قوقعه الجمر

ح ٩ ( الجزء الثالث )

حكاية 📖 #قوقعةجمر

📝 - ٩ - ( ٩ - ج الثالث )

✍️#فراقد

%%%%%%%%%%%%%%%%%%%%

ولا ادري شنو البيه ...

تعب ما ادري تاليه ...

حزن ما جاسته اغنية ...

انه ليا جفن مبيوع
دمع ما لجم راعيه ...

وحلم ينعاد يومية ...

نهر عطشان شاطيه ...

وگلبي اليضحك وي الناس
خانگته بواجيه ...

اضحك ما گلت تعبان
اگول الدنيا مگضية....
++++++++++++++++++++++

شوقية ...

بهذيح الليلة حمزة تخبل عليه
منه كلمة ،، ومني كلمة
دفرني دفره قوية بنص بطني

- حمزة كطعت مصاريني

- يطبج طوب

تركني الوب ودخل للكبة ..

غزاني ألم فضيع ،،
هو صح ضعيف بس ما شاء الله قوي،،
عظمه صلب وضربته تهد الحيل
كمت أعيط بصوت عالي
- حمزززة راح أموت
يييييمه تعالييييلي
يااااااابه خزززززعل أفززززعلي

طلع عليه من الكبة بيده فانيلة الداخلية يريد يبدل
- بلا مكاره

اشرلته بيدي ،،وناديته بصوت الألم
- تعااال بطني أنمردت

جي عليه شلون ما يحركني اعيط بالزايد

شلح بطني .. يعاين عليها وظل ساكت
ضربته محومره ومبين أثرها على جلدي

انوب أريد امد جسمي مااكدر
تقرفصت وصرت طوبه

راح جاب دهن طبخ ورجع عليه بقصده يمرغني
- فكي روحج

- ررراح أموت حمزة
مسلمتك بيد العباس أبو رأس الحار على هاي الضربة

صم حلكي - جعممم من لدغج عربيد علي الشرجي كون
-الكافل شويه تسلميني بيده

- يا حمزة يل عشكتك وطلعت عن شور أهلي
وتحملت لخاطرك كتل يابو كتل
وفاركت اعزاز قلبي لخاطرك
وهنا بدار الغربة أستفردت بيه
بس أكلك لا حسبالك أني وحيده لا ورب الكعبه ،،
الله هو وكيلي
والعباس التخاف منه وتحلف بي هو كفيلي

هو سكت وناط عيونه بوجهي
- ادعين عليه شوك

-لا وين سمعتني أدعي
بس أني ضعيفه والغربة فلشتني
مسلمه روحي بيد ألله وهو نعم الوكيل و الكفيل .

تركني الوب من الألم
ورجع دخل للكبة ...

ويا هذاك الليل المر على أمة محمد ونامو وارتاحو بي
الا أني ظليت للصبح مثل السمج المزوهر
شبعت بجي
اتفركعت تفركع من القهر
أتمنيت أبوي الكليط عدل ويعاين للذل العايشه بي
ورب الكعبة يشتريني من الدنيا وأهلها .

وعده هذاك الاسبوع
لا أني احاجي حمزة ،،، ولا هو يحاجيني

هو يطلع من الصبح يرجع ظهر يدور شغل وماكو

ولا عدنا جم فلس جوة أيدينا
يفتحله بيهن جمبر مخضر بالسوك ،، ونعاين تالي رزقنا وين يصفه ...

يومي وحياتي نفس كل يوم
وخلف الله على أحليمه وجهالها مونسيني

أحليمه نفس يومها ونفس شغلها
تطلع من الصبح ترجع المغرب

جهالها طول النهار يمي ..

هي سباعية وشاغولة وتجيب لجهالها ما مقصرة وياهم
بس ما تلحك تطبخلهم بالنهار
عليها تسويلهم بس العشه

سكينه تجيب ريوكهم وتجي يمي
إريكهم واتريك وياهم ...

شبر وشبير يطلعون يلزمون الشارع

جويرية تبقه يمي

سكينه ترجع تنظف دارهم وتعاين شعدهم
غسل ملابس ،، لو غير شغله

أنوب ترجع عليه جايبه مسواك غداهم
أمها مجهزتلها شنو تطبخ
بس هي تتعاجز ،، تجيب كلشي يمي اطبخلهم الغده
وآني هم أخاف الله أضيف العندي ويه جدرهم
يصير الغده الهم والنا ( أني وحمزة )

اغدي الجهال واتغده وياهم ...
أطلع حصة حمزة ...
والباقي بالكدوره ترجعه ( سكينه ) لمطبخهم
واتفقت ويايه ما أكول لأمها أنى اطبخلهم
يعني شلون يبقى هذا الموضوع سر بيناتنه .

وره الغده الزمهم اجلفهم و أسبحهم...وانومهم شويه

حت سكينه اجبرها تدخل تسبح
وامشطلها وارتبها

هي شاطره تغسل ملابسهم ما تخليهن

وهجي يخلص نهاري وياهم ..

من يكعد أبوهم من النوم يدك علينا الجينكو
ويصيح - سكننننه تعاي بويه

هي أسمها سكينة بس أهلها ينادوها سكنه

تندار على دارهم تخدم أبوها وتعاين شمحتاج ،،
و بعد ما تجيني
عود لليل ترجع ويه أمها يتعللون يمي .

جي يوم الجمعة ،، وأحليمه كاعده يوم عطلتها
دارت عليه من الفجر .. وايدي بيدها

عجنت هذيج النجانه الزينه وشخصت ثوابها،لوجه الله وللرسول (ﷺ) والإمام العباس .

وهي هم شاركت ويايه
وجابت مخضر وشحم بطن غنم نظيف ...
وكعدنا ثرمنا نجانه حشوة كباب طاوه

حمزة سمع المجلس والثواب للعباس طار وانسر وجهه
راح جاب كوم خضره ،، وخيار

أحليمه أخت دنيا ... وتعرف حالنا
راحت جابت فراش للكاع من دارها
وايدي بيدها فرشت داري ...

وصدك هي سباعيه وشاغوله
فزعت حمزة جر واير كهرباء من دارهم عبره من حايط الجينكو...وشالو مبردتهم كعدوها على بلوكات بشباك ربعتنا..

شجرت تنوري ،،
شبر وشبير نكلولي شكو حطبايه وخشبه وورقة بالمنطقه

كعدت أكطع العجين ، أني وياها نريد نخبز
جي حمزة كال :- رغيف بركة الكفيل لا تثلمي

أحليمه جاوبتة :- أي خويه أعرف
وصدك هي بعد تعرف صغرت الشنكه

سكينة كاعده تنظف بالخضره

و جويرية بيدها خياره تكركط بيها..
وهي تموت على حمزة ،، تفتر وراه
وهو هم يحبها ويلاعبها...

كلنا يا الله ،،، وكفت للخبز

اول شنكه بلشت أمدها كالت أحليمه:- أوكفي لا تخبزيها
انخي أبو فاضل على شغله عندج كلفه ،، ونذريله
هذا اول ثواب يطلع من ايدج بثوابه

ورب الكعبة
أمد بالكرصه وجي أخوي الحيد كبال عيوني ،،
وكعت دمعتي
نخيت العباس وبخته بجاهه يم الله يفزع لأخوي الحيد ويطلعه ويخلصه من شدته ومرضه .

أنوب أريد دموعي تكف وتوكف ماكو
أخبز وهن ينكطن بالتنور
شريد اذكر وشريد أحجي عن عز ودلال أهلي إليه

أحليمه تمدلي
وأني أخبز واسولف بكلبي واشكي همي
واشتياقي لأهلي وعصرة غربتي لربي ..

خلصنا الخبز ...
وبلشنا بتقلاة كباب الطاوه

وكعدنا نجهز لفات توزيع الثواب

حمزة يحوس ويفتر فوك روسنا
وهذا هجي سوي
وهذا هجي عوفي

يابه ورب الكعبة ندري بيك تعرف
بس أني هاي اول مره اسوي هذا الثواب

الحمد الله صار الثواب خير وبركه

تغدينا أني وأحليمه وجهالها من الثواب

وحمزة سكنه خدرتله جاي
تغده ويانه على الواهس .

أحليمه كالت :- اروح اغسل وبدل ثوبي
وانتي هم اغسلي والبسي شي مرتب

عطت وراها :- تعاااي اخذي جهالج سبحيهم ينكطون وسخ ..

جاوبتني:- مااا يفيد بيهم تراب الشارع متنايهم
بليل اغسللهم وخومدهم

من طلعت حمزة ناده عليه بالكبة
لان سكينه بالمطبخ تغسل المواعين

- شوك البسي أسود

- ماعندي ملابس سوده

- عندج النفنوف الجيتي بي من بغداد

- هااا الكوستم قصدك

- اي هذا اسود

والله سبحت ولبست الكوستم
بس هذا عندي أسود اشتريتة ورة وفاة المرحومة .
احنا ما نلبس الأسود
نحزن على موتنا بلون نيلي .

مشطت و شعري شلته بالقراصة
وكحلت عيوني .. وتعطرت
وهذا هو كل ترتيبي ...

حمزة لزك الا تلبسين ربطه
- يابه راح يجن بس نسوان للمجلس
ماكو يدور عليه حجه ،، الا تلبسين ربطه ...
وافقت أمري لله مالي خلك للمشاكل

يمه ردت روحي وآني كاعده كبال المبرده
شبعت هوا ...

من جيت بدار حمزة حت الهوا انحرمت منه
بس اكول ميخالف أصبر و الله كريم بأجر يتحسن حالنا .... بس هو كل ما جاله يتخبل عليه
ويصيح ويرزل وما يحترم .

جت أحليمه سابحه وكاشخه بالاسود ..

النسوان هي عزمتهن ،، وعزمت المله

كعدنا نسولف أني وياها
- أكلج ما رديتلي خبر
رجلج رضه يشتغل بالبيكم لو لاله

- يا بيكم هاي

- غمت روحها ،، لا والوعد اي والله لا والوعد
خااايبه الكتلج إبن أختي يشتغل بيها
بس ماكل حق فروخي وما يناوشني منها درهم

-ياااا أحليمه نسيت السالفه
ورب العزة بالي مو صافي

- أكلج يا خايبة قنعي يشتغل بيها
خااايبه شون أظل أعلم بيج
خااايبه من هو يتعب بالشغل ويكد أنتي ترتاحين
ومن يكعد بالبيت عطال بطال ويرتاح ويشبع تختخه ،، انتي يشتعل سلفى سلفاج ،،يناكرج ويصخم عيشتج

- قابل شبيدي يا أحليمه

-بيدددج والعباس بيددج
بس أنتي خااااايبه ما تعرفين ادبرين حالج

ولو ما عليج لوم بعد أنتي بنت عز ودلال
ما تعرفين لدروب الذل والفكر والعوز

أكلج أسكتي هسه أقنعه الج

نادت عليه هو جان متمدد بالكبة
وآني وياها كاعدات بالربعة
- أبووو مصيفي خوويه ما تجي يمنا عدنا وياك شغيله تفيدك ...

شويه وجي علينا :- هلا خويه

- شوو أكعد شوي يمنا أريد أحجي وياك

كعد قريب علينا .. و جويرية نكزت كعدت بحظنة

هي أحليمه ضحكت :- يا الله هاي بشاره خير

هو أبتسم :- أي سامع من أهلنا من أكو سالوفه خير
والفرخ ينبص بحضن المعني يجي الخير

والله أحليمه صاحبة لسان
وروحها حلوه
وتعرف تسولف
قنعت حمزة يلزم الها البيكم ( سيارة )
وبلكت الله يفتحلنا باب رزق على كرفتها .

هو جاوبها:- الله كريم ،،، وظل ساكت
من سكت معناه راح يفكر يلا يقرر ويرجعلها جواب

وره شويه بلشن يجن النسوان

لبست حجابي وعدلت روحي

وكل وحده من النسوان تجي وياها جهالها
ويسلمن ويرحبن لسانهن حلو

أحليمه مستلمة استقبالاهن اني ما اعرف .

وهن يسألن شعجب مسوين مجلس
وهو لا وكت عاشور ولا أكو فد مناسبه دينية

وهي تجاوبهن :- ام مصيفي طلبت نذر من العباس
و قامت المجلس

وهن يدعلي بتحقيق المراد

يمه مرت عليه ساعات تخبل..و داري صار يزهي
بجية النسوان وصوت دوي سوالفهن
و رنة ضحك ولعب جهال
صارلي شهور كاعده وحدي ،،
أني متعلمه على هوسه أهلنا وكثرة خطاطيرهم
هجست روحي هسه استعدلت بجيتهن

يمه ساعات شكول عليها قليل بحقها
اول مره أحضر مجلس عزاء للرسول ( ﷺ) وال بيته

فاكه حلكي واعاين عليهن
الواحد من يسمع مو مثل اليحضر ويعاين بعينه
اعاين شلون يلطمن
وشلون يردن على الملا
كلشي يعرف يسون ... نفس طبع جوهره وأهلها
من جني بعزه المرحومة وأبوي الكليط

وآني كلشي ماكو ... واكفه على صفحه واعاين عليهن

بس من كامت تنعي الملا
وهي مرأه جبيره حافظة الكلام على غيبها
وصوتها تعبان ،، يساعدنها النسوان بالنعي
هيجت عليه ألمواجع ،، شبعت بجي
هي تكول على ال البيت
وآني مروني أهلي وتذكرت مصابهم
وصدك لو كالوا الغربة مره
وأهلي صدك ضعت منهم وضيعوني ..

خلص المجلس... وكعدن النسوان يرتاحن من اللطم
وسكنه نكزت توزعلهن ماي
وأحليمه وزعت عليهن الثواب ..

وآني لكيتلي باب فرج
عيوني ما سكتن ولا بطلن البجي
مشتاكه موووت لأهلي ولمة خواتي

أحليمه كالت للملا :- علويه بروح أهلج
أمسحي على بطنها من بختكم كون تحبل
وينترس حضنها بولد ببنيه بس كون الله يرزقها

هي خطية المرأه عجوز جييره
من عشيره ( الياسري )
انوب صوتها راح من قراية المجلس
:- تدني ليه يبعد أهلي

تقدمت عليها خطية قرت سورة الفاتحة والاخلاص
على بطني ودعتلي بالذرية الصالحة
انوب من تقرأ القرآن صوتها يخبل
تقرأ بصوت اهلنا ،، أهل الخير والبركة المتعلمين الحفظ من مجالس آلكتآب .

هي تقرالي ، و أحليمه وجم مرأه عكدن طرف شيلتها

يمه هذا المجلس عمري وحياتي ما أنساه
على بساطته وطيبته وصفاء النيه البي
كلش إثر على حياتي ،، واله حلاة خاصه بروحي

وية طلعت النسوان طلعت أحليمه وجهالها

أني كمت كنست فراش الكاع ولملمته
دكيت الجينكو
جاوبتني أحليمه :- هااا شوك

- دزيلي الجهال ياخذون الفراش

- شوك رجعي فرشي

- لا كنسته ولميته خليهم يجون ياخذونه

-- خااايبة أنلطمي لا اوديهم ولا ياخذونه

- ليش

- خااايبه غير انا مستحية منج ما هديتج شي للبيت
مو أنا غمه لو ما غمه ما آنسه هديتج
رجعي فرشي واعتبري هو هدية بيتج
عسه فرشة بركة مجلس أبو فاضل خير وبركة عليكم

- لا لاااا أحليمه ما أقبل حرام والله
انوب كله جديد

- اي والحسين كله جديد
وانا متقصده اطلعه الج جديد حت أهدي الج
وتباركين اول فرشته بالمجلس

- لا أحليمه ما أقبل خلي الجهال يجون ياخذونه

- العباس عليا أن رجعتي بعد لا اجيج ولا اسلم عليج
خااايبه غير اكلج هديه
أكو واحد يرد الهديه
رسول الله بكبر منزلته عند الله قبل الهديه
وانتي اليابسه ترديها ،، ردي فرشي
وحضريلنا جاي ،، والشكر من عندي
حتى نصير أنا وياج ،، جاي وشكر ذايبين ببعض على كولت المصريين وضحكت ...

سكتت بعد ما أعرف شجاوبها
- رحم الله والديج

- والديج الرحمه
خدري الجاي زين لا تشعوطي

رجعت دخلت جوة...ورجعت مديت الفراش من جديد

سألني حمزة ليش رجعت فرشته
حجيتله عن موقف أحليمه واعتبرته هديه لدارنا

ظل ساكت ما حجه شي ...
بس جنه ضاج وجه انكلب .

خدرت الجاي .. شو لا أحليمه جت ولا جهالها
انتظر يا هسه تجي وماكو ...

لليل هم ماكو ما جتني ...

ظل بالي يمها ،، انوب ما أكدر اندار عليها
حمزة ما يقبل اوصل لباب الشارع .

دكيت الجينكو محد جاوبني ..

للصبح جتني سكنه وياها جويرية
سألتها عن أمها
جاوبتني بقهر ،،، طلع الأفندي أبوها كاتلها هي والجهال

أنوب من الكتل ظاله نايمه بالفراش ما رايحه لشغلها
( تشتغل معينة لمراه عجوز و زوجها رجال شايب)

سودة عليه ظلت يومين هي ماكو...
بس الجهال يمرون عليه..

ثالث يوم
جت سكنه كالت:- عمي أبو مصيفي يكدر ياخذ أمي للدكتور بالولاية...

ليش

- مو تدرين أبويه طكها
وطكتا طاحت على اذنها شو بعد ما تكدر تمشي ادوخ وراسها يرج ..

حمزة موجود جوة
دخلت كتله ،، صفن
كال :- ما يصير بس انا اطرش وياها
انتي غيري ثيابج وأمشي ويانه

اجاني باب فرج ،،
واركض أعدل روحي أريد اطلع
حت المسجون عنده ساعه يطلع بيها من الزنزانة ..

وحمزة ساعه وهو يعاركني
البسي هذا ،، نزعي هذا
غسلي وجهج ،، لا تخلين عطر
عدلي الربطه زين وخليها نازله على صدرج لا ترفعيها على ركبتج ...

واخير شي يريد البس فوك الكوستم عبايه راس ،،

- أبددد والله ما اطلع بيها
هسه برأس الدربونه أتجقلب بيها واصير مضحكة للعالم

- البسي شوك لا تلحين

-ما أعرف أمشي بيها اوكع

- العباية ستر بويه لا تلحين
هنا مو مثل هناك

-ما اروح حمزة اخذ سكنه وياكم
وخلي جويرية يمي .

- يطبج طوب

ظليت كاعده بمكاني وضايجة ...

شويه ورجع عليه :- كومي فضيها المرأه ناطرتج

- مو كلت ما تروحين

- شوكت تزوهرت وحجيت
كومي فضيها

ورب العزة بداخلي فرحت ،، بس بقيت شكلي ضايج
راح اطلع واشتم هوا واعرف شكو ماكو هنا

طلعت امشي وياه
يعاين عليه:- وعلي الشرجي هاي تنورتج كصيفه
يااابويه يرررج من تمشين ارجعي لبسي عبايه

ما جاوبته ،، نقذني شبر واكف بالباب
- يلا باجي أحليمة تريدج

سبقت خطواته
عاطت بصوت مكتوم صاك على سنونه
:- الصبرررر ياالله

وكفت بره باب الشارع
وانتظرتة يقفل الباب
ما انداريت على أحليمه الا هو وكفلي باب شارعهم
اضوج من رجلها..

دخلت خطوتين لحوشهم
لكيت أحليمه تنتظرني.. خطية تريد تمشي ما تكدر
تقدمت سندتها ... هااا عيوني سلامات

جاوبتني بغصة :- يا خيه ظلت بيها سلامات
ظلت بيها عافيه
فتحت زيكها وعاينت للسمه
:- أبو خيمة الزركه نذر عليه بس تاخذ العار العندي
احني جفوفي والبس أحمر مشعشع

- يااا صوتج لا يسمعج

- خايبه دكيتله منوم وخمدته من عساه لا كعد

- ياااا خاف يصير بي شي

- عرج ما يطكه نكس عمرج سامعه نكس صارله شي

أمشي ويه خطواتها ساندتها
لحد ما طلعنا الشارع نريد اناجر تكسي
اعاين بعض الناس المتواجدين بالشارع يعاينون علينا

أجرنا تكسي ،، أني وياها كعدنه ليوره
وحمزة بالصدر يم السايق
بهدوء هي ناوشتني فلوس
ندست حمزة وعبرتهن بالخفيه وخليتهن بيده
نستحي من السايق .

أعاين للمنطقه
مكانها مكطوع
وبعيد عن المدينه
وآني سميتها قرية تلفات الدنيا

وصلنا للمدينة وهي تندل دكتور
دخلنا للعيادة ... وبعد الحجز والسره
دخلت وياها ،، كشفيه على فحص
خطية طلع عدها ألتهاب بالاذن وهاي الدوخه من عدها

طلعنا للصيدلية..أخذت علاجها

كالت الحمزة :- من رخصتك خويه بس شوي اطلع بره
اريد اشتري دوه خاص ومستحيه منك

حمزة طفر بره ...

طلعت راجيته من جيبها
وانطتها للدكتور الصيدلاني

انطاها العلاج وعلمها عليه علاج نسائي
ومقويات ومنشطات للحمل

رجعنا لدارنا بتلفات الدنيا

أعاين جهالها سارحين بالشارع وياهم فرقه مال جهال
ولعبهم عياط وصياح وفرحانين من كل كلبهم ...

جلبت بيه ادخل الدارها
اشرتلها على حمزة .
هي تعرف ما يرضه
بس حك عليها تجلب بينه وتريد تضيفنا
على كولت اهلنا كلمة التنكال .

عاد لليل مرت عليه...
والصدك ليلي موحش من دون سوالفها وهوسة جهالها

من تجي حمزة يطلع يكعد يم زلم الجيران بره

شو طلعتلي علاكة العلاج النسائيه

:- هااا أحليمه شسوي بي

- تنوعي ليه،،هاي الوصفه لبنت الحجيه الاشتغل عدها
هم ما عدها ضنه ،،
والدكتوره التراجعها خوش دكتوره بس مغلوانيه
وصلوات على محمد حبلت على ايدها

انا اختج بكت الوصفه من عدهم
و اشتريتلج نفس علاجها
وباجر اردها الهم ...لا من شاف ولا من سمع

- ياااا وشلون يصير اخذ نفس العلاج

- خااايبه ما سمعتي الدكتور شكال
هو كله مقوي ومنشط ما يضر
بس هذا شطفي بي خافن عندج ألتهابات
وهاي العصاره من تخلص بعد لا تعيدها

وهذا الكبسون أهم من ذن كلهن
شسوين بدون علم رجلج
دكيله يوميه حبابه وخليها إله بالجاي بالأكل بالمحلبي
انتي وشطارتج .

وانا كلي يقين راح تحبلين عليهن

- اكلج أحليمه بس حكهن غالي

- يا بووويه ،،، خااايبه انتي ولا جنج بنت خير
كلشي ما ترضين تاخذين مني
غير انا أختج ،، والخوات لبعضهن

تنوعي ليه ،، حتى لا تنغثين وتعدين انا مفضله عليج
من تمشين لاهلج أخذي شبير وياج
مو أخوج دكتور فروخ
بس خلي يكشف عليه
انا أخذته لمستشفى العام وكشف عليه الدكتور
كال :- يحتاج عمليه يلا يحجي
بس انا خفت عليه وهم جان صغير
بطلت وكعدت عن حاله ،،
بلكت الله والعباس اخوج يعالجه ويكوم يحجي خطيا

- هاي سهله أخوي يونس شاطر خوش دكتور
واذا ما عرفله اخلي ياخذه لغير دكتور

وخلف الله عليج من تساعديني

- خااايبه وكرص
عليمن خلف الله عليه ،، غير اختج انا ...

وصدك تمسكت برحمة الله وبلشت أخذ العلاج

وهي علمتني أغسل واتنظف دوم بملح ما يخلي التهابات.

وحمزة يوميه بليل اسويله فد شي حلو
لو كاستر لو محلبي لو حلاوة تمن لو حلاوة تمر
هجي شي كد ماعون واضيع الحبايه بي

هو بعد هذيج الدفره ما ضربني ولا مد إيده عليه
بس شنو عصبي وروحه بخشمه يعارك ذبان وجهه
ومكابلني وكاعد مخلصيها عراك ...

أحليمه سحبت البيكم من أبن أختها
وسلمتها أمانه بيد حمزة
وعلى حب الله يناوشها كل رأس شهر هل قاسمة الله

حمزة بي طبع من يريد يسوي شي ما يحجي
كله عنده :- بالكتمان بويه بالكتمان
لازك بهاي الكلمه كلشي عنده بالكتمان

من اخذ البيكم...جي حاجاني
يريد يشتغل بيها دوار بغراض الدور (عتاك )
وبتفكيره هذا الشغل خوش بي رزق وكلشي يتحصل من عنده،،،بس محتاج جم فلس يستفتح بي الشغل

بيني وبين نفسي ردت اداين من أحليمه
بس بعدين بطلت ،، شلت محبسي وناوشته
:- هذا بيعه واشتغل بفلوسه والله كريم .

وظل الليل كله مخلي المحبس بيده ويعاين علية

الفجر كال يالله وطلع للشغل ...

ويطلع هي الطلعه لليل وهو ماكو
ظل بالي عليه ..

والله جي بوكت متأخر وجهه ضاحك
بشرني محصل رزق
صح قليل بس ميخالف نصبر والله كريم ..

هو سبع وشاغول مندل مخازن الدواره
ومتعلم شلون يصرفون الأغراض اليشتروها

وطلع (حمزه) صاره مده يسأل على هذا الكار ومفتهم دربه

والحمد لله بلش يشتغل دوار
بس شنو ما يقبل أكول شنو يشتغل
واذا سألتني أحليمه أكول:- يشتغل على باب الله
ويحمل مخضر من العلوه لاهل السوك .

وصدك ثبتلي هو راعي دار
ونيته صافيه ويايه
ويريد يوفرلي كلشي ويعيشني بالحال الزين

مثلا حصل تخم نص عمر جابه النا ... وتركه
من اشتغل بعد وطلع حكه
أخذه للنجار صلحه وعدله وجي نصبه بالربعه

وشيحصل شغلات نص عمر من البيع والشره
يجيبه النا ... ويصبر يطلع حك مشتراها
ويعدلها ويصلحها يلا يقبل استعملها

فراشات ،، زوالي ،، بسط
حت مواد غذائية يشتري
غراض دار كلشي يحصل
التعبان ياخذه للتصريف يسونه إعادة تدوير
والزين لو نص عمر يصير حصتنا

وهجي استمر شغله ،، يطلع من الفجر
ما يجيني لليل ،، يجيني ميت هلكان من التعب .

يادوب ياكل لكمه وينام جفي
حت مو هلكد يسولف ما عنده قوة يحجي .

أني ما ضميت على أحليمه شنو يشتغل
وحك الله ينكال هي فرحتلي

وخوش علمتني
كالت :- تنوعي لا تخلين بيده الفلس
دوم أخذي منه وضمي
جمعي ولا تنطي
ولا تكليله هلكثر جمعت لو هكثر صارن

ترى هذول عدهم طبع لو صارت بظافرهم أطحين
لو يعرس مره ثانيه
لو يشتري سلاح يعارك بي الوادم من يطكه الشرجي

وخليلج مضمامين ،،
واحد خلي يندله وكبال عيونه
بس هاا خلي بي الشي القليل

والمضم الثاني لا هذا تلفي عنه ،، وخلي مال خنك
كون من يطبله الفلس بعد ما يطلع

ومن يجيج بليل خلي كباله وين اللحمايه الجبيره السمجة الطيبه ،، اللكمة الزينة تفتح نفسه

والصبح لا تخلي يطلع بدون ريوك ..

والسفرطاس دوم خليها بيده
النهار طويل ويرادله لكمة نظيفة

ومن يجيج بليل لا تغثي عليج بالكلمة الطيبة
والضحكة الحلوه .

بس أرجع واوصيج لا تأمنيله راقبي

والله يوفقكم ويرزقكم من واسع أبوابه...

وصدك سمعت كلام أحليمه
وبلشت أخذ من عنده وبرضاته اجمعله
وأخلي الفلوس بالكنتور كبال عيونه ..

بالنهار أركض أطلع نصهن ...
واضمهن بجيس وادحسهن ويه المواد الغذائية ...

ومداريته بكلشي ما مقصره بحقة ..

و الحمد الله يوم بعد يوم يحصل رزق ...

بعد مشكله الحمل ،، خلصت علاج أحليمه وما حبلت

هو بالنهار ماكو يطلع للشغل ..
وتاخذني أحليمه بهذاك العصر للدكتوره
خطية جت من وكت علمودي ..

كشفت عليه الدكتوره كالت عندج ألتهابات كلش قويه
تمنع الحمل .. كتبتلي علاج

وبين ما رحت ورجعت يمكن الف إيه قريت
خفت حمزة يرجع للدار وما يلكاني
وتصيرلي مشكله ...

بس الحمد لله نيتي صافيه وعدت هاي الطلعه على خير ..

بلشت أخذ العلاج الجديد ..

أحليمه كالت :- لا أنتي مجبوسه وهل ما تحبلين
أمشي اخذج للكشافه نعرف شعندج

وتاخذني للمراه الكشافه
شافتلي كالت:- عليج تابعه ما يصير عندج حباله

انقهرت من سمعت منها هذا الحجي

أحنا راجعين للدار أحليمه مرت على فد دار
طلعت علينا المرأه وهذاك السلام ولسانها اليخبل
وعرفتني أحليمه عليها
طلعت مرت المطهرجي مال جهال الديره
شو وصتها على سبع قلفات مال طهور الجهال ....!!!

ظليت فاكه حلكي شسوي بيهن

أستحيت اسألها كبال المرأه
من رجعنا للدار سالتها
كالت :- هذن تغسلين بيهن يفكن الجبسه
ويكطعن نفس التابعه ..

ما عدت يومين ثلاثه وتجيني المرأه
خطية جامعتلي القلفات بكطنه...
تشكرت من عدها ..

ويامن يجيب الليل حت تجيني أحليمه

والله تسرسحت وره وذان العشه هي وجهالها

كالت :- ظميهن بأجر اجيج من وكت
كون كبل صفار الشمس انتي غاسله بيهن.

وصدك ثاني يوم العصر تجيب بنيه شابه وياها
ورب العزة ما أعرف أحد هنا غيرها
وهي ما مقصره مختار المنطقه ما يحلكها
معوضه عني وتعرف كل العالم هنا .

توكلت وكلت يالله ...
اول شي دخلت سبحت سبح عادي
وانوب دخلت عليه البنيه الغريبه
وتسبحني بهذن القلفات السبعه
وياهن بالطشت سبع مفاتيح شمرتهن أحليمه
وهي البنية تكلي :- يا حبسه
ولازم اني اجاوبها :- فكي الجبسه
ونعيد هذا الكلام سبع مرات
وهذا الشي اكيد تعلوم أحليمه

وعدت الأيام...نفس يومي ونفس نظامي

بس شنو كمت ما أحمل حر البصره
والشرجي يعصر روحي ،، يكطع نفسي
اتخربط واوكع ... اتمدد على الكاع

وربي راحم بحالي تقريبا أكثر النهار سكنه يمي
من اتخربط هي تحير بيه

مبردتهم بقت عدنا ... مشتغله ليل ونهار وماكو هوا

وما اهجس على يا دقيقه تروح روحي
وانمد بالكاع أريد البروده ..

أحليمه كالت :- شنهي الجو جديد عليج
بس يمكن حبلتي ...

ونكعد أحسب أني وياها هجي يادوب معديتني الخبيثه على كولت حمزة أيام ...

يا يمه يا فرحتي ... تأملت خير

كالت أحليمه:- بأجر نمشي للدكتوره ونتأكد
لا تبشرين رجلج الليلة خافن ماكو شي
وينقهر خطيا.

يمه شيجيب بأجر ،،، الليل كله أفكر
واتأمل خير ..

طلعت الظهر أني وأحليمه للدكتوره
وأحليمه سباعيه بالخفيه تناوش السكرتيرة بغشيش
حت لا تأخرنا...

وكتبتلي الدكتورة على تحليل حمل
واطلع صدك حامل ....

يايمه يا فرحتي تمنيت حبايبي يمي وابشرهن
وافرحهن ويايه ...

بس دخت من فحصتني بالسونار كالت:-الج شهر ونص
أني من جيتها هذيج المره الفاتت
جنت غاسله من الدوره وجايتها
معقوله بساع حبلت وكبل لا اكمل علاجها !!

انوب ظليت أفكر خاف هذا العلاج الاخذته
مو زين على الجاهل...

رجعنا لديرتنا تلفات الدنيا

يمه وانصك من الخوف...

حمزة راكن البيكم بالباب ... وهو كاعد براس الركن
ويه جم واحد من الزلم الكاعدين ...

- عزززة وصخااام أحليمه شلون دبريني

- لا تخافين صارلج مده ما مدبغه روحي اخذي المقسوم ،،،هن جم راشدي على جم دفره أتحمليهن
وكامت تضحك على حظي .

فتحت قفل الباب ودخلت للدار
بس شنو قلبي يدك بسرعه من الخوف...

وره شويه جي حمزة
وجهه مكلوب وينافخ
- وين جنتي...؟؟

- الله يساعدك

- شوك وين جنتي ؟؟؟

- يااا غير أخذتني أحليمه ومشيت اجيك وضع إبنك
بعده بكد النتفة وكضاني كضيان على كولتك

صفن بوجهي،، اشرلي بيده يعني شنو

- حامل أني واليه شهرين
والدكتورة كالت جن بيج ولد
وهل توكعين وتتخربطين لان حمل الولد يفرق عن البنية...ومن هسه أكلك نسمي مصطفى

فشت أعصابه..وضحك
:-عليج الكفيل صدك تحجين لو تقشمريني

- وروح أبوي حامل
وأحليمه انقهرت عليه اخذتني للدكتوره لان اتخربط
كالت :- خطية رجلج يطلع على باب رزقه ما يلحك ياخذج..واخذتني بالكوه غصبا عني اني ما رضيت
بس هي بالكوه اخذتني ..

والحمد لله طلعت حامل
والدكتورة بشرتني بخير تكول بلكت يطلع ولد .

يمه لحد ما ضحك وراحن خيوط خباله
الا أني زعت العافيه،،،

كمت اجيب والزك بالحجي ،،واجذب عليه ،،
ورهمت وياي سالفه الولد
اعرفه يريد ولد لان إخوانه كل خلفتهم بنات.

بس شنو أني كمت اخوفه ...
هو ما يعرف بهذني الشغلات
بس أني سامعه من باجياتي يعني عندي معلومه
التقرب مو زين على الجاهل
من يتقرب عليه أسوي نفسي راح أموت
واتأذه ،، وبطني توجعني وخاف يصير شي بالجاهل
لان هو يوميه يريد
وما يقتنع اذا احاجي بالعيني واغاتي
أطلع بهذا الدرب حتى يتقرب بهدوء ،،
و ازاغل وياه ...
وتوصل قدرة تحمله بين يوم ويوم،،
لو بين يومين وثالث
بس ميخالف احسن حتى احافظ على حملي ...

والف الحمد لله والشكر لله مشت أيام نساوتي بتعب
بس ميخالف تحملت في سبيل فرحتنا .

وخلف الله على أحليمه وسكنه هن دارني

حمزة بعد من هذيج دفرته ما مد إيده عليه وضربني
بس شنو لسانه ما يسكت
وحك الله ينكال يوم زين ويوم لا ..

ويوم بعد يوم عيشتنه تتحسن
صح مو ذاك الحال الزين
بس وين جنا وين صرنا ...

واول ضميم طلعته جبرت حمزة يجرلي كهرباء
بعد ما أكدر أتحمل الحر والشرجي ،،
وباجر يصير عدنا جاهل شنو ذنبه خطية يتفركع .

وهم أحتاج ماي بارد ،، ثلجايه
كلساع ادك الجينكو على أحليمه ادزلي قوطيه ثلج بيد الجهال .

أنوب هنا بالبصره أهجس الصيف ١١ شهر
وشهر واحد مقسوم بين الربيع والشته .

كلت الحمزة الكهرباء وماطور الماي أهم من كلشي
والله كعد يومين من الشغل وجرلنا الكهرباء
الف الحمد لله اجتنا النعمه ...

وجي عاشور بهاي سنه بدايه شهر الرابع
وأني دخلت بشهري

حمزة جاب مترات قماش أسود ودكها بالربعه
دلاله على الحزن وإقامة العزاء للحسين الشهيد

الحمد الله من ربي هداه وقبل اطلع ويه أحليمه
نمشي لدور الجيران نحضر مجالس العزاء

أنوب أني ثكيله من حبلت سمنت
شكد جنت ضعيفه بس من تعديت الشهر الرابع
كمت بيه وما أنفخ ...بس جسمي صار حلو
يعني مو هلكد سمينه بس استعدلت .

أحليمه وسكنه يسوحلن بيه من نطلع
ميخالف أقبل اتعب بس المهم اطلع

ورب العزة أفرح بالمجالس
انطلق بالسوالف ويه النسوان
واتعرف على نسوان الجيران ...

العصر حضرت مجلسين ورجعت للدار
تعبت ،، هجست الجاهل صعد على كلبي .
حاررره وبوخه تخنك ..

دخلت سبحت بماي بارد ..
لبست دشداشه مرتبه ...
كل ملابسي بعدهن أنظاف اني بطبعي أحافظ على كل حاجه...

مشطت وتركت شعري محلول ..تكحلت
و تعطرت ..

داري نظيف والحمد اترتب احسن من كبل
عندي تخم قنفات...بردات زينه..فراش كاع نظيف
كهرباء موجوده أضويه ومروحه ومبرده

ريحه البخور تعط ،، أحليمه تجيبلي وياها
وآني أمشي وابخر أحب الريحه الطيبه

تمددت على هوا المبرده...

للمغرب دخل حمزة مستعجل
رجع من شغله ...

الله يساعدك عيوني ... كمت عليه وباوسته
علمته على هذا الطبع ،، من يجي من شغله
اتلكاه واباوسه ...

- يسعد بختج يا بويه
بس ستري حالج إبن عمي بالباب ...

- هلااا بي ..

دخلت للكبة استغربت حمزة ما عنده أقرباء هنا
منين جي هذا إبن عمه ..

سمعت صوت رجال غريب ينادي بصوت عالي
- يا الله،، يا الله

السلام عليكم بويه

يحجي بصوت عالي،، بس آني جوة خاتله بالكبة

وحمزة يرحب بي وصوته فرحان بجيته ....

دخل عليه للكبة :- شوك بويه حجابج على راسج
وطلعي سلمي على ابن عمي

- وين لكيته

- هو حصلني

- ما أفتهمت

- هو جاي يسأل عليه يعرف اهلنا عدهم كويعه هنا
وناشد المختار عني ،، ومدلي على حوشنا
ومن جيت لكيته ناطرني يم زبون الحلاق

- الف هلا بي ومرحبا
بس شعجب يسأل عليك

- يااا بويه وكت اسالتج والزلمه كاعد وحيده
جا ليش ينشد عني صارلي دهور مختفي عن أهلنا
وعمامي تبعوا اثري يردون يوكفون على مصيري.

- الف هلا ومرحبا بي

لبست ربطتي وطلعت عليه ..
رجال متوسط العمر
أصغر من عمي شبيب ...

اكلني اكل بلسانه الحلو وهذاك السلام

وحمزة طاير بجيته يرحب بي ..

أني اهتميت زايد بحمزة
أريد أبين للرجال ( الخطار ) حمزة عايش مرتاح ...

لا قصرت ويه الخطار من ضيافه
وعشه زين
وكلام طيب

ولا قصرت ويه حمزة ..كله أنادي أبو مصيفي
وعيوني .. وفدوة اروحلك
وجهزت إله الحمام
وطلعت إله الدشداشة الزينه

حت هو اهجسه فرح بهذا الاهتمام الزايد كبال إبن عمه ...

الرجال مبين خوش رجال
وينادي :- بويه و بويه

وبليل أدور علينا أحليمه وجهالها

وشبر وشبير وجويرية بره يمهم لعبوا طوبه
وآني وسكنه و أحليمه كعدنه بالمطبخ

والله للصبح ويروح الرجال ( الخطار )
دعالنا بالخير
لسانه يخبل وسوالفه حلوه

بليلة المحيه
يعني باجر يصبح يوم الطبك ( ١٠ عاشور )
أحليمه نصبت قزان الهريس على الحطب
أحنا نسمي عيش فاطمه

والليل كله سهرانين على طبخ الهريس

حت حمزة شارك بالطبخ وجاب وياها حنطة
وجاب دبس للوجه بساعة التوزيع

وسبحان الله أحليمه عادت عليه نفس الحجي
:- اطلبي مراد من الحسين لشغله كلفه عندج
وآني اسوط بالجدر،،،
ما ذكرت غير أخوي الحيد وشدته ،،
رايده من الله بس ساعة الفرج اله والشفاء العاجل
وبعد كلشي ما أريد من الدنيا .

للفجر وزعنا الثواب ...
وآني شاركت تعب أخوي بالثواب
وطلعت كل المواعين والكاسات الجابهن بتعبه
وجانن يزهن بداره وأساس مطبخ عايلتة..
وزعنا بيهن الهريس .

تمددت الصبح وغفيت
بعد تعبنا ،،، تركنه المواعين والقزان للعصر نغسلهن ...

فزيت الباب ادك بقوة تفلشت علينا ...

حمزة متمدد بصفي ،، كعد مخروع
حسباله جماعه الفرقه الحزبية جوي علينا
هم ما عدهم اعتراض على المجالس هنا
لو على طبخ الثوابات وتوزيعها با آيام عاشور ،،،
بس بين فتره وفتره يجون هجي شلون الكشف
جيب هويتك وين تشتغل ...

طلع حمزة للباب يركض
خطية لابس بس السروال الأبيض

يمه وأسمع صوت إخوانه
أبو علاوي ،، وأبو جواد يتعاركون وياه ...!!!

طلعت عليهم ،،
يمه أعاين بيدهم مكاوير
وحمزة يشاكف بيده ويدافع عن روحه من ضرباتهم

-
-
-

ولنا لقاء قادم أن شاء الله
+++++++++++++++++++++