ជម្រើសចុងក្រោយ/(The Last Person)

Ep15(កុហក)

រាងខ្ពស់ចុចលេខសម្ងាត់ហើយបើកទ្វារចូលទៅខាងក្នុង ប៉ុន្តែក្លិនអាហារបានសាយភាយចូលច្រមុះគេ ចិញ្ចើមស្អាតលើកឡើងលើ គេប្រញាប់ដោះស្បែកជើងហើយដើរទៅផ្ទះបាយចង់ដឹងថាអ្នកណាមកប្រើសប្រាស់ផ្ទះបាយរបស់គេដោយគ្មានការអនុញ្ញាត ។

" បងស្រី ? " គេភ្ញាក់ផ្អើលព្រោះបានឃើញវត្តមានរបស់ បូណា នៅទីនេះ វាមិនសមហេតុផលសោះដែលនាងមកចម្អិតម្ហូបនៅផ្ទះនេះ ព្រោះកាលពីពីរបីថ្ងៃមុន មុនពេលដែលពួកគេសម្រេចចិត្តបញ្ចប់ទំនាក់ទំនងគូរស្នេហ៍រយៈពេលខ្លី ជូយ៉ុន ទើបតែផ្ទុករបស់ក្នុងទូរទឹកកកក្នុងផ្ទះរបស់នាងជាច្រើន មិនថាជាសាច់ បន្លែ ឬគ្រឿងទេសផ្សេងៗឡើយ ។

" មកហើយ ? ឆាប់ទៅងូតទឹកទៅអាហារជិតឆ្អិនហើយ ថ្ងៃនេះបងបានធ្វើស៊ុបតៅហ៊ូនិងសាច់អាំងសម្រាប់ឯង " រាងតូចបិទភ្លើងចង្ក្រានហើយដើរមកដោះអាវក្រៅរងាររបស់ ជូយ៉ុន ចេញពីស្មាគេបណ្ដើរនិយាយបណ្ដើរ ។

" ... " ជូយ៉ុន គ្មានអ្វីតបព្រោះមិនដឹងថានាងធ្វើក្នុងគោលបំណងអ្វី គេសប្បាយចិត្តដែលទទួលបានការមើលថែពីនាង ប៉ុន្តែគេស្រាប់តែស្រពោនចិត្តវិញភ្លាមៗពេលគិតទៅដល់ ហ្យុនជុង ។

" ហេតុអីធ្វើមុខបែបនេះ ? " នាងសួរ

" បងគួរតែធ្វើជាសម្រាប់ ហ្យុនជុង គាត់ស័ក្តិសមនឹងទទួលបានវាជាងខ្ញុំ "

" ជុង គាត់យល់ច្រើនណាស់ គាត់ដឹងពីពួកយើងទាំងពីរហើយសន្យាថានឹងមិនគិតអវិជ្ជមានទៀតនោះទេ ‌ត្រឡប់មកវិញលើកនេះគាត់សន្យាថានឹងព្យាយាមយល់ពីបងជាងមុន "

" ល្អណាស់បើគាត់មិនបំផ្លាញ់ស្នេហារបស់បងទៀត ប៉ុន្តែដើម្បីធ្វើឲ្យល្អទាំងអស់គ្នាពួកយើងមិនគួរស្និតខ្លាំងដូចពីមុនទេ "

" ហេតុអី ? " នាងមិនពេញចិត្ត មិនចូលចិត្តសោះពេលគេធ្វើខ្លួនឆ្ងាយពីនាង ។

" គ្រប់យ៉ាងគឺដើម្បីបង ហ្យុនជុង គាត់ធ្វើគ្រប់យ៉ាងដើម្បីបង ខ្ញុំក៏មិនខុសពីគាត់ដែរ ជៀសវាងមាននរណាម្នាក់ត្រូវឈឺចាប់ពួកយើងត្រូវធ្វើបែបនេះ ប៉ុន្តែបើជៀសមិនផុតខ្ញុំសុំធ្វើជាម្នាក់នោះ...មនុស្សដែលឈឺចាប់ ឲ្យតែពួកបងបានក្ដីសុខ "