لحق يونس ولطفي للسبيطار دخلو يماهم ...
يونس : يا ربي وكون معاها...
لطفي قاعد في بلاصتو يغلي مقدرش يتحمل الظغط..عامر خوه حرقوه حتى هجر ماهو عارفو حي ولا ميت ...وزادو حرقو حتى يماه ودرك راهي فالسبيطار ..
وقف لطفي وخرج ديراكت يغلي من داخل ..يونس شافو عيطلوو
يونس: لطفي وين بيها ؟؟
لطفي ساكت وراح خرج مالسبيطار..
يونس باقي ثم مقلق على يماه حتى قالولو يماك طلعتها لاتونسيون ..مي راهي تحت المراقبة ..ورانا معاها
لطفي حكم طاكسي ورجع للدار خاطر خلا الطونوبيل عند يونس
لحق يغلي استغفر ...راح رفد حديدة في ساحتهم وخرج
لطفي : سمحيلي يما وسمحلي يونس بصح انا منسكتش على حقي ولي دنا لخويا دنا ليا
رفد الحديدة وراح يعيط كريم..
لطفي يخبط فالباب ويعيط
لطفي : كرييم اخرج يالن** ...اخرج اليوم ن** *** ..
كريم خرج معرفش شكون...
الجيران سمعو اىعياط والخبيط.
لطفي كان مخبي الحديد موراه
كريم : واشبيك تسب وطيح ؟؟ متحشمش نتا وقيل ؟؟
لطفي : كيفك نشبهلك
كريم : واش تحوس ؟؟
لطفي : جيت نعاود نربيك
وجبد الحديد ويخبطو على الراس..
كريم مخلوع شد في راسو وطاح فلرض وراسو غير دم
جراو ليهم الجيران نحاولو الحديد خاطر كان راح يزيد يضربو
لطفي: هذييي في خاطر عامر ...تحڨر الرجال نتا ...تحڨر الزوالة يالجيعان...عامر راح ...راح وميرجعش بصح انا نجيبلو حقو يالرخيس تفووو الله
مدمت انا عايش حق خويا دين عليا وفي رقبتي ..
كريم مدوخ وراسو غير دم...رفدوه الجيران داوه للسبيطار ..
ولطفي دخل لدارهم غسل وجهو والجيران يسقسو فيه واش صار
قاللهم الطفلة ختو جيناه مالباب ردنا ومدها لمول الشكارة ...وش ذنبو عامر لي بغاها ...واش خصو عامر
درك انا مهبول مق*** مريض في مخي معنديش عقلي تالف راي ..بصح عامر خاطيه يالزح كاش نهار شفتو منو حاجة عيانة ؟؟ انطقو
قالولو جامي الحق تاع ربي ...ناس ملاح ووليد فامليا.
لطفي يغلي : ودرك طفرت راح حرڨ وراهو بيد مولاه ...درك نديرولو جنازة ولا نبقاو هاك معلقين ؟؟
فهموني انا مانيش فاهم..
ويضرب بصبعو على راسو.
لطفي ؛ عامر راح ويما فالسبيطار مغمية ڨاع بسبتو الرخيس هذا ..
الجار : ربي يهديكم ياوليدي هذا واش نقولك..
شوية هاك رجع يونس يماه حالتها مستقرة ..قالولو خليها عندنا..
غير لحق لحقو جوندارم موراه..
يونس حبس وهوما يخبطو في باباهم..يونس مفهم والو .
يونس: واش كاين حظرات ؟؟
ح: هنا يسكن لطفي ****؟؟؟
يونس: ايه علاه واش كاين ؟؟
ح: ادخل عيطلو ولا ندخلو ليه
دخل يونس عند لطفي لقاه يحكي مع دينا تليفون.
يونس: لطفي الجوندارم برا يحوسو عليك واش درت ؟؟
لطفي تبسم: مرحبا بيهم...
ووقف لبس فاست تاعو
يونس: لطفي فهمني واش درت ؟؟
لطفي : جبت حق خويا ...جبت حق عمورة
وخرج...شدوه الجودارم دارولو مينوت..
يونس حكاولو الجيران ثم بقا مخلوع
يونس : لطفي علاه عليك ياربي...باش مخدوم مخك نتا ...علاه عامر في جيه ونتا في جيه
لطفي : يونس خوك راجل وجبت حق خويا...اتهلا في يما وقولها لطفي راجل وميسكتش على حق خوه..هكا ربيتينا ..
راح لطفي داوه وبقا يونس وحدو فاىدار هذيك...بعدما كانت زاهية..بعدما كانو متلايمين فرحانين لي يشوفهم يتشهاهم ...اليوم تشتو من كثرة المشاكل والهموم راحت الضحكة وراح كلشي
راح يونس مور خوه باش يشوف واش يديرولو قالولو نحولوه للمحكمة تحكم عليه ..حتى نشوفو كريم اذا مات ولا مزال عايش...
رجع يونس للدار مقدرش تعب وانقهر بزااف على خاوتو لي تفرقو واحد راح للموت برجليه ولوخر راح للحبس برجليه ويماهم في حالة فالسبيطار ..
قعد فوق دارهم البرودة دخلت الشتا مي هو ماهوش حاس بيها محروق على خاوتو وعلى دارهم كيفاه كانت فيها الفرحة ودرك غاب كلش
عيطتلو ميسا
ميسا: يونس ..واش راهي يماك؟؟؟
يونس تنهد: تعبت ميسا تعبت وبزااف
ميسا قلبها وجعها : وشبيك يونس ؟
يونس: عامر راح هجر ويما فالسبيطار ولطفي ضرب كريم ودرك راهو فالحبس ..مانيش عارف درك كون كاشما يصيرلو لكريم لطفي يباصي..
ميسا غاضتها حالتهم تبكي : يونس ادعليهم ربي يكون مع كل واحد...هذا قضاء الله وقدره وهذي حال الدنيا ..ربي حنين كريم ونشالله تتحل المشاكل والهموم ..
يونس: معرفتش كيفاه نلمها ...مين لميتها متلمت...تعبت بزاف ياريت جي لموت تديني ونريح
ميسا: علاه ياروحي تدعي على روحك هاك..حاب تهبلني معاك..
روح صلي وادعي ربي يفرجها عليكم...متدري هذا ابتلاء من عند ربي ونشالله جي فالصواب...ادعيه وانا ندعي معاك منا ...مكانش كيما قيام الليل ..صلي وادعيه وابكيلو غير هو لي يقدر يعاونكم..
يونس تنهد : نشااله...درك نهبط
ميسا: وقت متحتاجني عيطلي راني هنا ..هكا
يونس: نشالله..
هبط يونس باش يتوضا ويصلي ركعات لمولاه يدعيه يبكيلو ويشتكيلو هو الحنان المنان السميع العليم لي يقدر يعاونو مكانش غيرو
صونا تليفونو تاع لطفي...يونس تنهد...شاف فيه لقها دينا تعيط
يونس: الو دينا انا يونس
دينا تبكي : وينو لطفي سمعتك قتلو جوندارم يحوسو عليه ؟؟؟
يونس تنهد: لطفي راهو فالحبس
دينا مخلوعة: حبس ؟؟؟؟
يونس: ايه ضرب جارنا على جال عامر ...ادعيلو ربي يفك اسرو..
دينا كوبات وطرطقت بالبكا ..وتدعي في ربي يكون معاه
يونس توضا وحط سجادتو يصلي ويدعي في ربي يحل مشكلتهم ويفرج عليهم...بايت يصلي ويدعي في ربي على وعسى تنفرج عليهم من اوسع ابوابها .
غدوة منذاك راح يشوف يماه ميسا لقاها سبقاتو..
أنت تقرأ
القلب❤(باللهجة الجزائرية)
Romanceإذا ما بدت من أخيك لك زلة فكن أنت محتالاً لزلته عذراً، أحب الفتى ينفي الفواحش سمعه كأن به عن كل فاحشة وقراً، سليم دواعي الصدر لا باسط أذى ولا مانع خيراً، ولا قائل هجراً..
