ومن شافني واكفه غمزلي وعضلي شفايفه ، شكد ادبسز

رجعت احاجي دنيا ، احجي ولج ليش مابيه حيل  احزر

دنيا : جدج باجر مسوي غدة وخابرنا عزمنا

زبيدة : ههههه يااا هذا شوكت لحك

دنيا : حتى اني كلت بس ولج الظاهر علمود رجعتكم انتِ وهارون

زبيدة : الله اعلم بعد

دنيا : يله گلب اعوفج ترتاحين باجر ان شاء الله نتشاوف

زبيدة : ان شاء الله

سديته منها ومشيت طلعتلي ملابس واجيت اخذت مخدة وبطانية

هارون : صدك راح تنامين بالگاع ؟

زبيدة : مديت نفسي بسته من شفته وكمت

اي ويله كوم البس لتبقى بطرك الخاولي تتمرض ، مشيت خليت المخدة والبطانية على الزوالية وتمددت

اباوع لهارون كام لبس بجامة طفه الضوه واجه ذب روحه عليه ، ضحكت وضربته على جتفه

مو هيج تذب روحك عليه كسرت عضامي ، ما رد عليه فتح اديه وخله راسه على صدري

انت شقلبت نظام العلاقة الزوجية كله ، هو غير الزوجة تنام بحضن الزوج شو انت عكستها

هارون : والله محد كلج علميني على حضنج

زبيدة : هيج صار الحجي

هارون : اي

زبيدة : دنام نام

هارون : شبكيني

زبيدة : ابتسمت وحضنته

هارون : بوسيني

زبيدة : بسته من راسه

هارون : منا بعد

زبيدة : شال راسه مقدم شفايفه عليه ، بسته من شفايفه وحضنته ، شويه وغفيت

_________________________________

ديمة : حضرت ملابسي حتى ابدل ونروح لبيت جدو
اليوم جدو عازمنا كلنا واني كيفت لان اريد اروح اشوف زبيدة كلش مشتاقتلها هي ودنيا

داكوي حجابي وشفت امين يدخل للغرفة

امين : ديمة

ديمة : طفيت الاوتي وكمتله ، تفضل

امين : ذاك اليوم مدري شلون شفتج تكوين قمصلتج الجلد بلا زحمة عليج تكدرين تكويلي قمصلتي

ديمة : ياا صدك تحجي زحمتيش هسه اكويها الك تدلل

بس فدوة بلا امر عليك روح اسألي خالة واسلام اذا عدهم حاجة تحتاج كوي حتى اكويها الهم

امين : خوش هسه اسألهم

ديمة : طلع هو واني وخرت حجابي ورحت طلعت قمصلته من الكنتور كلبتها على البطانة وكويتها من جوه على أقل حرارة

كملتها واخذتها وعلكتها حتى لتتعفس ، باوعت لامين
هاا سألتهم ؟

امين : اي كالو ماعدهم

ديمة : تمام ، هياتها قمصلتك كملتها وهذا البنطرون الاسود كاويته ومعطرته الك من زمان

محتاج مني شي بعد ؟

اباوعله تقرب باسني من خدي وابتعد

امين : لا شكراً وعاشت ايدج

ديمة : طلع وعافني واني لزمت خدي وابتسمت ، امين باسني !! اي والله باسني

يربي مداصدك معقولة امين باسني ، ابتسمت الحمدلله يربي هالتصرف اشارة على انُ امين بده يرجع يتقبلني

حتى اني حاسته هالفترة راجع شويه مثل قبل ، صح مو مثل قبل تمامًا بس على الاقل ما كمت احس وجودي مضايقه مثل اول ما رجعت

ضليت اتشكر رب العالمين وركضت بدلت بحماس والضحكة تارسه وجهي

كملت وطلعت لكيتهم جاهزين ، اباوع لامين واول مرة انتبهله وافصل شكله هيج

امين طويل كلش ولهذا السبب من قلة الاكل يبين جنه ماصول ، بشرته حنطية وشعره كثيف وهالشي
وراثه عدهم خشمه طويل بس ملامحه متناسقه

اعترف اول مرة اشوفه حلو خصوصاً من يبلس شتوي يبين اسمن بسبب كثرة الملابس

هناء : يله يمه كملتي

ديمة : اي خالة ماعندي شي

امين : طالع اجيب تكسي واجي

اسلام : تعال ماكو داعي ستوني جبت سيارة صاحبي خلي نروح بيها

امين : اني مو كايلك بطل تاخذ سيارة مو الك تريد تبلينه

اسلام : يمعود تره هذا مو صاحبي بس وداعتك بس يحجي ادگه الك بالنعال لعد غير صديجي

امين : دامشي طاحظك وطاحظ صديجك وياك

يله امشونه منريد نتأخر

ديمة : طلعنا بسيارة صديق اسلام

هناء : اللهم صل على محمد وآل محمد ، بعد گلبي امي انتو ربي يرزقكم مثلها واحسن

ديمة : آمين خالة ربي يسمع منج

اسلام : هاا ولج بس لا ما عاجبتج الستوته

ديمة : مو قصة معاجبتني بس شكو بيها اذا نطلب من رب العالمين الاحسن منها مو صعبة على رب المستحيلات

قحط سيارة الله قادر يحققلنا الاكبر والاعظم

اسلام : بالله ركعتيني على حلكي

ديمة : هههههه لا حشاك على راسي انت

اسلام : ولك امين شو مرتك صايرة ام بيت لا وتعرف تحجي هم

امين : ملاحظ

ديمة : باوعتله بالمرايه وابتسمت ، خفق گلبي من ردلي الابتسامة

انداريت اباوع من الجامة واتبسم ، مدري ليش خجلت احس وكإن واحد غريب ابتسملي مو زوجي

وصلنا لبيت جدي ودخلنا جوه لان باردة بره ، اول ما دخلت شفت دنيا ركضت حضنتها وبوستها انوب سلمت على الباقين

وصلت يم بصائر ابتسمتلها بصدق وحضنتها بدون سابق انذار ، ابتعدت شلونج بصورة

بصائر : ضليت صافنه بوجها هاي صدك تحجي جايه تسلم عليه

اباوعلها شو فرحانه ولا كإنما اكو شي ، باوعت لامين الاشرلي بحاجبه اجي

تقدمت سويت روحي اسلم عليه ، بوسته وسمعته يشاورني

امين : سوي نفسج كلشي ما مسولفتلي وخلي الوضع طبيعي

بصائر : ابتعدت اباوعله مستغربة ، ليش ؟

امين : سوي مثل ما كتلج

بصائر : ماشي

رحت كعدت بمكاني ، اباوع شويه ونزلت المتسمى ، اباوعلها لابسه ثوب شتائي لونه جوزي

شكد ما هي حلوة بس ابد متنطاق ومتكبرة مدري اني لان كرهتها كمت احسها هيج

شفتها نزلت بسرعة حضنت خواتها تبوس بيهن وباخوها ، سلمت على الكل ومن وصلت يمي سلمت من بعيد وراحت للمطبخ

نور : زبيدة وينج ولج زبيدة

زبيدة : نعم

نور: هارون يكلج شتردين يتسوكلج للدولمة

زبيدة : رفعت حاجبي شهاللواته هاي على اساس هو ميعرف الدولمة شتحتاج

طلعت من المطبخ لكيته واكف بباب الصالة ، رفعتله حاجبي وتقربت منه

شنو هاي عيني سمعت بيك متعرف الدولمة شتحتاج وصحتلي حتى اكلك

هارون : احم اي كلت اصيحلج تكتبلي خاف انسى كلشي وارد

زبيدة : ابتسمت وباوعتله صفح لعد اوكف عيني خلي اجيب ورقة واجيك

رحت للمطبخ جبت ورقة وقلم من العاملات واجيت اكتبله ، طبعًا ادري بي جذاب بس ماخذته على هوى

بصائر : كل واحد ملتهي بشي الا اني حاطه بالي يمها من اجيت ولسه

اباوعلها واكفه هي ورجلها مدري شتكتبله ، منطيتني ظهرها ورجلها صاير كبالي

اباوع لرجلها شلون يباوعلها اكلها اكل بعيونه يحيث اني من يمي استحيت وهي كل شويه ترفع راسها مدري شتحاجي وهو يبتسم ومدري شيهمسلها

انقهرت من شفتها مبينه مرتاحة وسعيدة ويه رجلها وحليم لسه يدك وينوح عليها

ولاهو الكادر يتخطاها ولا هو الكادر يكمل وياي بسلام واكف بالمنتصف والخسران الوحيد بكل هذا اني

زبيدة : تفضل حبيب هاي الورقة تحتاج شي بعد؟

هارون : اي

زبيدة : وهو ؟

هارون : بوسيني

زبيدة : موهنا من نصعد

هارون : مابيها مجال منا منا دبريها

زبيدة : ههههه حبيبي تره حتى اني اريد ابوسك بس عيب عدنا خطار مو مال نستهر هنا

دزيتله بوسه بالهوى ، دبر نفسك بهاي يله توكل ، اباوعله اخذ الورقة وغمني وطلع

ضحكت وطبيت جوه اساعد البنات

شويه ورجع هارون متسوك واحنه قبل بوقت محضرين الحشوة فكبل اشتغلنا

كملنا كلشي وكعدنا تغدينا وبين ضحكة وسالفة خلص اليوم على خير ولله الحمد

______________________________

ديمة : وصلنا للبيت العصر ، نزلنا ودخلنا جوه وراح اسلام يودي سيارة صديقة

دخلت لغرفتي بدلت وطلعت غسلت وبديت اقره لان عكب باجر عندي كوزين ولازم اخذ بيهن درجة زينه

ثاني يوم كعدت الصبح على صوت الجرس ، تفاجئت لان احنه الجمعة محد بينه يطلع من البيت نضل نايمين فمنو الاجانه

كمت من فراشي غسلت وطلعت شفت خالة واكفه بالمطبخ تسوي جاي

شافتني اشرتلي اجيها بسرعة

صباح الخير خالة

هناء : صباح النور حبيبتي لفي روحج زين وكعدي هنا لتطلعين

ديمة : ليش خالة شصاير ومنو اجانه

هناء : والله يايمه ما ادري بس هذا المحامي جاي من طرف عمة الولد

ديمة : عمتهم نفسها ام الورث

هناء : اي هي من الله لا يرضى عليها وين ما جانت

ديمة :  زين ما فهمتي شيريد جاي ومنين اندلكم

هناء : كلشي ما اعرف ، كل الاعرفه انه اجه الصبح ومن طلعله امين عرف عن نفسه وطلب يدخل يحجي ويه الولد

وذاك ويا كاعد بالاستقبال شيريد ؟ ربج يعلم

ديمة : صبيت جاي بدلها لان جانت متوترة وحقها مالومها ، اباوع دخل اسلام اخذ الصينية وصاح لخالة

اسلام : تعاي يمه المحامي يريدج

هناء : ليش

اسلام : والله يايمه ما ادري بس گال عنده موضوع يريد يحجي بي بوجودج

هناء : يله يله جايه

ديمة : راحت خالة واني وكفت بالباب اسمع

المحامي : السلام عليكم حجية شلونج

هناء : وعليكم السلام ، الحمدلله

امين : ممكن تتفضل حضرتك تبلغنا شنو الموضوع المهم الاجيت تحجي بي

المحامي : احم بدايةً اعرفكم بنفسي اني عبد العزيز احمد محامي الست مسار الـ***** عمتكم

امين : اهلاً وسهلاً بحضرتك عرفنا منو انت نكدر نعرف سبب زيارتك المفاجأة هاي

المحامي : اولاً يؤسفني ابلغكم انُ ست مسار توفت قبل شهرين اثر حادث تماس كهربائي

اسلام : يمهل ولا يهمل

هناء : استغفر الله يمه لتحجي هيج ، الله يرحمها

امين : الله يرحمها ويغفرلها

هو هذا الخبر الي تفضلت حتى تبلغنا بي ، زين شنو المطلوب منه هسه

المحامي : اكو كم شغلة لازم احجي بيها وياكم

اول شي لازم تعرفون انُ عمتكم رحمة الله عليها ما صار عدها اطفال من زوجها ابد وزوجها المرحوم
كان عنده زوجة ثانية واولاد

وبكون عمتكم ما كانت على وفاق مع اولاد زوجها فقبل لا تتوفى بسنة كتبت وصية فيما يخص كل ما تملكه وصدقتها بالمحكمة

واني بكوني المحامي مالتها استلمت كل الإجراءات
وكملتلها كلشي حسب القانون

وقبل لا تسألوني ، محتوى الوصية كان يتكون من بندين ، البند الاول يقر انها ترفض اولاد زوجها يستلمون اي شي من ممتلكاتها حتى لو كان دولار واحد

اسلام : والبند الثاني ؟

ديمة : نصه صوتهم تقربت اكثر اسمع المحامي شيحجي

المحامي : محتوى البند الثاني ينص على انُ لو صار لصاحبة الوصية شي كل ما تملك يتحول لاولاد اخوها
ويتوزع عليهم حسب القانون

امين : هه وين جانت ستوها تذكرت عدها ولد اخو

المحامي : الست مسار حبت تكفر عن ذنبها وتعتذر منكم وما كان بأيدها تقدملكم غير هالشي

وهذا اعتراف اعترفته الي بلسانها ووصتني ابلغكم هذا الكلام وقت الي انجلطت وانشلت

قبل سنة بلغتني اوصللكم اعتذارها وانها متندمة على كلشي سوته وتتمنى منكم تبرولها الذمة

وممتلكاتها القدمتها الكم ماهي الا حق هي اخذته من والدكم في يوم من الايام واجه الوقت حتى ترجعه الكم

اسلام : وشعافتلنا المرحومة كلادة ذهب لو سيارة

المحامي : ست مسار كانت تاجرة على مستوى عالي وبأخر كم سنة اقيمت في دهوك وقبل وفاتها طلبت انُ تبيع كلشي كل ما تملك وتحوله لمبالغ مالية تتخزن بالبنوك حفاظًا على املاكها من اولاد زوجها

اسلام : وشكد قيمة هاي المبالغ المالية بله

المحامي : ******* ***** دولار امريكي

ديمة : اني سمعت المبلغ وشهكت موكعه الكلاص من ايدي

__________________________________

بصائر : كاعدة وخالة الملازم كدامي ، تنهدت وطكيت ركبتي ااااخ يمه انكسر ظهري

باوعت للساعة ، الساعة بـ2 هذا وين صار ، سحبت موبايلي متصلة عليه ، هه مغلق كالعادة

ذبيت الموبايلي وكمت فتحت الثلاجة ، اخذتلي نستلة اسد بيها جوعي وهم اكعد شويه اخذلي استراحة حتى اكمل قراية وانام

خلصت فترة استراحي واجيت اكعد ، شفت الباب ينفتح ويدخل حضرته بطلته البهيه ، اناقته ، شياكته شكله ، طوله كلشي بي ياخذ العقل

لكن للاسف اني مالي بهالانسان ذرة وحدة ولا الي حق اطالبه ولو بكلمة وحدة تجبر بخاطري وتحسسني إني انسانه

اباوعله تقدم وتخطاني داخل للحمام ولا كإني موجودة

وليش استغرب من تزوجنا ولليوم واني عايشة بهالغرفة على إني كائن غير مرئي فتعودت

فزيت على صوتة ورايه ، انداريت عليه ، اباوع  لاسمها الموشوم على صدرة يتحداني كلما اباوعله وكإنه يكلي شوفي اني شنو بالنسبة لهالرجل

وانتِ ! انتِ شنو بالنسبة اله ؟ نكرة !!

حليم : اكلج ما دامج كاعدة غسلي ملابسي باجر عندي دوام ومابيه حيل اكعد ارهم هدوم

بصائر : هزيت راسي بدون ما اجاوبه ودخلت للحمام حتى اغسلهن

فتشت سترته وخليتها بالغسالة ، سحبت القميص شفت طبع احمر الشفاه ماليته ملي ، رفعته مقربته لانفي ، عطر نسائي واضح وضوح الشمس

دمعت عيوني يعني طبع الحمره مو دليل على خياتنه بس العطر هو دليل ، شتحسين انتِ !

شمرته واخذت باقي ملابسة اكلبهن واذبهن بالغسالة لهناك وشفت شي كزبر كل جسمي منه ، ما تحملت القرف الشفته وسحبت القطعة الي بأيدي وطلعت شمرتها بوجهه

هايييي شنوووو

حليم : قز القرط شبيج

بصائر : شهالقررررف هذاااا الله ياخذك

اباوعله دنك شايل الملابس ، باوعلهن وابتسم

حليم : يا عيني يا فقيرة متعرفين هذا شنو

بصائر : ولان اعررررف هذاا شنوو اجيت احاججك ، ليش يا اخي دتسوي هيج بيه

وصلت بيك تعوف قذارتك وقذارة ذنيج الزانيات على هدومك وتطلب مني انظف وراكم ، ليش بس فهمني لييييش عمي لو متزوج الكاتلة اهلك متسوي بيها هيج

حليم : اكلج تره مالي خلكج النص الحافظته مدري من يا مسلسل تركي اكعدي رطني ويه روحج لتطلعي عليه

جاي تعبان اريد ارتاح وراي دوام ما ناقصني انتِ متردين تغسلين هدوني يطبج طوب العاملات يغسلنهن بس جفيني شرج 

بصائر : وكفت كدامه وبجيت ، حباب كافي طلكني لخاطر الله وخليني ارجع لاهلي واشوف حياتي بعيد عنك على الاقل خلي انتشل البقى من كرامتي الصارت بالحضيض من يوم النطقت النعم وصرت مرتك

اني تعبت والله تعبت مداكدر اتقبل الاشياء الداشوفها خلينا ننفصل وانت عيش حياتك بكيفك وعوفني اعيش حياتي بعيد عن بيئتك ، الله يخليك والله حتى هدومي العليه اعوفهن هنا ما اخذ منك شي بس عوفني بحالي وطلكني

اذا بقيت وياك اشوف خيانتك كل يوم كبالي انجلط واموت والله اموت

حليم : حجيناها قبل وراح نرجع نعيدها طلاكنا اني وياج راح يدمر العلاقة البين عوائلنا واني مستحيل اهدم العلاقات الطيبة البين اهلي واهلج علمود حضرة جنابج ستوج صحيتي واكتشفتي نفسج مو كد هالزواج

انتِ قبلتي وتدرين بيه كل هالصفات فبعد على شنو هالحجي الماصخ كعدي وانجبي واكلي من كدامج
لتسويلي هالافلام تره روحي طالعة

بصائر : هزيت راسي الله ينتقم منك دنيا واخره ، حسبي الله عليك الى يوم الدين

حليم : ياعيني انقهرت كلش لالا اوكفي راح ابجي

بصائر : عضيت اصابعي وزادت دموعي ، استاهل انييي والله استاهل شكد حذروني منك بس انييي غبييية والله غبييية ولك اول الناس الكلولي ولج هذا ميفيدج عوفي هييي

ضربت على رجلية وانيييي الغبية ما صدكتهاا وقبلت بيك عبالي خوش ادميي بس اثاريهااا تعرفك شنو وتدري بيك مو كفو ومو رجال

حليم : ليش مو رجال خو كولي تحبني ورادت تطفشج

بصائر ضحكت من بين دموعي ، تحبك !! هههههه ولك هي اصلا مشايلتك من كاعك

الكاعد تنفخ بروحك وتصيح تحبك عدها التراب اليمشي عليه رجلها يسواك ويسوه عشرة بكدك

حليم :لوما اخذته جبر جان صدكتج دخيل محمد يالنسوان شكد حاقدات و وحدتجن تكيد للثانية

بصائر : جنت خايفة على مشاعرك ومردت اقهرك بس مدام دتحجي هيج خلي اراويك

سحبت موبايلي فاتحة الستوديو ، دخلت على اخر صورة ودرت الموبايل عليه

هاا باوع ، هنا رجلها كاعد يسولف ، باوع شلون دتباوعله وهو يسولف ، بذمتك وضميرك هاي اذا عندك ضمير ، هالنظرة نظرة وحده مجبورة

اكو وحدة مجبورة تباوع لرجلها بهيج نظرة ، دشوف ماكلته اكل بعيونها

ناسيه الدنيا والناس ومركزة على حبيبها شلون يحجي وعيونها تحجي قبل لسانها شكد حابته وشايفته وممصدكة

بله كلي اكو يوم شفتها تباوعلك بهالنظرة ، ما حصلت منه جواب

رفعت عيوني عليه لكيت عيونه مدمعة وكوه مسيطر على دموعه لدرجة اللون الابيض مالت عينه گالب احمر

تبجي !! اي ابجي تستاهل كل الصار والراح يصيرلك لانك عاصي ومو رجال

ويه ما حجيت هيج صفكني راشدي وجرني من شعري ، وعيونه تتنافض منها الدموع بشده

حليم : منو هو المو رجال ولج ، بت النعال مو انيمج هنا واراويج المو رجال شيسوي والكعبة اسويج سبع وصل هسه واخليج تعضين اصابعج ندم

بصائر : من بين المي ضحكت ، ههه شكد مغفل انت والمثلك الي يعتبرون الجنس هو مقايس الرجولة

بس ما استغرب عدم معرفتك بمعنى الرجولة الحقيقي لان صدكني لو تعرف شنو هي الرجولة جان اتصفت بيها

حسيت بي يشد على شعري اااخ هددد شعررييي
الله ياخذك ، دفعته عني بقوه وعطت  بي وجعتك الحقيقة مو ، اييي الحقيقة توجع وانت حقيقتك ذكر مريض ذرة رجولة ماعندك

ونهايتك بهالدنيا وحيد ومذلول ولك لو بيك حظ متخلي شهواتك تسيطر عليك وتسويك سلعة تسحبك لطريق يهز عرشه لرب السماوات جل في علاه

حليم: د *** **

بصائر : ابتسمت وهزيت ايدي ، شجاوبك هسه اني بله بس ميخالف انت مريض ولا على المريض حرج

تصدك ردت احجي وياك حجايه بس خاف تسمعها وتروح تنتحر وتالي يوكع ذنبك بركبتي

مشيت عنه وحسيته يسحبني ايدي ويلويها

حليم : انييي جم مرة كتتتتلج لتحاوليييين تلمحييين لهذااا الموضوع ليييييش تخلينييييي ااذيج

بصائر : هاا جرحك الموضوع تؤ تؤ خطية ، تستحي من تتذكر نفسك شلون انتحرت علمود حبيية الگلب

نترت ايدي منه ، هاي اول واخر مرة اسمحلك تمد ايدك عليه والا راح اوصل سوالفك كلها لابوك وانت تعرف كلش زين شنو ممكن يصيرلك اذا انفتح حلكي

عفته ودخلت للحمام سادة الباب ورايه ، صميت حلكي وبجيت بشوغة ، متت قهر من شفته يبجي عليها

يبجي من كل كلبه وصوت ونته واصله يمي واني بالحمام ، اني تعبت لا بيه انفصل عنه ولا بيه اكمل وياا

وللاسف بساعتها الشيطان استغل ضعفي واستحوذ تفكيري وخلاني امضي على فعل راح اتندم عليه طول حياتي

شوكت وشلون تجرأت و سحبت موس الحلاقة وقطعت اوردتي ما ادري

كل الاتذكرة إني فقدت الوعي فورًا وما حسيت على شي بعد

وما كعدت الا نغزات بأيدي بعدها برودة تسري بوريدي

فتحت عيوني لكيت روحي متمددة بغرفتي ، ايدي ملفوفه ومعلكيلي مغذي وكانوله بالايد الثانية

باوعت لحليم وسهير يفترون گبالي وبس حسو عليه
ركضو باتجاهي

سهير : الحمدلله على سلامتج حبيبتي وكعتي كلوبنا عليج

بله هاي سواية ليش هيج حبيبتي لو ميتة شجان سوينا بلياج

بس الحمدلله على كل حال انتِ وبذرتج الحلوة بخير وسلامة ، الف الحمدلله على سلامتكم

بصائر : كعدت على حيلي وريكي ناشف ، باوعتها وباوعت لحليم الواكف يباوعلي ووجهه دم من الاعصاب

ببـ بذرتيش ؟

حليم : ابشرج مدام حضرة جنابج حامل

بصائر : هاا !!

**************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.