مخلت كلمه مكالته عليه واني متحملت رديت عليه وطلعت كل الظيم ظامته بقلبي عليه وع ظلمه الي وتحلفت بيه لو اني لوهيه بالبيت بس يجي بارق تحجيله وكلتله بقلبي طوز شتكوليله كوليله وعفته وصعدت لغرفتي وفرحت لان جاوبته ومسكتت وهمات انقهرت ع نفسي لان كالت لباهر مناقصني بعد اجمع العواكر كولهن بيتي شحصلنه من الجبيره حتى نجيب اخته خلت بعينه بس الخلفه نكرت كل حسناتي كل خدمتي الهم وطيبتي وتحملي مغثته لو غيري جان نهزمت منه بظهريه حمره ومسكتت وجان كالت لاهله ع ظيم كل هذه السنوات واني مشاكيه منه لاهلي ولايعرفون بالي اعيشه كوله لخاطر بارق لان احبه وخاف تكبر المشكله وتالي اتجبره يطلقني بس هسه لا متحمل بعد لان ظلمتني وظلمت اختي منو كال اختي حظه مثلي جائز ربي يرزقه بذريه احسن مني واني افكر وحجي ويه نفسي نمت ومصحيت الا ع عييطة بارق دنيييييا"""""!!!!!!!!😲😲😲😲فزيت مرعوبه ومحس الا انهال عليه بالظرب بالنطاق دمه جسمي وعييط وستنجد باحد يخلصني منه بس هو قافل الباب وعمو وباهر واوسم وسعدى بالباب يصيحون عليه وكسروا للباب ودخلوا خلصوني من اديه واني منتهيه من الظرب احس جسمي خدر مكدر حتى اكول اخ وطلعوه لبارق بره الغرفه واسمع عمتي تصيح عفيه عليك ابن بطني اخذت حق امك وعمو يكوله ارتاحيتي حرظتيه ع مرته والأولاد يحجون عليه وهيه صوته يلعلع عليهم وعليه وسعدى تغسل وجهي بالمي وتمسح الدم وتكولي الله عليج.لتكولين لاهلج ترى بارق يحبج بس هو عصبي وامي تعرفيه مراه كبيره وتريد تشوف جهالكم وهيه من تحجي من محبته بس متعرف تعبر عنه واني بداخلي اكول هذه ياحب
وبقيت يومين نايمه بالفراش مكدر اتحرك كل جسمي يأذيني وخجل اداوم لان وجهي مزورك ..وبارق ميحجي ويايه ولا كأنه ذاك الانسان الي يحبني ويكولي لو منج الطفل لو مريده وانت عمري وحياتي. فجئه حسيته انسان ثاني معرفه تغير عليه 180د .يمكن من ظغط امه عليه معرف من ظوجته لان يريد طفل ونزل غظبه بيه ..ااااوووف وبعد اسبوع رجعنه اتصالحنه وباهر يتوسل ببارق يقنع عمتي تخطبله داليا وهيه رافضه وتالي كالت اوافق بشرط بارق يتزوج ثانيه تتزوجون نفس الليله وطبعآ رفض بارق وباهرهذا الشرط لان بيه ظلم الي ..ونجبر باهر يخطب نجوى امه اختارته اله من كرايبه.. واني وبارق قررنه نغير الدكتوره ونروح لغيره وهمات نطتني امل هل شهر احمل وبيوم من الايام سوتلي مشكله عمتي شكبره واني صرت متحمل اسكوت لان تعبت ارادده كلمه بكلمه و مبيه صوج هذا امر الله وكلتله جائز ببارق السبب لويش تكولين انت عاكر وكاع بور وحرظت بارق عليه وبارق اعصابه تلفانه وهو اساسآ عصبي وينفعل بسرعه واني واكفه اغسل مواعين سحبني بارق من شعري وخلصني ظرب وكسر الكرسي خشب ع ظهري ومحسيت بنفسي الا واني بالمستشفى وعييط من الالم ونصدمت من كلتلي الدكتوره عندج اسقاط تؤم اثنينهم متكطعين ولازم نسويلج كورتاج ظليت ابجي وصرخ بصوت عالي مو بس من الالم الي ببطني لا من الالم الي بقلبي بعد كل هل تعب والانتظار تالي يتكطعون ببطني وحتى ملحكت افرح بكلمة انت حامل شكد جنت اتمنى اسمعه من اروح للمختبر واسمع يكولون لوحده انت حامل اكول همات يجي يوم يكولولي مبروك انت حامل ونطوني ابره مخدر ونمت وتالي فتحت عيني اعييط من الالم وبارق شكله حزين ومتألم وميخلي عينه بعيني
بارق:رجعت تعبان الدوام وقلبي خلصان استلمتني امي لو مرتك لو اني بالبيت خير شصاير كالت كذا...و...و...فورت دمي وخلتني اروح لدنيا وخلصه ظرب ومكتفيت سحبت الكرسي وكسرته ع ظهرهه واغمى عليه وعفته وطلعت افتر بسيارتي معرف وين اروح تالي رجعت بنص الليل للبيت كلي اوسم ع الصدمه دنيا صار عده اسقاط وابويه وقع ع اوراق العمليه طلعت مثل المخبل للمستشفى وشوف دنيا تعييط من الالم طلعت كعدت بحديقة المستشفى وخليت راسي بين رجليه وظليت ابجي وابويه وباهريهدون عليه ويوم ثاني طلعت دنيا للبيت بس مكدر احوط عيني بعينه شكوله اكوله اني قتلت حلمنه اني قتلت اطفالي بأديه اني ظلمتج انت تحملتي عصبيتي وتحملتي امي الي تبزع اكبر واحد.
دنيا: طلعت للبيت جمعت ملابسي وتصلت ع امي وجتلي امي ومروان اخذوني وبعد متحسنت حالتي النفسيه والصحيه حجيت لأهلي كولشي وكلتلهم بعد مريد ارجع خلي يطلكني ومقبل ابويه كال معدنه بنت تتطلك زوجج يحبج بس هو عصبي وامه تقره براسه فتحملي ومدام حملتي حتى لو راح هم بشرة خير ارتاحي كم يوم ورجعي وبارق ميتعوض وشنو ع بالج اذا طلكتي واكفلج بالباب خالد ابن الوليد ينتظرج تتطلكين حتى يتقدملج تحملي المراه الصالحه تتحمل زوجه مدام انت تحبيه وهو يحبج اصبر وان الله مع الصابرين ¥¥¥¥بارق:زعلت دنيا حقه من تزعل ومتريد ترجع وتريد تتطلك وبقيت ايام بكأبه ومكابل صوره وشم بملابسه واسمع اغنيةرائد جورج لاترحلين من بعدج يموت ورد الياسمين وتالي قررت اخذ ابويه وروحله بلكي تقبل ترجع ويايه
دنيا: اجووي عمو و بارق وحجه وياه ابويه وهدده بعد ميمد ايده عليه وكذا..
عتذر مني بارق كدام اهلي وعدني ميعيده ..ورجعت وستلمتني عمتي بوجه الميكصه السيف بسته براسه حتى مكالت الحمدلله ع السلامه ربي يعوضج عنهم جنه متمنيه ازعل واول موصلت استلمتني شغل بالبيت تحظير لزواج باهر وكل عاده لوحدي اعزل البيت من فوك ليجوه وصابغين البيت واثر الصبغ والهوسه كوله ع راسي وبداخلي اكول يمكن رجعوني حتى انظف البيت وتزوج باهر بنهاية شهر6بسنة2000 .
