مي: حفصة نتي و فاطمة الزهراء اجيو ديو اللباس يتصبن
خدينا اللباس و وجدنا كلشي باش نمشو، شوية و هو يجي عندنا ادم هاز جوج تريكوات و جوج سراول ديال دجين: سمحولي ما بغيتش نعذبكم ولكن خالتي أصرت عليا نعطيكم اللباس
فاطمة الزهراء: مكاين مشكل، الي بغيتيها نديروها ليك 😄
انا: زيدي خلاص
مشينا للواد و جلسنا كنصبنو فهدوك اللباس، كملنا لباسنا و خلينا لباس ادم هو الاخر،
فاطمة الزهراء: خليني انا نصبنهم
انا: لا نتي مكتعرفيش بحالاش، و هادو ماشي دياولنا باش تخسريهم
فاطمة الزهراء: كيفاش زعمة؟ حتى انا كنعرف نصبن
انا: ولكن ماشي بحالي، انا كنخليهم يشعلو و ريحتهم زينة، نتي بحال إلا مزفرين
فاطمة الزهراء: و باز ليك، حيدي أريهم خليني انا نغسلهم
انا: لا انا الي غدي نغسلهم
بقيت كنجر فالتيشرت و هي تجر، حتى ضربنا قرعة جافيل، و تخوات على دجين ديال ادم: 😱 ناري الصكعة شدرتي؟!!
فاطمة الزهراء: نتي هيا الي كفحتيه
انا: انا يا الكدابة؟ و نتي شكنتي كديري
فاطمة الزهراء: نتي هي الي ضربتيه برجلك
انا: خليني دبا نشوف شغندير، و حسابك من بعد الكدابة
شديت هداك السروال و بقيت كنغسل فيه و نشلل و لكن فات الفوت، سروال خسر من جافيل
فاطمة الزهراء: ناري ختي خسرتي سروال الراجل
انا: انا؟ و حتا نتي معايا الالة، دبا نغسلو الاخرين و نشروهم، وهاد السروال نشوفو شنو نديرو ليه
فاطمة الزهراء: اوف مشكلة
رجعنا للدار من بعد ما نشفو الحوايج، و خبينا الدجين،عاد باش دخلنا، طوينا اللباس، شوية هي تجي عندنا مي: الا طويتو اللباس،دو لباس ادم ليه
ادم: خالتي؟!!
مي: نعام اولدي؟
ادم: هانا خارج واحد الشوية و نرجع
مي: بلاتي اولدي تاخد لباسك راه وجد
ناري مشينا فيها، بقينا انا و فاطمة الزهراء نشوفو فبعضياتنا، وهي تهدر مي: حفصة جيبي لباس خوك
انا: اه وخا
جبت ليه اللباس و هو يبان ليه دجين مكاينش: فين هو الدجين الاخر؟
انا: مكاينش
مي: كيفاش مكاينش؟ فين هو السروال؟
انا: صراحة كلاتو المعزة
مي و ادم: كيفاش؟!!
انا: فين صبانه و نشرناه، جلسنا كنطرفو دكشي و هي تأكلو واحد المعزة و مشفناهاش
ادم: المعزة متقدرش تأكل الدجين، هدشي الي كتقولي ماشي منطقي
انا: وعلاش؟ الماعز كياكل كلشي
ادم: ميمكنش، وخا تكون هاد المعزة قرجوطتها ماكينة، راه الدجين هداك ماشي القماش
مي: دويو اهدوك الحمارات شنو درتو لسروال الدجين
فاطمة الزهراء: اهئ اهئ سي آدم، ختي حفصة مقصدتش تكب عليه جافيل عفاك سامحها وحتى نتي امي مضربيهاش
انا: ناري على كدابة و باز لوجهك شحال قاصح
مي: اييه كبيتي جافيل عليه المسخوطة؟!!!
ادم(معصب) فين هو السروال؟
انا: هانا نجيبو دبا 😦
غير جبتو ليهم و بدأت مي تغوت و آدم تعصب ديال بصح، شدو من ايدي و مشا كيجري
مي: هانتي قلقتيه عاود رتحتي دبا؟ سيري تبعيه راضيه قبل ما يجي باك سيري
انا: وخا
مشيت تبعتو كنقلب نقلب حتى عييت، شوية هو يبان ليا جالس حدا الواد و كيرمي الحجر فالما، قربت عندو: سي آدم؟
ادم: سيري بحالك
انا: مغديش نمشي حتى تسمعني، انا مقصدتش، اصلا فاطمة الزهراء هي السباب
ادم(باستهزاء) ههه وحدة تسب فالاخرى و لكن انا متيق فاطمة الزهراء،حيت نتي هي مولات هاد الفعلة، اصلا من النهار الي جيت و نتي كتديري ليا الزبايل
انا: نتا كتظلمني دبا
ادم: خليني عليك، بعدي مني لا نصدق داير فيك حاجة نندم عليها من بعد
انا: واش لهاد الدرجة، غير على سروال كيسوا جوج فرنك
ادم(بالغوات) هداك ماشي سروال يسوا جوج فرنك، هداك أغلى حاجة كنملكها و ما عمرو غدي يرجع وهدشي كامل بسبابك
انا: سي آدم واش كتبكي؟ لهاد الدرجة السروال غالي، راه غدي تلقاه فالسوق
ادم خنزر فيا: فين كتفهمي فين؟ فوتيني عليك هاد الساعة الله يرحم باك
انا: واش عطاه ليك شي واحد؟
ادم الصمت
انا: اه يلاه فهمت، واقيلة عطاه ليك شي واحد و بقا عندك ذكرى
ادم: اه و دبا بسبابك مشا، شكرا بزاف
انا: والله إيلا غير حادث، شغدي نستفاد إلا خسرتو ليك، شكون الي عطاه ليك؟ حيت إلي عطاه ليك غدي يجيب واحد بحالو
ادم: هداك الشخص الي عطاه ليا مكاينش
انا: مسافر؟ 😕
ادم: أوف عطيني بالتساع
انا: وخا نخليك تبرد، المهم سمحلي بزاف
مشيت و خليتو جالس تماك و ساهي، رجعت للدار و هي تلاقا ليا مي: مندرى؟ فين ادم؟ واش سامحك
انا: معرفتش،مهدرش معايا، المهم انا طلبت منو السماحة
مي: شفت فعايلك فين وصلونا، مشكلة صافي
انا: 😔 انا غدي ندخل للبيت و ما بغيتش شي حد يصدعني
مي: شنو؟ هايهاي، مزيان تبارك الله، سيري شطبي الزريبة ديال البهايم، خليني من التبوحيط، ونتي دايرة زبلة قد راسك.
انا: انا راه مريضة نفسيا و معنويا امي
مي(هزات الصندالة) سيري لا نشير عليك بهادي حتى تسخفي
انا: أوف، مشيت على سعدي و وعدي لديك الزريبة و انا بالي مشطون مع ادم، قبيلة كيبان كاعي بزاف لدرجة انو بكا، أو لهاد الدرجة عزيز عليه داك السروال
كملت جميع الزريبة، غسلت ايدي قاديت حالتي و دخلت للدار، لقيتهم معمرين اتاي و كياكلو كاوكاو، جلست حتا انا معاهم يلاه بغيت نشد شوية ديال الكاكاو و هي ضربني مي لايدي: جمعي ايدك، والله يا متاكليه
انا: وعلاش؟ شنو درت
مي: عقوبة، نوضي طيبي العشا
انا: والبنات؟ غدي يبقاو جالسين
مي: اه بغيتهم يجلسو حدايا، عندك شي مانع؟ يلاه نوضي تكعدي
انا: والله إلا حرام هدشي الي كديرو ليا
مي: يحرم عيشتك الباسلة
طيبت العشا و جا با جايب معاه ادم
مشات عندهم مي: سي آدم؟ كنت مع التهامي
با: اه جا عندي قبيلة
مي: ولدي نتا بيخير؟
ادم: بخير شكرا 😒
با: علاش شنو واقع؟
ادم: والو غير خالتي كتسول فيا مسكينة
مي: اه اه، انا نمشي نسخن ليكم الما
جات عندي مي و لقاتني كنعمر اتاي: نوضي سخني الما لباك
انا: وخا، سخنت الما و ديتو للواليد و رجعت حطيت اتاي ، سالا با الدوش و حطينا العشا، أنا منعت عليا مي نأكل معاهم و عزلتلي بوحدي كي الكلبة، قالك عقوبة، سالاو العشا و غسلت انا الماعن بوحدي، و فرشت ليهم كاملين فين ينعسو، حتى خواتي، يعني تمرمدت، نعس كلشي وانا حلف النعاس ما يجيني، خرجت نشم شوية ديال الهوا حيت حاسة براسي غدي نتخنق
خرجت وهو يبان ليا ادم جالس بوحدو و ساهي، تشعجت و جلست حداه بغيت نعرف مالو
