༺༺༺༺༺༺༻༻༻༻༻༻
حلقة (48)
#جُمِّلت أخلاقها
✍🏻كاتبة الجنوب
______________بسمه تعالى ______________
أتمايل على لحن أغنيةً، صغيرةً لم يسعني ان أتعمق بعمق كلماتها ولا أعرف ماذا يقصد قائلها، صغيرةٌ
وأخذتُ من الطرب باباً لسعادتي لم أعتقد بأن ذات يوم سأعشق كلمات أغنية وليس لحنها، لم أتخيل بأن كل كلمة يقولوها تمثلني فأنا لم أعتد على شعور ذلك الكاتب وهو يكتب بل عشقتُ لحنها، لكن ذات مرة سببت ذبولي أغنيتاً كان كاتبهاً يرتعش حباً وختمها بالعيش معاً او نعلن عن هزيمتنا...
✍🏻كاتبة الجنوب...
يا نعيش مع بعض حبيبي يا نموت احنه لثنين،، شغلها وآنا ادخل للغرفة صفن بوجهي وبكلمات اغنيه الحزينة حرك كل مشاعر بداخلي دافنتها من سنين دمرتني نظراته مجتمعه بين العتب والندم لو ما الحرام والعيب الا احضنه حيييل وارجع كل ايامنا،
انسى واقعي ال آنا بي واعيش وياا اجمل حكاية حب واخلي المثل ينضرب بينا مثل ليلى وقيس بكلمات اغنية دندن بصوت ناصي يسوده حرقة قلب ينعيش مع بعض حبيبي ينموت احنه لثنين...
وصلتني على شكل رسالة يا نموت سوا لو نعيش سوا ردت اصرخ واكله كاااافي مو صوجنه صوج الزمن ما جمعنه كافي يا أيسر كافي خليني اعيش،
لحن اغنية تجبرك تنفعل من كلماتها الهادئه يسوده طابع الحزن تخليك تسرح بعالم الهم والقهر فززنه صوت سليم وهو ايصيح
_أيسر والله ذبحتنه بأغانييك دگ ولطم
ضغط على دگمه وانطفه وهو يكول خلصنه منه،
سحبت نفسي من يمهم وكلمات بعقلي ترسخت ولحن سيطر عليه وخربط كل مشاعري اخذت نفس انسي آمنه انسي مو كلشي تتمني ايصير، يربي ساعدني ما عندي غيرك وآنا ضعيفة وگلبي هش وبكلمة وحدة أتأثر ملازم اخضع لگلبي ادوس عليه واسمع لعقلي بس هو گلب ما يقتنع باقي ينبض بإسمه تنهدت
و مشيت بخطوات بطيئه وبجسم ذبلان لازم ابقى فرحانه لفرحة حور
دجلة: يلا كومي كافي دللناج هواي اليوم
_محد يحاجيني اليوم عروس
_چا والعروس بعد مسوي شي موو
_ولج أمنووو لحگي حور خربت من هسه شلون لو راحت بيت زوجها
_لا تخافين اخلي يلمع لمع من النظافة
_دجلة عوفيها اليوم فرحانة
_چا منو يساعدني
_احنه موجودين امشي، امشي
نظف هسه مدكوليلي شنو تنظيف تردين تنزعينها الفستان خليها فرحانة بي.
_يوو انتي ثانية اخذتيها صدك اريد اخبث عليها
_بعد هرمون خباثة لازم يشتغل عندج
_هااا آمنه لا تمصخينها لا تنسين آنا مرت اخوج الجبيرة
بعدين شوفي عمتج وبناتها يبقون يمنه.
_وينها
_هذيج
_رايحتلها
مشيت خطوات لازمه عبايتها ودك سوالف هي وامي
_هاا عمة اشو لازمة عباتج
_اي والله اريد اروح بس عماد اخذ البت وطار بيها اريدها تجي ماكو
_عوفيهم شرايده منها
_راح ايصير غروب وارد اروح
_وين ماكو روحه
_اي يمه هاي عمتج عندجياها من مساع اقنع بيها وهي رافضة
_بيت ابو رافد تبقين يمهم بس احنه لا مو بيت اخوج هذا هم
_لا والله نفس معزه بس متعلمه هناك
_ماكو كعدي
سحبت عبايتها.
_ياا وين اخذتي عباتي ولج
_رايحه اشوف بتج وينها
_كوليلها امج راح تروح
_اي تحلميين اكلها، كلتها بصوت ناصي
_هاا اخذتي عبايتها،
_عوفيها باقيه ما خليها تروح اكلج دجلة مشفتي وجدان وعماد
_لا، بس هاي اختها مرتاحتلها
_اشبيها
_تشاقة ويه سليم
_عادي بنات عمتي كله هيج اسلوبهن
_والله فلا ارتاحيتلها
_ابقي راقبيها.
_ادور ادور الكاها يم سليم، وهذيج الثانية خاتله يم عماد
_غير مخطوبين بعد مرته، اروح اشوفهم وين
فتحت الباب الخارجي ومثل ما توقعت كاعدين يم نهر مشيت صوبهم بخطوات بطيئه وحتى لا يصدر مني صوت وصلت يمهم ومحد منتبه عليه تحمحمت وآنا اكول
_شيسون طيور الحب
التفتو عليه وبعد ايده عماد جانت لازمه ايدها
_مصيبه صابتج آمنه شتردين
_طفرتكم موو
_بس شلون كعدة كاعدين الله
وكعدت يمهم بقو عينهم عليه
_ياا ما تحجون!!
_اي روحي واحنه نتنفس
_شسويت كطعت عليكم نفس!!
_اي اختنگت اصلاً
_صدك وجدان
_اصلاً جيبولي اوكسجين بعد ما اكدر اتنفس!!
_جبح هل وجه مو آنا بت خالج هيج تبيعيني
_والله يا آمنه على عيني وراسي بس حالياً غير مرحب بيج
_هسه انتي شسوين جاية
_والله يا اخوي شفتكم كاعدين سوا وكل اثنين ثالثهم شيطان فگلت اصير ثالثكم ليش اخلي شيطان ثالثكم
_والله نرحب بالشيطان بس انتي غير مرحب بيج
_هيج صارت يخوي بسيطه، اصلاً اجيت آخذ وجدان عمتي تريدها
_شتريد مني
_والله روحي شوفيها
_جذب عليج ما تريدج
_صدك آمنه.
_قابل اجذب
_معليج بيها ستأذنت من عمتي ومكالت شي
_شتدفع واليوم اخليها تبات هناا
_والله
_والله
_چا خوش الج تردي.
_هاي هي اعتبرها باقيه، تركتهم ورحت يم دجلة متنرفزة لأن كل منجمع يمنه وبحجة يوصخون البيت وهي متريد احد وما تحب الهوسة
_حور بعدها ماخذة وضع العروس وفرحة ما واسعتها
وبسة ونورس مكابليها!!
البيت فرق بس عمتي وبناتها
_حور يلا كافيج كومي، لشغل يلا
_ادري شنو خالين حور للخدمة
_چا اكو غيرج غير انتي جبيرة وام بيت
_لا عندج نرجس ودجله آنا زغيرة يمهن
_ هههه ماكو اله انتي
_معليج انتي
_شلون شفتي عريس لغفله
_شبي حلوو، شدكولين بسه
_بس كصيرون
_هههه حتى هاي جاهله معاجبها.
_عادي واذا كصير
_كولي للكعب وداعاً
_هم عادي ما البسه
_اووو عاجبج فول مواصفات عندج
_اي رايده بعد شي
_بكيفج يمرت هبااار، شكبرا اسمه
_ترى متكون من اربع احرف قابل مثل اسم عز الدين
_اروح يم عمتي احسن
_اي شردي
افتر بكل البيت بس، غرفة بيها ايسر هاي ابد ما قتربت منها حتى لا اتكهرب
_هاا عمة شوصيتج رحتي وبعد ما اجيتي
_اليوم هناا تبقين ماكو روحه
_لا يمه باجر نريد نروح خطابة
_خطابة المن
_چا غير لخوي ايريد يزوج
_ياا اخو
_ياا هاي اشبيج ابو ايمن
_هو مو مزوج مجابها وياا
_مقابلة تترك ديرتها وتجي للعراق
_وهسه عمي ياخذ ثالثه
_هههه ثالثه ورابعة اذا اضطر أمر
_ميكعد راحة هذا العجمي
_خلي يزوج خو ميضل وحيد اشو ولده ميردونه وذولاك باقين ب إيران وميعرف عنهم شي
_شلون يعيشون
_ايكول خاللهم مبلغ يكفيهم وعلى ما يعدل امورا يروحلهم
_چا شكد عنده فلوس
_عنده راتب حبوبه
_الله يرزقة شنريد منه، بنات لازم نتحضر لعرس عموو
صاحت خوخه
_لك هلا، والله لرگص ركص بعد العريس خالي
لزمها سليم من راسها وهو يكولها
_شبيج رگاصة انتي بس تردين ترگصين
_والله خلي يخلولي لغنية احبها لهز هز اخلي رگاصة تتعلم مني
_عمة بتج مكانها مو هنا
_اوو يعمه هاي مخبله مو بعقلها
_هههه مخبله
_انت لصير حقير سليم
_شوفي عمه بتج ما تحترم اكبر منها
_ههه خلينه احترام الك .
هز رقبته سليم وهو ايصيح
_غير بت عمة عندي هم رگاصة وهم مخبلة كضوها زين لا تشرد منكم بشوارع تخزيكم عمه.
وهي ركضت ورا وهو يركض وميت ضحك اباوعلهم هذول من شوكت هيج صايرين ميانه وضحكات وسوالف سوا بقيت صافنة على سليم اول مرة اشوفه هيج فرحان
بيومها عمتي بقت يمنه وامي وبناتها عشنه جو عائلي ما يخله من سوالف وضحك حالنه حال كل لمة عراقية..
_آمنه، آمنه كومي
_شتردين حور
_لج رجلج بالباب يريدج
_اهوو گليله نايمه
_ولج كعدي يريدج
_استغفرالله هو يزوج حسبالج يرتاح ميرتاح
كمت متنرفزة فتحت الباب وحتى وجهي ما غاسلته
_شتريد
ابتسامه ترس وجها
_ايكولون عدنه مرا يمكم واجيت آخذ حلالي
_منو گال وينها ماكو
_ولگلاكه كوون تلگ عضامج لگ
_لا تلگلگ علينا بلا
_اهووو بعد ما عاجبها، روحي جيبي عباتج وامشي جدامي يلا
_لتشرط وما اروح لشوف
_مو هو بكيفج يلا
_اي بكيفي آنگوووو
_اشو طولان لسانج طولان
_من اول هيج بس انت ما منتبه هه
_حبيبتي وحياتي وقلبي وروحي مو هيج حبجيات لتموتن عليها
_لا عيني هذن گلتهن اذا ما طالعات من هذا مو حلوات
_وج انتي مزروعه هنا من نص گليبي من فديوا رحت للعيون
وج والله غرفة مو حلوا من دونج امشي..
_آمنه شعندج واكفه يم الباب
_هاا
_هذا عز الدين، شعندك مغبش علينا
_انت جنك مرتي ولكم شوفو شمس صارلها شكد من سامطه الوادم وانتم بعدكم عدكم غباشي
_مو لبارحة جانت عدهم سهرة عسل ويه حبايب
_اول مرة اسمع بسهرة عسل هاي بس عدكم
_چا انتم ما عدكم
_لا
_اخذ مرتك وتوكل بالله
_وهاي اخذنه رخصه من اخوج
يلا جيبي عباتج
_رايحه!!
جانت غصه بداخلي اعوف بيت اهلي واروح ورحت مجبورا وحاقدة على سالم جان يكدر اكوله بقيها كم يوم،
حور: بعد ما البيت فرغ وكل واحد راح على بيته وكل واحد بيهم انشغل بشغلة وبهيج ايكون آنا الوحيدة اعيد بذكريات واحداث صارتلي اباوع على حلقة واحرك بيها، هاي آنا دخلت شريك بحياتي ويا أما يجملها او يهدمها، فرحتي مكامله لأن خوف مسيطر عليه والمشكله اهلي رافضينه
بس كون ابوي يطلع هل مرا غلطان وحكم عليه بموزين كاعدة افكر ما اسمع غير الباب يندك،
عجيب منو هذا جاينه من صبح، صحت
_منوو
اجاني صوت سامعته بس منوو
_منو انت
_هبار
صخنت وتخربطن دگات گلبي
_فتحي الباب
_فتحت شويه من الباب وهو تقرب ومد راسه يباوع داخل البيت
_منوو موجود بلبيت
_محد من ولد بس آنا ومرت اخوي
_اي همزين حتى آخذ راحتي وياج
مدري ليش لعبت روحي منه
_شنو تاخذ راحتك وياي
_لعد شلون المن جاي غير اشوفج خو مو كلهم يوكفون فوك راسي
_اعذرني ما اكدر ادخلك ماكو زلمة بالبيت
_بس آنا مو غريب صرت خطيبج يحضي.
_مصارلك غير يوم واحد شعرف عنك
_ادخل وتعرفي عليه كلش زين بس دخليني شبيج مراح آكلج ترى اول وتالي نزوج
_صح، بس اخاف اخواني ما يقبلون
_هم گالت اخواني ترا انتي صرتي حلالي لا اخوانج ولا بطيخ
_حور، شعندج واكفه بالباب..
تلعثمت مدري شكول مثل حرامي بايكله بوگه ومحتار وين يوديها، التزمت صمت
_ها حور شبيج نخرستي بلا اشوف منوو
لگته واكف مبتسم
_هاا خويه رايد شي
_خويه آنا هبار خطيبهاا
_اي اعرفك بعدني ما ناسيه شكلك رايد شي
_لا جاي اشوف خطيبتي
_وان شاءلله تريد تدخل
_وشنو اشوفها بالباب
_لا مو حلوا وكفتك بالباب وماد راسك
_فهموها حتى ندخل داخل واشوفها
_ترى بس آنا وياها شلون ندخلك للبيت
_اووف مو جاي من شارع مو ممهورين وراح اصير مرتي
_راح اصير يعني بعدها مصايرا
_وهسه شلون
_تعال بليل وشوف خطيبتك لأن كلهم موجودين
تنرفز وكال
_اودعناكم،
سديت الباب تنهدت يبووي واخيراً راح
_والله لو مدخلته وبس آنا وياج بلبيت ساعتها شيفگج من سالم
_ترى افتهم مو جاهله كدامج
_بعد غير اوصيج لأن اعرف اخوانج ما يقبلون وحتى لو خطيب يبقى غريب وبعدين شعرفنه منه مصارله غير يوم واحد من شفناه.
معرف ليش خفت منه ومن حركاته وما توقعت يجي بليل
عماد: وينج حور
_هاا
_هذا خطيبج اجه ايريد شوفج
_وين يجي
_هناا بعد وين
_نبقى وحدنه
_لا اجيب العشيرة كلها
_يعني عادي
_اي غير خطيبج
_هاا
_روحي رتبي روحج طلعيله هيج شردينه والله
_اي هم صدك
_يلا روحي شوي وارجع
لبست اجدد ملابس عندي حطيت روج سحري بلون وردي خطيت عيني بكحل كرصت اخدودي تخبلين لو بس اشوي يرادلج سمن حتى ما يكولون عنج معصعصة
_فضيها خلصتي
_اي شوفني هسه، شلوني
_يعني احسن من مساع
_لك هبطت معنوياتي
_بويه تخبلين تخبلين
اروح اكول استاذ هوبال يدخل
_هوبال شنو
_اندري شسمه
_هبار
_فهمنه
_تعال هوبال، بس گلي انت منو سماك هيج
_والله مدري مجتمعين القوم وملكو غير هذا اسم يختارو
سلام عليكم
_وعليكم السلام
_احسن شي تحية الإسلام مو مثل هذا جيل بدلو تحيه ب هلو وهاي
_اي والله يا عماد نوب زلمة مشورب ادكله سلام عليكم ايكلك هلوو
_هذول انگليز دخلو ودمرو العالم
_اي والله اخذو نفطاتنه وجابونه اكلهم الجايف
_والله شحلاتنا من جناا ناكل اكل گاعنه المتربين بيها هسه ماكو تاخذلك شي تاكله تباوع تلكه علامه من افلان دوله چا شبي زرعنه
_نووب كل طعم مابي هسه دور حتى دجاج ضلو ذبحون بي وجمدونه ويبيعو علينا جاا ودواجن العدنه تارسة الديرا لو لازم تصدير وعود كاتبينه ذبح على طريقة اسلاميه وهسه تلكه الذابحه ما يندل الجبله وين
_كلشي صار تصدير خوفك لا بعد صدرون النا نسوان ساعتها ما نگلب عراقيات ندور اجنبيات
_ما اكدر احجي يمي اختك
_اي الحكومه كاضتك من زردومك يلا بوية اترخص
اخذو راحتكم واعتبر بيت بيتك
_تسلم يخوي
راح عماد وآنا خجل ما كلني اششش صيري قويه مو هذا زواج ردتي
_تعاي ليش متبعده راح آگلج قابل
تقربت يمه ابتسمت ابتسامه صغيرونه وبداخلي نار مشتعله
_ما اعرف عنج بس اسمج وعمرج، ليش هيج هادئه وخايفه مني لو هاي بس البداية بعدين طلعين لسانج
_حسب الوضع
_هم صح الوضع كل شوي يختلف عندج
ويغمز
_اي
_شوكت تردين نزوج
_ما ادري.
_هم تردين عرس وهوسة مثل الخطوبة
_ما ادري
_هم ما تدرين
_اي
_واحنه نخلصها كله ما ندري واي
_شتريد
بقى صافن على وجهي خجلت منه دنكت.
_حلكج كلش حلو نوب وردي
عض شفته وهو ايكول
_شوكت اتذوق الوردي
ابتسمت خجلانه!!
_حور احب المرا جريئه لا تبقين هيج متمسكه بكلمتين
_اي
غم گصته وهو ايكول
_هذا حضك يا هبار
تقرب اكثر يمي شعري نازل على عيوني بعد شعري وخلا ورا اذني هيج احسن اشوف عيونج الحلوا،
بقى صافن بوجهي ورجع عض شفته شوكت يجي ذاك اليوم ذبلن ملامحه خفت منه بتعدت شوي
غضب ترس وجها رفع ايده يريد يحجي دخل عماد
_حور، حور
_هاا
_باكيتين جكاير بسرعه الولد يردون.
فزيت مرعوبه وكمت سريع جبتله جگاير واخذهن مني وراح
رجعت نفس مكاني وهو رجع تقرب مني لزم ايدي وهو يكول
_حيل شبيج هيج ترجفين وجسمج حار
بلعت ريجي من كد الخوف معرف شحجي
_انتي بس لا ما تعرفين تحجين اعلمج صيري مثل ببغاء احجي وردي وراي، تعرفين تحجين
_اي
_هو اشك اهلج ما علموج غير اي وما ادري
_ههه
_ونسيت اكول ابتسامه، حبيبتي راح تصيرين مرتي وام بيتي تعرفين شنو يعني مرت هبار
_لا
_لازم حجيج كله اختصار، مرت هبار لازم تكون مرا بعشر زلم سباعيه وقحه وما تخاف واذا لزم أمر اربيج على ايدي، الخوف ما يوكلنا خبز، اريد اعيش باقي عمري بالخير واذا صرتي مثل ما اريد راح اغركج فلوس.
ما حجيت اي كلمه بس مدري ليش خفت من كلامه
وترني اكثر وهو يتلمس بوجهي وخاصة حلگي تجمدت بمكاني صرت مثل خشبه حتى بلكوا اخذ نفس عيونه مركزة عليه ويجر حسرات ويتوعدلي خفت ودگات گلبي زادن، نقذني عماد وهو يدخل عدل هبار كعدته
_اعتذر اذا ضايقتكم، بس شسوي اليوم خبصوني على جگاير
_هاا هم جگاير
_اي والله
_روحي جيبيله
_اي حور فد باكيت جگاير على سريع وهو بقى متنرفز
رحت جبتله واخذهن مني وهمس يم اذني
_دربالج على نفسج
خجلت منه وطلع
رجعت اخذت مكاني
_شنو سالفة جگاير اليوم ما تخلص
_لا يوميه هيج الولد يجتمعون يمهم ويشترون مني جگاير ابيع عليهم بيع
_حلوو عجبتيني من نزوج راح نشتغل سوا ونجمع فلوسنه
_شنو نشتغل
_بعدين تعرفين
_آنا هم احب اعتمد على نفسي اكيد اشتغل حتى اعتمد على نفسي
_هو اكو احله من واحد يعتمد على نفسه، بس من هسه اكلج هذا گلبج قويي وعوفي طابع الخجل خليج جريئه وانتي تعيشين شوفي لبنيه والولد يحتاجون شجاعة بس تدرين البنية تحتاج شجاعة اكثر
_شلون
تقرب مني وطبع قبله على حلگي سريعه
بقيت صافنه اباوعله ولا كأن مسوي شي
_ شفتي هاي شجاعة اخذت بوستي بدون ما ترفضين هههه بس شلون طعم انجرب شجاعة مرة ثانيه وغمز تبعدت عنه
هههه لا تخافين تعاي والله ما اعيدها، بس تقربي مني
رجعت يمه لزم ايدي حييل، الله ايدج والله حلوا ناعمه
_حور، حور
_هااا
_جيبيلي باكيت جگاير
_هبار: ليش ما تاخذ الكارتون كله وتفضها كل شوي جاي
_بعد شسوي هاي يوميه هيج
_انطيته وكال
_اخذ راحتك النسيب
_هو انت خليت بيها راحة
جيبيلي وياج باكيت جگاير
_انت هم دخن
_اذا انتي كاضيتها تبيعين على وادم وحتى ما يدخن خليتي يدخن تردين خطيبج ما يدخن نوب حتلو ما ادخل على هذا وضعي ادخن جيبي جداحه
_كمت جبتله واجيت
توقعت ما يدخن بس من شفت لزمته لجگارة عرفت هذا من سنين مدمن عليها، اخر شي عماد تعب من روحه وجيه وعرفت هو متعمد يجي وجگاير جانت حجه،
_يلا نسيب خلص وقت زيارة
حجه بصوت ناصي انت الله منين جابك عليه
_ما سمعت
_اكول اي نعست رايح بيتنا انام
_اي طبعاً بيتنا قابل يمي تنام
الله وياك نسيب تصبح على خير
_هاي كمناا لا تخاف الله وياك وانت بخير
_تعال، تعال هاي جگاير منو فاتحهم
_مالاتي
_هاك اخذهم وانطيها فلوس مو من هسه تاخذ مجاني
باوع على جيبه طلع لفلوس ونطاني اخذتهم منه
ودعناا وراح،
دخلت على سريع وآنا مستحيه من عماد غيرت ملابسي وتظاهرت بالنوم الي اول ما حطيت راسي اجه طيف رافد يزورني اخخخ يرافد كلش محتاجتك، لو تدري صرت عروس بس ما ادري شلون راح اكمل حياتي وياا، مو نفسك يرافد مو نفسك، ذكرت ام سمر وتأنيب ضميرها حيل بيها خليها تعض اصابعها ندم كل عقلها اخوها أخذ شرفي بس الغريب شعجب اخوها ما نطق بالحقيقه ههه يا حقيقه وهو لسوا يصخم الوجه اكيد ما يكدر يواجه احد هو حتى نفسه ما يكدر واجها، بيومها نمت على ذكريات رافد وآنا مبتسمه..
كاعدة ارتب بالغرفة وادندن بأغنيه وآنا اقنع بنفسي هاي حياة يرادلها قوا وحيل وآنا ما لازم اخليها دوسني برجليها لازم اعيشها يوم بيوم، حسيت بشي طفر توقعتها حشرة وهي صرخة وهي طفرة على جرباية اخاف انزل، وبقيت اصرخ الا أن سمعني عز الدين واجه ركض
_شبيج
_معرف شنو مشه منااا
_حبيبتي لا تخافين.
_هذا موو بريعصي يسمونه
لزمه بيده، وآنا كل جسمي اقشعر
_عيييع مشوف شكله مغزز
_شرايج لو اشمرا عليج
_لا حباب اموت غير
_ما تموتين لا تخافين
شمرا صار بين رجليه صرخت بكل قوتي طلع وسد الباب طفرت من جرباية صرت يم الباب وانا اضرب بالباب حيل وهو يسمع بس ما يدخل تعبت من صريخ كعدت بالزاوية وحاضنه نفسي حيل وبس دموعي تجري من صار هدوء فتحت الباب عز الدين شافني بالوضع الي آنا بي حضني وكال
_كلتلج قبل وارجع اكولج
"٠اريدج نار گبرا"
وآنا اعلمج بليل..
مسحت دموعي لأن كلامه وترني وطلع بقيت انتظر الليل شوكت يجي واول ما كملنه عشه وكل واحد وشغله
_هاا صار ليل يلا كول شتريد
_بويه خلي ناس تنام وحتى ايصير هدوء
بقيت اروح وارجع
لما الكل نام اجه وو كال
_ما تنامين
_مجايني نوم شتريد مني
_يلا شوكت ما يجيج نووم نامي تصبخين على خير
تغطا ونام وآنا اليوم كله انتضر هاي لحضة هذا من كل عقله
_شو نمت
لوح بيده بمعنى
_شتردين
_شنو تعلمني
فتح تگ عين
هيج يباا تهديد وكلته
_نام ضربته بالمخدة وآنا اذكر السوا بيه اليوم والله اذا عدتها مرة ثانيه، مو بيت فلم رعب عايشة بي
_انتي جبانه وآنا ما اريد مرتي جبانه "اريدها نار گبرا " تلهب لهب
_ابو گشرا روح نام
_ما تردين مني شي
_لا
_بعد احسن
بقيت افتر بالغرفة وعيني على شباك الي صار فترة مفتقدة اصوات معرف تعلمت وبقيت ما اهتم حتى لو اسمع بعدين تذكرت كل يوم قبل لا ينام لازم ايروح وياي لتواليت لأن بعيد خارج البيت بس هذا نام واذا نام بعد ما يكعد بقيت اطفر يم راسه
_ابو گشرا حباب كووم والله نسيت كوووم، بس اعرفه اذا نام مستحيل يكعد ضربته جريته ماكو
_ادري شوكت نمت اخخخ يربي شهل عائلة زفت سحبته من رجله اووف ثگيل شگبرك
رجعت صحت بصوت عالي بأذنه
_كووووم احتركنه
فتح تگ عين
_من يوصلني نار كعديني زين بويه
_اففف حباب بس كوم وياي
_روحي وحدج محد ياكلج،
صيري نار گبرا تلهب لهب
_والله لا قويه آنا ولا شي وحده ثوله وجبانه
بس لا حياة لمن تنادي وتذكرت تهديده آنا اعلمج، بس هسه آنا اعلمك وشوف بت بندر القوية وما تخاف شنو يعني واذا ليل، لبست حجابي وشمرت عليه لمخدة وطلعت وآنا ارتعش من الخوف هدوء البيت والكل نايم وبس خطواتي تنسمع امشي سريع والتفت وراي خايفة وخاله گلبي بشيشه فتحت الباب الخارجي وما سديته بقيته مفتوح وطرت طريق صار ابعد من حياتي وانا اباوع سواد ليل بالبستان مابي غير شجر ونخيل وصلت وانا اسد الباب واخذت نفس واخيراً وصلتلك لحضات ورجعت نفس ما اجيت امشي سريع بدون ما التفت وراي لأن وراي تشابك شجر وحشايش صايرا مثل سياج ومنظرا يخووف مشيت ومشيت وجان الزم من الورا صرختتت منووو....
يتبع...
لا تنسون تصويت وتعليق حلوو مثلكم وشاركوها مع اصدقاءكم اذا عجبتكم
احبكم
كتبولي توقعاتكم...