القلب❤(باللهجة الجزائرية)

P.A.R.T 29

عامر دخل للدار مقهور استقبلاتو يماه بفرحة حاسبة وليدها لقا خدمة وفرجت عليه....مي وجهو كان ميعجبش ...
زهيرة : خير وليدي ؟؟ وشبيه وجهك مقلب ؟؟
عامر ساكت دخل بيتو تنهد..
زهيرة تسقسي فيه وهو ساكت...
راحت وخلاتو..
عامر عشية كامل وهو متكي في فراشو وساكت ..
رجعو خاوتو لعشية لقاو يماهم مقلقة.
يونس: شبيك يما ؟؟
زهيرة: شوفو خوكم ملي جا مالخدمة وهو غايس وساكت تقلقت عليه ..يا ربي مفهمتش واش بيه عييت نسقسي فيه والو.
راحو عندو لطفي ويونس لقاوه غايس..
يونس : واش عامر ؟؟
عامر شاف فيهم ورجع غايس
يونس: شبيك مقلق ؟؟؟ والخدمة كيفاه.
عامر تنهد من قلبو : مكانش ...بلاك تزهرلي في حاجة خلاف
يونس: معليش هذي هي الخدمة كل نهار وكيفاه..دير ربي في قلبك وبلعقل تلقا خدمة نشالله
عامر : نشالله..
ودار جيهة الحيط ورقد ..
فالمنام يشوف في نورهان ...ديما ينومها وينومها بعيدة عليه...ينوض مخلوع ويستغفر...يشرب الما ويقرا قران ويرجع يرقد..
خرج لطفي ويونس من عندو ..
لطفي : وشبيه؟؟
يونس: مقبلوهش ..بلاك قصة معارف هاك عارف العقلية..
لطفي : ايه يدزو معاهم الرزاق ربي ...خيرها في غيرها..
يونس : نشالله..

غدوة منذاك عامر صبح راقد مناضش..
ولعشية كامل خرج..
يونس تفاهم مع الماصو على الدالة وتفاهمو على كلشي ...
رجع للدار باش يوجد الدراهم الصبح يجيب السلعة...
دخل لبيتو فتح الخزانة جبدهم حسبهم...بانولو ناقصين..
بقا يحسب ويعاود..ناقصين بزااف...
تقلق
خرج عند يماه
يونس : يما الدراهم لقيتهم ناقصين
زهيرة: اخااه ...ياوخدتي شكون دالك منهم ..
يونس: اصبري نسقسي لطفي ..
يونس: الو لطفي .
لطفي : وي يونس
يونس: الدراهم نتا ديت منهم ؟؟
لطفي : واش مالدراهم!؟
يونس : الدراهم لي كانو في خزانتي ؟!؟
لطفي : مديتش ..علاه لقيتهم ناقصين ؟؟
يونس: ايه وبزااف ..
لطفي : سقسي عامر.
يونس: عامر جامي دنالي لدراهمي وزيد بزاف واش يدير بيهم..مي نسقسيه
عيط يونس لعامر سمعو يصوني..
راح تبع الصوت لقا تليفونو ثم استغرب..
عامر جامي ينسا تليفونو ..اصلا ديما يمشي بيه وبالكيتمان..
استغرب..
راح لبيتو يقلب كاشما يلقا فتح خزانتو كابتو مكاش ..
يونس قلبو يضرب محبش يبين قدام يماه..
خرج يجري وعيط للطفي ..
لطفي : ر*** وين راح خوك ؟؟
يونس ولطفي قلبو الدنيا عليه والو ...حتى طاح الليل...
يونس : وين راح خوك ..تحيرت عليه..
لطفي : ياربي ويكون بخير..

عيطلهم واحد صاحبو...قاللهم عامر اعطاني امانة وقالي فاليل مدهالهم
راحو ليه يجرو...قلبوها لقاوها ورقة ومكتوبة بخط يدو..
يونس يقرا ويبكي ولطفي مخلوع ويقولو اجري الحق خوك
.........
راح يونس مع خوه للبحر يحوسو ويسقسو حتى لحقو للبلاصة لي خرجو منها الحراڨة...
لقاو ناس راجعة...
الدنيا ليل وظلمة ...يونس ولطفي يحوسو على خوهم من بلاص لبلاص ريحتو مكانش..
ولا يسقسو فالناس لي ثم..
يونس : وينهم الحراڨة وينهم؟؟
قالولو قلعو عندهم بزااف...
يونس شد في راسو كيفاه هذا قلعو..
شاف في لطفي ولطفي ملقا مايهدر..
لقاو واحد يعرفو لعامر ثم راحو ليه.
يونس : قولي عامر راح معاهم ؟؟! شفتو ؟
...ايه شفتو راح معاهم..هو وفلان وفلان ...
يونس : متاكد ؟؟ اااه ياربي ...
لطفي شد الراجل هذاك مالصدر من قوة الغش.
لطفي ؛ وعلاه خليتو يروووح علاااه ؟؟؟ علاااه معيطتنلناش ؟
يونس : اطلق الراجل معندو مدخلو..
هبط يونس للبحر حزين ...يشوف في نسمتو الباردة وهواه البارد شهر الخريف...نزلو دموعو ..
شاف على طول عينو مكان والوو..
لطفي : راح خوك يونس راح عمورة..
لطفي يهدر ويبكي على خوه لي خبا عليهم وخلا كيتو في قلبو كان يتظاهر بلي راهو مليح وراهو صابر ..بصح الشي لي كان مخبيه في قلبو يعلم بيه غير ربي...
قعد يونس يشوف فالبحر هو وخوه موجة رايحة وموجة جاية مش مصدقين بلي عمورة راح وحرڨ وربي عالم اذا يعيش ولا يموت ...
يونس رفد يدو للسما يدعي في ربي
يونس: يا ربي نتا لي عالم بيه وبحالتوو...ياربي احميه راهو في حمايتك..
لطفي جبد الورقة وعاود قراها..
"يونس لطفي علابللي راح جو ورايا تحوسو عليا ..نعرفكم وحافظكم ..يااغلى ماعندي فالدنيا ...
يونس نتا خويا الكبير والعاقل فينا ...نتا لي تفهمني وبزاف...تعلمت عليك بزاف حاجات وتربيت على يدك ..عوضتني المرحوم بابا لي منشفالوش. .كنت نشوفك قدوتي ونشوف فيك بابا ....ربي يهنيك بلاك تحبس عرسك بسبتي اتزوج وبلاك تسمي ولدك عليا ..مانيش حاب يكون كيفي. ..يونس ياغلى اخ..
لطفي نتا هو خويا المهبول لي يموت على الزواج...اتعاون نتا وخوك وعيشو حياتكم...حبس متبقاش تبع في لبنات تفيقلك دينا تقتلك...هاني نقولك متزعفهاش اذا غابت راح تندم عليها ..
ميمتي لعزيزة قولولها متبكيش عليا ...قولولها ولدك هجر وراح...يايرجع يايروح عند مولاه...اذا مرجعتش ادعولي بالرحمة وربي يغفرلي علابالي غلطت مي ملقيتش حل..
خوكم مقهور ...عامر الصغير قهرتو كبيرة وبزاف..داولي نورهان نوراة حياتي دمروني مقدرتش نشوفها قدامي ديما ونسمع صوتها وهي مع راجل غيري ..تحرقت ياخاوتي تحرقت مقدرتش
يونس نوصيك عليها ...نورهان كاشما يصيرلها نتا خوها اوقف معاها كريم متتكلش عليه...راهي في حمايتك...هي تعزك بزااف .
اتهلاو في روحكم وفي ميمتي ...قوللها يما المكتوب داني ماشي بلعاني عييت منصبر مڨواني ضري دخلاني
والله مقديت وزادو ايام مننساك 💔 جامي ..يما غير معنديش زهر..
وعمري مراح ننساكم اذا بقيت حي مي نتوما انساوني
انساو عامر ...علابالي تنساو مدام قلتولي انساها لنورهان معناها قادرين تنساو...انا مننساش ...
عامر مينساش....عامر راح انساوه...ابقاو على خير ...يانتلاقو في الدنيا ياغدوة عند ربي ...
نحبكم 💔"

لطفي يقرا ويبكي ويونس كيفو
لطفي : راااح عمورة الغالي يا ربي اغفرلو واحميه يااربي
لطفي ويونس قاعدين طرف البحر محطمين ...مافهموش كيفاش وعلاش انقلبت بيهم الدنيا هاك ..كيفاه كانو عايلة وحدة حاجة متفرقهم واليوم عامر راح وهجر ماعارفينو يبقا حي ولا يموت..
يونس مسح عينيه وشاف في لطفي لي غايس وساكت
يونس : لطفي امشي نرجعو للدار ...يما تتقلق علينا ...هيا نرجعو..
لطفي مسح عينيه وناض نفض حوايجو وراح مع خوه راجعين للدار طريق كامل غايسين..
باقية الذكريات تاع خوهم الصغير في بالهم تروح وجي ..
يونس حاس بتانيب ظمير كي محسش بخوه وبوجيعتو ..عامر كان يتبسم وهو مخبي في قلبو ومحبش يبين ويحيرهم...ندم وحس بروحو مقصر مع خوه ..استغفر وباقي عقلو يخمم كيفاه راح يوصللها الخبر ليماه وكيفاه راح يفهمها وكيفاه راح تتقبل بلي وليدها هجر في فلوكة وراهو بين يديين مولاه..
لطفي يسوق وغايس حتى هو ندم وحاس بتانيب الضمير...كان لازم يعاون خوه هكا ترباو...كان لازم يعطوه طريحة لكريم باش يتراجع ويمدلو نورهان ...مكانش لازم يحملو عامر فوق طاقتو..سيرتو هي جارتهم يعني راح يبقا يشوفها مع غيرو ويتحرق ..
لحقو للدار حتى واحد فيهم مقدر ينزل وكيفاه راح يقابلو يماهم....
باقيين ساكتين قلوبهم محروقة...يماهم سمعت الطونوبيل كي حبست هي اصلا كانت مخروقة عينيها على الباب تستنى فيهم يرجعو ويلقاو عامر ويكون بخير...بصح قلب الام يحس واحساسها مخيبهاش ..كانت حاسة بغصة في قلبها بلي عامر راح وميوليش..
خرجت طلت عليهم مالباب شافوها نزلو ودخلو ساكتين..
زهيرة طل على الطونوبيل شوف عامر وينو وتستنى فيه يدخل مي عامر مكاش.
شافت فيهم وقلبها يضرب قلبها خبرها .
زهيرة: وينو خوكم ؟؟ وين خليتوه ؟!
يونس دموعو نزلو مسحهم واستغفر .
زهيرة : ياوخدتي على وليدي خوك وينو يونس !؟
انطق. ..
لطفي خوك وينو؟!! قلبي مقايليش خير
لطفي : يما عامر..
زهيرة : شبيه؟؟؟
لطفي تنهد : عامر حرڨ...هجر في فلوكة وراح ...وخلانا برية ودعنا فيها .
زهيرة : تتمسخر بيا لطفي متخلعنيش اولدي راك موالف بالجاست هذو نعرف طبايعك..
لطفي مقنوط : والله ماني .....استغفر الله.
زهيرة: يونس وينو خوك ؟؟
يونس يشهق بالبكا : راح هجر ...راهو بيد ربي ادعيلو يالعزيزة دعوتك مستجابة ادعيلو يوصل وربي يكون معاه...
استغفر،الله
زهيرة قعدت غمضت عينيها بقوة ودموعها ويدان.
زهيرة: ربي يحميك ويكون معاك ياوليدي ...الكبدة محروقة عليك يالعزيز يابني ...علاه مقلتش ليماك وفرغت قلبك ...علاه هجرت وحرقت كبدتها ...اااه ياربي احميه واغفرلو راهو عاد صغير وميعرفش...ياربي اغفرلو وسمحلو ..يا ربي معرفتش ندعيك منيش عارفاتو حي ولا ميت راهو بين يديك ياربي ردولي سالم نفرح ليه ذاك المعزوزي حرقني ذاك العاقل فيهم ذاك لحنين راح وحرق قلب ميمتو ...يا ربي سامحو عاد صغير وميعرفش
زهيرة تبكي حتى داخت تغمت ...ولادها جراو ليها داوها للسبيطار...