_____________________hi____________________
لحقت الخمسة تاع لعشية يونس راجع للدار يمشي ويشرب فالما وخاوتو موراه وصحابهم يضحكو ...رايحين لدار.. لطفي يشرب فالما ويغمز لعامر وشدو فرغوهم فوق يونس...
عامر: دوش دوش راك تريح ...درك يشوفوك بنات الليسي يعيفوك ميجوش يقراو عندك.
يونس: اودي بلعو ...سميتوني ليسي..
لطفي: نروح نجيب قهوة وترجع
يونس: تعمل مزية جيبلي معاك...
راح لطفي وكمل عامر ويونس للدار .. يونس يشرب فالقرعة لي في يدو خاطر السخانة شهر سبتمبر..تلاقا بلي يقراو عندو خارجين على الخمسة هو مشفاش عليهم مزال جديد...مي شاف ميسا وحنان جايين يضحكو.. ميسا شافتو هبطت عينيها
حنان: خااه البروف تاع المات هو والله...كان يلعب فالماتش باين...
ميسا: اسكتي باين راهو يغلي مني.. .
يونس هبط عينيه وكمل طريقو...حتى سمع لطفي يتبلى فيهم..
لطفي : اوووو...هذي لاتاي ولا بورتاي !!..حنان هبطت عينيها وميسا تغلي من داخل . شافت فيه بغش
ميسا: كون تتلها بروحك ماشي خير !؟؟
لطفي : مانيش معاك ...مع الزين لي معاك...خاطيك ااشي ..
يونس رجع يغلي عيط للطفي: لطفي .. اخطيك ارواح نروحو نسهرو نوريلك الزين كيفاه داير متبعش جماعة الليسي ام قلبهم كحل
لطفي : هاني جاي..لحق لعندو لقاه يشوف فيهم لطفي شرب قهوة : متقوليش هذوك يقراو عندك ؟؟
يونس: ايه...
لطفي : انا وراسك جيبلي نموروها ..
يونس: شكون؟؟
لطفي: ماشي هذيك النقراشة ...لي معاها !؟
يونس يمشي ويشرب فالما ويقولو اخطيني . ولطفي يضرب فيه ويقولو والله جيبولي والله ... بقاو هكاك يتناقرو حتى لحقو للدار. ميسا بقات شوف فيهم و شوف كيفاه يضحك معاهم مكانتش عارفتهم خاوة..
حنان: شبيك ميسا ؟؟
ميسا: والو...خلينا نروحو للدار
الليلة هذيك يونس في فراشو يتقلب ويتفكر في ميسا كي كانت تشطح تبسم ..تمنى الوقت يوقف ويبقا يشوف فيها برك...منبعد تفكر كي تمسخرت بيه ضحك وحلف يخلفهالها..: هه ..راسها خشين بصح غير انا لي نكسرو ونركحها ....
غدوة منذاك الصبح ميسا راحت عيطت لحنان ورايحين يقراو
حنان: صباح الخير ..
ميسا:لباس ..
حنان: درك عندنا ساعتين عند يونس ماكيش خايفة؟؟؟
ميسا: نن ...واش دخلني فيه معندو مايدير.
حنان: هههههه كوراج عندك..
ميسا في قلبها : زعما واش يدير!!!..لحقو ىليسي دخلو يقراو.. دخل يونس ...شاف فيهم : سلام عليكم رجعولو السلام..يونس شاف ميسا قاعدة قريب لخرة هي وحنان ومشافتش فيه اصلا . يونس تبسم مهما كامل واش دارت فيه بصح كاينة حاجة تجبدو ليها . بدا يونس الدرس تاعو ويشرح ويفهم فيهم وساعة ساعة يشوف جيهتها ..مفهمش روحو علاه يحب يشوفها . شوية هكا شاف طفل لي يريح موراها يعيطلها بزااف . وهي دور ليه وتهدر معاه.. مرة زوج...تقلق ..مقدرش يتحكم في روحو.
يونس: نتي نوضي من ثم.
ميسا:انا استاذ؟؟
يونس عيط عليها: ايه نتي ..شكون يعني ؟؟ ملي بدات الحصة ونتي تهدري...نوضي من ثم وارواحي هنا الطابلة الاولى قدام البيرو..
ميسا: استاذ ...منحبش هذيك البلاصة ..عيشك
يونس: منعاودش الهدرة تقعدي هنا ووحدك منحبش اتشويش.. ناضت ميسا ورفدت دوزانها وقعدت فالطابلة الاولى قدامو . حطت دوزانها وشنفت ..
ميسا: بففف واش يجوزهم هذو الساعتين
أنت تقرأ
القلب❤(باللهجة الجزائرية)
Romanceإذا ما بدت من أخيك لك زلة فكن أنت محتالاً لزلته عذراً، أحب الفتى ينفي الفواحش سمعه كأن به عن كل فاحشة وقراً، سليم دواعي الصدر لا باسط أذى ولا مانع خيراً، ولا قائل هجراً..
