رحمه♡أوسم اهتمامه بيه موطبيعي وغيرته عليه موعاديه اووي فديته للحمش يخوفني بعصبيته بس احبه من يحاسبني ع لبسي ومن اشوفه لو اسمع صوته احس برجفه بجسمي وقلبي يطفر من مكانه ويروح يركض عليه اظوج اذا مر من يمي ومداهرني بكلمه احب مداهرته واحب اعانده حتى يلح ويايه ويطول الحجي بيناتنه شكد يعاينون عليه و يتغزلون بيه بس ولا هتميت الهم بس هو الي حتى ميكلف نفسه يكولي كلمه حلوه بعد الحفله طلعنه من القاعه سحبني من ايدي بقوه وصعدني بالسياره وياه مروان وامي وعمه ام بارق ورزلني لان ملبست العبايه من طلعت من القاعه ورزالته عسل ع قلبي وصلنه للعرسان للفندق ورجعنه للبيت وتمنيت اكمل سهرايه وياه هو ومروان والاولاد كرايبنه بس بعد كبرت ممنوع اسهر وياهم وهو مانعني اطلع للحديقه وبقيت الليل كوله اعاين عليهم من الشباك لحد محصلتلي رزاله معدله من ماما وجرة اذن حسيت اذني ماعت بيده ورجعت للفراش ابجي من الم اذني وبس اسمع صوت ضحكته اضحك ع ضحكه..وانتظر الصبح يطلع حتى اشوفه ..الصبح كعدت غسلت وبدلت ع السريع ولبست لبسه حرشه بيه حتى يكولي روحي غيريه ومقبلت اتريك انتظره يكعود وتريك وياه وتالي من كعد تريك هو والاولاد ونظربت بوري ومن شاف لبستي انعجب بيه ومكال غيريهه بس كلي لتطلعين بره اشرتله ع عيوني وكرصني من خدودي حيل ..شلون خدود خدودج مالت عظ تعالي اشاورج وره المغرب حظري نفسج اني ومروان نروح لجزيرة بغداد وناخذج ويانه ...والله صدووك ..اي ..ياالمغرب من الظهر احظر نفسي...بس خلي بالج لبستج اقتنع بيه يالا تلبسيهه ...لا والله البس لبسه تعجبك ..نشوف..والعصر ماما كالت يالا دنروح لبيت خالتج واني مقبلت اروح وياهم وظليت ابجي وخاله ام بارق تنظرلي بنظرة استهزاء وكل شويه تكول لماما لج عيني ام ايمن هاي بنتج شكد دلوعه لخاطر محمد هاي لو بنتي شعره انتفه اله اذا تدلعت و لج خاله انت كبرتي وين رايحه وياهم همه شباب وانت بنت ميصير ترحين وياهم عيب ...اني رايحه ويه اخويه ومتعوده اطلع وياه ومو عيب لساتني صغيره ...يا صغيره خاله الي بكدج هسه صارن امهات بيوت بس غير انت امج مدلعتج وع باله بعدج طفله كبري خاله كبري كافي مياعه ودلع ..واني احس بنار بقلبي بودي اظربه ظربه اكسر اسنانه.اوووف منج شكد مكروهه الله يساعده لدنيا عليج ..اووف الله يساعدني عليه حتجلطني وموت ناقصه عمر من وراهه ..ميهدكه مرض صخام ..كولشي ميصير بيه مداريه نفسه والبيت كوله يخاف منه بعد.شبيه تتمرض ومعليج بيه لترادديه وتالي من ترحين تاكله لراسي اختج لسان وترادد وممربيهه ومن هل حجي روحي لبيت خاله وهمه يمرون عليج اني اكولهم ..ورحت لبيت خاله وكاعده ع نار انتظر شوكت يمرون عليه وكل شويه اطلع للباب لحد ميأست منهم وظليت ابجي ومتعشيت ودعي ع ام بارق اكيد هيه مخلته لأوسم ياخذني وياهم وظايجه من بيت خالتي وكل شويه اتعارك ويه ماما وكوله انت السبب كتلج خن نبقى مقبلتي لجيتي ع بيت اختج
ونمت والدمعه بعيني ..الصبح كعدت ع صوت مروان ..ريري يالا كعودي دنروح .. اني زعلانه عليك رحتوا البارحه وتركتوني ونتظركم وظربتوني بوري ..دكومي غسلي وبدلي..وين نولي لبيتنه..لا مو لبيتنه ترحين ويانه اني اوسم لكليته..شنو لكليته لحظه ثواني وتلكيني بالباب وبسرعه غيرت ملابسي وسويت شعري ذيل حصان وشعري طويل وخليت ع شعري من فوك ماشات فراشه جان هستوه نازل موديلهن وطلعت وياه بدون ريوك ممصدكه حشوف اوسم ورحنه للكليه ونصدمت من شفت البنات شقه وظحك وياه وسوالف ويايه معقد ويحاسبني عالصغيره وع الكبيره وغرت من الطالبات تمنيت اني كبيره وطالبه وياه كليته حلوه والكروبات علاقتهم حلوه وظجت من كل شويه احد يكولي بعدج صغيره بعد كدامج مشوار طويل حتى توصلين للكليه وستلم نتيجته اوسم ناجح صار مرحله رابعه...
