بلاي ياسعود حبيت خريجه سجون

3

شدن تناظر السقف لا تطيح دموعها : لا بس اقول ماشاء الله متزوجين من شهريين وحملت واحنا ثلاث سنين و7 شهور ولا وربي رزقنا .
دخل ضاري غرفة الملابس وهو حافظ هالسنياريو اللي ينعد يوميا لدرجة معد يتأثر فيه : لا حول ولا قوة الا بالله
'
'
في بيت ابو عبدالاله .
ابو عبدالاله وهو لابس نظارته ويتصفح جواله : بشري ياميعاد ؟
ميعاد عدلت جلستها : ابشرك الحمدالله قدمت انا ولمى على الوظائف وقاعدين ننتظر عاد الرد
عبدالاله : انتي انقلش وهي حاسب ؟
ميعاد : ايه وان شاء الله بالرياض عاد مو بمناطق ثانية
ابو عبدالاله : مافيه مشكلة حتى لو بمنطقة بعيدة نجيب لكم نقل اهم شي لقمة العيش الحلال وانا ابوك
'
'
يوم الخميس ، الساعة 6 المغرب .
رغد بإستنكار : كيف متزوج وزوجته حامل بعد ؟
اميرة بهدوء : هذا اللي صار ، وهم الحين جايين تقبلوها طبيعي كأنا نعرفها من زمان هم ودها مستانسين ومعلنين زواجهم لكن ظروف اهلها واحنا ناس نكرم النسب ونقدره
لمى : بس ياميرة كيف كذا بيوم وليلة كل هذا يصير ؟ عمي مازعل ؟ ابسطها يعاتبه !
رسيل وهي تنقل كلام ابوها زي ماقال لهم : مريضة انتي ولا تتميرضين ؟ قلنا لك امي وابوي كانوا يدرون وهم اللي خاطبينها ولما وافقوا وطابقت التحاليل قالوا نعلن ؟ اهلها مات لهم واحد وقالوا اصبروا بعدين جتهم ظروف وسكتوا وتزوجوا لان صقر ماراح يصبر اكثر وتزوجوا والحين لما حملت صار لازم الكل يدري واهلها ب لبنان الله يوفقهم سواء بوجود اهلها ولا لا
ديما تقوم : خلاص اسمعوا صوت سيارة صقر
الساعة 8 العشاء .
كانت جالسة بهدوء تتأملهم يضحكون ويضربون بعض بمزح ماقدرت تحتك فيهم ، كلهم داخلين مع بعض ويسولفون ويضحكون وهو متلزمة الصمت فكرت بنفسها مر اسبوع على اخر موقف بينها وبين صقر ومن بعدها وهي طول وقتها مع فهد او بجناحها وصقر 24 ساعة برا البيت يجي يغير ملابسه ويطلع ، صحت من تفكيرها وهي تشوف رسيل تطقطق على ديما اللي قامت تضربها حست دموعها تحرق عيونها استأذنت وطلعت دورات المياه رايحه جاية ماتدري وش تسوي ؟ طلعت جوالها ودقت على صقر
رد مستغرب من الرقم الغريب : هلا ؟
سارة وهي تحاول ماتبكي : صقر فاضي ؟
عدل جلسته من صوتها لما عرفها : وش فيكم
سارة وهي ترفع راسها لا تنزل دموعها : عادي نرجع البيت
صقر طلع من عند الشباب لما حس ان الموضوع مايمزح : احد ضايقك بكلمة ؟
سارة بكت ماقدرت تكتم : ماعرف احد ماعرف جالسة لحالي من اول ماجيت اول مرة اشوفهم كلهم مع بعض وانا ماعرف احد ولا قدرت انسجم ولا عطوني فرصة انا خايفة وكبدي تقلب من الخوف خذني صقر تكفى مابيهم
صقر بعصبية : اميرة ورسيل وينهم عنك مخلينك لحالك ؟
سارة وهي تشهق : حتى رسيل واميرة ماتعودت عليهم كيف بياخذوني معهم
صقر بتنهيدة مايحب احد يبكي قدامه لو الد اعدائه كيف ب انسانه كافة خيرها وشرها عنه : ثواني طيب ، الحين مسحي دموعك وانا بشوف
سكرت منه وغسلت وجهها وهي ترجف انتظرت لين خف احمرار عيونها ودخلت وهي مبتسمة بدون نفس
ميعاد : تغطي بيدخلون الرجاجيل
سارة استغربت : ليه ؟
ميعاد : مدري قال صقر بيدخلون يسلمون
تغطت ب جلالها وجلست بجهه البنات اللي كلهم ب أجلتهم بالزاوية والعيال ب الجهه الثانية ولافيين روؤسهم عنهم شافته يدخل مع عيال عمه ويدورها بعيونه لما شافها ابتسم وغمز
ماقدرت تخفي ابتسامتها غصب نفس ثقته الدايمة بنفسه لو وش يصير لو انها تبكي منه يقول تطمني انا معك من اول زواجها مافكرت تحتك فيه وطول وقته لاهي عنها ولما بغته ماكسر بخاطرها
جلس جمبها بعد ماسلم على حريم عمانها ، اخذ يدها وضغط عليها يطمنها بانه هو هنا
شدت بيدها عليه براحة نفسية لما حست بوجوده على الاقل ماتكون مع البنات لحالها ، مايدري ليش اشمئز وهو يتخيلها ب حضن واحد قذر زيها رمها بقرف وتكتف !
ناظرت سارة بطرف عين وطنشته .
فهد بهبال : ايوه ياحلوين وش تقيمكم بـ زوجة اخونا الجديدة ؟
ماجد : اول نقطة الصوت ، شخبارك يام عبدالعزيز ؟
جمدت بمكانها وهي تسمعه ب لقبها باسم ابوها !
فهد : خير ان شاء الله اسمها ام فهد
بتال ب لعانة : لا صقر يحب يلقب نفسه ب ابو عبدالعزيز اكيد ولده عبدالعزيز
قام ماجد ياخذ البيالة من امه وهو يضحك على فهد المتنزفز
سارة بهدوء وهي تبي تفتك من ازعاجهم : الحمدلله بخير
طاحت البيالة من ماجد بوجهه مصدوم وتجمدت حركته وهو يغمض عينه نطق وهو يتمنى يكذب مايسمع : سارة !
الكل استغرب كيف ماجد يعرفها ؟ لمحته سارة من تحت جلالها وشهقت والله هو نفسه : ماجد !
ناظرها ب نظرة مافهمها الا سارة : وش الدنيا بك ؟
سارة عضت شفتها وهي تحس انه يرش الملح على جروحها ، تكلمت وهي متاكدة محد بيفهمها غيره : ‏جايني بعد غيبه تسال عن الحال كانك تقول طاب جرحك ولا ازيده
ماجد : والله قلبت الدنيا عليك مالقيت لك ارض رحتي انتي ومعك اختفى كل شي مرت خمس سنين بس باقي نفس مانتي نفس الصوت نفس الطول والرزة ماتغيرتي " وسكت وهو يناظرها بنظرة غريبة " بس ياخوفي انك خنتي عهد وميثاق لو انك مو من علومك عرفتك مهره اصيلة بنت رجال ينقال له عبدالعزيز عضدك اخوانك يضرب فيهم المثل ماظنتي " بنبرة مجهولة " تطلع من يمينك هالفعايل " واشر على صقر "
سارة بثقة : لولا الجمر مابينت ريحة العود ولولا المواقف ماتبين معدنك
الجدة تلطف الجو : اقول ياخالد انا جايتك والله لا يعوقني بشر
" تنبيه : ماجد ولد عم صقر ".
ابو صقر : البيت بيتك انتي الداخلة وانا الطالع وجناحك ب الدور الارضى نفس ماهو وملحقك محد قرب صوبه طبي وتخيري
الجدة وهي تلبس نظارتها : لاني في غيابي شفت العجايب " ضربت بعصاها وهي تناظر ماجد وسارة " والظاهر ان ماهو سر واحد فيه بينا كومة اسرار
'
'
دخل جناحه ب تعب توه مخلصه محاكمتين ، ضغط هالاسبوع عنده 4 قضايا وكل وحدة اصعب من الثانية صفط شماغه بترتيب على التسريحة ، شافته وقربت تركض وهي تبوس كتفه : حياك الله ياهلا والله وعليكم السلام متى جيت تبي اكل اسفة والله كنت عند خالتي اعذرني والله ماعيدها اسفة
مساعد سكر أذنه بتعب : بس بس بعدين وش تبوسين كتفي من شايفه ؟ الملك سلمان ؟
عائشة تبوس كتفه مره ثانية بارتباك : والله اسفة ماعيدها تكفى سامحني
مساعد هز راسه بقل حيلة : خلاص ياماما خلاص هدوء بس
عايشة : تبي عشاء ؟ الحين اجيبه ترا عصرت لك عصير برتقال احسك تعبان وسويت لك مكرونة باشميل وقليت لك برقر وبطاطس
مسك فمها : اول شي ماقلت لك جوعان ثانيا وش برقر ماقلت لك ماكل زيوت ابدا " صرخ " تفهمين عربي ؟
عايشة وهي تنتفض : من عيوني خلاص توبة اعذرني الحين اسوي لك وجبة ثانية ويالله اجلس بنقع رجلينك بموية وملح وانشفها لك
مساعد : من باقي تنقع رجلين زوجها ؟ من اي عصر طالعة انتي ؟
عايشة صاحت : والله اسفة مادريت
صرخ مساعد وهو يرمي عطره بالجدار : انطمي
'
'
في الحي القديم .
جالس يرتب المُعلبات وهو يبتسم اشتاق ل سارة كثير ، من يوم جت وهي ماليه حياته عليه تسمعه تهتم فيه تضحك معه تعصب عليه تنهد بشوق : الله يسعدها وين ماكانت .
دخلت اخته عليه : ملوك
عبدالملك بطفش ماله خلقها : هلا ؟
تجلس : مو سارة راحت ؟ الحين من بيدبر ريم ترا فهد بيجي بكرة
لف عليها بصدمة فعلا هي صادقة ، مشى رايح جاي وهو يفكر وش يسوي ؟ كيف يوصل ل سارة ؟
'
صباح يوم جديد .
فكت جلالها وهي توها مخلصة من صلاة العصر تأملت صقر النايم من جاء من الداوم ، تنهدت وهي تفكر بقرارها طول امس مانامت من رجعوا وهي تستخير وتفكر لقاءها ب ماجد اللي بنعرفه قصته مع سارة بالبارتات القادمة ابدا مو من صالحها .
قربت بهدوء وهي تقومه : صقر الصلاة لا تفوتك
صقر بالويل يفتح عيونه : جهزي ملابسي بتسبح وبطلع
سارة : صل قبل بعدين تسبح
صقر طنشها ودخل يتروش .
سارة سوت بيدينها كش على الباب : الشرهه مو عليك على اللي تنصحك اساسا
صقر : تراني ماسكرت الباب يابقرة اشوف
سارة بصراخ عشان يسمعها : انا ابيك تشوف
طلع صقر وتسند على الباب : باللهي يالقوية ؟
سارة بنذالة : ايه
صقر يحك دقنه : صدق ؟ ماشاء الله " ركض سحبها وهو يدخلها الحمام "
صرخت سارة وهي تفك نفسها من يده : فكني .