༺༺༺༺༺༺༻༻༻༻༻༻
حلقة (25)
#جُمِّلْت أخلاقها
✍🏻كاتبة الجنوب
_______________بسمه تعالى ______________
أتسائل بيني وبين نفسي
لماذا اذا أحببنا أعطينا لمن نحب
كل ما لدينا وهببنا أنفسنا له
لماذا لم نترك جزء صغير من الكره
ونقدمه له عندما نكتشف بأنه لا يستحق
لماذا نغلق أعيننا ونعتبره ملاك وبعدها،
بعدها ماذا؟؟
بعدها سيخيب ضننا بهم ونعود الى نقطة البداية....
حور: البيت اذا كله ولد مو حلو لأن راح يكون فارغ دائماً وهدوء تام ناهيك عن تجمعات الليل وضجته كل ناس عدهم ليل للنوم وراحه الا احنه سهر وضحك واصل للسمه،
كاعدة وحيدة هدوء لا صوت آمنه وعركاتها ويه بسه ولا سليم وصياحه وضربه آمنه ولا صريخ نورس ونرجس تعيط علينا أخذو أختكم موتتني،
ماكو فراغ بس حور باقيه وحيده عدنه حوش (يصير بدون سقف مساحة واسعة بالبيت) كل يوم أنظفه وأشر ماي لأن تراب مو صبه كاعدة بعتبت الباب غرفة أنتظر آمنه ماكو والواحد من يصير بحياته فراغ تبقى أفكار تاكله أكل إجه بالي أمين!!
هم خطيه لأن حب وحدة ما تحبه وانا حبيت رافد وهو ما حبني مدري يحبني وهو يكابر ضربت على راسي حور كافي حبج رافد طلعي من راسج رجال يفوق عمرج أضعاف يا حب هذا،
أرجع اكول هو حب ما يعرف أعمار، نكتت ايدي اوووف انا جنت احجي على أمين شجابني على رافد!!
جان يندك الباب رحت ركض وأخيراً اكو احد ذكرني فتحت الباب دخل عماد هو يمشي سريع
_حور بسرعه طلعيلي ملابس ومسحيلي حذاء راح اسبح على سريع
دخل بسرعه حتى ما كال شبي وين ايريد يروح رحت سريع حضرت ملابسه وكعدت امسح حذائه ثواني وطلع أخذهن ويلبس بيهم
_ليش مستعجل وين رايح
_روحي طلعيلي مشط ودهن شعر
رحت سريع جبتهم
_شوفيني شلوني طالع
إبتسمت كتله...
_عريس ما شاءلله
_ما بقى شي واصير عريس
_وجدان عروسه موو
_كولي ان شاءلله
_على أقل تملي علينا الييت ضاله وحدي
_انتي بس دعيلي.
_إن شاءلله يارب تزوجون تملون بيت عيال، بس وين رايح وهاي كشخه كلها
_يعني بينت الگشخه من شوفني ادكول الله شكد حلو
_شنو رايح شوف وجدان
_اليوم المشيه مالت أمين، وهما هم اجو
_هاا يعني أمين خطب
_هو راح نخطبله
_الله يوفقه، شعجب ما كالو
_بويه بس زلم
_ومنين خطب أمين
_من بيت حوثي جوارينهم
_بس لا هذول نعسان والفاهي يجون
_اي هماا راح ايصيرون نسابته
_شلونها اختهم عاد
_هسه هم تلكينها منعسه وفاهيه
_الله يعينه لعد
_ايكولون بناتهم حلوات
_اي بعد هو يمشون على جمال
_روح لا تتأخر على حبيت الگلب
_بس كون أكدر احجي وياها، إدعيلي
_ان شاءلله تلكى زاويه مابيها أحد
جر نفس وتنهد رفع ايديه لسمه وصاح آمين
وطلع،
ضحكت على سوالفة وهذا عماد طلع هم واكع بحر الحب شييكم ال بندر گلوبكم رجيجه،
تنهدت الله يوفقك أمين وتنساني، عرفت من إجه جانو اهله مصريين يخطبوله وإجه ياخذ رئيي بس ما وصل حل، يمكن هي هاي الي سمونها قسمه ونصيب،
عماد: بيت عمي ابو رافد وبيت حوثي الي هما اهل لبنيه جيران بعد كم خطوة يعني لا سيارات ولا شي يتمشون، زلم هواي نسوان هم رايحات بس لكبار،
وانا وانا بويه أعاين عليها بلكت ألمح طولها عرفت هي جايه لأن عمتي متعوف بنياتها وحدهن بس اكيد بيت عمي وبيت عمي واحد من يدخله يغوص بي بعد ما تندلى بس انا اليوم اشو ما اتحرك منا اذا ما اشوفها مو إله أحجي وياها المهم أكحل عيني بشوفتها، بقيت أحوس مثل الوحده تطلك وتريد فرخها يطلع،
لهناك شفت بنيه زغيرة تأشر عليه باوعت وراي محد أشرتلها انا، سوت حركة بيدها بمعنى تعال رحت صوبها
_هاا عمو شتردين مني
ساحتني مناك
_هاي لبنيه تريدك هي كلتلي صيحيله
_بويه وينها لبنيه
_هناك، هنااااك
رحت للمكان أشرت بي لبنيه مشيت شوي جان أنصدم من اشوفها وجدان
_هاا يبت الناس
_أجيت اشوفك
_يبعد جبدي والله هيج شوفتي تهمج
_اي
_جاا شكول على نفسي وانا رويحتي عطشانه بيج بويه
إبتسمت خجلانه
_فديوا رحت للخجلان
بس مو حلو سويتي هذا، اذا ترديني انتضري اجمع فليساتي وتقدملج وصيرين ملكي وحلالي، يبنيه ترديني انتي.
هزت راسها بمعنى اي .
_ضربت على رجلي بويه غير انا اموت بيج يبنيه .
تقربت عليه ولزمت ايدي بس مو لزمة ليكول جمرة وايدي جليد وذوبتني، معت وعلي موش بنيه بقيت أمتمت
معرف شحجي
_هواي صايرة أفكر بيك
لا تعوفني.
مدري شحجي شكول تاهن كل كلماتي ونسينا احنه وين لازمه ايدي وعيونها بعيوني انا عماد خجول يخجل من خياله اليوم هو ضايع بسواد عيونها تخلى لساني عني وعيوني صارن متشوف غيرها،
إنتبهت نزلت ايدها بسرعه وحطت ايديها على وجها وتأشر وراي التفتت واشوف احمد أخوها جاي يا كاع أنطمي وبلعيني أنتظرته يوصل اول ما وصل جرني من قميصي من ورا، وصاح
_شسوي هنا يم اختي
_بت عمتي شكو بيها
_وبت عمتك تلزم ايدها على يا أساس، انتي هيي دخلي داخل حسابج بعدين، وأنا جرني تتختل ويه اختي
_بس أفهم شنو تتختل مو عيب ابن خالك قابل غريب
ماكو ما يسمع عصبي وعيونه تجدج من العصبيه جرني من ايدي وشمرني يم باب بيت عمي ولزلم موجوده رجع جرني من قميصي ابن كح... ما متربي كواد
سمعته هيج وأكومن على حيلي وتولاه بوكسيات، وما أشوف أله سالم اجه سريع و شبك رگبته من ورا وأشبعه تكفخ، ودرنا عليه اثنينه وشبع طن ضرب ما فكينا الا بتواسيل
عاط عمي
_ولكم شبيكم ويه وليييد عمتكم
رجع كال
_كواويد انا أعلمكم، حسابكم يمي.
جاوبه سالم: شتريد سوي سوي
التمو يمه ولد يهدونه تركهم وراح وهو يتوعدنه
جرني سالم وأخذني على صفحة
_شيريد منك ليش هيج صاير عصبي
_بعدين اكلك انا رايح للبيت، مالي خلك،
_اووف منك عماد هسه مو وكتها ما تعرف احمد زين
_هو جاوز عليه
_بس خليتني أبرد گلبي وانا من زمان غاثني..
_انا رايح
_شوي وأجي للبيت
_براحتك
امشي وكل عقلي يمها خاف يسوي بيها شي بقيت ألوم روحي وصلت للبيت تلكتني حور
_يمه عماد هاي شصاير بيك طلعت گشخة واجيت مبهذل
_بعد شسوي هو هذا حظي لا سألين اي سؤال راسي يوجعني وراح انام لا ادكعديني حتى يجي عليه كليله ما موجود
وراح عماد وما عرفت شنو قصته ..
بيت ابو رافد:
وجدان: دخلت للبيت مثل الحرامي بايگله بوكه وما عنده مكان يضمها، ضميت نفسي من العالم وانا انتظر حكم اعدامي من احمد اباوع على باب ومنتظرته يجي،
نسوان سمعن عيطت زلم وكلهن هجمن يم باب، وانا اباوعلهن من البعيد
ضربت امي على ايدها وهي اصيح ابني راح يكتلونه ولد بندر، وثانيه اصيح واحد راح يقضي على ثاني هذول شبيهم تذابحو ،
ما يدرون انا سبب!!
بقيت بنفس مكاني وهنن يصرخن عليهم، عله صوتهم و الناس فزعت و النسوان گلوبهن بشيشه، دخل أحمد صاح راح أجيب سلاحي اليوم اسويج جنازة وأزتج للمقبرة بيدي، ما ضل علينه بس هذا لمنتف
_شبيك يمه
_شفتي، شفتي ولد اخوج سوو
_اي شنو صار منا ودرب
_سألي بتج كليلها شنو صار
_يا بت
ما كال وطلع
_اجت شافتني بزويه ضامه روحي جرتي من إذني وبقت تضربني
_انتي ورا سالفه خليتيهم يتذابحون احجي يمعزايه شمسويه
_ما سويت شي
_ما مسويه وكل هل خوف ودموع تصب احجي
_يمه
_وغمااا ، والله راح ذبحني انتي وخواتج
_ما سويت شي ما سويت
_امشي ولي من وجهي ما اريد اشوفج
عفتها ودخلت للغرفة وسديت باب
لهناك هدأت وأجتلي
_محد هنا وحدنه احجي شنو صاير
_حضنتها وانا اكلها يمه احمد شافني انا وعماد وحدنا
_وانتي شسوين يمه وحدكم
_يمه مو عماد
_شبي، بلا باعيلي تحبينه
_اي
تنهدت وجرت نفس
_عماد فقير وترباية اخوي مستحيل يسوي شينه وياج، بس شبي أحمد هيج مسودن
_لأن شافني لازمه ايده
غمتني وهي ادكول
_انتي لازمته هم مو هو، وهو حصل ضرب من وراج يمه منجن بنات ابو احمد ما علمتج على طيحان الحظ، اكول الولد فقير طلعتي انتي سبب
_يمه شراح اسوي خاف أحمد يذبحني بعد
_شحداا وانا موجودة
بس انتي غلط راكبج من ساسج تتمعشكين كدام العيون تحملي ليطلع من أحمد
_يمه بعد هي صارت
_كافي حابسه روحج بالغرفة ولعيون عليج لا تحسسينهم مسويه فد مكسورا
_ماشي
مسحت عيوني وطبعت بوسه على خد امي وطلعت وراها وكأن كلشي مصاير وانا أبتسم للوجوه. امي هواي حنينه علينا لو شما نسوي، دلالها النا ما ينوصف لهذا ما نخاف منها خوفنه من أحمد بس امي لا صديقتنا مو بس أمنه.
بيت ابو سالم:
آمنه شوفي نورس شبيها تبجي.
_حبيبتي نوروسه منو وياج
_اشوفها تأشر على حلكها بس ما فتهمت شبيها، بقيت أباوع على حلكها واشوفها دوده كارصتها من لسانها
_يااا تأذيتي حبيبتي
وهي مفرفرا من بحي أخذتها وطلعت بيها أتجول بالبيت الا أن هدأت خطيه لكيتها نايمه حطيتها بفراشها، شفت الدنيا راح اصير غروب،
_راح اروح للبيت
صاح ابوي
_ابقي لا ترحين
_يباا وحور تخبصني خبص تخاف وحدها
_معليج بيها يمها الولد
_اي يمه ابقي نومي نورس على ايدج تشلع گلب خالتها متعلمه عليج
_يلا لعد مدام هيج تعالو نلعب، ابوي سوانا
مرجوحه كلش عاليه، اصعد بيها وهز نفسي حيل احس طايرة بالهوا
شعور حلو وانت شوف نفسك فرحان، بس مو كل فرحة تكمل..
حور: عماد غط بالنوم وانا افكر شصاير وياا راح مرتب اجه مبهذل والوجه مزلق، سليم هذا ما محسوب عايش ويانا لأن باقي بين مدرسة والدجاج،
بعد فترة ما نستغرب لو نبت بي ريش لأن يكضي نهارا وهو يم دجاجاته ما يفاركهن ولا ثانيه، صار مغرب وآمنه ماكو عرفت بعد ما تجي لأن اعرف ابوي ما يخليها ترجع المغرب، وسالم ما رجع، وبس انا أفتر بلبيت
وما أسمع اله صوت سيارات طبكن يم الباب، رجف گلبي يا ستار منو جاينه انتظر الباب يندك حتى أفتحه وما احس غير باب اندفع حيل ومن القوة طاح ودخلو مجنديين وكلمن لازم اسلاحة بيده رعب سيطر عليه، صحت بصوت يرجف وبكلمات شبه مفهومه
_ششتردووون
محد حجه وياي دخلو يفتشون بلبيت رجليه ما عاد يوسعني كعدت نهد حيلي، شوي اجو يهرولون دكو تحيه هذا واكف ويباوعلي
_لكينا واحد ونايم
أشرلهم بمعنى جيبو
سحلو من فراشه وأخذو وهو ايصيح عوفوني ما مسوي شي
صاح عليه
_انت سالم لو عماد
_عماد، عماد من الله ياخذني.
_صعدووو
تقرب من يمي ورعب تملكني حطيت ايدي على حلكي وما سيطرت على دموعي، ما اشوف غير سليم اجه صار كدامي وهو بعده ما تحرك من يمي
_كله خير رايد شي
_سالم وين
_ما ندري وما موجود بالبيت،
_بعد رايد شي
لزمت ايد سليم عصرتها حيل أنبها حتى يسكت هذول ما يتحاجون وهو زغير خاف ياخذونه بعد
رجع كال وهو رافع تك حاجب
_انت بعدك زعطوط لا صير سبع براسنا وطلع.
ضغطت على رجليه وطلعت وراهم لكيت جيش مطوق بيتنا وسيارتين يم البيت أشرلهم ينسحبون بين ما هما ينسحبون ومجتفين عماد ويردون صعدونه لسيارة اجه سالم يركض ويصيح
_وين ما خذين اخوي
_انت سالم
_اي سالم وين ماخذين اخوي
صاح عليهم أخذو
لتمو عليه وهو ايريد يفلت روحه منهم ما يكدر جتفو جاي يصعدونه بالسيارة واجه أيسر دفع واحد منهم وهو ايصيح.
_وين ماخذينهم
_عاط عليه لأن دفعه وظاهر هذا جبيرهم،
أيسر ما سكت عاط عليهم بصوت عالي
_انتم شعدكم وياهم
أشرلهم ولتمو عليه جتفو وصعدو أيسر بالسيارة وراحو
لازمه سليم حيل لأن حيل عصبي كل شوي يلزم حجارة يريد يضربهم وما خليته رجليه ما عاد يحملني كعدت بعتبت باب شارع ونعاد عليه نفس الموقف
الي كل مرا اكول خلص نسيت يرجع انصاب بموقف ترجع كدامي هذيج حادثه،
ولد عمي بدو يتوافدون واحد ورا ثاني، كل شوي
واحد جايني دخلي وانا ابجي بهستريه وفاصله عنهم اجاني واحد عاط بصوت عالي وانا ولا يمي رجع صاح
_لشوكت تبقين ضعيفه عرفته هو بس ما رفعت راسي ولا باوعت لوجها جرني من ايدي حيل ودخلني للبيت صاح
_لج كاااافي، كااافي
وانا مو يمه فاصله عن الدنيا
رجع ضربني راچدي وعاط
_اصحي
فزيت من حرارة راچدي عطت
_انت شسويت وبجيت
حضني حيل وهو يكول
_كافي ادري قسيت عليج بس حتى تصحين
هنا ذبيت شكو دمعة بعيني ما لكيت نفسي غير وانا أبادله حضن وبقوا، حسيت بأمان هديت وانا بين أحضانه مثل طفلة صرت ولكت ابوها بقينا متحاضنين وانا بس شهكاتي مسموعه مردته يهدني وانا متعلكه بركبته وريحته طاخة خشمي الي صار زمن ما شامتها ، لهناك تنهد وهو يبعدني عنه
_استغفر الله خليتينه انطيح برذيله، اصحي حور كاافي بجي رحمه ل اهلج
_رافد،رافد أخذو اخواني
_يطلعون صدكيني يطلعون
_مسحت دموعي صدك انت تكدر طلعهم
_قابل يبقون سنين
_خاف يعدموهم.
_قابل مسوين جريمه اخوانج فقرا لا تخافين عليهم
_يعني ما يعدموهم
_بيمن طالبتهم
ذكرت ابوي ابتعدت عنه طلعت قبله
عاط وين رايحه
_ابوي ما يدري
_هاا وانتي تردين كليله
_اي
_واحنه هنا كدامج خراعت خضرا حتى أخليج ترحين بليل وحدج، هسه الولد يرحوله وما أخليج تبقين وحدج اله يجي عمي يلا اعوفج وطلع يم الولد مجمعين يم الباب..
ريحني بكلامه، رفعت ايدي للسما يارب اخواني بين ايديك انت ارحم عليهم من بشر، رجعهم النا سالمين يالله ..
كل مرا رافد يكون منقذ الي بس هو يكدر يصحيني بس هو شوي ورجع دخل وياا سليم
باوعلي كال
_هاا ام دميعه بعدج تبجين
_لا
_ههه هو دموعج هاي ما يخلصن لو يجددن بين فترة وثانيه.
ابتسمت على كلامه
وهو هم ضحك
_سليم ما جوعان اسويلك شي تاكله
_لا
رجع رافد كال
_زين بقيتي تعرفين طبخين
_كبرنه وهذا البيت كله صاير جوا ايدي
_شاطرة بس دموعج قضيه
_ترى موقف أنحسد عليه وحدي بلبيت ودخلو عليه مسلحين وكل واحد عضلاته هل كبر شتريدني اسوي
_تبجين
_اي ابجي
_دلاعات بنات هلوكت مايعات
سكتت عنه ما حجيت اباوع على سليم شلون صاير نار ولعيون تجدح يبوووي هذا سليم غير على اخواني،
لهناك اجه ابوي مرعوب
_هاا يباا صدك خبر وصلني
_اي
صفك ايد بيد وصاح ضاعو ولدي
جاوبه رافد
_كول يا الله، هذا وكتنا غير يختلف عن ذاك الوكت
_شيختلف وهو صدام بعده يحكمنه
_بس ايده خافه على وشك انكوله باااي
_شتحجي بويه انت
_بعدين تعرف
صاح حور امشي انتي وسليم لبيتنا رايح انا للمركز
_وين تروح هسه ليل ومراح تستفاد شي
خليها للصبح
_والله لو ابقى كاعد يم باب مركز اتوسل بيهم بس اعرف شصاير وياهم
_لعد امشي انروح، اجيب سيارتي
طلع هو شوي ودك هورن طلعنا وصلوني انا وسليم بيت ابوي
وهما طلعو
وستلمتني نرجس وانا سولفتلها كل صار، بقت تدعي يطلعون بالسلامه لحضات واحنه ننتظر على نار لهناك اجه ابوي وهو معصب ولعيون حمر
صحنا بصوت واحد
_شصاير؟؟
يتبع...
ذكرت هناا بيت الحوثي لأن راح نفتحلهم باب وحدة من البطلات راح تدخللهم جنه!! تتوقعون منو اكتبو توقعاتكم...
لا تنسون تصويت وتعليق حلو مثلكم واذا عجبتكم شاركوها مع اصدقاءكم
احبكم...