ជម្រើសចុងក្រោយ/(The Last Person)

Ep15(កុហក)

" កុំយកជំងឺនេះមកនិយាយលេងសើច ពួកគេគួរឲ្យអាណិតណាស់ឯងមិនដឹងថាពួកគេជួបប្រទះអ្វីខ្លះមកទេ " ជូហ៊ី ស្ដីឲ្យប្អូនដែលយកអាការៈអ្នកជំងឺរបស់នាងមកនិយាយលេង នាងជាអ្នកព្យាបាលនាងដឹងច្បាស់ថាអ្នកជំងឺរបស់នាងពិបាកយ៉ាងម៉េច មានតែនាងទេដែលយល់ពីទុកធុរៈរបស់ពួកគេ ក្នុងនាមជាគ្រូពេទ្យម្នាក់ កាលដែលមើលពីស្ថានភាពអ្នកជំងឺរបស់ខ្លួនឯងដុនដាបពីមួយថ្ងៃទៅមួយថ្ងៃគឺជារឿងបរាជ័យបំផុតរបស់គ្រូពេទ្យ ។

" សុំទោសលើកក្រោយឈប់និយាយហើយ " ហេជូ ឱនមុខចុះដឹងកំហុស ។ ឃើញបែបនេះអ្នកជាបងមិនដឹងយកទោសប្អូនយ៉ាងម៉េច ព្រោះដឹងថានាងគ្មានចេតនាអាក្រក់ ដូច្នេះហើយចង់ស្ដីក៏មិនដឹងថាស្ដីយ៉ាងម៉េចទៀត ។

" តស់ ! ទៅញ៉ាំបាយ " ជូហ៊ី

" ពិតមែនទេ ? អ្ហា៎...តស់បងស្រី..."

ប្រាវ...

ព្រោះសប្បាយចិត្តដែល ជូហ៊ី ព្រមទៅញ៉ាំបាយជាមួយ ហេជូ ហក់លោតដោយសប្បាយចិត្តរហូតជ្រុលដៃទៅប៉ះឯកសារអ្នកជំងឺលើតុធ្វើការរបស់ ជូហ៊ី ក្រវាសជ្រុះរាយប៉ាយពេញឥដ្ឋ ។

" សុំទោសបងស្រីសុំទោស " ហេជូ រហ័សឱនរើសឯកសារឲ្យ ជូហ៊ី វិញទាំងនិយាយសុំទោសញ៉ាប់មាត់ រហូតនាងបានប្រទះឃើញឯកសារមួយដុំដែលមានរូបរបស់ ជូយ៉ុន និងប្រវត្តិសុខភាពបច្ចុប្បន្នរបស់គេ ។

" សាន់ ជូយ៉ុន ? " ហេជូ អានឈ្មោះលើឯកសារទាំងជ្រួញចិញ្ចើម នេះគេជាអ្នកជំងឺរបស់បងស្រីនាងដែរមែនទេ ? ។

" មើលមិនបានទេ អ៊ីន ហេជូ ! វាជាប្រវត្តិសុខភាពអ្នកជំងឺបង វាជាការសម្ងាត់មើលមិនបាន " ជូហ៊ី ទាញឯកសារពីដៃប្អូនស្រីមកវិញ ពេលឃើញនាងបើកមើលឯកសារអ្នកជំងឺរបស់នាង ។

" គេនោះ...មែនហើយ សាន់ ជូយ៉ុន ! គេជាអ្នកជំងឺបង ? " នាងមិនដឹង មិនដឹងទេថាគេមានជំងឺមួយនេះ កាលពីលើកមុនពេលជូនគេទៅពេទ្យនាងគ្រាន់តែដឹងថាគេមានជំងឺបេះដូង និងសុខភាពខ្សោយ ធ្វើឲ្យសម្ពាធឈាមឡើងខ្ពស់ មិននឹកស្មានថាគេមានជំងឺថប់អារម្មណ៍ថែមទៀត តាមមើលក្នុងប្រវត្តិជំងឺមុននេះជាកម្រិតធ្ងន់ទៀតផង ។