لطفي شاف في خوه بغش هوما ملي دوسو متهادروش.
لطفي : واش دخلك نتا ثان ؟؟ روح كمل طريقك.
يونس وجه صبعو لطفي يحذر فيه
يونس: لطفي هاني ساكتلك احكم قدرك.
حنان شافتهم هكاك والناس تتفرج جبدت روحها وجبدت ميسا معاها .
ميسا: خاااه تخلطت بيانتهم حابة نشوف واش يصير
حنان : امشي نروحو للدار درك تولي الهدرة فوقنا وزيد هوما رجال يدبرو ريسانهم ..وانا مانيش قادرة ...حابة نروح نريح.
ميسا راحت مع حنان توصلها وعقلها قعد عند يونس ولطفي ..معرفتش واش صار معاهم.
ميسا: كامل بسبتو لصاحب يونس هذاك..بففف لسقة ..اليوم نفهم يونس يوقفو عند حدو...نتي مريضة ومخطاكش ..بففف يعيي يالطيف..
وصلت حنان لدارهم ورجعت لليسي..
...
كي لحقت لقات الحالة فارغة ...قلبها يضرب خايفة مفهمتش واش صار....حتى صونا تليفونها لقاتو يونس.
يونس مقلق ::ويين رااااكي ؟؟
ميسا خافتو : راني ...راني جاية
يونس: وييين جاية ويين ؟؟ راهي قريب ثمنية ونص !!
ميسا: وصلت حنان لدارهم كانت مريضة ..مكاش كيفاه تخليها وحدها
يونس: بففف. كي تلحقي بيبيلي نهبط نطلعك.
ميسا : اوك
شوية هاك وصلت لليسي بيباتلو ...خرج ليها دخلها ..
قال للعساس خليها تدخل
دخلت ميسا مهبطة راسها خايفة من يونس كاشما يقوللها .
لحقو للدرج حبس وشاف فيها .
يونس: لطفي موالف يتبلاك ؟
ميسا : نن ...جامي ..يتبلا حنان هبلها مسكينة ...الصباح انا نقلو مريضة وهو محبش يخطيها
يونس: حنان ؟؟! يعني نتي جامي تبلاك ؟؟
ميسا : جامي.
يونس: واش جاب نومروك لعندو ؟؟؟
ميسا: انا ؟؟! نومرويا عند و ؟؟؟
يونس: ايه وهو لي عيطلك البارح وحطيتيه روجيتي ...هاتي نتاكد..
مدتلو تليفونها شافو لقاه نفس النومرو تاع خوه.
يونس: مفهمتش هو يتبع حنان ويعيطلك ليك..بففف ما طلق والو...شوفي
جبدلها بيس
يونس:شدي هذي ركبيها عندك ونحي النومرو القديم هذاك.
ميسا : اوك..
يونس: ميسا ...اذا دار جيهتك خبريني ..
ميسا: قتلك يتبع حنان بزااف ...احكي معاه يخطيها
يونس: وبلاك راهي صحبتو !؟؟
ميسا: نن مشكيتش ...كون هكاك تقولي ...بلاك دا نومروها بسيف ...
يونس تنهد : اطلعي خلينا منهم ...والله ..طلعلي الزبل صبح ربي.
طلعت ميسا مع يونس دخلو للكلاسة لي كانو كامل يتغامزو عليهم ..وحتى الليسي كامل قالو يونس دافع على ميسا وباين كاين حاجة بيناتهم..وانتشرت الهدرة هذي فاليسي كامل و اكيد راح توصل لدارهم لميسا
جاز النهار هذاك ...يونس ولطفي ميتهادروش رجعو كيما العديان.
...
نرجعو لعامر ونورهان.
نورهان : عمورة علابالك الخميس هذي عرس خويا .
عامر : ايه علابالي...
نورهان : راني خارجة مع يما غدوة نشالله نشري روبة .
عامر: اممم دوماج كون وحدك نخطفك.
نورهان : ههه امم علابالي
عامر: وين تروحو تشرو ؟؟
نورهان : مالفيترينات لي قدام الباطيمات.
عامر: روحي عند فيترينة تاع موح الكونغو ..هذاك صاحبي نوصيه بسعادكم فاسومة .
نورهان : اممم اوك نشالله.
...
جازت سمانة يونس وميسا عايشين اروع ايام حياتهم ...ولطفي ويونس متعاديين ...وحنان تتهرب للطفي بحجة دارهم ميحبوش وتخافهم ..
لحق عرس خو نورهان ...عامر هبلها على اللبسة ومقدرش يحكي معاها السمانة هذيك خاطر يباتو عندهم فاميلتهم وهي مخبرت حتى واحد بعلاقتهم ..خاطر دارهم مزيرين وخاوتها مزيرين
عامر توحشها بزااف هبل عليها ...يحكي معاها غير باافايسبوك..
عامر : اليوم الكورتاج..ويخلاص العرس ونرجع نسمع صوتك
نورهان : اممم هههههه نشالله
عامر : توحشتك يالزح ..والفتك
نورهان : مام انا والله
لحقت لعشية نورهان مع الشغل تاع العرس ...
فليل كامل خلاص العرس. ...خوها متصدر برا .شعلو الديسكو عند الرجال ..مور مراحو كامل لافامي بقاو لصحاب برك
لبنات يطلو من لاتيراس وليجان تشعل ليفيميجان ..
دارو غنية ميكس ..وناض عامر يشطح عارف نورهان راهي طل عليه
نورهان مخلوعة فيه اول مرة شوفو يشطح فتحت تليفونها تصور فيه ..فيديو ..
..
عامر يشطح مقلبها ونورهان تشطح كيفو وتصور فيه وفي روحها وتضحك.
...
كي خلاصت الغنية صفرولو لي كانو ثم خاطر يشطح مليح .
راح للميكروفون تاع ديسكو ...وقاللهم .
عامر : هذي في خاطر مهبولتي كاوكاويستا
ناضو كامل يصفرولو ويشطحو معاه ...جازت ليلة هبال ...نورهان قلبها طاير بالفرحة على المهبول تاعها ..عامر عبرلها على الوحش لي مخبيه في قلبو بالشطيح خاطر عارفها شوف فيه .
جاز عرس خوها لنورهان ..
غدوة منذاك يحكو تليفون
نورهان : حبيت نسقسيك ...يونس ولطفي خوك كانو متفاهمين واش صرالهم ؟
عامر : مفهمتش..ونتي شكون قالك راهم مداوسين ؟
نورهان : ااسمانة هذي داوسو فاليسي حتى سلكو الناس بيناتهم.
عامر : اووو ؟؟؟ مسمعتش. ..وهذو علاه دوسو...ولطفي واش داه لليسي؟؟
نورهان : سمعت قالو دوسو على طفلة ...وهذيك الطفلة تقرا عند يونس وقالو كاين علاقة بيناتهم...اليسي كامل يهدر...وبلاك لطفي ثان باغيها وتداوسو عليها .
عامر : يما قاتلي راهم مداوسين مي مقالولهاش علاه..انا حسبتها حكاية دراهم برك.
نورهان : ونتا سقسيهم وصلح بيناتهم ..ياك خاوتك.
عامر : ايه اليوم نهدر معاهم ونفهم منهم
نورهان : احكم كل واحد وحدو وافهم منهم ...صلح بين خاوتك واذا صح طفلة ...شوفو هي واش حابة ...يبقا الراي ليها
عامر : نشالله...ياسيدي في داركم وتخمي على خاوتي !!
نورهان تبسمت : والله معتبرتهم خاوتي ...يونس منقراش عند و مي كي نشوفو فليسي نحشم سيرتو كي عرف بعلاقتنا...نحسو خويا الكبير
عامر: كي اليوم نشالله ..ترجعي عايشة معانا
نورهان تبسمت : نشالله يارب ..
فاليل حكم عامر يونس خوه وسقساه.
عامر : واش الزعيم لباس.
يونس. يكتب : لباس عمورة ونتا
عامر : مانش لباس...حاب نفهم وشبيكم نتا ولطفي ؟؟
يونس تنهد : هو شكالك؟
عامر : لا ...انا نسقسي ولحقتني الهدرة كي دوستو فليسي ...دوختوني ..من وقتاش تداوسو ؟؟؟ ملي نشفالكم متفاهمين
يونس: هو لي دنا لحاجة خاطياتو
عامر : متفاهمتوش على طفلة ؟؟؟
يونس: ايه...حاط عينو عليها ...وانا محال نخليهالو ..وديجا هدرت معاها وراهي تابعتني ومنحبوش يدور جيهتها
عامر : يعني تفاهمت معاها... وقبلت بيك ؟؟
يونس : ايه خلاص قولو ينحي ق**** من بالو ...دنيا معمرة بنات يخير لي بغا انا هذيك يسموها تاعي ويخطيها
عامر : خلاص متتقلقش درك يدخل نفهمو ونشالله ترجعو كيما كنتو قبل
يونس: نشالله.
بقا يونس يكتب..و عامر طلع فوق دارهم يهدر مع. نورهان ويحكيلها ويستنى في لطفي يدخل
شوية هاك دخل لطفي
عامر : اي الشباب ارواح.
لطفي : واش عمورة نجي نفتحلكم
عامر يضحك ونورهان سمعاتو تضحك بالدموع.
عامر : هههههه ممبعد نعاودلك
طلع لطفي
لطفي: واش ....البوڨوص
عامر : حاب نهدر معاك.
لطفي مستغرب : اهيه؟!؟
عامر : واش كاين بينك وبين خوك ؟؟
لطفي : خلينا من ر***
عامر: احكي...فهمني. ..يازح تداوسو عند الليسي والناس تتفرج ..عيب والله..جامي صرات ..واش صرالكم...هذي كامل علاجال طفلة ؟!!
لطفي : ايه نحبها ..وقتلو عليها نهار لول ..وهو داها ليه..يتقعد بيا
عامر : بصح هو قالي هدر معاها وقبلت بيه ...هي تحبو. هو
لطفي مخلوع : اااه...قاتلو تحبو هو ؟!
عامر : ايه وراهي معه درك
لطفي بقا يخمم علابيها راهي تتهرب مني ...يمكن محبتش تجرحني ..وانا سيفت عليها
عامر : وين غست ؟؟؟
لطفي قلبو تزير ..حتى الطفلة لي بغاها راح يديها خوه ..
عامر :علابالي تحبها وراني فاهمك مي هي بغات خوك ..افهمها هذي ..وخوك علاحساب هدرتو ناويها .
لطفي ضحك بقهرة : ناويها ؟!! انا بغيتها ودرك يديها خويا ؟؟! منك بصح عامر ؟؟ كيفاه هذي !! كيفاه نقدر نشوف فيها وهي مع خويا !!!
تقبل نتا تشوف حبيبتك معايا ؟؟! تقبلهااا؟؟؟؟
عامر : نكذب عليك اذا قتلك نقدر
لطفي : شفت !!! ايه يديها بصحتو ...بصح انا ماني خوه ميعرفني وهاو البنيان يسكن فيه وحدو..
خليني انا نضربها بهبلة ولا هملة...
وخرج يغلي قلبو مزير خبط الباب وخرج...
من الغش لحق قدام دار حنان ...
وعيط : وانااا وااااش ندير لڨلبي ...نحرڨووو درك ..نحرڨوو..
وكمل يمشي ديراكت...كاين لي سمعوه مي معرفوش لمن خاطر هدرها ومشا ديراكت
***************************************
هلااااو..هلااااو..هاوااريو..الحمدلله نحطلكم صور الشخصيات ول نخليكم تتخيلوهم من عندكم و خلاص🙂🙂..جااوبووني نشاالله يكون عجبكم البارت نتلاقاو في بارت وحدوخر نشالله❤❤طشااااااو🖤
راه كاينة غنية الفوق لي بغا يزها
أنت تقرأ
القلب❤(باللهجة الجزائرية)
Romanceإذا ما بدت من أخيك لك زلة فكن أنت محتالاً لزلته عذراً، أحب الفتى ينفي الفواحش سمعه كأن به عن كل فاحشة وقراً، سليم دواعي الصدر لا باسط أذى ولا مانع خيراً، ولا قائل هجراً..
