الغد ليه النوبة فخديجة توجد الفطور، فطرنا و نضنا لاشغالنا كيما العادة، كملت انا و خديت الكتاب نقرأ واحد الشوية و هي تعيط عليا رقية: حفصة، حفصة اجي
انا: أوف شنو بغيتو تاني
رقية: اربي لما اجي تسقي لينا
انا: واش كاينة غير انا؟
رقية: اه غير نتي الي خفيفة، أما خديجة و فاطمة الزهراء كيتعطلو بزاف، وانا بغيت الما دبا
انا: أوف واخا، أري
هزيت الجراري و ديت الحمار للبير، و انا نتلاقى بحادة عندو: حادة؟ حتا نتي جيتي تسقي؟
حادة: اه ايوا بعدا مزيان، نمشو فبلاصة، كيدايرين بعدا كلشي بيخير؟
انا: الحمدلله و نتي؟
حادة: لابأس
سقينا الما و شدينا الطريق، بقينا غاديين شوية و هو يبان لينا دري اناري هذا فين كان، أول مرة نشوف بحال هاد الأشكال
حادة: أي اميمتي واش انا كنحلم، كتشوفيه احفصة بحالي
انا غير كنشوف فهاد الجمال الي عمري شفتو فحياتي
حادة (كتهز فيا): اويلي احفصة الرجوع لله
انا: اه شنو قلتي؟
حادة: ناري شديني غادي نسخف الصكعة
انا: مشتي انا،واش هدا ملاك نازل من السما
حادة: اييه ناري جاي عندنا ناري😱
انا: ويلي اختي والله إيلا جاي عندنا، سكتي لا يسمعنا
حادة: تي راه انا طلعت معايا السخانة ما بقيتش حاسة برجليا، غدي يفشلو عليا
انا: ثبتي اختي راه السيد قرب، ما تعيقيش
ادم: اه سلام، ختي بغيت نسولك
حادة: ناري كيشوف فيك
انا نغزت حادة: ههه ما تديش عليها، معمرها مسكينة شافت الرجال، و جاتها فشكل
ادم: هه ماشي مشكل
انا: اه اشحب الخاطر أسيدي
ادم: انا كنت بغيت نسولك، واش كاين شي بلاصة فين نجلس هنا، أوطيل مثلا
انا: اييه اشمن أوطيل بغيتي، ديال 5 نجوم و لا 3 نجوم
ادم: هههه دمك خفيف، كنهدر معك بصح
انا: شوف اخويا، هانتا متع عويناتك، كاينين غير ديور ديال الطين و الحقول
ادم: أوف مشكلة، اوك سمحولي البنات، تهلاو
انا: اجي بعدا نتا من منين جاي
ادم: ماشي مهم، غير رجعو لشغلكم
مشا و خلانا
انا(كنعيبو) ماشي مهم تفو على مغرور، يصحابليه رأسو معرفتش شنو
حادة: ناري اختي، هاد الزين غدي يجلس عندنا فالدوار،اه قلبي الصغير لا يتحمل
انا: تي تبتي اصاحبتي، السيد عاجبو راسو و حتى الشوفة مكيشوفش فيك
حادة: ولكن صوتو زوين و حنين، و عينيه يهبلو😍 هاد الأشكال راه معمرنا شفناهم
تفو الله يخليها سلعة الي عندنا ما فيهم ما يتشاف غير الشوفة فيهم تجيب ليك التقيا و دافعين كبير
انا: حتى هدا حاس براسو، وانا عدويا الراجل الي عاجبو راسو
حادة: ههه زيدي وكان
رجعت للدار و هي تلقا ليا رقية: وتي صدقت أكثر منهم، فين تعطلتي
انا: وراه غير مع الطريق و صافي، المهم الما جاك، مالك زربانة؟
خديجة: ههه علاش مفراسك؟
انا: لا ما فراسي ما يتعاود
خديجة: السي إبراهيم جاي العشية
انا: اه قولي هكاك، هه و السيدة جالسة كتوجد رأسها على قبلو
رقية: مكتمركوش ابنات الهم، انا كاع ممسوقة ليه يجي و لا يقعد، انا بغيت ندوش حيت من شحال هدي ما دوشت
انا: اربي اختي لما خليني حتى انا ندوش معاك
رقية: اويلي شوية ديال الما حدو يقدني انا
انا: و باز ليك راه سقيت عرام، وزيدون انا راه دودت اختي 15 يوم ما قاسني الما حشومة عليك
خديجة: تي خلي البنت تدوش معاك متكونيش مسمومة
رقية: اهياتا انا راه ختكم أكبر منكم هدرو معايا باحترام، و نتي يلاه وجدي الكيس و دكشي و انا نسخن الما
انا: وخا ازينة البنات
وجدنا الدوش ديالنا و دخلنا يفرك يما تفرك حتى طاب لحمنا، شللنا و لبسنا لباسنا و انا جلست كنطرف فالدوش، قالت لك حقا ما حقا هي أكبر مني
من بعد خرجنا و جلسنا كنتغداو، هاد المرة خديجة هي الي دات الغدا لعند با، حقاش انا كنت كندوش، جمعت الماعن و غسلتهم، وهزيت كتابي و خرجت حدا الدار نقرا، هنا الجو زوين و الطبيعة خلابة كتجيك النفس تقرا، ايوا بقيت ساهية كنقرا شوية هي تنقز عليا حادة: السلام عليكم
انا: بسم الله الرحمن الرحيم،خلعتيني الهيشة
اويلي شهاد الحالة الي دايرة فراسك
لقيتها ماشطة شعرها و ضافراه و دايرة وردة فالجنب: هه كيجيتك، زوينة ياك؟
انا: هههه هايهاي، زوينة تبارك الله
حادة: خلي بعدا هداك البوكوص إلا شافني يوعجب بيا
انا (حابسة الضحكة) اييه والله إلا
حادة: اجي كعما سولناه على سميتو
انا: علاش حنا بغينا نتعرفو عليه، هو غير سول و زيدون شبغينا نديرو بسميتو
حادة: هدا باينة غتكون سميتو حاتم و لا ريان و لا امين واحد فهادو، حيت صحاب المدينة هكا كيسمو ماشي بحالنا الجيلالي و المعطي
انا: ههه و قدور، و كبور
حادة: هه ولا التهامي
انا: اهياتا حدك تما هديك راه سمية با 😠
حادة: ههه و غير ضحكت معاك، مزال كتقراي فالكتوبة مقتقنطيش من القراية
انا: لا حبيبة، القراية راه زينة و مفيدة
حادة: اممم ايوا نمشي انا عند ربيعة خليك نتي مع كتوبك المملين
انا: سيري الجاهلة سيريجلست واحد الشوية و دخلت للدار لقيت البنات كيتفرجو فالتلفزة: شنو بادي دبا
فاطمة الزهراء: مسلسل مغربي
جلست حتا انا نتفرج، شوية هي تجي عندنا الواليدة: نوضو واحدة فيكم تحلب الغنم راه جاو
انا: مي انا بعدا حلبتهم البارح
خديجة: انا حلبتهم اول البارح
رقية: انا يلاه دوشت، غدي نتوسخ و ريحتي تولي كلها عرصة
مي: ايوا بقات لالة فاطمة الزهراء شنو غدي تقول دبا
فاطمة الزهراء: انا مريضة
انا: تبارك الله باينة عليك
مي(هزات الصندالة) تنوض واحدة فيكم لا نوريها شغلها
فاطمة الزهراء : صافي هاني نضت
انا: نتي مغديش توجدي شي حاجة لخطيبك
رقية: هو إلا جا غدي يجلس عند مو ماشي عندنا حنا
خديجة: علاش مغديش يجي للعشا؟
رقية: لا، مجايش علاش غدي يجي؟
خديجة: شعرفني، شفتك كتوجدي صحابلي غدي يجي يتعشا عندنا
دوزنا هديك العشية غير فراجة حيت شغلنا سالا، جا الليل و هو يجي الواليد و معاه شخص متوقعتش غدي يجي معاه
