جُمِّلْت... أخلاقها //باللهجة العراقية //

الحلقة 13

#جُمِّلْت أخلاقها...
✍️كاتبة الجنوب

_______________

تعال بياذنب لوجيت احاجيك
ونه اظنوني الجبيره اتعلكت بيك
شلت حبك ابكلبي وخايف اتظيع
ودمع بين الجفن والعين اخليك
وذا مرني الحزن وايريد له ادموع
اعيوني ابجيهه اله ولتصدك ابجيك
احس حجيك شعر واسوالفك شوك
وحلاتك من حلاتك تنجبر بيك
أنه العود الكبر صوتي اعلى دنياك
أفز واصحه بلحن واغفهاعلى طاريـك
واصوغ اسمك قصيده بلون موال
واحتار ابوفه بياطوراغنيــك

مرت ابوي خو ما بيج شي شنو هل جنط
نرجس:_لا مابيه شي انتظر ابوج حتى وديني اهلي

_ ليش هسه ترحين
نرجس:_ اي بعد ما بقى وياكم ولا ثانية وحدة مو انا الي ينضحك عليه وعايشه وياكم ومحد جابلي السيرة  ، عايشة بجذبة ومستمرين بيها
قندة:_ ليش منو جذب عليج وعليمن تحجين ما فتهمت

نرجس:_ قندة راح اسئلج سؤال واحد وجاوبي عليه
_ اي صار
نرجس:_قندة امج شلون ماتت

_هنا دنكت معرف شنو اجاوبها يعني شكولها امي ماتت مقتولة! لا وبعد ابوي قتلها! شكلها بأي ذنب انقتلت واني بنفسي معرف شنو ذنبها

نرجس:_ ليش ما تحجين يعني صح اللي سمعته ولكم ماكو احد يفهمني راسي راح ينفجر بس فهموني الي سمعته صح لو غلط

_معرف شنو اجاوبها بقيت ساكته وهي تبجي وتحجي بصوت عالي يا ناس يا عالم فهموني شصاير ويه صوتها العالي 

دخل ابوي!!!!

ابو سالم:_ خير خير شبيكم صوتج واصل لسابع جار

نرجس:_ ههههه ياا متردون صوتي ينسمع هاا نسيت انتم عائلة محافظة على قيمكم وعاداتكم تعال فهمني يا ابو قيم واخلاق

ابو سالم:_ ولج اشبيج فهميني سالفتج

نرجس:_ليش وانت متعرف شنو سالفتي السالفة الي ضامينها عليه اليوم عرفتها

ابوي تنهد وصار عصبي وصوته يرجف ويريد يهديها وهي ماكو صاح عليها بصوت رج البيت رج

ابو سالم:_ امشي هناك بلغرفة واحجيلي شصاير
نرجس:_ هههه تحلم ادخل بيتك بعد هسه اروح توديني اهلي

ابو سالم:_ صوتج لا اجي هنا ادفنج والله

نرجس:_ اي يبو سالم هو هذا كادر عليه تكتل بلنسوان وتدفنهن

هنا ابوي نزل راسه وما حجة اي كلمة؟؟؟؟؟

انا رجليه بادن بعد مبيه ابقى واكفة كعدت بالارض

والصمت سيد مواقف  بينه معدنة شي نحجي غير نسكت وشوي دخلو الولد سالم وعماد جانو مستغربين

_ شنو شصاير بيكم شي

محد يرد عليهم ابوي مدنك راسة وانا بس دموعي طيح

نرجس تباوع ابوي وتحجي

_من اجيتو وخطبتوني يابه ليش زوجتك ماتت شنو سبب موتها كلتو مريضة وبيها مرض مزمن، وهسه كتشفت مو مريضة اصلاً مجانت تعاني من اي مرض بس انت ذبحتها بيدك زين شلون رجلي مجرم وياي نفس الغرفة شلون أمن على روحي وزوجي قاتل يبو سالم فهمني السالفة هههه هو انا ويامن احجي منين اكو مجرم يعترف  بجريمة ههه يا الله زين انتم اكيد كلكم تعرفون وساكتين زين شلون سامحون ابوكم هو قاتل امكم بس كلولي شلون!!!!

ابو سالم:_ كااافي يا مرا انا مو مجرم

نرجس:_ لا والله مجرم ونص، بس گلي شلون گلبك طاوعك وانت تذبح انسانه عاشت وياك عمر وجابتلك ست جهال مثل ورد شلون

قندة:_ اشوف عماد يطك بأصابيعة من توتر وسالم صار اعصاب والعيون حمر

تقدم سالم وهو ايكول

سالم:_ يمرت ابوي كافي تحجين عليه؛ ترا ابوي مو مجرم سمعتي مو مجرم

نرجس:_ لك بس گلي شلون هيج دافعون عليه ولكم هاي امكم حملتكم تسع تشهر بطنها

سالم:_ قبل ما تحجين تأكدي شنو ذنبها شنو ال خله ابوي يقتلها

نرجس:_ ابو سالم انطق وفهمني ليش سويت هيج
ابوي ابد ميحجي ولا كلمة باقي مدنك راسة

سالم:_ لا تعبين روحج ابوي ما يحجي تدرين ليش لأن ايخاف علينا خاف نعرف امي شنو جريمتها وخاف نكرها بقى خايف علينا ولهذا اليوم ومخلي الحك عليه يريدنه انكرها هو ونبطل نحبه  وما نكرها هي هذا ابوي گلبة جبير ويفكر بينا، ارفع راسك بويه انت مالك ذنب وأي انسان بهل كرة ارضيه ايسوي مثل ما سويت انتَ

_ابوي بقى فاتح عينه وبس يباوع على سالم

ابو سالم:_ بويه انتَ

سالم:_اششش اي يباا اعرف سالفتها مرت ابوي امي وحدة مو شريفة وما حسبت حسابنه ابوي رجال فقير ومنطيها كل ثقة ويحاول يكسب رضاها بس هي سوت نزلت راسه وراحت خانته ويه عشيقها ابوي شافها نايمة طول بطول ويه اللي ما يسمى وكل رجال ايشوف مرته بهل وضعيه راح ايسوي مثل ما

سوا ابوي وأزيد،خليها ترجيه بذانج ابوي مو مجرم ابوي كتل انسانه حبها وصانها وجان يجمع فلس فلس،بس حتى ترضى عنه وتالي خوش جازته ابوي انسان فقير ويستاهل وحدة احسن من امي وحدة تصونه، بوية حسبالك ما اعرف لا غلطان ترا ناس كلها تعرف امنه شنو وليش انت قتلتها،

عماد:_ اي بويه احنه مو صغار حتى جذب علينه احنه عارفين امنه سوت وبقينا ساكتين مو جنت اتصر عليه اداوم تدري ليش  كرهت المدرسة احس الناس كلها تباوعلي من امشي اخاف من الناس كلها اخاف يعرفون انا ابن الكح... خاف واحد يشاقه وياي ويكلي هل كلمة يمكن بوقتها راح اذبحة حتلو كان شقه ميعرف امي صدك كح...احنة مو بنات وكاعدين بلبيت احنة شباب انطب ونطلع واكيد راح نعرف شنو احنه ولا حسبالك ما سئلناك يعني نبقى عميان وسالفة وراحت انسجنت سنة وخلص طلعت يعني نسينه لا بويه غلطان انت ما تحجي اكو غيرك يوصلنه،

تدري ليش ما عندي ولا صاحب اماشي لأن اخاف احجي ويه احد ويعرف حقيقتي بس گلي شنو ذنبنه نتهرب من الناس !! ابقى ساكت يباا احنه طايحين بيها..
سالم:_ هسه يمرت ابوي عرفتي هاي حقيقتنه ترا هواي ناس عدها اسرار مو كل سر مكشوف، اريد منج متطلع ولا كلمة الناس عليها ضاهر ميعرفون شنو داخل لكلوب

كافي احنه نعرف ما اريد صغار يعرفون، وانتي اذا باقيه هنا اهلا ً وسهلاً واذا بعد ما تأمنين روحج يم ابوي هذا شي راجعلج اكيد عرفتي گلب ابوي طيب مو مجرم بس صوني وكوني اله مرا وام جهاله صغار لأن احنة مو بحاجة ام واصلاً كرهت ال يمه وما احب اكولها ويلا اترخص اريد انام

قندة:_راحو هما دخلو للغرفة كل واحد دمعة بعينه اما اانا اول مرة اعرف سواية امي الي ما تتسولف حطوني بأمر واقع ومحد بيهم كلي كلمة  بقيت صافنة شنو احجي واصلاً معندي حجي احجي معقولة هاي امي هيج سوي، لا لا مو معقول، بقيت اجذب ذاناتي يرب طلعون متوهمين هاي مو امي،

امي ما سوي هيج هي تحب ابوي،ههههه لا ما تحبه هي دائماً تدعي عليه بس اصير عصبيه، صافنه وعقلي اجيبني وديني سمعت صوت رحت صوب غرفة اخواني اشوفهم نايمين مشيت على كييف شفتهم غاطين بالنوم بس حور تتحرك وصلت يمها حور حور نايمة،مجاوبت بس صوت شهكتها وهي تتنفس عرفت هي منايمه بس لا سمعت !! لا يربي، لج حور كاعدة

حور:_ اوووف شتردين متخلون واحد نايم بهل بيت

قندة:_هاا نايمه العفو ست حور نامي

عفتها اخذت موقعي بفراشي بديت انام وانا حاطة ايدي على اذاني سمعتي يا قندة الحقيقة الي جنتي دورين عليها شفتي شطلعت امج، ابوج مظلوم مو ظالم،اكيد هسة رتاحيتي، 

اوووف شكول عليج يا يمه من يتمتينه وطلعتي بسالفة عوجة، وين راحة ما رتاحيت بس لكيت الجواب لكل سؤال بداخلي،

_ليش ابوي قتلها!؛

_ليش محد سوالها فاتحة مثل كل الي يموتون!؛

_ ليش خوالي ما دخلو بلسالفة طلع ما الهم عين يحجون بعد الي سوته امي لكيت جواب كل سؤال
يمكن احنه بنات ما نطلع وندخل بس الولد يبقون ضامين روسهم،

نرجس وابوي بعدهم واحد يحجي ويه ثاني وبعدها مصرة تروح اهلها عفناهم وحدهم

حاولت انام وكل شوي فكرة اجيبني توديني وعيوني نشفن من الدمع 

معرف شوكت غفيت كعدت على صوت ابوي وهو اصيح قندة قندة يلا كومي كافي نوم

كعدت رفعت ايدي الحركة متعلمه اسويها احس جسمي متكسر من النوم من اكعد امد ايدي ارفعهن لفوك ونزلهن رحت غسلت وجهي لكيت ابوي يمي

قندة:_ صباح الخير يباا

ابوسالم:_ صباح النور يلا يباا بدربج للمطبخ سويلي لكمة اكلها

_ ستغربت،، ليش وين نرجس

ابو سالم:_ راحت بيت اهلها البارحة

قندة:_ ليش وديتها يباا

ابو سالم:_ هي لزمت تروح وراحت الضاهر بعد الي صار ما راح ترجع

قندة:_ هيج اشوف يباا

ابو سالم:_ اي والله بعد بكيفها

قندة:_ وين تلكى مثلك

ابو سالم:_ صرت بنظرها انا قاتل ومجرم بعد تخاف تأمن نفسها يمي

قندة:_ هااا خلي اكمل اكل...

بقيت اكمل الاكل هو هذا حظي عود كلت ادللت وبعد كلة الكى جاهز، غميت روحي هو انتي مو مال دلال ابقي بس للكراب

ورجعت انطفت شمعة
من بيتنا ابوي ما يحجي ويانة وكله ضايج رجع وحيد آمنة كل شوي تسئل اريد امي واحنه انكلها راح اتشوف اهلها جم يوم وترجع وتبقى تبجي لأن هي متعلمة تاخذها وياها وهي هم تعلمت عليهم، الولد يا اما بلشغل لو بيت عمي لو هما يجمعون ويجون عليهم ورى العشة،
بعد ما محد جاب سيرت امي ومرت ابوي بعدها بيت اهلها، وبيوم اجه سالم

_ اكلج باجر بيت عمي مسوين عزيمه وكالت عمتي خلي يجن بنات جيبهن وياك

قندة:_ اووو مابيه على دوخة

سالم:_ عيب من عدهم روحي انتي والبنات هسه من بعدهم

حور:_ ما اروح هسه اكيد عازمين عمووص

سالم:_ شنو هاي بعد

حور:_ سلووم والله هاي مرا ابد مو راحة فد شايفة روحها بس تتمضحك واكص ايدي منا اذا ما طلعت روحة نرجس اهلها من وراها لأن بقت طول اليوم حاشكة بيها حشك (وين ما تروح وياها)

سالم:_ هاا هاي مني هاي وبعدين شنو من اسم

قندة:_ هاي اصير مرت خال ابوي هذا الاسم مدري منين جابنه
حور:_ مو هي عمصا واحنه دلعناها ب عمووص الله عليك يخوي شلوني من ادلع واحد

سالم:_ انتي ما دلعين بس الي تكرهينه

حور:_ اي سبحان الله حتى اسم اجه فيت عليها

سالم:_عوفجن من هاي سوالف وباجر روحن هو ما عازمين احد بس بيت عمتي وعتمي ثانيه واحنه وهما ماكو احد غريب علمود عرسان سوا عمي العزيمة

قندة:_الله كريم منا الباجر اصير خير

سالم:_ يلا انا طالع تردن شي

حور:_ايس كريم 🖐

سالم:_وانتي يحلوة

آمنة:_ اريد ماما وديني

سالم:_ جم يوم وتجي

آمنة:_هي ليش راحت وعافتني

سالم:_ مو انتي جنتي نايمة وما كعدتج هسه راح اروح لمحل تردين ككو

آمنه:_اي

جرها من خشمها وباسها وصاح

سالم:_قندة تردين شي وياي

قندة:_لا خوية اريدك  سالم

سالم:_الله سلمج

راح سالم وبقن ينتظرن جيته لهناك واجه وجايب علاكة كلها حلويات وطارن من فرح

_قندة ترا حصتج وياهن، عود صايرة مرا ما تريد

قندة:_ ههههه

راح وبدت عرايك على حلويات وكل وحدة متكفيها شغلة وحدة يردن اكثر

يوم ثاني مالي خلك اروح بيت عمي هم عزيمة ودوخة راس كلت اطبخ شويه لأن ولد وابوي يرحون الهم بس احنه باقين،توني حطيت جدر وما اشوف غير ضحى بت عمي جايه

ضحى:_ هلا بت عمو

قندة:_ هلا بيج شلونج

ضحى:_حمدالله،يلا اجيت عليجن هسه ترحن وياي

قندة:_ ياا المن تعبتي روحج والله مالي خلك الهوسة
ضحى:_ماكو ما اريد اعذار روحن بدلن بسرعة

انتضرجن لج اشبيج اريدج وياي ساعديني ايدي طاحن من كثر ما شتغلت
محد عدنه غريب صدكيني

قندة:_ هاا يلا خوش امشي حور بدلي

حور:_ هاي العمصا ما موجودة

ضحى:_ قصدج هاي حركتها آمنه مو، ادري بيج تكرهينها

حور:_اي هاي عمووص

ضحى:_ ولج شهل اسم الحلو بعد منا ورايح عمووص اجه وعمووص راح

حور:_ هلا هلا بت عمي

وحدة ضربت ايدها بأيد ثانيه

حور:_انتضري دقيقة وحور جاهزة

ضحى:_يلا

بقينا نغيير ملابسنا وهي تنتظرنه كملنا ورحنة بيت عمي سلمت عليهم وحور وآمنه انطلقن يلعبن
اول مرة انجمع ويه عمامي حسيت بأن مو غريبة عنهم صدك لو كالو الدم يحن كعدت البنات ما تنمل سوالف وضحك طلعت اشوف آمنه لكيت سالم يم الباب ومركز على سمر وباقي صافن وهي كل شوي تلتفت اله وتبتسم وهو صافن اجيت كضيته من ايدا

قندة:_ هاا يخوي وين سارح

سالم:_ هاا شنو وين يمج

قندة:_ مممم وين آمنه

سالم:_ هسه شفتها منا عبرت

عفته ورحت الضاهر واكع اخوي بغرام سمر، سمر بت رافد ابن عمي هم كبر وبقى يدور بنات،هسه هو هم شاب ومن حقه يختار الي تناسبه وانا اكول ليش لازك بيت عمي هنا سالفة، أخذت آمنه غسلتلها لأن راح صير وكت الغدة اخذتها ودخلت للبيت بدينا نحضر السفرة وجمعنا كلنا على سفرة وحدة ادور على حور، لكيتها يم رافد معرف شعدها وياا هو من نوع ايحب اينكت ويضحك وهي مكابلته وتضحك وهو ما خله وحدة ما ضحك عليها، لج حور تعاي
حور:_ هاا قندة شتردين
قندة:_ ولج شعندج يم رافد
حور:_ شوفي شلون حلو يضحك
قندة:_ولج عيب انتي صرتي جبيرة
حور:_ اي ادري قابل شمسويه ترا بناته اكبر مني هو مثل عمي
رافد:_ ولج حورو تعاي بسرعة شوفي
حور:_ اي اي اجيت
اباوعلها شلون منطلقة وياا ليكول اخوها مو ابن عمها صح هو جبير بس يبقى رجال معرف عليمن سولفون
بس ضحكتهم وصوتهم العالي يربي شلون ويه هل حور هاي شوي ودخل سالم وعيونه دور مثل واحد مضيعله شي،بقيت اراقب سالم اول مرة اشوفه حاط عينه على وحدة من بنات،بقى يتلفت،كلت خلي اسهل عليه أمر خطيه عيونه راحن من تدور صحت
_وينج سمر سمر
_هاا اجيت
عاد هو فتح عيونه على وسعهن
قندة:_اكلج سمورة شنو رئيج نروح نفتر اشوف بستانكم
سمر:_ خوش فكرة خلي طيح شمس ونروح
قندة:_ خوش انخبر البنات ونروح كلنه وهم نتونس على خضار
سمر:_ مدام هيج انخلي زهير صعدنه بل بلم ونتونس بلنهر
قندة:_ الله صدك،
سمر:_ اي والله دائماً زهير يوصلنه مكان بعيد كلش نتونس
قندة:_ صدكين ولا مرة صاعدة
سمر:_ عمرج خسارة كلش حلو،بس

يتبع.. 

اصدقائي الحلوين لا تبخلون عليه بتصويتكم حتى توصل اكبر عدد احداث حلوة وشيقة بأنتظاركم وبفضلكم وجهودكم معي ان شاءلله متنظلم وتاخذ استحقاقها ما اريد غير تضغطون على نجيمه ⭐ وتعليق حلو مثلكم

احبكم...

✍️كاتبة الجنوب