حبيبه

#حبيبه 🦋 52

.............

ماما ،، شنو يا حوده فهمت منه
حوده ،، اها فهمت الحق ياامي ما شاءالله عليه
دينجر فالفيزياء
بدء معايا وكأني مش واخد شي عطني من الاساس
كل الأساسيات وحتى الاله فهمني عليها وقالي فكل حصه نوريك حاجه وان شاء الله متخشش للامتحان إلا وانت متمكن منها
ماما ،، باهي ماشاء الله
لي يعطو بضمير توا اقلال تمو كان هضا الطالب ميطرش ياخد تقويه
حوده ،، ياامي كان على حق الحصه الجايه متشيلش هم نا تو نصرف
ماما ،، كلمه وحده قلتها ايام الدراسه مفيش عمل السنه شهاده ومفيهش استهتار
حوده ،، بس ياامي
ماما ،، مفش حاجه اسمها بس
الهى في قرايتك وان شاء الله ربي يرزقني برزقكم
حوده ،، معناها نأجلوها الحصه الجايه
ماما ،، نا مشكيتلكش
انت فرحني بنجاحك بالمجموع لي يرفع الرأس والباقي مش شورك
حوده ربي يخليكي لي

صبا حوده عدا شور دار محمد لوله عشان يرقد فيها لانه بعد محمد اجوز قعدت لحوده

حط حوده تليفونه في جنبه واتكى على ضهرا وقعد ايبحت فالسقف وهو سرحان ويفكر في امه كيف تبي تصرف فحق الحصه وهو عارف ان معندهش
فلاش باك
فالسوق
على كم المتر هذا
البياع ،، ب45
ماما ،، وهضا
البياع ،، في منه ب60حرير اصلي
وانتي اكثر وحده عارفته.وفي منه التقليد ب45
ماما وهي اتفرج ع الاقمشة الأسعار نار
البياع ،، مش نا بس يا مدام
السوق كله وضع البلاد معش كيف قبل
ماما ،، يفرج الله على بلادنا
حوده ،، شنو ياامي كان غالي نعدو المكان ثاني
ماما ،، سوق كله كيف بعضه صدق هضا وضع البلاد
اطلعت ماما وعدت شور السياره
لحقها حوده وهو ايبحت في ماما
ماما ،، افتح وخلينا نعدو
حوده ،، بس ما خديتي شي
ماما ،، في محل فبدايه الشارع ناخد منه ولي ينقص عليا يراجيني فيه وفتحت ماما البورتفيه بتاعها وطلعت لفلوس لي عندها وقعدت اتعد فيهن
كشر وجه ماما بمتعاض
وحوده قدر يلاحظ الشي هضا عليها
حوده ،، شن في ياامي كنك مضايقه
ماما ،، سلامتك ياعيني مافيا شي
وصلو للمحل ونزلت ماما وحوده عشان تشري ولأنه صاحب المحل عارف وضع ماما فيساعد فيها
بس الحلو ديما ما يكملش زي مايقولو
صاحب المحل عشان عارف ماما تاخد منه بالدين فكان داير نسبه ازياده ع سعر الحاجه الاصليه
حوده كان ايبحت في ماما كيف خدت من هضا وسيبت المحل لي قبله مع انه اقل سعر من هضا
خدت ماما كل حاجتها من نفس المحل لي تعامل معه
ودرالها فاتورة بالحاجه
سلكت قيمه بسيطه وقع٦د الباقي عليها دين

فالوقت الحالي
كنت اتدق على دار حوده بس مردش
فتحت الباب بشويش
شفته كيف متمد ع السرير من دون اغطاء
عديت شور الدولاب لي كان فجنب الباب لانه المكتب محمد حاطه اقريب من سريره وفالجنب الثاني المكتب
والسرير فالنص يعني امقابل الباب
فتحت باب الدولاب طلعت انصولا لحوده
ومشيت شوره انغطي فيه لقيت سرحان ويبحت بالسقف
نا ،، حوده حوده وهزيتله كرعيه لي كان مادهن وحاطهن فوق بعضهن
نط حوده من هزت كرعيه
نا ،،بسم لله كنك انفجعت فيش كنت سرحان
حوده ،، متدوريش
عديت شور الكرسي لي جنب المكتب برمته وقابلت حوده وقمعزت عليه .
شنو متدوريش
كان ما حكيتلي نا لمن تبي تحكي
حوده ،، هههههه
نا ،، عليش تضحك
صح نحن خوت واقرب وحدين فالسن لبعضنا
حوده ،، اصلآ بعد اتصبي جنبي انحس فيكي اصغر مني
نا ،، هههههه
باهي لي ماني اقصيره الإحساس هضا كله ونا طويله
حوده ،، بس مش اطول مني
نا ،، ماشاءالله انت ربي يحفظك لي يشوفك يعطيك اكبر من عمرك
حوده ،، يعني نعجب
نا ،، غير تعجب انت
غير خش للجامعه وشوف شن ايصير معاك من وجوه البنات
حوده ،، طمنيتني
نا ،، باهي بعد طمنتك تو جاء دورك اتطمني نا
شو لي شاغل بالك ومخليك مش حاسس بروحك
ورد بالك اتقولي ما في شي
حوده ، شغلتني امي
نا ،، كنها
حوده ،، نحس فيها مضايقه ومتبيش تحكي لحد
نا ،، منيش مضايقه
حوده ،، مفلسه يعني وعليها دين كبير فمحل الاقمشه
نا ،، كيف عرفت
حوده ،، عديت معها للمحل
نا ،، اها يستر الله وشن الحل توا
حوده ،، والله ماني عارفه وزدت نا عليه هم أستاذ الفيزياء
نا ،، كان عليك انت ساهله تدبر
بس تعرف ماما هضا عليش قالت لسلمى متزورينش توا
حوده ،، من قالها لكي
نا ،، سلمى
حوده ،، نفكر نعدي لباتي انكلمه
نا ،، لا رد بالك اتديرها بعدين ماما تزعل منك
حوده ،، باهي شن الحل
نا ،، بابا رد قصدك
حوده ،، عزو قالي الاسبوع هضا ايجي
نا ،، وهو الاسبوع يبي يكمل
وكان رد كيف ما قلت لا جانا ولا سأل علينا وهو عارف ان محمد مش هنا لا وأخرى قبل ما يعدي ماجنش وماقلش انه مسافر ولا كان ناقصكم شي
حوده ،، شن انديرو
نا ،، تو نصرف خليني اليله انفكر وبعدها ساهل تفرج بأذن لله
حوده ان شاء الله
طلعت من عند حوده ونا شايل اطنان من الهموم فوق كتفي مش لي ولا العمري
خشيت على ماما لي كانت لابسه نظارتها وتخيط وغاطسه فالشغل لعند اوذنها
ماما ،رفعت رأسها بحتت فيا
وردت اتخيط
نا ،، ماما كان في حاجه تبي امساعده عطيني نساعدك فيها
ماما ،، تو عدي تريحي وارقدي وبكره بعد العصر عندي زبونه جايبه بناتها الاثنين تبي فساتين وراينا ابدعاتك فالتصميم ومتخليهش تطلع من هنا إلا وهي مقتنعه
نا ،، اصغار بنتها
ماما ،، تقريبآ
12و 15
نا ،، بس نا مصممتش للعمر هضا
ماما ،، متاكده انك تقدري
نا ،، ان شاء الله
مع ان المهمه كانت صعبه بالنسبه لي بس حطيت في راسي اني نبي اتساعد ماما
عديت شور ويه فالدار وخديت منها فونها وخشيت على مواقع للتصميم
وقعدت انتفرج وعجبني أكثر من شي
قلت بيني وبين نفسي اني نقدر
طلعت كراسي بتاع الرسم وقعدت نرسم فيه ونمحى ونشرط ونرد نرسم
أتعبت
عديت شور المطبخ انطيب قهوه الروحي عشان نقدر نسهر شفت ماما مزالت واعيه
نا ،، نحسبك معايا في قهوه
ماما ،، مفيش مشكله
نا ،، احلى قهوه الست الحبايب
ابتسمت ماما على كلامي
جتني ويه فالمطبخ وحكيت نا وياها على كلام حوده وشن قالي
ويه ،، باهي شن انديرو
نا ،، تو ونا نقلب فالفيس واليوتيوب شفت أكثر من حاجه تنفع اتكون مشروع لنا
نقدرو نساعدو بيه ماما ونعتمدو على أنفسنا
ويه ،، شنو
نا ،، ...........
وحكيت لويه ع الأفكار
ويه ،، هن الاثنين حلوات ويسير منهن
نا ،، باهي شن رايك نحكو مع حوده بكره وانصرفوا على ضوها
ويه ،، تمام يا أم الأفكار
نا ،، ههههه
طلعيلي حكية حليب
ويه ،، باهي
درت الروحي قهوه مره عشان كنت ناويه نعلق
ودرت لماما ويه قهوه بالحليب وحطيتلها معه بشكوط