سحابة صيف

جزء 14

  كانت الساعه 9:00 الليل قربت عايشه اكثر من حجرة امها...ولقت الباب مبطل ودخلت عقب ما دقته عشان تنبهها...
عايشه شافت امها ودمعت عينها: السلام عليج امايه..
ام راشد مب مصدقه تبى تنش: وعليكم السلام يا هلا غناتي هلا فديت عمرج ...
قبضتها عايشه عشان ما تنش: فديت روحج استريحي امايه ...
وحبتها ولوت عليها....
عايشه: شحالج امايه ..؟
ام راشد: بخير ربي يسلمج متى وصلتي..؟
عايشه: توني داخله...
ام راشد: والله انيه مب مصدقه..عايشه بنتي من متى ما شفتج....
ابتسمت عايشه: فديت قلبج غناة روحي...
ام راشد: وين ريلج.؟
عايشه بخجل فضيع: سار امايه وايد مشغول ..
ام راشد: خلاص فديتج ادري به مشغول ما ينلام..زين منه يابج...
ويلست تسولف ويا امها وتتخبرها عن احوالها..واحوال البيت والشركه والاهل..وكل شي...
عايشه وفي عيونها نظره بريئه: امايه ما تسيرون على بيت عمتي ؟
ام راشد: لا والله يا بنتي ما نشوفهم ابد...هذي الدنيا محد عاد يدري عن اهله..الا اقول ليش ما يبتي اليهال...وباجر اخر يوم في الاسبوع وعقبه اجازه يومين...
عايشه: والله يا امايه ما طاعوا قلت لهم بنسير بيت يدتكم قالوا بيتمون في العين مب راضيين ييون صوب بوظبي..يقولون رطوبه..وابوهم واعدنهم يسيرون دبي هالخميس...
ام راشد: على هواهم غناتي ...
عايشه: زين امايه وين ليلى...ولهت عليها موت..
ام راشد وتغير شكلها: ما شفتها اليوم مول وما يت ولا سلمت علي...
عايشه: افا يمه عسى ما شر..؟
ام راشد:ما شي يا بنتي سيري لها فوق ..مب طايعه تظهر من حجرتها..حتى عيال اخوج راشد ما شفناهم مول..
عايشه: ليش امايه شو اللي مستوي؟
ام راشد: ما يوون هني الا عسب عمتهم..والحين مب طايعه تظهر لحد ..عقب بتخبرج هي..نشي لها بنتي شوفيها..
ونشت عايشه وهي طالعه فوق..خطفت على حجرة سيف وبطلت الباب بس كان مقفل..وتحسست المفتاح من فوق ولقته وفتحت الحجره..ودخلت داخل...تنهدت من قلبها....ريحة سيف كانت مسك يفوح في اركان الغرفه...كل شي كان مكانه ما تحرك...وشبريته مرتبه نفس ماهي..اثاث حجرته لو ينطق بكى حزن على فراقه...سيف اللي بحياته ما زعل حد..سيف اللي بكته كل الناس وكل العيون ..واحترقت كل القلوب لفراقه....وكان طول عمره الطيب اللي يصلح من بين الناس..كل شي في هالبيت يذكرهم فيه...كل الاثاث اللي في الحجر هو اللي مشترنه اول ما توظف وكان هديه للبيت بعد بمناسبة زواجه من سعاد...
سعاد الملاك الطيبه اللي فعلا محد يستحق سيف الا هي..بنت الناس الطيبين والمعروفين بكرمهم وطيب اخلاقهم....ودارت الذكريات في راس عايشه وجمعتها المواقف مع سيف ....اللي كان نصير البنات في البيت ..يوم راشد ومبارك يأذونهن....وتذكرت واحد من مواقفها وياه...
سيف: يالله نلعب انا وعايشه وليلى...
مبارك: اوكي وانا وراشد بروحنا...اكيد بنغلبكم...
عايشه: بنشوف نحن اللي بنغلبكم..
ليلى: البناااات هيه..
سيف: حووه انا ولد لا تنسين..
تضحك عايشه وليلى...ولعبوا كوره وكان راشد يلعب بعنف..وما يرحم البنات...وكل شوي سيف يوقف اللعب..
سيف: يا ريال شو هالحركات ما تستحي ع ويهك هذيل بنات رقيقات ما يتحملن..
راشد: محد قالهن يلعبن ويانا...
مبارك: سير ازقر فهد وناصر عشان نلعب وياهم..
وتزعل عايشه وتمد بوزها شبرين..اما ليلى ما تسكت مول عن حقها..
ليلى: اذا زقرتوا قوم عمتي بخبر ابويه عليكم وبقوله من اللي مشرد الخيول من العزبه....
سيف يضحك: والله هزأتهم البنيه...
راشد بخوف من ابوه: اوكي ليلوه تلعب بس عويش لاء..
سيف: انا احتج اذا عايشه ما لعبت انا ما العب...
انقطع حبل ذكريات عايشه قبل تكمل شو اللي صار ويا سيف..يوم سمعت حس شيخه تلعب وتصارخ في الحجره اللي حذال حجرة سيف..ونشت بعد ما انتفض قلبها..ودقت باب حجرة ليلى بس ما رمست..وليلى ما سألت من اللي حذال الباب...ويتها شيخه بس من داخل..
شيخه: اتي من.؟
ابتسمت عايشه ودقت الباب...
شيخه: اتي من مافي متاح(مفتاح)..لوحي لوحي بيتكم...
ضحكت عايشه من قلبها: ليلوتي بطلي الباب...انا عويش..
ليلى اول ما سمعت حسها ابتسمت من قلبها ونشت بسرعه وبطلت الباب ولوت عليها...مب مصدقه انها تشوفها..ودخلت عايشه ويلست وياها تتخبرها عن احوالها و تحاول تلاعب شيخه اللي ما طاعت تيلس عندها مول..وكانت دافنه عمرها في حضن ليلى...
عايشه مبتسمه: خلاص كبرت نزليها من فوقج مب زين البزا...
ليلى: خليها تتدلع ما بقى لها شي وبتروح الله العالم شو بيصير فيها..
طالعتها عايشه بغرابه: وين بتروح؟
انترسن عيون ليلى بالدموع وسكتت..وعقب ما مسكت عمرها شوي خبرت عايشه اختها بكل شي...
عايشه: ليلوتي غناتي..حطي نفسج مكانهم وان شويخ عندهم...بذمتج ما بتولهين عليها..؟ ما بتفكرين فيها؟ ما تبين تشوفينها؟على الاقل لو يومين في الاسبوع...صح كلامي..؟
سكتت ليلى..وطالعت شيخه اللي مندمجه في عالمها..ونشت بسرعه صوب عرايسها...
عايشه نشت لها وسارت صوب شيخه...واول ما رفعت شيخه راسها طالعت عايشه وبطلت عيونها على الاخير..
مدت عايشه ايديها عشان تشلها: يالله حياتي..
نشت شيخه بصعوبه عشان تشرد..بس مسكتها عايشه ويلست تلاعبها وتضحكها ورغم ان شيخه مب راضيه على اللي يصير فيها من تعذيب بس انفجرت ضحك..وجارت عايشه ويلست تلعب وياها وما استحت هالمره منها..وعايشه تلاعبها وتتحرش فيها...وليلى تطالعهن ومبتسمه...
وردت عايشه عند ليلى تسولف لها...وما حست الا وحد يسحب ايدها..
شيخه:تألي بنثبح علوثه...
عايشه: فديت قلبج يا عسل انتي..شو تقولين والله اني مب فاهمه شي..
ليلىمبتسمه: تقولج نشي بتسبح عروستها...
عايشه:الحين عمتج عيوز وصلت الاربعين وتبينها تسبح العرايس..منقود يا بنيه...
شيخه: يالله تألي ثوفيها تثيح..بث ما ثويت فيها ثابون..
ليلى: شو اربعين انتي بعد..اذا وصلتي الاربعين يعني انا بكون في الثلاثين..بسم الله من فالج عويش..الحين انتي 32 وانا 26 ..ابييه والله اني يالسه اكبر ويطوف عمري بدون ما احس...
عايشه مبتسمه بحنان: عادي ما بنعيش الا مره وحده..خلينا قد ما نقدر نبتسم ونضحك..ونفرح اللي حوالينا..ونشكر الله على كل شي..صح؟
ابتسمت ليلى: صح...
عايشه: اممم ممكن ننش انا وانتي بنسير مكان...
ليلى: وين؟
عايشه: عند امايه.؟ ولا ما تبين؟
ابتسمت ليلى: ولهت عليها موت..يالله ننزل لها...
ونزلن البنات وتراضت ليلى وام راشد وردت طلعت فوق ويا عايشه اللي ما سارت بيت راشد بتتريا تسير لهم باجر..وتشوف اخوها وحرمته وعياله...ورقدت بحجرتها...مع ان ليلى يلست تقنعها ساعه ترقد عندها....
.................
اذن الفير الساعه 4:25 ونشت ليلى بصعوبه وقبل تصلي طلعت توعي عايشه للصلاه..بس شافتها يالسه على الشبريه ماسكه المصحف وتقرا فيه..وابتسمت وسارت تيلس حذالها..
عايشه وهي تبند المصحف: صدق الله العظيم..
ابتسمت ليلى..
عايشه: متى نشيتي؟
ليلى: توني ناشه وانتي..؟
عايشه: من نص ساعه احب اتعبد هالوقت والكل رقود..احس اني وايد قريبه من ربي...ليلى لا تضيعين هالاوقات وكوني فيها اقرب لله..صدقيني محد بينفعج الا هو...
ليلى: والله اني اسوي اللي اقدر عليه وانش كل يوم الفير...واصلي.
عايشه: لنفسج مب لي..لا تقولين ولا تضيعين اجرج...تعرفين اني اعاني ويا مطر وهزاعي وما ينشون الا عقب ما يطلعون روحي..بس فهد فديت روحه..والله يا ليلى اني اذا ما نشيت هو يوعيني انا وابوه للصلاه..علني افدا روحه تولهت عليه..تعرفين ليلوتي صج تولهت عليه..خصوصا يوم يتيدد فديت قلبه ييني يركض قبل يروح المسيد ويلوي علي وهو ميت برد ...واتخبره شوفيك..يقول لي اخذ شويه من دفاج قبل اسير...فديته عمري والله..
ليلى مبتسمه: ربج بعد..اسمه فهد لازم يكون كريم الطبايع بعينج..
عايشه مبتسمه بخجل: خافي ربج..والله ما طرا لي في بال..يالله نشي خربتي علي لحظاتي الروحانيه...بسوالفج الماصخه..
ليلى: عويش بذمتج شو تحسين يوم تتذكرينه...؟
عايشه: اضحك على عمري واستحي..يا ربييه كيف كنت مراهقه والله اني اضحك ضحك على نفسي..فهد ما يعني لي اكثر من اخو وولد عمه..وما يزيد حبه في قلبي عن حبي لراشد ومبارك وسوافي وناصر اخوه....
نشت ليلى مبتسمه: انا بصلي وبرد ارقد..انتي ارقدي بعد...
عايشه: ان شاء الله بس روحي وصكي الباب...
طلعت ليلى وصلت وكانت تفكر اكيد انها مب سايره الدوام..وشنطة شيخه كانت مرتبه وحاطتنها في طرف الحجره...ونشت بصعوبه وانسدحت على الشبريه وشافت شيخه راقده بهدوء ما تدري شو اللي يالس يصير حواليها..
.
.
مر الوقت ووصلت الساعه 8 الصبح..واتصلت ليلى بحصه وقالت لها ما تمر عليها...
حصه محرجه:وليش ما قلتي لي من امس..؟
ليلى: ما قدرت اتصل يتنا عويش ونسيت ادق لج..
حصه: مب عذر والله...برايج..
ليلى: ليش محرجه؟
حصه: ولا شي يالله برايج بسير الدوام..
ليلى: باي..
وبندت عنها ليلى اللي كان مودها معتفس على اخر درجه...ومب ناقصه تتضارب ويا حصه..يكفي ناصر وشيخه مب ناقصنها وذا حصه...ونزلت تحت وشافت امها في الحوي ويا عايشه وخلود...سلمت عليهن ويلسن يسولفن ويت شرملى تقولهن ان في موتر واقف برا فيه واحد يتريا ..ليلى هاللحظه قلبها انتفض وحست بشي غريب ..خافت وتغير شكلها..وبلعت ريجها بصعوبه..
شرملى: سياره لون ابيض..
ام راشد: شو يبغي.؟
عايشه: يمكن اهل شواخي..
خلود: يالله ننش داخل خافه يبا يدخل الموتر الحين داخل الحوي..
ونشن بسرعه داخل وياهن ليلى اللي تمت توايج من جامات الصاله...بس الريال ما نزل ونزلت حرمه منقبه اول ما شافتها ليلى عرفت انها فاطمه من مشيتها..ودخلتها شرملى الصاله وسلمت عليهن ويلست وياهن دقايق بس..ليلى فيها كانت تنتهي تنعدم تتنافض تموت كل ثانيه...
فاطمه بخجل: خالتي ام راشد..اخويه مستعيل فديتج ماروم اطول وين شيخه...؟
طالعت عايشه في ليلى اللي صاخه من اول ما يلسن وقلبها عورها عليها...
عايشه: بسير اييبها لج الحين...
ام راشد: بسرعه يا عايشه الريال بيتوحش على اخته...
خلود ما حبت تطول في القعده وعشان ما تشوف اللي تخاف منه نشت للمطبخ تتعلث بالقهوه والشاي...
سارت عايشه فوق وشافت شيخه راقده حبتها على خدها...وشلتها بهدوء وشلت شنطتها ونزلت بشوي شوي تحت عشان ما تنش...
ليلى اول ما شافتها ضغطت على عمرها اكبر عشان ما تصيح بس دموعها كانت اقوى منها...وبكل حراره انسابت دمعاتها حاره تكوي القلب...ما قدرت تتحمل ولا تقاوم هاللي ياخذونها جزء ما يتجزأ من عالمها..هذي اللي بقى لها من الدنيا وهذي فرحتها وهمها...ما قدرت ليلى تقرب ونشت امها ويلست حذالها وتمت ميوده ايدها....
شلت فاطمه شيخه بهدوء عشان ما تنش وابتسمت وسلمت عليهم وخلت شرملى تشل شنطتها.....
ام راشد: ما وصيج عليها يا بنتي...
فاطمه: لا تشغلين بالج يا خالتي بحطها في عيوني...
عايشه مبتسمه: وهالعشم فيكم غناتي..سلمي على الوالده...
فاطمه وهي تنزل نقابها : الله يسلمج الغاليه والله بعد هي تنشد عنكم...
وطلعت فاطمه..وعايشه ردت الصاله ويلست حذال ليلى من الجهه الثانيه..ولوت عليها...وانفجرت ليلى صياح ما قدرت تتحمل..وصيحتهم كلهم عليها مب على شيخه...وانفجرت شرملى صياح وام راشد تمت تصيح بنت ولدها وحال بنتها...اللي قطعت فوادها بالصياح...
كانت عايشه لاويه عليها من الخاطر وتمسح على شعرها وهي تشهق منتهيه من الصياح..قلبها متقطع...تحس بعمرها مختنقه..وكل شي حواليها غادي اسود..بس وين اللي يسمعها...

يلست عايشه تهديها بس ماشي فايده كانت محترقه من الصياح وترتجف من التعب والضيج..وسارت شرملى تييب لها ماي بس بعد ما هدت مول وام راشد تحاول فيها بس ما قدرت..ويتهن خلود ويلست وياهن ..وعايشه عقب نشت وخذت ليلى فوق حجرتها وخلود يابت الريوق وتريقت ويا ام راشد..
.....................
الساعه 9:30 كانت حصه متملله في المكتب وضايجه ومعصبه بعد..تبى تنزل عند مشاعل بس خايفه يشوفها حمد لانه منعها تسير لها..ويلست مكانها منقهره...
" يا ربي وين اسير الحين..الشيخ حمد مانعنا لا نسير على مشاعل ..والاخت ليلى محد ..وين اسير يعني..اروح للعاملات تحت احلى شي اسولف وياهن...ياهي حاله هذي...؟..زين ليش حمد يوم ما يباني ارمس حد ما يي يسولف عندي"
وابتسمت تضحك على عمرها بشو تفكر بس الحمدلله انها يالسه تفكر لروحها بدون محد يسمعها ولا جان راحت فيها....يلست متأففه ولا دقت شي ولا اشتغلت من الصبح وحست بضيج وملل فضيع...
"لحوول هذي مشاعل يوم حد يباها تييه ما تيي..وين منخشه هذي...؟"
رفعت سماعة المكتب ودقت عليها...
مشاعل: مرحبا..
حصه: وايد مصدقه عمرج اونه مرحبا...
مشاعل تضحك: بسم الله منج خرعتيني...
حصه: شحالج يا كتكوته..؟
مشاعل: بخير فديت عمرج ..(وتضحك)
حصه: اشوفج علقتي على الكلمه...
مشاعل: عاجبتني...
حصه: شو تسوين.؟
مشاعل: ولا شي انا خلصت من زمان بس باقي لي كم شغله خفيفه اخليها لبعدين..تامريني على شي؟
حصه: ملانه شو رايج تيين عندي؟
مشاعل: متهاوشه ويا ليلى ؟
حصه: ليلى غايبه تعالي واقولج كل شي...
بندت مشاعل عن حصه وسارت لها المكتب..
.
.
في مكتبه كان يالس يغني لروحه...ويخلص شغله وموده رايق على الاخر...يود تلفونه ودق الرقم وابتسم...
حمد: صباح الخير...
مهره: صباح الجوري..
حمد: شحالج؟
مهره: بخير وانتي شخبارج.؟
حمد: جييه حد قالج اني بنيه.....
مهره: اممم وشو بعد...
حمد: هيه يعني حد حذالج انا فاهم بس قصدي العوزج شوي....
مهره: انتي وين الحين ما بتيين الجامعه..؟
حمد:في الدوام...شو هالحشره اللي حذالج..؟
مهره: توه مخلص البريك ورادين الكلاس بسرعه ...
حمد: متى عندج بريك ثاني..؟
مهره: الساعه 12:25 البريك الجماعي...بتدقين؟
حمد: اوكي برايج الحين انتبهي عدل للاستاذ...
مهره: ان شاء الله...
بند حمد من عند هالبنت ورد يكمل شغله...حمد ضايع في داخله شي قوي يجبره يسوي اللي يسويه...هالبنت اللي اسمها مهره مب حبيبته ولا غناة الروح..وهي تعرف هالشي...مهره وحده من عشر يقضي حمد فيهن وقت فراغه..هي راضيه وهو راضي...على قولتها كل ما رمسها قالت له
"انت بس صديق لا اكثر.."
خلص حمد وحس بيوع ونش بيطلب له شي ياكله..وهو نازل خطف مكتب مشاعل بس ما لقاها..وعرف اكيد انها عند قوم ليلى وحصه..وسار بس ما دخل ودق الباب..
حصه: ادخل...
حمد: السلام عليكم..
حصه بإبتسامه كل فرح الكون فيها: وعليكم السلام..
حمد: شحالج حصه؟
حصه: بخير وانت؟
حمد: زين..
مشاعل: شلونك حمد؟
حمد: حنطاوي وانتي؟
تضحك مشاعل: يا خفة دمك...
حمد مبتسم: مب من شوي ترا ويانا كويتيه في الشركه لازم خفة الدم كلها هني...
مشاعل بخجل: الله يسلمك ما تقصر اخوي حمد...
كانت حصه تغلي تحترق تموت منقهره...في عيونها نظرة غضب تخلي حمد يتقطع يبتسم من الفرحه...يحس عمره طاووس...يطالعها بطرف عينه..وهي منقهره من الغزل الصريح بين مشاعل وحمد...
حمد: شو تسوين هني؟
مشاعل: اسولف ويا حصوه...
حمد: هيه ترا الشركه غاديه ميلس من سوالفكن...
مشاعل مبتسمه: ونحن نقول ديوانيه مو ميلس...
حمد: محد نشدج ندري من قبل تشوفين الدنيا...
ضحكت مشاعل...كان حتى لقسوة حمد نكهه ثانيه مستساغه عند كل البنات...رغم كل شي بس محد يروم يكرهه...حصه رغم كل الوان العذاب المباشره وغير المباشره بس ما تروم له....لكنه بجد اليوم حرق لها قلبها بسوالفه ويا مشاعل...طلع حمد وحصه هاللحظه حست عمرها خلاص مب متحمله مشاعل وخاطرها تصفعها لين ما تقول بس مع ان مالها خص في أي شي....بس الظاهر ان مشاعل كانت الطعم اللي حمد يصيد فيه افراحه من تعذيب حصه...نشت مشاعل واستأذنت بتروح تكمل شغلها...وتمت حصه في المكتب بتنفجر من القهر اللي فيها...
"شو هالحركات البايخه والله يا حمد بنشوف..."
وتمت مغيضه وما عرفت شو تسوي...ويلست مكانها وقررت تدق لليلى وتشوف شو فيها على الاقل ليلى بتفهمها ما بتحرق لها فوادها...
واتصلت بس كان تلفون ليلى مغلق..واستغربت منها هي ما تغلقه مول حتى الفير يكون مفتوح شو اللي مخليها تغلقه الحين الصبح..الا اكيد شي جايد وهو بعد اللي مخلنها تغيب وتتضيج البارحه...فكرت حصه شو ممكن يضيج بليلى غير ناصر وشيخه بس ما لقت شي لان ناصر يوم ياهن امس المكتب ما شاف ليلى مول وهي متضيجه من الصبح....بس ردت صورة مشاعل في عيون حصه...وخلتها تحرج وتكره عمرها...ونشت بتطلب لها شي تشربه....
......................
في دبي الساعه 11:00الضحى بدريه تحط شنطهم واغراضهم في السياره ويا البشكاره وتساعدها..وسلمى نزلت بدون أي شي الا لابسه عباتها ويلست في الصاله...وعبدالله يساعد بدريه وييب الاغراض من فوق...
عبدالله وهو نازل من الدري: سلامي غناتي اركبي السياره بنسير الحين...
نشت سلمى وركبت ورا...وعبدالله رد فوق ييب اللي باقي من اغراضه...وطلعت وراه بدريه...تييب تلفونها...
عبدالله: ما نسينا شي..؟؟
تضحك بدريه...
عبدالله: ليش تضحكين..؟
بدريه مبتسمه: ما بقينا شي في الفله (وردت تضحك)..واحنا رادين يوم اليمعه البيت حق شو كل هالعفسه...؟
عبدالله: نسيتي شو استوى بنا اخر مره رحنا..؟ رقدنا على الارض ولبست بيجاما من حجرة ذيابووه معفنه الله العالم من متى مب غاسلينها...ولا نسيتي يوم نشيت الصبح وما لقيت شي اغير فيه ثيابي...احسن شي نأمن يلستنا من الحين...
بدريه: لو سمحت لا تم تعايب..هذاك اليوم محد تفيج لنا كلهم كانوا تعبانين من العزيمه ومحد رتب لنا شي والصبح ما نشوا من وقت خل عنك البزا..
اصلا اهلك ما يقصرون كل مره ويانا وعشان قصروا وياك مره وحده بتاكلهم...؟
عبدالله: زين زين يالله تأخرنا انزلي...
ونزلوا كلهم الاثنين على الدري...
بدريه تضحك: اتخيل شكل عمي يوم يشوفنا حادرين البيت بمخداتنا ولحافاتنا وثيابنا والله بيتخبل..
عبدالله: عادي بقوله بدريه راغتني من البيت وييت عندكم..
بدريه تضحك من خاطرها: الحين قمت انا اللي اروغ؟ احيدكم اللي تروغونا هب نحن نروغكم...
ابتسم عبدالله: بدريه...
بدريه وهي تصك ليتات الصاله طالعين خلاص: هاه حبيبي..
عبدالله: فديت حسج بتوله عليج...
بدريه: ليش الاخ وين رايح...؟
عبدالله وهو طالع وياها ويصك باب الفله: يعني تعرفين يوم نسير بوظبي ما شوفج على راحتي واتم ويا الشباب..
بدريه تطالعه بطرف عينها: هيه هذي طريقة غير مباشره تخبرني فيها انك ما بتقر في البيت...
عبدالله ينزل من الدري صوب الموتر: تقريبا....
ركبت بدريه ورا حذال سلمى ما تبى تيلس جدام احتراما لها رغم ان بدريه الاكبر بس شافت انه من الذوق ما تخليها ورا بروحها...
عبدالله: ما شاء الله وانا الهندي مالكن يالس جدام بروحي...هيه تراني دريول..امحق سنه..
ضحكت سلمى..
بدريه: محد بياكلك بيلس عند سلامي...
عبدالله بصوت واطي ما تسمعه الا بدريه وسلمى: الحين بوقف وبيلس البشكاره حذالي..
بدريه: ودك عشان اطلعك انت وياها من السياره وارد انا وسلامي بوظبي لروحنا..
عبدالله يضحك: ان شاء الله هذا ويهي لو وصلتي قبل اسبوع...
بدريه: تعيبك سواقتي اشدراك انت...
عبدالله: هيه مبين..اللي تخاف تنزل في بيتها لتحت بروحها تروم تسوق ...لا تضحكيني..
بدريه مبتسمه: زين اخ عبدالله واللي يزعل عشان......ولا خلنا ساكتين احسن...
كان عبدالله وبدريه متعمدين يتحرشون في بعض عشان يغيرون مود سلمى اللي اكيد غصبا عنها بتضحك من سوالفهم واستهبالهم هم الاثنين...
ويلسوا يسولفون ويضحكون على سوالف عبدالله...كانت بدريه مسويه شندويتشات جبن ويايبه دلة شاي وياها...واكواب بلاستيكيه للدرب..
بدريه بحنان وهي تلف ورا: اندوج حبيبتي دونا كلي ما شفتج تريقتي...
وعطتها كوب شاي وسندويتشه....
سلمى مبتسمه: انتي الكل حبيبج حتى البشاكير..
بدريه: يا ويلج من الله مسكينه وحدانيه مالها حد الا الله واجب علينا نروف بحالها...
عبدالله: فديت الحنونه يا ربي اللي تتخبر عن البشاكير قبل ريلها...
بدريه: يالله يالبزا اللي فيك هي اول وانت وسلامي عقب مسكينه...
عبدالله: انا بفتح لي مشروع في دبي عباره عن تجميع وتلقيط كل المساكين وتكونين مديره عليه شو رايج..؟؟
بدريه:عن الطنازه...
عبدالله يطالع من الجامه: دونا...
دونا: نعم بابا..
عبدالله: انتهبي وانتي تاكلين لا تخيسين السيتات ولا تصبين الشاي عليهن..ويوم تخلصين حطيه في كيس فاضي..
دونا:ان شاء الله...
عبدالله يرمس بدريه: شو هالحرمه وين رايحين احنا يايبه كل هالمؤونه وياج..اللي يسمع بيقول سايرين السلع هب الا بوظبي ساعه ونص ونحن هناك ما فيج صبر..لازم تبرعاتج هذي واكلاتج اللي ما تخلص...يعني بيت اهلي ما فيه اكل...لازم تخيسون السياره..؟
سكتت بدريه وصبت شاي لسلمى وما ردت على عبدالله...اللي شغل الاف ام يتسمعون في برنامج حاطينه الضحى كل يوم....
....................
في مكتبه نش ناصر بيشوف ليلى هالمره وبيعتذر لها لو جدام حصه خلاص طفح الكيل وشوقه لعبه وعذبه والله ابتلاه فيه...ما يروم يوقف كل هالشوق اللي بخاطره واحسن شي يسويه انه يرضي قلبه لو على حساب عقله ونش من مكانه ونزل تحت...وتحمحم عسب ينتبهن...
حصه: ادخل..
ناصر: هلا حصه..
حصه: مرحبا استاذ..
ناصر وهو يطالع مكان ليلى: وين سارت ليلى..؟
حصه: ما داومت تعبانه...مدري شو فيها حتى مب طايعه ترمس...
اتفاجأ ناصر من رمسة حصه: ما قالت امس بتغيب..
حصه: والله انا بعد ما عرفت الا اليوم الصبح دقت وقالت لي لا امر لها...
ناصر: خير ان شاء الله مشكوره حصه..
حصه: العفو..

وطلع يجر اذيال الخيبه متضايق متكدر وصدره من الهم ممتلي...مب عارف وين يروح...حتى من لذيذ النوم محروم..وقرر بإيده ينهي حرمانه بس ما لقى اللي على ايدها نهاية كل الاوجاع...ورد مكتبه وكل هموم الكون على راسه....وسحب ورقه من على الطاوله وخربش بعض اللي في قلبه...

" لاتخفي الود في قلبك وتتبعني*** ولاتحرم العين من شوفك وابتسامتك*** زعلان ارضيك اعذرني وعاتبني*** قصرت اوفيك انا كلي لرضاتك*** طول غيابك وهجرانك يعذبني*** ياشين دنيا احرمتني من ملاقاتك*** شوف الوله من لذيذ النوم يسلبني*** ويحط لي في سكون الليل رسماتك*** "

ماقدر يكمل وقطع الورقه وفرها تحت المكتب ويلس يفكر ليش ما يت اليوم اكيد شي صار بهم...تم يفكر ويفكر واخيرا قرر..بعد طول صراع مع نفسه انه يمر عليهم اليوم ولو ان هالقرار كان شديد الصعوبه بالنسبه له بس بيسويه وعادي ابوه ما بيعرف ولو عرف ما يهمه اهم شي عنده راحة نفسه...
ابتسم ناصر ابتسامة رضا على قراره القوي في نظره ولكن الخطوه اليايه عليه هو هل يقدر يكمل ولا ما يقدر...؟؟.
......................
في فلة المرحوم بو راشد هدت ليلى شوي بس عيونها كانن منفخات من الصياح وجفونها متورمه..وخدودها متيمع فيهن كل الدم...منسدحه على شبريتها تطالع السقف بتعب...وعايشه حذالها تمسح على شعرها...ويوم حست انها هدت ظهرت عنها بتسير لامها شوي...
كانت ليلى بتموت من التعب وتحس قلبها محترق على اللي صار...هالبنت شو بيستوي بها؟ معقوله تين من كثر ما هي تصيح؟ كيف بتتقبل حد غير ليلى يهتم بها.؟
ملايين الاسئله كانت تدرو في راسها ومب قادره تركز في أي سؤال ولا تلاقي أي اجابه...صدق تعبانه من خاطرها...وحتى من تعبها مب رايمه تبطل عيونها ولا تشوف الضو في الحجره ..قلبها يدق بسرعه بسرعه..وانفاسها متلخبطه..وتفكيرها يوديها وييبها...من وين تبتدي في هالضياع اللي هي فيه..؟؟
نشت بصعوبه من مكانها ويلست على الشبريه وحست عمرها دايخه من الصداع العنيف اللي فيها....وردت تنسدح..مب رايمه تفتح عيونها مول..تحس بفوادها محترق وصداع ما يخليها حتى تتنفس عدل...وضحكات شيخه تتردد في بالها وصوتها ورمستها..وعيونها البريئه وكل شي فيها...
.
.
في الصاله اللي تحت كانت ام راشد يالسه ويا عايشه وخلود يسولفن..وعقب نشت خلود عنهن..
خلود: انا بسير البيت اشوف البشكاره شو مسويه من غدا وبييكن العصر...
عايشه: الله وياج ام حمدان..
ام راشد: مع السلامه بنتي..
وطلعت عنهن وام راشد تكلم عايشه..
ام راشد: شحالها الحين.؟
عايشه: الحمدلله سكتت بس مدري احس بها ضايجه وايد...ما كان له داعي ياخذونها هالفتره لو صبروا شوي لين ما تسير المدرسه..
سكتت ام راشد ونشت بصعوبه وسارت حجرتها وخلت عايشه في الصاله...ودقت لريلها ورمسته وتخبرته عن اليهال وعقب بندت..
كانت متملله مب عارفه شو تسوي..حست انها نحسه من اول ما يت والبيت كله مشاكل..تتحرا انها فال شر عليهم...وسارت تتمشى في الصاله والحجر وخطفت على كل الصور المعلقه وشافت صورهم وخبالهم وهم يهال...وابتسمت ويتها فكره جنونيه رغم هدوءها واتزانها بس فكرت شوي وسارت على طول صوب التلفون...واتصلت...تم يدق شوي بس محد رد..وبندت وردت تدق...
عايشه بهمس: السلام عليكم..
ام ناصر: وعليكم السلام...
عايشه: عمووه.؟
ام ناصر مستغربه: منو انت.؟
عايشه: امممم خمني..
ام ناصر: وشهو؟
عايشه تضحك: شحالج عمتي حبيبتي...؟
ام ناصر: بخير وسهاله من انتي؟
عايشه: بنت واحد يقولون انه اخوج...الله يرحمه توفى وكان عنده بنتين وثلاث اولاد واحد منهم خذ الله روحه قبل ابوه...
ام ناصر مبتسمه وتيمعن الدموع في عيونها: فديت روحج يا غناتي..فديت اهلج كلهم..شحالج وشحال الوالده واخوانج وليلى...
عايشه وقلبها يدق بسرعه: بخير وسهاله يا عيون عايشه...افا يا عمتي ايي بوظبي ولا تدرين عني...؟
ام ناصر وهي تمسح دموعها: فديتج يالغاليه وانا وش اللي بيعرفني..؟ شحاله بو هزاع واليهال ..؟
عايشه: بخير والله ..طمنيني عليج وعلى فهودي ونصور...
تضحك ام ناصر: هذاك اول نصور وفهود..الحين لو يسمعونج بيحرجون عليج...
عايشه: ما عليج منهم كلهم يهال...
ام ناصر: بخير يسرج حالهم علني افداج يا بنتي...والله ردت لي الروح من سمعت حسج...
عايشه: ولو عمتي تؤبري ألبي..ما عندنا الا عمه وحده تدلل كيف ما بدا...
ام ناصر عاقده حياتها: والله ما فهمت شي شو تقولين.؟
عايشه مبتسمه: لا غناتي بس كنت ارمسج لبناني..
ام ناصر: والله انا ما افهم شي غير رمستنا اما رمسة البي سي ما اعرفلها..
عايشه: عشتوا وتعرفين ال بي سي بعد...ثرج مب هينه...وبعدين اسمها ال بي سي..هب البي سي..شو بي سي انتي بعد...؟
ام ناصر: وانتي ما تيوزين عن خبالج..قلنا عرست وبتعقل..ثرج مثل ما انتي ما تتغيرين...على حطة غطاج...
عايشه: تراني اصيله ما تغير مول...
وتمت عايشه تسولف ويا عمتها شوي وعقب بندت عنها لان الظهر اذن وكان لازم تسير تصلي...
....................
عقب الساعه 2:00 يلست عفرا في الكلاس ما تحركت كانت وايد ضايجه ومب عارفه تشتكي همها لمن..تتمنى لو كانت عندها ربيعه تروم تثق فيها..بس مشكلتها انها تفكر الكل مب من مستواها وما تحب تدخل في أي تجربه ويا أي انسانه لانها تخاف من الفشل...
كل الطلاب طلعوا شوي برا الكلاس لين ما توصل المس وتأخرت وايد عليهم...طلعت عفرا كتابها ويلست تجلب فيه واخر شي نشت ووقفت حذال الباب...وتطالع برا بصمت وقلبها محترق...خلاص راحت وقالت للاداره انها ما تبى البعثه وما خبرتهم ان اهلها رفضوا عشان تبين ان عقليتهم مختلفه ولا تبى تحط اهلها ونفسها في موقف محرج..ولها اسباب ما حبت تذكر للاداره في الاخير ان اهلها لهم باع وذراع في اللي صار....
حمدان يقطع الصمت مبتسم: شو فيج؟
عفرا وهي تجمع شتات افكارها بعد ما بعثرها حمدان مثل اللي يبعثر قطع الدراهم في مكان هادي وينتبه له كل الموجودين بعدما يحدث الضجيج..
او مثل اللي يلمس ورق الورد وهو مبتل بالندى ويتبعثر من عليه...
عفرا: ولا شي...ليش تسأل؟
حمدان : ولا شي بس شكلج ضايجه وحبيت اسألج لو عادي...
عفرا بنظره بارده: اكيد مب عادي...
حمدان وهو يطالع المبنى الثاني: عيل سوري...
عفرا: اوكي قبلت اعتذارك..
حمدان مبتسم: ما بقى شي على الامتحانات غير اسبوعين...
عفرا بثقه: نحن لها...
حمدان مستغرب: نحن؟؟ انتي بس انا مب لها ..هي علي...
عفرا وهي حاطه ايديها ورا ظهرها ومتسنده على اليدار: ما بتنجح لو تميت جي..كن قد التحدي...واقبله..انت ريال مفروض كل الصعاب تذوب جدام قوة تحديك...
على طول بدون تفكير مر هالكلام مثل نسمة هوا بارده في جو حارق ..مثل كفوف بارده تنحط على خد دافي..او بالاحرى مثل سحابة صيف مرت وبردت المكان في صيف حار......
ابتسم حمدان لحظتها ويت مريامي بنت عمه على باله...وتذكر رمستها في العزبه...
عفرا وهي ما تطالعه وتشوف اللي في الساحه: هاه شو قلت..؟
حمدان بثقه: اوكي انا لها...
عفرا بثقه اكبر: كلنا لها مب انته بس لا تنسى..
ابتسم حمدان على عفوية عفرا: زين عفرا اقول..؟
عفرا: شو..؟
وقبل يرمس حمدان كان طارق ياي من بعيد يركض...ودخل الكلاس بسرعه...ودخلت عفرا خايفه هي وحمدان مع انهم ما يدرون شو السالفه..
طارق وهو يتنفس بصعوبه: اخ كنت بموت....
حمدان: شو مستوي بك.؟
طارق ينافخ ومب قادر يجمع انفاسه: سرت مبنى بنات اول ثانوي وكانت بتزخني المشرفه وييت اركض وهي تلحقني..بس زين ما شافت ويهي...
ضحك حمدان: دواك ياللي ما تستحي...
احتقرت عفرا طارق وطالعته بنظره من فوق لتحت....وهو انقهر من نظراتها بس طنش يدري بها ما تداني حد...ويلسوا في الكلاس كلهم يستهبلون ويدرسون ومحد ياهم والظاهر ان المس نست سالفة الكلاس...
عفرا من عقب الملل نشت..ومحد يدري وين سارت..وهم كلهم يسولفون واللي يقول نكت واللي يسب في الاساتذه واللي ما يعرف شو يسوي...واللي مازر السبوره شخابيط...وشوي وتدخل عليهم المس وهي تنافخ شكلها يايه تركض..
طارق: الله يخسها هذي شو يايبنها.؟ تحريتها نست...
وفي هاللحظه دشت عفرا وما قالت لها المس شي لانها تأخرت او دخلت بعدها....
ويلسوا كلهم...
المس محرجه:
Why didn't u tell me that u had a class at 2:00.? did u forget that this is your last year and all u need is more time to study and work, what did u get when u wasted ur time?
ريهام تتحرطم: هاللي ناقص بعد نقولج تعالي درسينا..ما صدقنا افتكينا منج...وشفنا حصة فراغ ..تبينا نقولج بعد..
طارق: هيه والله هاللي ناقص...
حمدان ساكت ما رمس..وعفرا تطالع المس وهي ساكته بعد...

المس: anyways thank you Afra for comming to my office and telling me about the class timing, you are the only student who really cares about her studies.
. الكل في هاللحظه طالعوا عفرا بحقد...لانها سارت تزقر المس للكلاس ونها ملت من اليلسه بدون دراسه وسارت لها عشان ما تضيع وقتها على الفاضي...
ريهام بهمس: بل عليج من بنيه...صج اكلة كتب..!!!
طارق بقهر: والله لو ما السنه مخلصه ولا جان قلت حق ابويه ينقلني من هالكلاس...اففف من بعض الاوادم...
طنشت عفرا وبطلت كتابها وتابعوا كلهم غصب ويا المس اللي بدت تشرح على اخر الوقت...
.....................
بطلت عيونها الوساع بكسل وتثاوبت ببراءه..وتحسست حذالها ويلست على الشبريه...وشافت شي غريب..مكان مب مكانها وبقعه مب بقعتها..وشبريه مب شبريتها..وغرفه مختلفه تماما عن اللي تنش كل يوم فيها...طالعت بغرابه..وبطلت عيونها على الاخير بحركتها المعتاده..وبدت تعصب ومدت بوزها وانترسن عيونها دموع...وفجأه بعد هالمقدمه الاستكشافيه يوم نشت..انطلق صوتها مدوي كالمدفعيه في الحجره...والبيت واركانه كلها...
بيت سعيد بن مطر اللي ينسمع فيه دبيب النمل من هدوءه ..فجرت سكونه شيخه بصراخها...وما طاعت تسكت مول...
وتبطل باب الحجره ودشت فاطمه اللي اول ما شافتها شلتها ولوت عليها...بس شيخه يتها الصدمه الثانيه...منو هذي اللي تتجرأ وتشلني غير امي وانا اصيح؟وين انا..؟ وهذا بيت منو؟ وين امي؟ وشرملى..؟ وشبريتي ؟ وحجرتنا انا وماما.؟وين عرايسي ومسبحهم؟ هذا مب شكل حجرتنا؟
كل هذي اسئله لو كانت شيخه ترمس كانت بتقولها...بس استمر صياحها...ونش احمد من رقاده ودخل الحجره..
احمد: بل عليها خبقت طبلة اذني..حتى الناس اللي كنت اشوفهم في الحلم زاغوا وشردوا من حسها...

فاطمه: يا هالوهقه شو بيسكتها هذي....؟
احمد: نزليها عند امي..
فاطمه: هيه بالمره عشان تفرها في الحوي..امي ما تتحمل أي ازعاج...
وشيخه تصيح وتصيح وتصارخ ولفت ويهها وهي فوق فاطمه واول ما شافت احمد زاد صياحها...ما تتحمل مول تشوف رياييل.... تكرههم كره العمى من كثر ما تكره عمها راشد ما تطيق تشوف أي ذكر...وترافس وفاطمه شالتنها وتصيح وتتحرطم...
احمد وهو حاط ايديه على اذنيه ويصارخ: سكتيها شو هالونّان...بوديها وياي الملعب تصارخ وتشجع ...هذي تتحدى كل الجماهير العيناويه بصوتها...
فاطمه: والله انك متفيج...احمد ساعدني شو اسوي...(وصرخت فاطمه)..
لان شيخه سحبت شعرها..وتمت تصيح بصوت اكبر واعلى .....
احمد قرب منها: حياتي تعالي بنروح نشتري حلاوه...
شيخه: ماليدث ماليدث..
ابتسم احمد بفرح: الله رمستني يا سلام والله ان هالبنت تحفه..بس شو قالت..؟
فاطمه وهي تعطيها احمد: اندوك تفاهم وياها...بسير اسوي لها شي تاكله...
احمد يلس على الارض ويا شيخه اللي ما رضت تسكت...وحاول فيها وما طاعت مول..وطيحت عمرها وهي يالسه على راسها بالعمد وضرب بقوه في الارضيه وبطلت عيونها على الاخير وسكتت بعد الضربه القويه على راسها...ثواني وانفجرت صياح توها انتبهت انه يعور..وصاحت بقوه وبصوت اعلى...
شيخه: وين ماما...اليد امي...
احمد: يعني شو اسوي اسير اطلعها من القبر مثلاً؟
شيخه: اليد...اليد...اليد..
احمد يقرب ويهه منها: شو تريدين.؟
شيخه تصارخ وتمد ايدها بتضربه على ويهه: اليد اليد..
احمد يبعد شوي عنها: اوكي تريدين..شو هو اللي تريدينه.؟
شيخه بصوت اعلى وصياح اقوى: اليد اليد..
احمد بضيج: بتنفجر مرارتي ارمسي شو تريدين بسويه...اسوي لج ملاهي..ولا اصنع لج مركبه فضائيه...شو اللي تبينه بسويه بس اسكتي وقصري حسج..والله ان صراخج بييب لي مرض خبيث في راسي...
شيخه تضرب بريولها على الارض وتتجلب يمين ويسار: اليد اليد...
احمد بعصبيه: زين يالدبه شو تبين..طفرتي اهلي تراج...
شيخه بصراخ: اليد اليد...اليد....اليد..
احمد ماسك راسه: شو اللي تريدينه بسويه..شو اليد هذي بعد....
شيخه وهي تتنفس وتشهق بصعوبه: اليد اليد...
احمد وهو يطلع: يلعن يومه اللي ييلس وياج..
ويوم كان احمد طالع شيخه انصدمت انها في الحجره بتم لروحها..ونشت بصعوبه وركضت ورا احمد وتعلقت في ريوله...
احمد هالمره تخدر وحس انه بيموت من الفرح..وتيمع كل حنان الكون فيه..وكسرت خاطره هاليتيمه اللي محد لها الا ربها في هالكون...
وشلها بسرعه ولوى عليها..وباسها على خدها وسكتت..وسار حجرته...ويلس على الشبريه..وهي يالسه فوق ريوله..وحاطه راسها على كتفه وتشاهق عقب الصياح...
احمد: خلاص يا عيوني يا عمري بس فديت روحج...
شيخه ساكته بس تشهق وتيمع انفاسها....وشوي وتدخل فاطمه مصدومه من اللي تشوفه..
فاطمه ماسكه حليب شيخه: شو سويت فيها؟ وشو هاللي اشوفه.؟
احمد وهو ينفخ نفسه ويطالع بفخر: قلت لج بروضها وروضتها.
فاطمه: وليش وين نحن في السيرك؟
احمد: لا نحن في البيت..الا شو رايج فيني؟
فاطمه: تعالي حياتي عندي...
شيخه: لوحي ماليدث..لوحي.
احمد: ويييييو راغوها..يالله لوحي يا لوح نحن ما نليدث...صح شواخي...
شيخه ساكته ولاويه على احمد بقوه...
فاطمه تغريها: تعالي بعطيج الحليب...
احمد: ييبي انا بعطيها...
وعطته فاطمه الحليب وطلعت وسدحها على ريوله وعطاها حليبها وتمت تطالعه وهو يشوف خدودها مثل بقعه كلها دم من احمرارها وعيونها منترسه دموع..ورموشها مبتله منها...وفي عيونها نظرة حزن فضيعه...كان يطالعها بحنان ويمسح على شعرها...ويشوف فيها سعاد..اللي هي امها ما خلت شي منها ما شابهتها فيه...
شيخه بعد ما خلصت حليبها مدت ايدها لاحمد يشل مرضاعتها: الحم الله..(الحمدلله)..
كانت ليلى معلمه شيخه اذا خلصت اكلها تقول الحمدلله...
ابتسم احمد ويلسها ولوى عليها: فديت روحج..والله يبارك في اللي علمج...
شيخه ماده بوزها: وين ماما؟
احمد يغير السالفه: نروح الدكان نييب حلاوه كبيره( ويفتح ايدينه على اخر شي)..كبيره هالكثر حقج انتي بروحج...؟
شيخه ابتسمت اخيرا: مالي انا بث.؟
احمد: هيه انتي بث...
شيخه: اتي مالوحين.؟
احمد ما يدري شو تقول بس فهم انها قالت انتي: زين حياتي مادري شو تقولين بس انا ريال مب بنيه تقولين لي انتي...
شيخه: اتي ما لوحين.؟
احمد: والله ما اعرف شو تقولين...بس بقولج لا لا انا مالوحين...شو هالكلمه يا ربي...
شيخه عصبت: ليث اتي مالوحين..ليث...
احمد : لا لا خلاص انا ايوه بسوي اللي تبين بس الله يخليج لا تبدين لي شغل المطافي...يالله نشي يا دبووه بنسير...
ونش احمد يتلبس مع ان الساعه 3:30 الظهر...وركبها وياه الموتر وساروا الجمعيه اللي قريب من بيتهم...وخلاها تشتري كل اللي في خاطرها وشكلها ما خلت شي ما خذته...وما زعلت عمرها مول....بس شكلها بدت تتعود عليه...!!! من يدري.؟
......................
الساعه خمس العصر كانوا كلهم ناشين من الرقاد...ويالسين في الصاله..عبدالله وحصه وسلمى وخليفه وساره..ويتناقشون في سالفة سلمى اللي مب طايعه ترمس...
خليفه: ولين متى بتمين صاخه ولا ترمسين..؟
ساره: حبيبتي سلامي قولي شو فيج يمكن حد من اخوانج يروم يساعدج.
سلمى تتنهد: ما برمس لين ما اشوف ابويه...
خليفه: ابويه ما بيرد الا يوم اليمعه ..سار المزرعه هو وامي...وتدرين به ما يرضى ييلس اقل من يومين...
عبدالله: خلاص سلامي تقبلي الوضع انج نحسه وارمسي ويانا عادي ما بنخبر حد..ولو تبيني اطلع بدريه الفتانه بطلعها..
بدريه: فتانه في عينك..
خليفه يرمس عبدالله وبدريه: زين يهالوه سكتوا شوي بنرمس الحرمه شو فيها...
عبدالله: والله اهانوني...افا ما يطيع زينك يا بو عفرا...
بدريه: تستاهل..
سلمى: غيروا السالفه بصراحه انا مليت..
ساره: خلوها ع راحتها بترمس يوم تحس عمرها محتايه ترمس...
ونش خليفه: انا طالع ميلس بن حميد..بتيي وياي عبدالله..
عبدالله يتأفف: لا لا ما حبه سير انت بروحك...
ابتسمت بدريه وفي خاطرها"الحمدلله ما راح"..
ساره: عيل انا بخليكم بسير اشوف بناتي ردن من المدرسه ولا بجهز لهن شي ياكلنه...
بدريه: ايي اساعدج..؟
عبدالله بهمس: بدينا..؟
ساره: لا فديتج ماله داعي..
وطلعت ساره وسلمى سارت فوق..
بدريه:انت ما تعرف تسكت.؟
عبدالله: والله انا حابس عمري هني عشانج وانتي تبين تسيرين فلتهم..
بدريه: وشو فيها يعني..تولهت على بنات خليفه...
عبدالله: ايوه..شي طيب..انتي تولهي على البنات واعطفي على البشاكير وحلي مشاكل الحريم الزوجيه..وانا بكون اخر اهتماماتج..دومج جي تخليني اخر شي..
بدريه مبتسمه: والله اللي اذكره من تاريخ بيت عمي العريق..ان سمر وذياب اخر العنقود ..من وين يايب انت هالبزا مادري..ماحيد عمي مدلعنك..
عبدالله: تراني فاقد حنان...
بدريه: زين شسوي لك..؟
عبدالله: والله انج تغيرتي وايد..لسانج طول..وانا مب مرتاح جي..
بدريه مستغربه من جدية عبدالله:شفيك انت؟
عبدالله: مدري اللي سمعتيه..
نشت بدريه ويلست حذاله وحطت راسها على كتفه: حياتي شو تقول انت؟تعرف ان مالي غيرك وما روم على زعلك..حد يزعل من قلبه وروحه..اذا لقيت حد يزعل من قلبه انا بعد ما بزعل منك...
عبدالله: هيه ادهني سيري بكلمتين...
بدريه: افا ومن متى وهاه اسلوبي.؟
عبدالله: امزح يا عمري خلاص..بس ابى شي.؟
بدريه: شو ؟
عبدالله: ابى اسهر عند الشباب اليوم..عادي ولا عندج مانع؟
بدريه مبتسمه: اسهر عندهم...ما بترياك وبرقد..بس رد قبل الساعه 2:00 اوكي.؟
عبدالله وهو ينش: ان شاء الله بحاول...
بدريه: اصبر شوي بدخنك..عشان ما يقولون ياي من دبي ومب متدخن..ولا حرمتك ما فيها خير..
عبدالله: هه خلي حد يرمس والله لا امشي عليه بالسياره عشر مرات واخليه يغدي تراب...
بدريه:فديت اللي يدافع عني...
ويابت الدخون ويلست تدخنه...وطلع عنها وسار ويا ربعه اللي في بوظبي..

في الحجره اللي فوق كانن سمر وحصه راقدات...مرت عليهن سلمى بتبطل الباب بس لقته مبند..وسارت حجرتها...وفي حجرتهن حست سمر ان حد بطل الباب وطلع..ونشت من مكانها ويلست على الشبريه...وشغلت الليت وسارت صوب حصه...
سمر وهي تهزها: حصه نشي يالله...
حصه بكسل: كم الساعه؟
سمر: مادري يمكن 5:00
حصه يلست: شو تسوين انتي هني؟
سمر: توني ناشه يالله قومي بننزل...
حصه: ليش ننزل اهلي محد انا بتم هني...
سمر مبتسمه وبدلع: لاء قوم عبدالله خويه هني...وسلامي ختيه بعد..
حصه نشت بسرعه من على الشبريه:قولي والله..
سمر: والله العظيم...
بدلت حصه بسرعه وسحت شعرها...وفتحت الباب...
سمر: ما صليتي العصر...!!!
ردت حصه مستحيه : اووه نسيت والله..
سمر: زين انا ذكرتج بالصلاه..لا تنسين اللي وعدتيني..
حصه: شو؟
سمر: الهديه..هذول قوم عبادي يوا..يعني بتشترين اللي قلتي لي حق المس..
حصه مبتسمه: ان شاء الله بنروح باجر العصر انا وانتي كارفور واشتري اللي تبين..
سمر: تعيش اروع اخت في البشريه..
ضحكت حصه ودخلت تتيدد عشان تصلي...وبعد ما طلعت دشت سمر وصلن العصر مع بعض...ونزلن تحت بس ما لقن حد في الصاله..
حصه: تقصين علي حضرتج؟
سمر: والله العظيم ان جينا قالت لي..
حصه: جينا هذي ما فيها مخ شراتج...والله يا سمر اذا محد طلع هني انا اللي بخلي المس تشتري لج هديه في المستشفى وانتي متكسره من الضرب...
سمر تضحك: والله انهم هني...
حصه: عيل كيف اختفوا ممكن تفسريلي..؟
سمر: بقولج نكته لين ما نلاقيهم..
حصه: جب مب متفيجه لشي ممكن تسكتين..
سمر: بقولج نكته والله انها فنانه...احلى نكته سمعتها..
حصه: لحوول كل شي فنان ما شي عندج نكته بايخه..
سمر: سمعي واحكمي بنفسج...
حصه: قولي..
سمر: ولد راح مع ابوه البخيل الدكان قال: ابويه انا احب الكت كات...قاله ابوه: زين يا ولدي حبه ورجعه مكانه..

حصه ببرود:زين وين بدريه؟
سمر: شو ما عيبتج؟
حصه: وينهم وينهم لا تطفريني..
وركضت سمر لجامات الصاله توايج من ورا الستاير تشوف اذا حد في حديقة البيت...
سمر: هذي بدريه توقعت انها تكون ويا البشاكير ...يالسه وياهن في الحديقه..
ابتسمت حصه وراحن لها كلهن يسلمن عليها...ويلسن وياها في الزراعه..
..................
الساعه 6:00 المغرب..كان حمدان منسدح على الشبريه في حجرته توه راد ويا اخته من نص ساعه...يفكر في اشياء وايده صارت اليوم وتصير بين فتره وفتره....ودقت سلامه الباب...
حمدان: تعالي سلامي..
سلامه: كيف عرفت انه انا...؟
حمدان يبتسم بسخريه: وليش منو بيدق علي..اصلا محد يسكن في هالبيت الا انا وانتي..
سلامه تستهبل: وامي وابويه؟
حمدان: قولي والله عندج ام وابو؟
سلامه تمت تستهبل: هيه يرقدون في الحجر ويانا فوق بس ما نشوفهم...
حمدان: الله اكيد لابسين طاقية الاخفاء...
سلامه: يمكن..
حمدان: ويمكن نحن نشوفهم بس هم ما يشوفونا..
سلامه: جي بنطلع نحن اللي لابسين الطاقيه مب هم...
حمدان يلس: يكفي استهبال..شو تبين؟
سلامه: ولا شي ملانه طفرانه..احس بتعب ابى اروح المدرسه..ماريد الاجازه تبدا..
حمدان: ليش.؟ من متى هالحب..ولا يكون وراج شي.
سلامه بثقه: مثل شو يعني...تتحراني عاشقه لي واحد واسير له كل يوم..
حمدان: ودج عشان اقطعج مليون قطعه...
سلامه: ضحكتني انا سلامه بنت راشد مب مال هالحركات..محشومه طال عمرك..
حمدان: زين تعالي نروح بيت يدي..
سلامه: لا استريح ما نبى نسير...عندهم عزا..
بطل حمدان عيونه: عزا شو؟
سلامه: محد مات بس عمتي ليلى..مب في وضع طبيعي.
حمدان : انتي شو تخرفين.؟
سلامه: شواخي الدبه خذوها قوم سعيد بن مطر..
حمدان: حرام لا تقولين...
سلامه: يالمتأثر شو ياك..؟
حمدان: ما احاتي شواخي..عمتي فديت روحها اكيد ميته من الضيج...
ونش حمدان وتلبس وبيطلع..
سلامه: وين رايح..؟
حمدان: اكيد بسير لها...طول عمرها تضحي عشاني بكل شي..وهي امي وابوي ما تبيني اسير لها وقت ضيجها...مب سنه هذي..ولا هو بمذهبي...
سلامه ابتسمت: انا بعد بيي وياك...
حمدان: يالله نسير لها...
ونزلوا تحت كلهم وساروا فلة يدهم راشد...وشافوا عمتهم عايشه في الصاله ويا امهم ويدتهم...وسلموا عليهن كلهن...واضطروا ييلسون في الصاله عشان عايشه...
حمدان ضايج: وين عمتي..؟
سلامه تأشر له ان عيب لازم ييلس..
عايشه تسولف: افا وانا مالي جيمه...
ام حمدان: ما عليج منهم اليهال جي..اصلا نحن ما ينشدون عنا كثر ما ينشدون عن عمتهم ليلى...
سلامه في خاطرها"عدال انتي اللي مقطعه عمرج بالسؤال"
سلامه: امايه قوم عمي مبارك ما بيوون اليوم.؟
خلود: لا والله ما بيوون دقت لي عمتج شمسه وقالت ما بيوون هني قبل ما تخلص الامتحانات عليكم..وعلى حمدان...
سلامه: احسن...
عايشه مستغربه: ليش احسن..؟
نش حمدان لانه مب متفيج لسوالفهن...ولحقته سلامه على طول قبل ترد على عمتها....
دقوا عليها الباب بس ما رضت تبطله ...
حمدان: عمتي بطلي الباب انا حمدان برمسج شوي وبظهر والله ..
سلامه: ما بنغثج بس دقايق ارجوج عمتي...
حمدان: اذا ما تبين سلامه تدش عادي بس انا شوي وبظهر..
سلامه: يا سلام ع كيفك هو..عمتي انا بنت افتحي الباب وهو ولد ما يدش..
حمدان: كانت فكرتي نيي هني انتي ما طعتي..
سلامه: تراها عمتي بعد مب بس انت...
حمدان: عمتي فديتج بطلي الباب...
ونشت ليلى من داخل وبطلته وابتسمت يوم شافتهم....سلموا عليها..وسلامه تمت لاويه عليها بقوه وما طاعت تخليها...
سلامه: عمتي ولهت عليج..
حمدان: زين ممكن تخلينها شوي تيلس بنسولف لها...
ليلى مبتسمه وعيونها متورمه من الصياح: سلامي خليني بيلس يالدلوعه...
ويلسوا كلهم على شبريتها...وسلامه حطت راسها على ريول ليلى بدلع..ويلست ليلى تتعبث بشعرها..
حمدان متأفف: طلعيها الله يخليج تييب لي المرض..
ليلى: حرام عليك ياهل...
حمدان: شو ياهل..باقي سنه وتكمل دراستها وتكون جامعيه..
سلامه: لين ما تيي السنه بعدني طفله..ابى استمتع بطفولتي...
ليلى: شخباركم وشو مسوين.؟ حمداني اخبار الدراسه.؟
حمدان: للحين اوكي بس الاهم اللي عقب اسبوعين..
ليلى: يالله شد حيلك انت لها...
ابتسم حمدان: كلنا لها..مب بس انا...
يت عفرا على بال حمدان..وابتسم من خاطره..نفس الجمله اللي قالتها عمته كان سامعنها اليوم من عفرا..ويلسوا ويا ليلى يسولفون ويضحكون..وغيروا لها شوي مزاجها من عقب الضيج اللي كان مسيطر عليها...


الساعه 7:15 متعطر ومتبخر ومتلبس ونازل تحت ويلس في الصاله...وشاف اخوه يالس يطالع التلفزيون...ويا امه..
ناصر: على وين اخ فهد؟
فهد: ولا أي مكان بيلس هني..
ناصر: وليش كل هالكشخه...؟
فهد: شباب لازم اكشخ..احب نفسي ياخي شو اسوي؟
ام ناصر: والله لا كشخه ع قولتك ولا شي..هذي الا بطره فيك..
ناصر: سمعت اللي انا سمعته...
طالعت ام ناصر ولدها بنظره مستغربه..شو اللي ممكن يكون سمعه..
فهد ييلس على الكنبه: شو سمعت؟ انا ما سمعت شي؟
ام ناصر: وشهو اللي سمعت يا ناصر.؟
ناصر: في ناس اليوم في بوظبي واتصلوا علينا وفي واحد هني ويانا في الحجره رمسهم بس ما خبرنا...
فهد: منو ياي بوظبي؟
ام ناصر: صج انك ما تستحي ولا تخيل..عيب عليك هالرمسه يا ناصر.
ناصر: وشو قلت انا الحين...اخبره ..
فهد: لعوزتوني شو مستوي؟
ناصر: الحب الجديم في بوظبي..
فهد ابتسم ابتسامه عريضه من قلبه: والله...!!!!!
ام ناصر: وليش مستانس شو بتسوي ان شاء الله...يا فهد استح على ويهك..
فهد: بعدني يالس عندج ما سويت شي.
ناصر: وليش شو ناوي تسوي؟
فهد: ازور بيت خالي حبيبي الله يرحمه واشوف بناته واسلم عليهم..وعياله بعد..صلة الرحم وصانا عليها الرسول..
ناصر: هيه ما تذكر غير هذي من وصايا الرسول..والباقي ناسنه..
ام ناصر: والله يا فهد ان سرت هناك لا انت ولدي ولا اعرفك....
فهد محرج: شو فيج انتي...ليش جي عقليتكم...ابويه ما بيعرف عند حرمته الثانيه ما يدري بشي عنكم..خلونا في حالنا ما صارت حاله هذي...
ونش فهد محرج وطلع عنهم...وناصر تم يالس ويا امه عقب استأذن منها وتلبس وسار عند ربعه...
.
.
وحده ورا الثانيه يتدافعون بقوه..الاقوى فيهم اللي تضرب اقوى..واللي ترتفع اكثر...كان صوتهم مرتفع وهم يتبادلون الادوار...والظلام مخيم على المكان..وتلاطمهن يشق سكون الليل...وكان يالس هناك عندهن يفكر في اللي ابعد من مدى نظره..وهو يشوفهن يتصارعن جدامه يكسرن صخور الشاطئ..تنهد فهد من قلبه وهو يشوف الامواج كل موجه تدفع الثانيه نحو الصخور..بشكل عنيف..ويطالع لبعيد بدون هدف...
نش بهدوء وركب سيارته ومشى على غير هدى...وما حس بعمره الا واقف جدام بيت خاله المرحوم ناصر...
ابتسم من قلبه...يا كم لعب في هالشارع..وكم طاح وتعثر وابتسم وركض ..وعاش حياته كلها قريب من هالبيت وفي ربوعه..
واللي خلى ابتسامته تنفرج عنها زاويه اكبر...يوم تذكر لعبه ويا الاولاد كوره في هالشارع..قبل 13 سنه وعمره 15 كان عقب صلاة المغرب يدخل بيت خاله بسرعه ويلاقي عايشه يايبه له كوب ماي تستقبله فيه...رغم انه صغير بس يحبها..وهي تنظر له نظره طفوليه تقهره...يندس في الزراعه عشان خاله ما يضربه ويا راشد ومبارك وسيف يوم ما يسيرون يصلون وهم صغار في المسيد..وكانت عايشه تشرده من ورا وتشهد وياه انها شافته يصلي بس عشان لا ينضرب..
كان فهد يفسر تصرفاتها على انها حب...بس عايشه كانت تتصرف بعفويه وما يهون عليها تشوفه ينضرب ولو ان ضرب ابوها كان خفيف وتأديبي...
ابتسم بعدها فهد وتنهد..وشاف عمره واقف وطول وقوفه..ونزل ودق الجرس...وتريا..ويت البشكاره تبطل له الباب..
تاما: من يريد.؟
فهد: ماما عايشه هني.؟
تاما: ايوه في موجود..تريد اناديها..؟
فهد: هيه يالله..
تاما: من انته؟
فهد: قولي لها تعالي وبس..هي تعرف..
وسارت البشكاره..وابطت شوي عايشه داخل..وفهد حس باحراج ورد بسرعه موتره وروح....
طلعت عايشه بس ما حصلت حد ..واستغربت...وعقب تفكير طويل ما شكت للحظه يكون اللي برا غير فهد..وابتسمت منه وعليه..
مول ما يتخلى عن مراهقته..وحركاته الشيطانيه...ضحكت وردت على طول داخل وهي مبتسمه..بس ما قالت لحد أي شي..
كان راقد وتلفونه يدق ويدق وهو مطنش..يدوره يمين ويسار بس ما لقاه..واخر شي مسكه ورد عليه بكسل وضيج..
حمد: الوو..
بدريه: صح النوم يا كسول..وينك ؟
حمد: بدريه الحشره شو تبين..؟
بدريه: تعال عندنا..
حمد: متفيج لج انا..
بدريه: الله يخليك..
حمد: امس كنت عندج شو تبين تتحريني فاضي لج اربع وعشرين ساعه..؟
بدريه: انا في بوظبي يالله تعال بيت عمك..
حمد: والله!!!!
بدريه: والله تعال..انا في البيت بروحي ويا حصه وسمر بس..
حمد: وخير يعني..اذا انتوا بروحكم شو اسوي يعني؟
بدريه تضحك: ولا شي..بس تعال بنتعشى ويا بعض...
حمد: فاضيه انتي والله..عندي مشاغل ثانيه غيرج...
بدريه: ايه اكيد مواعد لك وحده وعازمتنك على العشا...
حمد: لا طال عمرج مب نحن نمد ايدينا على بيزات البنات..الغاليه نحن نأكلهن ونأكل اهلهن ...
بدريه: ارجوك يا حفيد بيل جيتس..
حمد: ما اعرفه بس سلمي عليه..
بدريه: هاه شو قلت..
حمد: بسبح وبيي اسلم عليج وعلى البنات..بس لا تقولين للي عندج..
بدريه مبتسمه: اوكي حبيبي...
وبندت عنه بدريه وسار يسبح ولبس وطلع على طول...وسار بيت عمه...
.
.
في بيت بو خليفه كانت حصه وبدريه وساره يسولفن ويتذكرن ويستهبلن ويتهن حمده اللي عرفت ان عمتها بدريه يت هي وسلمى..ونزلت سلمى وسمر عندهن واحلوت القعده ضحك وسوالف..وما خبرت بدريه حد ان حمد ياي..وشوي وتيي عفرا لابسه مخور عنابي كان يجنن عليها ومكحله عيونها..وكانت صدق مختلفه ..بس اللي صدمها انها ما تعرف ان بدريه موجوده...اول ما شافتها ابتسمت من قلبها وحست قلبها يدق بسرعه..
ونشت لها بدريه ولوت عليها...
بدريه: فديت روحج غناتي شو هالحلى كله..ما حيدني احلويت يوم قربت امتحانات الثانويه العامه..الا انخسفت خسفه...
عفرا مبتسمه ببراءه ابتسامه نادراً ما يحصل لهم الشرف يشوفونها: الحلوه عيونج عمتي...
ويلست وياها وحصه مبطله عيونها على الاخير..وساره تطالع عفرا مبتسمه..وحمده تسولف ويا سلمى مب مهتمه...
عفرا: عمتي ولهت عليج...
بدريه: تولهت عليج العافيه..
حصه: عفاري فيج شي..؟
بدريه: حصوه ما تعرفين تسكتين؟
طنشت عفرا عمتها...ونشت المطبخ التحضيري وردت..يايبه وياها كيك وعصير لكل الموجودين..اللي بالنسبه لهم ما تغير شي في اليلسه لانهم متأكدين ان عفرا مستحيل ترمس مع أي حد فيهم..ولو انها يلست حذال بدريه..وتسولف لها...
بدريه:بقى اسبوعين..شدي حيلج ابى اشوف اعلى نسبه في العايله كلها..
عفرا وابتسامتها ما فارقت ويهها: انتي عمتي كم يبتي؟
بدريه: نسبتي مب شي..يالله شدي حيلج انتي اول حفيده بتتخرج من العايله...وعشان ما تم في خاطرج انا كنت يايبه 81%..مب شي..
عفرا: وما كملتي عشان تعرسين صح؟
بدريه: كنت احب عمج وماريد اضيع وقت اكثر وخفت يمل ويعرس ترا اول يتحرون الحرمه تنشغل بالدراسه اكثر عن الريل..
عفرا: ما فكرتي تكملين؟
بدريه: يحاول معاي عبادي بس ما رضيت..ما احب التزم بشي..ابا اعيش حياتي بدون قيود..
عفرا مبتسمه: بالعكس الكتب مب قيود...الكتب متعه ومتعه كبيره بعد..هي اكبر حريه في العالم..مستحيل حد يضايقج منها او تزعلين منه..ومتى ما تبينها سيري لها بدون عتب ولوم..
بدريه: بالعكس الناس هم الحياه والحياه هي الناس..نحن في العالم ما لنا غنى عن بعض..والكتب لها فايده وتونس صح بس ما تغني عن البشر..انتي ممكن تستغنين عن صديقه عشان كتاب؟؟
عفرا وهي منتبهه انها مرت عليها 12 سنه في المدرسه وبرا المدرسه وهي بدون صديقه مقربه منها..كانت تحس انها مب في حاجه للصديقات..وان مافي أي انسانه ممكن تفهمها وتتقبل عقليتها..
بدريه: شو قلتي؟
عفرا: ما اعرف.
وتمت بدريه تسولف وياها وعقب قربت اكثر من الحريم وسولفوا ويا بعض طبعا عدا عفرا اللي ساكته وما ترمس الا اذا حد رمسها...بس الاكيد من رمسة بدريه انها ناويه تقضي على احساس عفرا بالوحده قد ما تقدر...صح يبا لها وقت بس هي قد التحدي...وهي لها...
.
.
مرت نص ساعه ودق الجرس..وطلعت له جينا ودخل سيارته ونزل..وشاف بدريه يايه من بعيد.رحبت به ووايهته...
بدريه: فديت روحك يا ربي..
حمد: وين الشعب.؟
بدريه: كلنا داخل تعال...
حمد: كلكن حريم صح؟
بدريه: هيه..مافي ولا ريال الا انت...
حمد: يالله سرنا..
وقبل يدش الصاله دخلت بدريه..
بدريه: حمد اخويه بيدخل يسلم..عدلن شيلكن..
وتحجبن كلهن..وحمده سارت فوق على طول لانها ما كانت لابسه وقايتها...ودخل حمد..وحصه حست بعمرها اخف عن الريشه..وقلبها يتنافض بسرعه...ومب رايمه انها تخفي ابتسامتها رغم كل المكابره الي في عيون حمد...سلم عليهن كلهن...
وهو اول ما يت عينها في عينه..ابتسم من قلبه..ما قدر انه ما يبتسم..وما عرف شو اللي خلاه يبتسم..ويلس قريب منها شوي..على الكنبه اللي مجابلتنها...
حصه تحس قلبها يدق ويدق ويدق..مب رايمه تتحكم في انفاسها..تحس انها تبا تضحك بصوت عالي..وتحس انها بعد تبا تصيح..يلست سمر عدالها..
وساره طلعت..وبقت عفرا وسلمى وبدريه وحصه...
حمد: لو ادري ان هالذيبه هني ما ييت..
سلمى: مالي بارض ارد عليك..خلك بعيد عني...
حمد: اووه في تطور هاديه اليوم...
وبدريه تأشر له من بعيد يسكت انها ضايجه ومب وقته يتحرش فيها...
ونشت سلمى فوق وخلتهم..بس حمد انتبه على عفرا وبهره جمالها وسكونها..انبهر اكثر من نظرة الغموض في عيونها...وهي اول ما حست انه يطالع فيها..عطته نظره حاده غريبه..وحس بقشعريره في جسمه لاول مره من نظرة بنيه...
تنهدت عفرا وانتبهت حصه انه يطالعها...ونشت ..
بدريه: عفاري على وين؟
عفرا: بسير البيت ادرس..
حمد: بل عليج ويك اند ذابحه عمرج ليش..
حصه وبعدما انتهى الصمت بالنسبه لها:هي دوم جي ما تفج الكتاب..
حمد في خاطره"اخيرا قررتي تتكلمين"
سمر: حمد انت ليش ما تيي عندنا دوم..؟
حمد بإستخفاف: مره ثانيه ان شاء الله...
سمر: متى يعني؟
حمد: يوم اعرس كل يوم بيي عندكم...
سمر: الله بتعيش ويانا..
حمد: هيه تراكم لاقطيني من الشارع ايي اعيش عندكم...
بدريه: حمودي بس عاد ياهل هاي شو تحط راسك براسها...
كانت سمر متسنده بإيديها على ريول حصه اللي مول ما حست بها...حصه كانت ضايعه في عالم ثاني وسمر ماخذه راحتها..حتى حصه ما علقت على سمر انها تسولف ويا حمد..بالعكس استانست على الاقل بيرمس بيسولف..احسن من نظرة الاحتقار والصمت القاتل...
حمد: حصه ليش ساكته..
حصه مب قادره تركب جمله وحده على بعضها: انتوا ترمسون..
حمد كان يدري بكل اللي في قلبها..وابتسم: زين سولفي ويانا...
حصه مستحيه: زين ..
بدريه ابتسمت وعيبها الوضع...وسمر ببلاده علقت على حصه..
سمر: ونها اختي مؤدبه شياج اليوم..
حصه انتبهت ان اللي ترمس سمر بس ما ردت عليها..لازم ما تشل قناع الادب لين ما يطلع حمد...
تم وياهم حمد شوي وطلع ووصلته بدريه لين سيارته..وردت الفله..
بدريه: حصوه اباج عقب شوي تعالي يوم تصلين العشا...
حصه ما ردت..
سمر: اختي انتي فيج شي..
حصه منتبهه ان حمد راح وسمر متسنده عليها..وبعدتها عنها...
حصه: ذلفي من ويهي شو متسدحه علي قالولج شبريه ولا شبريه..
سمر: لا الشبريه الثانيه...
حصه: سمر اسكتي..
ابتسمت حصه بهدوء كانت الليله تعني لها الكثير..يمكن تكون نقله ويمكن تكون فتره وتزول..ويمكن تكون سحابة صيف تروح وما ترد...
بس الاكيد انها مهما قصرت يتم لها طابعها الخاص في قلب حصه...