الموت الحي

البارت التاسع والثلاثون

مرحبا حبايبي العسل شلونكم ❤️❤️

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

العيشُ تحت الضغط يكلفُ الانسانَ طباعًا لا تُشبهه ، قد يبدو عدوانيًا وهو في الحقيقةِ مسالم ، قد يبدو شريرًا وهو في الحقيقةِ احد الطيبين ، وفي النهاية قد يفقد اعتباره في قلوب الناس وهو في الحقيقة ضعيف يُقاتل الجميع ليحمي نفسه 🖤

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

#الموت الحي
#للكاتبة براء الموسوي

ديمة : كاعدة على الجرباية بالغرفة واباوع لاضافري
متوترة وخايفة ومترددة من هواي امور

ما حسيت باي شي اريد بس هاليوم يخلص احسه هم ونايم على صدري حتى النفس ثكيل عليه

بعز قلقي وتفكيري وما احس الا باب الغرفة تنسد
ويدخل امين

اباوعله سد الباب واندار عليه ، ويه ما صارت عيني بعينه نزلت راسي ، احس شوفته تسببلي مغص

فزيت من حسيت باديه تنحط على جتافي موكفتني

امين : مبروك حبيبتي 

ديمة : ااا الله يبارك بيك

امين : ليش منزله راسج ، باوعيلي خليني اشوفج

ديمة : شلت راسي وباوعتله ، جان لابس قاط نيلي وجوا قميص سمائي ، شكد جان طالع مرتب بيومها حتى شكله بين مختلف عن كل مره اشوفه بيها

حسيت بأيده تنحط خدي ، كزبر جسمي وغمضت عيوني من حسيت بابهامه يتحرك على خدي

امين : ليش متوتره وهيج ترجفين حبيبتي

ديمة : هاا للـ لا مبيه شي

امين : زين تحبين تاخذين حمام دافي حتى ترتاحين

ديمة : هاا اي بس وحدي

اباوعله من حجيت هيج ضحك بصوت وهز راسه 

امين : طبعاً وحدج ، لتخافين حبيبتي ما راح اجبرج على شي ولا افرض عليج شي انتِ ما مستعدة اله
كدامنا الحياة كلها لاحكين نشبع من بعض

المهم هسه انتِ تكونين مرتاحة وماعندج هالتوتر هذا ، باعي اديج شلون يرجفن

ديمة : اباوعله دنك وباسني من اديه ثنينهن وابتعد مبتسم

امين : يله حبيبتي اني راح اطلع اشم هوه شويه وانتِ اخذي راحتج ومن تكملين اني ادخل وراج
تمام

ديمة : همستله ، تمام

راح هو واني ذبيت النفس متنهده ، احس جبل وجان كاعد على كلبي ، كعدت وفركت مكان كلبي محاولة اكون هادئه

صليت على النبي وكمت متوجهه لجنطتي ، فتحتها وغمضت من شفت سيت النوم كدامي ، تنهدت وسحبته

خليته على الجرباية ووكفت كدام ميز التواليت شلت الطرحة من راسي ، خليتها على صفحة وبديت اشيل الاكتنشن من شعري لمن خلصت منه ياله ارتاحيت

مديت ايدي فتحت سحاب البدلة واخذتها علكتها بالتعلاگة ، رحت اخذت احتاجياتي والسيت ودخلت للحمام

مسحت المكياج عن وجهي وسبحت بسرعة ، كملت ونشفت جسمي وشعري

رحت بدلت ووكفت صافنه على منظري بالمرايه ، جنت لابسه سيت على طول الجسم عبارة عن تول وبي نقش ابيض من فوك لجوه وفوكا روب مفتوح

تنهدت وسديت الروب ، توجهت للباب فتحتها وطلعت
شفت امين كاعد كبالي على القنفة وبأيده موبايله

من شافني ابتسم وكام متوجه اليه

امين : نعيمًا حبيبتي

ديمة : الله ينعم عليك

امين : توضيتي ؟

ديمة : اي ، ليش ؟

امين : خوش لعد انتظريني هسه بسرعة ادخل اسبح واطلع حتى نصلي سوه متفقين ؟

ديمة : تمام ، اباوعله كرص خدي وراح

رحت لبست الجادر وطلعت السبحة الرقمية مالتي وكعدت اسبح علما يطلع

شويه وشفته طلع من الحمام ، اشرلي بأيده

امين : يله نصلي

ديمة : هزيت راسي وكمت فرشت سجادتي ورا وبدينه نصلي ، اني كملت قبله وهو بقه يسبح

نزعت الجادر ولميت السجادة ، خليتها على جهه ورحت وكفت كدام ميز التواليت امشط شعري

اباوعله كمل وكام لم سجادته واجه وكف ورايه

امين : امشطلج ؟

ديمة : انطيته المشط بدون ما اجاوبه ، اخذه مني وكام يمشط شعري على كيفه واكو ابتسامة مريحة على وجهه

امين : شعرج من الله هيج اشگر مو

ديمة : اي

امين : اتذكر مرة شفتج واكفه كبال الشباك بدون حجاب ، من شفت شعرج كلت هاي شتحس صابغة شعفتها صفرة ما عبالي انتِ هيج شگرة من الله

ديمة : ضحكت ، ياا والله هذا لون شعري مصابغته ، انداريت عليه ولزمت شعري ، باوع ماما شگرة وعيونها خضر واني ومبين طالعين عليها

اباوعله طول ما اني احجي هو مبتسم ويباوعلي

امين : عادي اكلج شي ومتزعلين ؟

ديمة : گول

امين : بصراحة احس المكياج جان ظالمج هواي

ديمة : باستغراب شلون يعني

امين : شكلج بدون مكياج احلى بالف مرة من بالمكياج ، هسه من جاي اباوعلج عن قرب واشوف ترافه بشرتج البيضة ولمعتها لو حمار خدودج الطبيعي شلون يصفن

سبحان الخلقج شنو من جمال شايله ، اباوعلج واخاف لا ارمش ويفوتني شي من جمالج

ديمة : كلامة خجلني لدرجة خلاني امتمت ، ما اعرف شنو اكول ، المفروض اشكره على اطرائه لو اسكت

موقف صعب !!

فززني صوته وهو يحمحم

امين : احم تجين نتعشه

ديمة : هاا لا اني ما اشتهي

امين : ميصير حبيبتي انتِ تعبانة ومن الصبح استنزفتي كل طاقتج تحتاجين تاكلين حتى لتتخربطين ، واني ما اريدج تتعبين

يله تعاي

ديمة : باوعت لايده المادها الي ، قدمت ايدي بتردد مخليتها بايده وهو سحبني كعدني على ميز الطعام

وراح بسرعة جاب الاكل من على الطاولة واجه خلا كبالي وراح فتح جنطته وسحب خاولي واجه حطه على رجليه

امين : هاج حبيبتي خلي على هدومج حرامات ليوكع عليهن اكل ويندمرن

ديمة : عدلت الخاولي على رجليه واباوعله شلون يفتح بالعلاليك ويجيب ويخلي كدامي لو اسئلته
الي تبين اهتمامة المفرط بيه

تحبين الصمونة مگسبه لو لينه

تشربين ببسي لو سڤن

اجيبلج گلاص لو عادي تشربين بالقوطية

اخليلج سماگ على الكباب

هاج هاي اللفه

طول ما احنه كاعدين عايف نفسه وحاير بيه موقفه خلاني صافنه ، اني شلون راح اكدر اتعامل ويه شخص بهالحنية !!

امين : شبيج حبيبتي ليش متاكلين ، تحبين اجيبلج شي ثاني ؟

ديمة : هاا لا شكراً هياتني داكل كدامك ، رجعت اكل رغم ما هالكد اشتهي بس جبرت نفسي ما ردت اكسر بخاطرة وهو خطية مكيف ويكسم ويخلي كدامي

كملت وكمت غسلت ، طلعت لكيته يعزل بالاكل

عوفه اني الملمه

امين : لا يروحي ارتاحي انتِ ، امشي اخذي علاجج وكعدي واني اخلي الاكل بالثلاجة واجيج

ديمة : ابتسمتله ورحت اخذت ادويتي و كعدت كبال التلفزيون وهو خله الاكل بالثلاجة وراح للحمام ، شويه وطلع ينشف وجهه

اباوعله اجه اخذ الريمونت وكعد يمي ، عبر ايده حضني من جتفي وباسني براسي

امين : تحبين نشوف فلم ونغير جو شويه

ديمة : صفنت بوجهه ، من اول ما دخل للغرفة وهو يتصرف ولا كإنما اكو شي وابد مجاب طاري ذيج السالفة واني كل حركة منه دتفززني لان اتوقعه حيطلب مني شي لو يتقربلي بس ابد مجاب طاري الموضوع

امين : شبيج حبيبتي شنو تعبانة تردين تنامين ؟

ديمة : احم لا منعسانه خخـ خلي نشوف الي يعجبك

حسيت بي يشدد ايده على زندي مقربني اله ويدفع راسي بخفه مخلي على صدره وبده يكلب بالتلفزيون
وايده تمشي على شعري

طلع فلم وكعدنه نتابعه بهدوء وطول ما احنه كاعدين هو يلعب بشعري بحيث خلاني انعس

ولوما الوضع المتوتر الاني بي متأكدة جان غفيت بس خوفي من هالليلة مخلي النوم يجافيني

كمل الفلم واني اصلا بالي مو يمه وهو هم انتبهتله كل تفكيرة مصوب وياي كل شويه يبوسني لو يلزم ايدي لو يحاجيني

واني كوه متحمله ومصبرة نفسي

امين : تكومين ننام ؟

ديمة : همهمت بدون ما ارد عليه وكمت دخلت للحمام ، فرشت اسناني وطلعت لكيته واكف يتعطر وباقي بطرگ الفانيله التعلاكة والبجامة

اباوعله اشرلي كدامه

امين : تعاي خلي غراضج هنا ليش لازمتهن هيج

ديمة : تقربت وكفت كدامه وخليت غسولاتي وشغلاتي على الميز ، رفعت راسي شفته يباوعلي من انعكاس المرايه 

اخذت المرطب وضليت ادير على اديه جني مسودنه ، سبحت اديه تسبح اريد بس اخلص بسرعة واروح

بس فززني هو من عبر اديه على خصري ولزم اديه
يمسح عليهن على كيفه

امين : خليني اساعدج

ديمة : بلعت ريكي من حسيت بشفايفه تصير قريبة على ركبتي

امين :  بهمس عود ليش هيج اديج ترفات

ديمة : هاا ششـ شلون يعني

امين : ما اعرف بس احسهن كد ما ناعمات اذا اضغط عليهن راح ينجرحن

ديمة : طول ماهو يحجي يمشي شفايفه على ركبتي
واني احس النفس ضاق عليه اريد اجر الهوى ومكادرة

غمضت عيوني من حسيت بي يسبحني ويديرني عليه

امين : باوعيلي ابد لتغمضين ، اريد اليوم احسج وياي ، بكل لحظة ، بكل لمسة ، فتحي عيونج و راويني الزمرد المضموم جواهن  ، ابد لتحاولين تحرميني من جمالهن

ديمة : فتحت عيوني وباوعتله وهو صفن بوجهي وبدون سابق انذار دنك عليه وباسني من شفايفي

واني بدون شعور لزمت اطراف الروب ضاغطة عليهن
وبلحظتها حسيت روحي دتطلع ، اول مرة اجرب هالشعور وجان من اقبح الاشياء الصادفتني بحياتي

نزلت دموعي من حسيت بي يفتح بحزام الروب ويذبه عني واديه تحاوط خصري بقوة مقربني عليه

شفايفي احسهن خدرن واختنكت وهو كإنه جان منتظر مني اشارة حتى يتقربلي والظاهر سكوتي
انطا هالاشارة

ما اعرف شبيه بلحظتها رغم كل الالم الاحسه بداخلي بس جنت باردة ماعندي اي ردة فعل خارجية غير الدموع

ردت ادفعه ، ردت اكله عوفني اني ما اريدك ، ما احبك ، لتتقربلي اشمئزيت منك

بس بالنهاية اتذكر اني الوافقت واني الي اختاريت إني اقبل بي واصير مرته فعلى اي اساس هسه جايه اعترض على شي اني الي اختاريته !!

فزيت من حسيت بي يدفع جسمي على الجرباية ويعتليني مخلي كصته على كصتي

امين : احبج ديمة ، اموت عليج شسويتي بيه لخاطر الله احس كل مسامة بيج جاي تجذبني ، اريد ابتعد عنج ولو شويه بس ما اكدر والله ما جاي اكدر

ديمة : فتحت عيوني اباوع لوجهه يبث عرگ وجسمه كله يرجف وكإنه داخل سباق ، اول مرة اشوفه بهالحال

اباوعله رفع ايده وسحب حمالة قميص النوم منزلها عني وايده الثانية امتدت تفتح بالسحاب

ما اعرف شلون وشوكت صرت اني بين اديه مجردة من كل كلشي جان ساترني

كل الاتذكرة إني كطعت شفايفي وهو يتقربلي بس في سبيل ما اتراجع بلحظة ضعف وادفعه عني

يمكن اصعب موقف ممكن يمر على اي بنية بهالحياة انها تسلم نفسها ، جسمها ، مشاعرها ، روحها واثمن شي ممكن تمتلكه لشخص عمرها ما حبته ولا فكرت بي 

واني اليوم عشت هذا الشعور ، حسيت روحي دتطلع
كل لمسة يخليها على جسمي تطلع وراها الف شوغة داخليه

وصلت لمرحلة فقدت و كمت انشغ من البجي وهو للاسف جان يفسرها على انها خوف وتوتر ويكعد يبوسني ويهدئني ميدري الشعور الي بداخلي شنو

واستمر الوضع على هالمنوال لحد ما اخذني وصرت مرته فعلاً

اباوعله ابتعد عني ودنك عليه باسني من شفايفي

امين : الف مبروك يروحي ، ربي يقدرني واخليج اسعد انسانة بهالكون

ديمة : بدون ما ارد عليه ، انداريت ونمت بوضع الجنين حاضنه نفسي ودمعتي على خدي

امين : شبيج حبيبتي ليش تبجين متوجعة مو ، تكومين نروح للمستشفى ؟

ديمة : همستله ، لا ميحتاج بس تعبانه شويه

امين : زين كومي سبحي ودفي جسمج بلكت ترتاحين

ديمة : بلعت الغصه المحشورة ببلعومي وجاوبته ، حباب امين عوفني ما اكدر اكوم اريد انام

حسيت بي يمسح على شعري ويبوسني من ركبتي

امين : هاهي براحتج حبيبتي ، اني كايم اسبح وانتِ رفعي رجليج خلي اسحب الغطة واغطيج لترحين تستبردين موزين عليج

ديمة : سويت مثل مكال وهو غطاني وراح ، سحبت اللحاف عليه ، عضيته بأسناني وبجيت من كل گلبي

اني شسويت بروحي وين ذبيت نفسي ، ليلة وحدة ما كدرت اتحملها ويا شلون بيه بعدين وشلون حكمل حياتي ويه هالشخص واني ساعة وحدة ماكدرت اتقبله

ربي اخذ روحي وخلصني تعبت انييي والله تعبببت
ضليت ابجي وكلما اتذكر الصار ابجي بالزايد ، حسيت بالقرف لدرجة تمنيت لو اكدر انتزع جلدي واذبه حتى لا احس بالاحساس الداحسه هسه

سمعت باب الحمام ينفتح بسرعة سكتت وغمضت عيوني ما اريده يشوفني بهالوضع المثير للشك

حسيت بي يرفع الغطة وينام بصفي او بالاصح لازك بيه ، سويت روحي نايمة حتى يعوفني بحالي وفعلا شويه وماحسيت بنفسي الا واغفى من التعب والبجي

______________________________

زبيدة : خلصت زفة ديمة واحنه رجعنه للبيت وطبعاً خالة وئام خلصت الطريق علينه بس تبجي حتى اني راسي داخ

دنيا : كافي ماما كافي حبيبتي راحت عيونج من البجي

وئام : مو بأيدي والله مو بأيدي شلون بعد ما اصبح بوجه ديمة وما اشوفها كل يوم

حمزية : كولي يا الله بنتي شنو سالفتج كل بنية هذا مصيرها يكبرون الاهل ويتعبون وتاليها تتزوج وتشق طريقها وحدها

اني وانتِ وكل مرة خلقها الله لابد انها تعيش هاليوم

زبيدة : ما عدايه طبعاً

حمزية : انجبي انتِ

دنيا : ضحكت ، حيل بيج مستاهله هسه انتِ شعليج وحطيتي روحج

زبيدة : غير هي جمعت كل البنات لو اني مو بنية يمه !!

وصلنا للبيت ونزلنا بس شنو كوه نمشي من التعب ومن اجينه ندخل دك موبايل دنيا ، بيبي وخالة دخلن واني وكفت وياها

دنيا : شفت يوسف يتصل ، جاوبته الووو

يوسف : خلص عرس ديمة مو

دنيا : اي وهستونه رجعنه للبيت بس ليش

يوسف : تمام لعد تحضري نص ساعة واني يمج ، محضرة غراضج مو ؟

دنيا : باوعت لزبيدة ، هذا كل عقله يريد يمر عليه الساعة بالـ1 بالليل

زبيدة : شبيج صفنتي ، ويامن جاي تحجين ؟

يوسف : الوووو

دنيا : الو هاا يوسف اسمعك ، اي اني محضرة غراضي من البارحة بس بيت جدي ميدرون احس زحمه اطلع هسه بدون ما انطيهم خبر قبل بوقت

يوسف : لتخافين اني خابرت جدج وانطيته خبر من البارحة وگلي ماكو مشكلة

دنيا : هااا هو هيج كلك

يوسف : لعد اتبلا عليه اني شبيج دنيا

دنيا : لالا مو هذا قصدي بس تفاجئت ، على كل حال هسه انزل غراضي وانتظرك

يوسف : تمام يله في امان الله

دنيا : سديته منه

زبيدة : هاا شيريد يوسف

دنيا : يكلي تحضري جاي اخذج للبيت

زبيدة : هسه ؟

دنيا : اني هم صفنت يعني هي بقت على نومة الليل خو خلي يمر عليه باجر عليمن متوازي

زبيدة : همه ذولة الزلم طگه ونص لو يردون يشدون الساعة تشكل فرق يمهم

بله متكللي شتسون بالرجل ، ادري حظ دبان ، اشو انتن التطبخن وانتن التنظفن وانتن التربن عود يعني اذا هو براسه خير ينطي مصرف وياريت لو المصرف الجن اشو يروح على بزرة وبطنه وانتن بالسنة حسنة
ياله تفتحن حلكجن وتطلبن شي

عمي اعيش حياتي وحدي وفلوسي نايمة على كلبي واسافر واروح واجي ، لا طفل يعيقني ولا رجل يمنعني بس انتن حساسات اذا مو بحضن ادم متغمضلجن عين

دنيا : الله زبيدة الله عاشت ايدج على الطاقة الايجابية الدتبثيها عليه

غميتها ، اهمداج خاف اني عايزة تحطيم وانتِ ما قصرتي ، اروح اجيب غراضي عابتلج شكد سوداويه

زبيدة : ضحكت على منظرها انوب راحت تمشي وتدردم عليه ، هزيت ايدي مو صاحيات والله

حضنت جتافي وتمشيت بالحديقة ، رغم كل التعب البيه بس مداحس نفسي نعسانة

خصوصاً اليوم خواتي ثنينهن راح يبلشن حياتهن الجديدة بعيدًا عني واني ! اني حبقى وحدي هنا

شلون حعيش واتعامل ويه اهل هالبيت واني كارهتهم كلهم ماعدى بيبي وعمتي بدرية بيه مجال وكادرة اتقبلهم

تنهدت والله شكلج يا زبيدة نهايتج حتكون مثل نهاية امج ،  وحيدة بوسط كل زحمة الناس هاي

ابتسمت من شفت نفسي واصله لأسطبل الخيول ، عزه لعد شكد ماشيه اني

باوعت اكو ضوه خافت جاي من داخل الاسطبل ، معقولة اكو احد كاعد بهالوقت ، اشو بيت جدي من اجينه كله اظلم ومبين كل البي نايمين لعد منو الكاعد هسه

ولو ليش داستغرب اكيد ذاك المسموم كاعد هنا ، خلي ارجع احسلي مالي خلك اشوف خلقتة الزفرة

انداريت دامشي بس استوقفني صوت نوعاً ما عالي
صفنت ، لحظة هذا مو صوت جدي !!

اي والله هذا صوت جدي ومبين عليه صاير عصبي من نبرته العالية ، تقربت لباب الدخول ودخلت

صار بوجهي ظهر هارون وجدي واكف كباله يعد ويصف عليه

النوح : انت شعبالك يعني سالفتك العوجة هاي راح تعبرها عليه لو عبالك ما راح اعرف بعمايلك السودة التخزي الوجهه

هارون : ليش شمسوي

النوح : ولك نذل عبالك ما ادري انت الشوهت معتز ابن عمتك وحركت وجهه

هارون : واذا تدري ليش جاي تسألني

النوح : لك ابن القندرة ابن النعال اني الى متى اضل اطمطم وراك مو والله طلعتها لروحي ، اني ابني وانت تجي تخرب

جم واحد صار هذا ، انت وتالي وياك ، تدري لوما منصبي وايدي الطايلة جان انت هسه معفن بالسجن
وحضك طايح بس ماكو فائدة متتعض ولا تصيرلك جارة

هارون : واني ما طلبت منك تفزعلي انت الي تطوعت من ذاتك فلتضل تمن عليه

النوح : هارون مو ليش تخليني احجي حجاية تضوجك وتجرحك ، خليني ساكت وحاشر لساني بلهاتي احسلي

شنو حضرتك متدري اذا انفتح حلكي انت شيصير بيك ليش تجبرني ااذيك واني احبك وميهينلي بيك

تدري لو واحد غيرك مسوي هالعملة جان وديته وره الشمس بس اااخ اااخ كونك حفيدي مستغل هالنقطة لكن اقسم ورب الكعبة اذا اي ضرر يبدر منك بعد لاتصرف وياك تصرف يخليك تعض اصابعك ندم

وانت تدري بيه حجايتي سيف وما اتراجع عنها لو اعرف نفسي اتندم عليها سنين الي احجي انفذة وانت
تعرفني ما حاجة اشرحلك

وهسه احجيلي ليش سويت بابن عمتك هيج

هارون : اسباب شخصية

النوح : اسبابيش هاي التخليك تحرك ابن عمتك

هارون : جدي كتلك اسباب شخصية

النوح : زين احجيلي ، سوالك شي ؟ اذاك بشي ؟ سمعك حجاية بس احجيلي اذا مسويلك شي افصملك ظهرة وانعل كلمن يطلع ورا بس انطيني سبب واحد يخليك تشوهه انسان بهالطريقة

هارون : اطمئن وصدكني هو كلشي ما سوالي اصلا ميكدر يوكف كدامي حتى يسويلي شي

النوح : زين ابن النعال اذا الولد ما مسويلك شي ليش اذيته هيج وخربت وجهه

هارون : كتلك اسباب شخصية ما اريد احجي بيها ليش تضغط عليه يا جدي

غير هيج انت شلون عرفت اني الچويته ، واني حذفت كل تسجيلات الكاميرات

النوح : زين تعترف انت الحاذفهن

هارون : اي اني حذفتهن قابل تريدني اعوف لزمه على روحي

النوح : لا إله الا الله انت وتالي ويه قباحتك هاي ، اني شكد شايف ناس گبحية بس مثل گباحتك وحق من خلق محمد ما شفت

هارون : هسه ما راح تگلي شلون عرفتني

النوح : لا راح اكلك حتى لتضل حسرة بكلبك ، حضرة جنابك من حذفت التسجيلات نسيت اكو كاميرات مخفية بين الشجر ومحد يندل مكانهن غيري

ومن اول ما صارت السالفة رجعت على الكاميرات وشفتك شلون خدرت معتز وسحلته للبيتونه بس انجبرت اضل ساكت لان جنت ملتهي وماعندي وكت احجي وياك

غير هيج احمد الله وشكره الف مرة اني الشفت الكاميرات وحذفت التصوير مو غيري والا لو عمتك تدري و ولدها يدرون بعملتك الطايحظها هاي جان وصلت السالفة لعمام ولد عمتك

وساعتها تعال تحمل كعدات وفصول غير انهم ممكن يحولون الموضوع للقانون وبعد شيخلصك

هارون : رجفت ، ما بقى عليه غير الزبايل امثال ولد بنتك ونسايبكم السرابيت

النوح : اكل تبن خفة حلگك ساقط

هارون : جدي رحمة للكعبة سد الموضوع وخلينه نروح ننام تره كمت اغفي ورايه طلعة للمحمية
اذا ما نمت ما اعرف اشتغل

النوح : هارون اني عند حجايتي هاي اخر فرصة الك
والله العظيم وهاي اني اكرر القسم صدك هاي اخر فرصة الك

احسب حسابك اي شي يبدر منك بعد حتى لو چان تافه اني ما راح اسكت وراح تتعاقب حالك حال كل واحد يغلط بهالبيت ، مفهوم ؟

هارون : بملل ، مفهوم

زبيدة : من سمعت بيهم يردون يطلعون ، ركضت ختلت وره الشجرة وايدي على حلكي ، اخاف صوت نفسي يوصلهم ويدرون بيه جنت اسمعهم

اباوعلهم طلعو ثنينهم يمشون ويتناقشون بنفس الموضوع وجدي يطبطب على ظهر هارون اليمشي مترهي ولا كإنما مسوين شي

انتظرتهم يختفون عن انظاري ياله طلعت

لزمت كلبي ، عزه بعيني هاي شنو هالعائلة هاي ، طلع جدي من البداية كاشف هارون ويدري بي من البداية
وبدال لا يعاقبه ويفضحه حذف كل التسجيلات وتستر عليه

زين مو مثل ما هارون حفيد جدي وعزيز عليه معتز هم حفيده والمفروض ميقبل الاذيه على الاثنين اشو جدي تستر على واحد وظلم الثاني

خصوصاً انُ هارون اعترف بالسانه انُ معتز كلشي ما مسويله ولا متعرضله وتصرفه جان لسبب شخصي مثل ميكول

يربي شهالعائلة الكلها تفرقة وغل وحقد ونفاق ، ناس حاقدة على ناس وناس تكيد لناس ، شهالمله هاي يا إلهي

عمي همزين خواتي راحن وخلصن لو باقيات جان تسودنن لان اني ادري بيهن رغم كلشي الا انهن فقيرات وميتحملن هيج ناس ولا يكدرن يعيشن وياهن

تنهدت ماسحه على وجهي ، انعل ابوكم من عائلة ايييع شكد ما جنت اكرهكم هسه كرهتكم بالزايد

مشيت راجعه للبيت ولاكتني دنيا تنزل بغراضها ووياها الحرس وبيبي وامي

دنيا : وين جنتي ولج صارلي ساعة ادور عليج

زبيدة : هنا افتر

وئام : شلون تفترين وحدج بهالليل ديربالج يمه خاف يصيرلج قدر اسم الله

حمزية : لا شسالفه ، البيت كله كاميرات وحراسه مكثفه شحده اليطب للبيت غير تنهشه الجلاب البره

على راحتج يمه زبد لتتقيدين

دنيا : انتبهت لموبايلي يلمض ، باوعت للشاشة ، يوسف رمش عليه

يله يا جماعة اني اروح يوسف اجه

تقدمت حضنت بيبي وبوستها

حمزية : الله ينور طريقج ويرزقج الحياة السعيدة و الذرية الصالحة التدخلج الجنة من اوسع ابوابها

دنيا : ابتسمت حبيبتي بيبي فدوة لكلامج ، ابتعدت وحضنت امي التبجي ، حبابه ماما لتبجين والله ميهينلي اروح واني اشوفج بهالوضع

وئام : تعلمت عليجن يبعد روحي ما اكدر افاركجن والله يعز عليه اصبح وما الكاچن كبالي

دنيا : هياتنا يمج بس اتصلي واحنه نركض الج المهم متكونين ضايجة ولا زعلانه ، حبيبتي ماما فدوة اروحلج لتبجين

وئام : بابتسامة لا هاهي يروحي توكلي بالله ما اعرضلج اني ، الله يوفقج ويعوضج خير عن الصارلج

دنيا : يروحي امين ويخليج خيمة على راسي

ابتعدت عنها وباوعت لزبيدة التباوع على الشجر ومسويه نفسها بالها مو يمنه

هاا اروح لو تودعيني ؟

زبيدة : عوجت حلكي عشتو اودعج شنو هو انتِ وين رايحة تجاهدين حتى اودعج 

دنيا : حضنتها بقوة وهمستلها ديربالج على نفسج وعلى ماما ودادا ومعين اني وديمة حنصير بعيدات وهسه  المسؤولية حتكون مسؤوليتج واني متأكدة
انتِ كدها

زبيدة : ابتسمت ، لتخافين بعيوني اخليهم وبعدين شنو انتِ ام الوصخ عود جايه توصيني شنو هاملتهم اني حتى توصيني عليهم

دنيا : هههههه لا بس كلت اذكرج ، بستها من خدودها يله مع السلامة تصبحون على خير

: الله وياج وانتِ من اهل الخير

دنيا : اخذ الحارس الجنطة واني سحبت الثانية ولحكته ، طلعت من البيت لكيت جدو واكف هو وعمو عبدالله يم يوسف

السلام عليكم

: وعليكم السلام

دنيا : اباوع ليوسف اجه اخذ مني الجنطه خلاها وره و وكف يسلم على جدو وعمو

يوسف : يله حجي اني اترخص ، محتاجين شي ؟

النوح : اني محتاج شغلة وحدة منك غيرها ما اريد ، شايف هاي حفيدتي ، اريدك تخليها بعينك وتديربالك عليها 

يوسف : اطمئن حجي بعيني اخليها

دنيا : ابتسمت من شفت جدو فتحلي اديه ، تقربت حضنته وهو باس راسي

النوح : ديربالج على نفسج وخلي ببالج اني بظهرج وسندج اي شي يصير وياج لتترددين تبلغيني ، صدكيني راح اوكف وياج واخذ حقج من حلك السبع مهما كان منصبه ومكانته

دنيا : شكراً جدو

عبدالله : امانه الله ورسولة اي شي تحتاجي اعتبريني ياسر وابد لتترددين تخابريني

دنيا : دمعت من كلام عمو ، احس طريقة كلامه وحنيته المبينه بصوته هواي تذكرني ببابا

ابتسمت وتشكرتهم من كل كلبي و ودعتهم وصعدت بالسيارة ويوسف سلم عليهم وحرك السيارة

واني التزمت الصمت وعيني طول الطريق على الاشجار والبساتين التلاكينه

وما فزيت الا صوت يوسف وهو يحاجيني

يوسف : شلونج

دنيا : الحمدلله زينه وانت ؟

يوسف : ماشيه اموري ، تحبين ناخذ شي ويانه؟

دنيا : لا شكراً ممحتاجة شي

يوسف : خوش

دنيا : انتهى الحديث وهو ضل يسوق لحد ما وصلنا للبيت ، هو دخل السيارة للكراج واني نزلت انتظرة

اباوعله جاب غراضي واجه

يوسف : يله تعالي

دنيا : دخلت ويا للمطبخ لكيت خالة رميم كاعدة وبس شافتنا ابتسمت وكامت

رميم : هلا ، هلا وميه هلا بدندون ، بعد كلبي هستوه نور البيت

دنيا : بوستها حبيبتي خالة منور بوجودج

رميم : يييمه الف الحمدلله من رجع انلم شملكم ، رحت فدوة لطولكم

يوسف : يمه مو كإنج بالغتي

رميم : انجب ولك انجب ابالغ شنو وداعة ابويه ما مصدكة دنيا رجعت وراح تعيش ويانه

يوسف : الله يثخن لبنجن

رميم : ههههه ثخين من كاعه ميحتاجله ثخن

دنيا : ابتسمت على كلامها

رميم : يله يمه انتِ تعبانة روحي صعدي لغرفتج وارتاحي وباجر ان شاء الله اجي اكعدج من وكت بواسطة جمعة حتى نلتم كلنا سوه

دنيا : ابتسمتلها ان شاء الله خالة

يوسف : من رخصتج يمه تره الساعة راح تطخ الثلاثة لاحكات على السوالف

رميم : اي شبيك مستعجل ، يله حبيبتي روحي بس خلصيني من هذا 

دنيا : هزيت راسي ولحكت يوسف الصعد فوك ، مشيت ورا لحد ما وكف كدام غرفة وفتحها ودخل الجنط

يوسف : تفضلي

دنيا : دخلت للغرفة وخليت جنطتي على الميز ، انداريت عليه لعد وين تيم ؟

يوسف : يم امي

دنيا : باستغراب وليش وديته يم خالة !!

يوسف : ومنو كلج اني الوديته تره هو ينام هنا ومن ردت اجيج صحت لامي تبقى يمه بس الظاهر هي اخذته يمها وهسه رايح اجيبه

ماله داعي هذا الاسلوب والنبره مو شايفج اني وما مصدك حتى اطلع ابني علمودج

دنيا : ضليت صافنه بوجهه والله حتى ما اعرف شجاوبه ، هذا شبي هسه اني شكتله

اباوعله طلع وطبك الباب ورا ، ياا شجا هذا لو سابته مياخذ موقف هيج

ضليت واكفه حتى استحيت اكعد كلت هسه يجي يكلي منو سمحلج تكعدين ويسويلي ادري بي طكه ونص

اباوع للباب انفتحت ودخل هو شايل تيومي اليفرك بعيونه سودة عليه مبين مكعده من النوم

انوب حبيبي شافني وصفن بوجهي شلون المستغرب
من وجودي ، اباوعله اندار على يوسف ويأشرله عليه

تيم : بابي ننه

يوسف : اي حبيبي شوف هاي جبتلك ننه

تيم : يمييي

دنيا : باوعتله باستغراب ويوسف فهم نظرتي وكعد يفسرلي

يوسف : يكول تنام يمي

دنيا : ابتسمت وتقربت اخذته منه ، حضنته وبوسته افيييش يروحي طبعا انام يمك لعد اني المن اجيت

تيم : ننه نام

دنيا : يروحي انت تريد تنام ، حضنته لصدري وهو شبكني مخلي راسه على جتفي

بلا زحمه عليك وين انومه

يوسف : تعاي

دنيا : لحكته شفته فتح الباب الي بالزاويه ودخل واني دخلت ورا

اباوع غرفة كلش صغيرة بس تجنن لونها ازرك غامق وابيض ، مليانه العاب واشياء تجنن حتى تلفزيون بيها

يوسف : حلوة الغرفة مو

دنيا : ابتسمت تجننن كلش حلوة

يوسف : هنا ينام تيم

دنيا : شعجب متنيمه يمك ؟

يوسف : جنت انيمه يمي بس بعدين بطلت لان تدرين بيه نومي عبث وهواي اتكلب كمت اخاف لا ادفعه لو اضربه واني نايم وانوب ااذي

وهم نومته هنا احسن الج واله حتى تاخذين راحتج اكثر في حال لو ما حبيتي تنامين وياي على نفس الجرباية

دنيا : هزيت راسي ، شكراً لانك فكرت بيه وقدرت رغبتي

يوسف : لتخافين خال ببالي من البداية شنو سبب تجديد زواجنا

يله اخذي راحتج ونامي واني هم راح اروح انام وان شاء الله اذا عندج شي نحجي بي باجر زائد ياريت اهلي ميدرون شنو نوع العلاقة البيناتناحتى لتصيرلج وتصيرلي مشاكل احنه في غنى عنها

دنيا : اطمئن الموضوع حيبقى بيناتنا

يوسف : شكراً واعتذر لان صيحت عليج بس استفزني سؤالج شويه

دنيا : ما صار شي انسى الموضوع

يوسف : يله من رخصتج وهاا اكو حمام بالغرفة اذا تحبين تبدلين او تسبحين ذاك ويا

دنيا : تمام مشكور

يوسف : يله ، تصبحين على خير

دنيا : وانت من اهل الخير ، جريت جنطتي وسديت الباب

تمشيت خليت تيومي على جرباتية ، غطيته ورحت فتحت جنطتي ، طلعتلي تراك واخذت خاولي وفتحت الباب وطلعت لكيت يوسف واكف مدري شيطلع من الكنتور ومن شافني طلعت اندار عليه

يوسف : محتاجة شي ؟

دنيا : باحراج لا شكراً بس اريد استخدم الحمام ، عادي مو ؟

يوسف : دنيا تره ماله تسأليني هالغرفة من هاليوم مثل ما هي الي فهي الج شتردين تسوين بيها سوي

ابد لتتقيدين وبالنهاية احنه مو اول مرة ننجمع بمكان وحدنا فخلي الامور طبيعية ولتتوترين وحتى حجابج اذا تحبين نزعي اني هيج هيج شايف شعرج يعني ماله داعي تحسسيني وكإني اول مرة راح اشوفه

دنيا : هاا ااا اي ان شاء الله احاول ما اتقيد من رخصتك

دخلت للحمام ، علكت ملابسي ورحت سبحت ، كملت وبدلت ، خليت الخاولي على راسي وصفنت ، مدري ليش احس بغرابة من افكر إني حطلع هيج كدامه

رغم كلامه صحيح واني ويه عشنه سوه وشفنه من بعض الاخزى والافشل من مجرد تراك وشعر بس اني ما ادري شبيه احس نفسي مستغربة

لفيت راسي بالخاولي وطلعت من الحمام شفته مطفي كل الاضويه ومخلي بس واحد لونه اصفر خافت وباقي بطرك البجامة ومتغطي مطلع صدرة

ياا هذا شبي گبل اخذ على الجو ونزع

انوب من شافني طلعت ولا كإنما شاف احد ضل لازم موبايله ويكلب ولا عبالك اكو احد ويا بنفس الغرفة

دنكت ومشيت زين اني ليش استحيت ما ادري عبالك اول مرة اشوفه على كولة زبيدة اني شكد ايييع

دخلت للغرفة وسديت الباب ، انداريت وشفت تيم كدامي نايم ومشابك اديه سوه ، ابتسمت جعلني اروح سبع فدوات لهالنومه الحلوة هاي

تقربت رفعت الغطة ونمت بصفه وتغطيت ويا ، رفعت راسي بسته من كل وجهه ، عيونه ، خدودة ، حنچه
وركبته حبيبي والله ممصدكة ربي جمعني بيك

مديت ايدي رفعته ونيمته على ايدي حاضنته ، غطيته وتغطيت زين وشبكته ونمت

____________________________

"صباحاً "

ديمة : غافيه واحس اكو شي خشن يمشي على ظهري

انزعجت لان ظهري صار يحكني ، فتحت عيوني وباوعت للمكان اني وين ؟

اخذتلي فترة صافنه ياله استوعبت هاي خشونة شوارب امين ، هذا شديسوي !!

امين : يله حبيبي كعدي ، اذن الظهر

ديمة : من سمعت صوته فزيت وانداريت بسرعة لان جنت نايمه على بطني

سحبت الغطة على جسمي وباوعتله مصدومة من الموقف

اباوعله دنك عليه وباسني من ركبتي ، كزبر جسمي وحسيته يبستم ضد بشرتي 

شددت لزمة ايدي على الغطة ، صصـ صباح الخير

ابتعد وباسني بخدودي

امين : صباح الورد يا احلى وردة بحياتي

يله حبيبتي كومي سبحي وتوضي حتى من يأذن نصلي سوه

واني راح اسبقج واحضر الريوك حتى نتريك سوه

ديمة : هزيت راسي بدون ما اجاوبه وهو دنك عليه راد يبوسني من شفايفي

ما تحملت وبسرعه انداريت عنه ، رجاءًا امين اني بعدني تعبانة مو وكتها

اباوعله ابتعد عني وهز راسة مبتسم

امين : هاهي حبيبتي براحتج واعتذر اذا جاي اضغط عليج ، ادري بيج ما متعودة احد يتقرب منج لهاي الدرجة بس كليلي شسوي بروحي ما جاي اشبع منج

الليل كله اني نايم بصفج وما مصدك بروحي كل شويه اشيل راسي واباوعلج حتى اتأكد هاي صدك انتِ النايمة يمي لو غيرج

ديمة : ما جاوبته وهو ابتسم باحراج وعافني وراح فتح البلكون وطلع

واني من تأكدت منه محيدخل ، كمت من الفراش ولميت نفسي انوب من كمت ظهري كام يصل عليه
مدري ليش

اخذت ملابس ودخلت للحمام ، فتحت الدوش ودخلت جوا ، من لامس جسمي المي حسيت نفسي انهار بحيث بدون شعور كمت اتشاهك من البجي

ضليت جوه المي ابجي واندعي على راسل الكلب هو وهبه كل الديصيرلي بسببهم

شنو ذنبي اني وشنو السويته الهم حتى يحطموني بهالطريقة وتاليها بسببهم اني ظلمت انسان وورطته وياي وهو لا بيها ولا عليها

الله ينتقهم منهم شر انتقام

ما اعرف شكد بقيت جوه المي ، ما حسيت بنفسي طولت لحد ما امين دك الباب وحاجاني

امين : ديمة بيج شي ؟

ديمة : كون الله ياخذها لديمة ، تنهدت وجاوبته هسه حطلع

سديت الدوش ونشفت جسمي وبدلت حتى اطلع

فتحت باب الحمام وطلعت داريد احاجي امين حتى اخابر ماما بس استوقفني صوته الجاي من البلكون

اسمعه يحجي بعصبية

امين : انتِ وتالي وياج ، الف مرة عدت عليج وكلت كافي متصيرلج چارة لو اله تسويلي مشكلة ياله ترتاحين

ديمة : ويه مديحجي اندار وشافني ورا واني بدون مقدمات سألته ، ويامن دتحجي ؟

امين :

**************************************
لهنا يكون خلص البارت ان شاءالله يكون عجبكم ❤️
+لتنسون التصويت والتعليق برأيكم ❤️❤️

شنو رأيكم بالاحداث ؟

شنو تتوقعون حيصير بالبارت الجاي ؟

.