القلب❤(باللهجة الجزائرية)

P.A.R.T 25

لحق عامر عند دار نورهان يخبط في باباهم...مقلق ودمو يغلي ماهوش فايق بواش راهو يدير..
لحقوه خاوتو للزوج.
يونس : عامر واش راك دير ؟؟ امشي منا ..الجيران يسمعونا.
عامر : واش دخلني فالجيران ..خطيني يونس ..خليني نقتلو..
خرج كريم : واش كاين هنا ؟؟؟
يونس : مكاين والو ...امشي عامر
عامر: خليني نهدر معاه ...اطلقني يونس نهدر معاه برك.
يونس طلقو ..
عامر : حبيت نفهم واش كاين في مخك؟؟! ياك جيتك مالباب ..علاه معجبناكش...زواولة حنا ...تحب صحاب الحبات نتا صح ؟
كريم : يونس شد خوك ...وفهمو بلي هذي حاجة ماشي بسيف وكل واحد ومكتوبو
يونس جبد عامر : امشي عامر .
عامر : اصبر ....اصبر طلقني ...اطلقني يونس خلي نتفاهم معاه
عامر : صحا عندك الحق ماشي بسيف ...ونتا علاه تزوج فيها بسيف ؟؟!
كريم : واش دخلك..
يونس : كريم خلينا نهدرو الداخل تبهديلة قدام الجيران
دخلو للساحة
عامر : فهمني ..علاه تزوج فيها بلا رضايتها ؟؟؟
كريم : راهي راضية ...وزيد نتا معندك مادخلك فهمت بيني وبينها...ديجا راني ساكتلكم...احكمو قدركم..
عامر : لالا ماهيش قابلة نتا سيفت عليها ..
كريم : لا حول ولا قوة الا بالله...يلزم نعيط للجوندارم ...نتوما متفهموش بالملاحة قلت جيراني ..وليتو تدخلو في حوايج خاطيينكم..
يونس : اصبر كريم رانا خارجين..

لطفي : امشي عامر ...افهم قالك مكانش مكتوب مكانش..
عامر : مانيش متحرك منا وعيط للي تحب..حتى نعرف ذا صح قابلة..
لطفي : عامر واش دخلك في ر*** اخرج قتلك.
كريم: عامر روح منا هاني نباصيك..قتلك روح خير لك..
يونس ولطفي جبدوه خرجوه منثم والجيران تتفرج مفهمو والو...
لطفي شاد خوه دخلو لساحتهم وغلق الباب ..
لطفي : افهم يار*** قالك ماهيش ليك...باه تفهم نتا ؟؟
يونس : درت تبهدايل برك...وهاك زاد شحن عليك وقادر يرشيك فالحبس ...اقتنع بلي معندكش واش دير ارضا بالمكتوب وادعي ربي يهنيها ..
عامر ترما فالكورسي يتنهد..
حاس قلبو راح يخرج..
لطفي : عامر متزيدش دور بق*** ...تلقا الف وحدة تتمناك ..
عامر حاس روحو فشل خلاص نغلقو كامل البيبان في وجهو ووجه نورهان ...والظاهر مكانش حل غير انو يرضا بالواقع ...
عامر : بصح انا بغيتها هي .
لطفي : ياعامر ياخويا محنة تنسيك في محنة خوذ رايي مع الوقت تنسا وجيب غيرها ...هذي الدنيا مكاتيب ...ولي ماهو ليك يعيك...هاو خوك قدامك كيفك ودرك راهو خاطب ولباس بيه...الدنيا عمرها ماتحبس عند انسان...خلاص خوها محبش ربي يهنيها ..نشالله تلقاه فحل ويهنيها ..ادعيلها بالسترة ولهنا وتتهنا من خوها ...هذا مكتوبكم ياعامر خويا ...وهذا قضاء الله وقدره..
عامر تنهد. مقدر يقول والو عارف هدرة خاوتو هي الصح..
رفد روحو ترما في فراشو...بقا يشوف فالسما ...يتفكر فيها ..
عامر : حابيني ننساك...ننسا روحي ومننساك..راح تبقاي لطفلة لي حبيتها وربيتها على يدي...وكيما قال لطفي ..نشالله يكون ولد حلال ويهنيك خيرمني ..لله غالب انا زوالي لا خدمة لا سكنة لا طونوبيل ...منقدرش نهنيك....ربي يهنيك يالعزيزة ...ربي يعطيك على حساب قلبك..نشالله تقدري تنسايني ...وتعيشي حياتك...سمحيلي درت كلشي باش نديك مي الله غالب مقدرتش...متزيديش تبكي دمعتك غالية ...راح تتزوجي وتتهناي كوني فحلة برك معاه...ربي يهنيك يااغلى حاجة في حياتي .
نزلو دموعو ...الراجل مايبكي غير كي يتقهر ويحس روحو خسر كلش...مسح دمعتو وغمض عينيه باش يرقد ومقدرش يرقد. الله غالب كلشي بالمكتوب
الليلة هذيك عامر مرقدش مقدرش يرقد..كلما يجي يرقد جيه نورهان بين عينيه ..واش ينسا واش يخلي ..ماهوش نهار ولا يومين ولا شهر ولا شهرين ..ثلاث سنين وهو معاها ...وقف معاها راجل ونواها حلالو وكان عندو امل يكمل قرايتو ويخطبها ويحطها على اسمو...محبش يتسرع وهي كانت صغيرة ...طمع يخدم بالماستار تاعو ويروح يخطبها وهو واجد ...مي المكتوب سبق وخوها راح يزوجها باش ينحي مسؤوليتها من راسو ...وطفرت درك...عامر حاول بلي يقدر مي مقدرش المكتوب غلب ...
عامر بايت مقهور ..قلبو وجعو ...
جبد البيسي ويشوف في تصاورها ...ويتفكر في ياماتهم وذكرياتهم...متحسر ...ساعات يضحك وساعات يتبسم...وساعات يتحرق وتنزل دمعة سخونة على خدو يمسحها ويتنهد..
تكا على كرسيه مقهور قلبو مزير عمرو متوقع يوصل
للحالة هذي..
عامر : واش ينسيني فيك...يا ربي عاوني وخليني ننساها يا ربي..
نورهان فالوقت لي دخل عامر وخاوتو لساحتهم ...كانت شوف فيه مالتاقة وتبكي محروقة عليه...عارفة بلي خوها محال راح يقبل بعامر..
خوها مدها لواحد طالع فالبلدية طامع في سكنة ومعريفة ...ومراحش يقبل بواحد زوالي كيما عامر ..وميقنعوش اصلا
دخلت لبيتها معنقة روحها بيديها وتبكي بالشهقة...توحشت يماها لي خلاتها في نص لطريق وزاد حتى عامر لي كانت شادة غير فيه وشوف فيه كلش في حياتها ...فرقوها عليه .وفرقوه عليها...