💔الجزء 187💔
نزلات من تاكسي وطلعات لعندو لدار..دقات ويديها كترجف ..ورجعات دقات تاني .وتالت والوو تا واحد ماحل لباب بدات كتبكي وضرب فلباب:عصااااام حل لباب عفاك عصااام
حطات راسها على لباب مازال كدق وتبكي:حل ماتخلينييش بحدي عفااااك عصااااااام
خرجو جيران على صوت اازديح ولبكة وقفو كيتفرجوو كيف كتبكي وحالتها كيف دايرة جبهتها وفمها كيسيلو بالدم ووجها حمر وشعرها مخربق..قربات عندها وحدة من جارات:مالك ابنتي
دينيس بصوت باكي:بغيييت عصااام اخالتي خاصو يحل لباااب
الجارة:شفتو فصباح بكري هاز شانطتو هو وصاحبو ومشاو واقلة سافرو..قوليلي اش واقع يقدر يعاونك
هزات راسها بلا وهي كتبكي:هو لي غيعاونييي عطيني عفاك نعيط ليه
دخلات جابت ليها الطليفون وعطاتو ليها دوزات النمرة بقة كيصوني مرة وجوج فتالي قطع عليها..رجعات صونات نفس الشي .
كتبات ليه ميساج:عصام جاوبني عفاك محتاجاااك ماتخلينيش بحدي انا دينيس
بقات شحال وهو يسيفط ميساج:دينيس ماتعاوديش تصوني عليا هضرنا فهدشي واش غنبقاو نعاودوها فكل مرة..صافي نساايني
قراتو وداك ساع رجعات صونات لقاتو بلوكة نمرة..زادت فلبكة وهي حاطة يديها على فمها:علااااااش اعصاام علاش
طاحت فالارض كتبكي وجارة كتحاول تسكتها وتعرف اش واقع حتى كتسمع صوت راجلها:زيدي دخلي ماناقصين صداااع يضبرو رااسهم
كلشي دخل لدارو بقات غا هي وصوت بكاها مسموع ..طلع الكونسيارح:نوضيي ابنتي سيري لداركم جيران كيتشكاو
شافت فيه وناضت بصعوبة راسها غينفاجر عليها كلشي تجمع عليها فدقة داك تصاور مازال بين عنيها كيف كتبوسو وكيف شاداه معنقاه وكيف داخلة لعندو لدار وكيف خارجة..كلشي غيكرها ..من خوها تا لباها وبدر ..اكيد غينويو بزاف دلحوايج ..والمشكل لكبير للي كتبغيه تخلا عليها حاسة براسها اتحماق
هبطات خرجات لقات مول تاكسي مازال واقف طل عليها:تعطلتي
شافت فيه وركبات كتبكي ديمارا:فين انديك ابنتي
ماجاوباتوش ماقادراش تهضر
بقة غير غادي وهو يطل عليها من لمراية شافها مرجعة راسها اللور ومغمضة عنيها ..وقف الطموبيل ونزل حل عليها لباب :بنتي واش نتي بيخير
ماجاوباتوش ضرب ليها على وجها بشوية :حل عينيييك اشنو واقع ليك
والو ماكاتحركش مسح على راسو ورجع ركب فالطموبيل مخلوع لا ماتت ليه فالطموبيل ايولي فالمحاكيم طالع هابط ..وقف حدا واحد السبيطار شاف يمين وشمال ونزل هزها وحطها فالارض ووركب وكسيرا بالجهدو مشا بحالو..خلاها طايحة فالارض حالتها حالة
فالجيهة لوخرا
ملي دخلوها للمستعجالات وهو واقف حدا الغرفة ماتحركش غير ساكت بحال شي بركان خاصو غا فوقاش يهيج ..خاص غا لي يجبدو باش ينفاجر
طاهرة واقفة بعيد عليه وكتهضر فطليفون:مازال ماجات..الله ياربي فين مشات هاد البنت ..شوف وصي واحد من رجال يقلب عليها سمعتيني وبلا مايكبر الموضوع تانشوفو شغا يوقع
قطعات:ياربي منين كينزلو علينا هاد المشاكيل
قربات لعندو :دينيس مارجعاتش لدار
شاف فيها شوفات غاضبين حومر:هربات حساب ليها ماغانلقاهااش ولكن مازال غنتحااسب معاهااا
طاهرة:انا ماعرفتش شنو لي خلاك دير هاد الحالة وشنو شفتي ولكن اي بنت فسنها راه كيكون شي حد فحياتهم كيتغرمو بيه لما جريناهاش لجيهتنا راه انخسروها
ضرب يديه مع الحيط وهو كيتفكر دوك الصور والفضيحة لي فيهم ..لدرجة ماقدرش يقولها المصيبة لي شاف..كون ماوقعش هادشي لعائشة كان غيقتلهاا ويمشي يكمل عليه تاهو..حيت بسبابو ضرب ختو وبسبابو عائشة هنا..زاد حقدو لييه وحلف لا وقعات لولدو ولا لعائشة شي حاجة ماغايتراجعش باش يقتلوو
طاهرة تنهداات:مافهمتش اشنو واقع لهاد العائلة ..
خرجات لعندهم طبيبة حيدات لكمامة من وجها:على سلامت لمريضة راها بيخير
يوسف:او ولدي
طبيبة:الحمد الله قدرنا نعتقوه فاخر لحضة تاهو بيخير
تنهد براحة وماتسناهاش تزيد شي كلمة..حل لباب ودخل لعندها كانت فوق لباياص مغمضة عنيها وناعسة وفيديها سيرو قرب لعندها وحط يديه على كرشها كيشوف فيها بهدوء ..حلات عنيها بشوية وشافت فيه نزلو دموعها وبصوت تقيل خوفان:طاح ليا ولدي ياك
بغة يهضر وهي تزيد فلبكة :كنت عارفة ماغانفرحش بيه نت ديما كتخسر ليا فرحتي كيعجبك تعدبنيي..صافي طاح ليا ياك
زير ليها على يديها:لا ماك
طاحش
ورجع حط يديه على كرشها:مازال هنا
شافت فيه كتحاول تأكد:واش بصاح
هز راسو باه غمضات عنيها كتحمد الله ..شافت فيه شحال وبداو كيتغمضو عنيها ورجعات نعسات ..بقة واقف حداها شحال تحنة باسها على راسها وخرج
طاهرة كانت مازال واقفة مع طبيبة كتشرح ليها اش خاص دير ..وانه خاص ترتاح فهاد الفترة دلحمل
شافتو غادي تبعاتو كتجري:فين غادي
يوسف:بقااي معاها
شداتو من يديه:ما انخليكش دير شي حاجة تندم عليها
يوسف بصوت حاد :لما قتلتوش ماغانكونش انا هو يووسف
ماقدراتش توقفو خرج وركب فلوطو وكسيرا نيشان عندو لدار ..طلع بدة كيزدح فلباب ماخل ليه تا واحد ..رجع ضربها برجليه وهو معصب:فيييين غتكوون
وهبط بحالو وخلا جيران كيطلو مافاهمين والو ..لي جا يزدح فهاد لباب ويمشي
داز هاد النهار وجا نهار جديد
كانت كتبكي وناصر حداها:بنتي علم الله اش وقع ليها عنداك غا تكون دارت شي فضيحة فراسها ياربي ماحفض ليااا بنتي ياربي
ناصر كيدوز فنوامر درجال وبوليس كيقلبو..او والو مالقاو والو:صافي غنلقاوها ..كون وقعات ليها شي حاجة خايبة اتوصلنا لخباار
شافو يوسف جاي ناضت لعندو:لقيتوها
هز راسو بلا ودخل لعندها للشمبر كانت معاها الممرضة كضرب ليها شي شوكة قرب لعندها..الممرضة سلات شغالها وخرجات
عائشة:لقيتو دينيس
جاوبها وهو كيلعب فشعرها وعنيه عليها:لا
عائشة:بهاد الطبع ديالك اتخسر كلشي ايووسف وليت كنخاف منك.كنتي اتقتلها تا هربات..وتا ولدنا كنتي اتقتلوو ماعرفتش فين باغي توصل هدشي بزاف والله
ونزلو دموعها:نتوما رجال كيهمكم غا رااسكم انانين بزاف ..ماكاتحسوش بينا..شنو فيها لاكانت كتبغيه ويبغيها وغيتزوجها
ضغط ليها على شعرها تاتوجعات:سكتي وديها فراسك نتي ماعارفة .وخوك انا لي غنتكلف بيه .خوك عندو حساب معايا وكينتاقم مني بختي ولكن هنا غنوريه
عائشة :رخي مني قصحتيني
رخة منها وحل لباب وزدحها وخرج خاص يلقة ختو بعدة ويرجعها للدار..مافظرش يوري تصاور لناصر وخوتو مايبغيش صورتها تنزل من عنيهم ..ماباغيش يزيد يشوهها معاهم..احساس خايب تشوف فداك الوضعية مع واحد عارفو غا كينتاقم منك بختك
فبلاصة خرا
كان هو وياه جالسين فوق رولاكس اونفاص مع البحر بغاو يبدلو الجو بعيد على كلشي يرتاحو شوية ..طفاو تليفونات وعاشو الحياة
مهدي كيشرب من كاسو دلفوطكا مخلط:شووف تيتيز اصاحبي
عصام كيطفي سيجار فطفاية وهو مبتاسم:من لبارح ليوم ستة دلبنات بلحساب مازال ما شبعتي
مهدي:هههه شغا دير خوك كيعشق الزين
عصام :ايوا الله يعطيك شي عقل
مهدي:اميييين
عصام ناض:ايوا نوض خاص نرجعو راه تابعنا شهر دلوطريما للمبارة لي جاية
مهدي ناض مساخيش:زيد زيد
طلع كل واحد للشمبر ديالو جمعو حوايجهم وهبطو ركبو فلوطو وديماراو يرجعو بحالهم
كان سايك مد طليفونو لمهدي:شعل هاد الطليفون نشوفو اش تما
شعل ليه طليفون:واه واه واه شحال دلميساجات ولابيلات .والواتساب الاوديواات وليتي مهييييم المسخوط
عصام:هههه دخل لواتس طلق شي اوديو نسمع
اول نمرة لقاها حداه دخل وطلق الاوديو ديال ليلى:عصام مالك ماكتجاااوبش فينك اولدي واش راك بيخير وليلى واش معاك
مافهم والو خدا ليه طليفون دخل عند عائشة للواتس يلاه سيفطات ليه ميساجات هاد صباح طلق اوديو طويل:عصااام حرام عليك فيينك.يوسف صيفطو ليه شي تصاور نت ودينيس داكشي خايب بزاف.ضربها وهربات من دار من لبارح ماعرفنا عليها والووو عنداك تكون دارت فراسها شي حاجة رجع عفااك وشوف شنو دير
بقة غير مصدوم كيتفكر لبارح فصباح فاش كانت كتعيط ليه وتصيفط ليه ميساج كيف بلوكاها..وداك الميساج لي صيفط ليها
دخل الطليفون لجيبو وهو غا كيفكر تكون دارت بصاح فراسها شي حاجة
مهدي وقف طموبيل خليني نسوك..وقفها حيت مامركزش فسوكان ..نزل وركب مهدي فبلاصتو وركب هو فجيهة لوخرا..وديماراو
مهدي:ماغايوقع ليها والو كون هاني
ماجاوبوش كان غير ساكت وميات فكرة كدوز فبالو
نمشيو لبلاصة خرا
دخلات عندها الممرضة فوق لباياص وغير ساكتة وكتشوف لبعيد
الممرضة:اختي خاص تقولينا شي حاجة على عائلتك باش يجيو يشوفوك وتعاودي لينا اش وقع
دينيس غير ساكتة وكتفكر فهادشي لي هي فيه سمح فيها وخلاها مع الفضيحة غا بوحدها..اخيب حاجة خوك وعائلتك يشوفو تصاورك مع شي حد فوضعية خايبة خصوصا وانهم كانو واخدين عليك نضرة زوينة..كون غير هو وقف معاها وماتخلاش عليها وساندها وقالهم غنديها وكنبغيها..كانت اتغامر معاه باي حاجة ولكن هو لاحها وخلاها تعوم فبحرها بوحدها ..طعنها فقلبها وشرافها تاهو قدام عائلتها شنو غيجي فبالهم وهوما كيشوفو تصاور داخلة وخارجة معاه لظار والبوسان وتعناق..نزلو دموعها خارين على خدها وجاوبات الخدمة:عفاك بعدي مني
الممرضة خرجات وهي كتنهد خاص دير شي حاجة البنت نفسيتها ماكاتبشرش بالخير مايمكنش تخليها هاكة اتصيفط صورتها للبوليس هوما يتكلفوو
