جُمِّلْت... أخلاقها //باللهجة العراقية //

حلقة (40) جزء الثاني

༺༺༺༺༺༺༻༻༻༻༻༻

حلقة (40)

#جُمِّلْت أخلاقها

✍🏻كاتبة الجنوب

_______________بسمه تعالى ____________

البيت مو بيتي الوجوه كلها صوبي لازمة بيدي ورده الورد الي احبه بس اليوم كارهته، لا نفس اللون الأحبه ولا نفس العطر الأشمه بوردتي البنفسجيه بالبستان

كلشي ضدي مو هاي حياتي حلمتها مو هذا بيتي الرسمته مو هذا أيسري الٔاحبه، الناس فرحانه وترقص على جراحي وآنا من داخلي اتكطع

ختنكت من الهوسه وثرثرت الناس وهما مركزين بتفاصيلي اسمعهم شلون مندهشين بجمالي وكل شوي سائلين منين هاي جنتكم الحلوا وآنا كارها شكلي وكارها كلشي بيه وحتى الناس حواليه كارهتهم على هاي حطه بقيت والكل فرحان بس اكو صرخة لو اصرخها اخليهم كلهم يطافرون بس مجبورا

اكعد وآنا مبتسمه، العريس طلع وكرسي اليمي كل شوي وحدة ناطه وكاعده بي وحطت ايدها وراي وتعالو طكونه صورة وآنا كاعدة على اعصابي والظاهر بالفرح، عاطت وحده وهي ادكول أذن أذان كافي مركصه، وإجن صوبي أخذني للغرفة واخيراً

راح ارتاح فتحت القفل ودخلتني للغرفة، دخلت امي وياي، ذبيت روحي ميته من التعب الغرفة حلوه ومرتبه وامي گبل راحت للكنتور حتى شوف ملابس ونصدمت من شافتهم هم قليلات وهم كلابيات كلهن نفس مديل بس الوان تختلف وعاطت وهي تغلط اشكال الغلط

_طيح الله حظهم شنو هل ملابس هو هذا ذوق خبصتني بي آنا اعلمهم.

رادت تروح تعاركهم سحبت ايدها

_يمه كافي مشوفين عرس كلها موجوده مريد احد يشمت بيه وتكب العيطة خلي يرحون عود ذيج ساعه احجي،

_استغفر الله العظيم هذول شلون بيهم يمه انتي لا تهتمين اله اخليهم يرجعون نص لفلوس

_شلفايدة، يمه غصباً عليه، يشتريلي ما البس على ذوقهم البس ملابسي وهاي هي

_يمه شلون وانتي عروس تلبسين قديمات

_لعد ترديني البس هاي

_لا ما أخليج لازم اجيبلج

شوي دخلت حور وراها دجلة وهنن يباوعن على الغرفة وشنو ناقصها وشنو حلو والمو حلو،
وبقن يتناكرن وآنا كعدت أخذت موقع العروس الخجلانه شوي كالو راح جيبون العشه ودجلة ام ثرب اخذت موقعها حتى تاكل عدل

_خلي نشوف أكل عرس آمنه طيب لا خاف مثل راعيته ما ينكحم(في مشاكل اوماينحمل او ما ينبلع)

_ههه انتي جنج بقرا، كلشي تعلف

_هاا آمنه مو شگلك عروس ترا اغط راسج بالنهر وخلي اخضر يطيح على احمر وصيرين مزورگه

_اي مو انتي بكيفج.

_منو يحميج هذا رجلج ابو راس لمصفح

_لا عيني ما احتاج حماية لنفسي عندي لسان وعندي ايدين.

_اشوفج شلون راح تعيشين ويه هذول، تكدرين تحمين نفسج

_اشش كافي تحجن لا يجون وانتي دجله لسانج شوي ما ارضى على بتي

_لا يا مرت عمي جاي اشاقيها بس هي ما تتحمل شسويلها

_مو هيج ال شقه دجلة شقة اله حدود ،

_خوش بعد مالي غرض بيهن.

_احسن

رادت تحجي جان تدخل اخت العريس اجو صوبها بعدها اجت امه كعدت وبقت تحجي ونص الحجي ما افهمه تحجي سريع احنه مركزين عليها

_ابتسمت على الحجي والله ما فتهمت شي هسه شلون اعيش وياها بالرغم مو اول مره اشوفها، داخلين عدهم ومن ايام عاشور بس شوف شخص عابر تحجي ويه ساعة ساعتين وبعدها تنساه بس من تتأكد وتصور نفسك راح تبقى وياا طول العمر هناا لازم تركز على كلامه،

وهذا كان اول حدث لهجة امهم المبهمه بنسبه الي،

غرفة العروس تحولت الى مطعم لا مو مطعم فندق، دجله فرشت من صوب بدل مكان واحد مكانين يلا تكفيها، امي وزعاطيها حور المسكينه نص نفر تعتبر، بناتهم وزعاطيهم بحيث فرشو سفرة بغرفتي الي هي غرفة العروس، وسوالف وضحك وآنا طكت بخشمي ريحة أكل وميته جوع اكلت ولا همني لا عرس ولا بطيخ باجر معدتي تحاسبني اذا خليتها بدون أكل، مدنكه ومركزة كل حيلي على أكل ما اسمع غير وحدة كالت

_يااا العروس هم تاكل

باوعتلها بطرف عيني بعد العروس تموت روحها علمود صخام العرس

طفله زغيرة الكل ضحك وهما ايكولون لا العروس مو بشر جايه من فضاء، مجنت احجي شي غير ابتسم الهم، شبعت يلا شلت راسي من صحن، وهنن ولا يمهن سولفن ودجله ما كلتهن اكل بالسوالف بحيث الحديث كله الها وناسيات روحهن هنن وين!!!

إجالهن صوت من وحدة خلاهن يطافرن

_ولجن راح يزفوو طلعن بسرعه

وهي صارت مرافس، هاي لتشيل صحنها وهاي لتلكط التمن، خلصن وطلعن بقت بس امي، وحور اخذت اخواني منها وبدت ترش عطور، وتعدل بمكياجي وتوصي وتنصح بيه اقترب صوت الزلم امي بعدها موجوده، ادكلي لا تخافين ومصير لبنيه هيج وآنا اصلاً و لا خايفه كل همي أنام وارتاح من الهوسه، دخل هو واكيد الإبتسامه على وجها وصته امي

_دربالك على بنيتي آمنه قطعه من روحي صح ما طلعت من رحمي بس ربيتها بيديه ثنين،

_ان شاءلله من عيوني

_سالمه عيونك، الله يهنيكم ابني ويحفظكم من كل شر زواجه مباركه عليكم وليدي

_نعمه الله عليج

كضتني ضحكه نعمه الله شنو قابل منطينه أكل بس لا حسباله آنا اكله كدامه وينسه روحه ويعضني
ابتسمت امي وهي تطلع ورسمت على وجها ملامح الحزن

تقرب مني وكال

_يا عروستي الحلوا مبروك زواج

_شوف من هسه اكلك آنا بشر مو تعضني والعباس الم عليك ديرة وكلها تعرف آمنه منوو

_شبيج ليش حته اعضج

_قبل شوي ادكول امي نعمه الله
_هي هاي حجايتنه

_بس أكل ايكولون عليه هيج لو انتم حجيكم بالمكلوب

_انتي صرتي منه وبينه ولازم تتعلمين علينه مو هيج ، وهسه منين نبدي

_والله نعسانه الف راسي ونام

_اي آنا هم نعسان بس شلون تنامين وكل هاي هوسه على راسج

تربعت وكعدت على جرباية

تعال وخرلي كل هاي هوسه خو مو وحدي اتعب

_ابدل واجيلج

الغرفة داخلها حمام اخذ ملابسه ودخل!!

_يلا بسرعه استعجل يا عريس

_ترى عندي اسم

ذكرت اخواني ولا مرا كالو اسمه كله الفاهي وعيب اصيحله الفاهي وآنا ما حافظه اسمه فكرت لازم اطلعله لقب بسرعه اجه بالي لقب وهو طلع لابس تراك ومبتسم

_يلا ابو كشرا تعال ساعدني

_هاي عليه

_غير من شفتك لحد الآن مبتسم والكشرا ما راحت من وجهك

_غير فرحان عريس وأخذت الي احبها

_عزا عزاك كون شوكت حبيتني

_تعاي اشيلج الهوسه اول واكلج شلون حبيتج

_ايبااه ابو كشرا هم يحب

_بس سدي حليكج هذا خلي اشوف شغلي

_يا شغل قابل جاي تعمر (تحرث) هنن ماشات طلعهن واسكت شبيك راح تموت من ضحك

_والله ما صورتج هيج موتيني من ضحك

_شوف هذا راح يفطس هسه ايكولون عريس فطس ومات ابو كشرا استر علينا ايكولون عليه عروسه الفگر موتت زوجها بيوم العرس

_ولعباس انتي بليه وابو فاضل انتي بليه

_ترى العباس هو نفسه ابو فاضل شكو تكرار لو عدكم زيادة بالحجي.

ما رد عليه بس يضحك مثل قندة بس جسمه يتحرك واذا يكتل روحه طلع صوت ناصي

_هسه انتي مغطيه جسمج بس مطلعتلي شعرج ترى شفت كلشي من تصوير لحد ما دخلتج بيتنا وهسه مغطايه ترى ماكو احد هنا، وانتي صرتي حلالي

_شلون بلى حلالك

_دافع بيج فلوس وعاقد عليج سيد

_لفلوس خذيتوهم وجبتولي هذين مساليب مالت مجاديه حتى لمجاديه ما يلبسون هيج، السيد كال كولي موافقه وكلتها وبس هيج صرت مرتك

_جا شلون صير زواج، محكمه ميقبلون لأنج زغيرا شوي تكبرين وروح للمحكمه، ملابس ما عجبنج من باجر انطيج فلوس وجيبي يعجبج، وهذين يولن خلي سعديه وانعيمه يشبعن بيهن، جابنهن واجن يركضن..

فرحت لأن حتى هو مراضي عليهن

_شو صفنتي ما ناويه تنزعين بدلة، ترى كلشي شفت بالتصوير ما ستحيتي

_قليل أدب انت وام تصوير ادبسززيه
_بس خوش لقطات حلوا معدلة هاي ام تصوير ويغمز

_طايحين حظ

_ياا اكو وحده ادكل زوجها طايح حظ بس يلا نتقبل كلشي منج، روحي بدلي ارتاحي

_شوف من آنا وزغيرة عاجبتني بدلة العروس واحبها جانوو جذبون عليه جيبولي بدله بس هسه بدلة حقيقيه الا أنام بيها

_كيفج طلعي فلوسها نامي بيها، بس يا حلوا هاي بيها حديد من جوا شلون ترهم تنامين هيج

.
_عادي أنام كعده اليوم

_خلصت يبوووي شلون حلو شعرج هيج احلى من هل مزبله حاطينها فوكج

_تسريحه غير

_والله شعرج هيج احلى، تدرين هسه صرتي احلى روحي مسحي زرق ورق اريد اشوفج على طبيعتج

_اهوو بدت رحمة الله وشرط علينا، اروح ابدل واغسل وجهي وانام وانت ابقى مكشر بوجهي

_يا يابه يا بويه منين طلعتيلي انتي شلون حلوا، وراح تعششين بوسط داري لعد شكد الله يحبني، شبيج ضحكين

_والله ذكرتني ب دار دور وام عليوي بالتنور هههه

_لج انتي ليش ضحكين على حجينه چا انتم ما سمونه دار

_لا، اكلك امك هم مدري شتحجي اشو سريع

_اي تلبگ لبگ

_خرب حظي اذا اقتهمت منكم شي

_باعي ايامنه طويله راح تعرفينه، ترى جاي تحسسيني احجي عجمي اشو حالي من حالج

_اكو شوي كلمات غريبه

_تتعلمين تتعلمين

_تكرر وجر حجي جر ما عدنه هيج
_لعد شوفي وقارني بين عدنه وما عدكم
تركته ورحت لحمام لبست ملابس محتشمه ونمت من تعب...

بسه/فرحانه اليوم عرس اختي ولأول مرة اكون أخت العروس بس ضايجه لأن بعد ما تلعب ويانا خسرنه خوش لاعب عرس وخبصه واحنه ضاربين عرس وكاضيها لعب ويه ريم، ظلمت الدنيا والكل راحت صاحت عليه امي اروح ويه حور وهي تبقى سمعت هيج، وبقيت ابجي وحور تعيط عليه
وجر بيدي عيب وما يصير تبقين هنا، ملو مني وعافوني يم امي وراحو جان صيف والجو حار، وبيتهم جبير بعد ما زفو عرسان كل واحد أخذ موقعه بالحوش وعلى هوا رب العالمين وافرش ونام واحد بصف الثاني، باقين اهلهم بس اهلهم هواي، انترس الحوش، بس رجلين مسدحه امي عاطت عليه نامي، ظاهرت بالنوم بس آنا عيني ما غفت بوسط هل جماهير كلها الكل نام وامي.

اباوعلها كل شوي كايمه، وادك باب على كييف مثل بايكه بوكه واصيح بصوت ناصي آمنه، آمنه، محد يطلعلها وترجع تنام لهناك هم فزت وهم نفس الحاله معرف شجاي ايصير وليش ما تخليهم نايمين، بقيت مراقبه الوضع بس عيوني خذلني وهي تستلم للنوم كعدت وشمس بعيوني باوعت قسم نايمه وقسم ماكو امي هم ما موجوده، عرفت هي يم آمنه بقيت مكاني لا اكدر اروح ادور امي ولا ادك الباب على آمنه تصنمت وبقيت لهناك وطلعت امي رحت يمها، ما خلتني ادخل وكالت ابقي بمكانج جابو مدري شنو مثل طاسه ركزت داخلها طلع نار ودخلو للغرفة حطيت راسي على باب اصنت شيسون اسمعهم ايكولون شبيكم بردتو وليل كاضينها نووم، عبرو نار حتى تحترون وتفضوها، ما عرفت شبيهم لفت انتباهي خروف زغير عبر ورحت ورا، اركض ابيض ونظيف وكلش زغير، أخذت حشيش وبديت انطي وهو ياخذ من ايدي فرحت هواي بي وفجئه اجه ابوهم وعاط عليه

_انتي هيي امشي دخلي داخل امشي.

وآنا ندحست جوا امي الي لكيتها تاكل وفرحانه كلشي طبيعي جبن وزبد من حيوان گبل للمعدة بدون اضافات، مليت من مكابله نسوان وآمنه مسويه روحها فقيرة وما تلعب، تمنيت لو رايحه ويه حور احسن للظهر يلا ودعناهم وخطيه آمنه عفناها بوسط الغرب ورجعنه بيتنه، استقبلنا ابوي وهو يتسائل على آمنه، وفرح من كلتله نطاني فلوس مهر وباجر اسوكلها من جديد،

شوي نرد من اعتبار آمنه، يوم ثاني بقينا يم حور وامي ودجله راحو وجابو انواع الملابس وما وصلن للظهر حطوهن بجنط كبار وللعصر رحنه آمنه وهي كلش فرحت بيهم رتبتهم هي وحور والفرحة ما واسعتها وهي ادكول هسه حسيت بنفسي صدك عروس...

حور: مرت 3 ايام على زواج آمنه راحت وخلتني بحسرتي، هم وحيده وهم تعيسه حسستني صدك عانس لأن لو مو عانس مجان زوجت زغيرة وآنا أكبر منها بعدني محد مگلبني كاعده وحدي وأجر حسرات على حالي دجلة اليوم يم اهلها مرتاحه محد يشرط عليه شوكت ما اشتغل بكيفي
شوي واندگ الباب رحت ركض اشوف منو حتلو بسه تملي عليه وحدتي صحت منوو
واجاني صوت الخاين الغدار

فتحت الباب

_هاا نعم رايد شي

_منو من ولد هناا

_ولا واحد، بعد رايد شي

سكت دقايق لهناك نطق وهو يكول

_ازوجت موو

_لا تنتظرك انت ابو درب غدرت بيها وتركتها بنص الطريق.

ضرب برجله حيل بالنخله يم الباب
_گله صوجي

_أيسر الندم ما يفيد، بس اموت اعرف ليش تخليت عنها، شكد انتظرتك شكد رادتك تجي وتسمع عذرك بس ماكو انت رحت وعفتها،

_ليش زوجت ليش ما صرت بعينها، ليش

_هو انت وينك، وبعدين هي بنيه واحنه مصيرنه بيد اهلنا، بس انت جنت كلشي تكدر سوي بس ما سويت شي انت بعتها وهسه هي وينها، هناااك عروس بيت بيد الغرب، هاي جنت سميها مريتي صارت مرت عماد الدين، انت سبب انت دمرتها ولك تضحك وتحجي بس هي كاتمه بكلبها يمكن هسه لو شوفك راح تنفجر كدامك،

_آمنه قويه اعرفها زين ولج مربيها على ايدي من احنه وزغار ما تفاركناا اخخخ من زواج، لو ما هو دمرني، ابوي يريدني اترك مذهبي ايمن ما يقبل اتركه وان تركته راح اخسرا، وان ما تركته راح أخسر ابوي كلت اصبر ايجوز واحد منهم يقتنع وصبرت وانا ما متنازل بس ما ادري خسارتي جبيرة ب آمنه ما ادري

_ روح أيسر آمنه ما مقسومه الك روح

_ههه هي القسمه احنه بيدنه نسويها لو محارب على زواج آمنه ما هسه صارت الي وأخذتها غصباً على الكل بس آنا اخخخخ مني مدري شبيه سحروني جلاب سحروني

عافني ومشه حتى بدون سلام حالته تبجي الكافر بس هو سبب بدمارا، خلي يتحسر على آمنه جوهرة جانت يمه بس هو تخله عنها، نبهني من كال سحروني ذكرت علاكه المرا شفتها يم باب غرفة سالم رحت كبل يم الغرفة ادور بس لأسف مكان فارغ لبست عباتي وگبل بيت ابوي، لزمت على نرجس اله تجي وياي

واجت وهي معارفة سالفة شنو
_تذكرين من يوم اهل البيت حقيقيين من اجو وياهم مرا وراحو بنص البستان ودفنوو
مدري شنو

_اي، وهسه انتي ساحتني مناك علمود هاي شبيج تخبلتي

_بوكتها انتي مو طلعتي وطلعن اماعين وشعر وجلد مال حيوان وانتي ساعتها كلتي اعوذ بالله هذا سحر

_اي حور مذكرة بعدني ما فقدت ذاكرة

_بس آنا ثوله نسيت سحر ونسيت عدنه مرا غريبه بالبيت ومن دخلت طشرتنه

_لحضه شنو شايفه على دجله شي

_مرا جاي اكنس وهي محذرتنه ما ندنه يم غرفتها، بس جانت عد اهلها ونظفت يم باب غرفتهم ولكيت علاكة سودة وريحتها تكتل مثل شي ميت، واليوم ذكرت اجيت ما لكيته،

_ايجوز وصاخه صارلها هواي وطالعة ريحتها
_لا نرجس شي بعلاكه ومدفون وآنا حفرت يلا طلعتها

_يعني دجله سوي سحر

_ليش لا ترى سالم مسحور ومو تحول ونگلب فوك حدر مو مثل قبل سالم ورا ما زوج صار عبد مطيع لدجلة وبس نرجس انتي ما تدرين شيصير
_فريتي عقلي فر، بس ... ذكرت اول ما خطب من يوم اجه ابن عمتها من كال امها راعيه سوالف سحورا بس محد صدكه معقوله يطلع حجيه صدك
_يمه آنا بديت أخاف

_اسم الله عليج خلي ايمانج قوي بالله سبحانه وتعالى وانتي ما يصيرلج شي، عوفج من هاي سوالف وشگ وسالم الله ينظر لحاله وان شاءلله لا مسحور ولا شي

_بس آنا لمعجبني منو شال هاي علاكه لا دكولين هوا مطيرها لأن مدفونه ولا واحد ياخذها وذبها لأن ما تنشاف الا واحد يحفر وآنا لو ما شفت جزء من علاكه وحفرت وطلعتلي هم جان ما شفتها
_زين انتي شفتيها وجاي تنظيف غير شمريها ترجعين دفنينها ليش

_اي صدك آنا شلون رجعت دفنتها هي مو وصاخه
_والله ما ادري سألي نفسج

بقيت صافنه ونرجس، تضحك عليه وادكول شيلي شكوك من بالج وآنا متأكدة كلش زين، نرجس مصدكتني، بس ما تريدني أخاف، من يومها ابتعدت عن دجلة الاف أمتار وصرت أخاف منها وشغله دكلي سويها اسويها واسوي زيادة هم، وهي ربحانه صرت اعتمد على نفسي وعماد ما مقصر وياي دائماً ينطيني مصرف، اجمعهم وانطيهم نرجس جيبلي جكاير ابيعهم على الولد من يجمعون بليل ورجعت على سالفة جكارة ومحصله منها ربح بس حتى ما اطلب من اخواني اي شي احتاجه انطي فلوسي نرجس وهي جيبلي، لأن كل طلعاتي بيت ابوي وبيت عمي ابو رافد وآمنه هم قريب بيتهم، بس ناس غربه اروح شويه يمها واعبر صوب بيت عمي، رافد من آخر مرا صرت اتحاشاه والمكان موجود بي اطلع منه وهو جياته قليله للعراق اكثر شي مسافر خارج العراق وبهيج آنا ما اشوفه ولا اشوف مرته العوبه بس ضحى اروحلها وهي تجيلي بيت ام ضاري قليل صارو جياتهم النا بعد ما زوجت آمنه، وضاري المعقد مانع البنات من جيه وهم عدهم دراسه زينب صارت معلمه وزينه بالمتوسطه،
وام ضاري قلت جياتها بسبب دجله ما تريد احد ودائماً سمعها حجي كفت رجلها منه، وهاي حياتي عايشتها بملل واقهر بروحي وفقدت الثقة من نفسي لأن محد اجه ودك بابنه و يخطبني، ومليت من سؤال ماكو احد خطبج منا مناا وآنا أزيد بالقهر وحسبالي يتزوج يرتاح وحسبالي من ازوج راح اسكت حجي الناس نسيت الناس كل همها الحجي وبس...

_اصبيحه حبوبه خليني اجرب شلون سوينه
_ياا تعاي منو لازمج الدور ترديني امنعج وآنا فادي رايح منهن علوا تتعلمين وحتى أخلص منهن بس انتي عروس اذا زكطتج (ضربج) برجلها وتعورتي آنا معليه اكولهم هي رادتها

_انتي معليج آنا احب حيوانات
_لعد تعاي اخذي مكاني

تقربت ولمست بقرة بيدي وملمسها ناعم حلو وآنا اكلها دربالج تضربيني

_خايبه هذن هوش انتي تحاجين منوو دتعاي نشوفج بلا دبريها لا

_خاب آنا آمنه كلشي اعرف

تقربت منها وبديت احلب بيها وحليب يطيح بطاسه وآنا فرحانه وصبيحه يمي سولف وادكول
_اليوم لبينتنه من ايد عروستنه

واخذني الواهس لمن ما كالت كافي
_الباقي يبقى لبنها يرضع منه

_ياا خطيه شبقاله، هم حليبه وهم لاحكينه ورا
_جا احنه نعلف ونتعب على تربيتهن وبعدين ما نستفاد شي

_اكلج هسه هذا حليب وين تودونه نخلي شويه وانحطه بالمخضاضه( آله عمل لبن) ونسوي لبن
_علميني شلون شلون سوونه
_تعاي وراي

_ولج صبيحه انتي ماكو شي ما تعرفينه
_صارلنه هواي نربي بالحلال وهل آنا من دون خواتي مدمغمه بخدمتهن

_انتي ليش ما تزوجين

_ومنو ياخذ صبيحه ام رجلين لمفطرة وايدين السود من ورا حلال وحش الحشيش
_جاا ليش ما يساعدوج.
_حبوبه هذاكين خواتي مدللات بس آنا باقيه للخدمه ولكراب..

كلش نقهرت على صبيحه وهي بدت تعلمني وفرحانه على فرحتي حطت حليب بآله مصنوعه من فافون على شكل سطوانه بنصها قبق يتفرغ بي حليب ومشدوده بحبل من جهتين كعدت أخضها حيل وهي ادكول بعد يرادلها وبقيت اخض بيها لهناك كالت شوفي فتحتها واشوفه تحول الى لبن وصفار تجمع بكتله وحده وصار زبد فرحت وهي طلعه ورجعت كالت

_اليوم لبينتنه من ايد عروستنه

وآنا فرحانه واضحك صدك شعور حلو وانت متعلم شغله جديدة، هي اخذت لبن وآنا أخذت آلة الخض وگبل اغسلها بالنهر امشي وامشي نهر قريب عليهم وبيدي آله وما احس الا واحد لزمني من ورا التفتت شفته وطاحت من ايدي آله ولد ضعيف وروحه رايحه امبين بعده زغير بس بي شيب لازم نعاله بيده ملابسه مشكوكه وجها اسود وذاناته كبار يأشر بيده ويصيح

_إبااه إباه
رجليه يبسن مثل طابوكه اريد احركهن ما اكدر، اريد اشرد بس رجليه ما واسعتني بقيت مثل صنم واكفه واطلب الغوث....

يتبع....

لا تنسون تصويت وتعليق حلو مثلكم 🤍♥💜