الموت الحي

البارت الثالث عشر/ الجزء الثاني

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

ديمة : من بعد ما طلعت زبيدة اني دخلت للحمام سبحت وطلعت صليت على راحتي وبدلت وتمددت
اريح جسمي شويه

صحيح اغلب الشغل اشتغلته زبيدة بس اني هم ساعدتها وبسبب السكر داتعب بسرعة

سحبت موبايلي واتصلت على امين داشوف شوكت حيجون

امين : الوو هاا عيني

ديمة : الوو امين شوكت تجون

امين : مسافة الطريق ليش تسألين شنو بيج شي ؟

ديمة : لالا ما بيه شي بس داطمئن عليكم

امين : لعد اطمئني ساعة بالزايد واحنه يمج

ديمة : تمام توصلون بالسلامة ان شاء الله

امين : الله يسلمج ، خوما محتاجة شي

ديمة : لا سلامتك ، سديته منه ووقت الموبايل على نص ساعة وغمضت عيوني

اريد اغفالي ولو نص ساعة حتى اصحصح شويه
وفعلا اخذتلي قيلوله نصف ساعة وكمت لبست ثوب مالت بيت ورتبت وجهي بمكياج بسيط جدًا هيج بس حتى ينطي روح لوجهي

كملت ورحت للمطبخ خليت الاكل على العين الصغيرة مالت الطباخ ونصيت النار حتى علما يجون يكون الاكل جاهز

بقى بس الدجاج عفته من يجي امين يشغل فرن الطباخ عليه لان اخاف اعلگه اني لتوج النار عليه

طلعت وفرشت السفرة بالصالة وهمزين جان اكو وطنية عليت السبلت بالصالة وسديت كل الابواب حتى يبرد

والله همه هم ما طولو شويه سمعت صوت الجرس يعلن عن وصولهم كمت فتحت باب المطبخ

اباوع دخلت خالة امين ام زينب ووياها بنتها زينب تطلع اكبر من بصائر شويه طبعًا اني ما عندي اي علاقة بگرايب امين يادوب شفتهم بعرسي خطف
ما صارتلي فرصة اتعرف عليهم

ابتسمت واستقبلتهم ، هاا الله يساعدكم

هناء : هلا بعد گلبي ، تعاي إمي سلمي على اخيتي ام زينب 

ديمة : تقربت بوست المرة ، اهلا وسهلا خالة حبيبتي نورتي البيت والله

ام زينب : النور نورج حبيية شلونج

ديمة : الحمدلله خالة اسأل عنج ، تفضلي تفضلي ليش واكفه ادخلي استريحي جوه

رحت سلمت على البنية  ودخلتهم خالة للصالة ولحكتهم هي وبصائر ، اجه امين يروح واني عارضته
باوعلي باستغراب

تعال ادنه اريد اسألك سؤال

امين : شكو شبيج

ديمة : امين عليك الله ياهو الاحلى اني لو بنت خالتك زينب

امين : ههههه صدك تحجين حاصرتني بالباب حتى تسأليني هالسؤال

ديمة : دجاوب شبيك هي احلى مو

امين : بشرفج هو هذا هم سؤال ، طبعًا انتِ احلى

ديمة : زين هي برأيك حلوة

امين : مابيها شي حلوة بس انتِ احلى

ديمة : اذا حلوة ليش ما خطبتها

امين : شبيج ديمة شهالحجي هذا البنية اصلا عاقدة وامها اجتي لهنا حتى تتسوگ لحنتها

ديمة : هاا يعني لوما هي مخطوبة جان خطبتها

امين : ههههه شبيج اليوم ديمة شنو صاعدة عندج الغيرة

ديمة : ضميت اديه انت مو تدري بيه ما احبك فليش داغار عليك

امين : ادري بس اني اموت عليج

ديمة : احم اكلك عوفنا من هالحجي وتعال اعلگلي الفرن مالت الطباخ

امين : اي تدللين بس شويه وخري

ديمة : علكه الي وضل واكف تحمحمت وحاجيته

يله روح بدل واكعد ويه الخطار ودزلي بصائر حتى تساعدني ولو اتعبك

هز راسه وطلع من المطبخ ، تنهدت امين وردة بس مو بأيدني والله مداكدر احبه

اباوع لبصائر دخلت هي وزينب بنت خالتها ، ابتسمتلهن

بصائر : هاا گلب شتردين

ديمة : تعالي اخذي السفرة وشيلي طوس الزلاطة واللبن والمي والخضرة علما اصب

بصائر : اهووو هم راح تسخريني

ديمة : انجبي وامشي فشلة من خالتج لتخليني اضوج

زينب : لا عادي حبيبتي احنه اهل اخذي راحتج وصبي داساعدج واشيل

ديمة : ابتسمت تمام ، صبيت وهي وبصائر يشيلن ، اخر شي شلت صينية الدجاج خليتها بنص السفرة وكعدت يم امين

امين : دواج اخذتي ؟

ديمة : لا هسه كايمة ، اجيت اكوم وخله ايده على فخذي

امين : كعدي اني كايم اجيبه الج

ام زينب : شنو وين كايم خالة

امين : هسه اجي ابدو انتو

ديمة : راح للغرفة جابلي الدوة واجه ، اخذت شريط الحبوب وشربته

ابتسمتله شكراً

امين : بالعافية على كلبج

ام زينب : شنو هذا الدوة الاخذتي خالة

ديمة : دوه سكر

ام زينب : يمه سودة عليه سكر بهذا العمر ، حبيبتي الرحمن يعافيج ويساعدج

ديمة : حبيبتي خالة تسلمين

امين : يله تفضلو بلشو حرامات ليبرد الاكل

ديمة : بدو ياكلون واني عيوني على ملامحهم اريد اشوف الاكل عجبهم لو لا

والله ماكو شويه واستبشرت ملامحهم ، هاا خالة شلونه الاكل ان شاء الله عجبكم

هناء : والله عاشت ايدج يمه يخبل

ديمة : الف عافيه

بصائر : شعجب طلع الطبخ وياج طيب ذاك اليوم معكرونة ما دبرتي وعجنتيها واليوم حتى تمنج حباية مفصولة عن الثانية

ام زينب : مابيها شي خالة ماكو واحد طلع من بطن امه كلشي يعرف الواحد شويه شويه يتعلم

عاشت ايدج حبيبة يوم النمد سفرة ولادتج

هناء : يييمه هيج ويسمع منج الله

ام زينب : مو بعيدة على رب العالمين متدرين على ساعة تجين وتبشرينا بحمل جنتج بس كولي يارب

ديمة : اباوع لامين يتبسم ويردد بخفوت يارب 

همه رجعو يكملون اكل واني صفنت على حجي خالة امين

صحيح كلامها فعلا على ساعة يصير عندي حمل لان امين مدياخذ احتياطاته فكلش وراد احبل

مجرد فكرة إني احبل من امين جفلتني ، لالا اني لازم الكالي حل ما اريد يصير عندي حمل اني ويني وين هالسوالف بهالوقت

حتى امين حالته المادية تعبانه يعني ابد ما راح يكدر يتحمل تكاليف انجاب طفل هو يادوب ديدبر مصاريف البيت

ضليت كاعدة وبالي يم موضوع الحمل ، حتى اكل ما اكلت ، لمن كملو كمت لميت المواعين ووكفت اغسلهن اني وبصائر

كملنا ورحت سويتلهم جاي ، شربو وكلمن راح لمكان يرتاح والعصريات كعدو وطلعو يفترون

اني ما رحت وياهم بقيت بالبيت

بقت يمنا خالة امين يومين بس شنو محسينا بيهن ، المرة كلش حبابه وبنتها تجنن وبسرعة تدخل للگلب فحيل تونست بجيتهم

راحو الجماعة ومر الاسبوع بسلام وروتين كالعادة ماكو اي شي جديد بحياتي

لمن خابرتني دنيا عزمتنا على غدة بمناسبة زواج زبيدة عد بيت عمو واني كيفت لان كلش مشتاقه
لخواتي

انوب عمو خابر امين عزمه وعزم اهله بس خالة تعذرت لان جانت تعبانه فعمو خلاها على راحتها بس اصر على امين يجيب بصائر حتى تغير جو ويانه

وهو مكال لا وبصائر هم كلش فرحت لان حبيبتي ماعدها صديقات وتستحي تختلط باحد فحيل تتونس من احد يعزمها على لمة تكيف

تنهدت وعدلت ملابسي كدام المرايه ، اخذت اخر نظرة على نفسي

بيرفكت كالعادة

امين : هاا حبيبتي كملتي

ديمة : اي ماعندي شي بس اطلبنا التكسي بسرعة حتى لنتأخر

امين : تكسي !!

ديمة : لبست الاسوار وباوعتله ، اي تكسي لعد بيمن نروح

امين : بالستوته غير

ديمة : انداريت عليه ، بشرفك امين تريد تاخذنا بالستوته

امين : اب واذا ؟

ديمة : تشاقه اكيد

امين : ليش شنو الي بالموضوع يستوجب الشقة !!

ديمة : بشرفك امين يعني تريدنا نطب للمنطقة الكاعدين بيها بيت اختي بستوته !! صدك تحجي انت

امين : واذا رحنالهم بالستوته يعني قابل شراح يصير

ديمة : انت شايف البيوت والسيارات الي هناك حتى تحجي هيج

كل عقلك تريدنا نطب لمنطقتهم واحنه صاعدين بستوته عاويه جنه مجاديه والله فشلة شنو همج احنه

امين : شهالحجي السخيف هذا يعني اليصعد بستوته هسه صار همجي ؟ شو انتِ متعرفين تحجين

ديمة : ما اقصد بس والله الستوته ابد مو لائقة لهيج مكان امين انت رايح للـ***** مو لسوگ ولا طاب بمنطقة شعبية حتى اكلك اي وميخالف

شنو ماخذنه بستوته تريد تضحك الوادم علينا عمي اذا متوازي اني انطيك فلوس التكسي بس رجاءًا اكعد ولتحرجني كدام خواتي ورجولتهن

امين : احرجج كدام خواتج ورجولتهن !! ليش حضرتج انتِ واهلج من قبلتو بيه ما جنتو تدرون بيه على كد حالي وماعندي غير هالبيت والستوته

ليش تحسسيني وكإن اني طبيت نافخ روحي بسيارات اخر موديل وبيوت تسد عين الشمس

اني واضح من البداية وكتلكم وضعي المادي شنو فعلى شنو هالحجي الماله داعي هسه

ديمة : اعرف بس والله عيب نطب عليهم هيج

امين : شبيج بابا عليمن عيب قابل راح نطب عليهم عريانين احنه

ديمة : حتى وان كل مكان واله احترامه مو مال نضحك الوادم علينا حباب خلي نطلب تكسي ونفض هالنقاش العقيم

امين : ديمة نقطة على السطر اليوم منطلع منا غير بهاي الستوته عاجبج أهلا وسهلا ما عاجبج كلش عادي هسه ابدل ونكعد بالبيت

ديمة : شنو هو عناد

امين : مو عناد بس انتِ لازم تتقبلين وضعي وتبطلين تستعرين من وضعنا ، كلمن يمد رجليه على گد غطا واني هذا غطايه وما مستعد استعر من نفسي علمود ناس ان رضو عليه او ما رضو ميضيفولي شي

ديمة : قحط العشرة يعني والله اني اطيها الك شبيك ما اعرفك هيج بخيل انت

امين : اعتقد فهمتيني ، اني طالع انتظرج بره انتِ وبصائر ، ربع ساعة اذا ما طلعتي راح ادخل جوه وبعد ما اروح وانتِ براحتج

ديمة : اباوعله عافني وطلع ، عود شنو معناها هالتصرفات فرض شخصية يعني لو شنو

والله كبرها وهي متسوه شيصير يعني لو رحنه بتكسي لو اله يحرجنا ويفشلنا كدام العالم

اباوع لبصائر طبت

بصائر : متكومين

ديمة : اخوج يريد ياخذنا بالستوته تخيلي

بصائر : اي لعد بيمن تردينا نروح ؟

ديمة : كمت جريت جنطتي ، اهووو عاد انتِ واخوج نفس الصنف

بصائر : شبيج ديمة ليش تحاجيني هيج

ديمة : ماكو شي امشي

طلعنا لكينا واكف بره يخلي فراش بيها ، والله لو تصبها ذهب هم تبقى ستوته

صعدنا وهو حرگ ، والنبي متت قهر الطريق كله اطحن بروحي طحن

انوب طبينا لمنطقة بيت عمو وشفت اهل المنطقة يباوعولنا احتركت حرك ولو بودي اخنگ امين بمكانه على الفشله الفشلني ياها

وصلنا للبوابة وفتحوها النه ماشريلنا على الكراج ، دخلنا للكراج ونزلنا حتى يصفها امين براحته

اباوع للسيارات مالت ولد عمو ولستوته امين فرق السما عن الگاع

سياراتهم كلها اخر موديل وتاخذ العقل وستوته امين حتى كفر توكف يمهن

طبينا جوه ولكينا زبيدة ورجلها جايين

اجتني دنيا سلمت عليه ومن شافت وجهي سألتني

دنيا : شنو صاير بينج وبين امين شي

ديمة : لتجيلي طاري تره روحي لعبانه منه وكوه متحملته

دنيا : خير ان شاء الله شنو صاير بيناتكم

ديمة : داسولفلها وقاطعني صوت زبيدة

زبيدة : هاا دمدم شلونج

ديمة : بوستها هلا زبد اني الحمدلله انتِ شلونج

زبيدة : ماشيه اموري

يحيى : بوية ليش واكفين استريحو

زبيدة : كعدت يم خواتي وعيني على هارون من دون الكل اخذله كرسي وحدة وكعد ، الله يفضحك يا نعلون والله شكلك راح تفشلني اليوم

يحيى : اي بويه هارون شلونك شخبارك

هارون : بخير

يحيى : شلونها زبد وياك

هارون : زينه

زبيدة : غمضت عيوني ، يربي شلون يحاجي عمو ، الله لا يوفقه والله عرفته راح يجي ينغص عليه ويطلع 

يحيى : شلونج زبد

زبيدة : الحمدلله كلش زينه

يحيى : شرأيج بتراكي ، تأنقت اليوم علمودج

زبيدة : هههههه صدقة للاناقة عيني

يحيى : ليش ولج حتى اليوم كلت ما البس وردي علمودج

زبيدة : ابتسمت لا اليوم طالع حلو تخبل

يحيى : على راسي زبد انتِ هنا

زبيدة : اباوعله يأشر على راسه ضحكت والله سوالفك يا عمو

رميم : يله حبايب تفضلو الغدة جهز

زبيدة : كمنا حتى نكعد

يحيى : تعال بويه هارون اكعد يمي انت ومرتك وين رايحين بالاخير

زبيدة : كعد عمو على راس الطاولة وكعد على يساره هارون واني بصفه

باوعت للكل ، احس اكو شي ناقص ، اكول دنيا تيومي وينه شو ماهو

دنيا : سودة عليه كعد من الصبح يكول راح يجي عمو
ومكيف تالي من وكلته نعس ونام

زبيدة : يا عمو هذا

يوسف : امين ، مدري شمسوي لتيم والطفل متخبل عليه

حليم : هو هذا دومه يقره قران تلاكه ركع الجاهل بآيه سطره بمكانه

امين : طاحظك اي والله

يحيى : عوفو الحجي بويه وبلشو ليبرد الاكل

زبيدة : بدينه ناكل ونتناقش بامور جانبية بس اني ابد ما اخذت راحتي لان حليم كاعد كبالي وكلما ارفع راسي الكا يباوعلي

فحيل توترت وهذا هارون مسودن طكه ونص على ساعة يهيج على حليم ويسويلنا هوسه خصوصاً هو استلمه من الباب كل ساعة يبسمره بشغلة

يحيى : تدري هارون انت شكد جنت وكح بصغرك

هارون : كلولي

يحيى : والله جنت مسودن اهلك وكل ساعة جاي واحد مشتكي عليك

تدري مرة من المرات هدو الجوارين على بيت جدك لان كتلت ابنهم

وجدك عود طبب الرجال لجوه حتى يتفاهم ويا وانت صعدت فوك السطح وشمرت طابوكة على راس الرجال وشكيته ونقلو الرجال للمستشفى من وراك

هارون : هههه اي اتذكر

يحيى : ههههههه خرب يومك جنت تلعب فلك

تذكرين رميم بيومها جابه ياسر يركض خلا عدنه حتى لا يلكفه ابو ويكتله

رميم : اي اتذكر وبيومها نيمنا يم يوسف وجياد واجينه بالليل لكينا كاتلهم

دنيا : يااا عزه ليش

يحيى : لان كلوله دبه حميسة

زبيدة : ليش هارون جان سمين

رميم : اي بعد كلبي جان مدعبل تدعبل وابيضاني يخبل

حليم : لعد شدسمله هسه

هارون : من الشغل ووكفه الشمس ، تعرف بعد الاعتماد على النفس يتعب مو مثل ما بابا يجيب ويحط بحلكي

حليم : على شنو جاي تلمح

هارون : الملح من يمج

زبيدة : انطيته الملح

جياد : صدك هارون انت شتشتغل هسه ، يعني ذاك اليوم مريت حتى اجيب اوراق الصفقة من شركتكم ما شفتك هناك

هارون : اني طبيب بيطري وشغلي متعلق بالحيوانات الي بالمزارع مالت جدي وهم اشتغل بترويض الحيوانات

ديمة : الله يعني تلزم الحيوانات وهنه صغار تربيهن شلون ذوله الي بالتلفزيون

هارون : اي

ديمة : ياعيني خطية زين امهاتهم شلون يقبلن ينطنكم اولادهن

زبيدة : اباوع لهارون صفن بوجه ديمة ، اي حقه بعده ما متعود على غبائها

هارون : امهات منو ؟

ديمة : امهات الاطفال

هارون : يا اطفال ؟

ديمة : شبيك زوج اختي اطفال الحيوانات

هارون : ها اي لتخافين هنه ميطن اولادهن لان هنه عايشات وياهم

ديمة : يعني انت مربي حتى امهاتهم

هارون : اي

ديمة : يااا يعني انت تعتبر جدهن

هارون : عفواً

ديمة : شبيك يعني انت هسه مو تربي مثلاً الاسده فتعتبر ابوها والاسده من تجيب اسد انت راح تعتبر جده مو

هارون : اسده وتجيب اسد !! انتِ خريجة لغة عربية مو

ديمة : لا اني مهندسة ليش مبين عليه ادرس عربي

هارون : اي لان كلامج كله فصيح

ديمة : صدك والله

هارون : اي

ديمة : تدري اني جنت بالسادس كلش شاطرة بالعربي

هارون : اي مبين

زبيدة : يمه هارون ناصب على ديمة وهاي الثولة مصدكه ومن كل عقلها كاعدة تتفاعل ويا

غير كوه سيطرت على روحي ما اطكها بضحكة انوب كلها تضحك وهي تضحك وياهم بدون متفتهم شكو

ديمة : شبيكم تضحكون مو جاي تنتاقش

يحيى : ههههه تناقشي بويه تناقشي على راحتج

زبيدة : رجعنا نكمل أكل ونضحك على سوالف ديمة خو هارون طكت روحه من اسألتها وكوه متحمل ويجاوبها

هههههه حيييل وابو زايد شكد ارتاح من اشوفه متنرفز هيج

كملنا اكل وكمنا ساعدنا العاملات بلم السفره ، لمن صفينا السفره وكعدنا بالصالة نشرب جاي

اباوع لتيومي طلع من غرفة خالة وعمو يفرك بعيونه ويمشي

ذبيت استكاني وكمت من مكاني رايحتله ، تقدمت وشلته هااا حبيبي شلونك

تيم : هاا ذبيدة

زبيدة : يمه يمه كبر حبيبي وكام يصيحلي بأسمي ، بوسته بعد عمري هاللسان الحلو

تيم : وين ننه

زبيدة : خلي تولي ننه

تيم : لا اتي ولي

زبيدة : ههههه دبسز ميقبل عليها ، اخذته وكعدت بمكاني

دنيا : هاا حبيبي اصبلك عميه

تيم : ذوعان

دنيا : يخسى الجوع هسه كايمه اصبلك

زبيدة : اباوعله كعد شويه بحضني وفز

تيم : ياا امو ممين نونك ( عمو امين شلونك )

امين : ههههههه حبيبي تعال ليه

زبيدة : نزل من حضني يركض شمر روحه على امين وحضنه وامين كام يكطفه بالهوه ويبوس بي وذاك يضحك

اجتي دنيا وكعدت توكله وهو مدري شيسولف ويه امين وامين مندمج ويا ويسولف

ضلينا كاعدين جوه لحد العصريات سوت خالة عصرونية وكعدنا كلنا بالحديقة

انتبهت لهارون عينه على تيم شلون يلعب ويه ولد عمه بالطوبه ومبتسم حتى باله مو يمته

اباوعله شويه وكام متوجه الهم ، شفته كعد على ركباته حتى يصير بمستواهم وكام يسولف وياهم

ما اسمعه شيحجي بس شفته اخذ الطوبه وكام يلعبهم وهمه مكيفين لان اجه واحد يلعب وياهم

بصراحة من شفته شلون يضحك ويبوس بالجهال اكتشفت خصلة ثانية بصالحة انه يحب الاطفال وحنين عليهم

وهالشي بين من طريقة تعامله وياهم حتى على ظهره شالهم وكام يفتر بيهم وهمه يضحكون

شويه واجه كعد يمي بس شو فجأة انكلب وجهه ولا كإنما جان يضحك ومتونس

هارون : صارت الدنيا ليل يله كومي

زبيدة : كمت ويا وعمو والولد كامو يحجون عليه ويكولون بعد وكت والعشه راح يجهز بس هو اصر وكلهم عنده شغل فعافو على راحته

طلعنا من بيت عمو بعد ما ودعناهم وشكرناهم على العزيمة

طبكت باب السيارة وانتظره يجي ، ماكو ثواني واجه صعد وحرك السيارة

اباوعله الطريق كله ساكت وكالب خلقته الكبر حتى اني كآبني ويا

انوب عالك التبريد واني كاعدة بالصدر والتبريد صاير بوجهي گبل بحيث شكل عندي صداع من البرد

نصي التبريد

ميرد عليه ، كلت خاف ما انتبهلي رجعت عدت عليه نفس الكلام وهم غلس عليه انوب اني لو اكدر انصي من يمي جان نصيته

بس حضرة جنابه مدري شلون مسوي نظام سيارته اله هو من يمه يسوي كلشي حتى الجامه اذا ماهو ضاغط على زر معين ما اكدر افتحها

اكدر اعرف حضرة جنابك ليش جاي تغلس تره ما كتلك افتق الذرة جاي اكلك نصي التبريد راح ينفجر راسي وعيوني كامت توجعني

اشرتله هيوووووو اني احجي ويامن

والنبي فزيت فزه من وكف السيارة واندار عليه يصرخ جنه وحدة تطلگ

هارون :  شبيييييج شبيييييج باااااالعه لساااااان مطيييي شكدددد تحجييييين سكتييييي ما اريد اسمع صوتتتتج

زبيدة : ضليت صافنه من عيونه تنفض بالدموع نفض

ياا هذا شبي يبجي والله قبل شويه ما جان بي شي

اباوعله فتح باب السيارة ونزل منها مدري وين راح ، انوب احنه واكفين قريب على البساتين والدنيا ليل
وظلمة والسيارات اليمرن ينعدن على الاصابع

يربي هذا وين وله وعافني انوب خاف انزل واكملها مشي للبيت وهناك ينفتح وياي تحقيق اله اول ما اله اخر

فتحت فلاش موبايلي وسحبت يدة الباب ونزلت لكيته كاعد على حجارة ببداية البستان ، تقربت وكفت كدامه

شبيك هارون ، ليش هيج انفعلت شنو صاير وياك شي ؟

رفع راسه وباوعلي ، اباوع لعيونه حمر دم ورموشه مبلله الظاهر جان يبجي

بس غير افهم ليش ، شبيك هارون شنو تحس نفسك تعبان لو النوبة اجتك

ما جاوبني بس تنهد وباوعلي

هارون : تعرفين تسوقين ؟

زبيدة : هاا اي اي طبعاً اعرف

هارون : لعد سوقي انتِ اني ما اكدر اسوق

زبيدة : اي ميخالف ، كوم يله

تقدمت اسنده حتى يكوم بس دفعني عنه بخفه

هارون : لتلزميني اني اكوم

زبيدة : يطبك مرض ، ااا اقصد براحتك

مشينا للسيارة هو صعد بمكاني واني كعدت بمكانه ، حركت السيارة وعيني عليه مرجع راسه على الكشن ومغمض عيونه

ضليت اسوق وكل شويه استرق النظر اله والكا نفس وضعه

وصلنا للبيت ، صفيت السيارة بالكراج ونزلت وهو نزل بس شنو كومه يمشي وايده حاطها على راسه

انوب شفته يريد يوكع ركضت لزمته ، بطل عناد شوف روحك راح توكع

هارون : امشي بسرعة فوك راح تجيني النوبة

زبيدة : يله يله ، سندته ومشيت وهو ويايه ،دخلنا وشافونا بيت جدي كلهم كامو عبالهم بي شي

هيام : اسم الله يمه شبيك حبيبي

حمزية : شبيك حبيبي ليش هيج عيونك

هارون : امشي بسرعه

زبيدة : اجينه نصعد فوك وعارضتنا امه

هيام : وين رايح يمه فهمني شبيك كلبي كام يلوب عليك والله

زبيدة : شهكت من شفته دفع امه

هارون : يابه دوليييي

امشييي انتتتتتِ فضينيييي

زبيدة : عزه يمه هذا شنو من بشر انوب اخو وابو هدو عليه لعبو لعب لان دفع امه

عبدالله : لك حقييير نذل فوك ما تسأل عليك بس متصيييرلك جارة لا والله اعوج وراح تبقى اعوج طول عمرك

موسى : لك هدنييي صاحب خليييي اربييي للللك انتتتت ششايف روحك عبالك خبالك هذاا اذا تطلعه هنااا نسكتللللك حيوان حللللكك اشششكه والله

النوح : كافيييي صووووت ما اسمع وانت هارون اخذ مرتك واصعد حسابك بعدين

زبيدة : صعدنا للغرفة ، فتحت الباب ودخلت مكعده هارون على الجرباية

اباوعله اشرلي على وجهه ويلهث

هارون : وو وصـ وصله بسرعه هنا هنا ططـ لعليها 

زبيدة : ركضت فتحت الجرار الاشر عليه سحبت قطعة قماش قطن ، بسرعه اخذتها وخليتها بين اسنانه 

وفعلا اقل الدقيقة واجته النوبه ، اباوعله شلون يتحرك عبالك متكهرب

ركضت مددته على الجرباية ولزمت اديه كمت امسح عليها وعلى راسه

خلص اني يمك اهدئ اهدئ ، حاول تنظم تنفسك
بسم الله الرحمن عليك

هارون تسمعني انت اكيد لتشنج روحك حباب ، حسيت بي يضعط على ايدي

ميخالف اضغط على ايدي اكثر المهم تهدئ ، اباوع لعيونه انگلبن وصارن بيض

حرت شسوي ردت اروح اصيح لاحد وهو يشد على ايدي شلون اليكلي لترحين

ضليت اقره ايه الكرسي وامسح بأيدي الثانية على راسي وانفخ الهوه بوجهه

لمن شفته هدئ وراحت النوبه عنه ياله عفته ، اباوع لوجهه شلون مطعون ودمعته تنزل من عينه على المخده

كمت من يمه حتى ينام ، دنكت نزعته حذائه ، اعرف لو وحده غيري يمكن متسويها بس نعلون اليوم كسر خاطري ومن باب الانسانيه ما كدرت اعوفه

عدلت راسه على المخده وغطيته ، كعدت يم راسه كلت خاف يحتاج شي

بس هو غط بالنوم عبالك انضرب مخدر ، اني من شفته هيج سحبت القماش من حلكه وكمت غسلت وطلعت صليت وبدلت ملابسي

تمددت بفراشي وبالي يمه كل ربع ساعه اكوم اشوفه
وعلى هالحال منا لمن غفيت بدون ما احس

وما كعدت الا الفجر على صوته يون ، وخرت اللحاف وكمت بسرعه لكيت وجهه عركان ويهذي

لزمت كصته ما جان مصخن لعد ليش ديهذي ، تذكرت ذاك اليوم من اجته النوبة هم كام يهذي بس بوقتها گبل كام يحجي مو مثل هسه

هارون : ححـ حبابه تتـعاي 

شـ شعري لا لا شعري

ععـ عيوني حبيبتي وو وينج تتـ تعاليلي عيوني
يوجـ جعني

ححـ حبابه وو والله اخخـ اخاف

زبيدة : اباوعله ينشغ بنومه شلون الطفل ويحجي كلام ما مفهوم

مديت ايدي على خده ناويه اكعده وما احس بس بي غير يفتح عيونه ويكمز عليه يخنكني

هارون : شتردييييين منيييي ترديييين تموتنيييي مووو

زبيدة : اختنكت واختفى صوتي اريد احجي وما اكدر هو صاير فوكي وايده تضغط هلى ركبتي

ههـ هارون اخـ اختنكت

هارون : شعرييي شعرييي ليييش تلزمييي شتردييييين

زبيدة : بدت الرؤية تختفي عن عيوني ههـ هارون اصحى حباب

اباوعله فجأة رخه لزمة ايده عن ركبتي ومن صفن بوجهي كمز مبتعد عني بسرعة

شهكت بوجع محاولة اجر النفس ومو كادره

هارون : باوعيلي بسرعه راح امرغلج صدرج وانتِ جري النفس على كيفج

يله يله ويايه عفيه عفيه شويه شويه ، جري النفس ولتضغطين على اعضائج

هاا اييي ايي هيج تمام وجعج كاعد يرجع لونه

زبيدة : شكلت عندي كحه وهو كعدني ، يفرك بظهري ويحثني حتى اتنفس

ما يقارب نص ساعه اني بس احاول انظم تنفسي وهو ويايه ، لمن تنفست عدل ياله ارتاحيت

غمضت عيوني ، يمه ردت اموت

هارون : هاج شربي ماي واهدي

زبيدة : شربت مي وتنهدت

هارون : هاا شلون صرتي

زبيدة : دفعت ايده وعطت بي ، انتتتتت شنووو من بشرررر ليييييش دتأذينييي ليييش

دمعت عيوني ، بشنو اذيتك اني حتى تأذيني ليش دائما تسوي وياي هيج

بس كلي اني شنو السويته الك حتى تحقد عليه لهالدرجة وتحاول تكتلني

لك رغم كل السويته ويايه انت ، نسيت كلشي من شفتك تخربطت ، ذبيت حملك كله عليه وكلت ميخالف لو مهما يكن يبقى انسان وواجبي امام الله إني اساعده

تالي متالي هيج تسويه بيه ، اذا اني اذيتك بشي بدون سبب كلي حتى اعرف اني شنو السويته الك

لان تفلت عليك !! مو انت البديت وطعنت بيه وبخواتي

لان قبلت اتزوجك !! مو جدك الساومني على اخوية وخواتي مثل ما ساومك على شغلك قابل اني عاجبني اضل ويه واحد لاهو يريدني ولا اني اريده

بس غير مجبورة لوما زواجي منك مجان اخويه هسه سوه العملية ولا جان اجتني فرصة استرد حقي وحق خواتي

فإذا اني تساومت حالي من حالك ليش جاي تعتب عليه وتأذيني وكإنو اني الفرضت عليك هالزواج مو جدك

هارون : اني ما متعمد ااذيج هالمره ، جنت احلم وانتِ اجيتي لزمتيني وفززتيني هلي صارت عندي ردة فعل قوية تجاهج ما جنت منتبه عليج

زبيدة : بهاي ما جنت متقصد وبالباقيات هم ما جنت متقصد

هارون : لا متقصد

زبيدة : ليش

هارون : اكرهج

______________________________

"الساعة الـ2 بعد منتصف الليل "

ديمة : نايمه وكعدت على صوت اشعارات موبايلي

وخرت الغطه عني وكمت اخذته من الطبله ، اباوع جايتني رسالة على الواتساب من رقم غريب

فتحت الرسالة جان مكتوب بيها هلاووو ومكرره باكثر من رسالة لهالسبب انخبص بموبايلي بصوت الاشعارات

بلعت ريكي من شفت خط الكلمة مزخرف ، هاي هبه جانت تكتب بكيبورد مزخرف ومن تدزلي رسالة تجيني الكلمات مخربطة واضل اتعارك وياها

اباوع رجع الرقم دز " حبابه ردي عليه اني هبه "

غمضت عيوني ، والله عرفتها هي ، رجعت قريت الرسالة شنو من عين صلفه الها بحيث كاعده تراسلني

فزيت من دك الموبايل بأيدي ، باوعت لامين كعد وعلك التيبل لامب

امين : خير منو جاي يدك عليج بهالوقت

ديمة : هاا هاي دنيا

امين : شتريد

ديمة : ممـ متعاركه هي ويوسف واتصلت عليه حتى تفهمني شنو الصاير لان متكدر تكتب

امين : خير خوما بيها شي

ديمة : لا لا انت ارجع نام واني حطلع احاجيها بره

اخذت الموبايل وطلعت بسرعه ساده الباب ورايه ، رجع الرقم اتصل عليه

دخلت للمطبخ وفتحت الخط ، اجاني صوتها

هبه : الوو ديمة

ديمة : بهمس شعندج داكه عليه ولج والله عينج صلفه بعد كل السويتي جايه تتصلين عليه ولاكإنما مسويه شي

هبه : صدكيني ديمة اني السويته جنت مجبورة عليه ، راسل هددني بفيديواتي وصوري وخفت لا يشهرني
فاضطريت اسوي السويته

والله يا ديمه اني احبج وعمري ما فكرت ااذيج بس الخوف خلاني عميه وما اعرف اتصرف خفت من اهلي ليذبحوني ويهدرون دمي

ديمة : دكلي تبن حقيرة عبالج دروبج هاي تمشيها عليه لو عبالج راح اتعاطف وياج ، خاف عبالج اني ما ادري بيج شلون بعتيني برمشة عين

راسل الكلب حجالي كلشي عنج وكلي شلون انتِ من غيرتج مني وحقدج عليه استغليتي ابسط فرصة اجتج في سبيل تضريني

بس ما بالحيف اني ابقى ديمة النوح وانتِ تبقين هبه الزبالة المجديه التاكل وتلبس فضالتي وفضالة اهلي

عبيت بحلكج اكل وفلوس لمن كال الله بس توقعت ممكن اسويج آدميه وراقية مثلي بس المثلج مثل الوردانه لو يحطوها بشيشه العطر تبقى تحن لاصلها النكس والقذر

هبه : حقج بكلشي تكولي واني اعتـ....

ديمة : ما اريد اسمع منج كلمة وحدة تولين عني وابد لتفكرين تتواصلين وياي بعد والا راح اتصرف وياج غير تصرف

سديته بوجها وشمرت الموبايل على الميز ، حقيرة شلون ادبسز جايه هسه تعتذر بعد ما دمرتني وكسرت ظهر ابويه الكلبه

تنهدت واخذت الموبايل وطبيت للغرفه لكيت امين كاعد ولازم موبايله

هاا امين شعندك كاعد وويامن جنت دتحجي

امين : ما جنت احجي ويه احد بس ضل بالي يم دنيا ويوسف ان شاء الله انحلت مشكلتهم

ديمة : هاا ايي اييي انحلت

امين : الحمدلله لعد تعاي نامي

ديمة : طفيت الضوه و اجيت تمددت بصفه وانطيته ظهري ، خليت الموبايل يم راسي وضميت اديه ، الحقيرة طيرت النومة من عيني

الله لا يوفقها لا هي ولا راسل دمروني وهدمو مستقبلي مسلمتهم بأيد العينه متنام وهو الياخذلي حقي منهم هالانذال

حسيت بالموبايل يهتز يم المخده ، استغفرت ربي على هالليلة وجريت الموبايل

لكيتها راجعه دازتلي رسالة ، نصيت اضائة الجهاز وفتحتها

بلعت ريكي واني اقره المكتوب بيها

" اسفه ديمة بس اني محتاجة خمس ملايين واذا ما دبرتيهن الي خلال شهر راح اضطر اروح للمحل مالت اخو رجلج واراوي صورج انتِ وراسل "

_

_____________________________________

زبيدة : كعدت ثاني يوم الصبح ما لكيت احد بالغرفة اكيد هارون طالع وحتى لو جان موجود اني من اليوم قررت اتجنبه وكإنه اصلا مموجود

هالشي افضل اله والي شنو قابل ما رايده حياتي اني وهو باللسانه اعترفلي انه يكرهني يعني ممكن كلشي يسوي في سبيل يأذيني

واني مالي خلك منتظرة اخلص مصلحتي ويه جدي واجلق هارون والنوح واطفر بجلدي حتى البيت هذا اعوفه

كمت سبحت وبدلت ونزلت لكيت كل الزلم طالعين وبس النسوان كاعدات

صبحت على الكل ودخلت للمطبخ سويتلي لفة جبن وصبيتلي جاي وطلعت كعدت يمهن اتريك

اباوع لهيام اجتي كعدت يمي

هيام : اكول زبيدة شلون صار هارون البارحة جان مبين عليه متخربط

زبيدة : اي صحيح جان كلش تعبان ، اباوعلها لطمت على رجليها حيل

هيام : سودة بوجهي عليه ، بيه ولا بيك حبيبي

زين طمنيني شلون صار ، اني اليوم الصبح سألته بس ما جان اله خلك يحجي فكلت اسألج

زبيدة : لا الحمدلله صار زين اطمئني

بدرية : شبيج زبد حبيبتي ليش هيج صوتج مبحوح

زبيدة : هاا هاي البارحة قبل لا انام طبيت سبحت وطلعت نمت على السبلت فيمكن اخذت برد وتطبگ صوتي

حمزية : جؤ جؤ غير تنتبهين يا بيبي ، شو خلي اكوم اسويلج يانسون حتى تفك بلاعيمج

زبيدة : لا بيبي حبابه كعدب ما احب اليانسون

حمزية : ماكو متحبي بكيفج انتِ هذا دوه وبي العافية احسن من الكبسول التاخذو مرد اجسامكم مرد

هسه راح اسويلج شلون يانسون يخبل والله ليخلي صوتج من كد ما صافي ولا صوت فيروز

زبيدة : على كيفج مو لهالدرجة مو حتى الله ميقبل بهالجذب

حمزية : وخفة لهالوجه و لج قابل اني اجذب والله انتِ بس لو تبطلين تجوعر وتحجين مثل البنات جان صار صوتج احلى من صوت فيروز

زبيدة : هسه ما افتهمت هذا مدح لو ذم

بدرية : ههههههه اختاري اليعجبج

زبيدة : ابتسمت ورجعت اكل علما كملت اللفة طلعت بيبيتي لازمه كوب من كوب مدري جايبته

حمزية : هاج يمه شربي والف عافية

زبيدة : بيبي بشرفج هذا كوب لو دولكه

حمزية : دشربي وانجبي

زبيدة : ضحكت واخذته منها ، شربته كوه وجبرتني كله اكمله عاد جبرت نفسي اجرعه علمود بلاعيمي

كملته وخليته على الميز

منال : صحة وعافية حبيبتي

زبيدة : ابتسمت على كلبج خالة

بيداء : انتِ مترحين يم البنات شبيج مكابله العجايز وكاعدة

زبيدة : ليش مضايقتكم كعدتي هنا ؟

منال : لا امي عليمن نتضايق بس عمتج تقصد ليش متكعدين ويه بنات عمج اغلبهن بعمرج يمكن تتونسين وياهن اكثر

زبيدة : والله خالة وبدون زعل اني كعدة البنات متعجبني ، حجيهن كله حجه المكياج وكالت العطور والملابس واني امل من هالامور

غفران : ليش شترديهن يسولفن بالزلم لو بالعلاقات حتى تعجبج كعدتهن

زبيدة : وشمعنى اختاريتي هالموضوع بالذات الظاهر سامعة بناتج يسولفن بي هواي هلي يدك براسج دائما

غفران : احترمي نفسج اني بناتيييي خط احمر

احجيلج حجاية حجية شنو هذا الكلام ، شلون تقبلين تتجاوز عليه وعلى بناتي هيج

حمزية : والله عاد انتِ البديتي فتستاهلين ، هاج بيبي  هاي اميه دافيه اشربي

غفران : هيج صار الحجي عمه

حمزية : والله السمعتي وكلمة زايده اخلي فاضل يوديج لاهلج عود سيري يمهم جم شهر

غفران : عمه انـ...

حمزية : كافي سكتي

زبيدة : اباوع لبيبتي شلون سكتتها اي حيييل بعد حلكي المتقبل بالغلط وهي هم ما جذبت خبر كبل زعلت وكامت روحه بلا رجعه

بدرية : زبد اني العصر رايحه للسوك ليش متجين وياي

زبيدة : لا عمه ما اريد احس بملل من كلشي ، والبيت هنا جوه كآئيب ما اعرف شسوي

واني ما متعوده اكعد هالكد بالبيت بدون شغل ، لابد قبل من جنت كاعدة بالبيت جنت لاهيه نفسي بالشغل اما هسه كاعده ومصفطه

هيام : ليش متتعلمين طبخ

زبيدة : اني اتعلم طبخ !! اعرف اطبخ خالة

اريد اتعلم شي جديد يونسني ويملي الفراغ عليه

بيداء : تعلمي الركص

زبيدة : شلون اصارحج واكلج اعرف

بيداء : هو مبين عليج

زبيدة : ابتسمتلها شكراً عمه وأمانة شوكت ما تشتهين واحد يركصلج ابد لتجيني

بدرية : ههههه والله سوالفج يا زبيدة ، زين عمه اذا هيج انتِ ضايجه ليش متتعلمين الخياطة

زبيدة : والله عمه فكرة حلوة بس وين الكه دورات تعلمني

بيداء : اذا تردين ادليج على صديقتي تشتغل خياطة واحنه نخيط عدها بكل مناسبة حتى بدلات البنات نسويهن عدها

منال : ياهي قصدج ولاء

بيداء : اي خياطها مضبوط ويخبل حتى احلى من الحاضر ومن فترة سمعت بيها تاخذ دورات خياطة

زبيدة : زين متكتبلي عنوانها حتى اروحلها

منال : اني عندي قماش واريد اخيطه لمحرم اذا تردين اخذج ونروحلها وانتِ هناك شوفي اذا تكدر تسجلج بالدورة مالتها

زبيدة : اي طبعًا اريد شوكت نروح

منال : اذا تحبين هسه

زبيدة : يله لعد كايمة ابدل واجيج

حمزية : قبل لتطلعين خابري رجلج بيبي

زبيدة : هاا ايي ميخالف ، صعدت فوك بدلت واخذت موبايلي

ضليت حايره ، اتصل عليه لو اغلس ، اني لو عليه بزبانه ما اعبره بس خاف بيبتي تسأله لو يرجع وميلكاني ويسولي حركات الرجل الغيور

كلت خلي اخابره واتجفه الشر اشرفلي

اتصلت عليه ومن شفته رد عليه خليت الموبايل على اذني

هارون : شتردين

زبيدة : راح اطلع ويه مرت عمو فؤاد للخياطة وبيبي كلتلي اخابرك اكلك

ما رد عليه ، الووو مو احجي وياك ؟

هم ما رد عليه ، عبالي سده بوجهي واني نزلت عليه دوسه ونص

تفلت على الموبايل الكبر لفك شكد سزز ومو مال واحد يحترمك لو طالعه ولابستك مثل النعال اشرفلي اهمداك من بين الزلم اي والله

هارون : سمعتج سمعتج بسيطة

زبيدة : ضليت باهته صخام الصخمني هذا طلع يسمع يبوووو شيفضج يطلابه

سديت الخط ديله ويسمعني عشتو عاد شلون اخاف اني

اخذت الموبايل ونزلت طالعه ويه مرت عمو فؤاد

اكلج خالة اني ما جبت فلوس هواي ويايه خاف تريد الفلوس كلها مقدمًا قبل لا تسجلني

منال : لا عادي احنه معاميلها متتجرأ تحجي ويانه واذا على الفلوس لتخافين اني شايله هواي وياي

زبيدة : تمام شكراً

منال : العفو حبيبتي

زبيدة : ضلينا بالسيارة ما يقارب نص ساعة ووصلنالها جانت كاعدة بمنطقة راقية وهادئة كلش

نزلنا وتوجهنا لبيتها ، شفت اللافته الي حاطتها يم البيت مسويه اعلان بخصوص دورة الخياطة

دكت الجرس مرت عمو شويه وسمعنا صوت يجي من جوه ، انفتحت الباب واشرتلي خالة منال ادخل

دخلنا وتلكتنا بالطرمة مرة يطلع عمرها بمنتصف الاربعينات ، صحيح جميلة ومعتنيه بنفسها هواي بس اثار العمر مبينه عليها

وللصراحة اكثر شي لفت نظري بيها شعرها جان كصه قصيرة كلش وبلون رمادي ومخصل بابيض

كلش عجبني ولو عندي الجرئة جان كصيت وصبغت هاللون

ولاء : شلونج عيني ام احمد نورتيني والله مشتاقتلج وين هالغيبة

منال : والله ملتهين بهالحياة

ولاء : ما عرفتيني منو هالبنوته الحلوة الي وياج اكيد مو بنتج لان اني شايفه بناتج

منال : لا هاي مو جنة هيام مرت ابنها الصغير بس هم اعتبرها بنتي نفس الشي

ولاء : هاا حبيبتي شلونج

زبيدة : الحمدلله

ولاء : ليش واكفين عزه والله خذتنا السوالف ونسيت اكلكم تفضلو

تفضلو تفضلو اهلا وسهلا بيكم

زبيدة : دخلنا كعدنا بالاستقبال ، حاجتها مرت عمي على القماش التريد تخيطه وكلتلها عليه

ولاء : اووو والله اني موقفه دورات هسه

منال : حرامات عود زبيدة ضايجة وكالت اريد اتعلم شي جديد واحنه كنالها تسجل يمج

ولاء : لعد خلص ما دام انتو الكتولها عليه هاهي اني بخدمتها وخدمتكم

ليش احنه نكدر نكول لبيت النوح لا منتجرأ اصلا

منال : حبيبتي تسلمين

زبيدة : اتفقنا وياها على كلشي ودفعنالها نص المبلغ وطلعنا

بلغت بيبتي وخلت واحد من السواق يلتزم بيه يوديني ويجيبني

اروح بالاربعة الظهر وارجع بالسبعة بالليل وهالوقت حيل مناسبني

المرة الاسمها ولاء كلش شاطرة بشغلها بس بالنسبة الي احسها مو مريحة يعني مزعططه روحها وكوه تتعامل على انها وحدة بالعشرين

تصرفاتها مريبة

مر اسبوعين واني مسجلة يمها وكلش داستفاد منها وهي هم شقاوجية وتمشيلي الوقت بضحكة وسالفه وتعليم بحيث ما احس بسرعة الكه نفسي متعلمه

اليوم نزلني السايق كالعادة يم بيتها ، دكيت الباب وفتحتها الي

وكالعادة سوالف المباوس هاي اني ما احبها بس انجبر اسكت وانطيها خدي حتى لا احرجها

طبيت كعدت بالاسقبال لكيتها محضرة القماش

ولاء : ذبي صايتج وحجابج شبيج مگبعه شنو كاعدتلج ويه رجال شنو سالفتج اله كل مرة اكلج اخذي راحتج ياله

زبيدة : ذبيت الصاية والحجاب ، اني جنت لابسه بنطرون قماش لونه اسود ولابسه ويا توب بيجي ربع ردن

ولاء : زبيدة شنو رأيج ارجعلج فلوسج وتكليلي اسم الدكتور الناحتلج جسمج

زبيدة : هههههه لا عيني بدون مترجعيلي فلوسي اني اكلج هذا نحت رباني

ولاء : دروحي شكد نحيسه

زبيدة : والله العظيم لا مسويه عملية ولا راح اسوي بس العب رياضة كل يوم

ولاء : احاول اصدكج

زبيدة : ضحكت ديله تعاي خلي اشوف اليوم شؤاح تعلميني

كعدت يمها وكامت تشتغل كدامي واني اباوعلها

ولاء : هاج بله جربيلي هنا

زبيدة : شوو هيج اسوي

ولاء : اي عاشت ايدج

زبيدة : ضلت تشتغل واني وياها خطوة بخطوة اخر شي عافتني اشتغل شغلة بسيطة وهي كعدت تراقب شغلي

ولاء : زبيدة سؤال

زبيدة : عيني بالمكينة اممم جواب

ولاء : شنو رأيج بيه

زبيدة : من اي ناحية

ولاء : شكل جسم شخصية من كلها

زبيدة : شكلج وجسمج مقبولات مابيهن شي بس شخصيتج ما اكدر اعلق عليها بكل الاحوال اني ما صارلي اعرفج غير اسبوعين فما اكدر احكم على شخصيتج

بس ليش تسالين

ولاء : لا هيج ادردش وياج

زبيدة : تمام ، شوفي هيج صح

ولاء : اي صح ، اكول زبيدة

زبيدة : كولي

ولاء : يعني انتِ هسه لو رجال جنتِ ممكن تنعجبين بيه

زبيدة : ما اعرف بعد حسب ذوقي لو جنت رجال

ولاء : زين ولو جنتِ على حالج بنية هم راح تنعجبين بيه وبجسمي

زبيدة : باوعتلها ، شهالاسئلة السخيفه هاي ، انتِ شبيج اليوم ؟

ولاء : مابيه شي انتِ شبيج متتحاجين

زبيدة : اسألتج غريبة ومريبة ومقززة هم

ولاء : لتصيحين لج

زبيدة : ولجلاجه بنسج وعضامج احجي عدل

ولاء : يعني ما راح تجاوبيني

زبيدة : يابه دولي بأسألتج التهز عرش الله هاي حتى معدتي كلبت من وراج اكو واحد طبيعي يسأل هيج اسئلة مقرفة

جريت حجابي وصايتي اريد اكوم وتفاجئت بيها من سحبت المگص وخلته على صدري

ولاء : حركة وحدة اذا تتحركين انبت هالمكص بكلبج

زبيدة : شبيج انتِ تخبلتي يمعوده نزلي المكص الشيطان شاطر

ولاء : كعدي ، كعدييييي كلتتتت

زبيدة : كعدت ، فضيني شتردين تره لعبت نفسي منج

ولاء : نفس ما اسمع منج هسه بسرعه تنزعين الملابس العليج والا اذبحج هنا

زبيدة : بهتت ملامحي من سمعتها ، اا انتِ شجاي تحجين

ولاء : مثل ما سمعتي نزعيي يله

**************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

م / بدايةً اعتذر على ذكر اخر مشهد بالبارت ، اعرف اغلبكم حس بالقرف والتقزز من الحدث الاخير ، اني هم مثلكم لعبت نفسي واني اسرده لكن صدكوني هالحدث كلش مهم وراح يغير هواي امور بالرواية لذلك اضطريت اذكره باختصار لان اعرف هيج نوع من المشاهد شكد تكون مقرفة بالنسبة للقارئ

شنو رأيكم بالأحداث ؟

شنو تتوقعون حيصير بالبارت الجاي ؟

.