بداو الناس كيجو، شي كيدور فالمعارض شي كيهدر، كلها و شكيدير و سي آدم واقف واحد البوست فيه الإعلان ديال كتابو و كيهدر مع شي ناس، انا بانت ليا بسمة كتهدر مع هبة، غير شفتهم و انا يدخلني الشك، أو هدي شكدير مع بسمة، القضية فيها إن، بقيت حتى انا كندور تماك و كنشوف، شوية هو يوقف حدايا واحد الراجل: سلام انا سميتي كمال و نتي؟
انا: مشرفين انا سميتي حفصة
كمال: سميتك زوينة بحالك
انا: ههه شكرا
كمال: ايوا عجباتك شي حاجة هنا
انا: كلشي زين، علاش نتا مشارك فالمعرض؟
كمال: لا حتى انا بحالك جيت غير نتفرج
انا: مزيان
كمال: قريتي كتاب ابنة الريف، كتاب صراحة رائع، راه هو الي متصدر القائمة الأولى فالكتب أكثر قراءة هنا، و هو الأهم فهاد المعرض، سمعت بلي الكاتب عندو خبر مهم للمتابعين ديالو
انا: اه قريتو، حتى انا دكشي الي سمعت
كمال: صراحة انا استمعت بالهدرة معك،ممكن تعطيني نمرتك باش نبقاو نتواصلو
انا: اه صراحة، قاطعنا ادم: سلام شنو واقع هنا
كمال: أهلا سي آدم، صفا؟
ادم: سمحلي و لكن معرفت نتا شكون
كمال: انا معجب كبير بأعمالك
ادم: اه مرحبا، حفصة بغيت نهدر معك
انا: لقيتني كنهدر مع مسيو كمال و مستمتعة بالهدرة معاه
كمال: حتى انا امدموزيل حفصة
ادم(كيهدر فودني) زيدي قدامي قبل لا ندير شي فضيحة هنا
انا: ههه وخا إلا كان هكاك يلاه
مشينا و خلينا كمال ما فاهم والو،
ادم: واش حماقيتي، لاش باغا توصلي بهاد الحركات
انا: ماشي شغلك فيا
ادم: خلينا دبا ساكتين و جلسي هنا حتى من بعد و نهدرو
بقيت جالسة حداه و الي جا كيعطيه التوقيع و يهدر معاه،انا جاني الملل نضت و مشيت عند بسمة، بقيت انا و إياها نهدرو و سولتها على هبة، و هي تقولي: هديك كيما قلت ليك غير لصقة
انا: اممم ممكن نعرف ادم شنو باغي مني
بسمة: بغاك تبقاي معاه و تكوني فجنبو
انا: صافي؟
بسمة: صافي، قاطعنا صوت ادم الي كيهدر فالميكروفون: مساء النور أعزائي الحضور، أنا كنشكركم بزاف على حضوركم الكريم و على دعمكم ليا، كيما كنت قلت ليكم عندي ليكم خبر مهم جدا، شحال من معجب سولني على كتابي ابنة الريف، واش القصة حقيقية، وشكون هاد البطلة الي خطفت قلبك، و إلى اخره، انا غدي نجاوبكم على أسئلتكم، اه القصة حقيقية و كلشي فيها حقيقي، حتى الأحداث و الشخصيات و لكن انا بدلت غير الاسامي، و البطلة فعلا خطفت قلبي دون سابق إنذار و انا ممتن لوجودها فحياتي، و هاد البطلة حاضرة معانا هنا و انا كنطلب حضورها، حفصة حياتي ممكن تفضلي توقفي حدايا
بسمة: سيري عندو احفصة
انا ترددت و بقيت واقفة فبلاصتي
بسمة: حفصة شكتسناي سيري، انا بقيت واقفة و خايفة نمشي، و كلشي كيقلب بعينيه عليا، اكيد جاهم الفضول باش يشوفوني، و لكن انا خايفة بزاف
بسمة: حفصة يلاه، تيقي فيا عفاك سيري
انا قلت الي ليها ليها و مشيت عندو، و شي بقا كيشوف فيا و شي كيصور، ناري القضية فيها التصاور، وقفت حداه شاف فيا و على وجهو ابتسامة، شد ايدي و بقا كلشي كيصفق،و هي تقول واحد البنت: سي آدم، حبيبتك زوينة بزاف
ادم: شكرا 😊
واحد الراجل: سي آدم واش غدي تتزوجو؟ و لا ديجا مزوجين؟
ادم(جبد بواط من جيبو) حفصة حياتي واش تقبلي تتزوجي بيا
انا بدون تردد: اه موافقة
ناض كلشي كيصفق و يصفر و انا دموعي كيخرجو بوحدهم و آدم كيمسحهم ليا، سلمو علينا كلشي الي تماك و باركو لينا و هبة بغات تنفجر، مقدرتش تتحمل و خرجت، مشينا انا و آدم لواحد البلاصة بعيدة شوية و بقينا كنهدرو
ادم: ههه توقعت غدي ترفضي
انا: وعلاش غدي نرفض؟
ادم: حيت إلي شاف تعاملك معايا قبيلة يقول بلي مكتحملينيش
انا: ههه و نتا الي فقصتيني
ادم: انا من شحال هدي مقرر نطلب منك الزواج و لكن قلت حتى نكمل من قصة المعرض، و لكن فين هدرنا انا و إياك داك النهار و نتي تقلقتي، جاتني هاد الفكرة
انا: و علاش ما بقيتش هدرت معايا و لا سولت عليا
ادم: انا قلت خليني نفقصك شوية، و كنت خايف نقولك المفاجأة و نصدق ما درت والو دكشي علاش تجنبت نهدر معك، و لكن فين كنت بعيد عليك ما كنتش مرتاح
انا: حتى انا كنت خايفة نخسرك و فنفس الوقت كنقول فيها خير، ربما ما مكتابش لينا نكونو مع بعضياتنا و لكن هدرة هبة شوشاتني بزاف
ادم: كيفاش هدرة هبة؟
عاودت ليه كلشي، ادم: و نتي تيقتيها؟ واش لهاد الدرجة مكتيقيش فيا احفصة
انا: ماشي هكاك و لكن نتا تعاملتي معايا مؤخرا ببرودة و فين عرضت عليا بسمة فجأة للمعرض دخلني الشك
ادم: و هي زادت وسوسات ليك، واش متعلمتيش من داك النهار ما تيقيش فيها، هي بغات غير تذللك و نتي حالة فمك بحال البغلة، واش هداك الراس الي عندك فيه السيمة؟
انا: ياك اادم كتعاير فيا دبا، مشات الرومانسية و الكلام الحلو
ادم: ونتي الي فقصتيني، بعد المرات كنشك واش عندك عقل فداك الرأس
انا:(وقفت) انا غادية فحالي، خليك نتا هنا
ادم (شدني من دراعي) اجي فين غادية، صافي هنا سكت غير جلسي، ايوا دبا خاصني نهدر مع بابا باش نمشيو نخطبوك من عند عمي التهامي
انا: و دبا هدرت، اييه مرحبا بكم
ادم: و من بعد سيمانة نديرو العرس
انا: أو سيمانة، سيمانة قليلة بزاف
ادم: غير سيمانة الله يجعل البركة
انا: ايوا سير قول هاد الهدرة لحانا و شوف شنو غدي تقول
ادم: غدي تقول اربي اولدي ادم لما فكني من هاد الهبيلة
انا: ياك وخا 😡
ادم: ههه الله يخليلي الغضبان
الغد ليه سي عثمان يلاه جا من السفر، صونا عليه صاحبو سي محمد: الو عثمان، صفا؟
عثمان: أهلا محمد صفا الحمدلله و انت؟ العائلة بخير؟
محمد: كلشي بخير الحمدلله، عثمان فتح الفيسبوك و تويتر،.معرفتش هدشي الي غدي تشوف غدي يعجبك ولا لا
عثمان: شنو واقع؟
محمد: غير فتحهم و شوف
فتح عثمان فيسبوك و لقاه عامر غير بالاخبار ديال ادم و حفصة
عثمان: كوثر؟!!!!
كوثر جات كتجري: نعام اسي عثمان؟
عثمان: فين هو داك المسخوط، شي نهار غدي يجيبلي الجلطة
كوثر: الله يحفظك اسي عثمان ما تقولش هكاك، سي آدم خرج من شحال هادي
عثمان: أوف، صافي سيري نتي
شد عثمان التلفون و صونا لآدم
نرجعو عند ادم الي جالس مع حفصة و رقية فكافي يهدرو فموضوع الزواج
رقية: أووو الحمدلله فرحتوني بزاف
قاطعها تلفون ادم الي كيصوني
ادم: سمحولي واحد الدقيقة نجاوب
انا: وخا ماشي مشكل
ادم خرج من الكافي: الو بابا؟ لاباس؟
عثمان: ماشي لاباس و ما عمري نكون لاباس و نتا كتخربق من ورايا
ادم: بابا شنو واقع؟ شنو كنخربق، ما فهمتش
عثمان: بلاما تمثل عليا اادم، اجي دبا للدار بغيت نهدر معك، و ما تقوليش ما مساليش
ادم: بابا غير بشوية، فهمني شنو واقع
عثمان: هدرت معك اجي دبا و لا ما يعجبك حال
ادم: وخا غير تهدن هانا جاي
رجع ادم عند رقية و حفصة: سمحولي و لكن خاصني نمشي، يلاه نوصلكم
انا: ياك لاباس؟
ادم: لا غير شي خدمة مستعجلة
رقية: يلاه احفصة نوضي، وصلنا ادم للدار و هو مشا بحالو
ادم: دادا فين هو بابا؟
دادا كوثر: راهو فبيروه كيتسناك، ولدي شنو درتي حتى تعصب بحال هكا
ادم: انا براسي ما عارفش
مشا ادم عند باه للبيرو ديالو و لقاه عاطيه بالظهر و كيتفرج من الشرجم: بابا شنو كاين؟
عثمان دار عندو: جيتي اسي ادم، تبارك الله وليتي راجل و انا ما بقيتش معمر ليك العين
ادم: بابا شنو كتقول؟ واش درت شي حاجة خايبة
عثمان: لا حاشا نتا ما كدير والو، واش مكفاك الهواية السخيفة الي وليت معمر بيها وقتك، تنوض تطلب للزواج من وحدة ما معروف لا أصلها و لا فصلها و أمام الملأ، ما حشمتيش، ها نتا شوهتينا فمواقع التواصل، شنو غدي يقولو الناس على هاد.الفضيحة
ادم: بابا انا ما كيهمنيش كلام الناس، انا الي كيهمني هو أني كنبغي هاد البنت و مغديش نتخلى عليها
عثمان: ادم ولدي، هادي غير نزوة و غدي تسالي، هاد البنت مكتصلحش لينا، ماشي من مستوانا، عائلتها ما كنعرفوهاش و فوق هدشي كامل جاية من العروبية
ادم: بابا حنا ولينا فالقرن الواحد والعشرين و نتا مزال كتقول هاد الهدرة، انا مكيهمنيش هدشي، انا كنبغيها ما كنتفلاش و وجد رأسك باش نمشو نخطبوها السيمانة الجاية
عثمان صرفق ادم: ماشي نتا الي توريني شنو ندير، سمعت؟!! و هاد البنت نساها و لا غدي تندم
مشا و خلا ادم كيكسر فالاثاث و يغوت: مغديش نتخلى عليها و ما كيهمنيش تمشي معايا و لا لا !!!!!!!
