جُمِّلْت... أخلاقها //باللهجة العراقية //

حلقة(42) جزء الثاني

༺༺༺༺༺༺༻༻༻༻༻༻

حلقة (42)

#جُمِّلْت أخلاقها

✍🏻كاتبة الجنوب

________________بسمه تعالى _____________

الكل يبحث عن أمان والأمان يتولد داخل بقعه تسمى الحب أنا مؤمنه بأن الذي يحبك سيجلب لك الامان ويتولد لديك  شعور السعادة لكن نحن مجبرين على العيش في البيئة التي منحها الله لنا،

في ناس أصابها الألم اضعاف وصلو الى مرحلة تخلص من حياتهم وذهاب الى الموت، كم شخص قال حياتي توقفت في موقف كذا ونحن الآن نراهم مستمرين بالحياة هل تسائلت مع نفسك، لماذا هم مستمرين بالرغم كل الذي أصابهم!!

و لأن هناك نور في داخلنا يدعى الإيمان وهناك يقين بأن الله معنا و يرتب حياتنا للأفضل ليس كل شيء نراه امامنا هو صالح لنا لا، ارضو بحياتكم وقل سلاماً للراحلين...

كاعده على مسلسل بس بالي مو يمها افكر وين جنه وين صرنا ليش مو كلشي نريده ايصير ليش آنا اليوم هذا مكاني ليش ما زوجت حالي حال بنات بعمري ليش صارلي كل هذا شي عشت مرحلة مراهقتي وآنا اركض ورا رافد واغث ب ام سمر

الى أن كتفيت بصرخه منه تبينلي آنا منوو وشكد تعبنا واحنه اثنينه خطأ مراهقه وحركاتي طايشه سببت بدماري شوهت جسدي وتعبت نفسيتي وعيت اكثر وبمشهد من مسلسل وشوي كلام من دجله ذكرت الشي صارلي من سنين ذكرت الحرگ وإعتداء سببه اخو ام سمر رجعت ذاكرتي ويه احداث مسلسل يعني آنا مثلها هم مغتصبه لا يا حقيرة يا ام سمر

رفعت ملابسي وانا اشوف آثار الحرگ مرت عليه ذيج لحضة بكل تفاصيلها تملكني رعب وآنا أتخيل نفسي يمهم قسوت الي ما تتسمه ولدغة اخوها خله سمه يجري بدمي لحد الآن احس وصاخته على جسمي ارتفعت شهكاتي وآنا عيني على الحرگ بس عقلي أخذني بيت رافد وسط ظلام والقرف

الخلوني بي، نسيت روحي وآنا اعيش، لحظة دماري فززني صوت دجله وهي صيح

_حور اشبيج

نزلت ملابسي ومسحت دموعي

_مابيه شي

_شنو مابيج شي شنو هل دموع شنو هذا على رجلج بلا اشوف

_وخري مابيه شي

_امبين ذاك هو حرگ منو حاركج

_معليج

_حور تحجين لو شلون

_احتركت من جنت زغيرة

_بس امبين واحد حاركج

_شلون امبين

_باين من مكان الحرگ وشكله كليلي منو حاركج

_محد حاركني من جنت زغيرة احتركت.

رفعت ردانها وطلعت زندها وهي ادكول!!

_شوفي نفس شكل الحرگ مالتج هاي آنا حركوني مو احتركت

_منو حركج

_شوفي عندي صديقه بالمدرسن باكت فلوس وحطتهن بجنطتي من شافوها بجنطتي حسبالهم آنا بايكه وآنا مالي غرض بسالفة وامي من عرفت حطتني وجوتني على ايدي حتى بعد ما أعيدها، وتالي من ظهرت الحقيقة امي ضلت تلوم بحالها لأن حركتني هسه انتي منو حاركج.

_محد

عفتها وبقيت البس بحجابي لزمت عبايتي

_وين رايحه

_بيت عمي

_شسوين

ما رديت عليها طلعت ونار تفور بداخلي اعلمج ام سمر هيج سوين بيه طريق صار شطوله اخخخخ اكضج اليوم محد يفگج مني، وصلت بيتهم دكيت باب بيت رافد حييييييييل

طلعتلي وهي تعيط

_منوو هيج دك الباب.

ما جاوبتها فتحته وصرت بوجها

_هاي انتي شعندج

_والله كلشي عندي حساب وعتاب مال سنين

_عشتوو من يمته وآنا وزعاطيط وياهم حساب خاب دولي ادكولين شتردين لو شلون!! هاا خاف تردين ملابس شي وتستحين ادكولين اريد، بعد عارفه حالتكم

_حمدالله عندي ومكفيني والله ساترها

_لعد خاف تردين اكل، عذريني چلاب موجوده نذبلهم اليزيد.

_شايفنتي مجديه منج ام سمر يا محترمه يا مرت رافد الكل يقدرا ويحترمه بس مرته متكعد راحه تردين تعرفين سوت، سوت العمايل خطفت طفلة بليله ظلمه.

تغيرن ملامحها وهي اصيح!!

_اششش

وطلعت ولدها من بيت جرت ايدي ودخلتني للغرفة وسدت الباب.

_شتردين سوين

_شصار بذاك اليوم

_ياا يوم

_هاا سوين روحج ما تعرفين، اليوم أخذتيني وجربتي عليه انواع جرايم هاج شوفي هاي اول جرح شوهتي جسدي حركتيني من الله يحركج بنار جهنم

_هسه يلا ذكرتي ههه

_هذا الهامج هسه ذكرت، اي هسه رجعتلي ذاكرة جنت طفلة كلشي ما تفهم ما تدري صارها اغتصاب اي حور مغتصبه من قبل اخوج العار

_اششش انتي بديتي مو جنتي تركضين ورا رجلي!!

_ورجلج ما يعرف يبعدني عن طريقه لا بس انتي تعرفين انتي  مجرمه وحرامات رافد خالج بيته هيج قذارة مو مال بيت شريف مال مزبلة شوارع هناك مكانج

_ههههي لا تجاوزين وانتي بيتي

_بيت العامر ما شاءلله ملوث بيدج القذرة، جنت طفله تتوسل بيج عوفيني والله ما اعيدها لا تحركيني كلشي اسوي بس ما اتحمل ألم إذيتيني جنت اون يم راسج اخخخ يمه اخخخخ بويه ردت بس ترحميني ما وكفت بعينج على أنيني ولا صرخاتي شنوو من بشر منين مصنوعه يمكن انتي مثل شيطان مصنوعه من نار مو من طينت البشر لأن بشر عنده رحمه الا انتي شايفه كل قساوا

_ما لومج بعد بت زهرة!

تقربت منها جريتها من شعرها

_وانتي شتختلفين على زهرة

هذيج على اقل دفنت عارها وياها بس انتي عارج يمشي بشرايينج

_حور لا تتخبلين عوفي شعري
بعدين آنا ما سويت شي وجلبت العار اهلي

_هواي مثلج مسويات نفسهن شريفات وهنن اكبر عارات بس الله بعدهن ما فاضحهن

_والله لا حبيت وتمعشكت على زوجي ولا جبتله العار

_لا بس خطفتي طفله وخليتي اخوج يغتصبها وضيعتو براءتها

_وخليتج عار مثل امج لا تعرسين حتى لا تنكشفين وايكولون عنج عار مثل امج زهرة

_وهذا تردينه انتي جريتها من شعرها وركعت راسها بالحايط جربت انواع ضرب هاي ام سمر خايفه منها من سنين اليوم صارت جواي وهي تتمنى تتخلص مني ما ادري منين اجتلي هاي قوة اليوم هي ضعيفه وهي تتوسل تتخلص مني وآنا ما راحمتها ابد

_اي توسلي بعد وبعد محد راح خلصج مني يا ماا كتلج ام سمر عوفيني

_اخخخ عوفيني مابيه حيل ضرب ولج بت زهرة العار،

_اي هيج جنت اكلج عوفيني بس انتي زيدين بدل ما تعوفيني، زين طلعتي ولدج من البيت ما اريدهم ايشوفون امهم وهاي حالتها

_شراح سوين حقيرا.

_اراويج بت زهرة شراح اسوي

طفرت على مطبخ اخذت سجين اله اسوي بيج
مثل ما سويتي بيه!!

شغلت الطباخ وحطيت سجين عليها وهي

صرخت!!

_شبيج حور تخبلتي، ترى الم عليج البيت كله بس تحركيني

_اي تخبلت مثل ما تخبلتي انتي

بقت صرخ وعله صراخها وآنا اعرف روحي ما اكدر اسويها بس ذوكتها الخوف الي ذوكتنياا بهذيج ليله!!

اجت ضحى على صياحها تركض

_شبيج ليش هيج صيحين، هاا حور هاي انتي هناا

_زين والله سمعتي صريخ هاي القذرة

_شبيج حور ليش تحجين عليها هيج

طفرت سديت الباب وأخذت سجينه وهي تتلبد ورا ضحى

_شبيج حور تخبلتي

_اي تخبلت ومرت اخوج هي سبب خبالي وخري ضحى حسابي وياها واذا دافعيلها، شوفين مني غير شي

_مو صاحيه هاي لبنيه

_اي ليس على مجنون حرج وخري

_حبوبه لاترحين وتعوفيني تريد تحركني

_ضحكت والله زمن ام سمر تخاف من حور

_حور انتي فقيرة والعاقله سوين هيج

_من يدوسون على گلبج زيادة راح يصير صلب

_حور بس گليلي شصايرلج وهيج تردين تعذبين ام سمر

_سأليها شسوت بهذيج الليله

دنكت راسها وصارت الملاك البريء

_مراح تجاوبج لأن سوته مو شويه، ترديني اكلها كلشي سويتي لو حرام تخجلين من عملتج وخاف ايشوفون وجهج الثاني وساعتها ياخذون عنج غير نظرة شمرت سجينه من ايدي لا تخافين آنا مو مجرمه مثلج، صح بت زهرا بس مو عار مثلج محد رباني ربتني دنيا واله اكلج رافد اله دور كلش حلو بحياة حور صنع منها

شخصيه قويه بعد ما جانت حور طفله شرسه تضرب كل طفل عنده ام تضرب كل طفل امه مهتمه بي رافد شي حلو اليه، ابتسم كل ما مر اسمه كدام عيوني حبيته اي حبيته بس مو انانيه اخلي يتعذب او يتعذب احد من وراي، مو حور تستخدم قذاره حتى ترضي نفسها دست على گلبي وبتعدت عنه

بس حتى ما اضرا، ليالي انام وآنا ابجي على ذكراه ما تغمضلي عين الا لمن يمر طيفه كدام عيني، انتي تحبينه بس ما تحبينه بگدي دفنت حبه بگلبي وعشت حياتي، لا حسبالج خفت من سويتي وبتعدت صرخ بوجهي وعرفت آنا جاي أعذبه وما اريده يتعذب اكثر بسببي

_حور مكافي بعدين كولي شبيها ام سمر وياج

مسحت طرف عيني ما اريد دمعتي تنزل تردين تعرفين سوت، اكلج سوت،

خطفتني من بيت اهلي وتفننت بتعذيبي وهاج شوفي جسمي  ، كل هل تشوهات سببها هي وعلوا اكتفت بحرقي لا دزت على اخوها يعتدي عليه هاي كدامج حور مغتصبه من قبل اخوها العار

_هاي شجاي تحجين

_هاا ما صدكين بمرت اخوج الملاك البريء

_لا لا مستحيل

رفست ام سمر برجلي احجي كليلها

_شوفي ضحى كل زوجه من تحس بيتها ينهدم تسوي كلشي بس علمود ما ينهدم

_ودمرين حياة لبنيه من انعل ابو البيت ولج لبنيه اهم شي شرفها ما صدك هيج سوين انتي مجرمه اليوم الكل اريدهم يعرفون واولهم رافد خلي يعرف مرته شمسويه

_لا كلشي ولا رافد والله طلكني.

وضلت تذرف دموع التماسيح

_تستاهلين واله حور شنو ذبها
باجر اذا زوجت ونكشفت

_ذنبها لأن ركضت ورا رجلي

_ورجلج زغيرون شيبه تارس راسه تغشمرا بنيه مراهقه

_نسيتي هاي لبنيه بت زهرة

_وبت زهرة  شنو واذا بتها راح صير مثلها

_طبعن طالعة من رحمها وتربايتها

_الله يهديج بس حور غير وزهرة غير واذا امها مو خوش ما لازم بت تطلع نسخه منها شوي كبري عقلج

_لا وراثه الها دور

_واحد يورث الشكل بس اخلاق تعتمد على شخص  والمحيط العايش بي ياما ناس ملتزمين يطلع الهم واحد فرع مو زين يا ام سمر أصابيعج مو كلهن سوا وبعد هذا سمعته مراح اسكت لأن لبنيه شنو ذنبها

_حبوبه لا ادكلين احد والله ينهدم بيتي

_ههه على اساس هسه بيتج عامر اشو هاجرج وساكن خارج العراق منو كلج ما مزوج ومستقر اشو يومين ما يطول هناا ويرجع

_شنو تردينه

_صلحين الخراب الي سويتي ومدام محديعرف بس آنا، جيبي اخوج يخطب حور لو بس بي يعمل عملته ويشرد

_اي أكله بس هاا بشرط ما يوصل كلشي رافد

_لا ما اكله

_ههه وكل عقلج آخذ اخوها هيج آنا ما عندي كرامه وآخذ شخص مجرم مثل اخوها

_قابل معطل عليج كيفج بس انتي ترحين بيها اذا درو شرفج بححح بسرعه راح ايكولون بايعه، شرفها مثل زهرة

_والله ذبحتيني بزهرة الله يلعنج ويلعن زهرة وياج واطمئني ما آخذ اخوج شوفيله وحده عار تلوكلكم انا بت ابو بندر اشرف رجال

_ولج حور هسه هي مالت كرامه واذا زوجتي ونكشفتي ساعتها محد يرحمج، غصباً عليه يزوجج

_والله وعلى كص ركبتي ما اخلي واحد نذل يزوجني لو يبقى آخر زلمه بالعالم هم ما آخذه رفست ام سمر برجلي صرخت اخخخ ما هتميت وضحى صيح لا تتخبلين وتجيبين نهايتج لروحج تقربت يمها انسي سمعتي اليوم ما اريد واحد يعرف

_ليش

_ما اريد اصير فضيحتي بلسانهم سمعتي ضحى

_بس شلووون وانتي مو...

_منو كلج راح ازوج.

_منو خليج بدون زواج

_يخلوني بس لا تحجين ولا اي كلمه سمعتي انسي وبس

وانتي ام سمر حوبتي ما تتخطاج ثقي بالله، طلعت وآنا مفتخرة اليوم الي اخاف منها من سنين ضعيفه كدامي خليها تعيش بندم، ما كتلهم كل حقيقه كل عبالهم آنا ما اكدر ازوج اخذت ثاري منها وخليتها بنار، ايام وضحى يوميه تجي وكل ما صحتلها فرصه تتوسل حتى ازوج اخو ام سمر وآنا رافضه، كل ضنها حور الغبيه ما تعرف تصرف

آمنه: ايام تمشي بس عكس الي نخططله آنا اليوم بيت الحوثي يم عمادالدين مو أيسر بعد ما انتهت فترة ضيافة لزموني المطبخ، صحت ما اعرف اطبخ ردت احد يحن عليه كالو تتعلمين انعام وعياطها عليه خلتني اتعلم واصير طباخة محترفة

صار الزاير يعتمد عليه وميريد احد يلزم الطبخ غيري، صرت اطبخ عزايمهم لأن طبعهم بين فترة والثانيه بالبيت لازم اكو عزيمه، جماعته الشيوخ يجون وكله عزايم، طبخ الزايرا ابد مو طيب وعمي ايكول الطبخ على نفس وبت بندر نفسها حلوا مثل ابوها، وآنا واحد يمدح بيه ذبيت الميانه وياه وهما عدهم كلمة ابو واجبه ومطاعه، بقى يدخل بكل

زغيرا وجبيرا وابنه مثل الخروف يمشي ورا بالسمع والطاعه وبيوم كاعده بالغرفة بعد ما نگيت عليه جيبلي تلفزيون وهنا التهيت شوي، كاعدة ومركزة على تلفزيون وعماد الدين نايم بس مو غافي طب ونفتح الباب واشوف عمي

_ها انتم هنانه

_اي بويه يعني وين نروح

_بس اجيت اكول عمي اهلج ما قدرونه، الأصول دكول لازم يعزمون العرسان وهما لحد هسه محد عزمنه شنو ابو سالم ما يعرف اصول

_والله يا عمي ما ادري آنا لا رايحه بيت اهلي ولا شايفتهم

_بس ما يصير، هيج شنو قابل احنه ناقصين

_لا حشاك عمي بس اخلي عماد الدين يوديني وساعتها انطيهم علم

_شنو ترحين اهلج احنه ما عدنه مرا تروح اهلها اول ما تعرس تلزم بيتها وتجعد سمعتي بويه.

هزيت براسي بمعنى اي

رجع حك خشمه وباوعلي بطرف عينه وحجه

_بويه عماد الدين وصي مرتك تلبس شي حدر دهداشتها ميصير طالعه ركبتها وصدر يلج من بياض وبعدين كارثه اذا دنكت واخوك موجود بالبيت عيب منه

_ان شاءلله

متت خجل وهو عنده عادي رجع كال سمعتي يا بتي

'اي سمعت صار عمي وطلع ومنها ضل مثل حرس كبالي بس مجرد تطلع رقبتي كال طلعت عنده اجرام وآنا بالبيت مو بشارع، العم يعتبر مثل أب مو لازم حجاب لأن الله محلله وزاير هم محلله بس محرم ركبه تطلع بقيت البس فانيلت عماد الدين هاي بيضه خنگ، يلا رضى زاير، طكت روحي وما قبلون اروح أهلي اله بعزيمه زعلت وسويتها ظلمه

عليه وهو ماكو، ابوي ما يقبل توسلت بزاير يلا انطاني إذن اروح وطلع كلشي يمشي بشور ابو طرت من الفرحة وآنا احضر ملابسي اروح اهلي

صار واجد ما شايفتهم وهما بعد خطوتين ارتب بنفسي ولبست احلى لبس بعد عروس والأهم ما بين انكساري يم دجلة

_شكد راح تبقين

_اربع ايام

_بكيفج

_يومين بيت اخواني ويومين بيت ابوي

_بكيفج

_احس راح ترتاح مني

_لا ما ارتاح لأن مجانج راح يصير فارغ

_حسبالي تحبني وراح ادكول اشتاقلج ولا تبقين واجد

_اي احبج بس هلج هم لازم شوفينهم

_انت ما تحبني انت بس ردت تزوج مرا وما شفت غيري

_مو كتلج جنت مراقبج من ايام مجلس الحسين(عليه أفضل السلام) شفتج تلمعين من دون نسوان

تنهدت وآنا اكله

_الحب يصير من زغر ويبقى سنوات انت معجب نعجبت بشكلي لا ادكلي حب

_المهم خذيتج وهسه انتي مرتي

_امبارك عليك ابو كشرا

تدري شكد خطبوني وياهو شوفني وكال احنه ناخذ آمنه وبالنهايه اجيت انت باردة مبرده ومدري شلون وبين يوم وليله صرت مرت ابو كشرا

_قسمة ونصيب وآنا حضيت بيج

_مو صوجك صوج الزمن ذباني هيج ذبه

_هسه لا تتحسرين دخلتي قفصي بعد ماكو طلعه منه للموت

_اخخخخ من بيت الحوث

_شبينه ما عاجبيج ترى احنه ننحط على خشم

_هذا يا خشم شيلك انت غير ينكسر

_اصلاً خفيف

_هو غير صايرلي فيل

_متونس ومرتاح بعد ليش ما اصير فيل ، يلا مشينا اريد اروح لا تعطليني

_كول اريد اخلص منج

_هو هيج

_امداك لا احساس ولا مشاعر

بارد برودت الثلج، عماد الدين مثل ما كالو ولد فاهي وبقمة فهاوا ضحكته ما تفارك وجها واعتمادة على ابو، هو سايق تكسي هم تكسي مو مالته مالت ابو يشتغل وجيب لفلوس ل أبو وهو ينطي شويه والباقي بجيبه

ودعت اصبيحه وهي ادكلي تعلمت عليج حبوبه لا تتأخرين

حتى جويسم لكيته ينتضرني ويلوح بيدا باي باي

ودعتهم ودخلت بيت اهلي اول ما دكيت الباب فتحته حور بعيون منعسه شافتني وصرخت
_وأخيراً اجيتي

اخذتها بحضاني وآنا متلهفه عليها

_تعاي هناا

_اول تالي ادخل بيتنه خطار

_هي لبنيه خطار بيت اهلها.

_وانتي شوكت تعرسين

جرتها حسرا وهي ادكول

_بيد ربج

_شنو محد

_دجله نايمه واخوانج بالصيد وسليم لازم لمخده يشخر

_سويتو بغيابي

_على حطت ايدج

_وباقيه مكابله دجله ما طلعين

_لا غير اموت اروح بيت ابوي وبيت عمي وسولفتلها كلشي صارلي بذيج الليله جنت اريد واحد يسمعني وارتاحيت وتأكدت اكثر ب آنا شريفه واخوها ما خذ شرفي، الحمدلله طلع شوي احسن من اخته

_شخبار أيسر
_اجه وشبع طن رزايل مني

_خيولي خنيث، هم يجي الكم
_اي يجي

_ان شاءلله ما اشوفه

_لا هم شوفينه

لهناك يلا كعدت دجله وتفاجأت من شافتني لليل يلا رجعو سالم وعماد، سالم سلامه عادي بس عماد حضني بشوق وهو ايكول لحد الآن ما راضي على زواجج بس ابوي وسالم اخخخ منهم

_هاي قسمتي شسوي بعد

يومين كضيتهم يمهم رجعت ايام طفولتي عبرت صوب ام ضاري ولعبنه واخذت ورده من وردتي بنفسجيه وآنا ذايبه بعطرها صارت عصريه لبست عبايتي كتلهم اروح ابوي دجله ما قبلت حور تروح وياي طلعت وانا ادور على سليم وصلني واشوف أيسر صار بوجهي فزز من شافني وكف على حيله دقايق وعيونه تحجي وتعاتب غمضت عيوني تنهدت

_سليم وصلني بيت ابوي

_شلونج آمنه

_زينه الحمدلله، يلا سليم رايحه كدامك

_اوكفي بس اخلص البيدي

اجاني صوته وهو ايكول

_لا شكراً، يلا سليم قابل ابقى واكفه يم الغرب
زفر هسه آنا صرت غريب يا آمنه...

_مو ابن عمج صدك شنو غريب

_اروح وحدي شنو، يلا راح اصير مغرب
تجاهلته اباوع ملامح وجها معصبه تحرك سليم

_امشي، امشي خبصتيني

ايسر ضرب رجله حيل بالنخله الحركة دائماً سويها من ضوج لو يضرب ايده بأي شي كدامه

سليم: هاا ايسر شبيك وعمه ما اشوف

_ما نتبهت

_اروح اوصل اختي بيت ابوي وارجعلك

_هسه من بعدهم امشي نروح سوا

رفعتله تك حاجب بقه صافن بوجهي

مشينا وطول طريق يسولفون وآنا عيوني ما نزلت منه دكات گلبي زادت تواجده يوترني اكثر بيت اهلي صار طويل يلا وصلنا، اول ما دخلت وآنا متلهفه على امي بقى واحد، واحد يجولي فرحانين بيه وآنا ادور ابوي بينهم

_يمه وين ابوي

_غاط بالبستان

وسليم وأيسر راحو يمه

رحت ادور عليه لكيت ايسر فرحان يشلع طرح وياكل من شافني تقرب يمي وابوي بعيد هو سليم

_هاج تاكلين

_ما اريد

_آمنه

_صايرا حلوا

_حلوا من كاعي

_آمنه

_هاا

_ليش سويتي بيه هيج

_هههه آنا

_ليش ما انتضرتيني

_ليش ما نهيت عليه، مو انت كلت بت عمي حتى لو آخذج بالقصب

جر حسره وهو ايكول ضيعتج وضيعت روحي بحكم المذهب

_مذهبك اهم من آمنه واله اكلك ايمن اهم وانت واحد جبان وتخاف منه، اكيد تخسر آمنه وضيعتني خلي ايمن فيدك

جر ايدي.

_آمنه

_لا جيب اسمي على لسانك

_هيج يهون عليج تعوفيني، آمنه، آمنه بس خليني افهمج

_ما يفيد بعد مو كلشي نريده ايصير

عفته وركضت حتى لا يلحكني وآنا كارهته واردد بصوت ناصي جبان الخنيث

وصلت يم ابوي فتحلي ايديه مبتسم شمرت نفسي ولكيتها خوش حجه حتى ابجي

_ليش يباا ليش هل دموع وانتي اول جيتج النا من بعد عرس تبجين ليش

مسحت دموعي

_عنيت عليه يباا

_يمج يمته ما تردين خليهم يجيبوج

_يباا مو مثلك حنينين، يباا ماكو احد بحنيتك
سمعت خطوات ايسر

ومحد مثلك يحبني كلهم جذابين...

_خيولون خسرانين الما يحبون أمونه بتي

_يباا يعجبهم شكلي وبس گلبهم قاسي يا يباا

_هو ينعجب بهيج وحدة عسل يكدر يخسرها

_خسروني وضاعت بتك وراحت بيت الغرب

_لا يباا لا دكولين غرب هذولي صارو اهلج، بيج شي ما مرتاحه

باوعت على أيسر لكيته مركز ويانا وجكارة بيده من يمته هو يدخن جكاير

جاوبته

_بعدني ما شفت منهم شي بس نكول الحمدلله

_عفيه بتي يستاهل الحمد، لك أيسر عميتنه بجكايرك وين ابوك عنك

_اخخخخ يا عمي ابوي داري عني

_من جوا ايدكم لو طايعينه مجان هسه كاعدين سوا ومزوجين مجان انطيتكم بناتي ليش هسه بين الغرب

_اعض ايدي ندم يا عمي

_بعد ما يفيد كلشي بيد القسمه

هو منو طيح حظنه غير القسمه كلشي وكالو قسمه ونصيب

_الله كاتبلكم أفضل ان شاءلله روحي يباا يم امج
تنهدت وعفتهم ورحت يم امي وكضيت اليوم بين اهلي شكد حلو من تحس بأمان بين امك وابوك وصدك محد يحبك بكثرهم..

يتبع...

صار يومين اكتب بيها مو حلقة ضيم لا تنسوني بتصويت حتى توصل اكثر عدد وشاركوها مع اصدقاءكم

احبكم جثير