#جُمِّلْت أخلاقها..
✍️كاتبة الجنوب
كلامك ع الگلب دوسة حوافر خيل
تلكـتهن لكت والحـافر يغـرز
ظميت السوالف غصبن على الروح
لان ادري الصدك من ينحچي يبزز
وشربت الحزن من دمي انه اسنين
وشربته دمـع من گـال لي معوز
اگمز ع العنب ما الوحه ايديه اگصار
خلصت العـمر ع المامش تگـمز
درخيلي الحبل ما عندي جنح ايطير
دم رجلي انحصر واحبالك اتحزز
لا تلوم الزرع من يفسد من الريح
البراد على الـدفو لو سـير يفزز
وگلبك مو گلب صخرة وعليها اضلوع
وانا حالي نسيم بصخرتك شيهز
________________
_مرت ابوي ملتهيه بالملابس تختارلي وهذا مستغل الوضع طاكها غمزات وانا متعجبة وفاكة حلكي
اباوعلة الى ان انتبهت عليه مرت ابوي سحبتني من ايدي وطلعنة كلشي ما شتريت وتمشي ودردم عسى عينك فكس كاعد ويتغمز للبنية ادبسزز اما انا بعدني سارحة بالاحلام ومتعجبة هم حالي حال البنات
واحد ينعجب بيه ترا لا تلوموني اول مرة اطلع
وللسوك هم واول مرة اتعرض ل هيج موقف ما
شايفة احد من شبيت لحد الان غير زهير يدخل علينا وكاضيها عليه ثوله ما ثولة وهذا شي خلاني امشي عدل واحس انا كبرت خلاص بنية عادية يمكن اي احد ينعجب بيه وزادت ثقتي بنفسي،
بعد اللي صارلي خليت مرت ابوي هي تختارلي حتى اطلع من سوك وكل شوي اكلها خلص استعجلي رجعت للبيت مسطورة سطر وكل شوي اذكر الولد،
هاي غمزة وهيج نسطرت خرب حظي وثولي دائماً اكون ثولة، مرت ابوي جبرتني البس ملابس حتى اذا مو مقاسي ترجعهن رحت لبستهن فستان طويل حلو ومرتب اول ما شافتني مرت ابوي
نرجس:_يمة صلوات على محمد طالعة عروس
_خجلت من حجيها
نرجس:_ جيبيلي المشط وتعاي امشطج فتحت شعري ومشطته وسوت بيه فيكه ونزلت خصلة من شعري وكصتها لحد عيوني باوعت لنفسي بمرايا هاي شنو صدك تغيرت ل سبعين درجة بقيت صافنة على نفسي
وما مصدكة هاي انا،
بهاي الفترة من كد الاكل وراحة سمنت جسمي تارس وملامحي برزن، وانا ما قاصرني شي بياض وعيوني حلوات طلعت صدك بنيه
نرجس:_اشو صفنتي
حور:_هههه ما مصدكة صايرة نظيفة
نرجس:_عيب ماما عيب تحجين على اختج الجبيرة هيج
حور:_غير هي شوفي شلون صافنة هييييييي نحن هنا
قندة:_اسمعهم وساكته مستغربة هاي انا شوكت
كبرت لحد الليل من نمت اجه كبالي هذا شاب اللي صادفته بل سوك مو نظرة اعجاب لشكله لا والله ابد ما حطيته بالي لأن اول مرة أمر بهذا الموقف اللي خلاني اكول على نفسي انا كبرت ولازم اهتم
بمظهري، معندي ام تشرحلي بأن كبرت ولازم اغير من تصرفاتي، يلا قندة كافي احلام يقظة نامي،جا غير انام والله ثولني مطلعت عليه روحة خرب حظي معرف
شوكت نمت وانا بعالم ثاني
يوم ثاني مرت ابوي اخذت حور وآمنه كالت خلي افتك من هوسة سوك مزدحم هي راحت وانا استلمت الطبخ كلت هم فرد نوب اوكلهم من طبخي واكيد راح تتأخر
كملت كلشي يلا اجن والفرحة ما واسعتهن وآمنه مشتريه البدلة عروس اللي خبصتنا بيها وتمشي
وتصيح انا عروسة وراح اصير عروس باوعتلها وهزيت ايدي لا هاي هي روحة للسوك خلتنا نحلم بالعرس من جبيرة للصغيرة جا بيوم العرس شنسوي ،
اما حور. على وضعها ما يعجبها العجب دائماً ساكته واذا حجت تنكط سم بحجيها هذا طبعها، هاي فترة كله تحضير زواج ابن عمي سرمد طبعاً العروسة بت عمتي ام احمد جنات الجبيرة، ومختبصين
بالتحضيرات بيت عمي قريب علينا ويجون ويرحون علينة يعني صارت الهوسة عدنا وعدهم
_اليوم يوم الحنة جان كاعدين وكالت مرت ابوي
نرجس:_يلا كومن بدلن خلي نشوف الحنة
ما كلنا شي طفرنة بدلنا على سريع وطلعنا قبل لا نوصل للبيت شفنا زهير
_وين رايحات
نرجس:_بيتكم جبت البنات خطية يتونس شوي
زهير:_اي زين سوين بس غير جيبيهن من وكت زلم ترسو الساحة ترس تعالن امشن وراي على سريع خلي اسويلجن طريق
_وبقى هو يمشي واحنة ورا وزلم تارسة ساحة همزين صرت مو ثولة دنكت راسي والحمدلله مشيت عدل ما تكودت كدام الزلم وصلنة للبيت وتلكونا بسلام
سلمنة وكعدنا شوي وبدت حفلة الزلم ونسمع صوتهم ودبجه مالتهم نسوان كلهن اجتمعن يم الباب وقسم يم شباج انشوف الحنة الزلم جايبين مطرب وخبصو الامة خبص وركاصة كايمة زلم بصفحة ونسوان من صفحة يركصن على هوسة الزلم اخذتلي طلا
(نظرة)من زرف (ثقب) شفت ولد كلهم على دبجة وحدة اخواني ولد عمي بسرة ويدبحون وسرمد
بلبداية لازم ايد زهير وايد ثانية يفرر بيها كلش حلوين ركصتهم،اباوعلهم شكد مخبوصين بهل الزواج البنات سون حنة وكملو صينية حنون العريس صينية
حاطين بيها ورد وبخور وحنة اخذوها وراحو بعدين سون طاسة جبيرة كالن هاي النا قبل لا نام نحطها
ونام رجعن على هوسة مالتهن بالدك والركص الا أن هدئوا وبدت العالم تروح شوي وصاح علينا ابوي ردنا نطلع مرت عمي صاحت على مرت ابوي حاطة طاسة صغيرة كالت
_هاج خيه خلي البنات يتحنن وباجر جيبيهن وتعاي بعد انتم مو غربة ميحتاج عزيمة
نرجس:_اي ان شاءلله لا ميحتاج عزيمة نجي نساعدكم
_هلا بيكم
نرجس:_يلا احنة نترخص والله هنيهم زواجة مباركة الله وياكم حبايب
وطلعنة من بيت عمي لبيتنه اول ما وصلنة بدلنا وفرشنة للنوم مرت ابوي جابت طاسة الحنة
وعلاليك واحنة كعدنة داير مدايرها وبدت تحط ايدينا وشدها بالعلاكة حتى من نام حتى لا يدمر الفراش الضحكة ماليا وجوهنا وآمنه طفر بالنص الى ان خلصت طفت الاضوية
كعدت الصبح اباوع ايديه مربطات ابتسمت هسه اكيد صايرات حمر بديت افتح بيها اشوفها شلون
يابسة على ايدي بديت اشلع بيها شوي شوي احب هاي حركة بالحنة واشم بيها غسلتها وطلعت حمرا،
رحت حطيتلها شوي دهن حتى يبرز لونهن وتروح كسرات خدران مالت ايدي لأن طول الليل مشدودات كملت رحت للمطبخ كالعادة مرت ابوي محظرة ريوك وكاعدة تغسل الملابس صحت عليها،
وما اسمع غير صوت آمنه وهي تبجي رحت عليها خفت حسبالي بيها شي،
قندة:_هاا شبيج تبجين خرعتيني اشوفها تأشر على ايدينها هههههه هاي كل هل دموع لأن ايدج مفتوحة ومطشرة الحنة على فراش،
كومي كومي ميخالف امشي خلي اغسلج اخذتها وغسلتها واراويها اللون
_الله والله حلو اللون طلع وهي فرحانة وتضحك ادكول صرت عروسة
_وانتي ميته حتى صيرين عروسة تكبرين ولاحكة صيرين عروسة لا تخافين
_مااا مريد من اكبر هسة اصير عروس
قندة:_اي خوش صرتي عروسة يلا خلصنا يا عروستنا تفضلي،
ابتسامتها شاكة حلكها وطلعنا كملنا الاكلة
نرجس:_يلا بنات ستعجلو حتى اروح بيت عمكم فشلة من عدهم
قندة:_اي هسه نخلص، وروح بس الافندية بعدها نايمة
نرجس:_اوو حور بعدها يمه كملي وكعديها.
قندة:_هي هاي شيكعدها، بس ما عليج خليها يمي محد يعرف كعدها غيري
نرجس:_هههههه على كيفج وياها يمه قندة صدك حور تختلف عنكم احسها لحد الان ما طايقتني
قندة:_لا هاي طبعها ما يعجبها العجب ودائماً تفكر بالمستقبل عايشة اميرة زمانها،
نرجس:_بس هي فقيرة وحبابة حتى كلامها قليل
نادراً ما نسمع صوتها
قندة:_اي هذا طبعها يلا خلي اكعدها هم يلا
صحيح ولد ما اجو للبيت
نرجس:_لا باقين يم ولد ساعدونهم
قندة:_ها جا سليم وينه
نرجس:_تلاكينه يلعب هسه برا هاي اذا ما عبر على بيت عمج ذكرتيني خلي اكوم اشوفه،
راحت هي وانا كمت آمنه غسلتلها وبدلتلها ورحت على ست حور غاطة بالنوم توليتها رفسات حتى تكعد
حور:_شكو خلوني انام
قندة:_ما كافيج نوم
حور:_اووف الواحد ما ينام بهل البيت
قندة:_يلا عن الدلع وكومي
حور:_كايمة كايمة اوووف
قندة:_عفتها وكملت تبديل وجهزت ملابس للعصر نلبسها شميت ريحتهن اوووف شكد حلوا ريحة الملابس جديدة شوكت البسها، يلا مضل شي للعصر والبسهن
نرجس اخذت سليم وسبحنة لأن غاط بالطين عفتها سبح بي ورحت ل حور لكيتها توها كاعدة
قندة:_هاي من مساع كعدتج ما كايمة
حور:_اووو هسه ليكول مدري ويت رايحة هو بيت ابو رافد قحط مشايفة شكولاتهم
قندة:_انتي شوكت تتأدبين وتحترمين الناس
حور:_ خليتها الج ال فاهية عود من اشوف الناس زينة وتحبنه ذيج ساعة افكر احترمهم او لا
_صافنة على كلام حور هاي شوكت كبرت وهيج صايرة عنصرية وما اطيق احد والله خايفة اذا كبرت شلون راح تتأقلم ويه الناس
شوي وسمعت صوت سالم
سالم:_هاا وينكم
صاحت عليه مرت ابوي
_هاا يمه هنا هنا
سالم:_ ما ترحون بيت عمي ساعدون بناتهم
نرجس:_اي يمه هسه نخلص ونروح
سالم:_يلا خفن ايدجن حتى اوصلجن
نرجس:_ لا يمه ما اريد انتعبك هو من بعده بيت عمك
سالم:_لا وين ترحون وحدكم الشارع متروس زلم يلا خفن ايدجن عدنا كومة شغل هناك
_خبصنة خبص سالم على ما خلصنة ورحنة بيت عمي كلها مجمعة قسم نعرفهم وقسم لا، بوقت
مناسبات مدري منين طلعون الاهل تواصلهم بس بلمناسبات والهوسة كايمة، وكل شوي وحدة تهلهل ويبدن كولات كلهن مجمعات وكل وحدة مسوية
مجموعة قسم تكشر البتيته وقسم تكشر البصل
وهاي اللي تنظف الخضرة كاعدين على شكل
مجاميع مرت ابوي اول ما دخلت هلهلت وضلت تسلم بعدين شكلت ويه نسوان بنات صاحن عليه وبديت اساعدهن اما حور وآمنه طلعن يلعبن ويه جهال،
وبدن سوالف وضحك وبنات يحجن بالعرس كلمن ادكول اللي طبلة اللي عرفته جايبين طبلات جم وحدة وعرايك كابة بينهم انا كاعدة مثل الصنم
محنطة وكاعدة بس ابتسم كملنة تنظيف الخضرة وحدة منهم كامت تغسلها والباقي كامن على طبخ
لأن طباخ جايبينة بس يطبخ بس وجبة العشة بقيت يم البنات على ما نسوان طبخن البنات كامن يسون شعرهن،كعدت يمهن وحدة تسوي للثانية انا بس
اباوع بعيوني، نرجس كل شوي صاحت على جهال شوفيلي سليم وينه هي اسميه سلوم،مرت ابوي
كلبها كلب ام انا كاعدة مطفية وما ادري عنهم شي آمنه يمها وحور يلعبن داخل اللبيت بس سليم ما يقبل يدخل يم نسوان وكل شوي تودي جهال سألون عليه شوف وينه تخاق عليه من النهر،
اشوف النسوان شلون حبن نرجس وسوالف وضحك وياها، بس اكو جم مرا كل ما تحجي نرجس فرن ايدهن لو يعوجن حلكهن 😏 مثل مراضيات عليها
ومن بينهن وحدة اجت سئلتني انتي مو بت ابو سالم مو امج زهرة كتلها اي انا جان طكها ضحكة والله خوش تاركتلها خلفة هل زهرة هاي جرتها وحدة وبقن يحجن بصوت ناصي وتباوعلني حيل ضجت
وما رتاحيتلها كلت خلي اسئل عليها صحت على بت عمي ضحى
_اكلج ضحاوي
_ها عيني
_تعالي اكلج هذيج منو
_هاي اصير مرت خال ابوي وابوج
_هااا
_اي شبيها وياج
_لا هيج بس ما رتاحيتلها
_هي هاي لسانها طويل وميعجبها العجب مشوفينها شايلة خشمها عود شوفوني انا مرت دكتور هم ما ادري دكتورلو صيدلاني عوفيها لا تهتميلها، يلا امشي ترا راح خلصون حتى انحط الغدة رحت وياها الغرفتهم،
كملت شغلها ورحنة صلينة وبدو بتحضيرات الاكل وكامت الخبصة النسوان الكبار يحطن بالصحون
وبنات يحضرن نفسهن انتبهت على حور وآمنه ما موجودات طلعت اشوفهن وين اباوعلهن لعبن ويه مجموعة من بنات جاي ارجع واشوف زهير صار عينة بعيني وصاح عليه
زهير:_هاا خايسة شلونج
قندة:_اووو هذا منو هاا كاطع بعد ما مريت النا كطعت وهل كطعة
زهير:_بيني وبينج اخلي العرسان ياخذون راحتهم
قندة:_ولك شلك بيها صارلهم شكد من عرسو يا عرسان قابل ابوي اول طيحة اله بزواج
زهير:_خرب والله ضحكين لا ان شاءلله منا ورايح اجيلكم بس ها ما اريد طبخين طبخج يلعب نفس
قندة:_اممم هسه صار طبخي يلعب نفس مو جنت تاكل اصابعك ورا
زهير:_وين اكل اصابعي اشوفهن معضعضات اثاري من ورا اكلج، هو ما جنت مجبور اكل
صاحو عليه كال من رخصتج بت عمي
قندة:_مرخوص
راح زهير رحت كعدت يم البنات وبدو الزلم يصبون الغدا على ما خلصو حطو السفرة للنسوان صاحت علينا نرجس اجينا كعدنا يمها وهي توكل ب آمنه وهذن نسوان يباوعلها ويحجن...
يتبع...