جُمِّلْت... أخلاقها //باللهجة العراقية //

الحلقة الرابعة

#جُمِّلْت أخلاقها..
✍️كاتبة الجنوب

____________________

هل تعلمون بأن قلوب كالنوافذ
خلف كل نافذة قصة...
وخلف القصة قلوب أما أن تنبض بالحب...
او بالحنين، بالوجع والألم...
وبما لا يشتهي او يحكى..
فالوجع اصم...
والحنين أخرس..
والشوق اعمى..

هكذا نحن خلقنا لننسى تلك النوافذ والقصص لكن
لا جدوى من ذلك هناك من يطرق باب النوافذ
ويسعى على كركبت ذلك العالم الصغير...

قندة:_ راح ارجع هذاك اليوم المشئوم يلي ما أنساه طول حياتي سمعت امي صرخت بصوت عالي ركضت لكيت امي طايحة بل كاع (الارض) وابوي

بيده سجينه كلها دم اجيت اكلب امي (اديرها بكل جهه) ماكو مالها نفس احجي وياها اخضها (احركها) يمه كعدي يمه اشبيج كولي هذا دم منين يممممممه حاجيني بس هي ماكو مالها صوت التفتت باوعت

ابوي عيونه حمر وبيهن غضب كتله يباا اشبيها امي يبااا احجي  فهمني امي ليش ما تحجي وياي صفنت تقربت من يمه وهو يباوعلي وعيونه حمر  لزمته من  قميصه يابه سويت

هاي امي شسويت هاي امي انت كتلتها لا لا اكيد موانت، انت ولا مرة شفتك مديت ايدك عليها اخذت منه سجينه بهاي كتلتها يابه احجي كول مو انت مو انت صح حطيت ايدي على أذني رجليه ما واسعاتني كعدت بلكاع اباوع ابوي ساكت ما ينطق ولا كلمه اخوي سالم مقابيله منتجي على حايط  وكل شوي نازلة دمعة ويمسحها وباقي  يفرك بعيونه مندري شنو صاير  استهترت بقيت اصيح ولكم فهموني شجاي اصير هنا بس فهموني  تعبت ومحد يجاوبني،

يمكن بهذيج لحظة كرهت ابوي كلش مريده يبقى ولا دقيقه يمنه  واحنا على هذا

حال كل واحد منصدم من منظر ومحد منا يحجي،
وندك الباب ابوي اشر على سالم يفتحه وابوي على حاله

مدنك راسه ولازم سجينه ،انفتح الباب ودخلوو خوالي

اول ما دخلو شافوو امي هجمو على ابوي خالي جبير لزم ابوي من قميصه ولك هاي شمسوي لا يا گلب 

تعجبت على ثبات ابوي وسكوته وهما هجمو عليه مثل وحوش وهو وكفهم وصاح بعلو صوته، تعالووو وياي

وسحبهم للغرفة ونسد الباب الغرفة ومقبل ندخل وياهم غير هو وخوالي، ما اسولفلكم على حالي جنت خايفه مرعوبه امي هاي مقتوله بين ايدي انداريت الها اخذتها بين احضاني بعد ما اشوفج يمه يعني

خلص راح تركينه لا يمه ترى خواني صغار محتاجيلج يمه كومي عفيه شوفي ابوي ايحبج والله يحبج ولج يومه كومي يمه احنه منو النا اكيد جاي تخوفين ابوي تشاقين وياا تردينه يسمع كلامج يمه بس كليلي جاي تشاقين مو انتي مو ميته انتي عايشه يمه احجي فتحي عيونج والله بعدنا صغار مشبعنا منج كافي شقى يمه اكعدي فدوة نمت على صدرها  حسيت بحركه وراي التفتت طلعت حور..

اشوف حور يمي عفت امي واخذتها دخلت للغرفة وامنه كاعدة بزاويه معرف شنو احجي وياهم كلمه مني ما تطلع بقيت ساكته حور تبجي واسكت بيها ما تسكت بس آمنه ولا كلمه طلعت منها شوي سمعنه صوت سيارة شرطة وصار صيحه ما اشوف غير آمنه طاحت ركضت عليها اضرب بيها ماكو ولا صوت صرخت بعلو صوتي

سالم سالم يبااا وينكم الحكووووو امنه

دخل سالم راح جاب ماي رش عليها ماي صحت بس كعدت مصدومه اخذت نفس حمدت ربي من طلعت سالمه سالم رجع يمهم بقيت اباوع فتحت باب قليل

بقيت اباوعلهم سالم وعماد واكفين على صفحه غطو امي واخذوها التفتت ابوي حاطين كلبشات بأيده صار

عماد يم الباب بعد صحت ردت لا تاخذونهم ماكو محد يرد عليه  ،واختفى صوت سيارات الشرطه والاسعاف بيت صار خالي وهدوء عم مكان، دخل سالم وعماد وياهم خالي كل واحد كعد بصفحه ومدنك راسه وعلامات الحزن،  بيوم وليله صرنه  يتامى لا ام ولا ابو

احنه صغار تحملنه المسؤوليه،  اخوي بعده صغير سليم عمره 6 سنوات وحور عمرها 9 سنوات وصغيرتنا آمنه خالي بقى يمنه خالي كال لازم اخذكم بيتنه بس احنه ما قبلنه مرت خالي كلش ما نرتاحلها  بقى ويانا لليوم ثاني، اخوي سالم بدل وكال راح اشوف ابوي، بقينا ننتظر سالم بلكت يرجع وابوي وياا

آمنه كلش تعبانه حتى ما تحجي وكله نايمه

سليم اللي جان نايم بوقت الحادثه ومشاف شي وكل شوي ايكول وين ماما واريد بابا، عائلتنا شتت ومحد يعرف سبب من ظالم ومن مظلوم

شوي واجه سالم سئلته عن ابوي كال انسجن ضربت على وجهي لحكيني يمه انتي متي وابوي نسجن واحنه وين نروح كلي
سالم وين نروح شنسوي شلون نعيش

كعد سالم وكال

سالم:_ لمي غراضكم شكو شي تحتاجونه ابوي وصاني اروح بيت عمتي كال لا ظلون وحدكم بالبيت

قندة:_منو كال راح يستقبلونه

سالم:_ما عدنه غير هذا الحل

وبقينا نحضر لروحة بيت عمتي وكل واحد علامات على وجهه،حزن،تعب، صدمه، منعرف شنو مصيرنه وشنو راح واجهنا وليش ابوي سوا هيج جان هسه احنه عايشين حياتنا وياهم يربي صبرك شنو اللي سوينا حتى اصير كل هذا بينا، يعني المفروض امي متوفيه وهسه احنه بعزاء بس محد سوالها فاتحه معرف ليش سكوت تام حتى خوالي جانو عيطون على ابوي هم ساكتين...

كملنا الغراض واخوي جاب سيارةوحملنا طبعاً معدنه هواي اشياء بس ملابس وكم سلعة اخذناها بيتنه بسيط

على كد حالنه ودعنا البيت وطلعنا منه بأرواح تعبانه بدون الام ولا اب اذكر فرحتنا اول ما انتقلنا ومن شفنه زرع طرنا بي مبقينا بي هواي بس كم شهر وختمناها بمأسات، وصلنا البيت عمتي بيتهم جبير واسع بس شافتنا بقت تبجي وتبوس بينا واحد واحد،عمتي كلش طيبه وحنينه لهذا ابوي قرر نبقى عدها بس منعرف شكد نبقى عمتي دموعها ابد ما نشفت...

واحنه نبجي وياها الا امنه ساكته منطقت بحرف اصغر وحدة ودلوعة ابوي يحبها واجد وهي حيل متعلقة بي وفجئه تلكى روحها بهيج حادث فبقت مصدومه بس صافنه بالوجوه ...

ام احمد:_ يمه قندة اخذي خواتج وروحي يم البنات

قندة:_ان شاءلله عمه

ودخلت على بنات سلمت عليهم بنات عمتي الجبيرة اسمها جنان

جنان:_مرحبا اسمي جنان عمري 17 سنة اكبر اخواني

بس عندي اخوي احمد الجبير واني تسلسلي ورا شكلي بيضه عيون بنيه وشعري،اسود طويل وجسمي حلو لا سمين ولا ضعيف اجوي بنات خالي امي كالت راح عيشون ويانه فرحت لأن احب قندة وحزنت عليهم على وضعهم ولي ديصير وياهم ان شاءلله نكدر نخفف من مأساتهم.

_اعتقد كافي حجيتي عن نفسج هواي خليني اكمل لو تبقى عليج ماكو كلمة ما توصفينها لنفسج ممممم شكد مغرورة باوعتلها صفح 😏 تفضلي ست ام العريف

عرفينه عن نفسج

مرحبا اني وجدان  اصغر من جنات عمري9 سنوات بشرتي بيضه شعري اسود وعيوني بنيه قصيرة جسمي متوسط احب نفسي هواي اهتم بشكلي ومن هواياتي بلبيت ضحك 🌚 يعني بين قوسين فاكه حلكي مينسد وعرايك ويه اختي متنمل هي شخصيتها قويه ولكل يحترمها ويسمع كلامها عصبيه حادة وبما انو بيت خالي راح يبدون عيشون ويانا راح نبدي وياهم حياة
جديدة هواي حزنت على الي صار وياهم وخصوصاًعلى خالي دائماً جان يجينه وجيب وياا كومه حلويات احبه🥺

شوي شوي تتعرفون على بقية العائلة (عائلة ابو احمد)

بقينا كم يوم بيتهم ويلي عرفنا ابوي انسجن سنة كامله وامي محد سوالها فاتحه، اكثر وحدة متأثرة امنه  لأن حيل متعلقه بأمي متحجي ابد واكل متاكل اتوسل بيها تاكل شوي وترجع تنام الى أن بيوم  جنه كاعدين وانتبهت على امنه متكعد باقيه نايمه كلت خلي اكعدها ما كافيها نوم رحت اكعد بيها متكعد ولج امنه اكعدي مكافي نوم امنه ماكو متتحرك وجها اصفر وحلكها يابس وجسمها نار صرخت بصوت لا لا امنه كعدددددي وكلها اجت سالم ضربها ماكو رش عليها ماي ماكو شالها واخذها لمستشفى لحكنا وياي عمتي حطولها مغذيات والحمدلله صحت ودكتور كال عدها فقر دم وضعف كال تبقى اليوم بالمستشفى الى ان يتحسن وضعها وبقينا وياها وسالم راح لأن ميقبلون يبقى وبقينا يوم كامل وبعدها طلعنا خطيه اختي حور شافتنا وضلت تبجي اكلها مبينه شي باوعت على امنه وباستها وكالت

حور:_خفت عليكم يمتى يرجع ابوي ونعيش،مثل قبل

قندة:_ان شاءلله يرجع ونعيش مثل قبل وروح للبستان

امنه:_و ماما

_هنا دمعتي بعيني ما اكدر ابجي كدامهم مريدهم يحسون بضعف

قندة:_ ماما هم ويانا انتِ بس،صيري زينه وهي تجي اذا شافتج هيج تزعل ماما بقت بس،تهز براسها بمعنى قابله

والحمدلله شوي شوي بدت اصير احسن...

ومرت ايام بيت عمتي يمشي اليوم عادي عيشتهم حلوا وكلش طيبين وغير جنان وجدان عرايكهم ميخلصن وشوي يرجعن يصالحن اما اخوي سالم بقى يطلع ويه احمد ابن عمتي يشتغل وياا طبعاًهاي سنة تركو المدرسه بسبب الحادثه عمتي اصرت على ولد بنتقلون هنا ويبدون يداومون بس هما مقبلوو،الا حور اللي كاعدة يم الكتب وتبجي انقهرت عليها بس،شنسوي مافي باليد حيله،وماشيه حياتنا طبيعيه

يتبع.. 

حبايب گلبي مثل كل مرة شاركوها مع اصدقاءكم، ولا تنسون ضغطون على نجيمة 👈⭐ حتى توصل لأكبر عدد

احيكم 😍

✍️كاتبة الجنوب..