حبيبه

#حبيبه 🦋 77

#حبيبه 🦋
#البارت_السابع_و_السبعون
شن لي مازال مكتوب على اطفال مفرحوش بحضن امهم ولا شمو ريحتها ولا حفظوا ملامحها ولا شبعوا من حنانها شن لي مكتوب على اطفال كان اول صوت يدخل لمسامعهم هو صوت الصراخ والبكاء على امهم
شن حعييشو من بعدها
وكيف حتكون حياتهم من غيرها
اعميمه نجاة مدت اول بيبي لبابا
واعميمه فاطمه مدت البيبي الثاني  لماما
ماما مدت ايديها لي يرجفن ومسكت البيبي لي كان يبكي  وقعدت تبكي طبست بيه على مني وحطته لها على حضنها وقريب من وجها
سبحان الله كيف برم وجه شورها وكانه يبي ايبوسها وكانت بوسته اشبه بالطفل لي يرضع من صدر امه
اللقطه هذي مش بس بكتنا لا شقت اقلوبنا شق
انفتح الباب وخشت عمة مني لي كانت ماسكه سيما
سيما ،، ابي  مامي   * نبي *
ماما ،، اااااااااه ياكسرت قلبي على بنتي وعيالها آآآآآآه ياعويلتك يامني لي مازالو مافرحتي بيهم اااااه على بنيتك لي اتدور فيكي
ويه ،، تعالي سومي هنا
سيما ،، ابي مامي بوجه زعلان وشوارب نازلات تحت
بابا ،، تعالي اهي ماما تعالي
عدت تجري شور بابا وماما ارفعت البيبي لي كان فحضنها وقعدت اتبوس فيه
مسكها بابا وقمعزها على كرعيه
هيا طبسي بوسي امك
سيما ،، ننت مامي *ارقدت*
بابا ،، ننت خلاص وياريتها ما ننت
سيما ،، ابيها نا
ونزلت عليها
وقعدت اتهز بيدها على ايدين مني لي مربطات جو الكفن وبعدين المست وجها
نودي مامي هيا نودي مامي نودي *نوضي*
نا ،، هيا سيما نعدو خلي ماما توا هيا ياعيوني 💔😭
بابا  ،، بوسي ماما هيا
سيما ،، امبش نودي توا
بابا ادموعه انزلن كيف سيما تبكي وتحكي وهي مش فاهمه شن لي ساير في امها
بابا ،، شوفي نا كيف  انبوسها شوفي
وطبس على مني ايبوس فيها من جبهتها
مد يدا ليسار لبعد مني وحضنه ونزل وجه على قيس وجها وقعد يبكي بصوت لدرجه ان كل جسمه ايهز وهو يبكي
وكل لي معنا فالمربوعه قعد يبكي حوده قدم شور بابا وحضنه وهو حاضن مني وقعد يبكي امعه
طبست عليهم اعميمه فايزه وصبتهم من على مني وسيما لي خافت جت تجري احضنت سلمى لي كانت امغير تبكي عند كرعين مني
وسلمى احضنتها وسكتت
سلمى ،، ليش ما بوستي مامي
سيما خشت في حضن سلمى ومبتش اترد
..................
وليد ،، كان يبكي واجعته بنت عمه لي طول عمرها فحسبة اخته
واجعته مني لي عدت فرمشة عين مني لي عمرها مزعلاته مني لي فوقت شدته كانت ديما تسال وتواسي فيه
عمي ابراهيم ،، اصبر ياوليد الصبر مفروض انت لي اتصبر خوته مش نحن لي نصبروك
وليد ،، مني طول عمرها اختي الكبيره عمري ما درت فرق بينها وبين وصال ودانه
عمي صالح كان امصبي على ايمين عمي ابراهيم ويسمع فيه
هذي الدنيا ياوليد ان شاءالله ربي يصبر هلها ويعوضهم خير بعويلتها
انت شوف هي صح عدت بس ربك عنده حكمه اكيد
ومافي حد ايموت ناقص عمر
اهي سيبت اعويلتها لي ماشافتهم  وبنتها لي مزالت تبيها ومفرحتش بيه
مافي حد تبي توجعه غيبة مني اكثر من بوها وامها
وربي ايصبر عبدالرحيم لي يبي يدفن اثنين فوقت واحده بنته ومراته
وعزو لي فقد امه واخته
من ايقول ان الوجع يبقي كبير وان بدال الواحد نفقدو اثنين
انت انسان مومن وعارف حكم ربك
...................
طلعو بابا ومحمد وقعدو حوده ويوسف وقعدت ويه امعاهم فجنب عزو لي طول وهو يبكي فوق راس امه
طلعت نا وسلمى وماما وعماتي لي كانن شايلت البيبز وعمة مني لي ماساكه سيما لي مش فاهمه شن لي صاير في امها وتحسابها امغير راقده
سلمى مسكتها ايمان عشان اتقمعزها فالصاله على خشت ساره وهي تبكي بالصوت
كان صوت ابكاها عالي حضنت ماما لي لاقتها اول وحده
بكت ابكاء عليها لدرجة اني كل لي قاعدين بكو امعاها
مني وسلمى وساره كانن صديقات صح مني مش قريبه لها زي سلمى بس مني كانت اكثر من ايقدم النصح لساره ايام الثانوي والجامعه وعلى مايصير معاهن مستحيل اتطلع سرها
ج
كانت اعميمه نجاة امقمعزه تبكي مع صبايا
حولت من ماما وعدت شور اعميمه نجاة وقعدت تبكي معاها
ابكائها كان ابكاء شخص فاقد ابكائها كان من قلبها كان
طالع من جوا
تمت كل مره تبكي مع وحده لعند وصلت في سلمى
سلمى ،، ااااااااااه ااااااااااه ياربي ياربي ياربي
ساره ،، عدت وخيتنا عدت صحبتي عدت لي تخبي فسري وتدافع عليا عدت وخلت اعويلتها عدت وهي زعلانه مني
سامحيني ياسومه وان شاءالله مني اتسامحني
سامحيني يامني سامحيني مانحساب الموت تاخدك منا
كلنا قعدنا نتابكو على كلامها سامحيني يامني كان فيوم قسيت وبعدت عليكي سامحيني مانحساب الموت اتفرق بينا
صبت وهي تمشي وتبكي كانت مشيتها مهزوزه
وصلت في عمة مني لي ماسكه سيما قمعزت قدامها وحضنت سيما
نعلي مني لي خلت بنتها كيف ما ماما خلتني نعلي سيما بتعيش كيف عيشتي
نا لي امجربه القزن نا لي عشت بلا ام نا لي انحرمت من امي واليوم سيما كيفي
صبت اعميمه فاطمه وقعدت اتسكت فيها
فجاه طاحت علينا وصال وشجنجت
انفجعنا عليها فوق من فجعتنا بمني
ايديها وكرعيها لفن ع جنب
صبت اجديده ود تجري شورها وشيماء ودانه وقعدن
يبخن فيها بمياه لعند هديت واجديده خدتها فحضنها وقعدت تقرا عليها فقران
سمعنا صوت الخيمه بعد بنوها برا صوت الحديد بتاع الخيمه كان صوت قاسي كان صوت كسر كان صوت جرح ينزف ومستحيل يبرا ولا يتعالج
سبحان الله كيف خيمة العزاء تنبنه في لحظه وخيمه الفرح بالحجز بيش اتحصلوها
سبحان الله كيف هالخيمه مكروها ومحد يبيها ولا يتمناها
كل ما نسمع صوت تخبيطم كنت نبكي على مني وخيتي على صحبتي على ضحكتي على فرحتي على حنونتي على ماما وجرحها وقزنها واليوم فقدها لبنتها
كنت نبكي ع الوداده على خيتي لي مش بس اعيالها تقزنو لا ،  حتى نا كسرتي فيها كبيره مني كانت كل شي بالنسبه لنا مني كانت الحنونه فينا ولي تبينا ديما متريحين  وناجحين
كملو بناء لخيم وجابو مصروف العزاء اعميمه سليمه واعميمه جميله وحمات اعميمه فاطمه الكبيره
هن لي صبن للعزاء
المصروف والذابيح جابوهن بلا احساب
جدي منصور حلف ماحد ايحط صدقة اليوم الاول الا هو (عم بابا )
خشت اعميمه جميله ع البنات وقلتلهن
اعميمه جميله ،، هيا صبن للمطبخ شوفن العرب لي قاعده هك من الظهر
ميرا ،، حاضر
اعميمه ،، جيبي خواتك وتعالن
صبن البنات لي كانن نفس حالتنا ايتباكن للمطبخ بدن ايجهزن في اصدقة العزاء
وشيماء بدت اتطلع هي وجوري ويقدمن
اعميمه ،، جوري عيونك ع الحمامات لعند بعد الدفينه كلمتك خالتك تو اتدزلي البنات لي يجن يخدمن عندها
ميرا ،، بلكي العرب مايبوش ياماما فكينا من الاحراجات
اعميمه جميله ،، هذي اصدقتي نا لمريم لي خيرها سابق هى واعيالها علينا
شيماء ،، عندها حق ماما
جوري معناها نا نعدي انشوف الحمام لي برا
قبل الصلاة مرات يبن ايخشن
................
جاو الرجاله عشان ايطلعو الجثامين
ماما ،، ردن بالكن وحده تندب ولا نسمع صوت اعياطها
كانت تحكي وتبكي
هن ايريدن منكن لدعاء توا وهضا الوقت ليي محتاجتكن فيه
ردن بالكن والله وحده اتعيط ماني امسامحتها لا دنيا ولا اخرى
وان شاءالله ربي يسامحني لاني جهلت وندبت
هذي كبدي لي انحرقت وربي ما يضوقها لمؤمن حرقت الكبد وكسرت القلب
جاء محمد للصاله وكان باين عليه باكي لعند منتهي نجوى اول ماشافت وجه محمد زادت فالبكاء هي عارفه قديش محمد ايحب مني وقديش يحترم فيها
كان امنزل راسه تحت بس مع هضا كله قدرنا انشوفو قديش متاثر
صبا يوسف وصكر المصحف وحوده دار نفس الشي
عمي صالح كان ماسك عزو مع يدا
خشو خوت نوريه اثنين عزو  عزو وبابا ويوسف وحوده  لي كانو فالمربوعه ومطلعوش برا بكل 
عمي ابراهيم هيا ياشباب
اكرام الميت دفنه
طبس يوسف ومحمد على ثابوت مني من قدام
وخوت نوريه على تابوت اختهم من قدام
حوده عدا شور تابوت نوريه من لاوراء
وميدو فجنبه
صافي ومعتز شالو ثابت مني من لاوراء
عمي عبدالله خدا غزو من يدا وعمي صالح مسك وليد لي كان متاثر بشكل كبير وصوت عبرته ماليه المكان
وليد لي مقدرش ايشيل ثابوت بنت عمه ولا مرات عمه
وليد لي حاسس انه قعد بس مالهش اهميه كيفه كيف باقي الشباب
وليد لي كان يبكي قدام الكل لانه مش شايفهم كيف ماهم شايفين ادموعه و واجعهم
كان يبكي على روحه لي قعد بالحال هضا يبكي على عمره لي يبي يكمل وهو يراجي في يد اتجي تمسكه اتقوده توريه طريقه
على كابتن طاير قعد عاها ع الكل   
عمي صالح كان ايبحت في تابوت ايمان لي طلع بعد تابوت نوريه وضغط على يدا وليد زين
وكانه خايف منه يرحل كيف رحلة لي قدامه .
رحله مافيهش رجوع رحلة تقسم الظهر وتشق  القلب رحله طويله كلها حسره وألم ع رحيل صاحبها
رحله اللا عوده
رحله لي يوم جيتك لهدنيا ربي حدد رحيلك عنها بأسباب مختلفه
رحله لي منتمنش حد من احبابي يرحلها ولا يفارقني فيها
وربي ان شاءالله يجعل يومي قبل يومهم لاني عارفه اني معنديش القدره عشان انعيش بلاهم
( اطفالي وامي وخوتي وسندي  يجعل الله يومي قبل يومكم )Natash sa
.............
ماما بصوت عالي خانقته العبره غارق فالدموع  ،، رب يرحمكن ويغفرلكن ويوسع منزلتكن
اللهم ربي ارحمهن برحمتك التي وسعت كل شي
نحن البنات وعماتي وكل من يسمع في دعاء ماما
امين
اللهم اغسلهن بالماء والثلج والبرد اللهم نقاهن من الخطايا كما ينقى الثوب الأبيض من الدنس
نحن 😭💔 ،، امين
اللهم عافهن واعفو عنهن اللهم وسع مدخلهن واكرم نزلهن اللهم ابدلهن دارآ خيرآ من دارهن واهلأ خيرا من اهلهن وزوجا خيرا من زوجهن
اللهم انت ربهن وانت خلقتهن 😭
ماما عاودتها من جديد  ،،  انت خلقته انت خلقت بنتي ياربي انت عطيتاها لي وانت هديتها للاسلام وانت قبضت روحها اللهم لا اعتراض على حكمك لا اعتراض ياربي لا اعتراض  ياربي  وحطت ايديها على صدرها لا اعتراض ياربي على رحيل بنتي لا اعتراض على فراق حبيبتي ياربي لا اعتراض ياربي واغفر جهلي وقلة حيلتي ياربي
انهارت ماما من  البكاء    .
كانت نار والعه في روحها كانت تبكي وتطلع فالاه من وسط قلبها
مش عارف كيف اتدير بيش تهدا كان وجع ايشق في صدرها وقلبها ونار مني لي فماما مستحيل تطفى ولا تبدء
مني البنت لهاديه المحبوبه الجميله المتواضعه الناصحه المسامحه مني البنت الكريمه
والزوجه الحبيبه والمخلصه مني الام الحنونه لي ضحت بعمرها عشان اتجيب وتفرح زوجها وعمها وعيلتها مني الكنه المحبوبه ومرت الاخ المحبه والاخت لي مهما حكيت عنها مستحيل نعطيها ولا نوفيها حقها
احمد ،، وينك انت ياراجل
مصعب ،، كنك رايفت عليا
احمد ،، تي مش وقت ابصاره ياراجل
مصعب حس من صوت خوه ان في شي مش طبيعي
خاف على اجديده وده وجدي احمد ايكون صاير فيهم شي
مصعب ،، شن في ياأحمد متقولش امي ولا باتي
احمد ،، لا لا اطمن
بنت الحاج عبدالرحيم وزوجته عطوك عمرهم
مصعب 💔 حس قلبه انشق من الكلمه
وجسمه افشل وجه وايديه وكرعيه كلهن اقعدن امياه
لي جاء فعقله ان( ويه وماما )
احمد ،، تسمع فيا شن قلت
مصعب صبا من على مكتبه وعدا شور الشباك افتحه عشان ياخد نفس ويقدر ايرد عليه
كان يسمع في صوت انفسه
احمد ،، مصعب انت اكويس رد عليا
مصعب بصوت يدوب طالع وقلب يرجف ونفس يبي ينقطع اكويس
نا اكويس
احمد من صوت مصعب فهم ان يحساب ويه هي لي توفت
احمد ،، مصعب اسمعني اكويس
البنت لي توفت هي زوجتة يوسف
مصعب وهو يستوعب فالكلمه
غمض اعيونه وهز راسه ونبض قلبه زاد وحس بحراره جو جوافه
كيف من قولي
احمد ،، زوجته يوسف توفت تحت الولاده
مصعب بداء يستوعب فالامر
وزوجته شن جابها لبنته
احمد ،، قصه ياراجل هذي زوجته لي كانت فالاردن
المهم سقد عشان تحظر الدفن
احسن شي تعال للمقبره طول
مصعب وهو ايصكر فالشباك وعدا شور مكتبه طفى اللاب ولم حاجته خدا مفتاح سيارته وطلع بسرعه   ،، تمام جاي جاي
طلع بسرعه من مكتبه ومن الشركه بكل كل لي مار من جنبه فالشركه كان يركز عليه كيف ايجري حسو ان في شي
ركب سيارته ومندون ما يرجها عشان تسخن طلع بيها
حط يدا على قلبه وهو يسوق وقعد ياخد في نفس
اهدا اهدا شن قصتك كل ماتسمع طاريها ايسير فيك هك اهدا البنت مش لك .💔
.........
سلمى ،، وهي تبكي
ياراحم الحي ورازقه ارحم خيتي ومرت بوي وثبتهن عند السؤال اللهم ثبت خيتي ونوريه عند السؤال
اللهم وسع منزلتهن اللهم إخراجهن من ضيق اللحود ومرتع الدود الى جنات الخلود
اللهم ياقيوم اقمهن على نور في قبورهن وزدهن سرورآ على سرورهن اللهم ثبتهن وبيض اللهم وجوههن عند لقائك
..................
وصلو بيهن للمقبره كان جايين راجله عدد كبير بكل للمقبره
زملاء بابا فالعمل ومعارفه
انسابته من اهل نوريه ونسابتهم
اهل يوسف واصحابه ونسابته
عمامي ونسابتهم اصحاب الشباب
مفش حد غاب لدرجة المقبره امتليت
حطوهن فجنب بعضهن وصلو عليهن
صلاة الجنازه
الصلاه لي تفرق عن اي صلاه الصلاه لي يصلوها عليك
لاول واخر  مره بعد موتك
كيفيتها
يصلي عليه أربعًا، أربع تكبيرات، وأنت واقف، تصلي عليه مع إمامك، تكبر أربع تكبيرات و تقرأ بعد الأولى الفاتحة، الحمد لله رب العالمين، وما تيسر معها من آيات أو سور قصيرة، ثم تكبر وتصلي على النبي ﷺ كما تصلي في الصلاة، ثم تكبر الثالثة وتدعو للميت، بما تيسر 
الامام بداء فالصلاه كان واقفين كلهم في صف واحد
يوسف وباته وعمه وبابا ومحمد وعزو وخوت نوريه وعمامي ومعتز وصافي وحوده و وليد وميدو فالصف الثاني وفجنبهم خالد واحمد ومصعب لي وصل وهم ينظمو فالصفوف  وعلي وحسام صديق محمد وزملائه فالعمل
وباقي الاقارب والناس لي جايه اتعزي كان واقفين بشكل عشوائي عكس العيله لي كان كلهم فجنب بعضهم
بدء الأمام بأول تكبيره
وقراء الفاتحه وبعدها سورة يسين لانه معروف فضل هذه السوره عند قراتها للميت
كبر التكبير الثانيه وامتلاث المقبره بصوت التكبير وكن بعدها بالصلاه على الحبيب
وفالتكبيره الرابعه بداء الامام فالدعاء 
 اللهم اغفر لحينا وميتنا وشاهدنا وغائبنا وصغيرنا وكبيرنا، وذكرنا وأنثانا، اللهم من أحييته منا فأحيه على الإسلام، ومن توفيته منا فتوفه على الإيمان، اللهم اغفر له وارحمه وعافه واعف عنه، وأكرم نزله ووسع مدخله، واغسله بالماء والثلج والبرد، ونقه من الخطايا كما ينقى الثوب الأبيض من الدنس، اللهم أبدله دارًا خيرًا من داره، وأهلًا خيرًا من أهله، اللهم أدخله الجنة، وأعذه من عذاب القبر، ومن عذاب النار، ووسع له في قبره ونور له فيه؛  اللهم لا تحرمنا أجره، ولا تضلنا بعده
كملو الدعاء ونزلو يوسف ومحمد لقبر مني كانو الاثنين منهارين كيف بعضهم محمد فتح العقد بتاع الكفن ورقى ويوسف طبس عليها ورد يبكي كيف العيل  الصغير لي فاقد امه  خطرت عليه كلمتها
بعد إنجيب نبي نرقد نومه طويله
صورني تلقاها بعد اترايف عليا
حط اصوري فدار لعيال عشان ماينسوش شكلي ونقعد ديما فاداكرتهم
وحال بابا كان كيف حال يوسف واكثر كل لي فالمقبره وجعهم بابا لي طاح قدام القبر ونزل بجسمه من قوا لبكاء  بابا لي يذكر في مني وطفولتها
مني لي مجش حظر فرحها ولا شافها كيف ما كل اب يشوف بنته يوم فرحها وهي ماشيه للكوافير وفي من ايخش مع بنته عشان ايصور معاها
مني لي كل ماتشوف بابا تحضنه وتبوسه وعمرها ماقالتله ليش ماجيت لفرحي
اهو اليوم شافها بالابيض ولا مش اي ابيض
ابيض محد ايتمني يشوف غالي ولا حبيب ملفوف بيه
نزل حوده ومحمد وعزو نزلو نوريه لقبرها وعزو ياما صار فيه كان مايبيش ايسيب امه
خده محمد في حضنه وقعدو ايتباكو
جرح عزو كان اعمق جرح فكل الموجودين
عزو مش بس فقد صدر حنون وام لا فقد اثنين فقد صدر وفقد قلب فقد ام وفقد اخت
فقد حنان وفقد سند راء متقولليش  كيف سند
فعلآ الاخت الصالحه سند وظهر لخوها مش بس خوها لا في من تلقياها سند لكل هله ولبوها قبل ماتكون لغيره
وفعلآ في كم من بيت تلقي الاخت الكبيره هي السند فيه وهي صاحبة الكلمه الطيبه وهي لي تلم عيلتها وتفرح بخوتها واعيالهم
عشان هك نار عزو ياكبرها من نار ويا مصعبها
................
روحو الكل من الجنازه حيلهم من هد وقلوبهم موجوعه كان وداع مني وأفراقها  صعب على كل العيله
يوسف كان قاعد امعاهم جثه من غير روح
مخبش ادموعه نهائي ولا قال كيف مايقولو اصحاب العقول المختله نا راجل مانبكيش على مرا جايبتها فاتحه
وراء هضا مش كلامي هضا الواقع البيبي
ونا نعرف او سمعت على راجله بعد ايموتن صبايهم بمجرد انها ماتت ايفكر فنفسه ويدور غيرها
في من خدا بنت خو مراته (يعني عمتها اخت بوها لي جت مكانها )
ويقول ان في راجله بعد ايعزوهم في زوجتهم يصبرك الله  ايرد ويقول (نا فليله) و
واكيد فهمتن القصد من الكلمه لي لها معني كبير وعميق