_______
لطفي يشوف فالتليفون مستغرب..
عاود كتبو لقاه نفس النيميرو لي بعثتلو منو حنان
هذا النومرو واش راهو يدير عند يونس وكيفاه داه ..وعلاه كاتب حنونتي!!! ياك شافني حاط عيني عليها ...وزعما قتلو ليه جيبلي نومروها ...هو داه ليه ..
لطفي زير على يدو حس الدم يغلي في راسو ..رجع عند يونس لي حاط راسو ويكتب يحظر فالدروس.
لحق عندو لطفي الغش عاميه
خبط يدو على التابلة بغش
يونس نخلع شاف فيه وجهو ميعجبش....حط ستيلو وشاف فيه مستغرب
يونس: شبيك لطفي ؟ واش كاين ؟
لطفي : واااش كاين ؟ تحب تعرف اش كاين ؟؟
جبدلو تليفون وورالو النومرو ..
يونس مخلوع.
لطفي: ر* النومرو هذا واش يدير عندك ؟
يونس مستغرب : ونتا علاه تسقسي؟؟ ومين تعرف هذا النومرو ؟؟
لطفي : داير روحك معلابالكش ...تطعني في ظهري ...خوك انا يالرب العالي ..زعما درت فيك ثيقة وقلت خويا الكبير ونتا خاربها مورايا يالزح....علابيها محبتش تقرا عندك تفوو اذا نتا راجل.
يونس قلق وقف شد خوه من يدو ويزير.
يونس: وشبي ر** نتا درك ؟؟ تخلط في ق*** الهدرة معايا ؟؟ فهم روحك ..
لطفي : اطلقني ...اطلقنييي
يونس: مانيش طالقك فهمني نتا علاه تحوس على النومرو هذا ؟؟ دور بالطفلة لي تحب ميهمنيش ...هذي خاطياتك ..
لطفي جبد يدو منو بقوة ..وقرب ليه عينو على عين خوه.
لطفي : راك غالط في حسابك .. هذيك يسموها تاع لطفي وعلى جالها نطيح الروح.
...
دخلت يماهم مفهمت والو لقاتهم يداوسو وعينيهم تخرج شر ...اول مرة تشوف النظرة هذيك بيناتهم.
من صغرهم رباتهم متفاهمين ويحبو بعضاهم ومكاش حاجة تفرقهم.
لي يشوفهم يحسبهم صحاب وهو ما خاوة..متفاهمين وديما يضحكو مع بعض ...اذا مرض واحد منهم يتقلقو كامل عليه واذا احتاج يعاونوه...كانو يد وحدة مكاش لي تفرقهم..
واليوم شوف فيهم يداوسو كي العديان ومفهمتش علمن .
زهيرة : اخزو بليس وانعلوه ..شبيكم واش كاين ؟
لطفي هبط راسو وجاي خارج.
زهيرة حبساتو : شبيك وليدي واش. كاين فهمني .؟؟
لطفي ساكت ويغلي من داخل ..
يونس كيفو: خليه يروح..حاسب الدنيا ڨاع ليه.
لطفي شاف فيه بغش ..وشاورلو بصبعو
لطفي : منعاودش هدرتي وليام بيناتنا ..
وخرج خبط الباب قريب نحاها ..
يماه مخلوعة وقلبها يضرب مفهمتش...شافت في يونس ..
زهيرة: واش كاين يونس !؟ ياك زعما نتا الكبير نتا العاقل..متبعش خوك.
يونس ترما فالكورسي ومسح على وجهو واستغفر .
يونس: مكان والو
زهيرة : كيفاه مكان والو ...مشفتكمش انا تتاكلو ؟؟
يونس: اوووه يما قتلك مكاين والو.
زهيرة شوف فيه متحيرة مهناهاش خاطرها ..ولادها جامي تضاربو ومدامو وصلو لهنا معناها حاجة كبيرة
زهيرة: ساعف خوك نتا عاقل وكبير وراك في بلاصة باباهم بعد المرحوم.
يونس تقلق عيط: انا ديما نساعف انا الكبير ...منعيش انا درك عيشو وحدكم..
ورفد روحو وخرج خبط الباب موراه.
يماهم متحسرة وقلبها وجعها عليهم ومفهمتش حتى واش صاير ...بقات تدعي في ربي يهديهم
لطفي خرج ورفد تليفون عاود عيطلها روجيتي وزاد عيط فالنومرو الاول طافي..
لطفي : بفففف ر** علاه متفردش عليا التليفون هذي...غدوة نشالله نصبح عندها فاليسي.
...
يونس كيفو خرج يدور برا يمشي ويخمم كيفاه لطفي يدور بميسا ..ياك النهار لول حط عينو على حنان واش وصلو لميسا
ولا بلاك كي رفضاتو حنان دار لصحبتها .بفففف
وش هذي الخالوطة ...وعلاه عليك يالطفي ...من الناس كامل ملقيت غير ميسا !!!..
وانا واش ندير لڨلبي لي بغاها ...
قعد يمشي ويخمم مفاقش حتى لقا روحو قدام دار ميسا...خاطر تبعها هو مرة وعرف دارهم..
حبس تنهد...الضو طافي معناها راهم راقدين..والسكات برا مكان حتى واحد.
قعد يخمم ويمسح على وجهو ..
يونس: لازم نلقا حل ونظمنها ليا قبل مايدور بيها لطفي...اذا داها لطفي انا مانيش راجل ..انا طحان اذا خليتهالو .
رفد تليفونو يشوف نومروها يخمم اذا يعيطلها ولا لا.
يونس: نعيط ...يلزم نفريها.
ميسا كانت تكونيكتي وكانت تقرا فالكرونيك حتى شافت نومرو متعرفوش عيطلها .
ميسا: بففف واش حكاية النوامر هذو...درك نعيطلو نبهدلو
يونس: الو
ميسا شبهت الصوت وحسباتو لطفي
رفدت ميسا : الو ..واش تحوس عندي ؟؟ ياك درتك روجيتي فالنومرو لوخر واش تحوس عندي وشكون نتا ومين جبت نومرو تاعي؟؟
يونس يسمع مستغرب مفهمش
يونس: شكون الفرخ هذا لي يقلق فيك؟؟؟
ميسا : نتا شكون غيرك..ماشي نتا لي عيطتلي قبيل؟؟؟
يونس: انا ؟؟؟ ميسا انا يونس ...وشكون البغل هذا لي يقلق فيك؟؟
ميسا حلت فمها مخلوعة حشمت..
ميسا : استاذ ...سمحلي واحد كان يقلق فيا مكنتش عليك.
يونس تنهد: مانيش استاذ...انا يونس ..يوووونس...هذيك استاذ خليها فاليسي
ميسا: كيما تحب ...مي علاه عيطتلي كاشما احتجت؟
يونس: ايه ..
ميسا: هيه ؟
يونس قلبو يضرب معرفش كيفاه يبداها ..كان حاب يمد لروحو وقت اكثر ..مي مدام دخل خوه فالوسط لازم يفهم روحو ويفريها .
يونس: راني....راني محتاجك نتي
.
ميسا قلبها يضرب ماهيش عارفة واش تقولو
ميسا : انا ؟؟ كيفاه محتاجني مفهمتش ؟؟
يونس : ميسا ...ياميسا ومدرتي فيا .
ميسا تسمع ..عضت شفتها تستنى فيه ينطق ويصرح بمشاعرو لي مخبيهم وهي حاسة بيهم.
يونس: واش رايك فيا ميسا ..؟؟ كيفاه شايفتني؟؟
ميسا: لباس بيك ...مفهمتش علاه تسقسي فيا .
يونس قلق : ر** ..افهمي بلي ...بلي نحبك...نحبك ميسا ومانيش حاب نخسرك.
ميسا حلت فمها مخلوعة ..متوقعتش يقولها ديراكت...حاسة روحها تحلم ولا في منام وماهيش حابة تفطن منو..
يونس: علابالي دخلتهالك ديراكت ..مي حابك تكوني ليا برك...مانيش حاب حتى واحد يبعدك عليا ...
سمحيلي مسقسيتكش اذا عندك واحد في حياتك مي مقدرتش نسكت كثر...ڨلبي ضرني وقلت لازم نخبرك بلي نتي غالية وبلاصتك في ڨلبي وحدها.
ميسا غلبوها دموعها من هدرتو حاساتو يهدر من ڨلبو وحاسة بالحب تاعو ..وهي حست بكلشي من قبل ..مي اليوم هو صارحها..
يونس سمعها تبكي هبل.
يونس: شبيك تبكي !؟ ماكيش حابة تكوني معايا
ميسا : نن ننن بلعكس...مي قاستني هدرتك...كنت حاسة بيك ومكنتش مصدقة ..كنت ديما نكذب روحي مي اليوم تاكدت ...
يونس: راكي قابلة تكوني معايا؟؟
ميسا : اممم.
يونس : طلي عليا
ميسا: ااه .وين ؟؟
يونس: طلي ر*** راني قدام داركم..
ميسا ناضت تجري طلت عليه هكاك بلا خمار نسات روحها كامل مالفرحة
لقاتو مقابلها ويتبسم..
بعثلها قلب بيدو وحطها على قلبو وقالها بالاشارة يضرب ليك برك..
ميسا تبسمت..اععع حاسة روحها تنوم.
رفدت تليفوها وقلبها يضرب
ميسا: حتى انا نحبك نموت عليك يا عمري نحبك.
تهدر وتبكي.
يونس شد في قلبو ويضحك...بعثلها بوسات وقالها ادخلي درك..
دخلت ميسا معنقة تليفونها وتضحك وتبكي مخلطة...
يونس كمل طريقو للدار ويضحك
الليلة هذيك يونس وميسا مرقدوش بايتين يحكو فالتليفون طيرو فيها كامل الحشمة وحكاو مع بعض بصراحة .
غدوة منذاك الصباح راحت ميسا تقرا تمشي وتتبسم تخمم كيفاه راح تقدر تقرا عندو وهي حبيبتو جاتها بيزار ...
تخمم مع روحها : خاه كيفاه راح نقدر نفهم المات وانا كلما نشوف البروف يروح عقلي بعيد ونتفكر واش صار البارح.
عيطت لحنان وراحو يقراو.
حنان شوف في ميسا فرحانة ..مفهمتش واش بيها ...كلما تخطط خطة تخرجلها عكس.
حنان : واش سر هذي التبسيمة ؟
ميسا: ياحنان كون نحكيلك متامنييش
حنان مستغربة : احكيلي وخليني نشوف اذا نامن ولا لالا
ميسا : البارح يونس جاني حتى للدار
حنان :قولي والله ...خااه مهبول...واش جا يدير؟؟
ميسا : امممممم ديكلارالي بلي يحبني وااااع مانيش مامنة.
حنان تبلع في ريقها مكانتش متوقعة يصرا هذا الشي كامل ....يعني صح يحبها وزاد ديكلارالها ..وانا وين راني ...محاال. نخليها تكمل بيناتهم محاال.
ميسا : وين غستي ؟
حنان : والو..كلشي مبروك...ربي يهنيكم ويخليكم لبعضاكم...والله فرحتلك
ميسا: عيشك....بصح وشبيه وجهك صفر ؟؟
حنان : مرقدتش مليح حاسة روحي عيانة راح نرجع للدار
ميسا: خاااه ...تحبي نولي معاك نوصلك !؟
حنان : تراطي الساعة لولى ؟؟
ميسا: شفيها عادي ...المهم راحتك....راكي تباني عيانة وماش مليحة
حنان : اوك ...عيشك .
رجعت حنان وميسا للدار باش توصل ميسا حنان لدارهم ..فالطريق تلاقاو بلطفي جاي جيهتهم
حنان شافتو بقات تبلع في..ريقها عرفاتو جاي ليها .. خاطر اعطاتو نومرو ماشي تاعها
ميسا: هوليك صاحب يونس ااسامط ..نشالله يكون يونس هدر معاه وخطانا
حنان شافتو قعدت زعما عيانة ومريضة.
لحق لطفي شاف فيها وجها صفر ..
لطفي : شبيك حنان ؟؟
وشاف في ميسا : شبيها ؟؟
ميسا تعوج في فمها : روح كمل طريقك متدخلش في حاجة خاطياتك
لطفي : سكتينا نتي ..والله ...كلما نهدر معاها تنطقي ...حتى انا مهدرتش معاك...تقدري تسكتي
ميسا شدت حنان ونوضتها
ميسا: امشي نروحو.
حنان جات نايضة شافت يونس جاي...
رجعت قعدت وزعما تلوح بيديها على وجها.
لطفي قرب ليها خاطر هي صحبتو مي ميسا ماهيش عارفة...
لطفي: حنان نديك للطبيب ؟!
ميسا : واش مالطبيب تهدر عليه روح خلي الطفلة. ..وش دخلك فيها ؟؟
لطفي قلق شاف ميسا بتحدي وقرب ليها : اخر مرة نهدر ونقولك مدخليش روحك وتبلعي ر* فمك فهمتي...
ميسا :ياخي بلا طاح علينا صباح ربي ...عمري مشفت لصقة كيفك.
لطفي عيط: سكتييييينا اوووو.
يونس: واش بي ق*** نتا؟؟ علاه تعيط عليها ؟؟ شوف فيا ..
وقرب ليه عينيهم مع بعض وفي زوج دمهم سخون ويغلي ...والناس كامل تتفرج
************************************
هاااااي ڨييرلللز وااش رايكم فالبارت نشاالله يكوون عجبكم💚
😁😁...المهم راها شعلت بين الخااوة..قولولي رايكم زعما واش يصرا🌚
طشاااااو
أنت تقرأ
القلب❤(باللهجة الجزائرية)
Romanceإذا ما بدت من أخيك لك زلة فكن أنت محتالاً لزلته عذراً، أحب الفتى ينفي الفواحش سمعه كأن به عن كل فاحشة وقراً، سليم دواعي الصدر لا باسط أذى ولا مانع خيراً، ولا قائل هجراً..
