حبيبه

نا ..كملت الصلاه و دعيت لربي يخليلي ماما ويقرب مني الناس لي يحبوني ويبعد عني لي يكرهني
دانه ...تعالي بابيبا فرشتلك جنبي
نا حطيت راسي ع المخده وغمضت اعيوني وقلت ليش انفكر فيه

معتز ..كان راقد في فالمربوعه مع الشباب ومغمض اعيونه ويدكر فيا بعد طاح مني الشال من كتوفي وكيف اشعري كان طويل .... وعجبه💗

فالصبح اوعيت بدري مكنش في عرب واجد الأغلبية روحو فالصبح بدري قعدنا نحن وعيت عمي صالح لي هو بات وصال ودانه وليد
وطبعآ عيت عمي عبدالله يقعد سلف اعميمه نجاة وولد عمة بابا يسكنها فجنبهم بات صافي ونجوى وخالد وسالم
واعميمه فاطمه زوجها مفتاح واعيالها اصغار ملهمش دور فالروايه
...
طلعت للجنان وكنت رافعه شعري ذيل احصان لابسه بجامه بيبي بينك طبعآ خياطة ماما نبي نشوف الورد لان اجنانهم كان مليان شجر وورد ونا نعشق الورد
معتز ..بصوت هادي صباح الخير
نا..مرديتش عليه.
معتز ..عارفك زعلانه مني بس ...
نا ... قاطعته قبل ما يكمل كلامه ..بس نا منحقش فيك ودموعي يبن ينزلن مني وبصوت يرجف
وقتله من (حبيبه) ؟ ؟ وبحتت فيه من فوق لعند لوطه وعديت وسيبته .
معتز...يانعن جد ام الحياه ..نا اتديرلي هكي نا غلطان اصلآ لي جيتها
نا كنت نمشي وحاسه بغضب معتز ورايا واعيونه لي فشعري ومركز ع طريقة مشيتي
معتز ...كان يبي ينفجر من الغضب
ونا ...
قررت اني معش انشوف معتز
وهذي كانت اخر مره شفت فيها معتز لعند ......
🌸متابعتي الغاليات تبو تعرفن امتى معتز وحبيبه يتلاقو .........بس اصبرن اشوي لانه الجاي احلى🌸

فالمغرب بنات العيله كلهن كانن يجهزن فلقعده برا فالجنان
وكانو مجهزين عالة الشاهي والجو حلو
والشباب ايجهزو في الشوايات عشان العشاء
جاء عمي عبدالله وعمي ابراهيم وعمي صالح* لي كنت انحبه كيف بابا وقعدوا برا فالجنان
وماما وعماتي مقمعزات اقريب منهم وعمي صالح قاللهم عطني عالة الشاهي تو نا انطيبها
البنات كانن فالمطبخ ايجهزن في سلاطات بتاعات العشاء اعميمه فايزه رمتلهم تنورين خبزه
سالم ...يرن على صافي ومعتز لي كانو طالعين من الصبح ...ها ياراس وينك
صافي .....اقريب منكم هيا جايين
وليد كان قاعد هو ومحمد وميدو وخالد ايهدرز ومحمود ومعتز خوتي الصغار مع اعيال عمي لي فعمرهم يلعبو في بلاستيشن
خش خالد ع البنات وخداء اللحم والكبده وبداء في الشواء
صافي ومعتز ....السلام عليكم
كلهم ...وعليكم السلام
عمي عبدالله وين كنتو حتى الغداء ماجيتوش عليه
معتز ...كان عندنا شوي شغل
عمي عبدالله ...شن صار فالأرضي لي قتلك شوفهن
معتز ....عديت شوره الراجل بس يا حاج راهو امعلي السعر علينا
عمي ابراهيم ....نا من الاول قلت للحاج ايفوتا السمسار هضا طماع ويرفع في الأسعار
معتز ....ايسير خير
طبعآ معتز مهندس معماري ويشري فالأرضي ويبيع ويبني في فيلات وشقق ويتاجر فيهن ومعه خالد ولد عمه ماسك معه الفرع بتاع العقارات والبيع
وخالد كان ضابط و هو اكبر واحد عند هله وبعده صافي لي من عمر معتز وبعده سالم وبعدهم نجوى البنت الوحيده