بلاي ياسعود حبيت خريجه سجون

2

تنهد ابو مساعد ب هم : مالي غيرك ان حكيت ل سعود لامني وان حكيت ل امك بكت وانا معد فيني زود اشيل هم احد تعبت اعيد ب الكلام خمس سنين قلت انسوا ان لكم اخت
مساعد بتردد : يبه شفتك نايم ب غرفتها وانت مقفلها من خمس سنين وش طرا لك ؟
ابو مساعد : خمس سنين ماعمرها زارتني بأحلامي جتني قبل شهر تمشي لي بدون رجلين وتناظرني بعتب نغزني قلبي وجتني امس بس بدون ماتناظرني حتى كان راسها بالارض ومشى شايب مسكها بيدها وخذاها بعيد عني راحت حتى بدون ماتناظرني
وقفت كل خلية ب جسم مساعد وهو يسمعه ! اخته شفيها ؟ غايبه عنهم سنين ولاول مرة تزورهم باحلامهم وكل حلم ابشع من الثاني قبل يومين سعود واليوم ابوه ، ابتسم ل ابوه : هذا من ابليس يايبه قوم نصلي وندحره '
بعد المغرب .
جلست سارة بجناحها وهي تصفط جلالها شافت صقر يدخل ابتسمت : انا بروح وبرجع
صقر يرفع حاجبه : وش عندك تحت ؟
سارة وهي تطلع : برجع لك ماراح اضيع .
'
واقف قدام المرايا ينسف غترته : يمه باللهي مو كأني امير ؟
ام صقر تضحك على هبال ولدها : شيخ الامراء
رسيل تقشم حب وترميه على فهد : القرد بعين امه غزال
فهد يعدل وقفته : يمه صدق شكلي حلو اني اقابل فيه مرت اخوي الجديدة ؟
اميرة وهي تدرس بنتها : ياويلك لو يسمعك صقر يقص لسانك
دخلت سارة بحياء : السلام عليكم " ردوا عليها السلام "
فهد يركض لها بترزز : احب اشكرك انك لبيتي لي دعوتي وانك تنزلين اتعرف عليك عليك اكثر " ركع بهبال " هل تسمحين لي ب تقبيل يدك ؟
رسيل وهي منسدحة : وش هالمسلسل المكسيكي ؟ اسمحي له عشان يسمح لكم صقر انه يشيل روؤسكم عن اجسامكم
رماها فهد ب عقاله : انطمي ياهادمة اللذات مالك شغل
ضحكت سارة من شكل فهد الكاشخ كانه معرس وريحة البخور تشمها وهي بالدرج ، جلست وهي تفرك يدها ماتدري وش تسوي
جلس جمبها فهد بتميلح : وش تدرسين اكيد تدرسين انتي كبري
سارة : ماكملت دراستي
رسيل تسوي نفسها تشق ملابسها : ياحظك
فهد بابتسامة غبية : اساليني وش ادرس
ضحكت سارة : وش تدرس ؟
فهد يسوي نفسه مغمى عليه : فديت الضحكة الذباحة اه ياحظ صقر مايستاهلك " عدل جلسته " اول شي احب اشكر خادم الحرمين الشريفين واهلي اللي دعموني وحققوا حلمي اللي كنت احلم فيه من كنت ب بطن امي واتخصص امراض نساء وولادة
ام صقر تغطي وجهها : استح على وجهك استح مو كفاية الحريم اللي مفشلني معهم لا دروا عن تخصصك يابو عين زايغة
فهد شهق بحماس : انتي حامل صح ؟ تكفين خليني اولدك والله تراني شاطر
صقر وهو واقف بالدرج معه عقاله : قل قسم بالله ؟
فهد : اعوذ بالله وش جابه " تلثم وهو يكلم سارة " استودعتك الله ياحب انقتل بالمهد قتله زوجك الحيوان "وهج قبل يجيه صقر"
ضحكت ام صقر : خذ زوجتك قبل لا تكمل عليها رسيل
صقر : مهبول اخليها بعد الحيوان اللي هج تو
صعدت سارة معه بتأفف ، وام صقر تتأملهم لين اختفوا من قدامها رسيل : ياحليله صقر والله طلع متزوج من شهرين وانا اقول شفيه وسهرات لين 8 الصبح و24 برا البيت وماينام هنا
سكتت ام صقر بحسرة وهي تتذكر قبل 24 ساعة لما دخل عليها زوجها بهدوء وهي مخلصة من صلاة العصر ( ابتسمت له وهي تشوفه : امر يابو صقر وش فيك ؟
ابو صقر يمسح على وجهه ب هم : بزوج صقر !
ابتسمت : هذي الساعة المباركة اجل بدور له بنت الحلال
ابو صقر : بس بنت الحلال لقيتها
ام صقر باستغراب : كيف لقيتها ؟
ابو صقر بهدوء : بزوجه سارة
ام صقر : ومن ذي ؟
ابو صقر : مانصحك تسمعين ل يتم الزواج ولكن بتقولين لعيالك ان صقر متزوجها له شهرين بالسر واحنا كنا ندري بس سكتنا لان اهل البنت كانوا مشغولين ولا قدروا يشهرون الزواج بسبب شغل ابوها ب لبنان واذا سالوك عن اهلها قولي انهم مايجون الا ب السنة مره
ام صقر بهدوء ودموعها على خدها وهي فهمت السالفة : يالله قوي قلبي والله معد فيني اكذب اكثر من هالـ 30 سنة اللي مرت .
ابو صقر وهو يقوم : مجبورين )
اما فوق ، سكر صقر الباب وهو يتخصر : عاجبك طويل العمر اللي تحت ؟ نازله عشانه
سارة : حرام قالي ابيك ماحبيت اكسر ب خاطره
صقر بطنازة : قولي قسم بالله ؟
سارة ببراءة : والله
خذ مفاتيحه وجواله وفتح الباب بس ماينفتح استغرب رجع يكرر لكن نفسه الباب ماينفتح دخلت ورقة من تحت الباب نزل ياخذها وانصدم وهو يقرا كلام ابوه : من اعرست ماجلست مع مرتك ، بنفضي لكم الجو
صرخ ب قهر مايبي يجلس مو قادر يجلس معها ابدا والحين بيجلسونه معها غصب
انسدح بس ماش مافيه النوم قام بطفش شافها جالسة تتامله
صقر : مضيعة شي بوجههي ؟
سارة : قايل لاهلك اني حامل ؟
صقر : ابوي قايلهم
سارة : وش قايل ابوك خلوني بالصورة لا افضحكم
صقر : قايل اني ماخذك من شهر واهلك طلبوا يبقى زواج ب السر بسبب ظروف والحين اهلك ب لبنان عشان دوام ابوك ومايمديهم يجون واحنا اعلنا زواجنا وانتي حامل
سارة : ينفع مسلسل كويتي ل رمضان
صقر : انتي من مين حامل ؟
ناظرته سارة بغصة وعيونها تجمعت فيها الدموع هي تبي تنسى وهو يذكرها يعني يستغبي ولا ايش ؟
صقر وهو يحاول يكون طبيعي ومايقرف من الموضوع : بشكل غير شرعي ؟
سارة ببحة : والله ماكنت ادري كنت نايمه وهجم علي اغتصبني دافعت عن نفسي مسك راسي وضربه بالارض وفقدت الوعي والله انا مو مثل مانت متصور
صقر رحمها بس عجز يصدق : اجل ليش اهلك مايبونك ؟
سارة بهدوء وهي تحاول تمنع دموعها : انت حالف الليلة مانام ؟
صقر : اجل تبيني اعيش مع وحدة ماعرف عنها شي ؟
سارة ضحكت بسخرية : بتندم انك سالت ، عشاني قتلت زوجي
صرخ صقر : ياوجه الله متزوجة بعد " استوعب وقرب ل الجدار بخوف " ماذبحوك ؟
سارة : كنت بامريكا والقانون وقف معي انه قتل خطأ وسجن خمس سنوات
مسك صقر راسه : ياوجهه الله وش سويت بحياتي عشان ربي يبلاني فيك انا ؟ قاتلة وخريجة سجون ومغتصبة وحامل ب ولد حرام بعد
سارة بغصة من كلامه اللي يجرح هي مو زي مايقولون هي اشرف وانقى بس الزمن عيا لا ينصفها : بس انا حافظة القرآن كامل جيت ب امريكا مع زوجي هو يدرس وانا انشر الاسلام اسلموا خمسة على يدي كنت معلمة في دور التحفيظ قبل اتزوج كنت اشرف منكم وانقى منكم كلكم بس انا ربي بلاني وانا بصبر " اذا احب الله عبدًا ابتلاه " يكفي ربي يحبني مو مثلكم تتركوني عشان سُمعة
سكتت صقر باحراج : والله ترا كنت امزح يعني بس يعني معليش حامل حمل غير شرعي ومسترجلة وتشتغلين ب بقالة وتتزوجين واحد ماتدرين من هو وكل هذا ولا اثر فيك
سارة : ليش جامد انا ماحس ؟ تدري اني اموت بالدقيقة الف مرة بس انا مؤمنة وصابرة انا ماجزع واسخط " وعسى ان تكرهوا شيئًا وهو خيرا لكم " ربي ماحطني معك الا ب خيرة لي ربي يعلم وانتم ماتعلمون ربي اللي انطق عيسى بالمهد وحملت فيه مريم وهي عذراء بدون رجال ومن رزق زكريا وهو شايب وزوجته عقيم ومن اخذ موسى من حضن امه وارسله ل فرعون وارجعه لامه ومن انجى يونس من بطن الحوت مو عاجز انه ييسر امري ويختار لي الأفضل اللي بطني ماتتشرف فيه انت لعله يكون خير ل الاسلام والمسلمين زوجي اللي قتلته يمكن لو عايش جرني ل طريق السوء يمكن لو بين اهلي انا الحين عقيت بامي وابوي ودخلت النار
سكتت صقر وهو يتاملها بصدمة مستحيل احد بالدنيا بيكون زيها ماخذة كل الموضوع ايجايبة وكلامها مقنع 100٪‏ هو من ذنب انهى الدنيا بوجهه يمكن ربي ارسلها تساعده يكفر عن ذنبه
صقر تنهد : طيب ياسارة دامنا على البر خلينا نوضح كثير اشياء زواجي لك مبني على مصلحة بيني وبين ابوي بضبط وضعي هالثمان شهور واول ماتولدين بطلقك اعترف لك ماقدر اكمل حياتي معك
سارة وهو تدخل الحمام بتغسل وجهها اللي انتفخ من كثر البكاء : ولا انا حياتي واقفة عليك
'
'
في نفس البيت ، وغرفة مختلفة .
جالسة على السرير تتأمل الارضية تنتظره يطلع من دورات المياه .
طلع وهو يمسح وجهه ب المنشفة بعد ماتسبح وهو توه راجع من الحضيرة ، نزل المنشفة وهو يحسها تبي تقول شي : ايوه ؟
شدن تلعب ب يدينها وابتسامة صفراء : شفت زوجة اخوك حامل
تسند ضاري على الجدار وهو يرمي المنشفة على كتفه ويتكتف وببرود : كنت فيه ترا لما خبرنا ابوي .