تحزمت بحزام راشي

الجزء 55

شافت فيها تضحك ..وخا تقرصت مابينات والو ..

ياسمين: (تضحك) اه بزااف .. كون تشوفيني تنشبع معاه ضحك..

هند: اوا الله يدومهااا .. انا مشيت..

نزلت هند .. وياسمين شافت فيه وهو تيكمي وساكت..

ياسمين: اول مرة نعرفك ضحوكي .. كان تيسحاب ليا المشكيل فيك صدق فيا !!

نزلت خلاتو تيشوف في نفس وضعيته .. مخدااش كلامها بجذية..سالا ونزل عندهم هز فاطمة الزهراء تيلعب معاها .. ولوخرين مجمعين وهو ساكت..
وصل وقت العشا وتجمعو على طابلة الا هي لي مزلاتش..

محمد : فين ياسمين .. عيط ليها تعشا معانا..

إدريس تنهد وناض طلع عندها لقاها مكمشة في بلاصتها ناعسة ..رجع نزل عندهم ..

دريس: تضرها المعدة..

سليمة: ياكما مريضة ؟

محمد: اوا الا كاتت مريضة نشوفو مالها نديوها لطبيب..

دريس: وغير هي مكتعشاش ديما صافي كولو راه معندها والو..

مباركة: عاد كانت صحة سلام كالسة معانا .. قلت ليها رجعي تعشااي لعجب هدا..

دريس نفخو ليه راسه بدا ياكل ممسوقش قال يمكن نعست ...
بعد العشا طلع  الفوق ..سمعها تتقرقب في الكوزينة مشا طل عليها لقاها تتدهن شكلاط وسط الخبز..

دريس ط: منين فيك جوع علاش منزلتيش تتعشاي .. انا ݣلت نعستي ؟

هزات طرف ديال الخبز وشي ديسير وخرجات تتاكل برة ..فيها واحد القجة .. ومعصبة تتاكل في هداك الخبز بالاعصاب وحابسة البكية.. شافتو خرج وهي تزيد تتغدد باغية تموت..

ياسمين:  الله يعطيك شي موصيبة تفو .. من نهار تزوجت بيه وانا مفقوووصة..(هزات واحد التفاحة عضت منها)  مريض تفو..

شوية بان ليها داخل هاز واحد الكرطونة ديال بيتزا حطهالها..

ادريس: شدي

ياسمين: (شافت فيه ) و مالك تتنفخ .. تنسعا عليك..

دريس: فاش يكون فيك جوع هضري..

ياسمين: (قلبت وجها)  مخصنييش..

ادريس: (تنهد) دابا مالك ؟ قلتي مابغيتي نهضرو معاك خليناك فخاطرك ..  لبيت جريتي عليا منو نخوي ليك الدار ؟

ياسمين: (طرطقت عليه) على اساس ماشي ديما خاويها .. تتجي تنعس وتاكل وتخرج (مزيرة باغية تبكي وماباغاش تهضر ومقادراش تخليها في خاطرها) الناس تتقشب معاهم وضحك .. تتجيي لعندي كيولي فيك التوحد (نزلت راسها تتبكي) مالي انا حابسة عليك تقشاب وضحك ولا وجهي ماشي ديال ضحك .. ولاخسارة فيا...!؟

تنهد تيشوف فيها تتبكي من قلبها .. وتمسح في الدموع .. بصح كانت مضيومة .. وتتحس بالوحدة وبحال اللي كاينة فشي بلاصة غريبة عليها وماشي ديالها ...توحشت دارهم وحبابها حتى هداك صداع والضجيج  اللي كان تيضرها في الراس توحشاتو ..
ردت شعرها تتمسح دموعها وتشهق بكات حتى تنفخو عينيها..