جُمِّلْت... أخلاقها //باللهجة العراقية //

الخاتمة (2)

༺༺༺༺༺༺༻༻༻༻༻༻
الخاتمه (2)

#جُمِّلت أخلاقها

✍🏻كاتبة الجنوب

______________بسمه تعالى _____________

أيسر:_

أحببتها منذ صغري، رأيت براءة الأطفال في عيونها،

حنية قلبها وخوفها وتوددها اليه، طفلة وقحه لا يهزها شيء،

شهدتُ على أول نضج لها، شهدتُ على تغيير

ملامحها كبرت أمامي وزاد قلبي حباً لها،

حلمنا وزدنا إصراراً نحن لبعض لكن

الفراق حاله بيننا وقتل قلبينا هل

الفراق يجدي!!!

وضمأ الشوق أحر من لهيب النار...

دقت ساعة النهاية تم تاك تم تاك بصوت ضعيف

كضعف قلب آمنه وهي ترتجف خوفاً من مستقبل

يخلو من صديق الطفولة..

_لج اصبيحه اليوم متأخرة على شغلج

_ترى آنه هم بشر أتعب أتمرض مو آله بيدكم تردون بس اشتغل لجن لا تحنوون ولا واحد يصير بمجاني عفيه گلب عدكم قاسي مثل الحجر

_اووو اليوم طابگات يمج ونهديتي عليه لج آنه شعليه هذا زاير لاعب بعداداتكم بحيث بس يضعط بزر على واحد منكم صيرون مثل آله

_أبشرج صرتي مثلنه، شوفي منو جاي وراج

التفتت جهاد ابن رافد!!

_هلوو جهاد

_هلوو، هاي من أيسر الج

دنكت راسي منعت عيوني من الدموع وآنه اشوف

بطاقة العرس بيده هزت گلبي عرفت خلص

صديق الطفولة راح يبدي حياة جديدة بدوني

ويعيش بالبيت الرسمته بخيالي وراح يكون رفيق لأحد غيري

إبتسمت وأخذتها منه وآنه اسمع صوت اصبيحه

وهي ادكول الله عرس ابتسمتلها وتمشيت بجسم

مهزول ولازمه بيدي أسوء شي بحياتي
اللحضة مجنت

متوقعتها، زادت نبضات گلبي وكل شي بيه احسه

يوجعني وصلت للغرفة سديت الباب وأعلنت

استسلام نزلت دموعي وآنه اذكر كل ايامنه

كضيناها سوا لعبنه، وأول احبك كلتها، وأول مسكة

ايد، حسيت بشعور غريب، شعور دافي، شعور أمان

بطلي القوي كل ما ناديته لكيته كدامي اليوم بطلي مو الي ،

تمنيت لو يرجع بيه زمن واكول لا، وهاي حياتي محد

يتصرف بكيفه، آنه المسؤوله عن كل شي صارلي

تستاهلين يا آمنه كولي لا ما اريد ازوج، حبيبي

أيسر ما أكون لغيرا ومحد يجي مكانه بس كلشي

صار عكس آنه بيدي نهيت حياته وحياتي، تلمست

بطاقة جان لازم تكون هاي دعوة حضور عرسنه،

جان لازم من اشوف مكتوب اسمك، الفرحة ما

توسعني، جان مفروض اكون اسعد إنسانه، بطاقة

عرسك بيدي واسمك مكتوب عليها، كل كلمة

مكتوبة مثل طلقة صابت گلبي، وصلتي بيد حبيبته

وصلتي المكان الخطأ ملازم تكونين هناا، بسببج راح

يجون هواي ناس فرحانه ومتزينين بأحلى ثياب

صرتي بيدي وهدمتي احلامي، كرهتج وكرهت

كلشي بيج، التهئنه ومكان والتاريخ التعيس

الموجود هناا انتي ملازم تكونيين بيدي اجيتي

بمكان غلط .. غلط، غلط اكون مدعوا حالي حال

الغريب، طفيتي شمعة حياتي وحركتي خيط الأمل

لزمت جهازي أتلمس اسمه صديق الطفولة ضغطت

على زر الأتصال بعده ما رن وسديته شراح

ادكوليله دموعج راح سبقنج خلص كافي تركي!!!

بلحضة حسيت خلص امسح رقمه وامسحه من

گلبي بس اكو شي بجسمي ينادي منعني احذف

أيسر من حياتي واذا حذفته من جهاز منو يحذفه

من گلبي؛ مجنتي دعوة جميله زدتي جراحي.

البطاقة متلأت بدمعات آمنه ومزقت كلشي مكتوب بيها بحرقة قلب، ورقة وأختفت حالها حال اي نفايات بس بقت جرح ينزف بكلب آمنه، الي نكتبلها عمر ثاني، عمر حزين بين ندم وغلطه موافقتها بالزواج وبين فقدانها أيسر اختفت البسمه من حياة آمنه وصارت عبارة عن كتلة من نار تلهب وتحول نارها الى رماد، قست على العالم وصار عالمها كئيب لا تحب ولا تثق، ضاعت بين حب أيسر

وقساوة بيت الحوث وبرودة عز الدين، ابتعدت عن الناس واقعيين وصارت حياتها الكترونيه!!

وبدت حياتها بأسم وهمي مستعار وبعمر صغير بدل عمرها الضاع تعرفت على أصدقاء وصارولها أهل ورجعت مثل مكانت بتكوين عصابات والكل يهابها بطول لسانها وكلامها الواعي وبخلق مشاكل، عن طريق فيس بوك آدمن بكروبات والناس تحبها وتقدم نصائح تارا وتارا تخلق مشاكل وتارا تضحك وتمزح،

صار عدها ولد اثنين وبنات اثنين، وبعدها بنفس دار ويه بيت الحوث بس عمها شوي اتغيير صار احسن من قبل تقبل وجودها بالبيت ونسه سالفة بت زهرة، بس هم مرات تشكي منه ومن بناته،

فزيت على صوت صراخ ابوي طفرت مرعوبه

_شصاير

لكيت ابوي يدگ على راسه وعيونه حمر متروسه دموع خفت وگلبي وجعني لأول مرة اشوف ابوي بأسوء حال لأول مرة احس بأنكسارا

لأول مرة احس بضعف ابوي، عيوني تتسائل عجزت عن نطق ورجفة بجسمي مصدومه من حال ابوي حضنت امي وبقيت ابجي

وهو يصيح

_مصيبه وطاحت على راسي.

_يمه شبي ابوي

سمعني و التفت عليه

_مصيبة وطاحت فوگ روسنه يا يباا شگول للناس، شكولهم

_يا ابو سالم ما بيدك شي قدر وصار

بس ابوي جان مثل الأخرس الما يسمع ولا يحجي يلوم بروحه ويدگ على راسه لو يصفگ ايد بيد وضع ابوي بجانه كلنا وحتى النايم كعد على أثر صوت ابوي وما اعرف شنو هل مصيبة هزت ابوي وخلته بهاي الحالة، بقيت مصدومه مرة ابجي ومرة أتسائل ومحد جاوبني، صوت الباب اندگ رحت ركض فتحت الباب، طلع سالم وعماد دخلو والوجوه ما تتفسر

_ابوي وينه

بلعت ريچي وأشرت بيدي لمكان موجود بي ابوي راحو سريع بعكسي خطواتي ثگيله مثل طفل اول ما يتعلم المشي، اسمع صوت ابوي هو ايگلهم

_مو زين يا يباا مو زين امصيبه وطاحت فوگ راسي

سالم: شلون هيج صار

نرجس: والله ما ادري كعدت على صوت ابوك
كعدي.. كعدي أنبگنه

عماد مكتفي بالسكوت ونضراته صوب ابوي

سالم: ما حسيتو بي

_النايم امرا غلبان

ابو سالم: اخخخ غطوني بليلة ظلمة

شلون ما حسيت شلون هيج غافلوني وسطو عليه، بويه شگل للوادم لو سألت عن حلالها

عماد: كول يا الله بويه اكيد راش عليكم مخدر، وهل ما حسيت

_كلولي هسه شسوي

_نخابر أيمن هو ضابط ويعرف بهاي أمور

_اي صح خابرا

راح سالم على صفحه واتصل على ايمن.

ورجع الباب ندگ وماكو غيري يفتحه رحت فتحته ودخل سليم يركض ركض

_هاا يباا شصاير من خابرتني صوتك خوفني وما سمعت منك شي

عماد: على كيفك سليم، ماكو شي بس حراميه داخلين على بيت ابوي وبايگين كلشي

_لاا، كول غيرها

_هذا الي صار

_الله يكسر ايدهم ان شاءلله، وهسه شراح نسوي

_سالم راح يخابر أيمن

_زين امشي خلي نشوف، شماخذين شمخلين

_ابوي ايكول ما مبقين شي

_اوووف رايح آنه امشي تروح وياي

_جاي وراك، يباا لا تخاف كل مشكلة والها حل
طلعو او  ابوي راح وراهم،

الوضع متوتر الأشياء راحت قيمة مو هينه لا هي فلوس وانگول تتعوض وندفع بدالهم بس اغراض ابن الحجية اشياء تخص سيارات ما موجودات بالعراق جيبوهم من دول ويبيعوهم، ابوي جان من ينام كل شوي يفز ويروح يطمأن عليهم بس بذيج الليلة ابد ما فز لوجه الصبح،

شوي وسمعنه اصواتهم علت ركضنه نشوف

شصار:

ابو سالم: هو ماكو غيرا

سالم: النذل الخسيس والله اذا طلع هو

ابو سالم: امس جنت يمهم وسأل عليهم اذا جانن موجودات لو أخذوهم

عماد: والله يا يباا ولا ارتاحله بس والله اذا طلع هبار ورا هاي بوگه ولا أخلي حور عنده

ابو سالم: محد يدري بيهن غيرا وكتله سعرهن بالملايين وهاي جداحة ثبتتلي هوو

سالم: يباا لا تستعجل كل واحد يدخن عنده من هاي جداحه بعدين ما اعتقد واحد

سليم: اكيد وياا جماعة

سالم: يجي ايمن وايصير خير

بقينه ننتضر أيمن الى أن شرف استاذ بسيارة الشرطة وبقو يحجون برا البيت . وآنه خاله راسي على باب اسمع حجيهم من بين حجي سمعتهم ايكولون شوف هذاك هبار شوفو شلون لاف وما وصل يمنه

_يمكن خاف لأن شاف سيارة الشرطة، إلتمت الناس علينا وصار الكل يعرف طفرو علينه حراميه،

الجداحة ما ثبتت شي لأن عليها اكثر من بصمه ايديهم، ابوي راد يشتگي على هبار بس من سمع راح يحققون ويه بيت كله وحتى بناته لازم يرحن وينطن شهادتهن رفض ابوي والولد بحجة بناتنه ميدخلن مراكز وما لگو اي شي حتى يتهم هبار بس ابوي متأكد هوو، وصل الخبر للحجيه وابنها تسودن فلوسه وراحن ورا يومين بليل اندگ الباب حيل،

_يا ستار يا ربي منو جاينه هسه

نرجس: يمه اسم الله، وين رايح ابو سالم

_اشوف الباب مشوفين راح يفلشونه

_خاف ارهابيين بعد

_كولي يا الله بس احنه ارهابيين يجون دگون ويطلبون استأذان

_چا اروح وياك ما اخليك وحدك

_مو رايح للحرب

طلع ابوي فتحلهم الباب

_هاا بويه رايدين شي

_انت بندر....

_اي

_اخذو

دخلو علينه وجتفوو ابوي

نرجس: ابو سالم وين ماخذينه

_حجيه رافعين عليه دعوا

وصرخ بصوت صعدووو

_يباا لا تخافون، لا تخافوون راجعلكم

وصعدو ابوي بذيج الليله وأخذو منه وراحو، وامي مرا تلطم ومرا تبجي

حضنت خواتي وهنن يبجن وكيوون مسوي روحه زلمة ويهدد آنه أعلمكم حسبالكم ابوي يخاف منكم ابوي بطل، امي ما رادت تخابر الولد بليل سدت بيبان وبقينه وحدنه بذاك البيت جبير،

خايفة وحتى النوم ما جاني وأدعي ربي يجي الصبح وكل شوي أذكر سياراتهم ملثميين وآنرعب خاف يدخلون علينه مرة ثانيه،

ولا يوم ولا يومين ابوي نحبس بس بفضل أيمن والواسطات تشتغل بالعراق طلع، وجان شرط

الحجيه ما نبقى بالبيت بعد، ومن حركت گلب ابوي وبعد هذا صارله، واجه هبار وگله انت البايك وطبعاً هبار من سمع الحجي سواها عرگه وصيحه، وابوي هدده بأهله وكعدت عشاير ورجعنه ابوي عصبي ويتوعد ل هبار تفاجأ من اتصال حور وهي ادكول

_يباا عوف هبار انت مو گدهم  وما تكدر عليهم هذول

عاط عليها ابوي وسمعها اشكال الحجي، بس صدمة اكبر وهي ادكول

_ما يسوا اكل اكلته عدنه وخاصة من تروح نرجس ل اهلها، من ايدي اطبخلك وانطيك

ومناا أتبرى ابوي من حور وكالها حتى فاتحتي ما اريدج توصلين،

كلش خفنه عليه وخاصة من ضل يشگي من گلبه، بس ما سكت راح اهله وابوو (الي هو رجل امه) وما توصل لأي حل

_هبار باگني ترضاها وانت المربي

_هههه ارجع واكول مالي غرض بي

متبري منه وبعدين تعال، ترى امه و يبوگون منها تريد عمه وابو زوجته ما يبوكك

_چا منا ورايح اخلي العالم كلها تسمي الحرامي

_شتريد سوي بي سوي آنه ما لي غرض رجال على گد حالي

وابوي سوا الي گاله بكل مكان يكعد بي ايسولف قصة الحرامي، انتقلنه البيت جديد وابوي بقى يتحسر على بستانه وزرعاته الصارله سنين معتنين بيهم تركهن وطلع ودعنه بيتنه، وأجرنه بيت صغير لا بستان ولا خضار، وضع ابوي ما يطمن دووم ساكت واختفت البسمه من وجها، جنت دائماً اكوله لا ضووج بويه وهو ايكول ما ضايج بس ادري ياكل بروحه من داخل، حور بعد سوته، ابوي منعنه منها،

وكل واحد يتواصل وياها راح يكسر كلمة ابوي، كلنا صرنه ويه ابوي وقاطعنه حور الا آمنه صارت وياهم ضد ابوي، بناته قهرنه وضل ياكل بنفسه ندم،
بيوم اتصل رقم غريب على ابوي جاوبه ابوي  ، ويسمع ضحكات شوي وحجة وياا:

_آنه دخلت بيتكم وبگتكم بمساعدة  وحدة منك وبيك

_لك هبار انت اكبر ساقط حسبالك ما اعرف صوتك
انطفى اتصال

رجع اتصل عليه ماكو مغلق

_والله هو مو كتلكم هو

وكلما ردنه ابوي ينسه السالفة يطلعنه هبار بشي جديد يذكرنه بي، حور صارت جزء من هبار وبقى هو نفس وضعه، خسرت اهلها ما عدا اختها آمنه،

ابوي زعل على آمنه وبقى سنة كاملة  ما يحجي وياها ولا هي تحجي وياا الى أن دخلت نرجس وصالحتهم وصارت تجي بس بكل جيه تتصل على حور وهبار وتحجي وياهم وكأنما مصاير  شي،

ابوي ضل يتحاشاها ويكره جيتها للبيت بس ما بطلت الى أن بيوم حور ومن غيرتها على هبار الجان يحجي ويه آمنه بنقال، غارت منها وسمعت آمنه حجي وذكرتها بزهرة وخافت من آمنه على رجلها، وبهيج انكطعت علاقتهم  وما دامت،

بيت كريم:

_دبدوبي شجاي سوي

_شگون اسوي آكل بهل لَيمونات ايكولون اضعف بلكت اضعف وأخلص منك

_يمه، يمه صيري مثل هاي ممثله بالتفزيون

_شگون اسوي واصير هيج ضعيفونه

_لا تاكلين يمه

_شگون وتريدني اموت من جوع

_مو جاي ايسوون رجييم يمه هذا انترنيت گدامج وسويلج شي وضعفي

_اي وهل سمعت لَيموون اصفر يضعف

_اوو يمه بكيفج ابقي على سمنج حتى ما اشتهي آخذ مرا أخاف تسمن
مثلج

_جا شسوي بوحدة ضعيفونه

_جا ترديها مثلج دبدوبة، ويوميه اجيبلها گيلو ليمون حتى تضعف

كريم: خيولي هذا ابنج يعرف يختار

_هههه خليت اختيار الك ب امي الدبة

_شگون تعييب عليه لك هذا ورم، وكلبي مورم منكم ومن ابوكم كرمرم

كريم: يمه شبيها، هذا دبدوبي هاي ملكتي، أخذت گلبي من اول يوم شفتها

_مممم ضل يصبغ بيه

_هذا مو صبغ حبيتج وحبيت فطريتج وضحكتج هيج دخلتي لگلبي بدون  ما دگيين الباب، احبج دبدوبي.

خجلت من كلامه والولد كاعدين كلهاا صاحت

_اوووو ابوي طلع رومانسي

الله عوضني ب كريم وحنيته ولدي كبرو وصارو شباب صغيرهم بالثاني عمرا ٨ سنوات فرح زوجت واستقرت بيتها، عمتي وعمي انطوكم عمرهم عمي ما شفت منه أذيه الا عمتي ما حبتني دووم، ونست آخرتها بالگبر دائماً أدعيلها بالرحمة والمغفرة، اهلي صرت اروحلهم كل سنة ومرات بالسنة مرتين احسن من قبل ملجأنه يم ابوي ونرجس وحتى لو اروح ل اخواني شوي وارجع محد يتحملنه غير نرجس، تسأل علينه،

بآخر اتصال ويه نرجس ضوجتها من ساومتها بيني وبين بسه وجان جوابها ماي بارد على گلبي وهي ادكول

_انتم هم بناتي حالج من حال بسه،

بس تبقى غصة بگلبي اخواني ربيتهم على ايدي مشفتهم يوم دگو عليه الباب وزاروني او اتصلو عليه، بس ما اكطع بيهم يبقون اخواني وكطعه من روحي

اندگ الباب على ثنائي الجميل..

_شبيج اشو وجهج اصفر بلا باعي حيل حرارتج مرتفعة ، امشي اوديج للطبيب عيوني انتي

_تعبانه عماد، تعبانه

_استغفر الله، امشي بويه لبسي عباتج لك ضرغام دربالك على اخوانك امك مريضة اوديها للطبيب ونرجع

_يباا انت شجاي سوي لازم ايدها هسه تعديك ترى امي بيها كارونه

_ولي من انعل ابوك لا ابو كارونا هاي تعب سنين تريدني اتركها كرونا شنو وتفرقنه

_اهووو ابوي رومانسي صايرلي ضل تعديك ولا تجوون يمنه حجرو روحكم بالمستشفى، هسه مال رومانسيه بهل زلك

_امشي ملعون والدين

_استهينو بالمرض وهاي دكاترا تحذر بينا وانتم جهله، اشبكها بعد هههه تعب السنين

شمر عليه نعال وهو ايصيح..
_الله منطيني قرودة مو ولد، جيل تگنيك، وانتي بويه كومي.. كومي

_ترى صدك حجي ابنك يمكن آنه مصابة

_امشي نروح ونسوي تحليل لبسي كمامتج وجفوفج

_دربالك لا أعديك

_نتمرض سوا معليج، ولا اعوفج بأزمتج هاي
ستندت مني قوا وجنت حيل خايف ضيع وجدان من ايدي لازمها حيل واشجعها انتي قويه انتي بطلة وجدان لا تعوفيني وصلنه للمستشفى بعد معانات سواق تكسي من يشوفون حالتها ميقبلون وصلونه بس اگو ناس عدها رحمة،

وصلنا للمستشفى وبعد تحاليل وعلاجات رجعنه ورا يومين خابرونه، بأنها مصابة مستشفيات مليانه وصار الحجر بالبيت، سويت الغرفة مستشفى من مغذيات واوكسجين ودكتور اجيبه للبيت وبدت حالتها سوء يوم على يوم ليل كله ما انام من ونينها افرش سجادتي وادعي ربي يردها سالمة، لا يوم ولا يومين14 يوم ورجعت تستعييد عافيتها سجدت ربي شكر،

ما طولت هواي وفيروس صابني

وجدان: ما جانت سنة خير علينه بسبب هذا فايروس، جنت يوميه اسمع عماد يبجي ويناجي ربه ودموعة قوتني ما تشافيت بشكل نهائي وطاح عماد وبسبب مناعة الضعيفة ردنه نخسر عماد، صعد فيروس على كبد عماد وأكل جسمه أكل بدا يوم على يوم يضعف عماد، وتبادلنا أدوار، خلصت

فلوسنه وصار ما عدنه فلس نجيب لگمه ناكلها، بس خالي ابو سالم ما قصر وهواي ناس من عرفو بحالنه صارو دزونه فلوس وأكل

_بويه وجدان كوليلي ابني شلون حالة

_حالته تبجي الكافر كل يوم احجي وياا انت مؤمن وهذا ابتلاء، وكبار بالسن جاي تشافه وهو ماكو راح اموت وايامي بدت تخلص

_فتحيلي الباب اشوفه حتى لو من بعيد.

_عنده مراجعة للطبيب وهسه راح يطلع بس يا خالي دربالك تصير قريب منه

ابوي رفض يروح وبقى ملازم الباب وأول ما طلع عماد

_يباا هاي شصاير بيك

_خليك بعيد

_هاي شلوون سالفة خليني اوصلك

_آنه اروح ابتعد عني يباا

_وشلون تروح هيج وحدك

_احسن من ما ينعدي واحد بسببي

رفض عماد احد يوصله، بس ابوي ما تركه راح ورا خاف طيح لو صيرله شي، وانطه كل العندة ل عماد بس حتى يتشافه، طول عماد وگلوبنه تسودها الخوف وخاصة واحنه كل يوم نسمع حالات وفاة نسبة فايروس بجسمه جانت كلش عاليه بس فضل الله تشافه من المرض وجان يوم فرح من رجعنه سالم من المرض..

سليم كمل دراسة وصار دكتور اسنان وزوج دكتورة بنفس اختصاصة وكون نفسه واشترى بيت وعاش ويه ابو سالم بيت واحد وصار عنده بنات اثنين،

بسه زوجت وصار عدها ولد نورس طالبة جامعيه وآخر العنقود حمامه مثل ما يسميها عمو بندر طالبة اعدادية آما كيان ترك دراسة وخابصهم بتصوير وطموحه ايصير يوتيوبر،

آمنه بعد ما تزوج أيسر بقت على تواصل وياا بس هذا تواصل ما دام بسبب زوجته وغيرتها من آمنه، اكثر من مرة تتصل عليها وادكلها ابتعدي عن زوجي، وابتعدت آمنه عن أيسر وبقى حبهم يسري بدمهم لحد الآن من ينجاب طاري أيسر يفز گلب آمنه وعيونها تلمع،

اما رافد:

بعد جائحة كارونا منعو عنه السفر استقرينه بالعراق وبهذا استقرارنه والكعدة بالبيت خلاني أقرأ هواي كتب وزادت مكتبتي، اجيت انفض التراب من مكتبة وارتب كتبي كبرنا وحتى كتابة صرت يادوب اشوفها، البس مناظر والتزم الهدوء بغرفتي ويه كتب وأدخل بعالم القراءة ومحد يجرأ يوصل للغرفة بس اليوم ندگ الباب وأنزعجت من دگت الباب فتحت الباب متنرفز

_هاا ام سمر اليوم داگه الباب شعندج

_اسفة والله بس عمك ابو سالم يريدك ضروري

_خير ان شاءلله، جاي وراج

نزعت نظاراتي رجعت الكتاب لمكانه وطلعت

_هلا ب عمي

_هلا بيك

_وجهك مخطوف، شصاير

_الله بلاني بشلون نسيب، هبار ومشاكله ما تخلص.

فز گلبي من سمعت اسمه

_حور بيها شي

_لا جيبلي اسمها

_هاي الفاهيه يطلع منها كل هذا

_روح شوف حالها

_اعرفها، ما تعرف تتصرف

_شنو مشكلة الجديدة

_يحجي عليه ويسبني بالنقالات ويگول وصلوها اله، موجودة تسجيلات أخذتهم للشيخ واليوم الكعدة

_ايصير خير، والله متحلف بي بس هو هلكدوته بوگسي واحد يموت بيدي والله، وهم يحسبونه عليه زلمة بس هو صوج هاي الفاهيه الكاعدة عنده، والله جهالي ما اعوفهم وطز بيهم شراح يطلعون مثل ابوهم اخخخ لو اصير بيدي

_والله ما ادري بيها غسل مخها عدل

_محد يعرفها بگدي، ايصير خير عمي بليل نروح بس، شلون اشوفه كدامي وهيج اسكت ما اخنكه

_لعد آنه شگول، الله وياك عمي متقصر.

_الله وياك

اخخخ يحور ما سمعتيني وعلگتي روحج بهذا الناقص بس حتى لا سمعين كلمة عانس، لو باقيه عانس ولا مختارا هبار، بيومها واجهنا ولو مو زحمة من الناس اله اكسر ضلوعه، مسوي روحه الملاك البريء بس وجها ينكط شر، والشيوخ ما عدهم غير حل تصالحو وبوس راس عمك، وعمي يقهر بگلبه

على منظر كدامه، حور عاشت طول عمرها بدون أم وتتحسر عليها، وبتصرف صغير خسرت ابوها هم، هو هذا البشر اذا ما عرف يتصرف يبقى يقدم خسارات..

بسة: وهاي صار خمس سنوات واحنه مكاطعين حور، بس نعرف مكانها وين عايشه، وابوي ك أي أب حنين على اولادة يسأل عليها بس من بعيد بدون علمهم، مرة جمعنه كلنا وگال راح اكلكم حزورة واشوف منو ايحلها

كلنا مشوقين نعرف الحزورة

_اشتريت اربع رگيات (بطيخات) وحدة طلعت خايسة وثانيه بيضة وحدة شگرا وحدة حمرة؟ فنكم تعرفون الحل

بقينه صافنين هاي شنو من حزورة،
_كولنه يباا ما نعرفعا

_ضحك وكال
هذول نسابة الخايسه هبار ما تنوكل  والبيضة عز الدين هم ما تاكلها بس على اقل ذبها للدجاج شوي ما تتحسر على فلوسك وشگرا كريم تاكلها بس هم ما عاجبتك كلش ورابعة حمرا مؤمل (زوج بسه) هذا ربح بينهم الله عوضني بي لأن طلع خوش انسان، وهذا تفسير الحزورة

ضحكنه كلنا على سوالف ابوي، جاوبته آمنه

_اي والله يا يباا شلون نسبان عندك، واحد فاهي وثاني طايح حظه وثالث هالله هالله ورابع يعلم الله، بعدنه ما شايفين منه شي

_لا لا الا بيبي خوش نسيب

مؤمل: ترضاها عمي رجال شواربي ولحيتي اسميني بيبي

ابو سالم: هاي سوالف النت يباا تقبلوها، حط ايده على نرجس وحضنها لصدرا 

شوف هسه آنه اسميها دكتورا وصدك صارتلي دكتورا كل علاج موجود عدها

_يمه منك ومن سوالفلك ما تكعد راحة

_يباا عوفك من امي سولفنه سوالف قبل

وكلنا ايدناها وتربع وهو ايكول

_سوالف عمة مها ما تخلص جنه صغار وتكعد سولفنه وما عدها غير سولف من نولدت وسوالفها حافظهن على گلبي صاحت نرجس

_على گلبي هم من كثر ما سولف بيهن

ضحكنه كلنا وبقينه نستمع سوالف القديمة بصوت ابوي...

وضاعت سنوات العمر في قصص لا تشبهنا، حور كانت متأمله تعيش قصة حب مع رافد بس حب كان خاطئ حبته، صح تودد الها بس متقبله لأن رجال مزوج وكبير بالعمر  ، اما آمنه كان حبهم نظيف وجميل بس كان خطأ منهم هما اثنين عاشت قصة ما تشبه قصتها رسمتها بأحلامها، سالم أفنى عمرا بحب سمر لكن كرامة وحب المصلحة سيطر عليهم وضاع حبهم، اما سليم ضحى وكان وفي وبذل كل جهده وعاد كل الناس من أجل حبيبته وأصابة خذلان، اما الثنائي الوحيد عماد وجدان من أجمل ثنائيات المرت عليه رادها بالحلال وكانت ثقته عاليه برب العالمين وربك ميرد احد خائب، وعلى كد نيتك تحصد،

و خلصت روايتنا ضحكنه وياهم وبجينه وياهم

وعشنه حياتهم بين هل سطور وهسه صار الدور

نودعهم ونتمنالهم حياة سعيدة وندعيلهم يحن گلبهم وگلب حور وترجعلهم لأن الواحد شكد يعاني بس يلكه أمان بظل عائلته، ما كدرت اتواصل ويه حور فكل احداث وصلتني من بسه الي عرفته سالم وعماد ما كاطعين وياها بين فترة وآخرى يزوروها، بس هي الله يحفظها كاطعه ويه الناس كلها،

او يمكن هبار مكرها بكل الناس ومن خلال معلومات وصلتني حللت شخصية هبار هو( سادي)

السادي هو شخص متسلط، عديم الرحمة، عديم المسامحة لمن أخطأ بحقه بقصد أو دون قصد، يسعى بكل الطرق لتحقير وإهانة وإذلال الآخرين، وسحق آدميتهم، وجرح كرامتهم، ويتلذذ بذلك، ولا يشعر بالذنب عند ارتكابه الأخطاء أبدًا، ويتصف بعدم الثقة بمن حوله، ويستلذ بتعذيب أنثاه حتى هو يمارس جنس معها لهذا بليلة دخلة حور صارت بيده فريسه واستلذ بتعذيبها،

هواي خفيت امور عن عائلة حفاظاً من معرفة اصحابها  وخفيت حياة بسة لأن كانت تتعرض لعادة مكروها وهي طلبت اكتب تفاصيل بغرض توعيه بعض البنات بس رفضت لأن اكثر قراء مراهقات وبهذا العمر وبهذا زمن، أي شي يكتشفو يحبون جربونه مو كلها تتعض وخاصة اذا بيها اشياء شيطانيه، واني اوكع بخطيئتها لهذا رفضت ..

لا حب يعلو فوق حب الأمهات هكذا قالو.. لكن ماذا عن امي لم تكن مثل باقي امهات أحملتنه ذنب لليوم نخاف لا احد ايكول علينه بنات زهرة ف الأم منزلتها كبيرة بعيون ابناءها حافظو على سمعة اولادكم كلكم راح تكونون امهات مو عبث من قالو الجنة تحب اقدام امهات، وبهاي رواية شفنه مرت اب حنينة مو مثل المعروف تكون شريرة نرجس كانت مثال لمرت اب وعكست النه صورة،

الأخلاق صفة مهمه لكل شخص لكن اذا شخص  تشوهت أخلاقه شكد مراح تتجمل تبقى مشوها بعيون الناس،

اكثر رواية تعبت نفسياً، واني اكتبها حسيت نفسي وحدة منهم، لأن اكثر احداث عشتهن شخصياً يمكن لو شخص قريب مني يقرأ راح يقول هاي قصتج لكن تشابه قصص فقط..

اذا لاحظتم شوي اختلاف باللهجات، لأن تختلف لهجة اهل البصرة من منطقة لأخرى، مو اختلاف شامل لا اختلاف بسيط، اذا لاحظتم لهجة بيت كريم تختلف عن لهجة بيت الحوث وهكذا،

وفي الختام شكراً على قراءتكم حروفي وشكراً على تفهمكم وصبركم على تأخيري في تنزيل، لأول مرة اكون مو دقيقة بالنشر، شكراً على تصويت وشكراً على تعليقاتكم الحلوا، وشكراً للناس نزلت الواتباد علمود الرواية ولا تحذفونه لأن وراكم قصص أجمل، وشكراً لجماعة التكتوك الي اجو متأخرين، وان كانت رواية عجبتكم شاركوها مع اصدقاءكم 

انتضروني في رواية جديدة، احبكم هواية مهجاتي.

13/1/2023 الجمعة

                           "النهاية"