ضائعه في غابة ظنونه

العاشر

دخلت هناء الي اختها التي تحتجز نفسها بالغرفة ولا تتوقف عن البكاء لتربت علي كتفها بحنان وهي تجلس بجوارها : كفاية عياط بقي ياهدي انتي كدة هتموتي نفسك
بكت هدي بحرقة وحسرة وهي تقول ; كان لازم اعرف ان واحد زيه مالوش امان.... كان لازم اعرف ان اللي يخون مرة سهل يخون تاني وتالت... تعالت شهقاتها بينما تتابع : باعني زمان انا وبنته وجري ورا ناديه اللي اول مااخدت اللي وراه واللي قدامه رمته وانا اللي زي الهبله وافقت ارجعله ... واهي بنتها عملت نفس العمله خلته يسرق ويخون الراجل اللي طول عمرة مأمن له هو وابنه وبعد كدة رمته برضه...... بس المرة دي بنتي انا اللي دفعت التمن
ربتت هناء علي كتفها ودموعها تتساقط هي الاخري ....منهم لله ياهدي .... منهم لله
نظرت الي اختها بقلب محترق ملتاع وهي تقول :هي وامها بيتهنوا بالفلوس و بنتي انا اللي ضاعت ياهناء.... بنتي انا اللي اتاخدت من حضني واتكتب عليها تتجوز الراجل اللي بينه وبين ابوها تار... اللي ابوها سرقه وخانه ودخله السجن.... لا وكمان حملت وسقطت
ياقلبي يابنتي ياتري بيعمل فيكي اية
ضمتها هناء اليها : اهدي يااختي.... اهدي ووحدي الله وبعدين انتي قلتي انه قالك لما تتحسن هيخليكي تشوفيها
قالت هدي من بين دموعها : اشوفها بأي عين ولا بأي وش..... لو كنت رفضت ارجعله زمان بعد مااتجوز عليا وخاني وعشت انا وبنتي بعيد عنه وعن شره كان زمان بنتي في حضني... كان زمانها اتجوزت اللي تحبه ويحبها....
ربتت علي ظهر اختها قائلة :متعرفيش الخير فين... مايمكن يكون الراجل ده ابن حلال
هتفت هدي بحرقة : ازاي ياهناء .. ازاي و كل اللي بينهم تار وانتقام
: ربك مؤلف القلوب.....وسيرين طيبه وهو لما يقرب منها هيعرف انها مش شبهه ابوها ولااختها 
هزت هدي راسها بأسي : عمره ماهيشوفها غير بنت الراجل اللي سرقه وسجنه.... عمره ماهيشوفها غير خاينه زي بنت ناديه
ابتلعت هناء لعابها بحسره ولكنها تحاملت علي نفسها تهديء قلب اختها الملتاع.... اهدي ياحبيبتي وارحمي نفسك... انتي قومي صلي ركعتين واطلبي من ربنا يفرجها من عنده....
قالت هدي برجاء باكي: يارب.... يارب أقف جنب بنتي يارب...
...........
.....
نزلت سيدرا الدرج تتهادي بثوبها القصير لتنظر الي والدتها وزوجها الجالسين بالبهو قائلة : ها ياجمال لقيت ليا اللي هيدخل شريك مع حمزة
نظر اليها جمال باستهزاء : وده اللي هو مين ان شاء الله
هزت كتفها ببرود : اي حد.... ماهو كله بتمنه
نظر اليها جمال رافعا حاجبه ; لا وحياتك..... التمن المرة دي هيبقي دم
قالت باستهزاء : ولية بقي ؟
التفت اليها جمال قائلا : عشان وسعت منك المرة دي ..... انك تعملي شركة وهميه عشان تضمني رقبه حمزة ده حاجة خطيرة والآخر منها انك تسلمي سرك ده لحد متعرفيهوش
تجاهلت ما قاله لتقول ببرود : شوف حد مضمون
سخر منها : قدام الفلوس مفيش، حاجة اسمها مضمون
رفعت اصبعها امام وجهه بتحذير : يبقي نشوف حد وتحط رقبته تحت رجلك
نظر اليها بحدة : متتكلميش معايا كدة يابنت انتي... انا مش شغال عندك
تدخلت نادية : اية ياجمال اهدي.... سيدرا متقصدش
قالت سيدرا ببجاحة : لا اقصد... وانتوا بتشتغلوا عندي بالفلوس اللي اخدتوها
قال جمال بنبرة ساخرة : الفلوس اللي اخدناها
هزت سيدرا راسها ; ااه
اندفع اليها جمال بغضب : لا ياروح امك.... الفلوس اللي بتتكلمي عنها دي متجيش نقطة في بحر.... ده انتي لهفتي منه قرض ب ١٠٠ مليون
اهتاجت سيدرا بغضب ; وانت مالك.... بقولك اية انت وهي انا زهقت من وجع الدماغ ده
انتوا معايا من الاول وعشان نضمن ان حمزة مياذيناش لازم نأمن نفسنا ولو علي الفلوس هديك ياجمال اللبي انت عاوزة
تدخلت نادية لتهديء  الجو ; ايوة ياجمال سيدرا عندها حق ... احنا في مركب واحده
زم جمال شفتيه قائلا ; مركب واحدة...!
اومات سيدرا له ليقول جمال : بس انا ماليش دعوة بالموضوع ده
قطبت جبينها : يعني اية ؟
: يعني مع نفسك.... شوفي انتي حد يعملك اللي انت عاوزاه... إنما أنا برا.. مش، كل شوية هتعايريني بالملاليم اللي اديتهالي
زفرت سيدرا فهو يضغط عليها لتقول : طيب ياجمال... طلباتك
نظر اليها بانتصار قائلا : سيبيني افكر وارتب كل حاجة واقولك..
........
.....