وجعي_انت

32

#وجعي_انت
#dodywehbe
حلقه32
خشيت ونا نركر روحي ودموعي على خدي...... يفكر ويسأل ويجأوب على اسالته بروحه تعبت منه من اول ما تزوجته ونا عارفته قلبه وعقله مع غيري وسكتت وتحملته حتي انه كان يلخبط بأسمي وتوا بيطلقني خلاص قرر نفس العبه عندة اصلا انا من اول ما مد يدة عليه مفروض عديت لحوش هلي ليش نتحمله

اسيا: انتي هاااي كنك وين عديتي تعالي بنطلعو برا
نا: لالا بنرقد تعبت اليوم
ناهد: هي تعالي ماجنش لنرقدو
نا: بكرا نقعد معاكن وعد
ليبيا: خلاص يا بنات خلنها على راحتها
ورقدت هذي نا نهرب من مشاكلي بنوم ،،،،،، وعينا ثاني نوم على صوت الصبايا الكبار  وعيت نا و ليبيا وناهد
سالمه: كنك يا بيسان عيونك منتفخات
نا: حطيت يدي على عيوني وسكتت
حميدة: هي هي يا بنات كلمن الشباب ياخضن الفطور
فاطمه: والنبي الجو يسهف مفروض كل فتره نجو نغيرو جو
سالمه: معاك حق الواحد مل من الحوش
اسيا: صباح الخير
سالمه: كملتيها لي نوم انتي  ماعش تقولي بنغير جو وبنطلع وين ما تمشي تعزقي روحك وترقدي
اسيا: بصوت واطي يياااااي على اسطوانة اليوميه
فاطمه: خاطي البنت شن تبي فيها كلمي يا بتي حد يجي ياخد الصفرة
اسيا: يدها على شعرها و تتاوب بااه وهي طالعه وعزيز خاش خبطت فيه
عزيز: وووو افطني على صبح وبحت فيها من فوق لوطه كيف طالعه هكي انتي تحسبي روحك في حوش
اسيا: حاطه يدها على راسها جت بتحكي عطست
عزيز: واوو شن رايك نعطيك التشيرت تمسحي فيه اقلبي وجك لم تعطسي
اسيا: جت بتحكي عطست اخرة
عزيز: ضحك هههههههههه
اسيا: ابتسمت اول مرة يضحك  قدامها ديما يتعاركو ولا مرة ابتسم في وجها ..... ريحه عطرك قويه وعندي حساسيه
عزيز: ابتسم بخبث قرب منها بس قولي الحق سمحه صاااح
اسيا: وجهه انحمر وبعدت ها  تعال تبيك امك
نا اول ما خش عزيز لبست طربوشي وخشيت شعري اما اسيا و ليبيا كانو عادي وطلعت اسماء كانت لابسه استرتش وبلوزة قصيره وهي طويله ومليانه
فاطمه: امسك الفطور وتخليش بوك ياكل مالح
عزيز: هيتي
سالمه: وخلي مروان يفطر نعرفه هذا يكملها لي قهوة
نا: اول ما قالت اسمه حسيت قلبي بيطلع من مكانه
عزيز: مش قاعد راه طلع من صبح بدري قال عندة عمل
سالمه: وين عدة يا بيسان ما قلكش
نا: تمنيت الارض تنشق وتبلعني...... ها لا ما قاليش
اسماء: ابتسمت وبتغير الموضوع وين مرويه
عزيز: عصافير الحب هي وراجلها يتمشن وفي واحد عكسها قريب قتله مراد
فاطمه: تحشم قدام البنات
عزيز: تي اي حشمه يعرفن اكثر مني هذين
اسماء: بس لنقنك وين الزيتي داير جوه اليوم
عزيز: سقم التيشرت طرف هاا
اسماء: طلقت ضحكه طرف مطرففف
عزيز: ضحك ناعلي منك انتي....... هيتن الفطور هي
نا: مبلمه عيوني من اللي يصير قدامي وبحتت في اسيا الشر يطلع من عيونها، ،،،، كنهم هذين عادي يحكو هكي
اسيا: تقسم الخبزة بغل لا مش عادي بس هو فاشل وهي استغفر الله الواحد يبش يحكي على صبح بنعرف نا ليش دكت روحه ولدها مريض عزقاته عند امها وجت متاكدة باش تشوفك
نا: عقدت حواحبي كيف
اسيا : فطنت لروحه ها لا شي تعالي نفطرو بعدها نمشو لبحر فرصه مروان مش قاعد
وفطرنا وقعدن شوي ونبو نمشو لبحر
نا: هي يا امل معانا
امل: يدها على بطنها ناعلي خاطري والله بس محمود قالي تطلعش
اسيا: ووواك على خوتي نا يغددددو ان شاءالله يجيني واحد اجنبي باش ناخد راحتي
امل: هههههههه غير تحكي توا يجيك واحد يقطر في عيونك الثوم بعدين نا نحبها غيرته عليا ....
اسيا: لا وحياتك توا نخليه نفس العجين في يدي
وجت ليبيا وناهد وعدينا لبحر

سالمه: شفتن كيف كسر خاطرها وسيبها
امل: اها والله معاك حق حتي وجها تغير
سالمه: تفرك ايديها نا لي تصرف معه نشوفه بس