༺༺༺༺༺༺༻༻༻༻༻༻
حلقة (49)
#جُمِّلْت أخلاقها
✍🏻كاتبة الجنوب
____________'بسمه تعالى ________________
صرخت منو انت وجسمي كله يرتعش كلت هاي هي رحتي بيها يا آمنه،
بديت استدير شوي شوي
وأتخييل شكله!!
وايده باقيه على كتفي التفتت..
والگا جويسم اخذت نفس وزفرته اريد احرك حلگي وانطق بكلمة ماكو وريجي يبس غمضت عيوني بعدت ايده من كتفي تنهدت
_هذا انت
_ ابااه اباااه
_شصخم هناا شكعدك امشي امشي همزين ما وكفت گلبي طاح حظي على هيج بيت سحبته من ايده ميقبل يمشي وبقى ايصيح
_ ابااه ابااه!!
ويأشر
شتريد يمصخم باوعت مكان يأشر عليه لكيت نعاله مگطوع ميكدر يمشي بي، غميت كصتي دنكت واخذت نعال رهمته شلون مجان
_يلا امشي گدامي
بقى يحجي وكلشي ما افتهم بقيت بس اهز براسي، مشيت وهو يمشي وراي
مسكين اليحجي ويعرف كلش زين الناس ما تفتهم الحجي مالته بس يبقى مُصر،
يحجي .. ويحجي
عسى ولعل افهم منه كلمه !!
_بس تدري يا جويسم صح ما افهم عليك شجاي تحجي بس على أقل طلعتلي انت مو شبح وهم مليت عليه المكان هسه لو وحدي غير ولا امشي مشي اركض ركض!!
وحاطة گلبي بشيشه من رعب ههه عود حاطتلي خوش حماية واحد مخبل يلا المهم طريق رجعة سهل لإن طلعت بطريقي، شعندك طالع بهل ليل
صفنت اكيد حاله من حالي شهل سؤال الغبي صار هدوء ماله صووت التفتت هاا سكتت وتفاجأت ما لكيته هذا وين راح معقولة دخل للغرفة وآنا ما شفته!
اوو والله عجيب امرهم هاي عائلة مشيت بخطوات سريعة وصلت للغرفة سديت باب حيل اخبث على ابو گشرا
فتح تگ عين ونطق
_هاا رجعتي ما أكلوج الأشباح
_لك آنا بت بندر اخاف!!
_لا ابد مرحتي تركضين
_لا
_اي عفيه هيج اريدج
_ادري تريدني نار گبرا تلهب لهب
_زين حفظتي درس تعاي نامي
اجيت يمه تغطيت وداخلي فرحان مسويه فد انجاز جبير
بس ما ادري حفظت درس زين لآخر عمري..
رياح باردةو السماء غائمة
صوت زغزقة العصافير
مع صوت تحريك الأشجار والنخيل
واختلاف لون طبيعة ليعلن عن قدوم فصل الشتاء،
احب هيج اجواء طايرة اركض ويه رياح فرحانة واقرا أناشيد حافظتهم بالقراءة ونورس تركض وراي متلحگني وأضحك عليها لابسه بدلة نص ردن وفرحانه لأن احس برودة واخيراً خلصنه من حر الصيف
الفرحة ما واسعتني وانا أقطع مسافة بعيدة بين خضار اركض واغني اباوع بيتنا صار بعيد ونورس بعدها بنص طريق وآنا ما حاسه بنفسي ضحكت والوح بيدي نورس تعاي
وما اشوف غير امي تأشرلي ارجع اوووف يا يمه وآنا اريد نورس توصلي وانتي ترديني أرجع تأفأفت ورجعت هم اركض واركض الى أن وصلت ل امي
_هاا يمه شتردين
_الجو بارد تعاي لبسيلج شي لا تتمرضين
_لا يمه حلو خليني ما بردانه
_لا تعاي جيبي اختج طلعتلكم ملابس شتويه
تنرفزت وجريت نورس يلا امشي ندخل للبيت،
دخلنه لكيت امي مطلعة ملابس شتوية وترتب بيهم لبستنه واحنه فرحنه بملابسنه شتوية ليگول جدد
_يلا اخذو كيون وياكم ولا ترحون بعيد خاف تمطر زين، بسه انتي جبيرتهم
_اي يمه ما اروح بعيد
نورس: ماما بته تروح منات تلش بعيد!!
_اي اعرفها هي وين تبقى مكان واحد توصل آخر الدنيا
_لا يمه ما اروح امشي نورس كدامي
كبرت نورس بس لسانها مكسور حرف سين تلفظة تاء هادئة بس من تعصب تنگلب وحش علينا
آنا جبيرتهم ومسؤوله عليهم
شنو اسوي يقلدوني شفت بزونة على سياج تركض وبقينا نركض وراها وهم اشوف منو اسرع آنا لو هي، كيون كل شوي يبجي لو يركض ويطيح
شلته وبقيت اركض سريع جان اعثر واطيح آنا وكيون
زاد بجي كيون وعلة صوته واجت امي تركض أخذت مني كيون الي نشگت كصته وصار كله دم آنا هم تأذيت بس ما حاسة بالألم بكثر ما خايفه على كيون مو لأن متأذي بس خايفة من ابوي لأن آنا سبب بطيحة كيون بقت امي تسكت بي وتصيح عليه
_شايلته وتركضين بي همزين ما موتي الولد شكول لبوج لو عرف
_يمه حبابه لا ادكولين ابوي يضربني
_من شلتي ما خفتي من ابوج
_والله ما ادري راح نطيح
_مرة ثانيه لا تعيديها
_والله آخر مرا بس لا كولين ابوي
سكتت،، وآنا طمأنيت أخذت كيون لعبته وكل شوي بايسته
نسه طيحة وبقى يلعب ويانا، صار غروب ودخلنا وابوي هم خلص شغله ودخل اول ما يدخل يغسل ويلبس دهداشته
يأذن الأذان يروح يتوضأ ويفرش سجادته واحنه ورا يقرا بصوت عالي وآنا اردد ورا ونورس وكيون ماخذين نفس الوضعيه صلاة، جنت حافظة آيات الي يگولها بالصلاة وآذان وآنا بطبعي سريعة
بالحفظ وحفظت الصلاة، بس بقيت اصلي ويه ابوي نخلص من صلاتنا ونبقى ننتظر امي وطبخاتها الحلوا كلش احب شتاء وخاصة مطر،
تمطر واحنه نلتم داير مداير ابوي نكمل أكلنا ونروح نغسل يترس الطاسة ماي واحد ورا ثاني يغط ايدينه بالماي وياخذ صابونه ويفرك ايدينه بالرغم احنه مو صغار ونگدر نغسل وحدنا بس هو ميقبل يضحك ويكول يلا اشوف نظافة ايديكم ويشمها وايكول الله هسه صرتو نظيفين،
ظلمة وزخات مطر قليله وبين مكان الغسيل وغرفتنا مسافة بعيدة، بقى يعبرنه واحد واحد يخلي جاكيت على روسنا ويركض للغرفة، امي تعلگنه صوبه ونكعد داير مدايرها ندفه، تخلي حب شمسي اصير حار وتطلع ريحته جنن ونبقى نكرز حب وشلغم على نار ويبدي ابوي يقصنه قصة
كان يا مكان في قديم الزمان
بين إنس والجان اجتمعو الشبان
من بين هل شبان ولد فقير يسرح
بالخرفان
لا هو غني ولا يعرف بالمرجان
لمح بت ملك ورف گلبة وصار العاشق الولهان،
طلبها من ابوها الملك وليان،
ضحك عليه وطلب منه أطنان
الذهب والمرجان،
انكسر گلب العاشگ الولهان
ورجع خايب الظن
ويفكر شلون يجمع الذهب والمرجان
وفجئة عثر على فانوس بالطين و الوصخ مليان
مسح فانوس وتفاجأ بالمارد النبهان،
اطلب وأتمنى ايها فقير غلبان،
طلب ذهب ومرجان!
وبالسمع وطاعة استجاب المارد نبهان
فرح شاب وذهب الى ملك وأخذ ابنته
واصبح ذلك الشاب الفقير ملك ذو اربع وليان
وخلصت قصتنه يا اولادي يا حلوين،
ومنشبع بقصة وحدة ونطلب منه قصة ثانيه ويبدي قصنا الى أن ننعس ونام
ونصحى على صوت سوالفهم وريحة الخبز مالية المكان وناكل ونشبع ونتوجه لمدرسة
_يمة والله باردة شوفي وطين ما اروح
_يباا لازم تتعلمين
_شراح استفاد.
_افتخر بيج لو وصلتي مرحلة
يباا الما يعرف يقرى ويكتب مثل أعمى ايصير، جيبيلي جويرباتي اروح لگاعي
أخذهن يلبسهن وجان يندگ الباب
_يا ستار منو ذاكرنه من صبح؛
توجه ابوي يفتح الباب وامي راحت ورا،
_سلام عليكم
_وعليكم السلام هلا ابني هبار خير خو مابيك شي
_لا عمي مابيه شي
_جا شسالفتك جاينه من الصبح
_اجيت آخذ جناسي مالتك ومالت بتك اريد اكمل معاملة حتى نمهر
_الله يقدم البي خير ان شاءلله ابني
_مشكور عمي
_تعال تفضل بين ما طلعهن عمتك
_لا والله عمي مستعجل
_اي خو ما تبقى هناا تعال، تعال،
_سلام عليكم عمة
_وعليكم السلام هلا ابني.
_ولد مستعجل روحي طلعيله جناسي
_هاا راح تمهرون
_اي والله مكمل اموري نمهر وراها نزوج
_بس گلونه حتى نحضر روحنه مو تحددون الموعد يلا تحجون
_عمة خصم الحجي حضرو روحكم ما اطول ، بيتي كامل، واهلي تبرعولي بجم فلس بس اخلص اموري نزوج
_الله يقدم البي خير
_مشكورة عمة
_تفضل هاي كل مستمسكات يردونها شوف اذا بيهن نقص
_لا هاي هي
_يلا من رخصتكم
_هلا بيك
ابو سالم مو جنه خوش ولد وانت ضنيت بي شينه
_العلم عد الله بعد هي وحضها، من ناحيتي ما ارتاحله
_كول يا الله وان شاءلله يطلع زين
_ان شاءلله..
حور: آخر واحد سليم يطلع من بيت يروح للدوام هذا اختصاصة بيض اذا مياكل بيض ميروح ولازم يزور دجاجاته كبر هل ولد وبعده روحه بالدجاج معشعش يمهم
_يلا سليم جاي برد
_اي جاي جاي
_مشبعت منهن
_شتردين، روحي حضري ملابسي
_مو راح يدگ الجرس وانت بعدك
_اوو صايرتلي مدير بالمدرسة عندي مدير هناك وبالبيت هم مدير
_يلا بسرعة
بين ما يشبع كلش يلا يروح ويجي يبدل على سريع وياكل ويروح، عنده بايسكل يصعد عليه ويروح،
كبر اخوي وصار بالأعداديه افكر بهل ولد من ازوج منو يلبي طلباته دجلة لو وجدان الله يكون بعونه ويحنن گلبهن عليه بقيت انظف بالبيت ومن اخلص اشغل تلفزيون وعلى ما تكعد دجلة تبدي بتحضير الغده وهاي كل يوم هذا حالي، بقيت كاعدة لساعات على تلفزيون لهناك ندگ الباب
رحت طايرا افتح الباب وستغربت من لگيت ضحى
_اول تالي ضحى جاية صبح
_عيني بكل اوقات تلگيني موجودة
_يلا تعاي اليوم مخليج طلعين
إلا العصر
_لا عيني جاية آخذج واروح
_اي مو تايهه الج
_لا عيني
_اليوم شكو تحجين كله بعيني وعيني
_والله عاجبني يا عيني
_ضحى تحجين عدل احسلج
_هو انتي مو مال دلعات وحبجيات مال سب وشتم
_لأن هذا متعوده عليه ويطلع منج
_عود گلنا صرتي عروس بعد جم يوم وتودعينه نحجي وياج بكلام حلوو
_ايبااه من شوكت صايرة هيج
_منا وجاي
_بيها الخير
_دجلة وين!!
تمشي ودور عليها
_بالمطبخ شرايده منها اليوم
_اصبري
رحت وراها وبس اريد اعرف شعدها ويه دجلة
_يابه شلونج
_هلا بيج ضحاوي حبيبتي
وبقت تحجي وياها ودجلة اذا حجت بعد جيب اليسگتها، وندمجت بسوالف ويمكن نست شعدها ويه دجله اخر شي ختمتها
_اروح لا تحجي عليه امي
_ابقي تغدي يمنه
_لا والله يا دجلة ما اكدر مو اليوم غير مرا، بس اليوم اجيت آخذ حور وياي.
نططت عيوني هاي شبيها!
_هاا متفقات
_لا هاي كدامج گلت حتى حور ما تدري بس بيني وبينج اليوم بنات عمتي مجتمعات واختي هم عدنه گلت اجي آخذها خلي شوف لمتنا قبل لا تزوج
_يلا اخذيها تغيير جوو مثل مگلتي قبل لا تزوج ومشوف لمة
_اي
بس آنا ما اري...
ضربتني على خاصرتي
_اششش ولا كلمة امشي غيري ملابسج كدامي
_روحي حور
_وانتي تبقين وحدج
_شعلي هسه يجي سليم
_يلا لعد حور
دفعتني لا طلعين حجج
رحت غرفتنه اغيير ملابسي
_ضحى اليوم مو خاليه كولي شعندج
_شعندي وياج ما عندي شي بس اكو ناس دزوني عليج
واله اجي علمود استاذة حور
_عليج الله كولي منوو
_رافد
_جذابة
_وليش حتى اجذب
_غريب شيريد مني
_والله ايكول خلي تجي وتنتضرني بنفس مكانه..
تلخبطت دگات گلبي وعقلي ضل يتخيله شيريد مني
_ضحى يدري بيه انخطبت
_اكيد، ليش مثل هيج خبر ينضم بربج..
_اي صح ما ينضم
بقيت صافنة شلون راح التقي وياا شگولة وآنا اخر مرة شردت منه وخليته بحالة مأساوية
_يلا حور يلا فضيها.
_ضحى اذا تدرين شيريد مني كولي حبابة
_والله شعرفني بس گال روحي صيحي حور وهاي اجيتلج
_ومرته!
_بعد انتي راح تزوجين شتحجي بعد
صفنت شيريد مني رافد
_ولج ضحى تتوقعين ام سمر حاجيتله بموضوع اخوها والسوته بيه
_لا طبعاً اذا گلتله مراح يخليها لحضة بالبيت
_انتي ما شفتيها بيوم خطوبة شلون متندمه.
_شيفيد الندم سوته مو شويه
يلا كملي
_يلا نروح ونشوف سالفة اخوج
لحضات وطلعنه من البيت وهاي متجهين بيت ابو رافد البيت جنت مسويته معبد وعابدته عبادة من كثر ما اروح وارجع عليهم، التزمت هدوء بس ضحى تحجي وآنا عقلي وگلبي يمه شتريد مني يا رافد
وصلنا للبيت سلمت على عمي وعمتي وبقيت اسولف وياهم بس بالي يمه صاحت عليه ضحى تعاي مو نسيتي نفسج وانتي سولفين ويه امي، وهذاك مسكين ينتظر
_وينه...
_والله شعرفني وين مكانكم السري.
ابتسمت ورحت كدامها
_هاا تجين وياي.
_لا رايدج الج
لوحتلها بيدي باي وتوجهت مبتسمه وآنا أخطي خطوتي لحبيب گلبي وأكحل عيني بشوفته رجف گلبي وانا اشوفه واكف ويقلم بلشجر لابس قميص مخطط وبنطرون وحتى وهو بلبيت هم نازگ ومرتب!
نفس المكان آخر مرا ودعني بي وصابني ثول وكلت كل مشاعري ، امشي مستحيه ومعرف شحجي وياا شافني بقى صافت ونرسمت ابتسامة على وجها..
_شلونج يبت عمي
_زينة الحمدلله.
_ايكولون كبرتي وصرتي عروس.
_اي مثل مسمعت
_زين لحگت عليح قبل لا تزوجين
_وليش
_غير اودع بنيتي قبل لا تزوج كبرتي يل فاهيه وصرتي زوجة وبعد كم يوم اصيرين أم
تنهدت وآنا اكله
_هاي حياة،
_تبسمي ربما ألقى هنا أملًا، أو
ربما وجهُ هذا الحزنِ قد يُنفى
تبسمي كي أرى في غربتي حلمًا
ألقى بهِ وجهيَ المقبورَ في المنفى
تبسمي ليش هيج متوترة وتحسسيني جايبج غصب اريد اليوم تگضينه وياي مثل يوم جنتي طفلة يا حور هيج طفرين كدامي وسويين مصايب وتجيلي، تجيلي خايفة
_ومتخليني اطلع من يمك اله وآنا فرحانة وضحكتي تارسة وجهي علمتني عليك يرافد بس هسه حور مو نفسها ذيج طفلة لا كبرت وضلت متخاف من أحد.
_متبجي وما تذكر هذاك اليوم
_لا صارت قوية وهذا كله يرجع بفضلك
_مسويت شي بتي وعالجتها
_من صدك انت صرت علاجي
_اي انتي هم صرتي علاجي صرتي كبسولة حياتي وبراسيتولة عمري وبلياج انا اموت
_ليش تموت
_من المرض، الي مياخذ علاجة
شتتوقعين يبقى عايش
_لا يتمرض
_مال ثول هو مريض تردي يتمرض زايد
_لعد شگول
_فاهيه تبقين طول عمرج فاهية
_هسه انت جايبني هنا بس حتى تهيني وتغلط عليه
_لا اريد نگضي يوم حلو ونتذكر هاي فاهيه وطفولتها، حور تذكرين هاي شجرة جانت صغيرونه شوفي هسه شلون كبرت هم نفسج.
_بس انت ما كبرت نفس شكلك ابد ما تغييرت
_لج شوفي شيب تارس راسي
_بس حلو عليك
_هيج شوفيني حلو يحور
_اووو يرافد گلنا حلو وبس ما تغيرت هذا انت من يوم يومك
_عود ردت اكول "عيرتني بالشيب وهو وقارُ" اشو هاي فاهية ادكولي حلو.
_ما كلنا غير صدك، واذا ما تبطل من كلمة فاهيه اليوم اله احرك بيت عبيس
_هههه بعدج مذكرته يحور.
شلون افهمه حافظة كل تفصيله وبكل يوم يمرني طاريه ولا لحضة نسيته
_شبيج
كالها وهو مبتسم هيج ردتلي الروح وآنا مركزة بكل تفاصيله
_بيه انت
خجلت ودنكت راسي هل كلمة نحفرت جوا وكل ما يشوفني لازم ينطقها
تنهد وتقدم صوبي رفع راسي بيده
_تدرين هاي كلمة شسوت بيه آنا جبير والعاقل ورزن هزتني هل كلمة وخلتني ما اشوف دربي ليش وشلون ما ادري بس گلبي رف الج وخليتي طير فوگ ونسه شنو وضعه،
دار وجها وزفر
_شنو من عقاب هذا خلا گلبي يرف لوحدة زغيرة بعمر بتي.
ليالي وآنا افسر هل كلمة بالي وما لكيت غير روحي متعلكه بروحج اي يحور طيفج ما فاركني ولا لحضة بنية صغيرونه إطفر كدامي وآنا رويحتي خضرا بس لا حسبالج حبيتج حب طمع بالجسد لا حبيتج حب روح لروح حبيت روحج الحلوى
وحبيت تصرفاتج حبيت براءتج كلتها مرا احبج بس مو الحب معتاد عليه لأن يحب يزوج وضعنه ما يسمح لزواج وما اريد ادمرج وياي وانتي بعدج صغيرة حور لا تعتبري جرم بس الله خلق النا مشاعر وانطانه مفتاح واحنه بيدنه نتحكم بس مو بيدنه الحب نحب ونهوى ومشاعرنا لتحركنه مو بيدنه اذا ما كدرنه نتحكم بمشاعرنا مو بيدنه ، من لكيت نفسي متعلق بيج طرت للآخر الدنيا بس لكيته مو حل لأن طيفج ملازمني بس بعدت عن انظارلج وهاي انتي اليوم راح صيرين زوجة فلان شخص بس تبقين بروحي طفلة ربيتها على ايدي راح ارجع اجي لهذا مكان واذكر تفاصيلج راح اذكرج وانتي طفرين گدامي راح اذكرج وانتي ادكولين بيه انت باوعلي مبتسم صدك شنو معناتها
_اوو انت لطشت بيها
_عارف معناها وفاهمج كلش زين، طفلة جنتي ومراهقة اكيد افعالج ومشاعرج لا إرادية تنجذب لأشخاص وتحب وتنحب هاي فترة بذات تحب احد يهتملها ويحتويها وانتي لكيتي كل هاي اشياء بيه لكيتي أمان فاقدته لكيتي احد يسمعلج بس تدرين لما زدت بقراءة الكتب ودرست اكثر عرفت رجل بفترة اربعين الى خمسين من عمرا يرجع مراهق
ويبدي يعيش مراهقته
_هههه
_اي ضحكي اني شعليه لأن سمعتها من دكتور نفسي وأي رجل معاش مراهقته بصباه راح يعيشها بهذه الفترة، وبهيج اكون آنا مراهق حالي من حالج.
حور الأنسان من يروح يترك أثر ورا اتمنى اكون تركت أثر طيب وراي وما أذيتج
_هزيت راسي ب لا
_ ذكرتيني بيت شعري، عود ليش من اشوفج اصير شاعر شنو سر بيج يخليني اذكرج بأبيات شعريه
_ما ادري.
_لا اليوم حالفة تحجين كله مختصر
سمعي هاي ابيات..
_لا شيءَ يشبِهُ فَقْدَ الرّوحِ للجَسدِ
إلا افتقادُكَ مَن تَهوى إلى الأبَدِ
فميِّتُ القلبِ لا شوقٌ يؤرّقُهُ
وفاقدُ العينِ لا يخشى من الرّمدِ
_شبيج صفنتي
_طريقة كلامك حلوا وخاصة وانت ادكول شعر اصير مثل شعراء
_يعني إدائي حلو
_اي
بقى كل شوي يحجي ويأكد كلامة بيت شعري بيومها عشت ويا احلى يوم رجعلنا كل ذكرياتنا، ختمها وهو يكول
_غمضي عيونج
_ليش
_جايبلج مفاجئه
_شنو هي
_اسمها مفاجئه ملازم تعرفينها
ــ يعني مثل بالأفلام.
_بالضبط
غمضت عيوني تقرب مني ودكات كلبي ينسمعن لبسني كلادة حسيت بيها
_يلا فتحي
اول ما فتحت عيوني اجت عيني على لكلادة ناعمة ونازكة كلش حلوا
_هاا عجبتج
_اي كلش حلوا
_هاي هدية زواجج اعتبريها من ابوج او اخوج بس مو ابن عمج
_راح احتفظ بيها لطول عمري
_وانا ابقى عايش على ذكراج لطول عمري، ابعدي شكد ما تبعدين ابقى شايلج بنص روحي !
_اول مرا اسمع منك هيج حجي
_نار اشتياق تخليك طلع شكو حجي مدفون، تذكرين اول سفر الي من اجيت شلون حضنتيني هذا اشتياق..
بيومها تسحبت تسحب وطلعت من جو رافد تمنيت لو الله جامعنا بس مثل ما گال الأعمار الها دور وما اريد اضلمج وياي، الحب خاطئ اجه بوقت خاطئ
لا نكدر ننسى ولا نكدر ننجمع بقت نار شابة بگلوبنا وكل واحد يروح بطريق لأن طريق رافد يختلف عن طريق حور ولهنا وانتهت قصتي ويه رافد ذكرياته ملازمتني على طول وهديته الي بقت معلگة بركبتي
وكل ما طيح عيني عليها اتذكر موقف من رافد..
رجعت للبيت تلكتني دجلة..
_اجه العريس وما لكاج
_منو هبار
_يعني بعد منو اكو غيرا
_شيريد
_يعني شيريد غير جاي يشوف خطيبته
_وشكتيله
_بيت عمها
_دخل للبيت
_اي كعد شوي يم سليم انتضرج بس گال مستعجل وراح، اجه ايگلج حضري روحج باجر الصبح يجي ياخذج
_وين
_تمهرون بالمحكمة
_ايصير خير
_شلونهم بيت عمج وعمتج
_زينين
تشردت منها حتى لا تحجي بعد اكثر لأن رافد ثولني ثول عصرت على عقلي بس حتى ما اذكر اي شي يخص رافد، بس ذكرياته ما ناوية تهدني كعدت الصبح على صوت سليم
_شبيج اليوم ميته راح تأخر على مدرسة غير دكعديني
_طفرت مرعوبة فاتتني صلاة
_يا صلاة شمس صارلها شكد من طلعت راح ايصير درس الأول كومي سويلي بيض راح تأخر يلا بسرعة
_اي
طفرت على سريع سويتله البيض
_ادري شبيج يوم هيج متأخرة
_راحت عليه نومه
محجة شي بقى ياكل سريع حتى بدون ميكعد غسل وراح جاي يطلع گال
_حضري نفسج راح يجي هبار
_اي نطتني خبر دجلة
_يلا رايح، سدي باب وراي،
راح سليم كملت اموري على سريع، اجيت اطلع من خزانه ملابس احتاريت شنو البس بقيت البس وأنزع معاجبني شي بس لازم البس شي حلو،
من كثر ما مليت لبست اي شي اجه گبالي باوعت نفسي بالمرايا
_اي حلو
بعدني ما مكملة وندك باب
_اووف بس لا اجه جريت غطا على راسي، صح منوو
_آنا
عرفته من صوته.
فتحت شوي من الباب
_هاا حبيبتي شلونج
_زينه
_يلا ما كملتي
_بس لحضة شوي وارجع
_واكيد ما ادگدرين دخليني
_اي محد موجود غير دجلة
_يلا فضيها بسرعه
_رايحه
سديت الباب رحت گبل على غرفة دجلة دكيت الباب
_خرب إنَ، شكد تنامين كومي، كومي
طلعتلي تفرك بعينها
_هاا حور شعندج
_اجه هبار نسيتي اليوم محكمة
_اي صدك يو نسيت
_شبيج ترجفين هيج ومتوترا
_خايفة ما ادري شسوي كلشي مو ضابط
_هدي ترى ماخذيج محكمة مو لگصاب
عفتها ودخلت اكمل لبست حجابي وكملت صاحت دجلة.
_عاد حطي حمرا كحلة بعينج ماخذ عروس، مو عجوز
_اوو صدك نسيت
_اوكفي اجيبلج واجي
راحت ركض وكعدت ترسم بوجهي وهبار فلش الباب وايصيح يلا ويلا
على ما خلصتني اله هو مطعون طعن، باوعت روحي بالمرايا
_اي هسه حلوا تردين ترحين ممخليه شي،
ها شبيج صفنتي
_منو يروح ويانا
_يعني منو يروح، ترى صار رجلج مراح ياكلج
_لا عفيه استحي.
فتحت الباب وكالت يلا روحي
_دجلة، دجلة
_اششش ولا كلمة
_صلوات وأخيراً خلصتي يرادلج هلهولة
دجلة: هلهل هلهل غير عروس
_شلونج خويه، والله مليت وآنا انتظر
_هلا بيك، بعدك مشايف شي
_نعيش ونشوف، خويه لا تنتضرونها اليوم غدانه يم الوالدة، انطيت خبر العمي وأخذت موافقته
_أأأأأ شلون ما ابقى مااا
_حور عيب من امي
_معليك خويةاخذها وطير بيها بعد هي حلالك، بيباااي
دفعتني وسدت باب
_والله خوش مرا تفتهمين
_هههه الله وياك لا ترجعون للمغرب
_صار
والله لو مو عيب إلا اطلع جبار بداخلي بس مخطوبة واستحي وأصرف بنعومه
امشي متوترا وگلبي يدگ حيل
لزم ايدي، وآنا زاد توتري اكثر ليگول داخلة معركة مو امشي ويه خطيبي
_يباا كدامج خطيبج مو وحش مفترس وهيج خايفة وترجفين
سكتت طلعنا على شارع
گال ننتظر سيارة توصلنا وآنا صرت خرسة مدنگة راسي وايديه تتراجف لهناك وكفت سيارة فتحلي الباب كال صعدي
صعدت!!
سلم هبال وهو ايكول
_سيارتك ضخمه ما مبين تشتغل بيها تگسي
_اي والله ما اشتغل تگسي بس شفتكم حلوين لازميين الأيادي ومبين عليكم توا مخطوبين گلت اوكفلهم
_نتبهت هذا صوت أعرفة رفعت راسي لكيته عينه عليه يباوعلي من جامة، فتحت عيوني على وسعهم وصحت
_راااافد...
يتبع
لا تنسون تصويت وتعليق حلو مثلكم..
طبعاً أعتذر على تأخير كلش كلش أعتذر التمسولي العذر لأن مجان عندي نت وهسه رجعتلكم وبقوا
شرايكم بعودة رافد اين هم عشاق استاذ رافد وآنا منهم... 😅
احبكم جثير الحب
تفاعلكم بنات