الموت الحي

البارت السادس والثلاثون

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : احس بهوسه داير مدايري واحد يضربني على خدودي

فتحت عيوني من حسيت بشي ينرش على وجهي ،
اباوع لنفسي نايمة بحضن دنيا وبيت جدي كلهم ملتمين عليه واول ما شافوني فتحت عيوني اجوي عليه بس جدي واكف كدامي ويباوعلي معبس ملامحة

ديمة : زبيدة حبيبتي تسمعينه

زبيدة : اباوع بوجوهم ما جاي استوعب لان كلهم يحجون سوه

النوح : وخرو عنها خلي تتنفس وانطوها ماي بسرعة

دنيا : راحت ديمة تركض تجيب مي واني كومت زبيدة كعدتها على القنفة ومسحت على ايدها

سودة عليه وره ما رجعنا من الزيارة دخلنا للبيت واسقبلنا صوت واحد يصرخ وره البيت ركض جدو والولد لكو معتز ابن عمتي بيداء مچوة بوجهه ومشمور بالبيتونه الخارجية

والباب الداخلية مالت البيت مفتوحة واول ما دخلنا لكينه زبيدة مغمى عليها بباب الصالة

جدي تخبل لان حسب الي افتهمنا انُ هاي اول مرة يصير عدهم هيج حادثة

اباوع للباب ، دخلت عمتي بيداء المنتهيه من البجي ، خطية انقهرت عليه ما كادرة توكف على رجليها وصاحب واحمد (ابن فؤاد) سانديها وهي تون بوجع

بيداء : سودة بوجهي عليك يا يمة يا حبيب تشوهت
وتخربت ملامحك عمت عيني عليك كون

بدرية : صلِ على محمد ام معتز الولد هسه خذو للمستشفى و ان شاء الله مابي شي

بيداء : شلون مابي شي وجهه متشوه

دنيا : اجت ديمة جايبه المي ، اخذت الكلاص وشربت زبيدة

النوح : احجيلي زبيدة شصار بغيابنا وليش اغمى عليج اكيد شفتي النذل الدخل للبيت بغيابنا

عبدالله : يابه مو محلها هسه عوف البنية ترتاح متشوف وجها شلون اصفر من الهبطة

بيداء : خليها تحجييي خليييها لو هذا لان ابني محد بيكم بحاله ويريد يعرف منو السوه بي هيج هاي لو واحد من ولدك جان اكلت العالم بسنونك وطلعته من جوه الكاع

عبدالله : اشو انتِ تمسلتين ليش شنو فرق ابنج عن ولدي ، كلهم عندي واحد ونفس المعزة ، عيب هذا الحجي اني خالهم لبزرج مو عدوهم حتى ما ادير بال لامرهم بس هالتشوفين بنت اخوج شحالها صايرة
خلي ترتاح وتستوعب ونفتهم منها

فؤاد : انت شجاي تحجي يابه طاب غريب للبيت ولاعب لعب بابنه وانت شايلي هم ست الحسن

النوح : بسسس شو انتو متحترمون لا عبالكم كبرتو وصار يعلى حسكم بوجودي تره وحق الحق هسه العب الخيزرانه على ظهوركم ولا اعتبركم ولا اعتبر شيباتكم قنادر من يمتى انتو تتراددون هيج كدامي

فؤاد : العفو يابه حقك علينا بس انت جاي تشوف الوضع الاحنه بي هسه ميسمح نكون هادئين

خصوصا الشخص الدخل للبيت قبل ليدوس عتبة البيت داس على شواربنا من تجرئ يدخل ويسوي بواحد من أهل البيت هيج وهو يعرف احنه منو

ومثل متشوف البيت ما ناقص منه قشاية وحدة فمعناها الطاب لهنا غرضه يهينه ويزعزع امنا
وهذا الشي المالازم نسكت عليه

النوح : ما عاش ولا كان اليزعزع امن بيتي واني راسي يشم الهوى ، اصطبرولي اذا ما طلعته من جوه الكاع اني معتب

بس سكتو عني وخلوني اتفاهم ويه بنت اخوكم واعرف دربي شنو ، احجيلي يبت ياسر كل الشفتي بالتفصيل الممل ولتخافين من شي اني بظهرج

دنيا : مسحت على ظهرها حاثتها حتى تحجي

زبيدة : احم ششوف جدو وكت الانتو طلعتو اني جنت جوعانة ونزلت جوه حتى اكل ووو وسمعت صوت واحد يصيح بره ، ومن اجيت اطلع بره لكيت الباب الداخلي مفتوح

ومن شفت الباب مفتوح طلعت اشوف شصاير بره ومن طلعت جان الصوت جاي من الحديقة الخلفية
فرحت اشوف شكو ومن وصلت لكيت معتز مربوط على كرسي ومغطين عيونه وووو

داكمل وشفت هارون يدخل من بره ويجي يوكف وره جدي ، مقابيلي تمامًا

اباوعله كتف اديه واشرلي بحاجبة على خواتي

النوح : ليش سكتي كملي

زبيدة : ردت احجي بس نظرة هارون الي ابد مجانت نظرة عادية والي تبقنته انه ممكن فعلا يعيد نفس الشي باخوتي واني ما اتحمل احد ياذيهم

عاط بيه جدي

النوح : متحجيييين

زبيدة : هاا اي فشفت معتز رابطي هيج وهو يبجي ويصرخ احد يساعده

بيداء : سودة عليه وليدي

النوح : صوت ما اريد ، جم واحد جان بالغرفة البره ؟

زبيدة : اباوع لهارون رفع اصبعة السبابة وحك بي طرف حاجبة المطبور ، هاا ووو واحد بس واحد

عبدالله : كملي بويه كملي حبيبتي

زبيدة : اي بس شفته شردت لجوه ومن الخوف اغمى عليه وهستوني ياله كدامكم كعدت

النوح : ما كدرتي تشوفين وجهه ؟

زبيدة : ددور وجهك وانت الراح تشوفه ، احم لا لان جان ملثم ، اباوع لعمي فؤاد صفگ اديه بعصبية وجدي وعمي عبدالله والولد صار اعصاب

فؤاد : شلون نذل و قندرة

هارون : بحلگك

فؤاد : شتكول

هارون : سلامتك

زبيدة : اباوع لجدي اول ما سمع صوت هارون اندار عليه وعاط بي

النوح : انتتتت وينك البيت مكلوب كلاب وحضرة جنابك قافل موبايك ومختفييي من البارحة ويييين جنت

هارون : جنت بالمحمية

النوح : متكلييي شوداك للمحمية بذاك الليل

هارون : عندي تدريب

النوح : لا اله الا الله يعني حضرة جنابك رايح تتونس والبيت هنا محروك ابو ابو ، اكو واحد طاب للبيت ومشوهه ابن عمتك ومنعرف شنو السبب وهاي كدامك بنت عمك الله ستر وما انجلطت وخسرناها

هارون : والحرس وين اني من طلعت جانو موجودين

عبدالله : بويه وصلنا ما لكينه احد فص ملح وذاب اختفو منعرف وين راحو

صاحب : ااااخ بس الكفهم الا انعل والديهم هالنـ****

عاكف(ابن فؤاد) : مو بعيدة يطلعون همه الداخلين اصلا

فؤاد : ما سمعت بنت عمك تكول الداخل شخص واحد وملثم

هارون : تره اكو كاميرات مترحون تشوفوهم وين جانو وهم بطريقكم تشوفون منو الدخل للبيت وسوه بهالمسكين هيج بدال هالجدال الماله داعي

زبيدة : يربي هذا شنو من بشر يعني يقتل القتيل ويمشي بجنازة ، هو الشوهه الولد وهسه جاي يدليهم على دليل حتى يلزمو

انوب جدي وعمامي ركضو على الكاميرات وهو راح يمشي وراهم مترهي ولا كإنما مسوي شي

حمزية : ينطيك العافية يبيبي ياهارون

زبيدة : ليش حرر القدس لو كال معلومة محد يعرفها تره من البداية جان لازم يرحون يشوفون الكاميرات
بس همه مدري شبيهم فهايه

حمزية : خفه حلكج كون ولج شنو فهايه شو انتِ متعرفين تحجين شيسوي بيج الله بعد جان متي قبل شويه

زبيدة : لتخافين ما اموت و عمري طويل كلش وان شاء الله احضر فاتحتكم واحد واحد

هيام : صلفه

زبيدة : فوك متتخيلين

دنيا : سديت حلكها كافي زبيدة متشوفين الوضع شلون مشحون الله يخليج سكتي ولتسويلنه مشكلة

ديمة : اي زبيدة وبعدين انتِ متخربطة لترحين تتعاركين وتتخربطين بالزايد

زبيدة : باوعتلهن ودمعت والله محد كسر ظهري غيرجن لو ما انتن ومعين جان حجيت الشفته وفضحت هالنذل فضيحة بس الحقير عرف شلون يلزمني من ايدي التوجعني

اباوع لعمامي دخلو وجدي دخل وراهم بس وجهه صاير نار من العصبية

بيداء : هاا بشرو

صاحب : خالة التسجيل من طلعنا احنه ولحد الساعة 6 الصبح محذوف

عبدالله : والحرس مختفين

النوح : ما كو غير الحرس اكيد همه

هارون : تؤء ما اعتقد لان الحرس شعدهم ويه معتز وبعدين همه مو اغبياء حتى يعتدون عليه ويشردون عايفين البيت البي ملايين تأمن كل مستقبلهم

بيداء : لعد اكيد مستهدفين ابني

النوح : مو ابنج الخديوي اسماعيل حتى يستهدفو شو دسكتي

الموضوع اكبر من هيج والدخل لهنا اكيد عنده سبب من هالتصرف وبحيل الله محد راح يجيبه غيري اني الحگني هارون

دنيا : طلع هارون وره جدي واحنه اخذنه زبيدة وصعدنه فوك ، دخلنا لغرفة امي ودادا كعدنا يمهن

وئام : هاي بعدنه ما صارلنه غير يومين بهالبيت وبدت المشاكل المتخلص

ديمة : ليش بيت جدو من زمان عدهم هيج مشاكل

وئام : كولي يايوم مر على بيت جدج بدون مشاكل

ام حسن : شدعوه ام معين منين جان اكو قبل مشاكل
اشو النوح وحمزية ممشين البيت كله على الصراط المستقيم من يوم يومهم

وئام : السم الجان يندس من جوه لجوه والقال والقلت هذا شتسمي

وعلى طاري القال والقلت ايالجن تاخذن ميانه ويه اي واحد بهالبيت لتغرجن الحبيبتي والوجوه الحسنة الي استقبلوجن بيها

ذوله عكارب باقرب فرصة تسمحلهم يلدغوجن ويبتعدون ولا كإنما مسوين شي وخصوصا هالهيام

ام حسن : بعدج شايله بكلبج يا وئام

وئام : اي لان كل الصارلنا بسببها وبسبب اهلها من الله ينتقم منها دنيا واخره هالحقيرة الحية الما سلم واحد من سمها

و زبيدة انتِ بالذات ديربالج من كل نفر بهالبيت عدى جدج وبيبتج وعمتج بدرية تره كل اليكلج جنه نحب امج وقريبين عليها يضحك عليج

ام حسن : وئام كافي

وئام : لا مو كافي خليها هي وخواتها يعرفن اوادمهن
شنو عبالج اني نسيت ذني الحيايه شسون بيه من مات عباس ومن وراهن شهور اني نايمة بالفراش تالي طرحت ضناية بسبب سمهن وحقدهن

لو وسيلة الجانن مسوياتها خدامة الهن مستغلات عدم وجود ياسر وذيج جانت صمً بكمً تبلعها وتسكت

زبيدة : هاي يا ابن نعال جان يأذي امي

وئام : كلهم ، هيام وخواتها وبيداء وعمج فؤاد وعهود مرت عمج فاضل كل ذولة جانو يكرهون ابوج وشدو ويه امج حتى يأذو بيها

ديمة : فاضل ! ليش احنه عدنه عم اسمه فاضل ؟

وئام : اي بس ما شفته من اجينه الظاهر ما موجودين لا هو ولا العكربة مالته

ديمة : ما شاء الله عمامي هواي

وئام: بيبيتجن ما شاءالله بزون مو مرة تجيب وتخلف ، عبدالله وفؤاد وعباس وياسر وفاضل وبدرية وبيداء كل ذولة خلفتها

زبيدة : مسحت على ركبتي همزين حجيتي اخاف جنت ناوية اهدي اللعب عليهم شويه هسه بطلت

وئام : سمعيني زبيدة اني حجيت كل هذا هسه حتى احذرج انتِ خواتج وهم حتى افضفض شويه مو ترحين تسويلنه مشاكل

زبيدة : لعد ترديني اسكتلهم على الحجي الحجيتي هسه

وئام : انتِ بالذات ابتعدي عنهم وحاولي تتجنبين اي مشاحنات وياهم

زبيدة : شمعنى ؟

وئام : خواتج الله سهللهن وكل وحدة بعد جم يوم تروح وتشوف حياتها الا انتِ باقية هنا ومحد يعرف شوكت الله قاسملج تطلعين من هالبيت

فلازم تديرين بالج لان الناس الكاعد هنا عبارة عن مستنقع مال حقد ونفاق واحدهم يحجي على الثاني ومن يتكابلون يصيرون گلب على گلب واني ما اريدهم يمسوج باذيتهم وحقدهم

زبيدة : والله ما اعرف شكلج

دنيا : كلام امي صفنه صح همه مبينين مؤذيين بس ما توقعناهم واصلين لهالدرجة

ديمة : زين ماما متعرفين شنو الخلاف بين بابا وبينهم
اجت امي تحجي واندكت الباب ودخلن البنات

نور : بنات احنه ملتمين بالاستقبال ومسوين كعدة بنات تعالن كعدن ويانه خلي نتعرف عليجن وهم نغير جو بعد الهبطة الاكلناها

دنيا : باوعت لامي الهزت راسها

وئام : هسه حبيبتي شويه ويجن وراج

زبيدة : طلعت نور واني انداريت على وئام ، شنو سالفتج هستوج تحذرينه منهم وهسه تردينه ننزل نكعد وياهم

وئام : لتصيرين اندفاعية اني كلت تجنبنهم ولتطوخنها وياهم بس مو بمعناها تعزلن نفسجن كلش
بالنهاية احنه عايشين هنا ومجبورين نتعامل وياهم بس بحدود

زبيدة : كمنه اني وخواتي ونزلنه وره نور

نور : يله بنات وين صرتن

دنيا : اجينه ، لحكناها للاستقبال ودخلنه ، جانو كل البنات الي باعمرنا واصغر متجمعات وديسولفن

رحنه كعدنه على وحدة من القنفات وهنه ضل يحجن واحنه ساكتين

غيداء : اووف الله يساعد عمه بيداء خطية كسرت كلبي

هدى : بلكت الله تهجع شوية جزعتنا والله

نوال : اي والله تكول خدم عدها من اول ما تدخل لحد ما تروح لبيتها تستلمنا يا هذا عيب يا هذا ميصير

والله حتى كمت اكرهه اجي اسير يم بيت جدي حتى لا اشوفها هنا عسى لا شافتني وكلتلي هاا متعاركة ويه رجلج عشتو مدري بيش طالبتني

زبيدة : باوعت لخواتي بصدمة يمه هذني شجاي يحجن لعد منو الجان قبل شويه يبوس بيها ويواسيها

ولتنقهرين عمه ولتديرين بال والله ينتقم من الي فرفح كلبج ، اشو قبل دقايق جانن يموتن على عمتهن وهسه كاعدات يحجن عليها ويذمنها

ايييع لعد شكد منافقات ذني ، ما جذبت خالة وئام من حذرتنا منهم اثاري جينات اهلهن منتقلة الهن

نوال : عوفنه هسه من هالموضوع خلنه نتعرف على بنات عمنه

بله العرفنا بالجديد دنيا منفصلة وديمة مخطوبة بس انتِ الثالثة شنو اسمج نسيته والله

زبيدة : زبيدة اسم الله عليج من النسيان

نوال : اي زبيدة ما عرفتينه عليج،شدراسة متزوجة مخطوبة

زبيدة : مدرسة رياضيات وما متزوجة

زهراء : شعجب كل هالجمال وبعدج لسه ما معرسة

زبيدة : عاجبني وضعي هيج

غيداء : متتمنين واحد يحبج ويهتم بيج تره الحب والزواج شي حلو

زبيدة : اباوع شو سبلت عيونها وسافرت ، يااا هاي شبيها

لا عيني اني متعجبني هالسوالف ، حب وزواج وهالخريط مو ستايلي

نوال : هههههه هو كل المثلج يحجن هيج

زبيدة : شقصدج ولج

دنيا : كرصتها جايين نتعرف عليهن مو نتعارك تأدبي

زبيدة : متسمعيها ام الوصخ

ديمة : هههههه

زبيدة : شوف هاي الفطيرة

زهراء : انتِ يحلوة ما كلتيلنه شوكت عرسج

ديمة : من كالت عرسج مدري شصار بيه بس استغربت الكلمة ، عرسي !! ما ادري والله

زهراء : حاولي تتستعجلين بي ضايجين نريد عرس حتى نتونس اخر واحد عرس عدنه معتز قبل سنتين

دنيا : لعد وين زوجته

ديمة: صدك ولا وحدة من زوجاتهم شفنه

غيداء : مو باعي عدنه عيسى وموسى ومعتز ماخذين خوات ولان مرت معتز زعلت خواتها زعلن وياها فبيبي حلفت تاخذ جهالهن ومترجعهن للبيت وهسه راح يصيرلهن شهر عد اهلهن

زبيدة : وهي منو حتى تقرر اذا يرجعوهن لو لا

اباوع لنور اشرت على حلكها

نور : هههه شبيج حبيبتي زبيدة غير هي جبيرتنا وهذا بيتها يحقلها كلشي تسوي مو دنيا

دنيا : اباوعلها تاشرلنا على زبيدة والبنات ، افتهمت منها انها متريدنه نحجي شي بوجودهن واني هم دخلت بالجو وايدتها ، اي طبعا لعد شلون

ديمة : اكول بنات احنه عرفناجن علينه بس انتن ما عرفتنا عليجن

غيداء : اوكفي اني ابلش ، باعي اني غيداء فؤاد خريجة قانون وكاعدة بالبيت

وذني خواتي زهراء وهدى

زهراء مدرسة احياء ومتزوجة احمد ابن عمة بيداء وعدها بس هيثم و بيتهم ثالث بيت هنا

وهدى طالبة مرحلة ثالثة رياض اطفال وعدنه بعد 2 اخوان عاكف ، عاهد وثنينهم ممتزوجين

نوال : اني ونور بنات عبدالله ، اني ما مخلصة دراسة ومتزوجة واحد غريب ومستقرة بمركز المدينة بس اجي بين فترة وفترة هنا اتونس وماعندي اطفال

نور : اني دراسة فنون جميلة ومتخرجة من زمان

وهم عدنه 3 اخوان الجبير عيسى وبعده موسى واصغر واحد باخواني هارون

ديمة : صدك نور اخوج هارون ليش هيج يحجي

نور : شلون يعني

ديمة : ما اعرف بس صوته خشن وشلون المختنك

نور : اي مو هو ميحجي هواي ودائما ساكت وهم يدخن فصوته صاير كلش خشن

ديمة : يعني هو هذا مرضه

نوال : مرضيش هذا ياهو كال هارون مريض

دنيا : اباوع لنوال كامت تخوزر بنور ، من شفت الوضع انشحن بينهن غيرت الموضوع

زبيدة : مليت من هالكعدة وما اريد اكوم لا يطلعوني مسويه روحي نفرتيتي عليهم

مواضيعهن تافهه ياحجة فلان يا گال علان هسه اريد واحد يسولف على السيارات ماكو كلهن باربيات ويحبن المكياج

اخر شي من شفت الوضعية مصخت ترخصت وكمت
فلت فوك حتى انام وفعلا ذبيت روحي وگبل نمت

ما كعدت غير لمن كعدتني دنيا المغرب

دنيا : كومي زبد تكلج امي موزين تضلين نايمه لسه ، كومي غسلي ونزلي كعدي ويانه

زبيدة : دنيا عليج الله اذا بعدجن تسولفن على رجل نوال الرجل الفولاذي عوفيني انام

دنيا : لا ولج الجماعة كاعدين يحضرون العشه فشلة خلي ننزل نساعدهم

زبيدة : كمت دخلت للحمام غسلت وبدلت ملابسي لفستان اسود عريض ويا حجاب اسود ونزلت

لكيت كل النسوان متجمعات داير مداير بيبيتي

حمزية : شلون صرتي

زبيدة : الحمدلله

حمزية : تعاي كعدي اريد اسولف وياجن

زبيدة : رحت كعدت يم نور هاي الوحيدة بيهم هادئه ومالها صوت ولهالسبب استلطفتها نوعا ما بس مو كلش

نور : بابتسامة صح النوم

زبيدة : يصح بدنج

حمزية : معتز ابن عمتجن طلع من المستشفى والحمدلله الحرگ الي بوجهه مو كلش خطير فجدجن گلي يريد يسوي غده عكب باجر على سلامته ويعزم رجل ديمة واهله حتى نتعرف عليهم وهم نحجي بموضوع عقد المحكمة حتى اول ما يعقدون بعدها بالزايد اسبوعين او شهر وتتزوج ديمة

وئام : اسبوعين او شهر ؟ صدك تحجين حجية كلش قليلة المدة شنلحك

حمزية : لتخافين نلحك اشو الغرفة وصارت جاهزة مو تزگام مثل قبل وحتى الهدوم ما كمتن تفصلن بدلات كله حاضر تشترن والقاعة بس حجز فبعد شنو المتلحكن

ام حسن : ميخالف غير البنية تريد تجهز على راحتها

حمزية : ماكو على راحتها حبيبه البنية مو حلو تطول خطبتها حتى تطلع عليها حجاية واحنه منحب نطول هالسوالف

هيام : عين العقل كلامج يمه

وئام : انتِ بالذات لتدخلين

هيام : الظاهر بعدج شايله عليه

وئام : ولاخر يوم بعمري

هيام : سبحان الله على الرغم المفروض اني الاضل شايله بكلبي وحاقدة عليكم مو العكس

حمزية : شهالحجي هذذذا هيام

هيام : حجية اذا انتِ ناسية فآني ما ناسية ولا راح انسى

حمزية : هسه احنه جاي نسولف على العرس شجابج على ذاك الموضوع الزفت خلينه كاعدين على حبة الله بليه مشاكل ليش تخلني اضوججن

زبيدة : اباوعلهن شلون يتناقشن وكل واحد ينطي رأيه من صفحة واني صافنة ، عرس ديمة بعد شهر بالزايد ذوله شجاي يمسلتون

حمزية : المهم سدو هذا الموضوع وخلونه نحير بعرس ديمة نريد تسويلها عرس كل الناس تسولف بي
اريد حفيدتي تطلع اميرة حالها من حال بنات عمها

زبيدة : زين وابنج ، ما فكرتي انه ما صارله غير 6 شهور من مات ، بهالسهولة تخطيتي وكلبج انطاج تفرحين وتجهزين بنته وتعرسيها وهو سنته لسه ما دايره ، عفيه شنو من كلب كلبكم انتو من شنو مصنوعين

اباوعلها خزرتني وكامت جرتني موكفتني كدامها

حمزية : مو انتِ التعلميني شسوي ومو انتِ التذكريني بأبني ، اني ابني صارلي حزنانه عليه سنين وهاي عيوني راحت من البجي عليه ليل نهار

سنين مرت واني عيني متغفه بالليل اذا ما اسبح وادعيله يكون بخير ومرتاح سواء عايش لو ميت
سنين واني ما ادري عنه وليلي من نهاري ما اعرفه شنو

واذا انتِ حزينة على ابوج صار ست شهور فآني حزنانه على ضناية الي نحرمت منه صارلي سنيييييين

ومن كثر الحزن والبجي عليه ماي عيني نشف مو انتِ الحشرة جايه هسه تعلميني شلون احزن على وليدي الجبته وتعبت بي وحبيته اكثر منج ومن الدنيا كلها

تعاي غيداء وديني لغرفتي

دنيا : راحت بيبيتي بعد ما حجت وعافتنا واحد صافن بوجه الثاني ، اباوع لزبيدة صعدت فوك وبعد ما نزلت

رحت اني ساعدت البنات بالعشه لحد ما رجع جدو والولد ، ولا بيبي قبلت تتعشى ولا زبيدة

كملنا عشه وكمنا غسلنه المواعين وصعدنا نمنا

الساعة الـ3 بعد منتصف الليل

زبيدة : كعدت شبعانه نوم ، نزلت جوه غسلت وجهي واخذت كلاص مي شربته وكعدت بالصالة اباوع للبيت وجمال التصاميم الي بي

حسيت نفسي مختنكه ، ذبيت الكلاص وكمت فتحت الباب وطلعت بره ، اخذت نفس افييييش شكد حلو الهوه

مشيت لكدام اريد افتر واغير جو شويه ، طلعت من البيت وضليت امشي واباوع للزرع وصوت الهوه اليحرك الشجر يرد الروح

لهناك وشفت مرجيحه بس كاعد عليها احد ، يا ترى من الكاعد هسه ، تمشيت ناحيتها ومن وصلت لكيتها بيبيتي

انتبهتلها جانت كاعدة ودمعتها على خدها وبس شافتني مسحت وجها بشيلتها

حمزية : شكد صارلج هنا

زبيدة : هستوني اجيت ، رحت كعدت يمها

حمزية : منو سمحلج تكعدين

زبيدة : اني سمحت لنفسي

حمزية : خوش

زبيدة : اباوع لعيونها يلمعن ومليانات دموع ، جنتي تبجين مو

حمزية : لا

زبيدة : لعد هذا الينزل من عينج شنو عصير

حمزية : لا هذا القهر

زبيدة : ومن شنو مقهورة

حمزية : مختنكة وحجيج يدك بكلبي ، زبيدة اني عمري ما نسيت ابوج ولا غفل عن عيني لحظة

صدكي من يوم القرر ابوج ياخذ امج ووئام وجهالها
ويطلع واني من ذاك اليوم لحد قبل 6 شهور اصبح وامسي ابوس بادين جدج واتوسله يدز على ابوج ويصالحة لو يسمحلي اشوفه ولو لحظة بس ما جان يقبل

ومع هذا اني ما ايست وضليت الح اكثر واكثر وما مليت ولا كليت لحد ما وصلني خبر وفاتة من يحيى ياله بطلت اكل لجدج اريد اشوف ياسر

يمكن يكون ما مبين عليه بس صدكيني الكسرة الي انكسرتها بعباس وياسر خلتني هيج ابين باردة وجامدة بحيث الي يشوفني يكول الف هنيالها هاي ضاربه الدنيا عرض الحايط وعايشه

وحقهم لان ما شايفين كلبي شبي ، انتِ بعدج ما متزوجة عود اذا الله قسملج وتزوجتي وصار عندج جهال راح تعرفين البزر شنو بالنسبة للام

ابوج وعمج من عافوني وراحو اخذو روحي وياهم
لا بقولي صحة ولا بقولي عافية وهاي شوفة عينج دمعتي مانشفت عليهم لحد هذا اليوم

بس مع هذا اني انسانه مؤمنة بقضاء الله وقدره وعمري ما اعترضت على اي بلاء يصيبني دومي جنت صابره واكول الله يهونها عليه ولحد الان اني عندي يقين الله راح يهونها

زبيدة : وانتِ اذا مقهورة ومكسورة هيج شلون تردين تعرسين ديمة وتسويلها ذاك العرس واحنه حزانه

حمزية : لو مهما حزنا وانقهرنا مصيرنا نتقبل فكرة انه الحياة لازم تمشي سواء عجبنا او ما عجبنا

واختج ميصير تبقى كل العمر حزنانه على ابوج ، لازم تتزوج حالها حال البنات وتشوف حياتها ، وسواء اجلت عرسها او ما اجلته مصيرها في يوم الايام تتزوج

وبكل الاحوال سواء تزوجت اليوم او بعد عشر سنين لتقنعيني انها راح تنسى ابوج لو من يجي على بالها ماراح تبجي عليه

هاي اني كدامج عرست وجبت وجهالي عرسو وجابو وشفت اولاد احفادي واني لحد هذا يومي اذا ذكرت ابويه لو امي ما اسيطر على روحي هههه هاج شوفي

زبيدة : ابتسمت من شفتها تمسح بعيونها وتضحك

حمزية : اني اعرف اعتراضج مو عالزواج انتِ ما راضيه لان سنة ابوج ما طالعة بس انتِ تعرفين شي واني اعرف شي اخيتج حلوة والعين عليها يا بيبي
فالافضل تتزوج بسرعة حتى لتتعرض لمشاكل

زبيدة : ما فهمت قصدج ، اباوعلها طبطبت على ايدي

حمزية : مو اذا احجي يبيبي العيبة مرجعها عليه خليني ساكتة وهمي بكلبي احسن

زبيدة : هزيت راسي وتنهدت مباوعه لكدام ، تدرين اني احسج هيج يعني شويونه احسج حبابه

حمزية : ههههه خلف الله عليج شنو شفتيني لازمتلج عصا بالباب

زبيدة : ضحكت لا بس اني ضجت منج لان صيحتي عليه البارحة رغم من اجينه حبيتج شويه لان ريحتج طيبه

حمزية : انعم الله عليج ست الحسن عاد زين بينه شي يعجبج

زبيدة : ابتسمت ، اااا باعي لتفهميها بغير قصد بس تره اني اسفة ما قصدي ااذيج من حجيت هيج المغرب

حمزية : هاهي انسي الموضوع اعتبريني ما سمعت شي ، تعاي خلي ابوسج

زبيدة : فتحتلي اديها تقدمت نمت على صدرها وشميت ريحتها وهي باستني ، ما اعرف ليش بلحظتها حسيت بشعور حلو احس وكإن شي من بابا التمسته من حضنتها

ابتسمت شجاي تسوين

حمزية : اقره عليج قران بلكت الله يعلقج

زبيدة : مبين خوش تقرين هلي احفادج كلهم مخابيل

حمزية : هههههه ترحيلهم فدوة

زبيدة : كمت عنها وعدلت حجابي ، يله امشينه خلي ندخل بردت الدنيا

حمزية : انطيني ايدج

زبيدة : اخذت ايدها ومشينه و احنه نسولف

حمزية : ولج يمدهوره سوالفج طلعت حلوة مامبين عليج

زبيدة : ابتسمت اني كلي حلوة بس ماعندي حظ

حمزية : والله يبيبي المبين عليج راح تاكليها مدبسة

زبيدة : اسم الله ليش يمه

حمزية : مو انتِ تكولين ماعندج حظ فعلا وجهج يحجي هيج بس ان شاء الله ربنا يكتبلج الصالح بالنهاية هذا كله مجرد حجي

زبيدة : الله اعلم ، دنمشي وشفنه الميتسمى طلع من البيت

حمزية : ها بعد طولي شعدك طالع بهاليل

هارون : شفت الباب مفتوح طلعت اشوف منو الطالع

حمزية : هاي اني وزبوده بنت عمك جنه طالعين بره

هارون : خوش لعد دخلو خلي اقفل الباب

حمزية : تعاي حبيبتي شوف هارون هاي بنت عمك زبيدة شوفها شلون حلوة

زبيدة : باستغراب اشو هاي عبالك دتبيع بيه شنو يشوفني !!

انوب الثاني باوعلي صفح ورد عليها من وره خشمه وهو يقفل الباب

هارون : شفتها

زبيدة : عشتو ما بقى عليه بس المخابيل الكبر لهالخلقة لو حلو شجان سويت

مشيت ويه بيبيتي صاعدة فوك

حمزية : شفتي ابن عمج شلون جمال

زبيدة : منيله جنه طنطل

حمزية : اوهووو (غمتها) هذا طنطل ولج ترحين فدوة لطولة ولعينه المكحله

زبيدة : من عمت عيني اذا اروح فدوة لهذا الاكرع

حمزية : ولي لغرفتج ضوجتيني منج كلشي ولا هارون هذا عزيزي

زبيدة : والله كون تدرين عزيزج شمسوي ، وصلتها لغرفتها ورجعت رايحة لغرفتنا

دامشي وما اشوف غير بزون اسود واكف بباب غرفتنا
يمه من شفته بلعت العافية هذا منين اجه وفوكاها اني عندي فوبيا من البزازين اشوف الموت ولا اشوفهن

ضليت واكفه كباله اخاف حتى اتحرك وهو مكابلني يخوزر بيه انوب شكبره جنه طلي مو تكول بزون

حسيت بصوت نفس ورايه انداريت شفت المسودن واكف ورايه ويباوعلي بس نظراته ابد ما جانت عادية
بيهن شي من الكره والحقد بحيث الي يشوفه يباوعلي بهاي الطريقة يكول هاي كاتلتله عزيز

فزيت عليه من حجه عاب هالصوت اي والله حتى صوته مزعج مثله

هارون : تعال تيمور

زبيدة : اباوع للبزون من سمع صوته كام يهرول واجه يتمسح برجليه وهو دنك شاله ومشه بعيد عني

تيمور !! من الكبر لفك ولف تيمور وياك

رحت للغرفة فتحتها ودخلت نمت ما كعدت غير صوت حركة دنيا بالغرفة ، شلت الغطة على راسي شبيج شبيج ادري شعندج خبصتينا

دنيا : جنطتي الزيتونية وين عندي دوام راح اتاخر

زبيدة : بنعاس ما ادري دوريها بالجنط وكافي هوسه نريد ننطمر

دنيا : هاي لكيتها انطمري طمرتهم ، اخذتها ودخلت للحمام عدلت حجابي ، تعطرت وطلعت

البارحة حاجيت عمو عبدالله وكلي هو ياخذني بطريقة ، نزلت جوه لكيت بس بيبي كاعدة تسوي ريوك ويه العاملات وجدو والولد كاعدين

صبحت عليهم ورحت اخذت مي اشرب

حمزية : صباح الورد بعد طولي تعاي يله تريكي

النوح : شو مبدله خيرج من الصبح

دنيا : اي جدو عندي دوام

النوح : ووين تداومين حضرتج

دنيا : موظفة بشركة عمو يحيى

النوح : على حسب علمي انتِ جنتي ماخذة ابن يحيى يوسف لو اني غلطانه

دنيا : كعدت واخذت استكان الجاي من بيبي ، اي جدو

النوح : وشنو هالاستهتار هذا

دنيا : ليش جدو شسويت اني ؟

النوح : اكو وحدة مؤدبة تشتغل ويه طليقها بنفس المكان شنو وين كاعدين احنه

عبدالله : شدعوة يابه تره يحيى وولده دولة وعلم ما عليهم غبار قابل منعرفهم احنه

النوح : احنه نعرفهم بس الناس متعرفهم وبعدين هي رجلها يريد يرجعها على ذمته شنو معناها تروح تداوم ويا بنفس المكان وين كاعدين احنه

دنيا : تره جدو والله ما بيها شي بس انت مكبر الموضوع

النوح : انجبي لج خفه طولج شنو مكبر الموضوع
تردين الناس تحجي عليج وتطلع حجي طايح حظة عنج

امشي كومي ماكو طلعه للدوام منا لمن تتزوجين عود هناك داومي ويه رجلج يله منااا

حمزية : شجاك يا عيني هسه عوف البنية تتسمم طلعت الاكل من خشمها

دنيا : عفت الاكل وكمت دايمة ، عفتهم وصعدت فوك خابرت يوسف ودمعتي بطرف عيني صايرة اني ما متعودة احد يحاجيني هيج

رد عليه الووو يوسف

يوسف : خير شكو دنيا شبي صوتج

دنيا : مو اتفقت وياك البارحة اليوم اداوم

يوسف : اي وهذا تيم جبته ويايه مثل ما اتفقنا

دنيا : اي جدو من دره بيه اداوم وياك رزلني وكلي ممنوع اداوم وياك بعد بنفس المكان وهسه منعني اطلع وهياني صعدت فوك وما راح اكدر اجي

يوسف : خلص اهدي ولا يهمج ، اليوم اخلي ابويه يحاجي جدج حتى نستعجل بالزواج شتكولين

دنيا : هاا بكيفك

يوسف : دنيا

دنيا : نعم

يوسف : جدج البارحة كل لابوية ديمة وامين بعد جم يوم يعقدون محكمة ، عندج مشكلة اذا جددنا عقدنا وياهم بنفس اليوم

دنيا : هاا ممـ ما اعرف

يوسف : عندج مشكلة لو لا

دنيا : بكيفك

يوسف : يعني اذا اكل لجدج خلي نعقد ويه ديمة وامين تقبلين

دنيا : عادي

يوسف : لا اله الا الله بابا شبيج انتِ هي لو اي لو لا
شنوه العادي عازمج على غده اني

دنيا : شبيك تصيح هاهي اي

يوسف : هسه الحجي عدل هاهي متفقين يله روحي كملي نومتج وان شاء الله ميكون خاطرج الا طيب

دنيا : ابتسمت وسديت الموبايل

دخلت للغرفة بدلت ملابسي وضليت كاعدة اكلب بموبايلي علما كعدن خواتي كمت نزلت وياهن
وهيج مر اليوم

لحد ما اجه اليوم الي سوه بيها العزيمة جدو على سلامة معتز وعزم بيها امين واهله وبيت عمو يحيى

بيومها محد طبخ جدو سوه ذبيحة وجاب طباخ يطبخ والولد جابو سمج ووكفو يحضرون بي حتى يشوو

اباوع للبستان وجماله لو على البرك الصناعية المسويها جدو بالبستان بحيث منطيه فد منظر خرافي خصوصا انُ الورد الاحمر والشجر محاوطها من كل مكان

حمزية : ولكم وين صارو الجماعة

النوح : صبري حجية الطريق ازدحام هسه تلكيهم جايين

حمزية : تعال بيبي معتز هاك تونس بهالبصلات الخضر وتظفهن

معتز : لا حجية عفيه مالكيتي غير البصل

حمزية : دهاك هاك قابل هي عزيمة امي وتريدني اني الانظفه والعاملات اليوم عدهن عطلة خوما اني الاخذ مكانهن اي والله عشتو

دنيا : ضحكت على سوالفها

ديمة : اكول دنيا لعد وين زبيدة اشو ماهي

معين : لتخافين حبيبتي راحت ويه زيد للاسطبل هسه تجي

دنيا : اباوع لهارون جان واكف يملح السمج وبس سمع بزبيدة بالاسطبل ذب كل الي بأيده وراح يركض بكل سرعتة حتى احنه خرعنه

يارب استر

***************************************
لهنا يكون خلص البارت ان شاءالله يكون عجبكم ❤️
+لتنسون التصويت والتعليق برأيكم ❤️❤️

شنو رأيكم بالاحداث ؟

شنو تتوقعون حيصير بالبارت الجاي ؟

.