مشيت مع بسمة للصبيطار و دخلنا للبيت الي فيه سي عثمان، لقينا ادم جالس حداه، فين جينا ادم وقف و قالي: جلس حداه هنا
انا جلست حداه: سي عثمان على سلامتك
عثمان: الله يسلمك ابنتي، شكرا بزاف على وقفتك معايا، انا صراحة حشمان منك، سمحيلي
انا: ماشي مشكل المسامح كريم
عثمان: انا مستحيل نلقا احسن منك لولدي، نتي بنت الناس، ظريفة و قلبك حنين، انا للأسف كنت أعمى فين مشفت هدشي، انا انشاءالله فين غدي نتعافى غدي نجو نخطبوك من عند عائلتك، و قولها ليهم
انا: وخا انشاءالله
جلست معاهم شوية، سلمت عليهم و خرجت و تبعني ادم: حفصة؟!
انا درت عندو: ادم
ادم قرب عندي: نتي أقسى بنت شفتها فحياتي، لهاد الدرجة انا مكنعني ليك والو؟
انا: اهئ اهئ سمحلي بزاف و لكن درت كرامتي فوق كلشي
ادم: علاش ما جيتي و عاودت ليا كلشي؟
انا: ما بغيتكش تحقد على باك، حتى أنا كنت عايشة فعذاب اادم
ادم شد وجهي: حتى انا مت شحال من خطرة، انا اصلا كنت عارف بلي بابا غيكون سمعك الهدرة، ولكن فين شفتك نتي ما متمسكاش بعلاقتنا، حتى انا ما بقيتش قاومت
انا: اهئ اهئ و دبا شنو؟
ادم: و دبا مغديش نفترق معك، وخا نتي تخليتي عليا
انا: و لكن انا كنت مجبورة
ادم: صافي نساي هاد الموضوع، خلينا نبداو صفحة جديدة
انا: اوك
وصلني ادم للدار و الطريق كلها و حنا كنهدرو بحال إلا سنين معمرنا تلاقينا، سلمت عليه و طلعت، حسيت بلي روحي رجعت ليا، عاودت لعائلتي كلشي و هوما فرحو ليا بزاف، بدات الواليدة بالتوجاد من دبا؛ وخا قلت ليها شحال من مرة مزال الحال، والو الي فراسها ديرو
دازت أربع أيام و سي عثمان خرج من الصبيطار مشيت انا و با و مي طلينا عليه، تعرفو على بعضياتهم و حددو السيمانة الجاية الخطبة، فهاد الفترة مي مخلاتنيش نخرج مع ادم، قالت لك عيب، اصلا عندها الحق، اليوم الخطبة ديالي، مشينا للحمام انا و البنات، من بعد مشينا لعند مريم قادت ليا شعري و المكياج، لبست واحد القفطان فالبيج سلفاتو ليا، لبستو و جلست كنتسنا فالبيت، جا ادم هو و باه و بسمة و معاهم دادا كوثر، جايبين الورد و الكادوات، خرجت عندهم سلمت عليهم و آدم غير ساهي فيا؛ معلوم راه جيت كنحمق، جلست حدا مي، بقاو كيهدرو، شوية هو يقوليهم سي عثمان: حنا اليوم جايين طالبين من عندكم بنتكم حفصة؛ و حنا مغديش نلقاو احسن منكم
با: حتى حنا كيشرفنا نتسابو معك اسي عثمان، و انا قابل نعطي بنتي
المهم قراو الفاتحة و ركبنا الخواتم، و انا ما قاداني فرحة، حطينا العشا، تعشاو الرجال فجيهة و العيالات فجيهة، من بعد ما سالينا مشاو فحالهم إلا ادم الي طلب يشوفني، بدلت لباسي و خرجت عندو: اشنو بغيتي اسيدي؟
ادم: بغيت نشوف مراتي الحبيبة، توحشتها سيمانة ما شفتها
انا: مزال ما وليت مراتك
ادم: قريب تولي مراتي، انا اتافقت مع عمي نديرو العرس من بعد 20 يوم
انا: بهاد السرعة؟!!
ادم: اه و شنو كنتسناو، انا مكرهتش غدا نتزوجو، ولكن الغالب الله
انا: ههه وخا، هي خاصنا نوجدو راسنا بزربة
ادم: اه، بالمناسبة جيتي غزالة الليلة 😍
انا: هههه شكرا؛ يلاه تصبح على خير
ادم: تصبحي على خير يا روحي
دازت هديك 20 يوم غير فالتحضيرات، اتافقنا نديرو العرس فكازا، جات العائلة وخا ماشي بزاف، و الي ساكن فالمحمدية جا عندنا، تكفل بات ادم بالقاعة و الماكلة و دكشي، الواليد حتى هو عاون، انا هاد المدة عاطييها غير للماسكات انا و البنات و تعلمت ندير الشهيوات العصرية بحال الكراتان و الشلايظ و الليباط، يعني وليت مستعدة، اليوم مشيت للحمام انا و البنات؛ و مع انا عندي حساسية من الحنة مغديش نتحنا، جات النكافة قادتني كاملة، وصلت 5 جا الدفوع بعيساوة، و القاعة عمرات، طلع عندي ادم و لقاني لابسة قفطان ابيض باس جبهتي: جيتي غزالة امرأتي الحبيبة
انا دمعو عينيا و النكافة كتعاير: خسرتو عليا كلشي، ههه ادم هانتا بكيتيها اشجاب ما يسكتها
ادم: و شغدي ندير ليها، هي الي حساسة
مسحت دموعي و قاديت المكياج من جديد، شديت فايد ادم و هبطنا بالزغاريد و الصلاة على النبي
جلسنا فبلاصتنا و بداو المراسم، لبسنا الخواتم لبعضياتنا، المهم نشطو الناس و خديجة شطحت العرس كامل، قالت ليا فاطمة الزهراء فودني: العرس كامل و هي كتشطح، باينة فيها غايرة
انا: ههه الله يجيب ليها حتى هي ولد الناس
فاطمة الزهراء: و انا؟
انا: ههه حتى نتي، لبست كاع الباسي السبعة و الأخيرة هي غوب طويلة و ساترة، طبعا هذا اقتراح بسمة، أما حنا هدشي مكنعرفوه، قطعنا الطارطة، وكلني ادم و انا لطخت ليه وجهو بيها ههه
بقاو كيضحكو عليه و هو يقوليا: ما بغيتيش تخلي عليك التحراميات ديالك، و لكن ما عندك مشكل دبا تشوفي
انا: ههه راه غير ضحكت معاك
ايوا سالات الحفلة، و لاو الناس كيمشو، حتى حنا نضنا فحالنا، توادعت مع عائلتي بالدموع، صعيبة تفرق مع عائلتك الي عشت معاهم نص حياتك بحلوها و مرها و دبا غدي نولي مسؤولة حتى انا على دار و حياة جديدة، مشينا للأوطيل و دخلنا للسويت ديال العرسان، دوش ادم و دوشت انا من وراه لبست غوب دو نوي فالبيض و خرجت عندو: اووو فين كنت مخيبة هدشي كامل
انا حشمت اول مرة كنبان قدامو هكا، ناض جبد واحد البلاستيكة خرج منها لباس للصلاة ديال العيالات، لبسي هادي و يلاه نصلو بجوج، صلينا قرينا الدعاء و بدينا بالليبيتيز، بلاما نقولكم شنو وقع ههه
الغد ليه فقت على شي حاجة كتلعب فوجهي، نضت مخلوعة: شنو هدشي؟!!
ادم: ههه كيفاش شنو هدشي؟ وردة
انا: ههه سمحلي كيسحابني شي حنش ماشي على وجهي
ادم: ههه حنش واش يسحابلك فالعروبية، بغيت نفيقك بطريقة رومانسية ندمتينا
انا: وراه جاتني ناعمة بزاف بحال جلد الحنش
ادم: علاش عمرك قصتي جلد الحنش؟
انا: اه ديك الساعة زحف عليا و كنت ناعسة، ناري طيرها مني
ادم: هههه نوضي تفطري
انا: صباح الخير بعدا
ادم: صباح الورد يا احلى وردة فحياتي
انا: انا كنحلم ياك؟
ادم: لا كلشي حقيقة، يلاه نوضي دوشي،
نضت دوشت لبست قميص مشطت شعري و خليتو مطلوق، جلسنا كنفطرو انا و آدم أو بالأحرى كنتغداو، و طبعا فجو الغزل و الرومانسية
دبا انا عايشة حياتي مع حبيبي و عمري ادم الي معيشني بحال الاميرة، انا دبا حاملة فشهري الثامن، من بعد زواج دام عامين غدي تولي عندنا ثمرة حبنا الي غدي يزيد يقوى بيها، دازو بزاف ديال الأحداث و تغيرو بزاف ديال الحوايج، أولها هو رقية الي ولدت بنت و سماتها فريدة على فريدة الي فسامحني، هه كتحماق على داك المسلسل، و خديجة الي كان هدر فيها ولد عبد المولى سيمحمد تزوجها و مشات معاه لفرنسا و دبا عايشين حياتهم، سكينة دبا كتقرا فالثامنة و با الحمدلله تحسنت حالتو و جاب الطاقة و جابت البلدية الماء لداك الدوار، دبا كلشي كاين الما و الضو، بناو دار كبيرة و زوينة صبغوها و قادوها و توسعت أرض با و جاب الخدامة هوما الي يحرثو و هو جلس يرتاح، ولات حالتهم الحمدلله بخير، و فالربيع كنمشو ندوزوه عندهم انا و آدم، ادم تابع الكتابة و نجحو ليه بزاف و لكن ماشي بحال نجاح ابنة الريف، و حادة مسكينة جابلها الله ولد الناس إلي تزوجها و هي عايشة معاه فالعروبية ، أما بسمة تخطبت و عرسهم قرب، يعني كلشي بخير و على خير؛ انا من بعد ما تزوجت دوزت باك حر و نجحت،دخلت سونتر ديال اللغات، تعلمت نهدر بالفرنسية و الإنجليزية، و دوزت البيرمي و شرالي ادم ميني كوبر، تعلمت البريستيج و وليت كنعرف لشحال من حاجة، علاقتي مع عمي مزيانة و كيقولي غير بنتي، و ديما مبرعاهم بالشهيوات، حتى ولا كيقول لدادا كوثر تعلمي منها
دبا نمشي نشوف ادم شكيدير، لقيتو جالس و شاد كتاب و كيقراه: أحيانا أشعر بالغيرة من الكتب الي تبعدك عني لدرجة أنني أحس برغبة في تمزيقها
ادم: ههه انت تغارين من الكتب التي تاخد جزءا بسيطا من وقتي، فماذا لو كانت امراة؟
انا: ساقتلها ثم اقتلك بعدها
ادم: كيف تقتلين رجلا ميت بعشقك
انا: ههه انا كنبغيك اعمري
ادم: حتى انا ادبدوبتي
انا تقلقت: ياك، وخا اسيدي، و هاد الدبدوبة خليها تمشي عند ختها و خليك نتا هنا بوحدك
ادم: لا لا حبيبة كلشي إلا فراقك
انا: ايوا سير جيب ليا لاكلاس راه ولدك بغاه
ادم: نجيب لك الي بغيتي نتي واياه، غير كونو على خاطركم
ايوا البنات كانت هدي هي قصة حفصة وولد المدينة ، الي كتعطي أمل لينا بلي حتى شي حاجة مستحيلة، و ما تعرفو حتى نتوما يكون زهركم بحالها و يجيب ليكم الله بحال ادم قولو امين، المهم ما تفقدوش الامل
💎💎💎 النهاية 💎💎💎
