༺༺༺༺༺༻༻༻༻༻
حلقة (2)
#جُمِّلْت أخلاقها
✍🏻كاتبة الجنوب
_____________بسمه تعالى _________
قندة: أنرعب من اشوفه معرف شلون راح نكون
سوا لسنين ونقضي كل عمرنا سوا بين تفكير بالمستقبل
وهدوء البيت مفروض أنام لأن باجر زواجي
فرحانه راح ألبس فستان جميل ومكياج ويتغير
شكلي وأصير عروس والكل تنعجب بيه وأهم شي
كريم أريد أشوفه جمالي حلم كل بنيه هاي لحضه
وهاي انا جاي أعيشه التفتت على ايدي الي مشدده
من ورا سالفة الحنة وأرجع اشتمها بعد ما كنت أذوب بريحتها
لكن اليوم ريحتها مختلفه مو مثل لهفتي وانا طفلة
حتى ريحة الحنة أحسها أختلفت بإختلاف المناسبه
تختلف وانا عروس وانا وطفله وفرحتها بلعيد تختلف تماماً...
بقيت بين افكاري وخوف من مستقبلي غفيت ما
كعدت الا وجه الصبح وبدت أصوات عاليه وصياح
ورجعت نفس الفوضى فتحت تك عين ونعاس
ماخذني رجعت غطيت راسي بالمخدة اوووف هذا
بيت كله ناس تروش شوكت نامو وشوكت كعدوو
يربي أريد انام،،
نجرت المخدة مني ضحى وهي اصيح ولج كومي
شلون عروس ما خذينها
_ضحى خاطر الله اريد أغفى عوفيني
خايبة كومي اليوم عرسج كافي نوم والله فشله
منهم قندو كومي
هفف متخلون واحد براحته
كومي ما كاعدين بلبيت
كايمه كايمه يربي
رفعت راسي ذكرت انا وين رجع الخوف تملكني
اليوم عرس اليوم اهلي يعوفوني
اليوم آخر يوم الي بهاي حياتي راح اصير مزوجه
وبدل ما يكولون بت افلان راح ايكولون مرت فلان
معرف شنو ضاملي قدر وشلون راح تكون حياتي
تنهدت وكمت غسلت لحضات جميله وانت شوف
العالم مخبوصه بيك وكلها مهتمه مثل اميرة اليوم
دلال ومعاملتهم حلوا واشوف مرت ابوي وضحى
وحور مندمجين وياهم كأنهم يعرفوهم من السنين.
قدمولي أكل وجوهم مبتسمه وهما ايكولون
يلا عروستنا أكلي لتبقين جوعانه
فرحانه بكلامهم حلو وطايرة بالأحلام بس اكو
غصه الخوف متملكني اهلي راح يعوفوني
ويرحون بيت غريب والأضرب بعيد عنهم حيل
بعيد كملت آكل صاحولي أغسل وبعدها دخلت
بلغرفة وإجت ام صالون وبدت تشتغل وحضرو
فستان الأبيض تشتغل وسولف وتضحك وحور
وضحى ما قصرن وياها وهم يردن اسويلهن والكل
بدا يتحضر للعرس
خلصت من مكياج وتسريحه وصار دور فستان
الأبيض،
ساعدوني بي واني ألبسه حسيت بأن انا
أميرة فعلاً، خلصت من لبسه وهما كلهم كالو
طالعة كلش حلوا وبدت تعلى صوت هلاهل
شعور حلو تملكني وانا اشعر بالفرح توجهت للمرايا
اشوف نفسي وفعلاً كلش حلو تملكني الغرور
وبعقلي أكول اشوف كريم شيكول عني حبيت
نفسي وبقيت متأمله حسني وجمالي بالمرايا،
وبدت ام صالون تشتغل للبقيه واكيد حور وضحى
هم يردن يغيرن شكلهن وهم لبسن فساتين كلش
حلوات صارن وبدت الزفة وأغاني ورقص لهناك
وكالو اجه العريس دخل كريم بقاط اسود كلش
لايك عليه وشكله متغير هواي
اجه كعد بصفي وكل ساع وحده اجت يمه مرا خاله
مرا عمه وهو يسولف وياهن بعدين التفت وانا كاعده
مثل حجر همس يم إذني وهو يكول شنو هل
جمال هذا كله ملكي..
خجلت منه وهو ابتسم وهن يرقصن ويجن يمه
بدينا ناخذ الصور لهناك صار وقت الوجبه بدو
يحضرون أكلهم دخلت للغرفة ومثل كل الأعراس الي نروحلها ،
الى أن صار موعد زفاف هنا دخل كريم وتوتر باين
على وجها أخذني بين احضانه وانا ميته خجل هو
يردد وفيت بوعدي وهاي انتي اليوم بين احضاني
بعد وين تفلتين مني وبدت ليلتنا بحب وسلام
وخلصت مشواري وانا بنت وهسه صرت زوجه ل كريم
صبح بعد ما جابو أكل وهو بدا ياكل وكل شوي
يوكلني حسيت بسعادة ويااا بعدها نرجس واهلي
رجعو بعد ما سلمو عافوني وانا دمعتي بعيني
بقيت وحيده فريد بيت كريم وهو ايكول بعد
بححح ماكو اهلج امج وراحت ضليتي بحدج هو يضحك وانا ميته خوف....
حور: بعد ما خلص العرس رجعنه بس هل مرة
بدون قندة ضجت حيل تمشي سيارة وانا مختنكه
فقدت شي عزيز قندة ماكو رافد مسافر راح أرجع
للوحدة جريت حسرة يمكن الي وياي سمعوني
شسوي بعد منو اتعارك وياا منو ايصيح عليه أدري
بيها تخاف علينا قندة مو اختي قندة امي صارتنا
ام حنونه ومع كل هذا أعاندها لأن محب أحد
يدخل بيه أحب اسوي شي لبراسي وبس ما اسمع
أحد أعتبر نفسي انا صح وهما خطأ وشي أريده
آخذه افكر بحال مسكينه قندة صح هي اكبر مني
بس ماخذة دنيا فطريتها ما تعرف تصرف وشغلة
اسويها تستفسر الف مرة مسوي شي لبراسها دائماً
أحسها متردده عقلها كلش زغير مو ناضج معرف
شلون ادبر أمورها ودبر حالها
طريق رجعة مكان قندة فارغ وضايجين
الكل ساكت وخاصة مرت ابوي علامات الحزن باينه
على وجهه مرات أصفن أكول معقولة هيج تحبنه
وليش حتى تحبنه شجابرها هي امنه الي ولدتنا
عافتنا وما حافظت علينا معقولة هاي الغريبه
تحن علينه اكثر من امنه يمكن هي صح تحبنه
بس انا عقلي مجاي يستوعب هاي المحبة حتى
لو ستوعب أرجع و اكول راح يجي يوم ونشوف
وجها الحقيقي وصلنا للبيت فارغ هدوء محد،
دخلت انا وراي نرجس احس راسي راح ينفجر
هلكد ما طريق بعيد أخذت مخدة ونمت ما سألت على احد ولا أريد اعرف وينهم
معرف شكد نمت بس كعدت على ريحة اكل ولزمت
بطني حيل فارغة اروح ادللج صدك جذب شعندي
غيرج تمشيت گبل للمطبخ ما اشوف غير
آمنه: بعد وكت جان بقيتي نايمه ست حور
حور: يمه بسم الله منين طلعتي
تخصرتلي وكفت
آمنه: اي حقج رحتي جم يوم ونسيتيني
حور: يااا شبيه أنسى هيج وحدة
كرصتها من خدها
آمنه: وهاي الحلوة عفتوها وحدها محد فكر بيها
وشلون حالها وشلون دبر أمورها عتبي عليج يا
حور عود انتي اختي عفتيني ورحتي
حور: انتي ثوله وجبانه شكد لحيت عليج امشي
امشي وانتي ما قبلتي جبانه شسويلج
آمنه: غير ما يقبلون
حور: وهاي انا رحت وغصباً عليهم هههههه
اجاني صوت هز ذاني هز
_غصباً على منو ولج
التفتنا صحنه بصوت يرجف سالم
تعاي تعاي اليوم أعلمج وانا شلون متحلف بيج
واتانيج ترجعين تعاي أعلمج
صرت ورى آمنه وانا ميته خوف عيونه حمر
ورجفت صوته تخوووف
_ههي هههي مو احجي وياج غصباً على منو
_والله آخر مرة ما أعيدها
_هههه آخر مرة، اول شي كسرتي كلامنا كلنا ماكو
روحة بس انتي رحتي وغصباً علينا هااا
بدا يشكل بقميصه وهو يتقرب علينا
لزمت آمنه قوي وهي ادكله
'بعد ما تعيدها ل خاطري يخوي لا تضربها
_وخري لج اليوم اكسر راسها تكسر جرني من
ملابسي وانا أرجف وبس دموعي طيح
_والله يخوي ما أعيدها
_غصباً على منو ولج ضربني اول ضربة على راسي وانفتح شعري وانا اصيح اخخخ شعري والله ما اعيدها
_لا وبعد الج عين تعيديها اليوم أجنزج منو خلصج مني
بقيت اصيح احس عظامي تكسرن لك سلوم
_ اخخخخ
آمنه: فدوة سلوم راح تموووت
عله صوتنا وأجت نرجس صرخت
_لا سالم لا شجاي سوي راح تموتها لزمته من ايده
كافي كافي
_عوفيني اليوم أجنزها اطلعها من البيت إجنازة
_لك يا جنازة اسم الله
زين اي كتلتها وبعدين راح
تدخل للسجن وتكضي حياتك كلها بالسجن وتحرم
شبابك من الدنيا وبعدين شراح تحجي للناس
ادكلهم والله لأن كسرت كلمتي موتتها منو راح
يصدك كلي لا راح يكولون مسويه مكسورا وسالفة عوجه
سمع هيج تنهد خلي تكسر كلامي وترفع صوتها
وشوف!!!
_لا هي حبابة ما سويها
رفع صبعة بصيغة تهديد
التفتت عليه نرجس وهي تحط صبعها على حلكهت
وسوت حركة بمعنى كافي غمضت عينها وحطت
ايدها على صدرها بمعنى لخاطري
نزل صبعه سالم وتنهد وطلع
طك الباب حيل بعصبيه
تنهد وانا ألم بكل ضلوعي معرف وين يوجعني مرا الزم كتفي ومرة راسي حرت شنو إيذيني
نرجس: مرا ثانيه لا تستفزيهم انتي غلطانه فوكاها
طولين لسانج اكيد مراح تلكين غير الضرب هو ولد
ودمه حار واخوكم الجبير لازم تحترمو ،
زفرت ب هههههف ودخلت بدون ما احجي اي كلمة
بيت ابو رافد في ساعات متأخرة من ليل وهدوء
عام بالبيت ومع هذا هدوء هناك في زاويه
أنين لفتاة أرهقها العشق ونهارت في جريان
الأشتياق حتى أفاقت وهي تنتظر صوته لعله يأتي
معتذراً لكن سرعان ما تيقنت بأن الحب مثل
الحرب لا اعتذار فيه..
سمر: اليوم راح يرجع سالم من صيد وكالعادة
وصولهم مع أذان فجر حفظت كل اوقات روحته
ورجعته بقيت انتظرا وهل مرة لازم احجي وياا
كافي تعبت انتظر واتمنى مبادرته اليوم راح احط
حل قلبي تعذب ومو ذنبي اذا غلطت سبحان ما
يغلط حاطه ايدي على قلبي وانا ستجمع القوة
وستجمع الكلام انتظرتهم بعد ما اجو ودخلو للبيت
نزلو كل الي صادو اسمع حجيهم ومداحرهم الا أن
عرفت خلصو وأخذ حصته سالم وبدأ يودع عمي
زهير راح عمي بيتهم وسالم تحرك للبيت باوعت
هدوء ولا صوت بعدها سماء ظلمه كطعت طريق
على سالم صرت مقابيله شافني نصدم وبقى
صافن تكابلت عيونه وبدت نظراتنا تعاتب شكد
جنت محضرة كلام بقلبي لكن سرعان ما أختفى
وضاعن كلماتي بلمعت عيونه كطع الصمت وخر
عيونه عني وهو ايكول
'_هاا سمر شعندج كاعدة لحد الان
_يهون عليك
_شلووون!!!
_باوع بعيوني واحجي
جر حسرة وهو يكول
_علميني يا سمر شحجي؟؟؟
زفرت وغضب باين على وجهي تقربت يمه لزمت ياخت قميصه
_شلون هنت عليك تتركني هيج طلعت ما تحبني
_هههه حبج هنا
وأشر على قلبه
رخت كل ملامحي وقلبي قشيم فرح
_ليش تاركني
_كدام كرامه يسقط الحب يا سمر ما انسى كلمتج
وانتي تذكريني انا ابن منو وشنو امي
يا سمر احنه بالبدايا وهاي جانت حجايتج لو نزوج
وصير عدنه جهال هم راح تعيدين نفس لحجايه
وهل مرا المن لجهالي
_من كل عقلك ترى حور هي ستفزتني وما ادري
شلون طلعت مني هاي كلمه والله مو قصدي
_اششش ما ينفع ندم الي صار صار وانا لا يمكن
أتخلى عن كرامتي وهاي مثل ما سمعتي راح ازوج
واكون عائله وانتي هم يجي يوم واشوفج عروسه
_ويهووون عليك واحد يزوجني
غمض عيونه وتنهد وهو يكول
_شرايدة!!!
_تعبت تدري شنو تعبت شسويت بي يا سالم شسويت
بدن دموعي ينزلن تقرب مني مسح دمعاتي وهو
يكول لا تفكرين بيه بعد انسي سالم اعتبري ما
موجود
_وانت تنسى سمر وتعتبرها ما موجوده ضربته على
صدرة ولك رد وبرد نار بگلبي
_لا انتي دافنج بگلبي والمدفون ما يطلع
معرف شرد عليه ضاعن مني كلمات بقيت صافنه
عليه وهو هم ما حجه دقائق بقينا على هذا حال
وعيونه تتعاتب
_روحي لحد يشوفج
هزيت راسي بمعني
اي
رجع خله صيد على ظهرا ومشى وعاف نار بقلبي
ملتهبه شنو من بشر وشنو من قلب قاسي شايله يا سالم...
وبنفس الليل وذلك هدوء في بيت آخر حيث عائلة
بندر عاشقة يصعب عليها نووم تنتظر محبوبها
وترفع راية الأشتياق
حور: نايمه على فراشي وهدوء، ليل بس اصوات
ضفادع بالنهر تصيح في تلك الغرفة مظلمة لا
يسعني أن آرى غير زاوية من حديد وبيها كومه
ملابس (شمعة) هذا حالي كل يوم استجمع كل
ذكرياتي معاه وهل يا ترى مشتاقلي ما اكدر اتخيل
شجاي يسوي بهاي لحضه لأن ما عرف طبيعة عمله
بس ياخذني حنين لدفئ كلماته وحنيته بعدني بين
صراع عقلي وقلبي عقلي يطرد افكاري وشوقي
وحبي لرافد لكن قلبي رافض يسيطر ويبقى يحن
ويشتاق اول حنون عليه هو من أحزن تجي
صورته گبالي وأرجع افرح اول واحد يحجيلي
وكأن آنا شخص كبير يستشيرني يسمعلي وأسمعله
يفهمني بأول حرف انطقه هو الوحيد الي أماني
ومأمني وسكني ومسكني حياتي بدونه عذاب
انتظر لحضات وصوله اليوم تعرضت ضرب وإهانه
ملكيت أحد يطبطب عليه معرف شكد أحبك بس
والله لو تدري معرف شوكت بدأ هذا شعور يتسلل
حياتي فجئه لكيت نفسي أحمله كل هل الحب بداخلي!!
وهذا صار روتيني بكل يوم تجي صورته كبالي
وأبدي أحجيلها عن الم الفراق، مدري شوكت نمت
كعدت على صوت عصافيير يم شباك من نعاس
اجيت أضربهن بس هنن اول ما شافني طارن
اخخخ لو الزمجن حتى عصافير ما خلن واحد نايم
رجعت مديت ايدي وثاوبت التفتت ما لكيت غير
عماد نايم هذا صاير كسلان من حادثه كاضيها
نوووم لو يروح لساحات طوبه اشوفهم يلعبون ويتحسر
على وضعه يرجع ضايج حقه ضرر رجله يمشي
ويعرج وعكازة بأيده وكل هذا وجها مبتسم وهو
يكول أمر الله رجلي ولا غير مكان لو هسه ضربه
جايه بعيني جان هسه ايسموني عماد أعور تنهدت
بگلبي ان شاء الله مابيك غير العافيه!
طلعت من الغرفة شفت سالم وهو يعزل بالسمج
ايريد يروح يبيعه ويسترزق منه تعديت عليه
باوعلي ودنك عرفته زعلان مني خفت احجي وياا
تعديته ورحت على مطبخ وكالعادة مرت ابوي
مكمله كلشي الحلو بيها ما عدها سالفة تشرط تحب
اسوي كلشي بنفسها وما تتأمر علينه وبنفس الوقت
تخلينا نشتغل وياها بس بطلب من عدنه دخلت
يمها التفتت باوعتلي
حور: صباح الخير
نرجس: صباح النور يمه
تعاي اكلي لا تبقين جوعانه باوعتلها ذكرت كلام
رافد من كال حبيها حور الأم الي تربي مو الي
جيب ويه موقف البارحة حسيتها صدك تحبنه بس
اكو غصه ادكول لا تغرج منظرها وتصرفاتها الخوف
من مستقبل خاف نتحطم من وراها كطعت سلسلة
افكاري وهي ادكول
_شبيج حور اشو صافنه
_لا بس ذكرت قندة مكانها فارغ
_اي والله جانت ماليه علينا البيت مكانها فرغ تعاي
كعدي انتي هم الج يوم تزوجين وهم تخلين مكانج فارغ
_هههه ما اظن أزوج
_لا يمه ليش حتى ما تزوجين شناقصج
رحت لبعيد انا احب رافد بس هو عنده زوجه
واولاد وبنات معقوله ازوجه يعني واذا اصير زوجه ثانيه ههه وحرك گلبج يم سمرر
نرجس: هم صفنت شنو اليوم ما شابعه نووم
مصفنه بجهي
_هاا لا نايمه زين اكول آمنه وين
_ قبل شوي طلعت يداحرون هي وسليم أخاف هل
ولد يكسر ضلع من ضلوعه على هل ضرب يضربها
وهي الله هداها لسانها اطول منها
حور: اوو آمنه تاخذ حقها بيدها
معليج مثل فار وبزون يتعاركون وشوي تلكيهم
صحبه
_الله يهديهم
_اكول نرجس بعد قندة وزوجت لازم نتقاسم شغل
_بكيفج هو شغل البيت شيرادله
_غير كبرت ولازم اعتمد على نفسي
_بكيفج الي تردينه سوي
_علميني شلون اطبخ
_اوكفي يمي وانتي تتعلمين
_يلا اكل لكمه ونبدي بالطبخ
ترا كلش تحمست
_اي اي الله يديم الحماس خاف يومين وتملين
_لا لا ما أمل أبد
وصدك بديت بأول طبخه وبقيت مركزة عليها وكل
شوي سائلتها كلشي ما افتهم وهي ادكول شوي
شوي تتعلمين هو شيرادله وهيج انكول خلصنه
طبخه وبدينه ننتظرهم يجون الولد حتى نبدي
ناكل برغم بس عيني عليها وحاطه ايدي كلاوات
على طبخه بس خبصتهم خبيصه كل شوي
سائلتهم شرايكم بالطبخ حتى ابوي ماسلم مني الي
من إجه وهو فرحان وجها مبتسم بالفرح وسرور
وهذا الي ما خلاني ما اتردد واني مكابلته واكوله
شرايك بالأكل اليوم
_كلش طيب
_يعني عاشت ايدي موو
_هو مال عاشت ايدج عاشت ايدج بس اشو نفس
طعم يوميه الي أعرفه يا يباا لازم يكون أختلاف
بين طبخ نسوان يعني نكهه تختلف مو طبق أصل
مثل طبخ نرجس مو نرجس ويغمزلها
_موو اكيد نفس طعم غير هي علمتني
نرجس: اي صح ههههه
_نحاول نصدك
_صدك بعد كل يوم اطبخ
_لا هاي هي بعد نرجس تكعد وتسكت
نرجس: هنيالي على بناتك ابو سالم
_هذول عصفوراتي حبابات باجر اشتريلكم احلى
ملابس انطي نرجس فلوس وتاخذجن لسوك
حور: صدك الله
نرجس: يا الله اليوم بين خوش محصلك شغله
_اي والله الحمدلله، الله ما ينسى عبده شفتي اليوم طلعت ضايج
_اي وهسه ما شاءلله علامات الفرح تبين من بعيد
رفع ايده وهو ايكول
الحمدالله
كتر الأكل على صفحه وبدا يسردنه القصه
ابو سالم: ضاكت بيه الدنيا ومثل كل مرة نكعد على
رصيف وكل واحد ينتضر دورا لعل الله يرسلنه
شخص يريد عمال حتى نسترزق منه، وفجئه كاعد
وحاط ايدي على خدي ودعي بگلبي أحصل شغل
حتى ما أرجع وإيدي فارغة لجهالي،
وما اشوف الا ظل رجل يمي رفعت راسي أشرلي بإيده
_تعال
رحت ورا صعدني بسيارة ستغربت من شكله
ملابسه مو نظيفه ممزقة غير مرتب تماماً وساكت
ما حجه اي كلمه
خفت منه كلت لا هذا اكيد مو بعقله مخبل وانا
جيت وياا فجئه حسيت خلص راح تنتهي حياتي،
كلت خلي اصيح عليه اشوف سالفته صحت
بصوت مسموع
_انت وين ماخذني
_ليش انت شسوي واكف هناك
_أريد اشتغل
_وهاي اريدك تشتغل وياي
سكتت بس بعدني خايف منه وگلبي ما مطمئن
وصلنا لمكان كله حديد وسيارات مسكربه مثل خرابه نزل
نزلت ورا كال
_شايف هاي سيارات اريدك تلم الحديد منهن
وتحطه على صفحه
بديت أعزل بالحديد لهناك وصلت شاحنه ضخمه
أشر عليه صاحب الشاحنه أحمل الحديد لجمعته
لشاحنه بديت احمل لهناك اجاله وهو ايكول
_هووب هووب هذا عامل مالي خو ما يصعدلك
بلاش عاد هذا ما كال شي حط 35 بجيبي وكال
هاي الك تعبت ويانا
تشكرته وحمدت ربي لهناك خلصت شاحنه وطلعت
وبديت اشتغل وياا بالحديد صار موعد حله بعد
كافي شغل كال يلا خلصن ساعات الشغل وشال
100 وانطاني وكال هسه تكدر تروح بستها
وحطيتها على كصتي وفرحت حيل تشكرت من
عنده ورحت عرفت الله ما ينساني وهاي كل القصه
نرجس: الحمدلله هذا رزقك
ابو سالم: الحمدلله والشكر وهسه اريدج تاخذينهن
لسوك وشوفي شنو محتاجات عصفوراتي
حيل فرحنه وآمنه ضلت طفر سمعها سالم
_كال شكو شهل وجوه المستبشرة فرحوني وياكم تربع وكعد
ابو سالم/ ليش ما تفرحنه انت
سالم: هههه اي أفرحكم ليش لا شنو تردون
اسويلكم حتى تفرحون
ابو سالم: تزوج
سالم: اي ازوج بس مو هسه
_لعد شوكت واحنه منطين كلمه لبيت ابو كريم
_وبيت ابو كريم بتهم ما كاعدة بالشارع لو الا زواج
_شهلحجي عيب من الناس ينتظرونه
_وينتظرون شنو يعني
_شووف سالم من باجر ابدي بنيان غرفتك الناس
منطيهم كلمه ما يصير نتأخر عنهم
_عود افكر
خلى وطلع وهو يدردم بينه وبين نفسه
وابوي يتحطم ومستحي من الناس وهاي يوميه
تنعاد سالفة سالم واخت كريم الي محد بينا بالعائله
هاضمها واولنا سالم وبدا يتهرب واحنه كلنا نعرف
شنو سبب هروب سالم من زواجه ب اخت كريم،
اما عن قندة محد يعرف أخبارها وهاي مر اربع
اشهر على زواجها وماكو أي خبر منها لا إجت ولا
احد راحلها ابوي مستحي منهم لأن ما نفذ الوعد
الي وعد بيها اهل كريم وبدأ ابوي يقلق واريد
يعرف أخبار قندة فقرر ياخذ نرجس ويروح يزورهم...
_تتوقعون خوف حور من نرجس واحتمال
بالمستبقل تنقلب الى مرت آب مؤذيه لو تبقى ام
الحنونه الهم ام شكوك حور تطلع صحيحه؟ 😥
حب سالم ل سمر راح يستمر لو يقتنع بزواج من اخت كريم؟ ☹️
_تتوقعون رافد يبادل حور الحب لو تنتهي علاقتهم🥺
لا تنسون تصويت وتعليق حلو مثلكم واذا عجبتكم شاركوها مع اصدقاءكم، احبكم